Ağ Evdə keçirilən görüşdə Kolumbiya və ABŞ prezidentləri Qustavo Petro və Donald Tramp Venesuelanı dirçəltmək strategiyasını və enerji əməkdaşlığı perspektivlərini müzakirə ediblər.

Musavat.com xəbər verir ki, bunu Kolumbiya prezidenti YouTube kanalında yayımlanan mətbuat konfransında deyib:

"Biz Venesuelanı necə yenidən qurmağı müzakirə etdik, orada baş verənlərə görə sadəcə təəssüflənmədik, baxmayaraq ki, bu, ciddidir. Biz qonşu kimi Kolumbiyanın köməyi ilə Venesuelanın dirçəlişinin necə görünə biləcəyindən danışırıq. Məsələn, sanksiyaların qaldırılmasından başqa ABŞ-ın bu prosesdə rolu nədir?"

Danışıqların atmosferi ilə bağlı prezident qeyd edib ki, iki tərəf bir sıra təcili məsələlərdə fikir ayrılığını saxlayıb: "Gördüklərimdən nə hiss etdim? Məsələn, narkotik qaçaqmalçılığı və ya enerji kimi məsələlərlə bağlı reallıq ətrafında çaşqınlıq. Problemə baxmaq üçün əlbəttə ki, fərqli yanaşmalar var. Bəziləri aqressiv, digərləri isə daha konstruktivdir. Bizi ayıran şeylərdən deyil, birləşdirən şeylərdən yapışırıq".

Petro regionun enerji potensialından birləşdirici amil kimi istifadə olunmasını təklif edib. Onun sözlərinə görə, Cənubi Amerika bərpa olunan mənbələr vasitəsilə "ABŞ-ın enerji matrisini 100 faiz və uzun müddət ərzində təmizləməyə" qadirdir.

ABŞ prezidenti Donald Tramp isə bildirib ki, ABŞ Venesuelada fəaliyyət göstərən üsyançı və terrorçu təşkilatlarla mübarizə aparmaq üçün Kolumbiya ilə əməkdaşlıq edəcək:  "Onlar bunu məndən istəyirlər və biz də edəcəyik. Venesuela rəhbərliyi ilə çox yaxşı yola gedirik. Çox, çox yaxşı".

Tramp bildirib ki, kolumbiyalı həmkarı ilə görüş zamanı narkotik qaçaqmalçılığı ilə mübarizədə əməkdaşlıq barədə razılığa gəliblər və mümkün sanksiyalar hazırlamaq üçün birlikdə çalışacaqlar.

Ağ Evdəki tədbir zamanı jurnalistlər ondan iki tərəfin hər hansı bir razılığa gəlib-gəlmədiyini soruşublar: "Bəli, əldə etdik. Biz bunun üzərində işlədik və çox yaxşı yola getdik. O və mən ən yaxşı dost deyildik, mən onu heç tanımırdım və çox yaxşı yola getdik. Və biz bunun üzərində işləyirik. Sanksiyalar da daxil olmaqla, digər məsələlər üzərində də işləyirik. Və çox yaxşı görüş keçirdik".

Musavat.com

Milli Məclisin sədri Sahibə Qafarova parlamentin yaz sessiyasının bu gün keçirilən ilk plenar iclasında çıxış edib.

Musavat.com spikerin çıxışının tam mətnini təqdim edir:

“Hörmətli həmkarlar!

Bildiyiniz kimi, Milli Məclis ötən ili uğurla başa vurmuşdur. Öz fəaliyyəti ilə parlament Azərbaycan Respublikasının Prezidenti möhtərəm cənab İlham Əliyevin daxili və xarici siyasətini qanunvericilik səviyyəsində dəstəkləmək üçün lazımi tədbirlər görmüşdür.
Xatırladım ki, ötən ilin yekunları barədə mən sizə ətraflı məlumat vermişdim.

Hörmətli həmkarlar!

Qeyd edim ki, Milli Məclisin beynəlxalq fəaliyyəti sessiyalar arasındakı dövrdə də davam etmişdir.

Deputatlarımız 2 beynəlxalq təşkilatın tədbirlərində iştirak etmişlər. Parlamentin 10 üzvü tərəfindən 6 xarici ölkəyə 18 səfər həyata keçirilmişdir.

Ay ərzində 5 ölkənin və 1 beynəlxalq təşkilatın 6 nümayəndə heyəti, ümumən 44 nəfər xarici qonaq Milli Məclisdə olmuşdur.

Hörmətli deputatlar!

Milli Məclis sədrinin başçılığı ilə nümayəndə heyəti yanvarın 25-də və 26-da Bəhreyn Krallığında rəsmi və işgüzar səfərlərdə, yanvarın 27-də Birləşmiş Ərəb Əmirliklərində işgüzar səfərdə, yanvarın 28-də isə Oman Sultanlığında rəsmi səfərdə olmuşdur.

Bəhreyn Krallığına rəsmi səfər çərçivəsində Bəhreyn Kralı Həməd bin İsa Al Xəlifə, Şura Məclisinin sədri Əli bin Saleh Al Saleh, Nümayəndələr Şurasının sədri Əhməd bin Salman Al Musalam ilə görüşlərim oldu.

Hörmətli həmkarlar!

Azərbaycan Milli Məclisi ilə Bəhreyn Nümayəndələr Şurası arasında Anlaşma Memorandumu imzalandı. Sənədi parlament sədrləri imzaladılar.

Hörmətli deputatlar!

Bəhreyn Krallığına işgüzar səfərdə məqsəd Asiya Parlament Assambleyasının yanvarın 26-da keçirilən 16-cı plenar sessiyasında iştirak etmək idi. Sessiyada mən çıxışımda son 2 ilə yaxın dövr ərzində Milli Məclisin Parlament Assambleyasına sədrlik fəaliyyətinin nəticələri barədə məlumat verdim.

Plenar sessiyanın yekununda Manama Bəyannaməsi qəbul edildi.

Bəyannamədə Asiya Parlament Assambleyasına uğurlu sədrliyinə, təşkilatın məqsədlərinin reallaşdırılması işində liderliyinə və səylərinə görə Milli Məclisə təşəkkür edilir. Bəyannamədə həmçinin multikulturalizmin, tolerantlığın təşviq olunmasında ölkəmizin ardıcıl və prinsipial səyləri yüksək qiymətləndirilir.

Hörmətli deputatlar!

Asiya Parlament Assambleyasının 16-cı plenar sessiyasında Assambleyaya sədrlik rəsmi olaraq Bəhreyn Krallığının Nümayəndələr Şurasına təhvil verildi.

Hörmətli həmkarlar!

Yanvarın 27-də Birləşmiş Ərəb Əmirliklərinə işgüzar səfərdə əsas məqsədlərdən biri Aralıq Dənizi Parlament Assambleyasının Qadın Parlament Forumunun 2-ci sessiyasında iştirak etmək idi.

Mən öz çıxışımda tədbirin mövzusunun əhəmiyyəti barədə fikirlərimi bölüşdüm. Azərbaycanda gender bərabərliyi sahəsində mövcud olan vəziyyət və müsbət təcrübə haqqında tədbir iştirakçılarına məlumat verdim.

Hörmətli deputatlar!

Birləşmiş Ərəb Əmirliklərinə işgüzar səfər çərçivəsində bu ölkənin Federal Milli Şurasının sədri Saqr Qobaş ilə görüşüm oldu. Görüşdə ölkələrimiz arasında münasibətlərin dinamik və hərtərəfli inkişafından məmnunluq ifadə olundu.

Azərbaycan Respublikasının Prezidenti möhtərəm cənab İlham Əliyevin “Zayed İnsan Qardaşlığı Mükafatı”na layiq görüldüyünü xatırlatdım. Dövlətimizin başçısının Birləşmiş Ərəb Əmirliklərinin qurucusu mərhum Şeyx Zayedin adını daşıyan belə nüfuzlu mükafata layiq görülməsinin xalqımız tərəfindən yüksək qiymətləndirildiyini bildirdim.

Hörmətli həmkarlar!

Səfərdə məqsədlərdən biri də Aralıq Dənizi Parlament Assambleyasının sədri cənab Cülio Çentemero ilə görüşüb danışıqlar aparmaq idi. Görüşdə qarşılıqlı maraq doğuran bir sıra məsələlər nəzərdən keçirildi. Xüsusən Parlament Assambleyasının Büro iclasında Milli Məclisə müşahidəçi statusunun verilməsi ilə bağlı müraciətin təsdiqindən məmnunluğumu bildirdim.

Yekun qərar verildikdən sonra bu statusun parlamentlərarası əlaqələrin inkişafı üçün yeni imkanlar yaradacağına inamımı ifadə etdim.

Hörmətli deputatlar!

Yanvarın 28-də və 29-da Oman Sultanlığına rəsmi səfər çərçivəsində bu ölkənin Şura Məclisinin sədri Şeyx Xalid bin Hilal Al Mavali, Dövlət Şurasının sədri Şeyx Əbdülməlik Al Xəlili və xarici işlər naziri Bədr Al Busaidi ilə görüşlərim oldu.

Görüşlərdə Azərbaycanla Oman arasında siyasi və digər münasibətlərin yüksək səviyyədə olmasından, parlamentlər səviyyəsində əlaqələrin dərinləşməsindən məmnunluq ifadə edildi.
Azərbaycan Milli Məclisi ilə Oman Şura Məclisi arasında Anlaşma Memorandumunun imzalanması barədə də razılıq əldə edildi.

Azərbaycan Prezidenti cənab İlham Əliyevin təşəbbüsü ilə yaradılmış Qoşulmama Hərəkatı Parlament Şəbəkəsi çərçivəsində əməkdaşlığın əhəmiyyətini vurğulandı.

Hörmətli deputatlar, hesab edirəm ki, 3 ərəb ölkəsinə rəsmi və işgüzar səfərlər uğurlu oldu və bununla əlaqədar nümayəndə heyətinin hər bir üzvünə mən öz dərin minnətdarlığımı bildirirəm.

Hörmətli həmkarlar!

Yekun olaraq onu da deməliyəm ki, Azərbaycan Respublikasının Prezidenti cənab İlham Əliyevin uzaqgörən xarici siyasəti, dövlətimizin beynəlxalq fəaliyyətinə strateji baxışı Milli Məclisin həyata keçirdiyi parlament diplomatiyasının uğurunun əsas amilidir.

Hörmətli həmkarlar!

Bu gün ölkəmizdə Gənclər Günü qeyd edilir. Bildiyiniz kimi, möhtərəm cənab Prezidentin sərəncamı ilə bir sıra fəaliyyət sahələrində fərqlənən gənclərin bir qrupuna Prezident mükafatları verilmişdir.

Azərbaycan gəncləri dövlət və cəmiyyət həyatının bütün sahələrində önəmli rol oynayır, ölkəmizin inkişafı, xalqımızın rifahı naminə bütün bilik və bacarıqlarını sərf edirlər. Gənclərimiz 44 günlük Vətən müharibəsində, antiterror əməliyyatında tarixi qələbələrimizin əldə edilməsində müstəsna rol oynamışlar. Gənclər Günü münasibəti ilə mən bütün Azərbaycan gənclərini ürəkdən təbrik edir, onlara möhkəm can sağlığı və uğurlar arzulayıram.

Hörmətli həmkarlar!

İndi isə mən yaz sessiyasında görüləcək işlər haqqında sizə qısa məlumat vermək istərdim. Əvvəla, qeyd edim ki, sessiyanın qanunvericilik işləri planı hazırlanıb və bu gün, bildiyiniz kimi, müzakirə ediləcək.

Bu sessiyada biz qanun layihələrini müzakirə və qəbul etməklə yanaşı, Konstitusiyanın tələbinə uyğun olaraq, Nazirlər Kabinetinin hesabatını dinləyəcəyik.

Bundan əlavə, Milli Məclisin iclaslarından birində 2025-ci ilin dövlət büdcəsinin icrası haqqında məsələ müzakirəyə təqdim ediləcək. Sessiyada Hesablama Palatasının, İnsan alverinə qarşı mübarizə üzrə Milli Koordinatorun, İnsan hüquqları üzrə müvəkkilin (ombudsmanın), bələdiyyələrin fəaliyyətinə inzibati nəzarəti həyata keçirən müvafiq qurumun və gender bərabərliyinin təmin edilməsinə nəzarəti həyata keçirən müvafiq icra hakimiyyəti orqanının illik hesabat, məlumat və məruzələri də dinləniləcək.

Milli Məclisin beynəlxalq əlaqələrinin inkişafı, parlamentin səlahiyyətləri ilə bağlı olan digər məsələlər də diqqət mərkəzində saxlanılacaq.

Hörmətli deputatlar, əminəm ki, Milli Məclisin yaz sessiyası yüksək səviyyədə keçəcək. Sessiyada sizin hamınıza uğurlar arzulayıram”.

Musavat.com

ABŞ prezidenti Donald Tramp Vaşinqtonun bütün Kanada istehsalı olan təyyarələrin sertifikatını ləğv etdiyini və Gulfstream məhsulları ilə bağlı mübahisəyə görə onlara 50 faiz tarif tətbiq edə biləcəyini açıqlayıb.

Musavat.com xəbər verir ki, Tramp qərarını Truth Social-da paylaşıb: "Kanada haqsız yerə, qanunsuz və israrla Gulfstream 500, 600, 700 və 800 təyyarələrini sertifikatlaşdırmaqdan imtina edir".

O, ABŞ-ın buna görə də "Bombardier Global Express və bütün Kanada istehsalı olan təyyarələrin sertifikatını ləğv etdiyini" vurğulayıb. Tramp bildirib ki, bu tədbir Kanada Gulfstream məhsullarını "tam sertifikatlaşdırana" qədər qüvvədə qalacaq.

Amerika liderinin sözlərinə görə, "Kanada əslində eyni sertifikatlaşdırma prosesi vasitəsilə ölkədə Gulfstream məhsullarının satışını qadağan edir": "Əgər hər hansı bir səbəbdən bu vəziyyət dərhal düzəldilməsə, Kanada tərəfindən ABŞ-a satılan bütün təyyarələrə 50 faiz tarif tətbiq edəcəyəm".

Musavat.com