 |
|
|
Türkiyə xarici işlər naziri Hakan Fidan IV Antalya Diplomatiya Forumu çərçivəsində ermənistanlı həmkarı Ararat Mirzoyanla görüşüb.
İqtisadiyyat.az xəbər verir ki, bu barədə Ermənistanın Xarici İşlər Nazirliyindən bildirilib.
Nazirlərin hansı məsələləri müzakirə etdikləri açıqlanmır.
Azərbaycan Respublikasının Prezidenti İlham Əliyevin Türkiyəyə işgüzar səfəri aprelin 12-də başa çatıb.
Antalya Beynəlxalq Hava Limanında Prezident İlham Əliyevi və birinci xanım Mehriban Əliyevanı Antalya şəhərinin valisi Hulusi Şahin və digər rəsmi şəxslər yola salıblar.
Türkiyə Prezidenti Rəcəb Tayyib Ərdoğan Suriya Prezidenti Əhməd əş-Şara ilə görüşüb.
Bu barədə Anadolu Agentliyi məlumat yayıb.
Prezidentlər Antalyada keçirilən Diplomatiya Forumu çərçivəsində bir araya gəliblər.
Görüş Ərdoğanın qaldığı hoteldə mətbuata qapalı formada keçirilib.
Aprelin 10-da İstanbulda Rusiya və ABŞ nümayəndə heyətləri arasında danışıqların ikinci mərhələsi baş tutdu və 5 saat davam etdi.
Məsləhətləşmələrdə Kremlin nümayəndə heyətinə Rusiyanın Vaşinqtondakı səfiri Aleksandr Darçiyev, Ağ Evin nümayəndə heyətinə isə dövlət katibinin Avropa və Avrasiya məsələləri üzrə köməkçisinin müavini Sonata Kulter başçılıq edib. İkinci görüş yeri ilə bağlı seçim isə xüsusi diqqət çəkib. Belə ki, fevralda baş tutan görüş İstanbuldakı ABŞ səfirliyində, bu dəfə isə Rusiya səfirliyində keçirilib.
Tərəflər bir daha müzakirələrin Ukrayna ilə əlaqəsinin olmadığını, iki ölkə arasındakı münasibətlərin normallaşması ilə bağlı fikir mübadiləsinin aparıldığını vurğulayıblar.
TEREF xəbər verir ki, Globalinfo.az-a danışan politoloq Qabil Hüseynli deyib ki, Rusiya və ABŞ nümayəndə heyətləri arasında danışıqların ikinci mərhələsi də birinci mərhələsi kimi uğurlu olub:
“Tərəflərin bir-birinin qarşılıqlı maraqlarına önəm verməsi, gərginlikdən yayınması diqqət çəkir. Məsələn, görüş yeri ilə bağlı balansa önəm verilməsi, ABŞ səfirliyindən sonra indi də Rusiya səfirliyində baş tutması mühüm məqamdır. Hər iki ölkə belə şeylərə diqqət edir.
İkinci görüş daha çox Vaşinqton-Moskva münasibətlərinin normallaşmasına həsr olunmuşdu desək, yerinə düşər. Bunu iki ölkə rəsmisi də təsdiqləyir. ABŞ və Rusiya arasında Ukrayna müharibəsi ilə bağlı bir çox qarşılıqlı sanksiya, məhdudiyyətlər var. Bunların aradan qalxması çox vacibdir. Ona görə də məsləhətləşmələrin növbəti raundu iki ölkə arasında diplomatik nümayəndəliklərin inkişafı ilə bağlı irəliləyiş əldə etməyə imkan yaratdı.
Politoloq əlavə edib ki, görüşdə tərəflər Rusiya və ABŞ diplomatlarının gediş-gəlişini və onların viza tələblərini asanlaşdırmaq üçün gələcək tədbirlər haqqında razılığa gəliblər:
“Bu, həm də müzakirələrin artıq üçüncü ölkədə yox, birbaşa Rusiya və ABŞ-da aparılması deməkdir. Təcrübə göstərir ki, belə danışıqlar daha effektivdir.
İstanbulda Rusiyanın ABŞ-da müsadirə edilmiş diplomatik əmlakının tez bir zamanda qaytarılmasının prioriteti vurğulanıb. Bu, iki ölkə arasında etimadı sarsıdan əsas faktorlardan idi. Böyük ehtimal müsadirə edilən əmlak içərisində məxfi sənədlər olub. Düzdür, indiki məqamda onların geri qaytarılmasının nəyi dəyişəcəyini söyləmək çətindir, amma belə bir tələb varsa, deməli mühümdür.
Hesab edirəm ki, ən önəmli detal tərəflərin danışıqların davam etdirilməsi ilə bağlı razılığa gəlmələri oldu. Böyük ehtimalla görüşlərin üçüncü, dördüncü raundu da olacaq. Amma bir müddət sonra artıq diplomatlar müzakirələri Rusiya və ABŞ-da davam etdirə bilərlər”.
Prezident İlham Əliyevin həyata keçirdiyi uzaqgörən, praqmatik və ardıcıl siyasət nəticəsində Azərbaycan son illərdə regionda və dünyada mühüm siyasi, iqtisadi və humanitar mərkəzlərdən birinə çevrilib. 2020-ci ildə Vətən müharibəsində qazanılan tarixi Qələbə ölkəmizin suverenliyini və ərazi bütövlüyünü bərpa etməklə yanaşı, Azərbaycanın beynəlxalq aləmdəki mövqeyini daha da gücləndirib, onu etibarlı tərəfdaş və qlobal proseslərə təsir göstərən dövlət kimi tanıdıb. Bu gün Azərbaycan dünya birliyində sabitlik, inkişaf və əməkdaşlıq simvolu kimi çıxış edir. Ölkəmizlə əməkdaşlıq etmək istəyən dövlətlərin və beynəlxalq təşkilatların sayı durmadan artır. Xarici siyasətdə balanslaşdırılmış yanaşma, qarşılıqlı hörmətə və faydaya əsaslanan münasibətlər Azərbaycanın beynəlxalq nüfuzunun artmasına şərait yaradıb. Dövlətimizin başçısının beynəlxalq və regional tədbirlərdə iştirakı, habelə Azərbaycanın ev sahibliyi etdiyi yüksəksəviyyəli Zirvə görüşləri ölkəmizə olan marağın və etimadın bariz göstəricisidir. Son bir neçə ildə Prezident İlham Əliyevin Mərkəzi Asiya Dövlət Başçılarının 5-ci Məşvərət Görüşündə, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 6-cı Zirvə Görüşündə, Şanxay Əməkdaşlıq Təşkilatının sammitlərində, Ərəb Dövlətləri Liqasının 31-ci Sammitində, SPECA – Mərkəzi Asiya Ölkələrinin İqtisadiyyatları üçün Xüsusi BMT Proqramının Zirvə Görüşündə, Davos Dünya İqtisadi Forumunda iştirakı ölkəmizə marağın əyani təcəssümüdür. Azərbaycanın beynəlxalq nüfuzunun davamlı artmasının növbəti təsdiqi kimi, Prezident İlham Əliyev aprelin 11–13-də Türkiyənin Antalya şəhərində keçiriləcək IV Antalya Diplomatiya Forumunda iştirak etmək üçün dəvət alıb. Forum müxtəlif ölkələrdən nüfuzlu siyasətçiləri, dövlət və hökumət başçılarını, xarici işlər nazirlərini bir araya gətirərək, son illər ərzində region üçün əhəmiyyət kəsb edən ən önəmli məsələlərin və çağırışların müzakirəsi baxımından çox vacib beynəlxalq platformaya çevrilib.
Forumda “Parçalanmış dünyada diplomatiyanı bərpa etmək” mövzusu ətrafında qlobal çağırışların müzakirəsi nəzərdə tutulur. Prezident İlham Əliyevin bu forumda iştirakı bir daha göstərir ki, Azərbaycan yalnız regionda deyil, həm də qlobal miqyasda etibarlı tərəfdaş və təşəbbüskar dövlət kimi qəbul edilir. Dövlətimizin başçısının beynəlxalq münasibətlər sahəsində zəngin təcrübəsi, strateji baxışları və praqmatik yanaşmaları onu beynəlxalq platformalarda böyük maraqla qarşılanan Liderə çevirib. Prezident İlham Əliyevin iştirakı ilə keçirilən forumlar və zirvə görüşləri təkcə diplomatik formatda deyil, həm də məzmun və nəticələr baxımından yeni keyfiyyət mərhələsinə yüksəlir.
Azərbaycan və Türkiyə arasında əsası Ümummilli Lider Heydər Əliyev tərəfindən qoyulmuş “Bir millət, iki dövlət” prinsipinə əsaslanan münasibətlər bu gün hər iki ölkənin rəhbərlərinin siyasi iradəsi və şəxsi dostluqları sayəsində ən yüksək zirvəyə çatıb. Bu münasibətlər təkcə iki qardaş ölkə arasında deyil, həm də regionun təhlükəsizliyi və inkişafı baxımından strateji əhəmiyyət daşıyır. Prezident İlham Əliyevlə Türkiyə Prezidenti Rəcəb Tayyib Ərdoğan arasında formalaşmış qarşılıqlı etimada əsaslanan əməkdaşlıq bu birliyin davamlılığını və gücünü təmin edən əsas amillərdəndir.
Antalyada keçiriləcək görüşlər Azərbaycan-Türkiyə münasibətlərinin hazırkı vəziyyətinə və inkişaf perspektivlərinə dair əhəmiyyətli fikir mübadiləsi üçün geniş imkanlar yaradacaq. Bu səfər, həmçinin ikitərəfli əməkdaşlığın siyasi, iqtisadi, enerji, nəqliyyat, müdafiə və digər sahələrdə daha da dərinləşdirilməsi baxımından mühüm addım olacaq. Bununla yanaşı, Azərbaycan və Türkiyə bu gün regional təhlükəsizliyin təminatçıları, sülh və əməkdaşlığın təşəbbüskarları kimi çıxış edirlər. Onların regiondakı fəallığı, Cənubi Qafqazdan Mərkəzi Asiyaya, Qara dənizdən Aralıq dənizinə qədər geniş coğrafiyada sabitliyin qorunmasına verdikləri töhfə beynəlxalq aləmdə yüksək qiymətləndirilir.
Türkiyə-Azərbaycan münasibətlərinin unikal xarakteri və bu əlaqələrin sabitliyi regional inteqrasiya və ortaq inkişaf baxımından nümunəvi model kimi çıxış edir. Heç şübhəsiz, Prezident İlham Əliyevin Antalyaya işgüzar səfəri və Antalya Diplomatik Forumunda iştirakı təkcə iki ölkə arasında strateji münasibətlərin daha da möhkəmləndirilməsi baxımından deyil, həm də Azərbaycanın beynəlxalq mövqelərinin güclənməsi və sülh təşəbbüslərinin irəlilədilməsi baxımından mühüm hadisə olacaq.
Azərbaycanın artan beynəlxalq nüfuzu, onun iqtisadi, enerji və nəqliyyat sahələrində həyata keçirdiyi irimiqyaslı layihələrlə də sıx bağlıdır. Ölkəmiz bu gün regionun enerji xəritəsini müəyyən edən aparıcı aktorlardan biri kimi çıxış edir. Prezident İlham Əliyevin rəhbərliyi ilə reallaşdırılan və dünya enerji təhlükəsizliyinə mühüm töhfə verən Cənub Qaz Dəhlizi layihəsi Avropanın enerji mənbələrinin şaxələndirilməsi baxımından strateji əhəmiyyət kəsb edir. Üç min beş yüz kilometrdən çox uzunluğu olan bu layihə Azərbaycanın zəngin enerji resurslarını Gürcüstan, Türkiyə və Cənubi Avropa ölkələri vasitəsilə beynəlxalq bazarlara çatdırmaqla qlobal enerji əməkdaşlığının mühüm komponentinə çevrilib.
Bununla yanaşı, ölkəmiz nəqliyyat və logistika sahəsində də mühüm təşəbbüslərlə çıxış edir. Bakı–Tbilisi–Qars dəmir yolu, Bakı Beynəlxalq Dəniz Ticarət Limanı və görülən digər işlər Azərbaycanın regionun əsas nəqliyyat qovşağına çevrilməsini təmin edir. Bu layihələr təkcə regional deyil, həm də Asiya ilə Avropa arasında strateji əlaqələrin möhkəmlənməsində mühüm rol oynayır.
Azərbaycanın uğurlu diplomatiyasının nəticəsi olaraq ölkəmiz beynəlxalq əməkdaşlıq platformalarında da fəal iştirak edir. COP29 kimi mötəbər beynəlxalq tədbirin 2024-cü ildə Azərbaycanda keçirilməsi ölkəmizin qlobal ekoloji gündəmdəki mühüm rolunu və iqlim dəyişikliyi ilə mübarizəyə verdiyi töhfələri bir daha təsdiqləyir. Bu tədbir vasitəsilə Azərbaycan bəşəriyyətin qarşısında dayanan ən aktual problemlərin həllində təşəbbüskar və məsuliyyətli tərəfdaş olduğunu nümayiş etdirib.
Bundan əlavə, Azərbaycanın BMT, İslam Əməkdaşlıq Təşkilatı, Qoşulmama Hərəkatı və digər beynəlxalq qurumlarla sıx əməkdaşlıq şəraitində həyata keçirdiyi humanitar və inkişaf layihələri də ölkəmizin dünyada sabitlik, humanizm və dialoq mədəniyyətinin təşviqinə verdiyi əhəmiyyətli töhfələrin göstəricisidir. Xüsusilə, Prezident İlham Əliyevin Qoşulmama Hərəkatına sədrliyi dövründə inkişaf etməkdə olan ölkələrin maraqlarını müdafiə etməsi, qlobal ədalətin bərpasına yönəlmiş addımlar atması beynəlxalq ictimaiyyət tərəfindən yüksək dəyərləndirilib.
Bütün bu fəaliyyətlər fonunda Prezident İlham Əliyevin Antalya Diplomatik Forumunda iştirakı Azərbaycanın dünya siyasətində mühüm söz sahibi olan dövlətə çevrildiyini bir daha nümayiş etdirir. Azərbaycan bu gün yalnız enerji və nəqliyyat sahələrində deyil, həm də sülh, əməkdaşlıq və dayanıqlı inkişaf naminə beynəlxalq birlikdə fəal mövqe tutaraq, regionun və dünyanın gələcəyinə töhfə verir.
“Qərb ölkələrində heç vaxt demokratiya olmayıb”.
“Report” xəbər verir ki, bu barədə Belarus prezidenti Aleksandr Lukaşenko “Mir” teleradio şirkətinə müsahibəsində deyib.
“Demokratiya yoxdur, sırf totalitarizmdir. Özlərini bizə belə təqdim etdilər. Kameranı gördülər, nələrsə dedilər, kameraya söyüşdülər, açıqlama verdilər, vəssalam. Amma siyasət tamam başqadır: insanları sevmirlər, insanlara hörmət etmirlər. Demos xalqdır, kratos gücdür”, - o qeyd edib.
“Amerika Birləşmiş Ştatları Çinlə ticarət sazişi bağlamaq istəyir və onun razılaşa biləcəyinə əmindir”.
“Report” xəbər verir ki, bu barədə Amerika lideri Donald Tramp bildirib.
“Görək Çinlə işlər necə gedir. Biz razılaşmaq istərdik. Əminəm ki, biz əla anlaşacağıq. Mən Çin Xalq Respublikasının Sədri Si Cinpinə böyük hörmətlə yanaşıram, o, uzun müddətdir mənim dostumdur və inanıram ki, biz ölkələrimiz üçün yaxşı olacaq addımlar atacıq”, - deyə o qeyd edib.
Qeyd edək ki, Donald Tramp prezident seçildikdən sonra Çin mallarına 4 mərhələdə rüsum tətbiqini elan edib. Aprelin 9-dan etibarən Çin malları üçün idxal rüsumları 104 faizə qaldırılıb.
Rəsmi Pekin isə ABŞ-ın Çin mallarına tətbiq etdiyi idxal rüsumlarını artırmasına cavab olaraq ABŞ-dan idxal edilən mallara 84 faizlik gömrük tarifləri tətbiq edəcəyini açıqlayıb. Bundan başqa, ABŞ-ın daha 12 şirkəti Çinin ixrac nəzarəti siyahısına, 6 şirkəti isə etibarsız müəssisələr siyahısına daxil edilib.
Çin Xarici İşlər Nazirliyi də ABŞ-ın addımlarının cavabsız qalmayacağını, ölkənin qanuni hüquq və maraqlarını qorumaq üçün qətiyyətli tədbirlər görüləcəyini açıqlamışdı.
Rusiya xarici işlər naziri Sergey Lavrov Türkiyəyə səfər edəcək.
Bakupost.az xarici KİV-ə istinadən xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.
O qeyd edib ki, Lavrovun aprelin 12-si tarixində Türkiyəni ziyarət edəcək.
Səfər zamanı 4-cü Antalya Diplomatiya Forumuna qatılacaq Lavrov burada bəyanatlar verəcək, həmkarları ilə ikitərəfli görüşlər keçirəcək.
Zaxarova səfərin Türkiyə xarici işlər naziri Hakan Fidanın dəvəti ilə baş tutacağını da bildirib. O, Lavrovun ikili görüşlərində Orta Şərq, Şimali Afrika, Cənubi Qafqaz və Xəzər dənizi regionlarındakı inkişafla yanaşı, müəyyən dövlətlərlə əlaqələrin aktual məsələləri də daxil olmaqla, qlobal gündəmdəki əsas mövzuları müzakirə edəcəyini vurğulayıb.
ABŞ-nin tarif siyasəti Ümumdünya Ticarət Təşkilatının (ÜTT) əsas qaydalarını pozur.
İqtisadiyyat.az xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova Moskvada keçirdiyi həftəlik mətbuat konfransında cari məsələlərlə bağlı açıqlamalar verib.
"Bu, Vaşinqtonun artıq beynəlxalq ticarət qanunlarına riayət etmək istəmədiyini göstərir. ABŞ birtərəfli tarif proteksionizminə üstünlük verdi. Qlobal iqtisadiyyatın artım tempinin yavaşlamasına və istehlakın azalmasına səbəb olan hər hansı bir amil bir çox qlobal proseslərə mənfi təsir göstərir. Dünyanın iki ən böyük iqtisadiyyatına gəlincə, vəziyyət daha da narahatedici olur", - deyə o qeyd edib.
“İsrail regionda xarici siyasətini daha böyük məsuliyyətlə aparmalıdır, seçdiyi vektor yəhudi dövlətinə sabitlik gətirməyəcək”.
“Report” xəbər verir ki, bunu Türkiyənin xarici işlər naziri Hakan Fidan İraqın UTV telekanalına müsahibəsində deyib.
Onun sözlərinə görə, İsrail öz xarici siyasətində daha məsuliyyətli olmalıdır:
“Seçdiyi strategiya - xüsusən də işğal ona heç vaxt təhlükəsizlik gətirməyəcək və mənfi nəticələr verəcək. Ola bilsin ki, onun həyata keçirdiyi təxribatlar hansısa taktiki məsələləri həll etsin, amma strateji müstəvidə dəyən ziyan bundan qat-qat ciddi olacaq”.
Fidanın fikrincə, İsraildə iki əsas siyasi istiqamət var. Belə ki, birincinin tərəfdarları region ölkələri ilə qarşılıqlı hörmət əsasında münasibətlər qurmağa, ikincisi isə qonşularını zəiflədərək yəhudi dövlətinin təhlükəsizliyini qorumağa çalışır.
“İsrailin hazırkı Baş naziri Benyamin Netanyahu da məhz bu ikinci siyasi istiqamətə aiddir. Biz bu taktikanın əvvəllər dəfələrlə istifadə edildiyini görmüşük və heç vaxt İsrailin özünün və ya bütün regionun xeyrinə olmayıb, lakin bir çox problemlərə səbəb olub”.