2020-ci il noyabrın 8-i isə tariximizə ən şanlı bir gün kimi yazıldı. Ali Baş Komandan İlham Əliyevin rəhbərliyi ilə Rəşadətli Ordumuz Azərbaycanın tarixi, mədəni və strateji əhəmiyyətə malik, Qarabağın baş tacı olan Şuşa şəhərini işğalçılardan azad etdi. Bu, 44 gün içərisində aparılan uğurlu əks-hücum əməliyyatlarının sırasında ən mühüm tarixi hadisə və böyük hərbi Qələbəmiz oldu.
Ümummilli Lider Heydər Əliyevin siyasi kursunu uğurla davam etdirərək Azərbaycanın milli və dövlətçilik maraqlarını daim üstün tutan Prezident, Ali Baş Komandan İlham Əliyev 2020-ci il noyabrın 8-də Şuşa şəhərinin azad olunması münasibətilə xalqa müraciətində demişdir: İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, Zəfərimizin günüdür!”
Bu uğurlarının davamı olaraq 2021-ci il 15 iyun tarixində Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğanın Azərbaycanın və bütövlükdə Türk dünyasının qədim mədəniyyət beşiyi olan Şuşa şəhərində keçirilən görüşün tarixi əhəmiyyəti olan “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalanmışdır.
Bəyannamə strateji əməkdaşlığın perspektivini təmin edir və ölkələr arasında münasibətlərin gələcəyini müəyyən edir və iki ölkə arasında əlaqələri ən yüksək səviyyəyə qaldırır. Bəyannamənin icrası keyfiyyətcə daha yüksək işbirliyinin təminatıdır. Bəyannamədə əksini tapan və iqtisadi inkişafa təkan verəcək məsələlərdən biri də ölkələrin qarşılıqlı surətdə investisiya qoyuluşlarını həyata keçirməsindən, habelə bu sahədə strateji məqsədlərin olmasından ibarətdir. Qarşılıqlı investisiya qoyuluşları ölkələrin iqtisadiyyatının sürətli inkişaf etməsinə, zəruri sahələrin genişləndirilməsinə, strateji sahələrin daha da təkmilləşdirilməsinə şərait yaradır, inteqrasiyanı dərinləşdirir və eyni zamanda iqtisadi əməkdaşlıq sahəsində perspektivlərin daha ümidverici olmasını sübut edən amillərdən biri də Türkiyə dövlətinin Şuşa şəhərində konsulluq açması ilə bağlıdır. Bu, hər iki ölkə vətəndaşlarının, iş adamlarının Azərbaycanda, xüsusən də Qarabağ zonasında daha geniş fəaliyyət göstərəcəklərinə bir işarədir. Bu, eyni zamanda, işğaldan azad edilən rayonların qısa müddət ərzində dirçəldilə biləcəyindən xəbər verir. Şuşada konsulluğun açılmasının iqtisadi əhəmiyyəti ilə yanaşı, siyasi və mənəvi tərəfi də var. Bu, Qarabağda Türkiyənin varlığı deməkdir. Eyni zamanda, bütün dünyaya verilən siyasi, diplomatik bir mesajdır.
Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan fəxarət hissi ilə bildirmişdir ki, Azərbaycan 44 günlük Vətən müharibəsi ərzində qələbə qazanaraq Ermənistanın 30 ildən bəri davam edən təcavüzkar siyasətinə son qoydu, torpaqlarını işğaldan azad etdi, tarixi ədalətin Zəfər çalmasını və beynəlxalq hüququn bərpa olunmasını təmin etdi. Azərbaycan Ermənistanın 30 illik təcavüzünə son qoyulmasında, işğal olunmuş torpaqların azad olunmasında, Azərbaycanın ərazi bütövlüyünün bərpa edilməsində Türkiyə Respublikasının mənəvisiyasi dəstəyini yüksək qiymətləndirir.

Altay Əliyev – Şəhid ailələri, əlillər və müharibə veteranlarının müdafiəsi İctimai Birliyinin fəxri üzvü

Dünyada gedən silahlanma Cənubi Qafqazdan da yan keçmir. 44 günlük müharibədən sonra Ermənistan tərəfi məğlubiyyətin səbəbkarı kimi Rusiyanı gördü. Rusiya ilə müəyyən mənada münasibətlərdə soyuqlaşma yaşandı. Ermənistan silah alışında daha çox Hindistan və Fransaya üz tutdu. Bunun obyektiv səbəbləri də var. Çünki Rusiya Ukraynada apardığı müharibəyə görə müqavilə öhdəliklərini yerinə yetirə bilmirdi.
Məsələyə obyektiv yanaşsaq, Azərbaycanın aviaparkını yenilənməsi Ermənistanın silahlanmasına görə deyil. Açıq şəkildə demək lazımdır ki, Azərbaycanın aviaparkı köhnə id i və Azərbaycan uzun zaman idi ki, aviaparkını yeniləməyi düşünürdü. Düzdür, Azərbaycanın aviaparkında MiQ-21, MiQ-29, Su-24, Su-25 hərbi təyyarələri var. Bu təyyarələr həm yeni təmirdən çıxıb, həm də modernləşdirilib. Müharibə vaxtı da ciddi nəticələr göstərib, ancaq aviaparkın yenilənməsi şərt idi. İddialı bir ölkənin aviaparkındakı ən yaxşı təyyarələr MİQ-29, Su-25 olmamalıdır. Məsələyə bir qədər dərindən yanaşsaq, Rusiya-Ukrayna müharibəsi Azərbaycanın da əlinə fürsət verdi ki, Rusiyadan yox, hərbi təyyarələri fərqli ölkələrdən alsın. Əgər Rusiyanın başı Ukraynadakı müharibəyə qarışmasa idi, ruslar Azərbaycana təzyiq edərək ən azı Su-30, Su-35-lər satmaq istəyəcəkdi. Yeri gəlmişkən, bu yöndə onların təzyiq etdiyi barədə məlumatlar da var.
Azərbaycan aviaparkını yeniləmək üçün strateji müttəfiqlərindən biri Pakistana üz tutdu. Azərbaycan öncə 16 ədəd “JF-17C Thunder Block 3” çoxməqsədli döyüş təyyarəsini sifariş verdi. Daha sonra isə bu təyyarələrin sayı 40-a çatdırıldı. İddialar var ki, Azərbaycan Çindən J-10CE döyüş təyyarəsi almağı da planlaşdırır. Ancaq Pakistandan alının JF-17-lərin sayının 16-dan 40-a çatdırılması, bunun nə qədər real olub-olmayacağını sual altına qoyur.
Azərbaycanın aviaparkını sürətlə yeniləməsi, şübhəsiz ki, Ermənistan tərəfini də narahat edir. Düşünürəm ki, təkcə Ermənistanı da yox. Ermənistanın da yeni təyyarələr almaq iddiası var. Məsələ ondandır ki, Ermənistan aviaparkını iki ölkə vasitəsi ilə yeniləyə bilər: biri Hindistan, digəri isə Fransa. Hətta iddia olunur ki, Hindistan tərəfi Ermənistana Su-30MKI-lar satmaqda maraqlıdır. Hətta Hindistanın Ermənistana bu yöndə təzyiq etdiyi də iddia olunur. Az ehtimal olsa da, Ermənistanın Fransadan “Rafale” döyüş təyyarələri ala bilər. Ancaq bunun reallıq payı bir qədər aşağıdır.
Döyüş təyyarələri almaqla işin bitdiyini demək və düşünmək, yüngül desək, axmaqlıq olardı. Öncə aerodromlar döyüş təyyarələrinə uyğunlaşdırılmalıdır. Bundan əlavə, döyüş təyyarələrindən də önəmlisi pilotların yetişdirilməsi vacib amildir. Ermənistan ərazisinin kiçik və bu ərazinin də, əsasən, dağlıq olması Ermənistanın əl-qolunu bağlayan əsas amillərdəndir. Azərbaycan ərazisi Ermənistandan böyük olsa da, Azərbaycan İrandan hava məkanı alaraq manevrləri həyata keçirə bilirdi. Yeri gəlmişkən, müharibə vaxtı İran o hava məkanını bağlamışdı. Ermənistan, əgər Su-30MKI, yaxud “Rafale” alsa belə, onun hava məkanı manevr üçün əlverişli deyil. Mütləq şəkildə Ermənistan hava məkanı kirayələməlidir. Ona görə də Hindistanın xüsusi təzyiqi olmasa, Ermənistanın aviaparkını yeniləcəyi istəyinə düşəcəyi inandırıcı görünmür.
Ermənistan hazırda daha çox hava hücumundan müdafiə sistemləri, haubitsalar, reaktiv yaylım atəş sistemləri, dronlar və antidronlarla daha çox maraqlanır. Hindistanın dronlar və xüsusilə antidron sistemləri sahəsində apardığı tədqiqatlar Ermənistanın diqqətini daha çox çəkir. Ona görə də Ermənistan daha çox bu istiqamətə yönələcək. Ancaq Azərbaycanın Pakistandan aldığı döyüş təyyarələri Hindistanı hərəkətə gətirib. Hindistan Pakistanla rəqabətini Cənubi Qafqazda da dava etdirir. Yeri gəlmişkən, Hindistan dünyanın 90-dan çox ölkəsinə silah satır, ancaq Hindistanın ən böyük silah alıcısı Ermənistandır. Bir neçə il də bunun davam edəcəyi gözləniləndir.
Son günlər Hindistandan Ermənistana generallar səfər edir. Hətta Ermənistanın Hindistandan aldığı ATAGS artilleriyasının təlim atışları da həyata keçirilib. Yeri gəlmişkən, Hindistandan Ermənistana gələn general Hindistan ordusunun 52-ci zirehli korpusun komandiridir. Həmin korpus tank, artilleriya və zirehli maşınlardan ibarətdir.
Ermənistan Baş naziri Nikol Paşinyan hər nə qədər sülhdən da danışsa, hətta Rusiya əleyhdarı kimi də görünsə, əməldə bunun tam əksini nümayiş etdirir. Rusiya ilə Ermənistan arasında siyasi əlaqələr, diplomatik səfərlərin sayında ciddi artımın olduğu görünür. Yəni Paşinyanın bir əli Rusiyanın “ətəyində”dir.
Açıq şəkildə demək lazımdır ki, “Qarabağ kartı”nı Rusiya yenidən işə salmaq niyyətindədir. Rusiya təkcə Ermənistandakı müxalif düşərgənin dili ilə yox, elə öz rəsmilərinin dili ilə də bu məsələyə ehyam vurur. Azərbaycan müstəqil olandan bu yana keçmədiyi kataklizmlər qalmayıb. Ancaq Paşinyanın bir Qurban bayramı təbrikinə insanların çoxu sıyıldı. Hətta bunu sülhün işarə kimi təqdim edənlər də oldu.
Azərbaycanda və Ermənistanda bir çoxları iddia edirlər ki, Rusiya zəifləyəcəyi təqdirdə, Cənubi Qafqaz rahat nəfəs alacaq. Düzü. bunun tam əksini düşünürəm. Tarixə də baxsaq, indiki adla Rusiyanın başqa regionlarda hər ağzı ovulduğunda bu regiona bəla gətirdiyinin şahidi olmuşuq. Bu regionda Rusiya təhdidi qalır, hətta deyərdim ki, son dövrlər bu təhdid açıq müstəviyə keçmək üzrədir. Hərbi baxımdan güclənməkdə fayda var, ancaq təkcə hərbi sahəyə fokuslanaraq digər sahələri gözardı etmək özü də bir təhdid sayılmalıdır.
Səxavət Məmməd

32 il əvvəl Ulu Öndər Heydər Əliyev hakimiyyətə qayıdaraq Azərbaycan xalqını, dövlətini və millətini parçalanmadan xilas etdi. Milli Məclisin 1993-cü il iyunun 15-də keçirilən iclasındakı çıxışında Ulu Öndər Heydər Əliyev Azərbaycan dövlətçiliyinin gələcək inkişaf strategiyasını elan edib və bu gün Azərbaycan tarixinə Milli Qurtuluş Günü kimi daxil olub.
Azərbaycan xalqının tələbi ilə ikinci dəfə hakimiyyətə qayıdan Heydər Əliyev Ali Sovetin sədri seçilib. Bununla da uzun illər davam edən gərginlik və qarşıdurma səngiyib və ölkə vətəndaş müharibəsi və parçalanma təhlükəsindən xilas olub. Milli qurtuluş fəlsəfəsi sözün geniş mənasında Azərbaycanın mövcudluğunu, onun ən böyük tarixi nailiyyəti olan müstəqilliyini təmin edir.
Həmin vaxt Azərbaycan dövlətçiliyi yox olmaq təhlükəsindən qurtulub. Əgər müstəqilliyi qazanmaq ilkin şərt idisə, ikinci vacib məsələ suverenliyi qoruyub inkişaf etdirmək idi və bu, Ümummilli Liderin iradəsi sayəsində reallığa çevrildi. O, Milli Azərbaycan dövlətçiliyi konsepsiyasını yaratdı. Bütün maneələrə baxmayaraq, ən qısa müddətdə ölkədə ictimai-siyasi sabitlik bərpa olundu.
Heydər Əliyev 1993-cü il iyunun 20-də Azərbaycan həqiqətlərinin dünya ictimaiyyətinə çatdırılması üçün yerli və xarici jurnalistlər üçün brifinq keçirib, iyunun 21-də isə bir sıra ölkələrin diplomatları ilə görüşüb. Bu sahədə yürüdülən siyasət respublikanı informasiya blokadasından çıxartdı. Dünyada Azərbaycanla bağlı formalaşan fikri müsbət yöndə dəyişdi. Məhz belə bir mürəkkəb siyasi şəraitdə Heydər Əliyevin böyük potensialı Azərbaycanın müstəqilliyinin qarantına çevrildi. Ümummilli Liderin şəxsiyyəti, onun özünəməxsus siyasi idarəetmə qabiliyyəti, qətiyyəti və xarizması siyasi böhrana son qoydu və Azərbaycanın dünya birliyinə inteqrasiyası başlandı.
1997-ci ildə Milli Məclisin deputatları 15 iyun tarixinin təqvimə Azərbaycan Respublikasının Milli Qurtuluş Günü kimi salınması təklifi ilə çıxış ediblər və parlament bu təklifi bəyənib. Həmin vaxtdan Heydər Əliyevin yenidən hakimiyyətə qayıdışı Milli Qurtuluş Günü kimi qeyd edilir.
Artıq beş ildir ki, Milli Qurtuluş Günü düşmən əsarətindən qurtulan, azad olan torpaqlarda da qeyd olunur. Hazırda Silahlı Qüvvələrin Ali Baş Komandanı, Prezident İlham Əliyev tərəfindən davam etdirilən siyasət nəticəsində Azərbaycanın ərazi bütövlüyü bərpa olunub.
Ata vəsiyyətini layiqincə yerinə yetirən Prezident İlham Əliyevin rəhbərliyi altında rəşadətli Azərbaycan Ordusu Ermənistan silahlı qüvvələrinin işğal altında saxladığı əzəli və əbədi torpaqlarımızı azad edib.
Bununla da Azərbaycan dövləti Müzəffər Ali Baş Komandanın rəhbərliyi ilə BMT-nin qətnamələrini döyüş meydanında təkbaşına icra edib. Beləliklə, 30 ilə yaxın müddət ərzində düşmənin işğalda saxladığı Azərbaycan torpaqları əsarətdən qurtulub. Düşmən əsarətindən qurtulan Azərbaycan torpaqlarında yenidənqurma və bərpa işləri sürətlə davam etdirilir.

Vahid İsmayılov
Tarix üzrə fəlsəfə doktoru

Ukrayna kəşfiyyatının Rusiya ərazisində həyata keçirdiyi “Hörümçək toru” əməliyyatından sonra Vladimir Putinin nə edəcəyini onun özü yox, ABŞ Prezidenti Donald Tramp və Rusiya Təhlükəsizlik Şurasının sədr müavini Dmitri Medvedev səsləndiriblər. Medvedevin yazısından belə aydın olur ki, Putin sülh istəmir, onun yeganə məqəsədi Ukraynanı tam məhv etməkdir.

Yenixeber.org: Maraqlıdır ki, may ayında Medvedev Ukraynanı və Avropanı nüvə zərbələri ilə hədələmişdi, ancaq bu dəfə “nüvə dəyənəyi”ni hərlətməkdən çəkinib.

Putinlə telofon əlaqəsi quran Tramp isə deyib ki, Putin ukraynalılara çox sərt cavab verəcək və bu barədə qabaqcadan onu məlumatlandırıb. Bu nə deməkdir? Deməli, belə çıxır ki, Putin starteji bombardmaçıların məhv edilməsinin qisasının alınması ilə bağlı ABŞ Prezidentindən xeyır-dua alıb?

Görəsən, Baydenə lağ edən Tramp özünü niyə fövqəldövlətin rəhbəri kimi deyil, büzüşmüş, sanki Rusiyanın hansısa qubernatoru və ya Putinin ştatdankənar mətbuat katibi kimi aparır? ABŞ mürəkkəb tarixi proseslərdən keçərək hüquqi-demokratik cəmiyyət qurub və orada prezidentin səlahiyyətlərini aşması və dövlət maraqlarına uyğun gəlməyən özbaşına siyasi kurs tutmasının qarşısı həmişə alınıb. Tramp Rusiya ilə əlaqədar elə ziddiyyətli və absurd bəyanatlar səsləndirir ki, ağıla yalnız aşağıdakı fikrirlər gəlir:

Birincisi, Tramp Avropa və Çinə qarşı geostrateji mübarizədə Rusiyanı öz tərəfinə çəkmək istəyir və məhz buna görə də Putinlə mülayim rəftar edir və həmçinin, ona deyir ki, sənin vəziyyətin çox pisdir, odla oynama, əgər mən qarşısını almasam, Rusiyanı çökdürəcəklər. Bunu anlayan Putin isə mümkün qədər fürsətdən istifadə edib Ukraynada qələbə qazanmağa çalışır. Hətta o, əlverişli şərait yaranacağı təqdirdə Baltik ölkələrinə girmək planı haqqında da düşünür. Çünki Trampın davranışları bunun üçün münbit zəmin yaradır.

Tramp öz xəyalında qurduğu gələcək geostrateji konfiqurasiyanın girovuna çevrilib. Necə deyərlər, “Ağıldan bəla!” sindromu onu hərdəmxəyal və həm də gülünc vəziyyətə qoyur.

İkincisi, Tramp Rusiya ilə oynayır. O, Rusiya və Ukraynanın tam taqətdən düşüdüyü zamanı gözləyir. Üzdə sülhdən dəm vursa da, əslində bu iki ölkə arasındakı müharibənin uzanması strategiyasını rəhbər tutur. Beləliklə, Tramp həlledici məqamda ABŞ-nin gücündən tam istifadə edərək Avrasiyanın ortasına yerləşmək niyyətindədir.

Üçüncüsü, arxa planda dayanan ABŞ “dərin dövləti” Vladimir Putinə gizlincə ismarıc göndərir ki, yeni dünya nizamında sizə xüsusi pay veriləcək, Ukraynaya və Baltik ölkələrinə yiyələnəcəksiniz, Qərbdən gələn səs-küyə əhəmiyyət verməyin, müharibəni davam etdirin, gec-tez Ukrayna yorulub yıxılacaq. Yəni, belə söyləmək olar ki, hansısa güclü mərkəz Trampı və Putini anlamadıqları böyük siyasi burulğanın içinə salıb oynadır.

Ümumiyyətlə, hər üç ehtimalda Rusiya böyük oyunun bir parçası və ya qurucusu yox, yalnız başqalarının ümidinə qalmış miskin bir istifadə materialı rolunda çıxış edir. Hazırda Ukrayna Rusiyanın başına od yağdırır və Putinin geriyə çıxış yolu qalmayıb. O, inersiya ilə sağa-sola hücumlar edəcək. Hamı yaxşı görür ki, Rusiya ağılla, bacarıqla yox, say çoxluğu sayəsində döyüşür. Putin ordusunun keyfiyyət imkanlarının yüksələcəyi isə inandırıcı görünmür.

Bütün bu həngamənin necə bitəcəyini zaman göstərəcək, lakin hələlik bilinən odur ki, Trampın indiyədək tutduğu siyasi-iqtisadi kurs və Putinə qarşı xoş münasibət bəsləməsi onun ölkə daxilindəki mövqeyini ciddi surətdə sarsıdır. Dünənə kimi ayrılmaz dostlar olan Elon Maskla Tramp arasındakı gərginliyin şiddəti ən yüksək həddə çatıb. E.Mask deyib: ”Tramp açıq-aşkar yalan danışır. Çox təəssüf. Amerikada əslində ortada olan 80%-i təmsil edəcək yeni bir siyasi partiya yaratmağın vaxtı çatmayıbmı?

Bundan başqa Mask söyləyib ki, ”Epşteyn faylları”nda Tramp da yer alır. Belə anlaşılır ki, Mask Trampı pedofillikdə ittiham edir. Digər yandan, Mask Trampa qarşı impiçment elan olunmasına çağırıb. Tramp və Mask arasındakı çəkişmənin acı nəticəsi ilk növbədə Amerika iqtisadiyyatında özünü büruzə verəcək. Trampın rəftar və davranış tərzindəki qabalıq, strateji düşüncəsinin kasadlığı və şit zarafatlarının sonu artıq respublikaçıları da təngə gətirməyə başlayıb.

Əlbəttə, ABŞ, Ağ Evi “dəli yığıncağı”na döndərən Trampdan ibarət deyil. Senator Lindsi Qrehemin Rusiyaya qarşı tətbiq edilməsi nəzərdə tutulan sanskiya layihəsinə hətta Nümayəndələr Palatasının respublikaçı rəhbəri Mayk Conson da dəstək verdiyini açıqlayıb. Hələlik vəziyyət durğun olaraq qalır, Tramp özünə qarşı kritik təpki almayana qədər Rusiyaya ziyan vura biləcək hər hansı addımı atmayacaq.

Ukrayna rəhbərliyinin Trampdan fərqli düşünən ABŞ siyasi elitası ilə müsbət münasibətlərini davam etdirməsi və indiki Ağ Ev administrasiyasının yanlış geostrateji planlama apardığını çəkinmədən bəyan etməsi daha məqəsdəuyğun görünür. Volodimir Zelenski və komandası bu müddət ərzində baş verənlərdən xeyli təcrübə toplayıb və onlar heç də sadəlövhcəsinə Trampın dəyişəcəyinə ümid bəsləmirlər...

Ukrayna rəhbərliyi 2022-ci ilin sentyabrında ağıllı strateji qərar verdi və PUA-ların istehsalı üçün böyük proqram layihəsinin reallaşması istiqamətində işə başladı. İndi Ukrayna təşəbbüsü tam ələ almaq üçün xeyli sayda dron istehsal edir və bu il 2,5 milyon ədəd dron hazırlanacaq. Son Ramştayn toplantısında avropalı dövlətlər və Kanada dron istehsalı ilə bağlı Ukraynaya böyük maliyyə yardımı göstərəcəklərini açıqlayıblar. Məsələn, Böyük Britaniya 350 milyon funt-stelinq maddi yarımdan əlavə, 2025-ci ildə Ukraynaya 100 min dron verəcək. Almaniya bu il Ukraynaya 5 milyard avroluq hərbi yardım göndərəcək, Norveç isə PUA-ların istehsalı üçün 700 milyon dollar ayırıb. Digər Avropa ölkələri də müvafiq yardımlar göstərəcəklərinə söz veriblər.

Ukraynada birmənalı şəkildə anlayırlar ki, Rusiya müharibəni dayandırmayacaq. Vladimir Putinin müharibəni uzatması üçün hələ xeyli resursu var. Son məlumatlara görə, müharibədə 250 min rus əsgəri ölüb, 1 milyon nəfər isə ağır yaralanıb. Bu göstəricilər nəinki Putinin, həmçinin mənəvi deqradasiyaya uğramış Rusiya cəmiyyətinın vecinə deyil, artıq onlar üçün insan həyatı heç bir önəm daşımır və Rusiya bundan da qat-qat artıq itki verməyə hazır görünür. Lakin müharibənin xarakteri və müqəddəratı Rusiyanın ixtiyarında deyil, hər şey daha çox Avropanın qətiyyətindən və Ukraynaya veriləcək yardımların miqyasından asılıdır. Son hadisələr isə Avropanın, nəhayət ki, hərəkətə keçdiyinin əlamətlərini göstərir...(Azpolitika)

Vaqif Nəsibov

Neft və qaz ehtiyatlarının azaldılması və satışı (sanksiya tətbiqinə görə də) Rusiyanın, Putinin çöküşünü təmin edəcək.
Kreml Nabiullinaya TƏZYİQ BAŞLADI!.
Aİ Rusiya Federasiyası ilə bağlı sərt qərarını təsdiq etməyə hazırlaşır. Bazarda qiymətlər ARTACAQ
İqtisadi müşahidəçi Maksim Blunt Rusiya Federasiyasındakı iqtisadi sahədəki vəziyyəti müzakirəsi zamanı: "Rusiya hökuməti Mərkəzi Bankın rəhbəri Elvira Nabiullinaya təzyiq göstərir, biznesə mənfi təsir göstərdiyi üçün əsas faiz dərəcəsinin azaldılmasını tələb edir. O da məlum olub ki, may ayında Rusiyanın neft ixracından əldə etdiyi gəlir 430,4 milyard rubla düşüb ki, bu da ötən illə müqayisədə 32% azdır. Gəlirlərin azalması tələbin azalması və rublun möhkəmlənməsi səbəbindən neftin qiymətinin azalması ilə bağlıdır. Bütün bunların Rusiya iqtisadiyyatına mənfi təsir göstərməsi labüd idi.
Arifa Huseynli
TEREF

Bakı şəhəri, Binə qəsəbəsi, "Atçılıq" adlanan ərazidə yaşayan Babayeva Nailə Şəmsəddin qızı və Kürdəxanı qəsəbə sakini İsmayılova Gülnar Novruz qızı tərəfindən Hurriyyet.az saytının redaksiyasına şikayət məktubu daxil olub. Şikayətçilər saytımız vasitəsilə Daxili İşlər naziri, general-polkovnik Vilayət Eyvazova müraciət edirlər:

"Cənab Nazir!

Biz, Babayeva Nailə Şəmsəddin qızı və İsmayılova Gülnar Novruz qızı yazaraq Sizdən xahiş edirik ki, işimizin daha ətraflı araşdırılıb, günahkar şəxslərin həbs olunamsı ilə bağlı göstəriş verəsiniz.

Mən, Babayeva Nailə Şəmsəddin qızı, ev almaq üçün Orxan adlı şəxsə müraciət etdim. Orxanın əlaqə nömrəsini internet saytından tapmışdıq. Zabrat 1-də evə baxmağa getdik. Evdə 17 yaşlı bir qız var idi. Orxan dedi ki, bu, mənim dayımın evidi, qız da onun qızıdır. Evə baxdıq, bəyəndik.

Səhərisi gün gəlib bir daha evə baxış keçirdik. Evdə Feyzullayev Aslan adlı şəxs və həyat yoldaşı var idi. Söhbətləşdik, evi 20 min manata almağa qərar verdik. Öncədən beh olaraq 1000 manat verdik. 1300 manat isə kommunal xidmətlərin mənim adıma köçməsi üçün ödənişi verdik. Yəni həmin gün Orxan, Aslan və Hüsniyyəyə 2300 manat pul vermişəm.

İyul ayının 22-də Aslan mənə zəng edib bildirdi ki, notariusa gəlin. Mən, Orxan, Hüsniyyə və Aslan Sabunçu qəsəbəsində, 12-ci Polis bölməsi ilə üzbəüz yerləşən 4 nömrəli notariusa getdik. Elə ordaca Hüsniyyəyə 500 manat pul verdik. Ondan sonra kommunalları mənim adıma keçirmək üçün "Asan Kommunal"a getdik.

22 iyul, 2024-cü il tarixində, təxminən saat 14 radələrində Nizami rayonu ərazisində yerləşən “Asan Kommunal”ın 2-ci mərtəbəsində, kameraların önündə 1000 dollar və 16 800 manat pulu Aslana verdim. Mənim onlara 500 manat borcum qalmışdı. Evi təhvil verəndə isə 500 manatı verəcəkdim. Evə gec köçməyimizə səbəb isə o idi ki, "bəzi təmir işlərini gördürürəm", - deyirdi.

İyul ayının 25-də evə köçməli idik. Aslan zəng vurub bildirdi ki, yasımız düşüb. Çox söz-söhbətdən sonra avqust ayının 8-də Hüsniyyə zəng vurub bildirdi ki, evin sənədlərini gətirib qaytarın, evi satmırıq. Biz soruşduq ki, nə sənəd?! O dedi ki, Aslan pulları götürüb qaçıb, gətir evimin sənədini ver.

Məni "tora salan" əsas adam Orxan olub. Hazırda isə hüquq-mühafizə orqanları Orxanı həbs etmir. Aslanı isə saxlayıblar. Nə verdiyimiz puldan, nə də evdən xəbər yoxdur.

Cənab Nazir!

Mən, İsmayılova Gülnar Novruz qızı da Nailə xanım kimi zərərçəkənlərdənəm. Məni də aldadaraq 3 sot torpaq sahəsində yerləşən 2 otaqlı evimi satıblar.

Belə ki, həmin vaxtlar anam ağır xəstə idi və evimi satmaq qərarına gəlmişdim. Sosial şəbəkələrdə evin şəklini qoyub, satışa çıxarmışdım. Telefon nömrəmə Ticarət adlı şəxs yazdı və alıcı kimi gəlib evə baxacaqlarını bildirdilər. Axşam evə Ticarət, Rəhim və Feyzullayev Aslan adlı şəxlər gəldi. Əvvəlcə bildirdilər ki, evi çətin satarsınızz, səbəb isə sənədinin olmamasıdır.

Onlar gedəndən sonra Ticarət mənə yazdı kı, Aslan deyir ailənin vəziyyəti mənim ürəyimi ağrıtdı, onların evini satıb, qardaş kimi kömək edə bilərəm. Şərti isə o oldu ki, evə əl gəzdirilməlidir, ondan sonra satıla bilər. Mən də inandım, razılaşdım.

Ailəmlə birgə evdən kirayə çıxdıq. Bu zaman evdən sadəcə geyim əşyalarımı götürdüm. Mebellərim və evə aidi bütün əşyalar evdə qaldı. Anamın vəziyyəti günü-gündən ağırlaşırdı...

Bir gün adlarını çəkdiyim şəxslər gəldilər ki, evin təmiri yekunlaşıb, Bələdiyyədən sənəd almaq lazımdır. Sən demə, dələduzlar evimdəcə məndən ərizə alıb, Bələdiyyənin iştirakı ilə evi satıb.

Bundan xəbər tutan kimi Ticarət adlı şəxsi çağırdım. Qardaşım söhbətə qarışdı. Ticarət boynuna aldı ki, bəli, sənin evini satmışıq. Dedi ki, narahat olma, Aslanla danışmışıq, sənin evini qaytaracağıq. Aslanın özü də mənə dedi ki, avqust ayında evini sənə təhvil verəcəm.

...Anam rəhmətə getdi, 40 gün başım yasa qarışdı. Onlardan da heç xəbər ala bilmirdim. Bir gün eşitdim ki, Aslan adlı şəxs qaçıb, yoxdur. Dərhal polisə şikayət verdim. 8 ay durmadan şikayət etmişəm. Sonradan Sizin, yəni Vilayət Eyvazovun qəbulunda olandan sonra, Canpolad adlı müstəntiq işimə daha ətrafı baxılacağına söz verdi. Amma bu dəfə də məni müstəntiq Canpolad aldadırmış...

Hazırda Aslan həbs olunub, amma işin içərisində olan digər şəxslər isə məsuliyyətə cəlb olunmur. Bu oyunu bizim başımıza Orxan adlı şəxs açıb. Xahiş edirəm işimizlə bağlı göstəriş verəsiniz".

Jalə FAMİLQIZI

Redaksiyadan: Yazıda adları çəkilən şəxslərin mövqeyini dərc etməyə hazırıq.