Hörmətli Mehriban xanım! Diqqətinizə çatdırıram ki, həyat yoldaşım Rzayev Osman Nəriman oğlu 05 iyul 2022-ci il tarixdən Göygöl rayon prokuroru İlqar Hacızadənin və məmur dostlarının istəyilə şərlənərək qanunsuz həbs olunub. Ötən 1 il ərzində ərimin pozulmuş hüquq və azadlıqlarının bərpasına dair çoxsaylı müraciətlərimiz heç bir fayda verməmişdir. Ölkə rəhbərliyinin də gücü və marağı Göygöl rayonunun hüquq mühafizə orqanlarının özbaşınalığına, rayonumuzda tuğyan edən məmur zorakılığının aradan qaldırılmasına yetməmişdir.

Hörmətli Mehriban xanım!

Sizi də başa düşməyə çalışıram. Ola bilər ki, sizin və prezident İlham Əliyevin vaxtı yoxdur ki, vətəndaşların hüquqlarının qorunması ilə məşğul olsun. Yəqin sizin digər şəxsi və siyasi işləriniz o qədər çoxdur ki, ailəmizə qarşı Baş Prokurorluq səviyyəsində ayaq açmış hüquqi-mənəvi terror aktının varlığından belə xəbər tutmamısınız.

Məlumat üçün bildirim ki, həyat yoldaşım ömrünün 20 ilini jurnalistika fəaliyyətinə həsr etmiş, mediada çalışdığı müddətdə daim dövlətçilik və milli maraqların qorunmasına üstünlük vermiş şəxsdir. Həbsi də peşə fəaliyyətinin sıradan çıxarılmasına yönələn şər-böhtan xarakterlidir. Osman Nərimanoğlu imzası rayon prokurorunun və dostlarının yaratdığı korrupsiya maraqlarının qorunması istiqamətində təşkil edilmiş çirkin bir oyunun günahsız əsiridir.

Onu da bilin ki, mən evdar qadınam. 2 oğlan böyüdürəm. Ərimin həbsindən sonra ailəmizin dolanışıq səviyyəsi daha da ağırlaşıb. Quru çörəyə, təzə geyimə, adi gündəlik məişət qayğılarının həllinə möhtac qalmışıq. Borca-sələmə düşmüşük. Ərimə hər həftə sovqat aparmağa da artıq pul tapa bilmirik.

Rəhbərlik etdiyiniz hakimiyyətin ədalətsizliyi, yarıtmazlığı, şəxsi-maddi maraqları ucbatından günahsız bir jurnalist türmədə, ailəsi də evinin içində aclıqla, mənəvi işgəncələrlə, prokuror İlqar Hacızadənin başçılıq etdiyi dəstənin şantaj və təhdidləri ilə sınağa çəkilir.

Hörmətli Mehriban xanım!

Axı sizlər bu dövləti necə idarə edirsiniz?

Axı niyə şərait yaratmısınız ki, hüquq mühafizə orqanları rüşvət yığıb dövlət vəsaitlərini də talayan məmurları yox, onları ifşa edən jurnalisti "reket" adlandırıb həbs edir? Maraqlanın görün, etimad göstərdiyiniz Baş Prokuror Kamran Əliyev hansı marağına görə sizləri aldadır?! Kamran Əliyev nə üçün Göygöl rayonunda korrupsiya bataqlığı yaratmış prokurorun özbaşınalıqlarını vətəndaş hüquqlarından və qanunçuluqdan daha çox müdafiə edir? Niyə hələ də 5 ili tamam olmuş və təyinatından bəri 8 köməkçi dəyişmiş prokuror hələ də öz vəzifəsində saxlanılır? Bir prokuror ki, təkcə Göygöl xəstəxanasındakı maddi sümürgəçiliyə görə Vasif Əliyevlə(Göygöl rayon RMX-nın direktoru) hər gün prokurorluğun yanındakı parkda yeyib içir, DTX-nın yerli əməkdaşları bu məlumatları bilsə də dövlətdən niyə gizlədir? Prokurorun şər-böhtan kompaniyasında Osmanın yalandan üzünə duran şəxslərin 8 nəfəri məhz Göygöl xəstəxanasının işçiləridir.

Hazırda iş Gəncə Ağır Cinayətlər Məhkəməsinin icraatındadır. Ona görə də sizlərdən sadəcə bir mühüm xahişim var.

Rəhbərlik etdiyiniz Heydər Əliyev fondundan ayda heç olmazsa ailəmizə 1000(min) manat maddi yardım göndərin ki, biz acından ölməyək. Həyat yoldaşım və ailəmiz adından sizlərə söz veririk ki, həyat yoldaşım azadlığa çıxar-çıxmaz işləyib sizə olan borcumuzu qaytaracağıq.

demokratik.az

Rusiya kənd təsərrüfatı məhsullarının ixracına qoyulan məhdudiyyətlər aradan qaldırılarsa, taxıl müqaviləsinə qayıdacaq.

Axar.az xəbər verir ki, bu sözləri Rusiya Prezidenti Vladimir Putin deyib.

“Taxıl müqaviləsini bərpa etmək üçün onun humanitar mahiyyətini qaytarmaq lazımdır”, - Putin bildirib.

2023-2024–cü tədris ili üçün Müəllimlərin İşə Qəbul (MİQ) imtahanından narazı qalanlar var.

Teref.Az APA-ya isinadən xəbər verir ki, Elm və Təhsil Nazirliyinin qarşısına toplanan bir qrup müəllim Azərbaycan dili və ədəbiyyat fənni suallarında nöqsanlara yol verildiyini bildiriblər.

Onlar sualların çətinliyindən və quruluşundan gileyləniblər.

Təhsil İnstitutunun İnsan Resursları Mərkəzindən bildirilib ki, 14 iyul tarixində Azərbaycan dili və ədəbiyyat fənni üzrə müəllimlərin işə qəbulu üzrə test imtahanı keçirilib. Namizədlərin apellyasiya müraciətlərinə əsasən, suallar ekspertlər tərəfindən yenidən yoxlanılıb və 29-cu test tapşırığında səhv olduğu aşkarlanıb.

Qeyd edilib ki, həmin test tapşırığı 1 280 nəfərə doğru, 3 842 nəfərə səhv hesablanıb, 959 nəfər isə tapşırığı cavablandırmayıb. Sualın hamıya doğru hesablanması nəticəsində 1 280 nəfərin nəticəsi sabit qalıb, 3 842 nəfərə 2,5 bal (səhv cavaba görə 0,5 bərpa), 959 nəfərə isə 2 bal artırılıb.

Əlavə olaraq qeyd edilib ki, 17 iyulda edilən apelyasiya müraciətləri iyulun 21-dək emal olunacaq: “Bildiririk ki, Azərbaycan dili və ədəbiyyat fənni üzrə imtahan 1 seans keçirilib və namizədlərə eyni məzmunda test tapşırıqları təqdim olunub”.

Hazırda paytaxt ərazisində sənədsiz evlərin sayı 450-600 min arasındadır. Vətəndaşların belə mənzillərə "kupça" ala bilməmələrinin əsas səbəbi isə ərazi ilə bağlı yaranan problemlərlə əlaqələndirilir. Amma əsas məsələlərdən biri isə sənədsiz evlərdə kommunal ödənişlər məsələsidir.

Maraqlıdır, bu necə tənzimlənir? Sənədsiz evlərə qanuni olaraq qaz, su, işıq və digər kommunal xidmətlər çəkilə bilər?

Məsələ ilə bağlı Qaynarinfo-ya danışan əmlak üzrə ekspert Elnur Fərzəliyev qeyd edib ki, hazırda qeyri-rəsmi rəqəmlərə əsaslansaq, Bakı və Abşeron ərazisində təqribi 500 min civarında çıxarış ala bilməyən fərdi həyət evləri var:

"Onlara qanunsuz tikililər və ya sənədsiz evlər deyilsə də, bu evlərin hər hansı bir formada sənədləri var. Evlərin bəzilərində bələdiyyə tərəfindən verilən sərəncamlar, bəzilərində illər öncə İcra Hakimiyyəti, kolxoz və sovxoz tərəfindən verilmiş sənədlər var. Bakının mərkəzi hissələri olan Yasamal, "Alatava”, "Sovetski”, "Kubinka” kimi tanınan ərazilərdə Mənzil İstismar İdarələri tərəfindən verilmiş "Ev kitabçaları" var. Vətəndaşlar bu sənədlər əsasında kommunikasiya xəttləri çəkib onlardan istifadə edirlər. Həmin ərazilərdə çıxarışlarının olmamasına səbəb bu torpaqların yaşayış üçün deyil, kənd təsərrüfatı və yaxud digər torpaq sahələri olduğu göstərilir.

Bu ərazilərə çıxarışların verilməsi üçün ilk növbətə torpağın təyinatı dəyişməlidir. Ondan sonra sonra üzərində olan tikililərə çıxarışlar verilə bilər. Bundan əlavə, bir çox qadağan olunmuş ərazilərdə böyük tikinti işləri aparılır. Bunlar vulkanik, kommunikasiya xəttləri üzərində, yüksək gərginlik xəttləri altında olan və s. qadağan olunmuş ərazilərdə tikilmiş fərdi evlərdir. Düşünürəm ki, sənədləşdirilmə zamanı bu ərazilərdə köçürülmə işləri aparılacaq və ya bu ərazilərə çıxarışlar verilməyəcək. Həmin ərazilərə çıxarışların verilməsi üçün əgər kommunikasiya xəttləri üzərində və ya al
tında tikilibsə, həmin xəttlər köçürülməlidir və ondan sonra çıxarış verilə bilər. Əks halda, həmin mənzillərə çıxarışların verilməsi qanun ilə qadağandır".

Ekspert bildirib ki, SSRİ dövründə tikilmiş Bakının mərkəzi ərazilərində yerləşən fərdi həyət evlərindən ibarət massivlərin yaşı 100 ili ötsə də, bu ərazilər kənd təsərrüfatı, əkin biçin ərazisi olmasa da, sırf yaşayış massivləri olsa da, hansısa səbəbdən bu ərazilərə kütləvi şəkildə çıxarışlar verilmir:

"Çıxarış verilməməsi səbəbi ilə dövlət büdcəsində ciddi axsamalar müşahidə olunur. Bələdiyyələr əmlak və torpaq vergisi yığırlar. Ancaq bu vergilərin yığılması üçün həmin əmlakın çıxarışı olmalıdır. Bu gün 500 min civarında olan fərdi həyət evinin çıxarışı olmadığına görə həyət evlərinin sahibləri əmlak və torpaq vergilərini ödəmirlər. Həmin əmlaklar sığortalana bilmir. Bu əmlakların satışı zamanı dövlətə vergilər ödənilmir. Hər hansısa çıxarışlı əmlakın satışı zamanı həmin əmlakın ümumi sahəsinin 30 kv.m çıxılır və qalan hissəsinə vergi ödənilir. Hər gün paytaxt ərazisində qeydə alınmayan yüzlərlə həyət evləri satılır. Burada notariuslar, banklar, sığorta şirkətləri və dövlət büdcəsi bu satışlardan yararlana bilmirlər. Vətəndaşın mülkiyyət hüququ tanınmadığına, qorunmadığına görə vətəndaş öz ailəsini evə qeydiyyata sala bilmir, sahibi dünyasını dəyişir və həmin əmlakın mülkiyyət hüququ tanınmadığına görə varislər arasında düzgün bölgü aparılmır. Həmin əmlaklar bank, ipoteka yolu ilə satıla bilmir. Bu baxımdan düşünürəm ki, problemlərin aradan qaldırılması, həmçinin dövlətin bu sahədən gəlir əldə edə bilməsi üçün mütləq şəkildə bu ərazilərin çıxarışları verilməlidir".

Elnur Fərzəliyev bildirib ki, ən azından 3 səlahiyyətli qurum bu əmlaklarda mülkiyyət hüququnu tanıyıb:

Həmin ərazilərə bütün yaşayış evləri qaz, su, işıq, kanalizasiya xəttləri çəkilib. Bu isə ona əsas verir ki, ən azından 3 səlahiyyətli qurum - "Azərsu", "Azərişıq" və "Azəriqaz" həmin mənzillərin sahiblərinə aid olduğunu sübut edir. Bu mənzillərə qaz, su, işıq xəttləri çəkilibsə, sayğaclar mənzil sahibinin adına qeydə alınır. Bu da onu deməyə əsas verir ki, artıq həmin mülkün sahibini ən azından 3 səlahiyyətli qurum tanıyır. Həmin müklərə ünvanlar verilir. Ünvan verilməsi də bir sübutdur. Lakin bütün bunlara baxmayaraq, təəssüflər olsun ki, bu ərazilərə çıxarışlar verilmir. Prosesdə ciddi yubanmalar var. Əksər hallarda vətəndaşlar çıxarışın alınması üçün məhkəməyə müraciət edirlər. Onların xeyirlərinə qərar çıxdıqdan sonra qətnamə ilə çıxarış alırlar. Bu isə Azərbaycan kimi inkişaf etmiş bir ölkə üçün xoşagəlməz haldır".

"Hər il ölkəmizdə əmlak sərgiləri olur. Xarici ölkələrdən də əmlak şirkətləri gəlir və həmvətənlərimizi öz ölkələrinə dəvət edərək əmlak satırlar. Lakin biz Azərbaycan olaraq xarici investorları öz ölkəmizə dəvət etməkdə çətinlik çəkirik. Çünki hər hansısa xarici vətəndaş digər ölkədən əmlak alarkən hüquqşünaslara müraciət edir. Həmin hüquqşünaslar hər hansısa statistik göstərici ortaya çıxararkən görünür ki, bu ölkədə çıxarış sayı azdır. Bunu görüb gələcəkdə baş verəcək neqativ hallara görə xarici investorlar ölkəmizə yatırım etmirlər. Bu baxımdan ölkənin həm büdcəsi, həm də əmlak sektoru çıxarışların olmaması səbəbilə böyük itkilərə məruz qalır", deyə ekspert vurğulayıb.

Bu gün Milli Məclisin növbədənkənar sessiyası başa çatıb.

“AzPolitika.info” xəbər verir ki, iclasın sonunda Azərbaycan Respublikasının Dövlət Himni səsləndirilib və bununla da Milli Məclisin deputatları tətilə çıxıb.

Parlamentin üzvləri iyulun 15-dən avqustun 30-dək istirahətdə olacaqlar. Parlamentin sədri, sədr müavinləri, komitə sədrləri və deputatlar üçün məzuniyyətlə bağlı veriləcək vəsaitlərin miqdarı artıq müəyyənləşib.

Milli Məclis üzvlərinin məzuniyyət zamanı alacaqları müavinət bu formadadır:

- Spiker - 21 min 300 AZN;

- Spikerin birinci müavini - 19 min 170 AZN;

- Spikerin müavinləri - 18 min 105 AZN;

- Komitə və komissiya sədrləri - 17 min 40 AZN;

- Komitə və komissiya sədrlərinin müavinləri - 15 min 975 AZN ;

- Deputatlar - 14 min 910 AZN;

Qeyd edək ki, Azərbaycanda minimum ayılıq əməkhaqqı 345 manatdır.

Uzun illərdir, ölkəmizdə sənədsiz evlərlə bağlı müzakirələr getsə də, təəssüf ki, ortada nəticə yoxdur. Sənədsiz evlər problemi bugünədək hələ də öz həllini tapmayıb. Hesablamalara görə, hazırda paytaxt ərazisində sənədsiz evlərin sayı 450-600 min arasındadır. Vətəndaşların belə mənzillərə "kupça" ala bilməmələrinin əsas səbəbi isə ərazi ilə bağlı yaranan problemlərlə əlaqələndirilir. Amma əsas məsələlərdən biri isə sənədsiz evlərdə komunal ödənişlər məsələsidir.

Bəs bu necə tənzimlənir? Sənədsiz evlərə qanuni olaraq qaz, su, işıq və digər kommunal xidmətlər çəkilə bilər?

Bu barədə Referans.az-ın sorğusunu cavablandıran hüquqşünas Turan Abdullazadə bildirib ki, hazırda sənədsiz evlərə bütün kommunal xidmətlər verilir:

“Yaxın gələcəkdə qanunvericiliyin tələblərinə əməl etmədən tikilmiş və ya tikilməkdə olan obyektlərin təbii qaz, su, kanalizasiya, elektrik və ya istilik enerjisi təchizatı sistemlərinə qoşulmasına dair məsuliyyət müəyyənləşəcəyi gözlənilir. Bu cür tikililərdə qaz, su, elektrik və kanalizasiya təchizatı müəssisələrinin vəzifəli şəxsləri qanunsuz qoşulmaya görə cəzalandırılacaqlar. Hazırda isə qanunsuz tikilililər qaz, su, işıq təchizatları ilə təmin olunur.

Hüquqşünasın sözlərinə görə, hazırda 1 milyona yaxın sənədsiz ev var və bu evlərə qaz, su, işıq verilməsinin dayandırılması hazırda ağlabatan deyil: “Statistik göstəricilərə əsasən ölkədə 1 milyona yaxın sənədsiz ev var. Bu evlərə qaz, su, işıq verilməsinin dayandırılması hal-hazırda ağlabatan və məqbul deyil. Çünki bu həm kütləvi etirazlara səbəb olar, həm də vətəndaşlarımızın konstitusion hüquqlarını pozar, həm də humanizm prinsiplərinə zidd olar. Bunun üçün əvvəlcə sənədsiz tikililərin operativ şəkildə sənədləşmə işlərinə başlanılmalı, əmlak amnistisyası tətbiq olunmalı, daha sonra sanksiyalar tətbiq olunmalıdır”.

Referans.az məsələnin rəsmi tərəfini öyrənmək üçün rəsmi qurumlarla əlaqə saxlayıb.

Sənədsiz evlərə elektrik enerjisinin çəkilməsi ilə bağlı prosedur barəsində sorğumuzu cavablandıran "Azərişıq" ASC-nin mətbuat xidmətinin rəhbəri Vaqif Aydınoğlu bildirdi ki, sənədsiz evlərə işığın çəkilməsi üçün sadəcə yerli icra hakimiyyəti orqanından arayış alınması kifayətdir.

“Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev isə sorğumuza cavab olaraq bildirdi ki, əslində evə qaz sayğacının çəkilməsi üçün evin sənədi lazımdır, amma hazırda sənədsiz evlərlə bağlı problemi nəzərə alaraq sayğaclar qanuni olaraq çəkilir. Bu təbii ki, yerli icra hakimiyyətlərinin təşəbbüsü ilə baş verir.

Azərbaycanda yeni müavinət növləri təsis edilib.

Bu, Prezident İlham Əliyevin bu gün təsdiqlədiyi "Sosial müavinətlər haqqında” qanuna edilən dəyişiklikdə əksini tapıb.

Qanuna əsasən, himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə aylıq, himayədar ailəyə verilmiş uşaqlara mövsümi geyim alınması üçün birdəfəlik müavinətlər təsis edilib.

Himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə aylıq və himayədar ailəyə verilmiş uşaqlara mövsümi geyim alınması üçün birdəfəlik müavinətlərin təyin olunma şərtləri də müəyyənləşib.

Qanuna əsasən, himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə müavinət himayədar valideynlərlə müvafiq icra hakimiyyəti orqanının müəyyən etdiyi orqan (qurum) arasında 0-18 yaş arası uşağın, o cümlədən 18 yaşınadək əlilliyi müəyyən edilmiş uşağın himayədar ailəyə verilməsinə dair müqavilə bağlanıldıqda, himayədar ailəyə verilmiş uşaqlara mövsümi geyim alınması üçün müavinət himayədar valideynlərlə müvafiq icra hakimiyyəti orqanının müəyyən etdiyi orqan (qurum) arasında uşağın himayədar ailəyə verilməsinə dair müqavilə bağlanıldıqda təyin ediləcək.

Eyni zamanda himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə müavinət himayədar valideynlərlə müvafiq icra hakimiyyəti orqanının müəyyən etdiyi orqan (qurum) arasında uşağın himayədar ailəyə verilməsinə dair bağlanılmış müqavilənin qüvvədə olduğu müddətə müavinət təyin olunacaq. Himayədar ailəyə verilmiş uşaqlara mövsümi geyim alınması üçün müavinət himayədar valideynlərlə müvafiq icra hakimiyyəti orqanının müəyyən etdiyi orqan (qurum) arasında uşağın himayədar ailəyə verilməsinə dair müqavilə bağlanıldıqdan sonra ildə 4 dəfə (mart, iyun, sentyabr və dekabr aylarında) ödənilməklə, həmin müqavilənin qüvvədə olduğu müddətə təyin ediləcək.