Əməliyyatdan sonra bədəni deformasiyaya uğrayıb, edilən cərrahi prosedurların izləri qalıb…

Bunu estetik əməliyyat etdirən vətəndaş iddia edir.

“Xəzər Xəbər”ə müsahibəsində uğursuz əməliyyat icra olunduğunu deyən şikayətçi Günay Kərimli bildirib ki, bir neçə il əvvəl plastik cərrah kimi fəaliyyət göstərən Səkinə Xudiyevaya mammoplastika, abdominoplastika və qolgərmə əməliyyatları üçün müraciət edib.

Lakin, Günay Kərimli edilən əməliyyatların uğursuz nəticələndiyini, bədənində əməliyyatdan sonra ciddi fəsadların yarandığını iddia edir.

Şikayətçi Günay Kərimli iddia edir ki, yaranan qüsurların aradan qaldırılması üçün həkim tərəfindən ona təkrar əməliyyat edilib, lakin revizyon əməliyyatın nəticəsi də uğursuz olub.

İddialarda adı keçən həkim Səkinə Xudiyeva ilə əlaqə saxladıq. O, məsələyə belə aydınlıq gətirdi.

Xezerxeber.az mövzu ilə bağlı daha ətraflı videomaterialı təqdim edir.

Qeyd edək ki, Plastik cərrah Səkinə Xüdiyevanın uğursuz əməliyyatları ilə bağlı zaman-zaman mətbuatda qalmaqallı şikayətlər dərc olunub. Qeyd edək ki,Səkinə Xudiyeva “Kəpəz” və “Real Hospital” da da estetik əməliyyat etdikləri pasiyentlərdə hüquq-mühafizə orqanlarına şikayət ediblər.(Xezerxeber.az)

Azərbaycanda əlillik şəxsin sağlamlıq vəziyyəti və bu vəziyyətin onun gündəlik həyat fəaliyyətinə, əmək qabiliyyətinə təsiri əsasında müəyyənləşir. Ölkədə bu proses qanunvericiliklə tənzimlənir və əlilliyin qiymətləndirilməsi müəyyən edilmiş meyarlar əsasında aparılır. Bildiyimiz kimi, Nazirlər Kabinetinin təsdiq etdiyi Qərarda orqanizmin funksiyasının pozulmasına səbəb olan xəstəliklərin və Xəstəliklərin Beynəlxalq Təsnifatı (XBT) yer alıb. Lakin bəzi nadir xəstəliklər var ki, həmin siyahıda adları yoxdur. Onlardan biri də anadangəlmə methemoqlobinemiya (XBT – D74) xəstəliyidir.

Bununla bağlı Bizim.Media-ya övladı sözügedən nadir xəstəlikdən əziyyət çəkən valideyn müraciət edib.

O bildirib ki, oğlu, 2017-ci il təvəllüdlü Şirinli Elgün bu xəstəlikdən əziyyət çəkir və əlilliyin qiymətləndirilməsi üçün qeydiyyatda olduqları tibb müəssisəsinə müraciət ediblər.

Əvvəlcə anadangəlmə methemoqlobinemiyanın nə olduğuna aydınlıq gətirək:

Methemoqlobinemiya qanda hemoglobinin oksigen daşıma qabiliyyətinin pozulması ilə xarakterizə olunan nadir xəstəlikdir. Bu, qanda oksigen səviyyəsinin aşağı olması, dəri və dodaqlarda göyərmə, yorğunluq və digər simptomlarla müşahidə edilə bilər. Bəzi hallarda xəstəlik həyat boyu davam edir və insanın gündəlik fəaliyyətinə ciddi təsir göstərə bilir.

Yəni göründüyü kimi, xəstəlik dünyada az sayda mövcud olan, xüsusi müalicəsi olmayıb, insanla daim yol gedərək onun iş qabiliyyətinə, gündəlik fəaliyyətinə, hərəkət imkanlarına mənfi təsir edən xəstəlik kimi qiymətləndirilir. Bütün bunlar nəzərə alınaraq əlillik müəyyən edilə bilər.

Həyat fəaliyyətinə təsir edən nadir xəstəlik əlilliyin müəyyən edilməsi meyarlarında əksini tapmayıb

Valideynin bildirdiyinə görə, prosesə uyğun qaydada müayinələrdən keçmələrinə baxmayaraq əlilliyin qiymətləndirilməsi üçün lazım olan tibbi sənədin (Forma 88) tərtibi mümkün olmayıb. Çünki həmin göndəriş sənədində əlilliyin təyin edilməsi meyarlarında göstərilən xəstəliklərin beynəlxalq təsnifat (XBT) kodunu qeyd etmək lazımdır. Forma 88 elektron formada yazıldığı üçün, həmçinin, nadir xəstəliyin adı Qərarda keçmədiyi üçün xəstəlik şəxsin gündəlik həyat fəaliyyətinə zərər vursa belə şəxsə göndəriş sənədi verilə bilmir. Prosesə uyğun olaraq da Forma 88 olmadığı üçün əlillik də qiymətləndirilə bilmir.

Məsələ ilə bağlı Dövlət Tibbi-Sosial Ekspertiza və Reabilitasiya Agentliyindən Bizim.Media-ya bildirilib ki, hazırkı vəziyyət onlarla bağlı deyil:

“Forma 88 rəsmiləşdirilib göndərildikdən sonra əvvəlcə elektron formada qiymətləndirilmə aparılır, qiymətləndirimədən narazı qaldıqda isə əyani müayinəyə də dəvət oluna bilər”.

Forma 88-in yazılmaması ilə bağlı Tibbi Ərazi Bölmələrini İdarəetmə Birliyinə (TƏBİB) müraciət etdik.

Qurumdan Bizim.Media-ya bildirilib ki, Xəstəliklərin Beynəlxalq Təsnifatının D74 və onun alt qrupu olan D74.0 kodlarının Azərbaycan Respublikası Nazirlər Kabinetinin 13 may 2022-ci il tarixli 187 nömrəli Qərarı ilə təsdiq edilmiş “Əlilliyin müəyyən olunması meyarları” siyahısında yer almaması səbəbindən vətəndaşa dair göndərişin (Forma 88) rəsmiləşdirilməsi mümkün olmayıb.

Qeyd edilib ki, əlillik meyarları Əmək və Əhalinin Sosial Müdafiəsi Nazirliyi tərəfindən tərtib olunur və Azərbaycan Respublikasının Nazirlər kabineti tərəfindən təsdiq edilir.


Göründüyü kimi, TƏBİB də yaraya məlhəm ola bilməyib.

Ortaya çıxan mənzərə olduqca acınacaqlıdır. Bir tərəf “Forma 88 yoxdur” deyir, digər tərəf isə “siyahıda xəstəlik yoxdur” arqumentini gətirir. Nəticə etibarilə zərər çəkən 9 yaşlı uşaqdır.

Kağız üzərində gedən bu bürokratik “top atma”nın nəticəsində naümid buraxılan 9 yaşlı uşaq sistemin boşluqları arasında qalıb.

Həkimlər onun nadir xəstəlikdən əziyyət çəkdiyini təsdiqləyir. Xəstəlik onun həyat keyfiyyətinə və sağlamlığına təsir edir. Lakin siyahıda kod olmadığı üçün dövlət qurumları faktiki olaraq onu görməzdən gəlir. Aidiyyəti qurumlar problemi həll etmək əvəzinə məsuliyyəti bir-birinin üzərinə atmaqla kifayətlənirlər.

Bu isə ciddi suallar doğurur:

Nadir xəstəliklər siyahıya niyə daxil edilmir?

Axı əlillik meyarlarını Əmək və Əhalinin Sosial Müdafiəsi Nazirliyi tərtib edir və Nazirlər kabinetinə təqdim edir. Nazirlər Kabineti isə təsdiq edir.

Dövlət qurumları niyə problemin həlli üçün təşəbbüs göstərmək əvəzinə prosedur arxasında gizlənirlər?

Ölümlə pəncələşən bir uşağın taleyi kağız üzərində ilişib qalıb...

Bu vəziyyət isə nə tibbi məntiqə, nə də sosial ədalət prinsiplərinə sığır.

Çünki burada söhbət sadəcə bir sənəddən yox, bir uşağın həyatından və gələcəyindən gedir.

Belə çıxır ki, Əmək və Əhalinin Sosial Müdafiəsi Nazirliyi və TƏBİB üçün üçün xəstəliyin mövcudluğu yox, onun siyahıda olub-olmaması daha vacibdir!

Əgər qanun və qərarlar real həyatda insanlara kömək etmək üçündürsə, o zaman bu qurumlar nadir xəstəlikdən əziyyət çəkən uşaqları niyə görməzdən gəlir? (Bizim.Media)

Azərbaycan Dövlət Su Ehtiyatları Agentliyinin tabeliyində “İri Şəhərlərin Su Təchizatı” Qapalı Səhmdar Cəmiyyətin “Sutikinti” Məhdud Məsuliyyətli Cəmiyyəti nəqliyyat mexanizimlərinin icarəsi xidmətinin satın alınması üzrə 30.12.2025-ci ildə başladığı açıq tenderə yekun vurub. Masabiqənin qalibi “RAPID SERVICES AZERBAIJAN” Məhdud Məsuliyyətli Cəmiyyəti seçilib və tərəflər arasında 767.059 manat məbləğində satınalma müqaviləsi bağlanılıb. Məlumat satınalmaların portalında 05.03.2026-cı ildə dərc edilib.

Qeyd edək ki, şərtlər toplusuna görə MMC-nin texnikaları Bakı, Sumqayıt, Şirvan, Gəncə, Mingəçevir şəhərlərində 0,3 kub ekskavator (qırıcı xətt ilə birgə) İli minimum 2020-ci olan 550 gün, 1 kub ekskavator (qırıcı xətt ilə birgə) İli minimum 2020-ci olan 140 gün, mini yükləyici ekskavator İli minimum 2020-ci olan 80 gün, mini ekskavator rezin tırtıllı İli minimum 2020-ci olan 80 gün, kran 50 ton İli minimum 2020-ci olan 10 gün, özüboşaldan 20m3 İli minimum 2020-ci olan 100 gün xidmət göstərəcəklər.

Qeyd edək ki, “Sutikinti” Məhdud Məsuliyyətli Cəmiyyəti bir satınalma müaviləsi də 11.12.2025-ci ildə “SN LOGİSTİCS” Məhdud Məsuliyyətli Cəmiyyəti ilə doldurma materiallarının satın alınması üzrə bağlayıb. Bu müqavilənin dəyəri 664.694 manat təşkil edib. Şərtlər toplusuna görə qalib şirkət “Sutikinti” MMC-ni 400 m(3) tikintiyə yararlı çınqılla, 300 m(3) qum-çınqıl qarışığı ilə, 25.000 m(3) optimal tərkibli/ yol döşəməsi üçün tikintiyə yararlı qum-qırmadaş qarışığı ilə, 20.000 m(3) 40x70mm/ yol döşəməsi üçün tikintiyə yararlı mişar daşı qırıntısı ilə 20.000 m(3) tikintiyə yararlı mişar daşı ilə təmin etməlidir.

Burada xatırlamağımız yerinə düşərdi ki, bir neçə il öncə Abşeron yarıımadasında, Bakı şəhərinin ətraf qəsəbələrində mağistral su xəttlərinin yeniləri ilə əvəz olunması işləri birbaşa “Sutikinti” Müəssisəsinə həvalə edilmişdi. Həmin dövrdə mediada Zabrat, Binəqədi, Buzovna qəsəbələrinə çəkilmiş su borularının yenilənməsi işlərində külli miqdarda dövlət vəsaitlərinin mənimsənildiyi yazılırdı. Belə ki, yeni su borularının çəkilişi zamanı qazılmış tranşeyə əvvəlcə qum tökülməli, boru onun üstünə qoyulduqdan sonra yenidən qum əlavə edilməlidir. Amma “Sutikinti” Müəssisəsinin rəhbərliyinin göstərişlərinə əsasən boruların üstü qumla deyil adi torpaqla örtülüb. Əvəzində isə bir kubu 30 manata hesablanmış qumun pulu mənimsənilib. Məlumat verənlərin sözlərinə görə “Şaqman” markalı yük avtomobillərinin hər reysinə 900 manat silinib.

İndi kim zəmanət verə bilər ki, “SN LOGİSTİCS” MMC “Sutikinti” üçün aldığı qum-çınqıl adi torpaqla əvəz etməyəcək, və ayrılan altı yüz min manatdan çox dövlət vəsaitinin çoxunu təyinatından kənarlaşdırmayacaq?

Qeyd edək ki, bu satınalmanın ehtimal olunan qiyməti 1.051.629,77 manat müəyyən edilib.  “Dövlət Satınalmaları haqqında” Azərbaycan Respublikasının Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Amma göründüyü kimi “Sutikinti” MMC açıq tender müsabiqəsində ehtimal olunan qiymətlə müqayisədə 20 faizdən dəfələrlə aşağı qiymət təqdim etmiş  “SN LOGİSTİCS”  MMC ilə satınalma müqaviləsi bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir.

Qeyd edək ki, “SN LOGİSTİCS”  MMC 2022-2025-ci illərdə “Azərsu” ASC ilə çınqıl və qum-çınqıl qarışığının satın alınması üzrə ümumi dəyəri 1 688 193 manat dəyərində 4 satınalma müqaviləsi bağlayıb.  İri Şəhərlərin Birləşmiş Su Təchizatı Xidməti isə 19.12.2025-ci ildə sözügedən MMC ilə tikinti sahəsi və yol döşəməsi üçün lazım olan mal-materialların satın alınması üzrə 987.660 manat məbləöində satınalma müqailəsi bağlayıb.

Qeyd edək ki, “Sutikinti” Məhdud Məsuliyyətli Cəmiyyəti uzun illər  “Azərsu” Açıq Səhmdar Cəmiyyətinin tabeliyində “Sutikinti” Tresti kimi fəaliyyət göstərib. Trest heç də balaca bir idarə olmayıb və kifayət qədər işçi qüvvəsi, texniki bazaya malik olub.

Müəsisə vaxtılə “Azərsu” ASC-nin tələbatları və digər təşkilatlarla bağlanmış müqavilələr əsasında su və kanalizasiya qurğularının, mənzil və digər sosial obyektlərin tikintisi, təmiri və yenidən qurulması işlərini yerinə yetirməklə məşğul olub.Hər il dövlət tərəfindən, yəni “Azərsu” ASC tərəfindən müxtəlif layihələrin həyata keçirilməsi məqsədi ilə buraya milyonlarla manat vəsait ayrılıb.

2023-cü ilin yayında elektron mediada yer alan məlumatlara görə qurum ya ləğv olunma, ya da başqa bir müəssisəyə birləşdirilməsi prosesində olub. Həmin məlumatlara görə buna səbəb son illər müəsisədə aparılan yoxlamalar olub. Bildirilir ki, müəssisədə külli miqdarda dövlət vəsaiti talan edilib. Hətta buna görə “Azərsu” ASC-nin əvvəlki sədri Qorxmaz Hüseynov ciddi sorğu-suala çəkilib.  Çünki, mənimsəmələrin  böyük əksəriyyəti məhz onun dövründə olduğu iddia edilir. Onun adamı kimi isə qohumu, müəsisənin birinci müavini vəzifəsini daşıyan Nurəli Cəbrayılovun adı hallanırdı.

Göründüyü kimi vaxtıilə “Azərsu” ASC-nin tabeliyində olan “Sutikinti” Müəssisəsi kifayət qədər böyük bir qurum olub və balansında çoxsaylı müxtəlif texnikaları olub. Maraqlıdır bu texnikalar necə olub ki, indi “Sutikinti” MMC -yə texnikaları icarəyə götürmək zərurəti yaranıb.

2025-ci ilin iyulunda yayılan məlumatlarada isə “Sutikinti” Müəssisəsi adını və təşkilati-hüquqi formasını dəyişdiyi bildirilir. Qurum “İri Şəhərlərin Birləşmiş Su Təchizati Xidməti” Publik Hüquqi Şəxsin “Sutikinti” Məhdud Məsuliyyətli Cəmiyyətə çevrildiyini elan edib. Qeyd edək ki, həmin dövrdə sözügedən qurumun dövlətə 5 842.08 manat vergi borcu olub.

Qeyd edək ki, “Sutikinti” Məhdud Məsuliyyətli Cəmiyyətn direktoru Orxan İmanlıdır. O, daha əvvəl Sumqayıt Melioservis İdarəsinin rəisi olub. Azərbaycan Dövlət Su Ehtiyatları Agentliyinin sədri Zaur Mikayılovun əmri ilə 2024-cü ilin oktyabrından “Sutikinti” MMC-yə rəhbər təyin edilib. Xatırladaq ki, Sumqayıt Melioservis İdarəsi carı ilin fevralın 18-də ləğv edilib. Orxan İmanlının Sumqayıt Melioservis İdarəsini talaması barədə də məlumatlar yayılıb.

Aktualinfo.net

Azərbaycanda zaman-zaman dövlət qurumlarında aparılan kadr dəyişiklikləri və korrupsiyaya qarşı mübarizə çərçivəsində bir sıra qurumların fəaliyyəti daha ciddi şəkildə ictimai müzakirə mövzusuna çevrilir. Xüsusilə də yol təsərrüfatı sahəsi bu baxımdan diqqət mərkəzində saxlanılır.

Belə ki, Saleh Məmmədovun Azərbaycan Avtomobil Yolları Dövlət Agentliyinin sədri vəzifəsindən uzaqlaşdırılmasından sonra agentliyin strukturuna daxil olan əksər yol istismar idarələrində baş verən proseslər diqqətdən yayınmır.



XALQ-a daxil olan məlumata görə, AAYDA-nın balansında olan 7 saylı Yol İstismar İdarəsinin rəisi Müşfiq İmranovun son illərdə sürətlə artan maddi imkanları diqqətdən yayınmır.

Məlumatlarda iddia olunur ki, Müşfiq İmranov Bakının müxtəlif ərazilərində bir neçə kommersiya obyektinə sahibdir. Bundan əlavə, onun paytaxtın ən bahalı yaşayış komplekslərindən biri hesab edilən Port Baku Residencedə dupleks mənzil sahibi olduğu deyilir.

Qeyd edək ki, həmin yaşayış kompleksində mənzillərin qiyməti adətən yüz minlərlə manatla ölçülür.

Məlumatlarda həmçinin iddia olunur ki, idarə rəisinin istifadəsində 77 FM 110 dövlət nömrə nişanlı “Lynk & Co” markalı avtomobil var. Mənbələrin sözlərinə görə, bu avtomobilin bazar qiyməti təxminən 90 min manat civarındadır.

Bu faktlar fonunda ictimaiyyətdə əsas müzakirə olunan sual isə belə formalaşır: rəsmi maaşı təxminən 830 manat olan bir dövlət məmuru bu qədər maddi imkanları hansı mənbələr hesabına əldə edib?

Məlumatlarda o da qeyd olunur ki, Müşfiq İmranov 15 saylı Yol İstismar İdarəsinin sabiq rəisi Zahid Nuriyevin kürəkənidir. Hazırda isə həmin idarəyə Vüqar Nuriyev rəhbərlik edir. Vüqar Nuriyevin Balaxanı qəsəbəsində asfalt zavodu fəaliyyət göstərir. Eyni zamanda onun “Rest Time” adlı restoran biznesi ilə məşğul olduğu da iddialar arasındadır.

Yol təsərrüfatı sahəsində çalışan şəxslərin eyni zamanda asfalt istehsalı və tikinti materialları biznesi ilə əlaqələrinin olması potensial maraqlar toqquşması yaradır. Belə hallarda dövlət sifarişləri, tenderlər və podrat işləri ilə bağlı şəffaflıq məsələləri də gündəmə gəlir.

Qeyd olunan iddialarla bağlı hələlik nə Azərbaycan Avtomobil Yolları Dövlət Agentliyi, nə də adı çəkilən şəxslər tərəfindən rəsmi açıqlama verilməyib.

Məsələnin ictimai əhəmiyyəti nəzərə alınaraq aidiyyəti qurumların bu iddialara münasibət bildirməsi və faktların araşdırılması cəmiyyət üçün maraqlı olardı.(Xalq.online)

Yazıda adı çəkilən şəxslərin və qurumun mövqeyini dərc etməyə hazırıq.

2-ci qrup gözdən əlil 18 ildir haqqı olduğu mənzili gözləsə də, Sosial Xidmətlər Agentliyi onu bu haqqından məhrum edib...

Poliqon xəbər verir ki, 2-ci qrup gözdən əlil olan Sabail rayonu sakini Niftaliyeva Sevil Həsən qızı Azərbaycan Respublikasının Prezidenti İlham Əliyevə müraciət ünvanlayıb. Şikayətçi müraciətində bildirib ki, gözdən əlil kimi 18 ildir mənzil növbəsində olsa da, hələ də mənzillə təmin olunmayıb. Halbuki ondan sonra növbədə olanların demək olar ki, hamısı Sosial Xidmətlər Agentliyi tərəfindən mənzillə təmin olunublar.

Belə ki, Sevil Niftalıyeva 03 dekabr 2007-ci il tarixdən etibarən mənzil növbəsində dursa da, müvafiq qərara uyğun olaraq birotaqlı mənzillə təmin olunmayıb. Agentlikdən aldığı və İdarə Heyətinin sədrinin müavini Faiq Ağayevin imzaladığı son məktubda isə bildirilir ki, Agentliyin tabeleyində bir otaqlı mənzil olmadığına görə, gözdən əlil qanunvericiliyə uyğun qaydada mənzillə təmin olunmayıb və bir otaqlı mənzil olan kimi əlil mənzillə təmin olunacaq.

Qeyd edək ki, 18 il müddətində Sosial Xidmətlər Agentliyinin tabeleyində bir otaqlı mənzilin olmaması heç də inandırıcı görünmür. Elə dövrü mətbuata nəzər salsaq, görərik ki, bir otaqlı mənzillər bir çox gözdən əlillərə verilib. Amma nə sirrdisə, Agentlik 18 il müddətində Sevil Niftalıyevanı mənzillə təmin etməyib. Demək ki, Agentlik bir otaqlı mənzilin olmaması ilə bağlı gətirdiyi səbəb heç də inandırıcı deyil. Əslində bu, “get ay batandan sonra gəl” anlamında verilən bir cavabdır və bu cavabın hansı məqsəd güddüyü də sual doğurur.

“Cənab prezident!

Artıq 18 ildən çox vaxt keçməsinə baxmayaraq, mənzil problemi həllini tapmamışdır. Mənə bildirilir ki, birotaqlı mənzil mövcud deyil. Halbuki mən uçuq və yaşayış üçün yararsız vəziyyətdə olan evdə yaşamağa məcburam. Sağlamlıq vəziyyətim nəzərə alınarsa, bu şərait mənim üçün həm təhlükəli, həm də ağırdır.

Hesab edirəm ki, dövlət tərəfindən qəbul olunmuş qərarın icrası gecikdirilməməlidir. Əgər birotaqlı mənzil faktiki olaraq mövcud deyilsə, mənim hüququm təmin edilərək ikiotaqlı mənzillə əvəz olunması məsələsinə baxılması məqsədəuyğun olar. Çünki əsas məsələ mənzil sahəsinin ölçüsü deyil, yaşayış hüququmun təmin edilməsidir”, deyə Sevil Niftalıyevanın Prezidentə ünvanladığı müraciətində vurğulanır.

Qeyd edək ki, şikayət əsasında redaksiyamız hüquqşünasla məsləhətləşmələr aparıb. Hüquqşünasın bildirdiyinə görə, gözdən əlilllərin evlə təmin olunması 3 il müddətində həyata keçirilməlidir və bu qanunvericiliyin tələbidir. Bu müddət ötdükdən sonra əlil növbədənkənar evlə təmin olunmalıdır. Həmçinin hüquqşünas onu da vurğulayıb ki, qanunvericiliyin tələblərinə görə, bir otaqlı mənzilin olmadığı halda, əlil iki otaqlı mənzillə təmin olunmalıdır.

Xatırladaq ki, Sevil Niftalıyeva hazırda bacısın evinə sığınıb. Bundan əvvəl isə qızına aid olan yaşayış üçün yararsız vəziyyətdə olan evdə yaşamağa məcbur olub. Şikayətçi onu da qeyd edir ki, Səbail rayon İcra Hakimiyyətinin əməkdaşları qızının evinə baxış keçiriblər və həmin mənzildə yaşayış şəraitinin olmadığını təsdiqləyiblər. Bundan sonra isə gözdən əlil olan yaşlı qadın bacısına sığınmağa məcbur olub. Lakin bacısın evində də sakin çoxluğu ilə bağlı yaşam şəraiti çox ağırdır. Şikayətçinin həyat yoldaşı yoxdur və hazırda işsiz olan bir qızı var.

Dözülməz şəraitdə yaşadığını bildirən Sevil Niftalıyeva əlilliyi olan bir vətəndaş kimi Konstitusiya ilə qorunan sosial müdafiə hüququnun təmin olunmasını istəyir.

“Möhtərəm prezidentimiz! Mən uzun illərdir səbir və ümidlə gözləyirəm. Əlilliyi olan bir vətəndaş kimi Konstitusiya ilə qorunan sosial müdafiə hüququmun təmin olunmasını Sizdən xahiş edirəm.

Sizdən xahiş edirəm ki, məsələ obyektiv araşdırılsın və mənzil təminatı ilə bağlı qəbul olunmuş qərarın icrası təmin edilsin”, deyə Sevil Niftalıyeva Prezidentə müraciətində yazır.

Qeyd edək ki, Sevil Niftalıyevanın şikayəti əsasında Poliqon martın 4-də Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinə sorğu ilə müraciət edib. Aradan kifayət qədər vaxt keçməsinə baxmayaraq, sorğumuza cavab ala bilməmişik.

Xatırladaq ki, Azərbaycan Respublikasının “İnzibati Məcəllə”sinə və “Media haqqında” qanuna görə media resursunun sorğusunun cavablandırılmaması inzibati məsuliyyət yaradır.

Sosial Xidmətlər Agentliyinin sorğumuzu cavablandırmaması isə onu deməyə əsas verir ki, ya Agentliyin ictimaiyyətlə əlaqələrlə bağlı fəaliyyətində ciddi qüsur və saymamaqzlıq var, ya da Agentliyin gözdən əlilin iddiaları ilə bağlı deməyə sözü yoxdur.

Bütün hallarda ümid edirik ki, Sosial Xidmətlər Agentliyi öz vəzifələrinə məsuliyyətlə yanaşacaq və bir əlilin 18 il müddətində hansı səbəbdən mənzillə təmin olunmamasına normal və inandırıcı şəkildə açıqlıq gətirəcək.