 |
|
|
Populyar tanışlıq tətbiqi olan "Tinder"in test etdiyi yeni bir xüsusiyyət dünyada qısaboylu kişilərin məyus olmasına səbəb olub. Belə ki, tətbiqin yeni funksiyası istifadəçilərə potensial partnyorlar üçün minimum və maksimum boy seçimlərini təyin etməyə imkan verəcək.
Sherg.az xəbər verir ki, bu yenilik sosial şəbəkələrdə böyük maraqla qarşılanıb və bəzi istifadəçilər bunun qısaboylu kişilərin şansını azalda biləcəyini irəli sürüblər.
Ən çox hansı boy aralığı seçilir?
"Daily Mail"-ə danışan professor Dr. Gert Stulp bildirib ki, insanların öz boyları, ideal partnyor boy seçimlərinə ciddi təsir edir. Onun rəhbərlik etdiyi, 5 min 782 nəfərin qatıldığı araşdırmada qadınların, orta hesabla, özlərindən 25 sm uzun kişiləri daha cəlbedici hesab etdikləri, kişilərin isə orta hesabla özlərindən 8 sm qısa qadınlara üstünlük verdikləri müəyyən olunub.
İngiltərədə qadınların orta boyunun 161 sm olduğu nəzərə alınarsa, qadınların ən çox seçdiyi kişi boyunun təxminən 185 sm olduğu ortaya çıxıb. Eyni şəkildə, İngiltərədə kişilərin orta boyu 175 sm-dir və buna əsasən, qadınlar arasında ən çox seçilən boy isə 165 sm-dir.
Hamıya uyğun tək bir ideal boy varmı?
Prof. Dr. Stulpun fikrincə, hamıya uyğun tək bir ideal boydan danışmaq mümkün deyil. Çünki fərdi seçimlər, mədəni fərqliliklər və şəxsi təcrübələr kimi müxtəlif faktorlar bu məsələyə təsir göstərir.
Boy filtri nə deməkdir?
Tinder boy filtri barədə hələlik rəsmi açıqlama verməsə də, funksiyanın ödənişli seçim kimi test edildiyini təsdiqləyib. Lakin mütəxəssislər hesab edir ki, bu cür filtr funksiyaları fiziki xüsusiyyətlərin partnyor seçimində daha çox ön plana çıxmasına səbəb ola bilər.
Gerçək həyatda boy vacibdirmi?
Amsterdam Universitetinin apardığı son araşdırmaya görə, fiziki cazibədarlıqda cüzi bir artım belə Tinder kimi tətbiqlərdə uyğunlaşma faizini 20 faiz artıra bilir. Bununla belə, intellektual səviyyədəki yüksəliş yalnız 2 faiz təsir göstərir.
Amma Prof. Dr. Stulp bildirir ki, uzunmüddətli münasibətlərdə boy faktoru təkbaşına müəyyənedici olmur. Əksinə, şəxsiyyət, zəkâ və ortaq dəyərlər daha böyük rol oynayır.
Bakının Sabunçu rayonunda yerləşən Sabunçu bazarı ərazisində güclü yanğın baş verib.
Oxu.Az xəbər verir ki, bu barədə Fövqəladə Hallar Nazirliyi (FHN) məlumat yayıb.
Qeyd olunub ki, Nazirliyin "112" qaynar telefon xəttinə paytaxtın Sabunçu rayonunda yanğın baş verməsi barədə məlumat daxil olub.
Məlumatla əlaqədar dərhal FHN-in Dövlət Yanğından Mühafizə Xidmətinin qüvvələri əraziyə cəlb olunub.
Hadisə yerində əməliyyat şəraiti qiymətləndirilərkən yanğının bazar ərazisində bir-birinə bitişik tikilmiş müxtəlif təyinatlı obyektlərdə baş verdiyi və yayılma riskinin yüksək olduğu müəyyən olunub.
Yanğınsöndürənlər tərəfindən həyata keçirilən zəruri və təxirəsalınmaz tədbirlər sayəsində baş vermiş yanğın genişlənərək daha böyük sahəyə yayılmasına imkan verilmədən qısa müddətdə söndürülüb.
Yanğın nəticəsində bazar ərazisində ümumi sahəsi 2 000 m² olan bir dam altında tikilən birmərtəbəli müxtəlif təyinatlı obyektlərdən ümumi sahəsi 130 m² olan avtomobil təmiri sexinin yanar konstruksiyaları və içərisində təmirə dayanan "MERCEDES" markalı minik avtomobili, ümumi sahəsi 100 m² olan kafenin və hər birinin sahəsi 10 m² olan kişi bərbərxanasının, avtomobil ehtiyat hissələrinin satışı mağazasının yanar konstruksiyaları ümumilikdə 250 m² sahədə yanıb.
Bitişik, o cümlədən bazar ərazisindəki digər obyektlər, park edilmiş avtomobillər yanğından mühafizə olunub.
Xəbər verdiyimiz kimi, Bakının Sabunçu rayonunda, Böyükşor gölü yaxınlığında baş verən avtoqəzada 3 nəfər ölüb, 1 nəfər xəsarət alıb.
DİN qəza anının görüntülərini yayıb.
Həmin görüntüləri təqdim edirik:
Sabirabadda çətənə kolları yetişdirən 4 nəfər saxlanılıb.
DİN-nin Mətbuat Xidmətinin Şirvan regional qrupundan verilən məlumata görə, Sabirabad Rayon Polis Şöbəsinin əməkdaşları tərəfindən kultivasiya yolu ilə yetişdirilən narkotik tərkibli bitkilərin aşkar edilməsi istiqamətində tədbirlər davam etdirilir. Şöbə əməkdaşları tərəfindən keçirilən əməliyyat nəticəsində qeyd edilən cinayət əməli ilə məşğul olan Mətləb Məmmədov saxlanılıb.
Onun həyətyanı sahəsindən kultivasiya yolu ilə yetişdirilmiş 621 ədəd çətənə kolu və 500 qram marixuana aşkarlanıb.
Şöbə əməkdaşları tərəfindən eyni istiqamətdə keçirilən digər tədbirlər zamanı Elcan Nəzərov, Fazil Ələkbərov və Vüsal Təhməzov da saxlanılıblar. Həmin şəxslərə məxsus həyətyanı sahələrdən isə ümumilikdə 250 ədəd çətənə kolu aşkarlanaraq götürülüb.
Faktlarla bağlı cinayət işləri başlanıb, saxlanılan şəxslər barəsində həbs qətimkan tədbirləri seçilib.
Almaniyanın Bavariya əyalətinin Passau şəhərində naməlum şəxs avtomobili izdihamın üzərinə sürüb.
Bu barədə "Bild" nəşri məlumat yayıb.
Hadisə nəticəsində 3 nəfər yaralanıb.
Hadisənin təfərrüatı araşdırılır.
Qeyd edək ki, ötən gün də Almaniyada analoji hal yaşanmışdı.
Aktyor Kamran Ağabalayev Qurban bayramı ilə bağlı maraqlı paylaşım edib.
Tribunainfo.az xəbər verir ki, aktyor sosial şəbəkədə bunları qeyd edib:
“Qurban bayramına nə kəsə bilərsiniz? Qul haqqını yeməyi, qeybət etməyi, insan haqlarına girməyi, yalan söyləməyi, harama yaxınlaşmağı kəsə bilərsiniz. Bunları kəsməsəniz, başqa nə kəsirsinizsə kəsin, nə xeyri? Bunları edəcəyiniz halda bayramınız mübarək!”
Tovuzda 31 yaşlı Kainat Namazovun anası və bacısını baltalayaraq evini yandırmasının təfərrüatı məlum olub.
Ailə başçısı Elbrus Namazov uzun müddət Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Tovuz rayon şöbəsində məsul vəzifələrdə çalışıb.
Bir müddət əvvəl E.Namazov infarktdan dünyasını dəyişib. Təxminən, 10 gün əvvəl onun 40 mərasimi keçirilib. Anadangəlmə ruhi əsəb xəstəsi olan Kainat Namazov atasının ölümünə qədər sakit təbiətli olub. Ancaq yas mərasimindən sonra aqressivləşməyə başlayıb və bir neçə dəfə evdə yersiz mübahisələr yaradıb.
İyunun 6-da günorta saatlarında K.Namazov növbəti dəfə anası Sevinc Namazova ilə mübahisə edib. Mübahisə sakitləşəndən bir saat sonra K.Namazov qəflətən həyətdəki, içərisində tezalışan maddə olan qabı götürərək evə daxil olub və mənzilə daxildən od vurub.
Anası və bacısı Kainata mane olmaq istəsələr də, alınmayıb. O, həyətdəki yarımtikilidən baltanı götürüb evə girərək yanğını söndürməyə çalışan anası və bacısına baş nahiyələrindən ardıcıl zərbələr endirib.
Evin yandığını görən qonşular hadisə yerinə gələrək K.Namazovun əlindən baltanı alıb, onu zərərsizləşdiriblər. (Oxu.az)
Dini mahnılar oxuyan ilahiyyatçı Taleh Boradigahi Turan Partiyasının sədri Cahandar Bayoğlunu xüsusi ittiham qaydasında məhkəməyə verib.
“Qafqazinfo”nun əldə etdiyi məlumata görə, Boradigahi partiya sədrini şəxsinə qarşı böhtan xarakterli çıxışlar etməkdə və yalan məlumatlar yaymaqla işgüzar nüfuzuna xələl gətirməkdə ittiham edib.
Şikayətə əsas kimi Bayoğlunun televiziya kanallarının birində son günlərdə səsləndirdiyi fikirlər göstərilib. Həmin verilişin görüntüləri məhkəməyə təqdim olunub.
Partiya sədri efirdə bildirib ki, bu gün Azərbaycandan qastrola gedən müğənnilər arasında sərhəd bölgələrində Səfəvilər dövrünə aid şərqilər ifa edənlər var və bu tədbirlər şiə-sünni qarşıdurmasını qızışdırır: “Taleh Boradigahi də bu gün orada qastroldadır. Onlar Xameneinin artistləridir”.
Xüsusi ittihamçı bu və digər ifadələrin təhqir və böhtan xarakteri daşıdığını bildirərək qarşı tərəfin cinayət məsuliyyətinə cəlb olunmasını tələb edib.
Cahandar Bayoğlunun vəkili isə şikayətin əsassız olduğunu deyib və icraata götürülməməsini xahiş edib. Müdafiə tərəfinin fikrinə görə, hər kəsin söz və fikir azadlığı var və Bayoğlunun səsləndirdiyi fikirlərdə təhqir və böhtan cinayətlərinin əlamətləri yoxdur.
Məhkəmə tərəfləri dinlədikdən və təqdim olunan sübutları araşdırdıqdan sonra şikayətin əsassız olduğu qənaətinə gəlib. Nəticədə Taleh Boradigahinin xüsusi ittiham qaydasında verdiyi şikayətin icraata götürülməsindən imtina edilib.
“İnsan da nəfsinə görə xalqına bu cür allahsızlıq edər?!”.
Bu sözləri “Yeni Sabah”a açıqlamasında Xalq artisti Şeyx Əbdül Mahmudbəyov deyib. O insanlara satışa çıxarılan meyvələrlə bağlı diqqətli olmağa çağırıb və xəbərdarlıq edib:
“Kal meyvəni dərənlərin də, satanların da haqqında cinayət işi açılmalıdır. Çünki millətin mənəvi sərvətinə ziyan vururlar. Kal meyvəni od qiymətinə satmaq üçün qırırlar, vitaminlər formalaşmır və meyvə yetişmir. Beləliklə, balalarımızın hamsının qarnı ağrayır, mədəsi çürüyür. Bu həm cinayət, həm də allahsızlıqdır. Kal meyvələri dərib baha qiymətə satmaq olmaz. Biabırçılıqdır! Bütün mer-meyvələri baha qiymətə yoluşdururlar ki, yüksək qiymətə satsınlar. Belə vətəndaşlıq, insanlıq olar?”.
Xalq artisti vətəndaşların cibinə göz dikən işbazları tənqid atəşinə tutub:
“Azərbaycan xalqına müraciət edirəm, meyvə-tərəvəz dükanlarından kal meyvələri almasınlar. Qoy üstlərində qalsın və məcbur olsunlar ki, meyvəni yetişdirib sonra bazara çıxarsınlar. Onsuz da camaatın ancaq pulu gedir. Bu məhsulların tərkibində vitamin yoxdur. 1 həftə, 5 gün bu meyvələri almayın. Yavaş-yavaş yetişir. Sahibkarlar o zaman Allahın bu əmanətinə məcbur qalıb xəyanət etməyəcəklər. Niyə belə haram iş görürsünüz? İnsan da xalqına qarşı nəfsinə görə bu cür allahsızlıq edər?!”
"İstilik təchizatı haqqında" qanun qəbul edildikdən sonra çoxmərtəbəli binalara qaz daxil olmayacaq". Bunu energetika nazirinin müavini Elnur Soltanov parlamentin Təbii ehtiyatlar, energetika və ekologiya komitəsində "İstilik təchizatı haqqında" qanunla əlaqədar keçirilən ictimai dinləmədə deyib. O bildirib ki, proses daha təhlükəsiz mühit yaradacaq. Nazir müavini, həmçinin bildirib ki, mərkəzi istilik sisteminə qoşulmaq mənzil mülkiyyətçilərinin öz iradəsindən asılı olacaq: "Bu da tarif məsələsini mənasızlaşdırır. Çünki vətəndaşlar hər ayın sonunda xərcləri öz aralarında bölüşdürə bilərlər. Bu da bizim bildiyimiz sistemi dəyişdirir. Sözügedən məsələ vətəndaşın tam haqqıdır".
Sözügedən qanun layihəsi ötən dəfə Milli Məclisdə müzakirə edilərkən “Azəristiliktəchizat” rəsmisi yaşayış binalarının mərkəzi istilik sisteminə qoşulmasını təklif etmişdi. Müzakirələrdə belə fikirlər də səslənmişdi ki, kombi sistemi vətəndaşın ziyanınadır, qaz çox aparır, bundan sonra MTK-lara, yaşayış binaları inşa edən şirkətlərə mənzillərin mərkəzi istilik sisteminə qoşulması vacib şərt kimi qoyulmalıdır. Bu məqsədlə yeni nəzarətedici qurumun yaradılması da təklif edilirdi. Yaşayış binalarının mərkəzi istilik sisteminə qoşulması isə qeyri-mümkün görünür. “Azəristiliktəchizat” hazırkı vəziyyətində heç mövcud abonentləri istiliklə təmin edə bilmir. Yaşayış binalarının mərkəzi istilik sisteminə qoşulması üçün nəhəng infrastruktur dəyişikliyi lazım gələcək. Bu, mümkün olacaqmı? Gələcək göstərər.
Bələdiyyələrin Fəaliyyətinin Təbliği İctimai Birliyinin sədri Vüqar Tofiqli Sherg.az-a açıqlamasında qeyd etdi ki, təkliflər səslənir, lakin mühüm məqamlardan biri arxa plana keçirilir:
- Təəssüf edirəm ki, bu cür mühüm məsələlərin müzakirəsində bələdiyyələr tamamilə kənara qoyulur. Bələdiyyələrin adı çəkilmir, onların məsələnin həllində iştirakı ilə bağlı təklif səslənmir. Əslində, bu prosesdə aparıcı qüvvə bələdiyyələr olmalı idi. Yeni tikilən binalarda idarəetmə ilə bağlı qanunvericilik mövcuddur. Qanuna görə, binada 50 faiz sakin yaşayırsa, sakinlər toplaşıb özünüidarəetmə qurumu yaratmalıdırlar. Mənzil Mülkiyyətçilərinin Müştərək Cəmiyyəti olmalıdır. Binanın idarə edilməsi bu qurum tərəfindən həyata keçirilməlidir. Belə bir pilot layihə həyata keçirilib, bir neçə il əvvəl. O zaman İqtisadiyyat Nazirliyinin həyata keçirdiyi pilot layihə əsasında paytaxtın bəzi inzibati rayonlarında belə idarəetmə sistemi yaradılmışdı. Amma MTK-lar binanın idarə olunması kimi “yağlı tikə”ni əldən buraxmaq, sakinlərin öhdəsinə vermək istəmir. MTK-lar sakinlərin canlarını boğaza yığıblar. Əslində isə binaların idarə edilməsiylə bağlı qanunvericilikdə heç bir boşluq yoxdur. Sakinlər özləri idarəetmə qurumu yarada bilmirsə, bu halda idarəetmə bələdiyyə tərəfindən həyata keçirilir. Hesab edirəm ki, mərkəzi istilik sisteminə keçid faydalı olar. Bu, həm enerjiyə qənaət baxımından sərfəlidir, həm də binaların estetik görünüşü baxımından. Vaxtilə MTK-lar tikdikləri binalarda istilik sistemini sakinlərin öhdəsinə buraxdılar. Hər sakin mənzildə kombi sistemi quraşdırdı, kombi aparatını da çıxarıb eyvanlara qoydular. İndi bütün eyvanlarda kombi boruları “gözə dəyir”. Bu, binaların, ümumiyyətlə, şəhərin memarlıq üslubunu da korlayır. Nəzarətedici qurumun yaradılmasında isə hesab edirəm ki, ehtiyac yoxdur. Büdcədən maliyyələşən kifayət qədər qurum mövcuddur, daha bir yenisinə nə ehtiyac? Sadəcə, mövcud qanunvericiliyin işlək mexanizmi yaradılmalıdır. Nə sakinlər əziyyət çəksin, nə bələdiyyələr, nə də dövlət orqanları. Sakinlər də tariflərin şişirdilməsi kimi bir problemlə üz-üzə qalmasınlar.