 |
|
|
Ötən il Böyük Britaniyadan Azərbaycana 3,83 milyard dollar dəyərində məhsul ixrac edilib.
Yeniavaz.com BMT-nin beynəlxalq ticarət məlumat bazasına – COMTRADE-ə istinadən xəbər verir ki, əvvəlki – 2023-cü illə müqayisədə Böyük Britaniyanın Azərbaycana ixracı 6,7 dəfə artıb.
Qeyd olunur ki, 2023-cü ildə Böyük Britaniya Azərbaycana 571 milyon dollar dəyərində məhsul ixrac edib.
Azərbaycan Dövlət Gömrük Komitəsinin açıqladığı məlumatda isə göstərilir ki, eyni dövrdə, yəni 2024-cü ildə Azərbaycan Böyük Britaniyadan 273 milyon dollar dəyərində məhsul idxal edib.
Açıqlanan məlumatlardan belə görünür ki, Azərbaycan və Böyük Britaniyanın açıqladığı rəsmi məlumatlar arasında 14 dəfə fərq var.
Böyük Britaniyanın rəsmi qurumları bildirirlər ki, 2024-cü ildə Azərbaycana 3,3 milyard dollar dəyərində qiymətli daşlar, metallar, sikkələr ixrac edilib. Lakin Azərbaycan Dövlət Gömrük Komitəsi 2024-cü ildə Böyük Britaniyadan cəmi 1,89 milyon dollar dəyərində qiymətli daşlar, metallar, sikkələr idxal edildiyini açıqlayıb.
İki ölkə arasındakı ticarətdə başqa bir diqqət çəkən məqam odur ki, Azərbaycan ötən il Böyük Britaniyaya 407 milyon dollarlıq məhsul ixrac etdiyini açılqayıb və bu məhsulun 396 milyon dollarını xam neft təşkil edib. Ancaq Böyük Britaniya ötən il Azərbaycandan cəmi 65,8 milyon dollarlıq məhsul idxal etdiklərini açıqlayıb və bu məhsulların da 58,8 milyon dollarını neft təşkil edib.
Qeyd edək ki, iki ölkənin açıqladığı ticarət göstəriciləri arasında bu qədər kəskin fərqin olması insanlar tərəfindən də təccüblə qarşılanıb, həmçinin mediada və sosial şəbəkələrdə geniş müzakirələrə səbəb olub.
Məsələ ilə bağlı Yeniavaz.com-a açıqlama verən iqtisadçı-ekspert Allahverdi Aydın bildirir ki, bu kəskin fərqin olması malların mənşə ölkəsinin fərqli qeyd olunması ilə bağlıdır:
“Böyük Britaniyanın rəsmi qurumları ölkədən çıxan malları ixrac kimi qeydə alırlar. Lakin, Azərbaycan ölkəyə daxil olan malı həmin məhsulun istehsal olunduğu, yəni mənşə ölkəsini əsas götürərək qeydə alır. Məsələn, ötən il Azərbaycan Böyük Britaniyadan ABŞ istehsalı olan 1 milyard dollar dəyərində qızıl idxal edib və bunu rəsmi statistikaya ABŞ-dən idxal kimi qeyd edib. Lakin, Böyük Britaniya həmin məhsulu öz rəsmi statistikasında ixrac məhsulu kimi göstərib. Yəni, ticarət göstəricilərindəki kəskin fərqlər bununla bağlıdır. Bəzən kiçik fərqlər də olur ki, bunlar da malların dəyərinin fərqli qiymətləndirilməsi ilə bağlıdır. Məsələn, Britaniya ixrac zamanı malı FOB qiyməti ilə, yəni malın gəmi və ya nəqliyyat vasitəsinə yükləndiyi anda olan qiyməti ilə göstərir. Azərbaycan isə idxal zamanı CIF deyilən qiymətlə, yəni malın nəqliyyat və sığorta xərcləri də daxil olmaqla tam çatdırılma dəyərini əsas götürür. Belə olan halda, iki ölkənin açıqladığı rəqəmlərdə fərqliliklər olur”.
Ötən il Ermənistanın Türkiyəyə ixracı son 2 ildə kəskin şəkildə azalaraq 413 min dollara düşüb.
Yeniavaz.com BMT-nin beynəlxalq ticarət məlumat bazasına – COMTRADE-ə istinadən xəbər verir ki, Ermənistanın Türkiyəyə ixracı 2023-cü ildə 6,4 milyon, 2022-ci ildə isə 61,2 milyon dollar olub.
Qeyd edək ki, ixracdan fərqli olaraq Ermənistanın Türkiyədən idxalında ciddi dəyişiklik olmayıb. Belə ki, 2024-cü ildə Ermənistan Türkiyədən 334 milyon, 2023-cü ildə 336 milyon, 2022-ci ildə isə 262 milyon dolar dəyərində məhsul idxal edib.
Cədvəldə 2024-cü ildə Ermənistanın Türkiyəyə ixrac etdiyi və Türkiyədən idxal etdiyi əsas məhsulların siyahısı yer alıb:
Ağsu rayonunda son beş ildə keçirilmiş dövlət satınalmaları təhlil edilərkən ortaya maraqlı mənzərə çıxır. 2020–2024-cü illəri əhatə edən məlumatlara əsasən, rayonda ümumilikdə 11 milyon 442 min manat dəyərində müxtəlif təyinatlı 54 tender keçirilib. Bu tenderlərin əksəriyyəti tikinti, abadlıq, işıqlandırma və suvarma sistemlərinin təmiri ilə bağlı olub.
FED.az xəvbər verir ki, tenderlərin ümumi məbləğinə görə bölgədə açıq fərqlə lider olan şirkət “ATF” MMC-dir. Şirkət təkcə Ağsu Rayon İcra Hakimiyyətindən 3 milyon 547 min manatlıq sifariş alıb. Bu sifarişlər əsasən şəhərdaxili yolların və kəndlərarası avtomobil yollarının əsaslı təmiri ilə bağlıdır. Maraqlıdır ki, tenderlər fərqli illərdə keçirilsə də, layihələrin mövzusu dəyişmir. 2020-ci ildən başlayaraq ardıcıl şəkildə eyni işlər təkrar-təkrar bu şirkətə həvalə olunub.
“Topxana Layihə İnşaat” MMC rayonda ikinci ən çox tender qazanan şirkətdir. Bu şirkət daha çox işıqlandırma və abadlıq sahəsində fəaliyyət göstərib. 2023 və 2024-cü illərdə müxtəlif sifarişlər əsasında 1 milyon 189 min manatlıq müqavilə bağlayıb. “Topxana” MMC-nin də əsas sifarişçisi Ağsu Rayon İcra Hakimiyyətidir.
FED.az xəvbər verir ki, eyni zamanda, “Şükran-2002” MMC, “Huseynli Partners Architecture and Construction” MMC və “Girdiman Təmir-Tikinti” MMC kimi şirkətlər də rayonun iri sifarişçiləri sırasındadır. Hər biri təxminən 900 min manatdan çox dəyərində tender qazanıb. Onların layihələri də əsasən suvarma sistemləri, tikinti və abadlıq sahələrinə yönəlib. Qeyd olunan bu şirkətlərin tenderləri müxtəlif tarixlərə təsadüf etsə də, predmetlər və sifarişçilər arasında bənzərliklər diqqətdən yayınmır.
FED.az xəvbər verir ki, tender qalibləri sırasında daha az sayda müqavilə qazansalar da, diqqət çəkən şirkətlərdən ikisi də “Ece Group” MMC və “Turan International Company” MMC-dir. Hər iki şirkət Ağsu Suvarma Sistemləri İdarəsi tərəfindən keçirilmiş iki tenderin qalibi olub.
Azərbaycan Respublikasının Prezidenti İlham Əliyev aprelin 24-də Pekində “China Energy Engineering Corporation Limited” (“Energy China”) şirkətinin sədri Sonq Hailianq ilə görüşüb.
Musavat.com xəbər verir ki, görüşdə “China Energy Engineering Corporation Limited” şirkətinin Azərbaycanda hazırda bir neçə layihə həyata keçirdiyi vurğulandı. Qeyd edildi ki, şirkət Xəzər dənizində 1 gigavat külək enerjisi mega layihəsinin podratçısıdır. Füzuli rayonunda günəş enerjisi və digər layihələrə isə “China Energy Engineering Corporation Limited” investisiya yatırıb.
Sonq Hailianq rəhbərlik etdiyi şirkət tərəfindən Azərbaycanla birlikdə enerji dəhlizlərində əməkdaşlıqla bağlı təkliflərlə çıxış etdi. Dövlətimizim başçısı “China Energy Engineering Corporation Limited” şirkəti ilə əməkdaşlığın prioritetliyinə və strateji xarakterinə toxundu.
Söhbət zamanı birgə uzunmüddətli enerji planlaşdırma layihəsi ilə bağlı fikir mübadiləsi aparıldı. Qeyd edək ki, Azərbaycan Prezidentinin Çinə dövlət səfəri çərçivəsində bununla da bağlı sənəd imzalanıb.
Görüşdə Azərbaycanda gələcəkdə Enerji tədqiqat mərkəzinin yaradılması ilə bağlı məsələlər müzakirə olundu. Şirkətin suyun idarəedilməsində böyük təcrübəsi nəzərə alınaraq bu sahədə də əməkdaşlıqla bağlı fikir mübadiləsi aparıldı.
Qeyd edək ki, fəaliyyət dairəsinə bərpa olunan enerji layihələri ilə yanaşı, hidrogen enerjisi, enerjinin saxlanması və iri elektrik şəbəkələrinin tikintisi kimi istiqamətlər daxil olan şirkətin 147 ölkədə 256 filialı var. Hazırda 416 layihəsi icra olunan şirkət Çinin bərpaolunan enerji bazarının 50%-nə nəzarət edir.
Azərbaycan Mərkəzi Bankının (AMB) İdarə Heyəti (İH) uçot dərəcəsinin 7,25 % saxlanılması barədə qərar qəbul edib.
Bu barədə AMB-yə istinadən xəbər verir.
Məlumata görə, faiz dəhlizinin aşağı həddi 6,25 %, yuxarı həddi isə 8,25 % saxlanılıb.
"Bu qərar faktiki və proqnozlaşdırılan inflyasiyanın hədəflə (4±2%) müqayisəsi, qlobal iqtisadiyyatda və maliyyə bazarlarındakı vəziyyət, ölkədaxili makroiqtisadi meyillərin təhlili və pul siyasəti qərarlarının real sektora ötürücülüyü nəzərə alınmaqla qəbul olunub", - AMB bəyan edib.
Faiz dəhlizinin parametrləri ilə bağlı növbəti qərar barədə məlumat ictimaiyyətə iyunun 11-də açıqlanacaq.
İqtisadçı-ekspert Xalid Kərimli “Referans”-a açıqlamasında bu haqda danışıb.
“Səbəb ondan ibarətdir ki, Mərkəzi Bank hesab edir ki, inflyasiya 5.9 faiz olmasına baxmayaraq, Mərkəzi Bankın gözləntilərinə uyğun gedir. Qarşıdakı 12 aylıq proqnozlar hazırdır və hesab edirlər ki, buna da uyğun olacaq. Elə bu səbəbdən də faiz dərəcəsinin aşağı salınmasını istəməyiblər. Həm də hesab edirlər ki, bundan sonrakı inflyasiya, əsasən, xarici faktorlardan asılı olacaq. Buna görə də faiz dərəcəsinin artırılması qərar verilməyib. Çünki xaricdən gələn malların qiyməti ölkədəki inflyasiyaya təsir edəcək. Bu səbəbdən də faiz dərəcəsini artırılması qərarına ehtiyac duymamalarına gətirib çıxarıb”.
Ekspert qeyd edib ki, Mərkəzi Bankın uçot dərəcəsini sabit saxlamasının əsas səbəblərindən biri də son dövrlərdə bankların faiz xərclərinin artması daha da aktivləşib.
“Onsuz da son dövrlərdə ölkədə faiz dərəcələri artıb. Bu aspektdən ona da getməməyi və gözləməyi diqqətdə saxlayıblar. Bundan əvvəlki iclasda da onların inflyasiya ilə bağlı proqnozları hesab edirlər ki, indi də proqnozdakı kimi qalmaqdadır. Burada pozitiv məsələlər də var. Tədiyyə balansında profisitin olması müsbət amil kimi qeyd olunur. Baxmayaraq ki, neftin qiyməti müəyyən qədər düşüb, amma yenə də ölkənin ticari müsbət həddədir. İndiki məqamda Mərkəzi Bankın faiz dərəcələrini dəyişməməsi daha çox “gözləyək görək nə olacaq?” prinsipindən irəli gəlir”.
Son sutka ərzində bitkoinin qiyməti kəskin şəkildə artaraq mart ayından bəri ilk dəfə 90 min dollar həddini keçib. Ticarət platformalarının məlumatına görə, 22 aprel tarixinə olan vəziyyətə əsasən, kriptovalyutanın dəyəri 2,54 faiz artaraq 90,47 min dollara çatıb.
Teleqraf xəbər verir ki, bitkoinin dəyəri 25,6 unsiya qızıla bərabər olub.
Son iki həftə ərzində ABŞ ilə Çin arasında ticarət gərginliyi səbəbilə qızılın qiyməti 10 faiz artıb. Nəticədə bitkoin və qızıl arasındakı nisbət 2024-cü ilin noyabrında, ABŞ-də keçirilən prezident seçkiləri öncəsində müşahidə olunan səviyyəyə qayıdıb.
“Euler Analitik Texnologiyalar” şirkətinin mütəxəssisləri bildirirlər ki, bazarlardakı qeyri-müəyyənlik fonunda investorlar qoruyucu aktiv kimi yenidən kriptovalyutalara üz tuturlar. Bu tendensiya bitkoinin qızıl qarşısındakı dəyərinin bərpasına səbəb olub.
Xəbər verdiyimiz kimi, ABŞ-nin və dünyanın nüfuzlu nəşrlərindən olan “Forbes” jurnalı milyarderlərin 39-cu qlobal reytinqini dərc edib və həmyerlimiz, “Lukoyl” şirkətinin əsas sahibi Vahid Ələkbərov Rusiyanın ən varlı şəxsi olub.
Yeniavaz.com “Forbes”ə istinadən xəbər verir ki, Vahid Ələkbərovdan başqa “Lukoyl” şirkəti ilə bağlılığı olan daha 10 nəfər milyarderlərin siyahısına düşə biliblər.
Bildirilir ki, şirkətin prezidenti və əsas sahibi Vahid Ələkbərov ardıcıl ikinci ildir ki, siyahıya liderlik edir. Onun sərvəti bu il 28,7 milyard dollar təşkil edir.
Ələkbərovun həyat yoldaşı Larisa Ələkbərova da 2007-ci ildən şirkətin minoritar səhmdarı hesab olunur. Onun da payı illər ərzində artaraq bu gün onu Rusiyanın ən zəngin qadınları siyahısında 19-cu yerə çıxarıb.
“Lukoyl”da Ələkbərovla birgə çalışan Leonid Fedun və Nikolay Tsvetkov da “Lukoyl”un yüksəlişindən faydalanıblar. Tsvetkovun sərvəti 2007-ci ildə 9 milyard dollaradək çatsa da, sonradan fərqli maraqlar üzündən maliyyə imperiyasını itirib. Əvəzində, Fedun sərvətini 2025-ci ildə 10,4 milyard dollara çatdırıb. Bu il onun ilk evliliyindən olan övladları Anton və Yekaterina da hər biri 1,1 milyard dollar sərvətlə ilk dəfə “Forbes” siyahısına daxil olublar. Onlara “Lukoyl” səhmləri 2018-ci ildə bağışlanıb.
Eyni səviyyədə sərvətə sahib olan digər adlar da var. Şirkətlərini “Lukoyl”a satan Andrey Kuzyaev və Qriqori Berezkin də milyarderlər arasındadır. Siyahıda həmçinin keçmiş sovet neftçiləri Aleksandr Putilov, Aleksandr Caparidze, Ravil Maqanov və Serik Raxmetov da yer alır.
Ümumilikdə, “Lukoyl”un hesabına milyarder olan 13 nəfər var. Onlardan 11-i ən zəngin iş adamları, 2-si isə ən varlı qadınlar siyahısında yer alır. 2025-ci ildə bu siyahıya üç yeni milyarder də əlavə olunub.
Aprel ayının əvvəlindən Azərbaycanda kartof və soğanın qiyməti kəllə çarxa çıxıb. Kartofun 1 kiloqramı ən ucuzu 1.60 manata, ən bahası isə 2 manata satılır. Soğan da həmçinin ən ucuzu 1.50, hətta 1.80-ə təklif olunur. Halbuki normalda kartofun 1 kiloqramı maksimum 1 manat, soğanın qiyməti isə 60-70 qəpik olardı. Hər yeməyin əvəzolunmazı olan bu ikilinin qiymətləri əvvəlki illərdə heç vaxt bu qədər baha olmayıb. Hətta 2 il əvvəl aprel ayında təzə çıxan soğanın qiyməti 20 qəpik idi. İndikindən az qala 10 dəfə ucuz. Hazırki dövrdə evimizi sadəcə 2-3 günlük kartof-soğanla təmin etmək üçün ən azı 10 manat xərcləməliyik.
Kartof-soğanın bahalaşmasının səbələrini kənd təsərrüfatı eksperti Akif Nəsirli Lent.az-a açıqlayıb. Onun sözlərinə görə, təzə kartofun hələ də bazarlara çıxarılmaması səbəbindən qiymət ucuzlaşmır:
“Kartof və soğanın baha olması bazardakı qıtlıqla bağlıdır. Bazarda təklif çoxdur, tələb az. Yəni təklif tələbi üstələdiyi üçün təbii olaraq, qiymət bahalaşır. Qıtlığa səbəb isə bu məhsulların əhalinin qida tələbatının 80-90 faizini ödəməsidir. Əslində 100 faizi də ödəyə bilər. Ancaq yazda yığılan təzə faraş kartofun 60 faizini ixrac edirik. Çünki onu saxlamaq üçün bahalı şərait yaradılmalıdır. Sərf etmədiyi üçün Azərbaycanda faraş kartof saxlanılmır. İyun ayınadək bu kartofların məsələsi həll olunur, becərilən kimi 60 faizi ixraca, qalanı da yerli bazarlara yönəlir. İyundan sonra isə yay aylarında aran rayonlarda kartof becərilir. Bu kartofu saxlamaq isə asandı, yetkin olduqları üçün bahalı şərait tələb olunmur. Tələbatı tam ödəyir və hətta payızda ixrac da olunur”.
Akif Nəsirli deyib ki, soğanın bahalaşması da təzə soğanın kütləvi yığımına başlanılmaması ilə əlaqədardır:
“Payızda əkilən soğan yazda yığılır, artıq yığımına başlanılmalıdır. Bu soğanların saxlanılması da faraş kartof kimi çətindir. Gündəlik istifadə üçün əlverişli deyil, tez xarab olur. Ona görə də becərilən kimi dərhal bazarlara göndərilir və satılır. Yazda əkilən soğanlar isə yayın sonu və payızda becərilir. Həmin soğanlar daxili tələbatı tam ödəyir və ixracata yönəldilir. Xüsusən, dekabr-yanvar aylarında ixracat daha çox artır. Buna görə də ölkədə mart aprel aylarında kartof soğan qıtlığı yaranır. Sahibkarlar həmin aylar idxalı artırırlar. Faraş kartof çıxanda isə idxaldan qorxurlar. Çünki faraş kartof bazara çıxanda idxal olunan kartofun qiymətinə çox təsir edəcək. Buna görə də, idxalı çox azaldırlar”.
Ekspert getdikcə qiymətlərin ucuzlaşacağını deyir:
“Bahalaşmaya təsir göstərən səbəblərdən biri budur ki, sahibkarların əlində statistika yoxdur bilsinlər ki, faraş kartof nə vaxt bazara çıxacaq. Ötən il faraş kartof aprelin 8-də satışa çıxarılmışdı. Bu il isə ayın 22-dir, amma hələ də bazarda faraş kartof yoxdur. Soğan da eynilə, ötən il martın sonu bazara çıxmışdısa, bu il hələ təzə-təzə bazarlarda görürük. Beləcə qarşıdakı günlərdə faraş kartof və soğanın yığımı artacaq və kütləvi şəkildə bazarlara çıxarılacaq. Onda hər ikisinin də qiyməti düşəcək”.
Həmsöhbətimiz sonda qeyd edib ki, qışda bahalaşmanın qarşısını almaq üçün xüsusi kvota tətbiq olunmalıdır:
“Məsələ burasındadır ki, dövlət bu məsələni müəyyən rıçaqlarla tənzimləməlidir. Məsələn, deyirdik ki, ölkədə yetişdirilən soğan daxili tələbatı tam ödəyir. Amma qış aylarında soğanın bahalaşmasının qarşısı ala bilmirik. Bunun üçün kvota qoydular və götürüb bütün aylara böldülər. Kvotanı iyul, avqust, sentyabr və oktyabr aylarına qoymaq lazım deyil. Bu statistika dövlətin əlindədir də. Görür ki, soğan dekabr-yanvar aylarında kütləvi ixrac edilir. Aprel ayınadək ölkə daxilində tələbata kifayət edəcək soğan saxlamaq üçün xüsusi kvota tətbiq etmək lazımdır. Bunun üçün çevik qərarlar lazımdır. Lakin çox təəssüf ki, biz Kənd Təsərrüfatı Nazirliyinin çevik reaksiyasını müşahidə edə bilmirik”.
Bu ilin yanvar-mart ayları ərzində Dövlət Gömrük Komitəsinin (DGK) xətti ilə dövlət büdcəsinə 1 milyard 430,5 milyon manat (841,5 milyon dollar) vergi və rüsum daxil olub.
Yeniavaz.com açıqlanan rəsmi məlumatlara istinadən xəbər verir ki, bu, ötən ilin eyni dövrü ilə müqayisədə 2,7% və ya 39,4 milyon manat azdır.
Qeyd edək ki, ötən ilin yanvar-mart aylarında gömrükdən dövlət büdcəsinə 1 milyard 469,9 milyon manat (864,6 milyon dollar) daxil olub.
Onu da bildirək ki, ötən ilin eyni dövrü ilə müqayisədə gömrükdən büdcəyə daxil olan vəsaitlər ümumi ticarət dövriyyəsinə, o cümlədən idxala nisbətdə də azalıb.
Belə ki, ötən ilin yanvar-mart aylarında xarici ticarət dövriyyəsi 9 milyard 696 milyon dollar, idxalın ümumi dəyəri isə 3 milyard 711,6 milyon dollar olub.
Bu isə o deməkdir ki, ötən ilin yanvar-mart aylarında büdcəyə daxil olan vəsait xarici ticarət dövriyyəsinin 9%-nə, idxalın isə 23,3%-nə bərabər olub.
Müqayisə üçün qeyd edək ki, bu ilin yanvar-mart aylarında xarici ticarət dövriyyəsi 12 milyard 49 milyon dollar, idxalın ümumi dəyəri isə 5 milyard 663 milyon dollar olub.
Nəticədə bu ilin yanvar-mart aylarında büdcəyə daxil olan vəsait xarici ticarət dövriyyəsinin 7%-ni, idxalın isə 14,8%-ni təşkil edib.
Xəbər verdiyimiz kimi, bir neçə gün öncə REAL partiyasının sədri, iqtisadçı-ekspert Natiq Cəfərli Azərbaycan Yerüstü Nəqliyyat Agentliyi (AYNA) tərəfindən qanunsuz cərimələndiyini iddia edib.
Sədr parkinq xidmətindən istifadə etmədiyi halda 20 manat məbləğində cərimə olunduğunu bildirib və məsələ ilə bağlı məhkəməyə müraciət edəcəyini deyib.
Natiq Cəfərli daha sonra həmin problemə görə AYNA-dan ona zəng edildiyini və məsələ ilə bağlı araşdırma aparıldığını əlavə edib.
Məlumatda qeyd olunub ki, inzibati protokol İnzibati Xətalar Məcəlləsinin 346-1.1-ci maddəsinə əsasən tərtib edilib.
Bəs qeyd olunan maddəyə əsasən, tətbiq edilən cərimələrdən toplanan vəsaitlər hansı hesaba yönəldilir? Bu vəsaitlər birbaşa dövlət büdcəsinə transfer olunur, yoxsa AYNA-nın öz balansında qalır? AYNA həmin vəsaitləri nə edir, hansı məqsədlərlə istifadə edir? Məhz AYNA tərəfindən parkinq qaydalarının pozulmasına görə yazılan cərimələr hansı hüquqi sənədə, qanunvericilik aktına əsasən tətbiq olunur?
Mövzu ilə əlaqədar nəqliyyat eksperti Eldəniz Cəfərov “Cebheinfo.az”a açıqlamasında bildirib ki, AYNA tərəfindən parkinq qaydalarının pozulmasına görə yazılan cərimələr “Yol hərəkəti haqqında” Azərbaycan Respublikasının Qanununa və İnzibati Xətalar Məcəlləsinə əsasən tətbiq olunur.
Onun sözlərinə görə, AYNA yalnız parklanma qaydalarının pozulmasına görə cərimə tətbiq edə bilər:
“Məsələn, "AzParking" MMC şirkəti tərəfindən təşkil olunan parklanma yerlərində nəqliyyat vasitələrini düzgün qaydada saxlamayan sürücülər AYNA tərəfindən cərimələnə bilər.
Qeyd etdiyim kimi, bu cərimələr həm “Yol hərəkəti haqqında” Qanuna, həm də İnzibati Xətalar Məcəlləsinə əsasən yazılır. Həmin sənədlərdə parklanma qaydaları var, açıq şəkildə göstərilib və tətbiq edilən cərimələr də bu qaydalara əsaslanır”.