"“National Prime Hospital” adlı klinika ilə bağlı şikayətimi bildirmək istəyirəm". "DİA-AZ" xəbər verir ki, bu barədə Aylin Elçin adlı sosial şəbəkə istifadəçisi gileylənir.
Narazı vətəndaş daha sonra başına gələnləri belə nəql edir: "Dünən (srağagün nəzərdə tutulur -red.) bizə həmin klinikada əməliyyat günü təyin olunmuşdu. Əməliyyat ödənişini kartla həyata keçirməyi planlaşdırmışdıq.
Ödəniş üçün kassaya yaxınlaşdıq. Orada bizə ödənişi yalnız nağd şəkildə qəbul etdiklərini bildirdilər. Halbuki, terminal qarşımızda idi. Terminal nə üçün olduğunu soruşanda isə, digər ödənişlər üçün olduğunu bildirdilər və səbəbini “orada həkimin xərcləri var” dedilər.
Əməliyyat üçün ödənişi posterminal vasitəsi ilə qəbul etməyə dəfələrlə imtina etdilər. Bizə dedilər ki, başqa kabinetə qalxmalıyıq, oradan icazə almalıyıq. Pasient niyə ödəniş etmək üçün xüsusi bir icazə almalıdır? Əgər bir klinika xəstəyə uyğun olanı yox, özlərinə sərf edəni edirsə, bu artıq çox şeyi deyir. Xəstəyə bu cür yanaşma tibbi xidmətdə qəbuledilməzdir. Əgər başlanğıcda belədirsə, əməliyyat və ümumi tibbi proses zamanı münasibət necə olacaq sualı yaranır?

Təbii ki uzun mübahisə və stressdən sonra biz oranı tərk etdik, baxmayaraq ki analizlərə və həkim qəbuluna ödəniş etmişdik. Stressli şəkildə pasiyenti əməliyyata yola salmaq düzgün hesab etmirəm, xüsusilə nəzərə alsaq ki, həmin şəxs bütün günü ac qalıb, əməliyyat gözləyir və stres altındadır.
Bu məsələ birbaşa böyük məbləglərə aid vergi öhdəliklərindən yayınma şübhəsi doğurur və xəstənin hüquqları pozulmuş olur".
"DİA-AZ" qeyd edir ki, “National Prime Hospital”ın adı buna qədər də müxtəlif qanun pozuntularında hallanıb və hal-hazırda bu "tibb ocağının" vergidən külli miqdarda vəsait yayındırdığı faktdır.
Mövzuya qayıdacağıq...

Bakı Slavyan Universiteti iddia edir ki, “Mahal” tikinti şirkəti universitetinin Binəqədi rayonu ərazisində yerləşən 3 saylı yataqxanasının ərazisini zəbt edib.
TEREF Bizimyol.info-ya istinadla xəbər verir ki, universitet rəhbərliyi tikinti şirkətini məhkəməyə verib. İddia ərizəsində göstərib ki, şirkət Bakı Slavyan Universitetinin balansında olan torpaq sahəsinin bir hissəsini özbaşına zəbt edib, orada dayanacaqlar inşa etməyə cəhd edir. Dəfələrlə xəbərdarlıq etmələrinə baxmayaraq, tikinti şirkətinin əməkdaşları qanunsuz hərəkətlərinə son qoymur. Pozulmuş hüquqlarının başqa cür bərpa olunmayacağını görüb, bu səbəbdən məhkəməyə üz tutduqlarını bildiriblər.

Universitetin iddia tələbi budur ki, qarşı tərəf ona aid torpaq sahəsindən çıxarılsın. Bundan başqa, mübahisəli sahədəki tikili cavabdehin hesabına sökülsün və torpaq sahəsi əvvəlki vəziyyətinə qaytarılsın.

Qeyd edək ki, 2302 kvadrat metr torpaq sahəsində yerləşən, 3223.3 kvadrat metrlik tikinti sahəsindən ibarət 3 saylı yataqxana binası Bakı Slavyan Universitetinin balansındadır. Yataqxananın yaxınlığında tikinti şirkəti tərəfindən çoxmənzilli yaşayış binası inşa edilib.

Tərəflər arasındakı mübahisəyə Binəqədi Rayon Məhkəməsində baxılıb. Hadisə yerinə baxış keçirilib, ekspertlər rəy verib.

Yeri gəlmişkən, Elm Və Təhsil Nazirliyi, Dövlət Şəhərsalma və Arxitektura Komitəsi və Binəqədi Rayon İcra Hakimiyyəti də müstəqil tələblər irəli sürməyən üçüncü şəxslər qismində bu məhkəmə prosesinə cəlb olunub.

Məhkəmə belə nəticəyə gəlib ki, tikinti şirkətinin dayanacaq kimi inşa etdiyi hissə zəbt olunmayıb. Lakin Bakı Slavyan Universiteti bu nəticə ilə razılaşmır.

Bakıda lüks avtomobillə avtoxuliqanlıq edən şəxsin kimliyi müəyyənləşdirilərək saxlanılıb.
Qaynarinfo-nun əldə etdiyi məlumata görə, 2005-ci il təvəllüdlü, Bakı şəhərində anadan olmuş Şahin Məsimov "Mercedes-Benz CLS 63 AMG" markalı avtomobillə Nərimanov rayonu ərazisində avtoxuliqanlıq hərəkətləri edib.
O, avtomobili qəfil sürətləndirərək, yolun səthində təkər izləri buraxmaqla və güclü sürtünmə səsləri yaratmaqla ictimai qaydanı və əhalinin dincliyini pozub. Bu hərəkətləri ilə o, cəmiyyətə açıq-aşkar hörmətsizlik nümayiş etdirərək, yol hərəkəti qaydalarını davamlı şəkildə pozub.
Faktla bağlı Şahin Məsimov barəsində İnzibati Xətalar Məcəlləsinin 511.1.3-cü maddəsi üzrə protokol tərtib olunub və iş məhkəməyə göndərilib.
Məhkəmə prosesində Məsimov törətdiyi əməldən peşman olduğunu bildirib və qeyd edib ki, sanitar su qovşağına tələsdiyindən avtomobili yüksək sürətlə idarə edib.
Məhkəmənin qərarı ilə o, qeyd olunan inzibati xətanı törətməkdə təqsirli bilinib və bir il müddətinə nəqliyyat vasitəsini idarəetmə hüququndan məhrum edilməklə yanaşı, 500 manat məbləğində cərimə edilib.
Qeyd edək ki, Şahin Məsimov "Esma Kivos Ceramic” MMC-də satış üzrə direktor vəzifəsində çalışır. Onun atası Emil Elbrus oğlu Məsimov isə həmin şirkətin qanuni təmsilçisi və baş direktorudur. "Esma Kivos Ceramic" MMC hamam otaqları üçün mebel və digər avadanlıqların topdan satışı ilə məşğuldur.

Naxçıvan Həmkarlar İttifaqları Şurası icra hakimiyyətləri, idarə və müəssisə rəhbərləri ilə əlbir olub, milyonlarla vəsaiti mənimsəyir. Bunu elə həmin idarə və müəssisələrdə çalışan, hər ay maaşlarının 2 faizini şuraya köçürən əməkdaşlar iddia edirlər.
Əməkdaşlar bu iddianı belə izah edirlər ki, şura onlar üçün nəzərdə tutulan sanatoriya göndərişindən tutmuş sosial vəziyyətin yaxşılaşdırılmasına qədər heç bir tədbir həyata keçirmir. Əvəzində bu tədbirləri sənəd üzərində yazıb, pulları mənimsəyirlər.
Naxçıvan şəhərindəki dövlət idarələrinin birində çalışan Rasim Qasımov deyir ki, dəfələrlə müraciət etsə də, sanatoriya üçün göndəriş ala bilməyib:
“Həzm sistemimdə ciddi problemlər var. Hakim yazılı şəkildə bildirib ki, sanatoriyaya ehtiyacım var. Şuraya dəfələrlə müraciət etsəm də, get-gələ salırlar. İldə 5-10 nəfər öz adamlarını göndərirlər, qalan pulu isə sənədləşdirib, yeyirlər. Bu, ədalətsizlikdir. İşçilər nə qədər hüquqlarını tələb edirlərsə də, nəticə etibarilə sistemdəki bu cür qüsurlar üzündən onlardan heç bir fayda görmürlər. Mənim kimi vəziyyətdə olan çox sayda işçi var, amma heç kim nəzərə almaq istəmir.”
Şurada çalışan, təhlükəsizlik baxımından adının çəkilməsini istəməyən vəzifəli əməkdaşlardan biri də pul mənimsənilməsini təsdiq edir:
“İdarə və müəssisələrdə həmkarlar adına yığılan pullardan işçilər heç cürə yararlana bilmir. Tədbirlərin keçirilməsi, işçilərə mükafatın verilməsi, müalicəsi, sosial vəziyyətin yaxşılaşdırılması adı ilə sənədləşdirilir, vəsait müəssisə rəhbərlərinə yaxın işçilərin kartına vurulur və onlar da həmin pulları idarə rəhbərlərinə çatdırırlar. Bu işlərə isə birbaşa rayon və şəhər icra hakimiyyətləri nəzarət edir. Yığılan pullar isə hər kəs öz payını götürməklə piramida şəkilli yuxarılara çatdırılır. Beləliklə də milyonlarla vəsait mənimsənilir.”
70.814 üzvü olan Naxçıvan Həmkarlar İttifaqları Şurası 1,250 ilkin təşkilatı, 6 muxtar respublika və 10 birləşmiş rayon və şəhər komitələrini özündə birləşdirir.
Gündəlik Naxçıvan