Milli Məclisin noyabrın 21-də keçirilən plenar iclasında millət vəkili Siyavuş Novruzov, ailələrə ikinci uşaqdan sonra yardımların verilməsinin vacibliyini diqqətə çatdırıb.

Ailələrə uşaqlarla bağlı təminatın verilməsinin daha məqbul olduğunu söyləyən deputat vurğulayıb ki, ailədə 5 uşağın olması fonunda ona hansısa təminatın verilməsi kimi yanaşma doğru deyil:
“Təklif odur ki, iki uşaqdan sonra ailələrə bu təminatlar nəzərdə tutulsa, daha yaxşı olar”.
Hazırda uşaqlar üçün hansı təminatlar mövcuddur?
Bizim.Media-nın bu və digər suallarını cavablandıran Əmək və Əhalinin Sosial Müdafiəsi Nazirliyinin şöbə müdiri Fazil Talıbov, ilk növbədə, bu gün ölkədə sosial təminat sisteminin əhatə etdiyi kateqoriyalardan birinin də uşaqlar olduğunu diqqətə çatdırıb:
“Buna görə də “uşaqlarla bağlı hər bir sosial yardım və müavinətlərin ləğv edilməsi” barədə qeyd edilənlər doğru deyil. Belə ki, hazırda 18 yaşadək əlilliyi olan şəxslər (50 min uşaq), ailə başçısını itirmiş uşaqlar (160 mindən çox uşaq), aztəminatlı (ünvanlı sosial yardım alan) ailələrdəki uşaqlar (160 minədək uşaq), şəhid ailələrinin, müharibə ilə əlaqədar əlilliyi olanların, beşdən çox uşağı olan qadınların və müddətli hərbi xidmət qulluqçularının uşaqları (30 min uşaq) və s. aylıq sosial ödənişlə təmin olunur”.
Şöbə müdiri, 3 yaşadək uşaqlara qulluq edən işləyən valideynlərə də 40 minədək uşağa görə aylıq müavinət verildiyini əlavə edib. Onun sözlərinə görə, 18 yaşadək əlilliyi olan şəxslərə qulluq edənlərə aylıq təqaüd verilir:
“Bundan başqa, valideyn himayəsindən məhrum uşaqların qəyyumlarına (50 min şəxs) aylıq müavinət, habelə uşağın anadan olmasına görə birdəfəlik müavinət (illik 120 min uşaq üçün) ödənilir. Bir sözlə, uşaqlarla bağlı sosial ödənişlər, ümumilikdə, 600 mindən çox şəxsi əhatə edir və bu ödənişlər üçün illik 650 milyon manat xərclənir.
Həmin sosial ödənişlərin məbləğinin mütəmadi artırılması təmin olunur və son beş ildə icra olunan dörd sosial paket çərçivəsində bu sahədə ciddi artımlar edilib.
Məsələn, 18 yaşadək əlilliyi olan şəxslərlə bağlı ödənişlər beş il əvvəl yalnız 82 manat məbləğində sosial müavinətdən ibarət idisə, sonrakı islahatlar çərçivəsində onlarla bağlı aylıq sosial ödənişlərdə dəfələrlə artım edilib.
Bu gün artıq əlilliyi olan 18 yaşadək uşaqlardan orqanizmin funksiyalarının 81-100 faiz pozulmasına görə əlilliyi olanlara həm 270 manat müavinət, həm 200 manat (gözdən əlilliyi olanlar üçün 300 manat) təqaüd, həm də onlara qulluq edənlər üçün 100 manat təqaüd təyin olunur, yəni bu istiqamət üzrə sosial ödəniş 570 manata (gözdən əlilliyi olan 18 yaşadək şəxslər üçün 670 manata) çatıb. Eləcə də uşaqlarla bağlı digər sosial ödənişlərdə ciddi artımlar baş verib”, - deyə, F.Talıbov qeyd etdi.

İşçilərin xeyrinə olmayan yeniliklər: son illərdə əmək qanunvericiliyinə edilən dəyişikliklər nəyə gətirib çıxardı?

Əmək Məcəlləsi işəgötürənlər ilə işçilər arasında münasibətləri tənzimləmək üçün nəzərdə tutulub və ona tez-tez hansısa şəkildə düzəlişlər edilir. Nəzəri olaraq, məqsəd bu münasibətləri hər iki tərəf üçün daha ədalətli etməkdir. Əmək sferasında bir sıra müsbət cəhətlər var, məsələn, əmək müqavilələrinin sayı artıb.

Lakin “Müstəqil Həmkarlar İttifaqı” İctimai Birliyinin sədr müavini Əhməd Rəhmanov AYNA-ya deyib ki, bəzi məqamlar tənqidlərə səbəb olur: “Bir neçə il əvvəl ölkənin Əmək Məcəlləsinə heç də işçinin xeyrinə olmayan dəyişikliklər edilib. Əgər əvvəllər əmək müqaviləsi müddətli və ya beş il müddətinə bağlanırdısa, düzəlişlərdən sonra tərəflərin razılaşdırdığı müddətə bağlana bilər və bu, məsələn, üç ay və ya altı ay ola bilər. Bu, işçiləri daha asılı vəziyyətə salır. Bundan əvvəl bir insanı iş yerində qeydiyyata almaq lazım idi, lakin sonradan ümidləri doğrultmadığı ortaya çıxarsa, digər bir səbəb varsa, onu işdən çıxara və ya yenidən hazırlığa göndərə bilərdilər. Amma indi işəgötürənlərin həyatı asanlaşdırılıb, muzdlu işçilərin həyatı çətinləşib. Tutaq ki, bir həkimlə altı ay müddətinə müqavilə imzaladınız və işəgötürən əvvəlcədən deyə bilər ki, bir şey ona uyğun gəlmirsə, sadəcə olaraq müqaviləni yeniləməyəcək. Nəticədə, işçini gözlənildiyindən daha çox iş saatı ilə işlədə, onu əlavə iş vaxtı üçün pul ödəmədən işlədə bilər və s. İşçi isə 6 aydan sonra işsiz qalmamaq üçün razılaşacaq və susacaq”.

Həmsöhbətimizin sözlərinə görə, əgər bir şəxslə müqaviləni uzatmaq istəmirlərsə, o, işsiz qalır və hətta ixtisara da düşmür, bu isə o deməkdir ki, o, kompensasiyaya da ümid edə bilməz: “İşsizlikdən sığorta ödənişlərinin təyin edilməsinə gəlincə, əmək müqaviləsinin müddətinin başa çatması bəndinə əsasən işdən çıxarılan işsizlərə ödənişlər 3 ay müddətinə təyin edilir. Bu şəxslərə təkrar sığorta ödənişlərinin həyata keçirilməsinə icazə verilmir. Bir şəxs dövlət orqanının və ya hüquqi şəxsin ləğvi, işçilərin sayının və ya ştatının ixtisarı nəticəsində işdən çıxarılıbsa, ona 6 ay, yenidən müraciət etdikdə isə 3 ay müddətinə ödənişlər təyin ediləcəkdi. Amma bütün bunlar onun üçün uyğun iş tapılmaması şərti ilə olur”.

“Yerli məşğulluq xidmətləri az adama işsizlik müavinəti ödəyir və onlar üçün münasib iş tapır. Məndə bir neçə ildir iş tapa bilməyən, lakin işsizlik müavinəti verilməyən insanların siyahısı var. İnsanların necə yaşadıqları heç kimə maraqlı deyil”, - deyə Rəhmanov bildirib.

Əmək qanunvericiliyimizin son illərdə məruz qaldığı digər dəyişiklik qadınların işləməsi ilə bağlıdır. Əvvəllər qadınların işləyə bilmədiyi peşələr var idi. İşlərin əksəriyyəti ağır yüklərin qaldırılması və təhlükəli maddələrin istehsalı ilə bağlı idi.

Qeyd edək ki, BMT-nin Qadınlara Qarşı Ayrı-seçkiliyin Aradan Qaldırılması Komitəsi Azərbaycandan Əmək Məcəlləsində qadın əməyindən istifadənin qadağan olunduğu iş və peşələrlə bağlı maddələrin ləğvini tələb edib. Avropa Şurası da bunu müdafiə edib. Bununla bağlı Ailə, Qadın və Uşaq Problemləri üzrə Dövlət Komitəsi beynəlxalq təşkilatların tövsiyələrinə və istehsalın çoxdan modernləşdirilməsinə əsaslanaraq, Azərbaycan Respublikasının Əmək Məcəlləsinə dəyişikliklər paketi hazırlayıb. Bu dəyişikliklərə görə, bir çox hallar ağır iş kateqoriyasından çıxarılır.

Bu il qadın əməyindən istifadənin qadağan olunduğu, əmək şəraitinin zərərli və ağır hesab edildiyi sahələrin, peşələrin (vəzifələrin), habelə yeraltı işlərin siyahısı haqqında qərar ləğv edilib. Müvafiq qərarı Baş Nazir Əli Əsədov imzalayıb. Buna əsasən, artıq qadağan olunmuş peşə və iş yerləri bütün qadınlara deyil, yalnız hamilə qadınlara və bir yaşınadək uşağı olan qadınlara şamil olunacaq.

“Bəzi insanlar qadınların belə işlərdə işləməsinə icazə verilməməsini ayrı-seçkilik hesab edirdilər, amma əslində bu qərar onların sağlamlığını qorumaq məqsədi daşıyırdı. Məsələn, bir qadının daşyonan və ya yerqazan işlədiyini təsəvvür edə bilərsinizmi? İndiki vaxtda qadınları istənilən işdə işlətmək olar, bəs bundan kimə xeyir gəlir? Belə çıxır ki, qadın işini itirib işə düzəlmək üçün dövlət qurumlarına müraciət edərsə, ona hansısa ağır iş təklif oluna bilər. Amma qadın istəsə belə, orada işləyə bilməzdi - fiziki meyarlar buna imkan vermir. Təbii ki, imtina edəcək, sonra məşğulluq orqanlarının ona işsizlik müavinətini verməkdən imtina etmək üçün əsası olacaq, çünki ona iş təklif olunub, amma imtina edib”, - deyə ekspert vurğulayıb.

Qeyd edək ki, qanunla işsiz şəxsə məqbul, yəni təhsili, təcrübəsi, ixtisası baxımından ona uyğun olan iş təklif edilməlidir. Amma bir sıra hallarda ona əmək qanunvericiliyinin tələblərinə cavab verən haqqı ödənilən ictimai iş, o cümlədən yuxarıda göstərilən meyarlara cavab verməyən və qabaqcadan peşə hazırlığı tələb etməyən müvəqqəti iş təklif oluna bilər. Bu, 3 ildən artıq işləməyən və peşəsi (ixtisası) olmayanlara; peşə hazırlığından imtina edənlərə; Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin yerli strukturlarında və DOST mərkəzlərində 24 aydan artıq qeydiyyatda olanlara şamil edilir.

Rəhmanovun sözlərinə görə, bu yaxınlarda Milli Məclisin deputatı Rauf Əliyev qadınların həftə sonları işləməməsi və ailəsinə daha çox vaxt ayıra bilməsi məsələsini qaldırıb: “Amma belə bir qərar verilsə belə, onun icrasına kim nəzarət edəcək? Son 5 ildə Əmək Müfəttişliyi təşkilatlarda monitorinq və reyd keçirməyib. Ölkədə sahibkarlıq fəaliyyətinin monitorinqi bir neçə il əvvəl dayandırılıb. Bu, o deməkdir ki, işəgötürən onda işləyənlər üçün qaydalar müəyyən edə bilər, məsələn, iş vaxtından artıq işləmək, lakin heç kim buna nəzarət etmir. Həmkarlar ittifaqları da susur. Bu illər ərzində heç bir həmkarlar ittifaqı qurumu təşkilatlarda işçilərin hüquqlarının pozulmasından danışmayıb. Adama elə gəlir ki, onların işi yalnız səyahət paketləri satmaqdır”.

Müəllif: Elya Belskaya
ayna.az

Azərbaycan Respublikasının Əmək Məcəlləsi
-əcnəbilər və vətəndaşlığı olmayan şəxslərin əmək hüquqlarının müdafiəsi üçün aşağıdakı maddi hüquq normalarını nəzərdə tutur, bu şəxslərin yerli şəxslərlə bərabər hüquqlara malik olduğunu təsbit edir. Əmək Məcəlləsi bu tələbi o əsasdan nəzərdə tutur ki, əcnəbi və vətəndaşlığı olmayan şəxslər Azərbaycan Respublikasının yerli vətəndaşları ilə bərabər hüquqlara malik olsun.
Praktikada isə əksinədir. Fikrimcə, bir çox sahələrdə:əcnəbilər və vətəndaşlığı olmayan şəxslərin Azərbaycan Respublikasının yerli şəxslərinə nisbətən əmək hüquqları daha çoxdur, xüsusən əmək haqqı sahəsində.Yəni, diskriminasiya əcnəbilər və vətəndaşlığı olmayan şəxslərə qarşı deyil, yerli işçilərə qarşıdır. Xüsusən də bu şəxslərin, yerli şəxs və ya işçilərdən bir neçə dəfə artıq əmək haqqı almalarında.
Azərbaycan Respublikasının Əmək Məcəlləsi isə əcnəbilər və vətəndaşlığı olmayan şəxslər üçün aşağıdakı hüquqları nəzərdə tutur:
Qanunla və ya Azərbaycan Respublikasının tərəfdar çıxdığı beynəlxalq müqavilələr ilə başqa hal nəzərdə tutulmayıbsa, əcnəbilər və vətəndaşlığı olmayan şəxslər Azərbaycan Respublikasında olarkən AR-nın vətəndaşları ilə bərabər bütün əmək hüquqlarından istifadə edə bilər və bu hüquqlara müvafiq olan vəzifələr daşıyırlar.
Qanunda nəzərdə tutulmuş hallar istisna olunmaqla əcnəbilərin və vətəndaşlığı olmayan şəxslərin Əmək Məcəlləsi və digər normativ hüquqi aktlarda nəzərdə tutulmuş əmək hüquqlarının məhdudlaşdırılması qadağandır.
Əmək münasibətləri sahəsində Azərbaycan Respublikasının vətəndaşlarına nisbətən - əcnəbilərə və vətəndaşlığı olmayan şəxslərə daha üstün hüquqların müəyyən edilməsi yolverilməzdir.
Azər Quliyev.
Teref. Xocanın Blogu
Səhifəmiz hamnın üzünə açıqdır.

Bakı şəhər sakini Səlimova Yeganə Sahibcan qızı tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, qızı Səlimova Aysel Yaşar qızı I qrup əlil olmağına baxmayaraq, nazirlikdəki psixoloqlar ona qərəzli şəkildə III qrup təyin ediblər:

“Mən, Səlimova Yeganə Sahibcan qızı, yazaraq sizdən xahiş edirəm ki, problemimizi işıqlandırasınız.

Mən və uşaqlarım ilk dəfə deyil ki, bu cür haqsızlıqlarla üzləşmişik. İllərdir ev növbəsində olmağıma baxmayaraq, mənə ev də vermirdilər, amma şikayətlərim və haqlı olmağım nəticəsində evi verdilər.

Qızım Səlimova Aysel Yaşar qızı həqiqətəndə xəstədir və bu xəstəliyi Əmək və Əhalinin Sosial Müdafiəsi Nazirliyindəki dırnaq arası “psixoloqlar”da təsdiq edir, amma III qrup veriblər.

Maştağa Psixiatriya Xəstəxanasının şöbə müdiri Oqtay həkim və baş həkimi Orxan və Nihat həkim qızımı müayinə və müalicə etdikdən sonra ona “Ağırlaşma F02.8* başqa rubrikalarda təsnif edilən, digər dəqiqləşdirilmiş xəstəliklər zamanı demensiya, epilepsiya nəticəsində dərin ağıl zəifliyi, tez-tez baş verən qıcolma tutmaları, kənar şəxslərin qulluq və nəzarətinə ehtiyacı var” diaqnozu qoyulmuşdur.

Mən anası olaraq imkan vermərəm ki, Sahil Babayev və dəstəsi qızımın haqqını yesin. Psixoloq dediyi həkimlər xəstələrə zülm verirlər. Mən Baş Prokurorluqdan xahiş edirəm, bir dəfə ora baxış keçirib, kameralara baxsınlar. Ağır xəstələrlə pis davranışın və haqsızlığın şahidi olarsız.

15 noyabr tarixində Respublika Əlillərin Bərpa Mərkəzində qızımı saat 14:00-da 102-ci otağa salıb, 16:00-da müayinə otağından çıxartdılar. Mən xahiş edirəm, o iki saatın görüntülərinə baxsınlar. Mənim uşağım kimi orada yüzlərlə belə xəstələrə işgəncə verirlər.

16:00-a qədər psixoloji xəstəxəyə həkim Günel Soylu tərəfindən psixoloji təzyiq göstərilib, otaqda kameralar var.

Prokurorluq tərəfindən araşdırılmanın aparılmasını, həmən tarixdə və saatda kamera görüntülərinə baxılmasını və həkimin cinayət məsuliyyətinə cəlb edilməsini tələb edirik.

Ən gülməli məqam isə odur ki, nazirliyin bütün bu diaqnozla tanış olan həkimləri xəstəliyi təsdiqləyir və qrupu dəyişməkdən ötrü sənədin axırında belə bir cümlə yazırlar: “Kənar şəxsin nəzarəti altında xüsusi məsuliyyət tələbi olmayan peşələr üzrə işləyə bilər”.

Yuxarıda qeyd etdiyim xəstəliyə sahib olan xəstəni hansı qurum işə götürür? Və yaxud da belə xəstəyə işləmək olarmı, yəni bacararmı?

İnsafsızlığın ən dibini görmüş şəxslər mənə yol göstərirlər ki, işləyə bilər.

Mən hesab edirəm ki, maddi maraqlar təmin olunmadığından vəziyyəti bu qədər gərginləşdirirlər. Bu vəziyyətin yaranmağının ən başlıca səbəbi Sahil Babayevdir. Həqiqətən də xəstə olanlar rüşvətsiz istədiklərini əldə edə bilmirlər. Amma sağlam şəxslər əllərində I qrup rahat şəkildə gəzirlər, bunun səbəbi əlbəttə rüşvətdir. Pul ver adını çəkdiyimiz quruma, ən ağır xəstəlik belə yazarlar sənə. Amma həqiqi xəstələri görüb, sanki havalanırlar, kobud davranış sərgiləyirlər.

Mən bir ana olaraq bu şikayətimdə də axıra kimi gedəcəm. Sahil Babayev və komandası düzgün rəy verənə kimi bu işin arxasını buraxmayacam”.

Məsələ ilə bağlı Əmək və Əhalinin Sosial Müdafiəsi Nazirliyi ilə əlaqə saxladıq. Bildirdilər ki, Bakı şəhər sakini Səlimova Aysel Yaşar qızı əlilliyinin qiymətləndirilməsi məqsədilə 15.11.2023-cü il tarixdə Dövlət Tibbi-Sosial Ekspertiza və Reabilitasiya Agentliyində əyani müayinə edilib: “Vətəndaşın tibbi sənədlərinə və əyani müayinə nəticələrinə uyğun olaraq Nazirlər Kabinetinin 187 saylı "Əlilliyin müəyyən olunması meyarları" na əsasən, ona orqanizm funksiyalarının 40% pozulmasına görə 2 il müddətinə əlillik təyinatı aparılıb”.

Buna uyğun olaraq A.Səlimli müvafiq sosial ödənişlərlə də təmin olunacaq.

Onu da qeyd edim ki, umumiyyətlə xəstəni Günel Soylu müayinə etməyib.

Xəstənin vəziyyəti və diaqnozu barəsində Həkim-Psixiatr Abdulla Şıxlinski ilə həmsöhbət olduq. Həkim bildirdi ki, “Ağırlaşma F02.8* başqa rubrikalarda təsnif edilən, digər dəqiqləşdirilmiş xəstəliklər zamanı demensiya, epilepsiya nəticəsində dərin ağıl zəifliyi, tez-tez baş verən qıcolma tutmaları, kənar şəxslərin qulluq və nəzarətinə ehtiyacı var” diaqnozu ola bilər. Xəstə həqiqətəndə ağır xəstəliyə sahibdir.

Lakin sənədin axırındakı “kənar şəxslərin qulluq və nəzarətinə ehtiyacı var” cümləsi yuxardakı cümlə ilə bir-birinə uyğun gəlmir. O, diaqnozu tərtib edən ekspertlər düzgün tərtib etməyiblər. Birinci cümlə ikinci cümləyə ziddir.

“Bu nəticə düzgün tətbiq olunmayıb. Və çox gülməli haldır, necə ola bilər ki, nəzarətə ehtiyacı olan şəxs işlə təmin oluna bilər. O nəticə etbibarsız hesab oluna bilər. Əgər yenidən rəsmi surətdə komissiya təzədən yoxlasa, o nəticə etibarsız hesab olunacaq. Nəyə görə etibarsız hesab olunacaq? Çünki o məntiq elmin qanunlarına ziddir. Nəticənin 1-ci, 2-ci, 3-cü hissələri bir-birinə ziddiyyət təşkil edir. Nəzarətə möhtac xəstə işləyə bilməz”, - deyə Abdulla Şıxlinski əlavə etdi.






Mənbə: Hurriyyet.az
Teref. Xocanın Blogu
Səhifəmiz hamnın üzünə açıqdır.

"Uşaqlarınıza pul qazanmağı öyrətməsəniz, onlar oğurluğu öyrənəcək" bir yəhudi ata sözündə belə deyilir.
Azərbaycanın orta təhsil sistemində əsas öyrədilməli olan pul qazana bilmək, xarici ölkələrdə yaşaya bilmək və dünyaya açılmaq. Güclü diaspora ola bilmək kimi əsas prinsiplər öyrədilmir. Xüsusilə də yuxarı siniflərdə vacib istiqamətlər, formalaşma və keçid dövründə uşaqların dünyaya baxışlarını formalaşdırmaq lazımdır.
Hər bir dövlətin, hər gün təhlükədə olduğunu anlatmaq lazımdır. Dövlətin mövcud olması üçün ilk növbədə bacarıqlı vətəndaşlar yetişdirmək lazımdır.
Şərt deyil ki, hamı ali təhsil alsın. Bizim orta təhsil sisteminin tək hədəfi var - ali məktəbə daxil olmaq. Elə valideynlərin də əsas hədəfi nə olur, olsun uşağı oxutmaq və ali təhsilli etməkdir. Hansı ki, 11 il valideyn ac da qalsa uşağını oxudur. 4 il də ali məktəbdə o uçağın ömrü gedir. Sonuc nədir? Adətən işsiz qalmaq. 1 il də hərbi xidmət və gəncin artıq 22-23 yaşı var. Daha sonra yenidən həyata başlayır. Axtarır. Özünə iş, həyatda yer axtarır. Tapana qədər də azı 30 yaşa çatır. Daha sonra isə cari hədəflər. Mənzil, ailə, uşaq qayğıları. Və beləcə insanımızın dünyaya açılması, dünya çapında tanınması hədəfləri olmur. Hamı sanki ata evində yığışmaq prinsipi ilə yaşayır. Öz həyətində oğullarına ev tikən ata, qızını yaxın qohumlarına ərər verən ana kimidir yaşadğımız ölkə...
Azərbaycanda outra-otura da xaricə çıxmaq mümkündür.
İndi ali təhsilin əsas hədəflərindən biri də bu olmalıdır. Orta məktəbin son siniflrində də gənclərin doğru həyata başlaması təbliğ edilməlidir. Müəllim və ya müəllimə yalnız ali məktəbə "hazırlaşmaq" tezisi ilə davam etdikcə, uduzacağıq.
Bunları niyə yazdım? Çünki 20-30 ildən sonra neftimiz olmayanda da dövllətimizin güclü və qüdrətli olması üçün yeni bir nəsilə ehtiyacımız olacaq...
Razi Abasbəyli
Teref. Xocanın Blogu
Səhifəmiz hamnın üzünə açıqdır.

Ağdam sakini Abbasov Bəxtiyar Surxay oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, 44 günlük müharibə vaxtı evi dağılıb, heyvanları tələf olub, rəsmi qurumlar gəlib baxış keçirsələr də, ona dəyən zərə ödənilməyib:

“Mən, Abbasov Bəxtiyar Surxay oğlu, yazaraq sizdən xahiş edirəm ki, problemimi işıqlandırasınız.

Özüm II qrup əliləm. Biz döyüş bölgəsində yaşayırdıq, cəbhə xəttinə 2 km ara məsafəmiz var idi. 44 günlük müharibənin 20-ci günündə mənim mal-qaram tələf oldu, evim yararsız vəziyyətə düşdü.

Müharibədən sonra nazirlikdən gəlib baxış keçirdilər, lakin mənə dəyən zərər ödənilmədi.

Hər yerə müraciət etmişəm. Məcbur qalıb “Kapital Bank”dan kredit götürüb, evi səliqə-səhmana saldım. Ağdam Prokurorluğu, İcra Hakimiyyəti, Prezident Aparatı - bunların hamısı vəziyyətimdən xəbərdardırlar. Mənə evimə dəyən ziyana yox, sadəcə əşyaların məhv olmasına görə 1000 manat pul yazdılar. 1000 manatı verdilər, amma evimə, tövləmə dəyən ziyanı ödəmədilər.

İcra Hakimiyyətinə qəbula getdim. Gah dedilər şəhidimiz var, gah da qazilər gəlib, qəbul etmədilər. Orada bildirdim ki, evim də, malım-mülküm də şəhidimizə, qazimizə qurban olsun. Xahiş etdim ki, sadəcə, mənim 2 baş iribuynuzlu heyvanımı verin. Mənə dedilər ki, yaxşı, get xəbər verərik.

Gözlədim, heç bir xəbər çıxmadı. Axırıncı dəfə gedəndə mənə bildirildi ki, “get əlindən gələn yerə şikayət et, sənə heç nə verilməyəcək”.

Məsələ ilə bağlı Ağdam Rayon İcra Hakimiyyəti ilə əlaqə saxladıq. Saytımıza bildirildi ki, Bəxtiyar Abbasovun şikayəti araşdırılacaq.

Mənbə: Hurriyyet.az