Bakıda quzu ətinin qiymətinin artmasıyla bağlı xəbərlər təsdiqini tapdı. Hazırda paytaxtın mərkəzindəki mağazalarda quzu ətinin bir kiloqramı 20, ətraf qəsəbələrdə isə 19 manata satılır.

Qəssablar quzu ətinin bahalaşmaqda davam edəcəyini bildiriblər: “Son bir həftədə aldığımız hər xırda baş heyvan üçün 20-25 manat əlavə vəsait ödəyirik”.

Qəssab Adil Quliyev Qurban bayramında quzu ətinin bir kiloqramının ən azı 21 manat olacağını bildirib. Onun sözlərinə görə, bahalaşma bayramdan sonra da davam edəcək: “Payızda quzu ətinin bir kiloqramı 25 manat olacaq”.

Qəssab qiymət artımını fermerlərlə əlaqələndirib. Bildirib ki, əvvəlki dövrlə müqayisədə indi diri heyvanı baha qiymətə alırlar. O, quzu ətinin bahalaşmasını rayonlarda xırda baş heyvan saxlayanların sayının azalması ilə izah edib./Yenisabah.az

Qazaxıstanda Özbəkəli Janibekov adına SKPU-nun Arxeologiya Mərkəzinin mütəxəssisləri Kanqyu dövləti dövrünə aid məharətlə hazırlanmış qiymətli zinət əşyaları aşkar ediblər.
32gun.az bildirir ki, bu barədə Qazaxıstan Respublikası hökumətinin rəsmi portalı (GOV.KZ) xəbər verib. Bildirilir ki, artefaktlar Türküstan bölgəsindəki Tolebaytobe qəbiristanlığında üç kurqanda aparılan qazıntılar zamanı aşkar edilib.

Arxeoloqların fikrincə, tapılan əşyalar təxminən 2 min il əvvəl hazırlanıb.

Onların arasında alimlər Çin Han sülaləsinə aid dəyirmi bürünc güzgünü - çox nadir və bahalı əşyanı qeyd ediblər ki, ondan yalnız o dövrün ən zəngin və nüfuzlu adamları istifadə edə bilərdilər. Əvvəllər oxşar güzgülər yalnız Kuşan imperiyasının mərkəzinin yerləşdiyi müasir Əfqanıstan ərazisində və Cənubi Uraldakı Sarmat krallarının məzarlarında tapıldı.

Bundan əlavə, tədqiqatçılar aypara formasında, firuzəyi və yaqutlarla işlənmiş qızıl sırğalar tapdılar. Komanda həmçinin quş ovu üçün istifadə edilən ox uclarını, küpəni, kəmər tokasını, saç sancağını, bilərzikləri və digər qalıqları qazıb.

Alimlərin fikrincə, bütün bu əşyalar bir kurqanda aşkar edilib. Digər iki nəfərin müayinəsi onların uzun illər əvvəl talan edildiyini göstərib.

Tədqiqatçılar aydınlaşdırıblar ki, Kanqyu dövləti eramızdan əvvəl III əsrlə eramızın V əsrləri arasında mövcud olub, Orta Asiyada geniş əraziləri tutur. Ölkə Çin , Kuşan İmperiyası və hətta Qədim Roma ilə ticarət edirdi . Ancaq tarixçilər hələ də ölkənin etnik tərkibini və ya sakinlərinin danışdıqları dilləri dəqiq bilmirlər.

Azərbaycanın avtomobil bazarında son illərdə ilk dəfə olaraq ucuzlaşma müşahidə edilir. Ekspertlərin fikrincə, bu tendensiya hələ bir müddət də davam edəcək. Hibrid və elektromobil avtomobillər bazara daxil olduqca, köhnə maşınların qiyməti daha da ucuzlaşacaq.

Mövzuyla bağlı "Kaspi" qəzetinin məqaləsini təqdim edirik.

Son zamanlar paytaxtda mövcud olan tıxaclar, parkinq qiymətlərinin artması insanların şəxsi avtomobillərdən istifadəsini çətinləşdirib. Bu səbəbdən sanki zaman keçdikcə avtomobillərə maraq azalır. Məlum tendensiyanın ilkin əlamətləri özünü qiymətlərdə də göstərir. Son illərdə ilk dəfə olaraq ümumi avtomobil bazarında ucuzlaşma qeydə alınıb. Bu barədə İqtisadi və Sosial İnkişaf Mərkəzindən məlumat verilib. Belə ki, 10 min manatadək olan avtomobillərin qiyməti aprel ayında 8,2 faiz ucuzlaşıb. Aİ-95 markalı benzindən istifadə edən və daha bahalı avtomobillərə tələbin azalması müşahidə olunsa da, həmin avtomobillərin qiyməti dəyişməyib. Bəs bu ucuzlaşma prosesinin davamlı olması mümkündürmü?

Seçimlər dəyişir

Nəqliyyat məsələləri üzrə ekspert Yasin Mustafayevin sözlərinə görə, avtomobil bazarımızda ucuzlaşmaya son vaxtlar qəbul edilən qərarlar səbəb olub:

"Hazırda bütün dünyada elektrikli və hibrid avtomobillərə maraq artır. Yeni avtomobil almaq istəyən, yaxud avtomobilini yeniləyən şəxslər əvvəlcədən kiçik də olsa bazar araşdırması aparırlar. Eyni zamanda, taksi fəaliyyəti ilə bağlı qoyulan tələblər də avtomobil bazarımıza təsir edib. Yeni qaydalara görə köhnə avtomobillər artıq taksi xidməti göstərə bilməyəcək. Ona görə də sahibkarlar avtomobillərini satmağı üstün tuturlar. Satış artdığı zaman tələb və təklif qanunlarına görə qiymətin ucuzlaşması baş verir".

İri mühərrikli avtomobillər də ucuzlaşacaq

Y.Mustafayevin fikrincə, artıq köhnə avtomobillərin erası bitir:

"Avtomobil alanlar hibrid və elektromobilləri seçdiyinə görə, digər nəqliyyat vasitələrinin satışı hazırda çox azdır. Köhnə avtomobil satan şəxslər daha da ucuz qiymət qoyurlar ki, tez satılsın. Beləliklə, bu məsələlər ümumi avtomobil qiymətlərinə də ciddi təsir göstərir. Müşahidə olunan ucuzlaşma prosesi davam edəcək. Həmçinin irihəcmli mühərriki olan avtomobillərin də qiymətlərində enmə gözlənilir. Bu avtomobillərə də tələbat azalacağı üçün onların da qiyməti ucuzlaşacaq. Artıq tanınmış maşın istehsalçıları da öz seçimlərini hibrid və elektromobillər üzərindən edirlər. Çünki bazarın tələbi bu istiqamətdədir".

Yeni avtomobil gətirmək daha sərfəlidir

İqtisadçı Xalid Kərimli bildirdi ki, hazırda sahibkarlara yeni avtomobilləri gətirmək daha çox sərf edir:

"Hibrid və elektromobil avtomobillərə maraq ötən ildən başlayaraq sürətlə artıb. Bu avtomobillər gömrük rüsumundan da azad edilib. Xüsusən də yeni buraxılış olan bu avtomobillər ölkəmizə gətirilərkən heç bir rüsum ödənilmədiyi üçün onların qiyməti daha əlverişli olacaq. Həmin avtomobillər insanların büdcələrinə daha uyğun olduğu üçün bazarda da payları artır".

Qiyməti alıcı və satıcılar müəyyən etmir

X.Kərimli qeyd etdi ki, qiymətlərin ucuzlaşması qısamüddətlidir, bazarda yeni avtomobillər çoxaldıqca, zamanla qiymətlər də stabilləşəcək:

"Qiyməti ucuzlaşan avtomobillər köhnə maşınlardır. Hansı ki, onlar yeni qanuna qədər taksi parkında istifadə olunurdu. Artıq onlar təyinatı üzrə fəaliyyət göstərə bilməyəcəyinə görə kütləvi şəkildə bazara çıxarılırlar. Kütləvi təqdimat da istər-istəməz qiymətlərə öz təsirini göstərir. Bu tendensiya qısamüddətlidir. Sonra bazar yenidən stabilləşəcək. Çünki Azərbaycan bu avtomobilləri xaricdən idxal edir. Avtomobil bazarımızda qiymətləri alıcılar və satıcılar yox, əsasən gələn avtomobillərin dəyəri müəyyənləşdirir. Avtomobili gətirən sahibkar maşını sata biləcəyi halda gətirir. Görsələr ki, sata bilmirlər, bu avtomobilləri gətirməyəcəklər. Bu zaman artıq daha bahalı avtomobillər idxal ediləcək. Beləliklə, bazar stabilləşəcək. Gətirilən avtomobillərin dəyəri artacaq".

Rüsumlar olsa, qiymətlər yüksələcək

İqtisadçı Emin Qəribli isə hesab edir ki, köhnə avtomobillərin zamanla bazardan çıxması həm iqtisadiyyatımız, həm də ekologiyamız üçün müsbət addımdır:

"Avtomobillərin qiymətinin ucuzlaşması müsbət haldır. Hətta bu avtomobillərə idxal rüsumundan əlavə, vergilər də tətbiq edilməlidir. Bu qayda həmçinin böyük mühərrikli avtomobillərə də tətbiq olunmalıdır. Bütün dünyada bu tendensiya var. O zaman bu avtomobillərin qiyməti də artacaq".

Əsas alıcılar xanımlardır

Maşın satışı ilə məşğul olan Fikrət İbrahimov da bazardakı mövcud vəziyyəti təsdiqləyir:

"Bəli, avtomobillərin qiymətlərində ucuzlaşma mövcuddur. Demək olar ki, benzin və dizellə işləyən, iri mühərrikli bütün avtomobillərdə qiymət azalmasını görmək mümkündür. Çünki alıcılar daha çox hibrid və elektrikli avtomobillərə üstünlük verirlər. Hətta 10 min manatlıq maşını da satmaq mümkün deyil. Satıcılar qiymətləri müəyyən etsə də, alıcılıq qüvvəsi çox aşağıdır. İndi maşın alanların əksəriyyəti xanımlardır. Onların da seçimləri hibrid və elektromobil maşınlar olur".

Dövlət Gömrük Komitəsi yanında “Azərterminalkompleks” Birliyinin külli miqdarda vergi borcunun olması üzə çıxıb.

32gun.az-ın əldə etdiyi məlumata görə, birliyin hazırki vergi borcu 3 milyon manatdan çoxdur (3124323.96 AZN).

Xatırladaq ki, 2022-ci ildən Dövlət Gömrük Komitəsinin “Azərterminalkompleks” Birliyinin direktoru vəzifəsinin icrası müvəqqəti olaraq general-mayor Kənan Aşurluya həvalə olunub.

Cənubi Koreyanın sabiq dövlət başçısının yeganə qızı olan Roh So-younq ilə ölkənin ən böyük ikinci holdinqi "SK GRoup"un rəhbəri Çey Tae-von boşanıb.

"Azərbaycan Reallığı" xarici KİV-ə istinadla xəbər verir ki, məhkəmə biznemen Çey Tae-vonun boşandığı həyat yoldaşına 1 milyard dollar təzminat ödəməsinə qərar verib.

Buna səbəb isə Çeyin həyat yoldaşının əlaqələrindən istifadə edərək öz şirkətini genişləndirməsidir.

İş adamı həmçinin 3 övladının anası olan keçmiş xanımına 1.45 milyon dollar aliment də ödəyəcək.

Beləliklə biznesmen 3 milyard dollarlıq sərvətinin təxminən 35%-ni keçmiş həyat yoldaşının hesabına köçürəcək.

Cütlüyün ayrılıq qərarının ölkə tarixində ən böyük boşanma işi olduğu bildirilib.

Məlumata görə, Çeyin 2015-ci ildə nikahdankənar münasibətdən övladı olması üzə çıxmasından sonra cütlük 2015-ci ildə boşanmaq prosesinə başlayıb.

Dövlət qeydiyyat şəhadətnaməsində göstərilən buraxılış tarixindən 15 ildən artıq müddət keçən avtomobil nəqliyyatı vasitələri taksi minik avtomobilləri ilə sərnişin daşımalarında istifadə oluna bilməz.

Bu barədə Nazirlər Kabinetinin təsdiq etdiyi “Müntəzəm və taksi minik avtomobili ilə sərnişin daşımalarında istifadə olunan avtonəqliyyat vasitələrinin texniki göstəriciləri, daxili və xarici tərtibatına dair tələblər”də öz əksini tapıb.

Sənəddə qeyd olunub ki, taksi minik avtomobilləri ən azı “Avro-5” ekoloji standartına uyğun olmalıdır. Bundan başqa, dövlət qeydiyyat şəhadətnaməsində göstərilən buraxılış tarixindən 8 ildən artıq müddət keçmiş avtonəqliyyat vasitəsinə “Avtomobil nəqliyyatı haqqında” Qanunla müəyyən edilən buraxılış kartı verilməyəcək.

Qanunda edilmiş dəyişikliklər 2024-cü il iyulun 1-dən qüvvəyə minir. Taksilərə bu cür tələblərin qoyulmasının qiymət artımına səbəb olacağı da deyilir. Maraqlıdır, Bakıətrafı qəsəbələrdən mərkəzə hərəkət edən və paytaxt daxilində fəaliyyət göstərən el arasında dediyimiz “1 manatlıq” taksilərin aqibəti necə olacaq?

Məsələ ilə bağlı nəqliyyat məsələri üzrə ekspert Elməddin Muradlı “Cebhe.info”-ya açıqlamasında deyib ki, taksi haqqında qəbul edilmiş qərar çərçivəsində taksi fəaliyyəti ilə məşğul olmaq mümkündür:

“Taksilərin keyfiyyətini artırmaq, taksidə olan nöqsanları aradan qaldırmaq üçün taksi haqqında müntəzam qanunlar qəbul olunur. Bu, məhz taksidə olan nöqsanları aradan qaldırmaqdan dolayı zəruridir. Taksi fəaliyyəti ilə məşğul olmaq üçün sürücülər qeydiyyatdan keçməlidirlər. Ancaq bu halda qanunun tələbinə uyğun şəkildə taksi kimi fəaliyyət göstərə bilərlər. Başqa cür məşğul olarlarsa, cərimələnəcəklər”.

Ekspert vurğulayıb ki, “1 manatlıq” taksilərin sürücüləri sırf taksi fəaliyyəti ilə məşğul olan sürücülər deyillər:

“Onlar adətən işə gedərkən yolüstü piyadanı götürüb öz gündəlik xərclərinin müəyyən hissəsini qarşılamağa çalışırlar. Ona görə onlar lisenziya almaqda və ya avtomobilinə taksometr quraşdırmaqda maraqlı deyillər. Lakin qanun qüvvəyə minəndə həmin sürücülərə İnzibatı Xətalar Məcəlləsinin müvafiq bəndlərinə uyğun olaraq protokol və cərimə tətbiq ediləcək”.

“Azərbaycan da inflyasiyaya təsir eləyən əsasən xarici amillərdir. Yəni xaricdən idxal etdiyimiz, idxalından asılı olduğumuz məhsulların qiymətləri bahalaşarsa, bu da dərhal bizə təsir edir və inflyasiya artır. Bu il üçün belə bir hal gözlənilmir”
Bu barədə Bizimyol.info xəbər portalına iqtiadçı Pərviz Heydərov danışıb. İqtisadçı qeyd edib ki, gələcəkdə qida rasionumuzda mühim yer tutan ərzaq məhsulları, xüsusən də, birinci dərəcəli məhsullar üzrə idxaldan asılılığı minimuma endirməliyik.

İqtisadçının fikrincə, bu da qısa müddətdə həll olunacaq bir problem deyil.

“Təəsüflər olsun ki, neçə illərdir bu sahədə dövlət müvafiq dəstək həyata keçirir. Subsidiyalar verilir, bununla yanaşı başqa vergilərdə güzəştlər olur, əlavə dəyər vergisi ləğv olunur və s.”-deyən iqtisadçı hesab edir ki, tətbiq edilən güzəştlər hələ də bizim ərzaqdan asılılığımıza ciddi təsir etmir.

Pərviz Heydərov əlavə edib ki, bunun da səbəbi var. Əsas səbəb odur ki, bu sahədə idxalçı dairələr, yəni idxalla məşğul olan, idxala məsul olan müəyyən bir qrup iş adamı və yaxud şirkətlər, bazarda yüksək mövqeyə sahib olanlar ölkəmizin ərzaq məhsulları üzrə kənardan asılılığının minimum səviyyəyə endirilməsində maraqlı deyillər.

Azərbaycanın bəzi bölgələrində təzə kartof yığımı başlayıb.

Fermerlərin sözlərinə görə, bu il ötən illə müqayisədə məhsuldarlıq nisbətən zəif, qiymətlər isə yüksəkdir.

Bu səbəbdən mövsümü yaxşı qazancla başa vuracaqlarına ümid edirlər.

Qeyd edək ki, ölkəmizdə kartofa illik tələbat 800-840 min ton təşkil edir. Bu isə aylıq 65-70 min ton tələbat deməkdir. Adətən, illik tələbatın 90 faizi yerli istehsal, digər 10 faiz isə idxal mənbələri hesabına ödənilir. Bəs bu il ümumiyyətlə, bölgələrdə məhsuldarlıq necədir? Qiymətlərlə bağlı hansı proqnozlar var? Bu sahədə ixrac imkanları nə yerdədir?

İqtisadçı-alim Vüqar Qocayev “Cebhe.info”-ya açıqlamasında deyib ki, yaxın bir neçə həftə ərzində təzə kartofun topdan və pərəkəndə satış qiyməti ucuzlaşacaq:

“Bu il kartofun bir qədər baha qiymətə təklif edilməsinə səbəb əkin sahələrinin azalması ilə bağlıdır. Belə ki, keçən il Cəlilabadda 6000 hektara yaxın sahədə kartof əkilmişdi, bu il isə 3000 hektara yaxın sahədə kartof əkilib. Yaxın bir neçə həftə ərzində digər rayonlarda kütləvi kartof yığımına başlanılacaq. Nəticədə topdansatış qiymətlərinin ucuzlaşacağı gözlənilir”.

İqtisadçı vurğulayıb ki, bu il məhsuldarlığın bol olacağı proqnozlaşdırılır:

“Builki hava şəraiti kənd təsərrüfatı məhsullarının, o cümlədən kartofun becərilməsi üçün əlverişli olub. Sadəcə, son iki həftədir ki, havalar qeyri-sabit keçir. Bu da kütləvi yığıma başlama prosesini ləngidir. İndiki qiymətlər istehlakçıları qorxutmamalıdır. Bir müddətdən sonra təzə kartofun bir kiloqramı 50-60 qəpiyə qədər ucuzlaşacaq. Yəni qiymətlər təxminən ötən illə müqayisədə eyni səviyyədə olacaq.

Payıza doğru isə inflyasiya ilə bağlı 10 faizə yaxın bahalaşma müşahidə ediləcək”.

Çin alış-veriş platforması olan "Temu"dan son günlər sifariş verənlər sayı olduqca artıb. Sosial şəbəkə istifadəçilərindən biri qeyd edib ki, yaxını bu mesajlara aldanaraq onlayn dələduzluğun qurbanı olub: "Temu"dan sifariş edənlər çalışın diqqətli olun. Bu gün bir tanışıma "Pegasus"dan mesaj gəlib. Fin kodunu yazıb, daha sonra kartından 1000 manat pul çıxıb. Əvvəl 20 min yazıblar, imtina gedib, sonra 10 min, sonda da 1000 manat çıxarıblar" Bu platformaya insanlar insanları aldadırmı ?

Məsələ ilə bağlı Azərbaycan İnformasiya və Kommunikasiya Texnologiyaları Sənayesi Assosiasiyası İctimai Birliyinin İdarə Heyətinin sədri Elvin Abbasov Sonxeber.az-a açıqlama verib.
Ekspert bildirib ki, bir çox xarici alış-veriş xidmətlərədə pul ödəyərkən bank məlumatlarımızı əlavə etdikdə insanların bank hesablarından ayda kiçik-kiçik məbləğlər çıxıb:

"Ümumiyyətlə yeni çıxan satış platformasında ilk öncə müşahidələr aparılmalıdır. Çünki, dələduzlar da bu tipli platformalar yaradırlar. Mən bunu "Temu"ya görə demirəm. Bu bilinən bir yanaşmadır. Daha öncə də bir çox xarici alış-veriş xidmətlərədə pul ödəyərkən bank məlumatlarımızı əlavə etdikdə insanların bank hesablarından ayda kiçik-kiçik məbləğlər çıxıb. Bu hallar çox tez-tez müşahidə edilir. Hazırda da dünyada dələduzluq xidmətləri var, hansıki onlar həqiqi platformalara oxşar tətbiqlər yaradır".

E. Abbasov bank kartlarından pulların çəkilməsini dünyaca tanınmış xidmətlərdə də baş verdiyini bildirib:

"Bank domenində kiçik dəyişikliklər edərək və onlayn satış platformalarına bənzərini yaradaraq vətəndaşları aldadırlar. Vətəndaş alış-veriş saytından məhsul alarkən bank kartınını qeyd etməməlidir. İlk olaraq o platformanın güvənli olduğuna əmin olmalıdır. Sosial şəbəkələrdə həmin platformaya yazılan şərhləri oxumalıdır.

Elə dizaynlı platforma yaradırlar ki, bu tipli platformalardan anlamayan insanları rahatlıqla aldada bilirlər. Əgər platforma telefona yüklənən tətbiqdirsə, yükləməzdən əvvəl o tətbiqin yorumlarını oxunmalıdır. Bank kartlarından pulların çəkilməsi dünyaca tanınmış xidmətlərdə də baş verib. Hansıki, o xidmət real xidmətdir. Ay ortalarında bir,iki, üç, dollar kimi kiçik məbləğlər bank hesablarından çəkilir. Bu təkcə "Temu" üçün deyil, bir çox platforma üçün keçərlidir. Hansı ki, bu platforlar dələduzluq saytı deyil, real xidmətlər üçün nəzərdə tutulub. İnsanlar bu məsələdə diqqətli olmalıdırlar. Bank məlumatlarını gizli saxlamalıdırlar. Ancaq ödəniş zamanı məlumatlar daxil edilməli, daha sonra isə silinməlidir. Bunlara əməl olunsa,insanlardan əlavə pullar çıxılmaz. Onlayn platformalarda ay ərzində əlavə pulların çıxıldığı çox müşahidə olunur. Bu məsələlərdə insanları diqqətli olmağa çağırırıq".

Azərbaycanda kommunal qiymətlərində artım olacağı ilə bağlı fikirlər yayılmağa başlayıb. Bunun nə dərəcədə real olması isə hər kəsi maraqlandırır.
Tribunainfo.az xezerxeber.az-a istinadən xəbər verir ki, iqtisadçı-ekspert Natiq Cəfərlinin sözlərinə görə, yaxın zamanda belə bir tarif dəyişikliyinin olması gözlənilmir.

“Hazırda nə qazın, nə də elektrik enerjisinin istehsalının xərcləri artmayıb. Əksinə dünya bazarına baxsaq, Azərbaycanın satdığı qazın qiymətində də enmələr müşahidə olunur. Çünki dünyada qazın qiyməti düşüb. Buna görə də Azərbaycanın daxili bazarında qazın qiymətinin artırılması üçün bir əsas yoxdur. O cümlədən elektrik enerjisi ilə bağlı da eyni vəziyyətdir, Azərbaycanda elektrik enerjisinin istehsalı son 20 ildə kifayət qədər sürətli gedir”.

Ekspert onu da qeyd edib ki, kommunal qiymətlərin artımı gələn il mümkün ola bilər.