Avropa İttifaqı və dünyanın 40-dan çox ölkəsi birgə bəyanatla çıxış edərək Rusiyanı Zaporojye Atom Elektrik Stansiyasından dərhal qoşunlarını və şəxsi heyətini çıxarmağa çağırıb.

“Report” xəbər verir ki, bəyanat Avropa İttifaqının Vyanadakı beynəlxalq təşkilatlar yanında nümayəndəliyinin rəsmi saytında dərc olunub.

Qeyd olunub ki, Rusiya hərbçilərinin və silahlarının nüvə obyektində yerləşdirilməsi qəbuledilməzdir, MAQATE-nin bütün üzvlərinin hörmət etməyi öhdələrinə götürdükləri təhlükəsizlik və təminat prinsiplərini pozur.

Bildirilib ki, Zaporojye AES-də Rusiya hərbi qüvvələrinin olması operatora və Ukrayna hakimiyyətinə beynəlxalq konvensiyalara, MAQATE-nin təhlükəsizlik standartlarına uyğun olaraq nüvə və radiasiya təhlükəsizliyi üzrə öhdəliklərini yerinə yetirməyə mane olur.

Sənəddə qeyd edildiyi kimi, Rusiyanın işğalı və Ukraynanın nüvə obyektlərində mövcudluğunu davam etdirməsi nüvə insidentləri və qəza riskini xeyli artırır.

Ermənistan Müdafiə Nazirliyi müqaviləli hərbçinin qəfil öldüyünü açıqlayıb.


Məlumata görə, bu gün günorta saatlarında 41 yaşlı Manvel Tadevosyanın səhhəti kəskin şəkildə pisləşib. Həkimlərin səyinə baxmayaraq, onu xilas etmək mümkün olmayıb.

Müdafiə Nazirliyindən verilən məlumata görə, ölümün səbəblərinin müəyyən edilməsi üçün məhkəmə-tibbi ekspertizası təyin edilib.

Mənbə: Sputnik

Qazaxıstan və Gürcüstan Rusiya Federasiyasının Ukraynadan sonra onlarla müharibə edəcəyindən qorxurlar.

Axar.az xəbər verir ki, bu barədə "Dey Uelt" nəşrinin materialında deyilir.

"Kreml hakimiyyəti Qazaxıstan və Gürcüstana hücum edə bilər. Rusiya Federasiyasının bəzi partiyalarının açıq şəkildə təcavüz miqyasının genişlənməsinə eyham vuran və SSRİ-ni “bərpa etmək” arzusunda olan bəyanatları narahatlıq doğurur", - məqalədə bildirilir.

Türkiyə Silahlı Qüvvələri tarixində ilk qadın generalı qeydə alınıb.

Türkiyənin Rəsmi Qəzetinin avqustun 13-də verdiyi xəbərə görə, bu, Jandarma Baş Komandanlığının rəhbəri, daha əvvəl baş polkovnik rütbəsi daşıyan Özlem Yılmazdır.

İndi o, Türkiyə Jandarma və Sahil Mühafizəsi Akademiyasının vitse-prezidenti vəzifəsini yerinə yetirəcək.

Yılmazın öncəki vəzifəsini isə general Arif Çətin icra edəcək.

"Finlandiyanın NATO-ya qoşulmasından sonra Estoniya ilə sahil müdafiəsini birləşdirəcəklər. Bu da Rusiya hərbi gəmilərinin Baltik dənizinə çıxışını bağlayacaq".

"AzPolitika.info" xəbər verir ki, bu sözləri yerli mediaya müsahibəsində Estoniyanın Müdafiə naziri Hanno Pevkur deyib. "Estoniya və Finlandiya raketlərinin uçuş məsafəsi Finlandiya körfəzinin genişliyini aşır", - Pevkur bildirib.
Ətraflı

Pevkur Finlandiyanın Müdafiə naziri ilə görüşdə ölkələrin müdafiəsini birləşdirmək və məlumat mübadiləsi aparmaqla bağlı razılıq əldə etdiklərini vurğulayıb. Onun sözlərinə görə, birgə raketdən müdafiə sistemi Finlandiya körfəzini Rusiya hərbi gəmiləri üçün bağlayacaq. "Finlandiya və İsveç ittifaqa daxil olandan sonra Baltik dənizi NATO-nun daxili dənizinə çevriləcək", - Pevkur vurğulayıb.

Xatırladaq ki, İsveç və Finlandiya Rusiyanın Ukraynaya müdaxiləsi fonunda bitərəf statuslarından imtina edərək NATO-ya üzv olmaq qərarına gəliblər. Onların alyansa daxil olması təşkilata üzv olan 30 ölkənin hamısı tərəfindən təsdiqlənməlidir. Avqustun 4-nə olan məlumata görə, 23 dövlət yeni üzvlər haqqında sazişi ratifikasiya edib.

“Müharibə başlayandan bəri Ukrayna ordusuna məxsus 4293 tank və zirehli texnika məhv edilib”.

Bunu Rusiya Müdafiə Nazirliyinin sözçüsü İqor Konaşenkov deyib.

Ukrayna Silahlı Qüvvələrinin 14-cü Mexanikləşdirilmiş Briqadasının itkilərinin 2000-dən çox olduğunu deyən Konaşenkov 28-ci Mexanikləşdirilmiş Briqadanın müvəqqəti mövqelərinə yüksək dəqiqlikli silahlarla hücum zamanı 100-ə yaxın əsgər və 9 hərbi texnikanın məhv edildiyini vurğulayıb.

O, Donetsk vilayətində 58-ci motoatıcı briqadanın 40 əsgərinin və 5 avtomobilin məhv edildiyini, Rusiya qüvvələrinin Ukraynadakı hərbi ünsürlərə qarşı hücumlarını davam etdirdiyini bildirib.

Son 24 saat ərzində Ukrayna ordusuna aid 5 idarəetmə mərkəzi, 6 silah-sursat anbarı və anbarın məhv edildiyini qeyd edən Konaşenkov Donetsk bölgəsində ABŞ-ın Ukraynaya göndərdiyi “AN/MPQ-64” RLS-in də vurulduğunu deyib.

Mətbuat katibi Konaşenkov Ukraynada bu günə kimi 267 təyyarə, 146 helikopter, 1732 pilotsuz uçuş aparatı, 365 hava hücumundan müdafiə raket sistemi, 4293 tank və zirehli texnika, 797 çoxbarelli reaktiv yaylım atəşi sistemi, və 3290 haubitsa məhv edildiyini qeyd edib.

Türkiyə ordusu ölkənin “Defence Technologies Engineering and Trade Inc” şirkəti tərəfindən hazırlanmış TOGAN kvadrokopterlərini alıb.

Bu barədə “Report” TRT telekanalının saytına istinadən xəbər verir.

Pilotsuz uçuş aparatı təxminən 1 metr diametrə malikdir və atəşin tənzimlənməsi, kəşfiyyat və müşahidə funksiyalarını yerinə yetirə bilir. O, 45 dəqiqə havada qala bilir və buraxılış yerindən 10 km-ə qədər məsafəni qət edə bilir.

TOGAN 30x böyütmə qabiliyyətinə malik infraqırmızı kamera ilə təchiz olunub. Kompüter görmə sistemi platformaya hərəkət edən hədəfləri avtonom şəkildə izləməyə imkan verir.

Batareya az olduqda, dron missiyanı başqa cihaza ötürür və bazaya qayıdır. Beləliklə, obyektlərin davamlı monitorinqini təşkil etmək mümkündür.

Tehran Moskvaya PUA-lar göndərərsə, Birləşmiş Ştatlar Rusiya və İrana qarşı aktiv şəkildə sanksiyalardan istifadə edəcək.

Bu barədə ABŞ Dövlət Departamentinin məlumatında deyilir.

Qeyd edək ki, bundan öncə İranın “Şahid-129” PUA-larını Rusiyaya göndərməsi barədə məlumatlar yayılmışdı.

Axar.az

Belarusda aerodrom yaxınlığında bir neçə partlayış baş verib. “Belaruski Hayun” və “Flagshtok” Telegram kanalları avqustun 11-də şahidlərə istinadla xəbər verib ki, ötən gecə Belarusun cənub-şərqindəki Qomel vilayətində Zyabrauka aerodromu yaxınlığında azı səkkiz partlayış səsi eşidilib.

Belarusun Müdafiə Nazirliyinin məlumatına görə, avqustun 10-da axşam 11-də bir hərbi maşının mühərriki alışıb, yanğının söndürülməsi üçün tədbirlər görülüb, xəsarət alan olmayıb.

"AzPolitika.info" xatırladır ki, Ukrayna hakimiyyəti dəfələrlə Rusiya Hava Qüvvələrinin Ukrayna ərazisinə hücum üçün bu aerodromdan istifadə etdiyini açıqlayıb. Ötən ay ordunun yaydığı məlumata görə, Rusiya bu aeroporta "İskəndər-M" və "S-400" mobil raket sistemləri yerləşdirib, onlardan Ukraynaya zərbələr endirir.

Avqustun 11-i Belarus hava qüvvələrinin iki gün öncə başladığı hərbi təlimlərin sonuncu günüdür. Belarus hakimiyyəti təlimlərin ikinci mərhələsinin 22-25 avqust tarixlərində Rusiyanın cənub-qərbində, Qazaxıstanla sərhəddə yerləşən Aşuluk hərbi təlim bazasında keçiriləcəyini bildirib.

Xatırladaq ki, iki gün öncə Ukraynanın işğal olunmuş Krım yarımadasında Rusiya hərbi bazasında partlayışlar törədilib, azı 9 Rusiya hərbi təyyarəsi dağılıb. Kiyev hücuma görə məsuliyyəti üzərinə götürməyib. Rusiyanın Müdafiə Nazirliyi isə Krımdakı Saki bazasının hücuma məruz qalmadığını, partlayışlara yanğın təhlükəsizliyi qaydalarının pozulmasının səbəb olduğunu açıqlayıb.

Belarus lideri Aleksandr Lukaşenko Rusiyanın Ukraynaya qarşı işğalını açıq dəstəkləyib. Belarus əsgərləri işğalda iştirak etməsələr də, Minsk Rusiya ordusunun onun ərazisindən Ukraynaya girməsinə, Ukrayna şəhərlərini bombalamasına imkan verib.

Amerikanın “Boeing” və Norveçin “Nammo” şirkətləri “Ramjet 155” reaktiv mühərrikli artilleriya mərmisini sınaqdan keçiriblər.

Sınaqlar Norveçdə baş tutub. Sınaq zamanı sursatın sabit uçuşunun imkanları və hərəkət sisteminin fəaliyyəti yoxlanılıb. Gələcəkdə şirkətlər sursatın idarə olunan uçuşunu həyata keçirməyi planlaşdırırlar.

“Boeing” şirkəti “Ramjet 155”i raketlərin və idarə olunan artilleriyanın “hibridləri” adlandırır. Güman edilir ki, bu sursat 155 mm-lik haubitsaların məsafəsini 40-dan 70 km-ə qədər artırmağa imkan verəcək.