Azərbaycanda adambaşına düşən aylıq xərcin artım tempi azalmaqda davam edir. Yanvarda adambaşına düşən orta aylıq xərc illik müqayisədə 17 manat, yanvar-fevralda 14,5 manat, yanvar-martda 13 manat, yanvar-apreldə 11,8 manat artıb.
Azərbaycanda adambaşına düşən orta aylıq xərc artsa da, bu artım tempində azalma davam edir.
Dövlət Statistika Komitəsinin məlumatına görə, 2024-cü ilin yanvar-aprel aylarında pərakəndə ticarət şəbəkəsində əhalinin bir nəfəri orta hesabla ayda 416,5 manat pul xərcləyib. Bu göstərici ötən ilin müvafiq dövrü ilə müqayisədə 11,8 manat və ya 2,9 faiz çoxdur. Pərakəndə ticarətdə 416,5 manat xərcin 235 manatı ərzaq məhsulları, içkilər və tütün məmulatlarının, 181,5 manatı isə qeyri-ərzaq mallarının payına düşüb.
Adambaşına düşən xərcin artım sürəti azalır
Qeyd edək ki, Azərbaycanda adambaşına düşən orta aylıq xərcin artım tempi azalmaqda davam edir. Belə ki, bu ilin yanvar ayında adambaşına düşən orta aylıq xərc illik müqayisədə 17 manat, yanvar-fevral aylarında 14,5 manat, yanvar-mart aylarında 13 manat, yanvar-aprel aylarında 11,8 manat artıb. Rəqəmlərdən də göründüyü kimi, ölkədə adambaşına düşən orta aylıq xərcin artımı azalır.
İnflyasiya aşağı düşdükcə xərcin artım tempi də azalır
Ölkədə adambaşına düşən orta aylıq xərcin artım tempinin azalması inflyasiyanın azalması ilə bağlıdır. Belə ki, bu ilin yanvar-aprel aylarında Azərbaycanda orta illik inflyasiya illik müqayisədə 0,7 faizə düşüb. Halbuki keçən il ölkədə 2022-ci illə müqayisədə orta illik inflyasiya 8,8 faiz təşkil edib. Beləliklə, ölkədə infyasiya kəskin şəkildə aşağı düşməkdədir. Növbəti aylarda inflyasiyanın aşağı düşməsi davam edərsə, adambaşına düşən orta aylıq xərcin artım tempi də azalacaq.
"Qlobal inflyasiya yavaşlayıb"
Mərkəzi Bankın məlumatına görə, inflyasiyanın xarici fonu əlverişli olaraq qalır. Qlobal inflyasiya dünya əmtəə qiymətlərinin aşağı düşməsi nəticəsində yavaşlayıb. Geosiyasi gərginliklər, mühüm beynəlxalq ticarət yollarında yaranan maneələr, iqlim dəyişiklikləri, dünya bazarında əmtəə qiymətlərinin və tərəfdaş ölkələrdə inflyasiyanın dəyişkənliyi xarici mənşəli başlıca inflyasiya riskləri olaraq qalır. Bununla belə dünyada monetar şərtlərin sərt olaraq qalması, ortamüddətli perspektivdə aparıcı ölkələrdə mərkəzi bankların faizləri daha mülayim endirməsi gözləntiləri qlobal inflyasiyanı azaldacaq amildir. İnflyasiyanı artıra biləcək başlıca daxili risk isə yerli xərc amillərinin, eləcə də dövlət xərclərinin aktivləşməsi və məcmu tələbin izafi artımı ilə əlaqədardır.
"Ümumilikdə, inflyasiyanın artırıcı və azaldıcı riskləri bir-birini tarazlaşdırır. Mövcud şərtlərin dəyişməz qalacağı təqdirdə 2024-cü və 2025-ci illərdə illik inflyasiyanın hədəf daxilində olacağı gözlənilir", - Mərkəzi Bankın məlumatında bildirilib.

Pərakəndə ticarət dövriyyəsi artır
Dövlət Statistika Komitəsinin məlumatına görə, 2024-cü ilin yanvar-aprel aylarında pərakəndə ticarət şəbəkəsində istehlakçılara 17 milyard manatlıq, o cümlədən 9,6 milyard manatlıq ərzaq məhsulları, içkilər və tütün məmulatları, 7,4 milyard manatlıq qeyri-ərzaq malları satılıb. Keçən ilin eyni dövrü ilə müqayisədə pərakəndə ticarət dövriyyəsi 3,3 faiz, o cümlədən ərzaq məhsulları, içkilər və tütün məmulatları üzrə 1,9 faiz, qeyri-ərzaq malları üzrə 5,1 faiz artıb.

Ən çox ərzaqlara pul xərclənir
Bu ilin yanvar-aprel aylarında alıcıların pərakəndə ticarət şəbəkəsində aldıqları mallara xərclədiyi vəsaitin:
51,2 faizi ərzaq məhsullarının,
5,2 faizi içkilər və tütün məmulatlarının,
13,4 faizi toxuculuq məhsulları, geyim və ayaqqabıların,
5,8 faizi avtomobil benzini və dizel yanacağının,
4,4 faizi elektrik malları və mebellərin,
2,4 faizi əczaçılıq məhsulları və tibbi ləvazimatların,
1,3 faizi kompüterlər, telekommunikasiya avadanlıqları və çap məhsullarının,
16,3 faizi isə digər qeyri-ərzaq mallarının alınmasına sərf olunub.
Əhalinin dərman xərcləri artıb
Bu ilin yanvar-aprel aylarında əhali əczaçılıq məhsulları və tibbi ləvazimatlara 401,9 milyon manat pul xərcləyib ki, bu da ötən ilin eyni dövrü ilə müqayisədə 0,5 faiz çoxdur.
Xatırladaq ki, Baş nazir Əli Əsədov bildirib ki, 2023-cü ildə inflyasiya xarici və daxili amillərin, o cümlədən həyata keçirilən antiinflyasiya siyasətinin təsirindən azalıb:
"Hökumət tərəfindən həyata keçirilən antiinflyasiya tədbirləri, valyuta bazarında tarazlığın qorunması, məzənnə sabitliyinin idxal inflyasiyasına azaldıcı təsiri, monetar siyasət qərarları inflyasiya təzyiqlərini yumşaldıb. Keçən il Nazirlər Kabinetində inflyasiya proseslərinin və onun səbəblərinin araşdırılması və təhlili istiqamətində "İnflyasiya və qiymət monitorinqi" üzrə İşçi Qrup yaradılıb".
Əlavə edək ki, 2022-ci il fevralın 21-də Nazirlər Kabineti "Azərbaycan Respublikasında antiinflyasiya tədbirlərinin gücləndirilməsi ilə bağlı təxirəsalınmaz tədbirlər haqqında" Sərəncam imzalayıb. Sərəncamda deyilib ki, ölkədə makroiqtisadi sabitlik qorunmalı, dünya ərzaq qiymətlərinin daxili istehlak bazarına qiymət təzyiqi azaldılmalı, əhalinin real gəlirləri və alıcılıq qabiliyyəti inflyasiya artımı şəraitində qorunmalıdır.
Sputnik

Azərbaycan sığorta şirkətləri institutsional investor kimi potensialını reallaşdırmaqdadır.

TEREF “Report”a istinadən xəbər verir ki, bu barədə Azərbaycan Mərkəzi Bankının (AMB) “2023-cü il üzrə Maliyyə sabitliyi hesabatı”nda bildirilir.

Məlumata görə, sığorta şirkətlərinin investisiyaları ötən ilin sonu ilə müqayisədə 18 % artaraq 1,501 milyon manata çatıb.

Vurğulanıb ki, artım əsasən dövlət qiymətli kağızları hesabına baş verib. Ümumilikdə, həyat sığorta şirkətlərinin aktivlərinin 91 %- ni, qeyri-həyat sığorta şirkətlərinin aktivlərinin isə 73 %-ni investisiya portfeli təşkil edir.

Qeyd olunub ki, sığorta şirkətlərinin investisiya aktivləri əsasən dövlət qiymətli kağızlarından və bank vəsaitlərindən ibarətdir.

2023-cü ildə sığorta sektoru investisiya fəaliyyətindən 85 milyon manat gəlir əldə edib ki, bu da cəmi gəlirlərin 6 %-ni təşkil edir.

Hersabatda bildirilib ki, sığorta şirkətlərinin mənfəətliliyi artıb. 2022-ci ilin sonu ilə müqayisədə həm həyat, həm də qeyi-həyat sığorta şirkətləri daha çox mənəət generasiya ediblər. Qeyri-həyat sığorta şirkətləri üzrə artım daha nəzərəçarpan olub. Hər iki qrup üzrə artımın səbəbi əsas əməliyyat gəlirlərinin artımı olub.

Hesabat ili ərzində sektorun məcmu kapitalı və kapital buferi artıb. Ötən il sığorta sektoru üzrə məcmu kapital 12 % artıb. Məcmu kapitalın tələb olunan kapitala nisbəti 7 faiz bəndi artaraq 183 % olub.

Bank sektorunun əlavə 5,3 mlrd. manat kredit vermək potensialı var.

Bunu Azərbaycan Mərkəzi Bankının sədri Taleh Kazımov deyib.

O bildirib ki, Mərkəzi Bankın sistem əhəmiyyətli banklar üzrə kapital adekvatlığı tələbi 12%, likvidliklə bağlı tələbi isə 30%-dir. Hazırda rəqəmlər müvafiq olaraq 17,5% və 53%-dir. Yəni, likvidlik səviyyəsi 30%-ə endirilsə və bizim digər tələblərimizə riayət etməklə bank sektoru əlavə 5,3 mlrd. manat həcmində kredit verə bilər. Hesablama bu şəkildə aparılıb.

AMB sədri ümumilikdə bank sektorunun 25 mlrd. manat səviyyəsinə böyümə potensialının olduğunu deyib: "Bankların kapital mövqeyi və borclanma səviyyəsi Mərkəzi Bankın tələbləri nəzərə alınmaqla bank sektorunun böyümə potensialının 25 mlrd. manat olduğunu deməyə əsas verir. Bu potensialın reallaşdırılması üçün bir neçə struktur səbəblər olmalıdır. Bu, təkcə bankdan deyil, iqtisadiyyatdan da aslıdır. Yəni riyazi olaraq göstəririk ki, bank sektorunun əlavə 25 mlrd. manat aktivləri olsa, bu, bizim tələblərimizə uyğundur. Amma bu potensialın hansı müddətə reallaşdırılmasını demək mümkün deyil".//APA

“Taksilərin sayı 10-15 min civarında azala bilər”

Bu yaxınlarda Nazirlər Kabinetinin taksi fəaliyyəti göstərən avtonəqliyyat vasitələrinin texniki göstəriciləri ilə bağlı müəyyən etdiyi yeni tələblərin mənfi effekti artıq yavaş-yavaş hiss olunmağa başlayıb.

Belə ki, taksi sürücülərinin mətbuata verdikləri açıqlamalara görə, iyun ayının birindən etibarən taksilərdə minimum gedişhaqqı məbləği iki dəfəyə yaxın bahalaşaraq, 4 manat 50 qəpiyə yüksələcək. Sürücülər bu barədə taksi şirkətlərindən onlara məlumat verildiyini bildiriblər. İstehsal ili yeni qanunun tələblərinə cavab vermədiyi üçün bir çox avtomobillərin artıq şirkətlə əməkdaşlığının sonlandırıldığı iddia olunur.

“1999 və 2000-ci il istehsalı olan avtomobillər taksi fəaliyyətindən kənarlaşdırıldığına görə, avtomobillərin sayında azalma var. Bir azdan istehsal ili 2005-ci ilədək olan “Opel” və digər markalı avtomobillərin də sifarişlərinə blok qoyulacaq. Bundan sonra taksi çatışmazlığı daha qabarıq şəkildə özünü biruzə verəcək. Bu da da öz növbəsində qiymətlərə təsirsiz ötüşməyəcək”- deyə, taksi sürücülərindən biri yerli mətbuata bildirib.

Xatırladaq ki, 2024-cü il iyulun 1-dən qüvvəyə minəcək yeni qanun buraxılış tarixindən 15 ildən artıq müddət keçmiş avtonəqliyyat vasitələrinin taksi kimi fəaliyyət göstərməsini qadağan edir. Həmçinin 1 iyul 2024-cü ildən sonra buraxılış tarixindən 8 ildən artıq müddət keçmiş avtonəqliyyat vasitələrinə taksi fəaliyyəti üçün müvafiq kartının verilməyəcəyi deyilir. Eyni zamanda bildirilir ki, buraxılış kartı almaq üçün taksi minik avtomobilləri ən azı “avro-5” ekoloji standartına uyğun olmalıdır.


Qeyd edək ki, 2024-cü ildə sözügedən qanunun elan olunması ilə birlikdə taksilərin sayında nəzərəçarpacaq dərəcədə azalma baş verib. Belə ki, 2023-cü ilin sonlarında açıqlanan rəsmi statistikaya görə, paytaxt Bakıda 67 min taksi var idi. Son aylar əksər sahibkarlar qanunun tələblərinə cavab verməyən avtomobillərini dəyər-dəyməzinə satışa çıxarmağa başladığı üçün bu say 67 mindən 60 minə qədər azalıb.

Rəsmi qurumların səsləndirdikləri bəyanatlara görə, əsas hədəflərdən biri paytaxtda taksilərin sayını 20 minə qədər azaltmaqdır. Səlahiyyətli şəxslər sözügdən sayda taksinin paytaxt əhalisinin tələbatını qarşılaya biləcəyini deyirlər. Həmçinin bir çox ekspertlər də müvafiq qanunun qüvvəyə minməsi ilə birlikdə paytaxtda taksilərin sayının azalacağı fikrindədirlər. Buna səbəb kimi hazırda Azərbaycanın avtomobil parkının böyük hissəsini köhnə avtomobillərin təşkil etməsi göstərilir.

Qeyd edək ki, Dövlət Statistika Komitəsinin məlumatına görə, Azərbaycanda avtomobil parkının 80 faizinin yaşı 15 il və daha artıqdır. Ötən il ölkəyə idxal olunan 90 mindən artıq maşının cəmi 12 mini elektrik və hibrid olub. Yaşlarına gəlincə, avtomobillərin 60 faizdən artığı 8-15 il əvvəlin istehsalı olub. Bu fakt həqiqətən də onu deməyə əsas verir ki, taksi fəaliyyəti göstərən avtomobillərin də bir çoxunun istehsal ili köhnədir. Odur ki, qanundakı məhduddiyyətlər ölkənin taksi bazarına önəmli ölçüdə təsir edərək, taksilərin sayında ciddi azalmaya səbəb olacaq. Bütün bunlar öz növbəsində əhalinin aşağı və orta təbəqəsi üçün də əlçatan olan və azad rəqabət mühitinin formalaşdığı xidmət sahələrindən birinin sıradan çıxması deməkdir.

Çünki bu gün minimum əməkhaqqının 345 manat olduğu ölkədə heç bir vətəndaş əvvəl 5 manata getdiyi yolu indi 2-3 dəfə baha - 10-15 manata getməyəcək. Nəticədə sərnişindaşımada taksilərin fəaliyyəti aşağı düşəcək, hazırda bərbad vəziyyətdə olan ictimai nəqliyyata böyük axın baş verəcək. Qeyd edək ki, təkcə ötən il taksi ilə 37 milyondan çox sərnişin daşınıb.

Bəs taksiyə yeni məhdudiyyət gətirib, qiymətin artmasına səbəb olan səlahiyyətli orqanlar ictimai nəqliyyatda yaranacaq bu cür xaotik vəziyyəti nə cür idarə edəcəklərini də əvvəlcədən düşünüblərmi?

Mövzu ilə bağlı iqtisadçı Xalid Kərimli “AzPolitika”-ya şərhində bildirib ki, taksi fəaliyyətinə dair tələblər artdıqca taksilərin sayında azalma və mövcud taksilərin xərclərində artım müşahidə olunacaq: “Hər iki amil qiymət artırıcı faktordur. Taksilərin sayının azalması rəqabəti aşağı salacaq. Digər tərəfdən isə tələblərə cavab verən taksilər də avtomobillərinə POS-terminal və taksometr quraşdırmalı olacaqlar. Başqa sözlə, tələblərə cavab verən taksilər artıq ekonom yox, premium sinfə aid olacaq. Ucuz taksilərin sıradan çıxması təbii olaraq bahalaşmaya gətirib çıxaracaq. Hər halda hökumətin atdığı addımların da məqsədi budur”.

Ekspert qeyd edib ki, taksilərin sayının 20 minə qədər azalıb-azalmayacağını bazar şərtləri müəyyən edəcək:“Sayın azalması və qiymətin artması bu fəaliyyətə marağı artıra da bilər. Yəni kəskin azalmadan sonra taksilərin sayında artım görə bilərik. Bazar bu cür reaksiya verə bilər. Lakin taksi bazarında hansısa durğunluğun olacağını düşünmürəm. Sadəcə taksi xidməti əvvəki kimi bu qədər populyar olmayacaq. Bizdə ictimai nəqliyyat o qədər də yaxşı inkişaf etməyib və taksinin özünün həmişə seqmenti olub. Bu sürətli və komfortlu çatdırıma növünün alternativi də yoxdur. İnsanlar hər zaman tələsirlər və komfort istəyirlər. Qeyd etdiyimi kimi, bu xidmət sahəsi bazara adaptasiya olacaq, amma qiymət səviyyəsi yüksələcək”.

Nəqliyyat eksperti İlqar Hüseynli isə “AzPolitika”-ya şərhində bildirib ki, taksi xidmətində tətbiq olunacaq yeni qaydalar dərin problemlərə səbəb olub:“Qanunun yeni tələbində göstərilib ki, avtomobilin istehsal ili 8 ildən artıq olmamalıdır. Həmçinin 8 il olsa belə, rəng məhdudiyyəti var. Yəni taksi xidməti ilə məşğul olan şəxs və ya fərdi sahibkar bu avtomobili ağ və ya qırmızı rəngə boyamalıdır. Bu, ölkəyə gətirilən yeni avtomobillərə aid ediləcək. Əslində burada da bir məna görmürəm. Amma dünya praktikasında eyni rəngli taksilərdən istifadə edən ölkələr var. Məsələn, nümunə kimi Türkiyəni göstərmək olar. Burada sarı rəngli taksilərdən istifadə olunur. Vaxtilə bizdə də bu cür yanaşma olub. Bir vaxtlar paytaxt taksilərinin qapılarının üzərində xüsusi nişanlar var idi”.

Ekspert də vurğulayıb ki, paytaxtda taksilərin sayının 20 minə qədər azaldılması gündəmdədir:“Burada önəmli məqamlardan biri də insanların sosial, iqtisadi ehtiyaclarının təminatıyla bağlıdıır. İşdən çıxarmaq, qapatmaq - bu hər zaman mümkündür. Amma insanlara alternativ imkanlar yaratmaq lazımdır ki, ailələrinin dolanışığını təmin edə bilsinlər. Düşünürəm ki, bu məhdudiyyətlər öz bəhrəsini verməyəcək. Qeyd etdiyiniz kimi, bu sayı perspektivdə 20 minə salmaq istəyirlər. Azalma gözlənilsə də, bu saya düşürə bilməyəcəklər. Düşünürəm ki, taksilərin sayı 10-15 min civarında azala bilər. Amma onu da nəzərə almaq lazımdır ki, şəxsin son ümidi taksi ilə ailəsinin dolanışığını təmin etməkdirsə və siz bunu onun əlindən alırsınızsa, həmin adam nə etməlidir? Hesab edirəm ki, burada müəyyən yumşalmalara gediləcək ki, insanlar çörəyini qazana bilsin”.

İ. Hüseynlinin sözlərinə görə, taksidəki qiymət artımı vətəndaşların böyük qismini ictimai nəqliyyata yönləndirəcək: “Taksidə minimal gedişhaqqı məbləğinin 4 manat 50 qəpik müəyyən olunması çox böyük rəqəmdir. Bu zaman vətəndaşların böyük əksəriyyəti icitimai nəqliyyata yönələcək. Məsələn, 4 nəfərlik bir ailənin avtobusla gediş-gəlişi elə hardasa taksiyə yaxın rəqəm idi, üstəlik komfort da yox idi. Qiymətlər qalxsa, təbii ki, sifarişlər azala bilər. Bu gün ictimai nəqliyyat da bu sərnişin yükünün öhdəsindən gələ biləcək standartlara sahib deyil. Taksi xidmətindən bu qədər çox insanın istifadə etməsinə baxmayaraq, ötən ilin eyni dövrü ilə müqayisədə bu il ictimai nəqliyyatdan istifadədə 12,5 faizlik artım var. Bu, taksi bazarındakı bahalaşma ilə əlaqədardır”.

Onu da qeyd edək ki, hazırda taksidə minimal gediş haqqı 2,50 AZN-dir.

Elvin Bəyməmmədli

“AzPolitika.info”

"Birbank" debet kartları bundan sonra da daha geniş şəkildə satılacaq.

Hurriyyet.Az xəbər verir ki, bu barədə "Kapital Bank"ın İdarə Heyətinin sədri Fərid Hüseynov 2023-cü ilin maliyyə nəticələri ilə bağlı keçirilən mətbuat konfransında deyib.

Daha ətraflı RTV-də izləyə bilərsiniz:

Bu gün Azərbaycan Mərkəzi Bankında (AMB) keçirilən növbəti valyuta hərracında 44,9 milyon ABŞ dolları satılıb.

Bu barədə AMB-dən məlumat verilib. Bildirilib ki, bu gün Mərkəzi Bankda növbəti valyuta hərracı keçirilib:

“Hərracda tələb 44,9 milyon ABŞ dolları təşkil edib və tam təmin olunub”.

Bu, daha öncə mayın 14-də keçirilən hərracda olan tələbatla müqayisədə 62,2 milyon ABŞ dollar və ya 2,4 dəfə azdır. Hərracın ortaçəkili məzənnəsi 1,7000 manat təşkil edib. Xatırladaq ki, mayın 14-də Mərkəzi Bankda keçirilən valyuta hərracında tələb 107,1 milyon ABŞ dolları təşkil edib və tam təmin olunub. Tələbin nisbətən yüksək olması ötən həftənin cümə axşamının, mayın 9-unun qeyri-iş gününə təsadüf etməsi ilə bağlı olaraq hərracın qrafik üzrə keçirilməməsi səbəbindən yığılan tələblə əlaqədardır. Qeyd edək ki, AMB-nin valyuta hərracı hər həftənin çərçənbə axşamı və cümə axşamları Azərbaycan Dövlət Neft Fondunun iştirakı ilə baş tutur.

Bir müddət əvvəl ölkəmizdə dollar alışının kəskin artması barədə xəbərlər yayılırdı. İndiki rəqəmlər bunun əksini göstərir. Maraqlıdır ki, ölkəmizdə artıq dollar ajiotajı bitib?

Məsələ ilə bağlı iqtisadçı Alif Nəsirli "Cebhe.info"-ya açıqlamasında bildirib ki, Azərbaycan iqtisadiyyatı hazırda idxaldan asılı vəziyyətdədir:

"Günümüzdə ölkədə dollar ajiotajına son qoymaq üçün ölkə iqtisadiyyatının istehsal gücü artmalıdır. Ölkənin intellektinin inkişaf ritmi yüksəlməli, sənaye inkişaf etməlidir. Azərbaycanda bu sahələr primitiv inkişaf səviyyəsindədir, ona görə də biz idxal etmək məcburiyyətində qalırıq. Biz adi kənd təsərrüfatı mənşəli ərzaq məhsullarını belə idxal edirik. Bu yaxınlarda kartof, 1 ay bundan əvvəl soğan idxal etdik. İdxal olunan məhsulların siyahısına nəzər salsaq, görərik ki, gülməli vəziyyətdir. Azərbaycan hətta müəyyən növ çörəkləri belə idxal edir. Niyə? Bu ölkənin daxilində istehsal edilə bilməz?"

O qeyd edib ki, hökümət dollar ajiotajına son qoymaq, Dövlət Neft Fondunda toplanan vəsaitlərin əriməsinin qarşısını almaq istəyirsə, ölkənin daxilində istehsalı genişləndirməlidir:

"Bunun üçün bütün addımlar atılmalıdır. Əgər bu proses baş versə, 1 il ərzində Azərbaycandan valyuta axınının qarşısı 50-60% alına bilər. Hazırda isə dollar ajiotajı bitməyib. Dollara tələbat azala bilər, bu da müəyyən amillərlə bağlıdır. Həm mövsümlə bağlı, həm də yay aylarında ölkəyə turist axını ilə əlaqədar dollara tələbatın aşağı düşməsi normal haldır. Çünki turistlər ölkəyə dollar gətirir, hərracda isə tələbat azalır. Yəni vəziyyət eyni olaraq qalır".

Bu ilin ilk 4 ayı ərzində Azərbaycana 502 milyon 621 min dollar dəyərində 27 min 838 ədəd müxtəlif təyinatlı avtomobil idxal olunub.

Yeniavaz.com-un apardığı hesablamaya görə, idxal olunan bir ədəd avtomobilin orta gömrük dəyəri 18 min 55 dollar (30 min 694 manat) olub.

Müqayisə üçün bildirək ki, ötən ilin eyni dövründə idxal olunan bir ədəd avtomobilin orta gömrük dəyəri 14 min 508 dollar (24 min 664 manat) olub.

Rəqəmlərdən də göründüyü kimi, bir ədəd avtomobilin orta gömrük dəyəri ötən ilin eyni dövrü ilə müqayisədə 24,5% və ya 3 min 547 dollar (6 min 30 manat) artıb.

Onu da bildirək ki, ötən ilin eyni dövrü ilə müqayisədə idxal olunan avtomobillərin sayı 2 min 17 ədəd azalıb.
İdxal olunan avtomobillərin ümumi sayı azalsa da, daxili yanma mühərriklə yanaşı elektrik mühərriklə də hərəkətə gətirilən nəqliyyat vasitələrinin (hibrid) idxalı artıb. Belə ki, ötən ilin ilk 4 ayında xaricdən 4 min 474 ədəd hibrid avtomobil gətirildiyi halda, bu ilin ilk 4 ayında 5 min 111 ədəd hibrid avtomobil gətirilib.

İdxal olunan bir ədəd hibrid avtomobilin orta gömrük dəyəri 31 min 651 dollar (53 min 807 manat) olub. Müqayisə üçün qeyd edək ki, ötən ilin eyni dövründə idxal olunan bir ədəd hibrid avtomobilin orta gömrük dəyəri 19 min 672 dollar (33 min 443 manat) olub. Son bir ildə ölkəyə idxal olunan hibrid avtomobillərin orta gömrük dəyəri 61% və ya 11 min 979 dollar (20 min 364 manat) artıb.

"Apollo Spirit Baku" MMC ləğv olunub.

İqtisadiyyat.az xəbər verir ki, bu barədə şirkət özü elan edib.

Kreditorlar iki ay ərzində tələblərini AZ1022 Bakı şəhəri, Nəsimi rayonu, Cəlil Məmmədquluzadə küçəsi, ev 102A ünvanına bildirə bilərlər.

Qeyd edək ki, "Apollo Spirit Baku" MMC ötən ilin sentyabrında hyaradılıb. Nizamnamə kapitalı 150000 ABŞ dolları olan şirkətin qanuni təmsilçisi Ukrayna vətəndaşı olan Mısechko Volodymyrdir.