Vaşinqtonda Azərbaycan Prezidenti İlham Əliyevə qarşı yönəlmiş təxribat xarakterli cəhdlər cəmiyyətdə haqlı narazılıq doğurub. Bir qrup öyrədilmiş şəxsin təhlükəsizlik perimetrini pozmağa cəhd göstərməsi və təxribatçı şüarlar səsləndirməsi bütövlükdə Azərbaycan dövlətinə qarşı yönəlmiş addım kimi qiymətləndirilir.

Hadisələrin diqqətçəkən tərəfi ondan ibarətdir ki, aksiyaya ilk dəstək verən qurumlardan biri ABŞ-da fəaliyyət göstərən ANCA olub. Ardınca anti-Azərbaycan mövqeyi ilə tanınan konqresmen Frank Pallonenin reaksiyası bu prosesin təsadüfi xarakter daşımadığını göstərir. Gəlinən qənaət budur ki, Vaşinqtondakı radikal qrup və onları açıq şəkildə müdafiə edən dairələr eyni ideoloji xətt üzrə hərəkət edərək ölkəmizə qarşı koordinasiyalı informasiya və siyasi təzyiq kampaniyasının tərkib hissəsi kimi çıxış edirlər. 


Milli Məclisin deputatı Azər Badamov Musavat.com-a bildirib ki, bu hadisə həm də Azərbaycanın dövlət təhlükəsizliyi orqanlarının yüksək səviyyədəki peşəkarlığını və ölkəmizin rəhbərinin təhlükəsizliyinin təmin edilməsi üçün atılan mühüm addımları bir daha nümayiş etdirir: “Dövlət başçısı xarici səfərdə olarkən o, öz şəxsi kimliyi ilə deyil, millətin iradəsinin simvolu kimi çıxış edir. O, bayrağımızı, suverenliyimizi və dövlətçiliyimizi təmsil edir. Ona qarşı atılan hər bir təxribatçı addım, əslində, onun təmsil etdiyi xalqa və dövlətə qarşı yönəlmiş hörmətsizlikdir.
Çünki dövlət başçısı xarici səfərdə olarkən o, təkcə siyasi bir fiqur deyil — xalqın iradəsini və dövlətin suverenliyini təmsil edən ali rəmzdir. Ona qarşı yönəlmiş hər hansı planlı hərəkət, əslində, Azərbaycanın beynəlxalq nüfuzuna zərbə vurmaq cəhdidir. Bu gün Azərbaycan dövlətinin başçısının yürütdüyü müstəqil siyasət, regionda sülh reallıqlarını yaratması, dünyada nüfuz sahibi olması, Münhendə, Vaşinqtonda və digər beynəlxalq platformalarda hörmətlə qarşılanan və sözün çəkisi olan lider olması çoxlarını narahat edir. Onlar öyrəşiblər ki, Azərbaycan xalqı torpaqları işğal altında olan, beynəlxalq platformalarda pozulmuş hüquqlarının bərpasına çağırışlar edən və əzilmiş xalq kimi görünsün. Amma bu gün xalqımızın qalib və başıuca gəzməsi çoxlarının yuxusunu qaçırdıb”.  

Deputat dedi ki, bu təxribatları törədən ünsürlər heç vaxt müxalifət ola bilməz: “Müxalifət mübarizəni siyasi meydanda aparar. Amma bu milli satqınlar şovinizt erməni dairələrin və xarici xüsusi xidmət orqanların cızdıqları ssenarilərə uyğun şəkildə hərəkət edirlər. Mən onlara heç azərbaycanlı deməzdim. Satqının nə milləti, nə də vətəni olur. Millətin iradəsinin simvolu, suverən dövlətimizin təmsilçisi olan dövlət başçımıza qarşı edilən hər bir təxribat siyasi təzyiq yox, xalqın ləyaqətinə toxunmaq cəhdidir.  Xaricdə müəyyən dairələrin himayəsi altında oturaraq dövlətimizə və millətimizə qarşı düşmən kəsilmiş bu ünsürlər, həm də onları idarə edənlər bilməlidirlər ki, xalqımızın milli birliyini və həmrəyliyini heç kim poza bilməz”.

Cavanşir ABBASLI
Musavat.com

“Bu gün hər kəsə aydındır ki, Mehman və Emin Hüseynov qardaşları bilərəkdən Rusiya xüsusi xidmət orqanlarının Azərbaycana qarşı informasiya hücumunun alətinə çevriliblər. “Qərb-Avropa” mövqeləri sadəcə onların “əfsanəsi” üçün bir maskalanmadır”.

Musavat.com qeyd edir ki, bunu keçmiş xarici işlər naziri, politoloq Tofiq Zülfüqarov deyib.

“Aydındır ki, bizim həbsxanada “yurd salmış”, Rusiya elitasının “maliyyə çamaşırxanası” olan Vardanyan haqqında film Kremlin kölələrin zəhməti ilə qazanılmış nailiyyətlərinə təhdid siqnalına çevrilib. Düşünürəm ki, hökmdən sonra artıq himayədarlarına etibar etməməli olduğuna əmin olan Vardanyan rəqəmlər və tarixlərlə daha çox sənədli şəkildə danışacaq. Üstəlik, bu “səmimilik” çox güman ki, Rusiyada siyasi mənzərədə dəyişiklik etməyə hazırlaşanlar üçün əsas təbliğat tətikləyicisinə çevriləcək. Epşteyn kimi Vardanyanın da sənədləri studiyaya gəlsin. Gözləyirik!” - Zülfüqarov qeyd edib.
Beləcə, “izlər” yenə Rusiyaya aparır.

Bəs Kremli təlaşlandıran nədir?

Rusiyanın hibrid hücumu

Bu arada Minval Politika sensasion sayılacaq məlumat yayıb. Məlumatda deyilir ki, Rusiyanın Azərbaycana qarşı informasiya kampaniyası yaxın günlərdə yeni, daha aqressiv və iyrənc mərhələyə keçə bilər. “Mənbələr bildirir ki, söhbət yalnızca ayrı-ayrı ekspertlərin şərhlərindən və ya media yazılarından yox, həm də Azərbaycana və şəxsən ölkə rəhbərliyinə qarşı hədəflənmiş yeni informasiya hücumları dalğasından gedir. Əsas diqqət rezonans doğuracaq informasiya sızmalarına və mənfi rəy yaratmaq cəhdlərinə yönələcək”, - deyə qeyd olunur.
Həmçinin, bildirilir ki, bu kampaniyada Rusiyada yaşayan tanınmış bir Azərbaycan ailəsinin üzvü də iştirak edə bilər. Hansı ailə? Bu kim(lər) ola bilər?

Yeri gəlmişkən, bu mövzuda Milli.az yazır ki, son həftələr sosial media məkanında Azərbaycana, xüsusilə də Prezidentə və onun ailə üzvlərinə qarşı başladılan koordinasiyalı çirkli kampaniya təsadüfi emosional çıxışların toplamı deyil. Yazıda deyilir ki, bu, sistemli, planlı və mərkəzdən idarə olunan informasiya təxribatıdır, izlər birbaşa Kremlə gedib çıxır: “Etibarlı mənbədən aldığım məlumata görə, bu proses Rusiyanın Azərbaycana qarşı genişləndirdiyi hibrid müharibənin yeni mərhələsidir. Əgər əvvəlki mərhələdə əsas alət kiber hücumlar idisə, indi informasiya terroru ön plana çəkilib. Dövlət qurumlarına, media resurslarına, infrastruktur sistemlərinə qarşı genişmiqyaslı kiber zərbələr endirildi. Bu hücumların texniki arxitekturası, istifadə olunan server zəncirləri və koordinasiya mərkəzləri barədə Azərbaycan tərəfdə kifayət qədər məlumat var. İndi isə taktika dəyişib: hədəf cəmiyyətin psixoloji dayanıqlığıdır. Hazırkı mərhələdə önə atılan fiqurlar Mehman və Emin Hüseynov qardaşları kimi siyasi klounlardır. Onların sosial şəbəkələrdə səsləndirdiyi ittihamlar nə faktoloji baza, nə hüquqi əsas, nə də ictimai legitimlik baxımından ciddi qəbul edilə bilər. Lakin burada məsələ onların kimliyi deyil, istifadə olunma mexanizmidir”.

“Azərbaycan diplomatiyasının manevrli tərpənişi kimlərinsə xoşuna gəlmir”

AzTV-nin İctimai-Siyasi Proqramlar üzrə Departamentinin rəhbəri, politoloq Tofiq Abbasovun Musavat.com-a bildirdiyinə görə, Azərbaycan ilk dəfə deyil ki, bu vəziyyətlə rastlaşır. Onun fikrincə, rəsmi Bakının xarici siyasətdə addımları və uğurları bundan əvvəl də hədyanlarla qarşılanıb. “Sadəcə, dünya siyasi arenasında dəyişikliklər gedir və Azərbaycan kimi yığcam, əslində, orta gücü təcəssüm etdirən dövlətin müstəqil addımları bizi diqqət mərkəzinə gətirir. Donald Tramp da Sülh Şurasında Azərbaycanın mühüm rolunu vurğuladı və bu da bizə olan diqqəti artırır. Ona görə də dostlar uğurumuza sevinirlər, qeyri-dostlar isə qısqanclıqla yanaşırlar”, - deyə T.Abbasov vurğulayıb.

Ukrayna və İran ətrafında gərginliyin davam etdiyini xatırladan politoloqun sözlərinə görə, sülh prosesi işləmir, amma Azərbaycan Şərqdə və Qərbdə sülhə töhfə verməyə çalışır: “O ki qaldı Vaşinqtonla yaxınlaşma və uzaqlaşmağa, bu qabarma-çəkilmə həmişə olur. Elə Rusiyanın özü ilə də olub. Çünki geosiyasi iqlimlə bağlı məsələlərdir. Məsələn, görürsən ki, bir administrasiya əvvəlkinin addımlarını sıfırlayır və bu da münasibətlərə təsir edir. O baxımdan, Qərb dövlətləri, eləcə də ABŞ və Rusiya qeyri-adekvat addımlara üstünlük verir. Rusiya bəyəm bilmir ki, Azərbaycan Şərqdə və Qərbdə sülhə töhfə verir? Ona görə də ölkəmizə qarşı bu kampaniyalar təsadüfi xarakter daşımır. Əslində, Azərbaycanın suveren, müstəqil siyasətinə olan reaksiyalardır”.

T.Abbasov onu da yada salıb ki, “Avroviziya”, “COP29” tədbirləri vaxtı çirkin kampaniyalar aparılmışdı: “Bu gün Azərbaycan diplomatiyasının manevrli tərpənişi kimlərinsə xoşuna gəlmir. Ancaq biz buna öyrəncəliyik, belə kampaniyalara cavab verməyə həmişə hazırıq. Əsas odur ki, hədəflərimiz var və ona doğru irəliləməliyik”.

Emil Salamoğlu
Musavat.com

ABŞ prezidenti Donald Trampın dəvəti ilə Azərbaycanın dövlət başçısı İlham Əliyev Sülh Şurasının ilk iclasında iştirak etmək üçün Vaşinqtonda işgüzar səfərdədir.

Musavat.com xəbər verir ki, fevralın 19-da ABŞ prezidentinin sədrliyi ilə Vaşinqtondakı Donald Tramp Sülh İnstitutunda Sülh Şurasının ilk zirvə toplantısı keçiriləcək.

Görüşün məqsədi ABŞ administrasiyasının Qəzzanın yenidən qurulması planı üçün vəsait toplamaqdır.

Sülh Şurası Donald Trampın təşəbbüsü ilə yaradılıb və Davosda təsis edilib. Azərbaycan təsisçi üzvdür. Nizamnaməyə əsasən, daimi üzv olmaq istəyən ölkələr 1 milyard dollar töhfə verməlidirlər. Üç illik üzvlük üçün heç bir şərt yoxdur. Lakin ilk görüşdə iştirak edən dövlətlərin Qəzzanın yenidən qurulması fonduna töhfə verməsi gözlənilir.

ABŞ administrasiyası sammitdə iştirak etmək üçün təxminən 60 ölkəyə rəsmi dəvət göndərib.

Tramp bu görüşdə Qəzza zolağında humanitar yardım və yenidənqurma üçün 5 milyard dollar ayrılacağını açıqlayıb. “Sülh Şurasının limitsiz potensialı var", - deyə ABŞ prezidenti vurğulayıb.

Daha əvvəl Ermənistanın baş naziri Nikol Paşinyan da ABŞ-a yola düşüb. Orta Asiyanın digər liderlərinin iştirakı ilə bağlı rəsmi məlumat artıq dərc olunub. Qazaxıstan prezidenti Kasım-Jomart Tokayev və Özbəkistan prezidenti Şavkat Mirziyoyev Vaşinqtona yola düşüb.

İsraili sammitdə xarici işlər naziri Gideon Saar təmsil edəcək. İsrail Xarici İşlər Nazirliyi diplomatın baş nazir Benyamin Netanyahunun adından Vaşinqtona səfər etdiyini bildirib. İsrail uzun müddət Sülh Şurasına qoşulmaqda tərəddüd etsə də, qərarını rəsmi olaraq 12 fevralda lan edib. Kipr, Rumıniya və bir sıra digər ölkələr sammitə müşahidəçi kimi nümayəndələr göndərəcəklərini açıqlayıblar.

Avropa Komissiyasının prezidenti Ursula fon der Leyen dəvət alıb, lakin onun yerinə Aralıq dənizi üzrə Avropa komissarı Dubravka Şuica Vaşinqtona gedib. Aİ sözçüsünün sözlərinə görə, Brüsselin Şuranın nizamnaməsinin müəyyən müddəaları ilə bağlı "bir sıra sualları" var. Bir çox ölkə oxşar səbəblərdən dəvəti rədd edib.

Haqqın.az “DW Worldə”a istinadən yazır ki, dəvət olunmuş dövlətlər arasında narahatlıq doğuran digər bir səbəb Şuranın strukturudur. Hazırda yeganə sədrlik ABŞ-ı təmsil edən ABŞ prezidentinə məxsusdur. Onun altında büdcə ilə bağlı qərarlar qəbul edən və birgə məsələləri müzakirə edən üzv dövlətlərdən ibarət Şura yerləşir.

Bundan əlavə, Tramp tərəfindən təyin edilmiş yeddi üzvdən ibarət İcra Şurası yaradılıb. Bu Şuraya ABŞ dövlət katibi Marko Rubio, Dünya Bankının prezidenti Ajay Banga, Cared Kuşner və Stiv Vitkoff daxildir. Onun mandatı Sülh Şurasının qərarlarını həyata keçirməkdir.
Ayrı bir Qəzza İcra Şurası Zolağın yenidən qurulmasına nəzarət edir. Nizamnaməyə əsasən, Şuranın sədri Donald Trampın direktorlar şurasına başqalarını dəvət etmək, qərarlara veto qoymaq və "törəmə müəssisələr yaratmaq, dəyişdirmək və ya ləğv etmək" kimi müstəsna hüququ var. O, yalnız könüllü istefa verdikdə və ya "iş qabiliyyətinin itirilməsi nəticəsində" əvəz edilə bilər.

Musavat.com

Vaşinqton Yaxın Şərqdə nüvə silahının yayılmasının qarşısını almağı prioritet hesab edir.

Musavat.com xəbər verir ki, bunu ABŞ-nin vitse-prezidenti J.D.Venc "Fox News"a verdiyi müsahibədə deyib.

Onun sözlərinə görə, Tehranın nüvə bombası əldə etməsi regionda nəzarətsiz silahlanma yarışına səbəb olacaq:

"ABŞ-nin müəyyən qırmızı xətləri var. Burada əsas marağımız İranın nüvə silahı əldə etməsinin qarşısını almaqdır. Biz nüvə silahının yayılmasını istəmirik. Əgər İran nüvə silahı əldə edərsə, onlardan sonra nüvə silahı əldə etmək istəyən bir çox başqa rejimlər - bəziləri dost, bəziləri o qədər də dost olmayan rejimlər ortaya çıxacaq. Bu, Amerika xalqı üçün fəlakət olardı".

Musavat.com

“İrəvan sonuncu erməni evinə qayıdana qədər öz işini davam etdirəcək”. Bu sözləri Ermənistan parlamentinin sədri Alen Simonyan deyib. O, nədənsə hesab edir ki, gec-tez Azərbaycan həbsxanalarında saxlanılan bütün ermənilər evə qayıdacaq. Yada salaq ki, Prezident İlham Əliyev Münxendə verdiyi müsahibədə ABŞ-nin vitse-prezidenti Ceyms Di Vensin bu yaxınlarda Bakıya səfəri zamanı erməni məhbusları məsələsini qaldırdığını, lakin layiqli cəzalar alan xuntaçıları azad etmək niyyətində olmadığını bildirib. Qeyd edib ki, onların bəşəriyyət əleyhinə cinayətləri artıq çoxsaylı şahid ifadələri ilə təsdiqlənib. Amma görün, erməni spiker nə deyir. Sitat: “Onlar qayıdacaqlar. Bu gün ya sabah, hamısı qayıdacaq. Vaxtilə onların (erməni məhbuslarının – red.) sayı 200-ə çatmışdı. Lakin yorulmaz işimiz sayəsində biz bir çoxunun azadlığa buraxılmasını təmin etmişik. Və bu iş sonuncu erməni Ermənistana qayıdana qədər davam edəcək”.

Simonyan bu xüsusda əlavə edib ki, Azərbaycanla danışıqlar prosesi sülhə doğru irəliləmək üçün fürsət yaradır. Erməni spikerin cani ermənilərlə bağlı lovğa əminliyi hardandır? Bu, sırf seçkiöncəsi daxili auditoriyaya ünvanlı bir PR gedişidir, yoxsa...

Demokratiya və İnsan Hüquqları Komitəsinin sədri Çingiz Qənizadə Musavat.com-a deyib ki, erməni hərbi canilərlə bağlı məsələyə Azərbaycan Prezidenti nöqtə qoyub. Onun sözlərinə görə, onların əfv edilməsi mümkün deyil, lakin yekun sülh müqaviləsindən sonra İrəvanın xahişləri əsasında ekstradisiya məsələsinə bəlkə baxıla bilər: “O anlama gəlmir ki, Azərbaycan xahişi nəzərə alacaq. Sadəcə, erməni tərəfi buna ümid edir. Simonyan da daxili auditoriyaya hesablanmış çıxış edərək belə rəy bildirib. Halbuki həmin cinayətkarların azad olunmayacağını yaxşı bilir. Seçkilər yaxınlaşdıqca erməni məhbuslarla bağlı çağırışlara Ermənistan hakimiyyətinin reaksiyaları artacaq. Məncə, onların azad olunmasını istəmirlər. Paşinyan o qüvvələri də özünə düşmən və rəqib sayır. Lakin çox istərdi ki, onları buraxaq və bunu özünün siyasi uğuru kimi erəmnilərə təqdim etsin”.

Hüquq müdafiəçisi qeyd edib ki, Bakının təhvil verdiyi 4 erməni ilə bağlı Paşinyan daxildə təbliğat üçün istifadə etdi: “Eyni zamanda, taxıl daşınması, benzin verilməsi Paşinyanın erməni seçicilərinə arqumentləridir. O, ümidləndirir ki, Araik və digərlərinin məsələsi də həllini tapacaq. Amma Azərbaycan belə bir vəd verməyib. Dövlət başçısının mövqeyini İrəvanda düzgün oxumalıdırlar. Ona görə də Simonyanın çıxxışı blef və piardır”.

Xatırladaq ki, Araik Arutyunyan ömürlük, daha 7 nəfər isə müxtəlif müddətə azadlıqdan məhrum edilib.

Emil Salamoğlu
Musavat.com