Eynulla Fətullayev Media Agentliyini ələ saldı - ŞOK STATUS
Azərforum xəbər verir ki, tanınmış jurnalist, "Haqqin.az" saytının baş redaktoru Eynulla Fətullayev sosial şəbəkədə Medianın İnkişafı Agentliyini sərt tənqid edib. O, Agentlikdə son vaxtlar həyata keçirilən kadr dəyişikliklərinə rişxənd edərək ələ salıb, qurumun fəaliyyətini "məzhəkə" adlandırıb. Fətullayev, eyni zamanda Azərbaycan mətbuatı haqqında da "axsaq, kifir, dilsiz-qulaqsız" ifadələrini işlədib.

Azərforum Eynulla Fətullayevin statusunu olduğu kimi təqdim edir:

"Bu Media ilə bağlı partapart təyinatlar baş verir. Birini baş katib, obirisini baş katibin müavini, üçüncüsü Müşahidə Şurasının üzvü… Elə bil ki, söhbət axsaq, kifir, dilsiz-qulaqsız Azərbaycan mediasından yox, Britaniya və ya Almaniyanın mediasından gedir… Bu məzhəkəyə gülməyib nə edəsən? Media Agentliyi! Yox bir Avropa Şurası Parlament Assambleyası ".

Artıq bir neçə gündür bir sıra KİV və sosial mediada ilin əvvəlindən repetitorluq xidmətlərinin qiymətləri artdığı qeyd edilir. Artımların təxminən 30 faizə qədər olduğu bildirilib.

Məsələ ilə bağlı sualları cavablandıran Elm və Təhsil Nazirliyi yanında İctimai Şuranın üzvü, Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov qeyd edib ki, repetitorluq Azərbaycanda universitetlərə qəbul olmaq üçün vasitə olaraq istifadə olunur.

“Repetitor xidməti vergiyə cəlb olunmur və bütövlükdə bu xidmətin legallaşdırılması istiqamətində bu və ya digər hüquqi tənzimləmələr həyata keçirilmir. Buna baxmayaraq, repetitor qiymətləri gündən-günə qalxır. Onların da kifayət qədər öz əsaslandırmaları var. Qeyd etdiyim kimi, bütövlükdə bütün xidmətləri bazar özü tənzimləyir və bazarda əgər tələbat varsa, təbii ki, o xidmətin qiyməti qalxır.

Görünən odur ki,tələbat var, çoxdur və eyni zamanda, bunun müqabilində onlar qiymətləri qaldırmaqda maraqlıdırlar. Yəni belə deyək, vergiyə cəlb olunmamaq məsələnin bir tərəfidir.

Niyə repetitorluğa bu qədər maraq var? Təbii ki, bu xidməti qadağa eləmək mümkün deyil. Çünki xidmət qanuni xidmətdir, onun vergi tərəfi başqa məsələdir. Bacaraqları, bilikləri olan şəxs, əlbəttə ki, repetitorluq fəaliyyəti ilə məşğul ola bilər, bu xidməti göstərə bilər. Amma məsələ budur ki, gələcəkdə bu xidmət daha da genişlənəcək. Hər zaman qeyd edirəm, bizdə repetitorluq daha çox təhsil müəssisələrinə qəbula xidmət edir.

Nəyə görə belə olmalıdır? Araşdıqda görürsən ki, o repetitorluq xidmətini göstərən adamların böyük əksəriyyəti elə orta məktəbdə müəllimdir. Ali təhsil müəssisələrində müəllimdir. Bir çox hallarda orta təhsil müəssisələrində olan müəllimlər bilərəkdən bu xidmətdən qazanmaq üçün sinifdə dərs keçmirlər, keyfiyyətli tədris aparmırlar.

Dərs keçənlərin də öz iddiaları var. Onlar qeyd edirlər ki, Dövlət İmtahan Mərkəzinin tərtib etdiyi suallar əsasında dərs qurmurlar. Yəni burada repetitorların iddiaları odur ki, tədris proqramları ilə Dövlət İmtahan Mərkəzinin tərtib etdiyi suallar arasında uyğunsuzluqlar var”, – o qeyd edib.

İ.Orucov bildirib ki, repetitor tələbələrə müştəri gözündən baxırsa, həmin müəllimlərə qarşı ən sərt cəzalar tətbiq olunmalıdır.

“Bunlar uzaqlaşdırılmalıdır. Yoxsa gəlib məktəbdə gününü keçirib, sonra repetitor xidməti müqabilində pul almaq yaramaz. Siz təsəvvür edin, bir valideynin bir uşağının repetitor xərcləri 500-600-700 manat təşkil edir. Bu böyük məbləğdir.

Direktorlar bu istiqamətdə biabırçı fəaliyyətlə məşğuldurlar. Direktorlarvar ki, pul müqabilində məktəb binalarının qapılarını o repetitorların üzünə açırlar. Çirkin fəaliyyətlərdən biri odur ki, hansısa pul müqabilində şagirdlərin məktəbə gəlməməsinə göz yumurlar. Həftənin 2-3 günü şagird dərsə gəlmir. Mütləq şəkildə bunu həll etmək və üzərində getmək lazımdır”, – deyə o vurğulayıb./trend.az

Bir neçə gündür Sumqayıt və Bakı arasında ekspress avtobuslar fəaliyyətə başlayıb. Bu avtobusların Sumqayıt avtovağzalı, “Bağçalı evlər” yaşayış kompleksi, Sumqayıt dairəsi, Ceyranbatan qəsəbəsi, metronun “Avtovağzal” stansiyası, Bakı Beynəlxalq Avtovağzal Kompleksi marşrutu üzrə hərəkət etməsi müəyyənləşib. Amma avtobusların paytaxtdakı son dayanacağının avtovağzal ərazisinin olması sərnişinlər tərəfindən narazılıqla qarşılanıb. Bir çox sərnişin avtobusların 20 Yanvar ərazisinə getməməsinə görə narazılıqlarını ifadə edirlər. Onlar əlavə vaxt və pul itkisinə məruz qalmamaq üçün manatlıq taksilərə üstünlük verdiklərini söyləyirlər. Arqument kimi isə Sumqayıtdan metronun Avtovağzal stansiyasına 80 qəpiyə gəlməkdənsə, elə bir manata 20 Yanvara gəlməyin daha əlverişli olduğu göstərilir.

Nəqliyyat məsələləri üzrə ekspert Yasin Mustafayev İqtisadiyyat.az-a açıqlamasında bildirib ki, Bakı-Sumqayıt ekspress avtobuslarının açılması bir sıra üstünlüyə malikdir.

Onun sözlərinə görə, həmin marşrutlar avtobus xətti ilə hərəkət edir və tıxacda qalmır. Halbuki pik saatlarda sərnişinlər 1-1.5 saat Bakı-Sumqayıt yolunda tıxacda qalmağa məcburdurlar:

"Doğrudur, 20 Yanvar metrosundan 1 manatlıq taksilər Sumqayıta sərnişin aparırlar. Sərnişinlər hesab edirlər ki, 1 manatlıq taksidən istifadə etmək daha səmərəli və vaxta qənaətdir. Lakin bu taksilər də tıxacda qalır və nəticədə vaxt itkisi yaşanır. Çünki fərdi nəqliyyat vasitələri avtobus zolaqlarından istifadə edə bilmir. Halbuki Sumqayıt şəhər Avtovağzalını Bakı Beynəlxalq Avtovağzal Kompleksi ilə əlaqələndirən yeni ekspress marşrut xətti avtobus zolağında rahat hərəkət edə bilir".

Ekspert deyir ki, sözügedən ekspress avtobusların 20 Yanvar ətrafından hərəkət etməsi əlavə sıxlığa səbəb olacaq.

Bu gün ölkəmizin fərdi nəqliyyat vasitələrindən ictimai nəqliyyata keçid dövrünü yaşadığını bildirən Y.Mustafayev söyləyib ki, bu keçid baş verməsə, Bakıda tıxac probleminə görə hərəkət etmək mümkün olmayacaq: "Eyni zamanda Bakıətrafı kənd və qəsəbələrə, o cümlədən Sumqayıta gediş-gəliş çətinləşəcək. Yaxın zamanlarda ictimai nəqliyyatla bağlı aparılan islahatlar daha da təkmilləşdiriləcək. İslahatlar davam etdikcə və infrastruktur yaradıldıqca 20 Yanvara və şəhərin mərkəzinə doğru daha qısa vaxtda hərəkətə imkan yaradan addımlar da atılacaq".

Mövzu ilə bağlı “Baku Bus” MMC-in mətbuat katibi Əsmər Əliyeva İqtisadiyyat.az-a açıqlamasında bildirib ki, qeyd olunan məsələ "BakuBus"ın səlahiyyətində deyil: "Belə ki, "BakuBus" daşıyıcı şirkətdir və Azərbaycan Yerüstü Nəqliyyat Agentliyi (AYNA) tərəfindən müəyyən edilmiş marşrut pasportu əsasında fəaliyyət göstərir. Marşrut pasportunda dayanacaqların yeri, sayı, avtobusların sayı, interval və s. öz əksini tapır".

AYNA-nın mətbuat katibi Tural Orucov isə İqtisadiyyat.az-a açıqlamasında ekspress avtobuslarının son dayanacağının Bakı Beynəlxalq Avtovağzal Kompleksindəki Nəqliyyat Mübadilə Mərkəzinin olduğunu xatırladıb.

O söyləyib ki, buradan da paytaxtın istənilən ərazisinə avtobuslar hərəkət edir.

Qurum rəsmisinin sözlərinə görə, Sumqayıtdan Bakı şəhəri istiqamətinə ictimai nəqliyyatın təşkili ilə bağlı sərnişin tələbatı nəzərə alınaraq, Azərbaycan Yerüstü Nəqliyyat Agentliyi tərəfindən yeni ekspress marşrut xətti təşkil edilib. T.Orucov bildirib ki, 14 avtobus 11 dəqiqə intervalla sərnişinlərə xidmət göstərir:

"İlkin təhlillər onu göstərir ki, avtobusların son dayanacağa çatma müddəti təxminən 35 dəqiqə təşkil edib. Digər nəqliyyat vasitələri isə eyni məsafəni təxminən 1 saat ərzində qət edir. Rahat, sürətli və təhlükəsiz sərnişindaşıma xidməti göstərən avtobuslar “Avtovağzal” metrostansiyası dayanacağında saxlayaraq sərnişinlərin metroya əlçatanlığını təmin edir. “20 Yanvar” metro stansiyasından fərqli olaraq “Avtovağzal” metro stansiyasında nəqliyyat sıxlığı müşahidə olunmur və vətəndaşların metroya daha tez çatdırılması təmin edilir".

Qeyd edək ki, Sumqayıt və Bakı arasında fəaliyyət göstərən ekspress avtobuslarda gedişhaqqı 0.80 azn təşkil edir. Ödənişlər nağdsız qaydadır. “BakıKart”ın balansını artırmaq üçün həm Bakı Beynəlxalq Avtovağzal Kompleksi, həm də Sumqayıt avtovağzalında ödəniş terminalları yerləşdirilib. Sərnişinlər, həmçinin “BakıKart” mobil tətbiqi üzərindən QR kod vasitəsilə də ödənişlərini edə bilərlər.

Rusiyanın Belqorod şəhərində insanlara hücum edən dəstə başçısının ailəsini qanunsuz olaraq Rusiya pasportu ilə təmin edən polis əməkdaşlarına qarşı səhlənkarlığa görə cinayət işi açılıb.

Lent.az Rusiya mediasına istinadla bildirir ki, dəstə başçısının ailəsi 2011-ci ildə Ukraynadan Belqorod vilayətinə köçüb. 2022-ci ilin yazında ailə Daxili İşlər Nazirliyinin Dzerjinski rayonu üzrə şöbəsinə Kaluqa vilayətinin Prudkovo kəndində müvəqqəti qeydiyyat ünvanı göstərilməklə Rusiya vətəndaşlığı üçün sənədlər təqdim edilib. Ailənin orada yaşamadığı, hüquq-mühafizə orqanlarının əməkdaşlarının bunu yoxlamalı olduğu qeyd edilir.

Hazırda onların pasportlarının verildiyi şöbə yoxlanılır. Məsuliyyətə cəlb olunan polis əməkdaşlarını cərimə, üç aya qədər həbs və ya bir aya qədər islah işləri gözləyir.

Qeyd edək ki, yanvarın 17-də hüquq-mühafizə orqanlarının əməkdaşları Belqorod küçələrində yoldan keçənlərə hücum edən və onların hərəkətlərini lentə alan qrupun 5 üzvünü saxlayıblar.

Məlum olub ki, Belqorodda yeniyetmə dəstəsi peyda olub və izdiham içində yoldan keçənlərə hücum edib, onları döyüb, videogörüntülərdə alçaldıb. İstintaq onların milli nifrət motivləri ilə hərəkət etdiyini irəli sürüb. Dəstənin başçısı saxlanılıb, onun cəmi 17 yaşı var, Azərbaycan vətəndaşıdır.

“Xəzər dənizinə tökülən suyun miqdarının azalması dənizin səviyyəsinin azalmasına səbəb olur”.

Bunu Qaynarinfo-ya açıqlamasında ekoloq ekoloq Xosrov Musayev ötən bir neçə il ərzində Xəzər dənizində suyun səviyyəsinin 50 sm azalmasına münasibət bildirərkən deyib.

Ekoloq bu gün Xəzər dənizinə çoxlu miqdarda çayların töküldüyünü qeyd edib:

“Məsələ burasındadır ki, həmin çayların suları da azalıb. Bunun da əsas səbəbi dünyada baş verən iqlim dəyişikliyidir. Yağıntılar qeyri-sabit keçir, bəzi yerlərə az, bəzi yerlərə çox düşür. Yağıntıların miqdarı get-gedə azalır. Bütün bunların hamısı sonda Xəzər dənizində suyun azalmasına səbəb olur”.

Qeyd edək ki, İranın Su Tədqiqatları İnstitutunun rəhbəri Məhəmməd Rza Kavyanpur ötən bir neçə il ərzində Xəzər dənizində suyun səviyyəsinin 50 sm azaldığını açıqlayıb.

Yanvarın 24-də saat 11 radələrində paytaxtın Nizami rayonu, metronun “Koroğlu” stansiyasının qarşısındakı mağazalardan birində törədilən qətlin təfərrüatı məlum olub.

RTV-yə danışan hadisə şahidləri bildiriblər ki, qışqırıq səslərini eşidiblər:

“Mağazanın yaxınlığında dayanmışdıq. Əlində bıçaqla çıxdı, dedi yaxın gəlməyin”.

Ətraflı süjetdə:


Yanvarın 24-də saat 11 radələrində paytaxtın Nizami rayonu, “Koroğlu” metro stansiyasının qarşısındakı mağazalardan birində 1991-ci il təvəllüdlü Nurlan Məmmədovun öldürülməsi barədə rayon prokurorluğuna məlumat daxil olub.
Bu barədə Daxili İşlər Nazirliyi və Nizami Rayon Prokurorluğu birgə məlumat yayıb.

Bildirilib ki, araşdırma zamanı 1985-ci il təvəllüdlü Əhməd Hüseynovun aralarında yaranmış mübahisə zamanı Nurlan Məmmədova bıçaqla xəsarət yetirərək qəsdən öldürməsinə əsaslı şübhələr müəyyən edilib.

Hadisədən sonra Əhməd Hüseynov könüllü olaraq istintaqa təslim olub və şübhəli şəxs qismində tutulub.

Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanaraq ibtidai istintaq aparılır.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmət ötən il ərzində bəzi aparıcı supermarketlər haqqında inzibati protokollar tərtib edib.

TEREF xəbər verir ki, supermarketlər haqqında inzibati protokolun tərtib edilməsinin səbəbi qida məhsulunu üzərində göstərilən qiymətdən baha satılmaları olub.

Qeyd edək ki, barəsində ən çox inzibati protokol tərtib olanan marketlər şəbəkəsi “Araz” supermarketləri olub. Bu supermarket haqqında il ərzində 7 protokol tərtib edilib.

Bundan başqa BRAVO (“Azərbaycan Supermarket” MMC) haqqında 5, “OBA Market” haqqında isə 4 protokol yazılıb. “Al Market”, “Bazarstore” və “BM Market”lər də haqqında protokol tərib edilən digər marketlər şəbəkələridir.

Supermarketlər barəsində 2023-cü ilin yanvar-dekabr ayları ərzində tərtib olunan inzibati xəta haqqında protokolların siyahısını təqdim edirik:


yeniavaz.com

“Uşaqların tərbiyəsi ilə valideyn məşğul olmalıdır. Çünki hər şey ailədən başlayır. Məgər uşaq anadan olanda məktəbdə dünyaya göz açır?! Tərbiyə evdən başlayır”.

Bu sözləri Yenisabah.az-a açıqlamasında tanınmış müğənni Akif İslamzadə deyib.

O, ötən gün Gəncədə 8-ci sinif şagirdinin qətlə yetirilməsindən sonra sosial şəbəkələrdə məktəblərlə bağlı yayılan müzakirələrə münasibət bildirib.

Xatırladaq ki, yanvarın 23-də səhər saatlarında Gəncə şəhəri M. P. Vaqif adına 8 nömrəli tam orta məktəbin XI sinif şagirdi Raul Rəhimov məktəbin önündə 17 yaşlı F. Şabanov tərəfindən bıçaqlanaraq öldürülüb. Fakta görə Gəncə şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb. Polis əməkdaşlarının keçirdikləri əməliyyat-axtarış tədbirləri nəticəsində qətli törətməkdə şübhəli bilinən, 2007-ci il təvəllüdlü F. Şabanov saxlanılaraq istintaqa təqdim edilib.

Məsələyə münasibət bildirən A. İslamzadə söyləyib ki, bu gün valideynlər uşaqlarına nəzarət etmirlər:

“Bunun üçün isə vaxt olmalıdır. Ya valideynlərin özlərinə başları qarışıb və uşaqların başını buraxıb, ya da ki, çörəkpulu dalınca qaçırlar deyə axırda da belə olur. Bizim vaxtımızda uşağı məktəbə qoyanda müəllimə deyirdilər ki, “əti sənin, sümüyü mənim”. Uşaq da o təlim-tərbiyəni görüb böyüyürdü. İndi isə Avropada olan axmaq-axmaq nələr varsa, bizimkilər də baxıb təkrar edirlər. Ümumiyyətlə, təhsil sistemi bütövlükdə dəyişilməlidir. Çünki ata-anamızdan sonra bizim üçün ən müqəddəs obraz müəllim olub. Bir peşəni hörmətdən salmaq üçün onu adiləşdirmək lazımdır. Bu gün biz bir-birimizə “müəllim” deyirik, müəllimlərin cibinə pul basırıq. Ən dəhşətlisi isə budur ki, yuxarı sinif şagirdləri müəllimdən “ştuçnı” siqaret istəyirlər ki, ver, çəkim”.

Onun sözlərinə görə, bunun kökündə dayanan problem isə birdir:

“Təhsil sistemi dəyişdirilməlidir. Bizdəki təhsil sistemi Qərb təhsil sistemidir. Əvvəllər ruslara, onlardan da bizə keçib. Ona görə də bu təhsil sistemi kökündən dəyişilməlidir. Mən uşağı vurmağın tərəfdarı deyiləm, lakin, tutaq ki, müəllim uşağın qulağını burubsa, bunu problem etmək nəyə lazımdır? Yenə deyirəm, bütün təhsil sistemi dəyişilməlidir. Belə təhsil sistemi olmaz. Təlim-tərbiyə isə ailə və mühitdən başlayır”.

“Bu barədə bir misal çəkmək istəyirəm. Bir həftənin hadisəsidir. Dostumgilə gedirik, liftin qabağında gözləyirik. Bir nəfər 20-21 yaşında oğlan durub liftin qarşısında. Orada da 2-3 lift kabinəsi var. Oğlanın basdığı düymədə lift tez gəldi. Özü də başa düşdü ki, biz ona tərəf gedirik, hətta bizi də gördü. O, lifti saxlaya bilərdi, amma qalxdı yuxarı. İndi sual edirəm ki, bunun günahı kimdədir? Valideyn və məktəbdə. Bu cavan uşaqların belə günahlarının bir ucu gəlib bizə çıxır.

Bu problem bütün dünyada var. Bu dövrün adı da axır-zamandır. Bəşər tarixində bir Nuh peyğəmbərin dövründə belə mənəviyyatsızlıq olub, bir də indi. Allah o vaxtı bizi su ilə imtahana çəkdi, indi də, inşallah, odla imtahana çəkər. Çünki bu bəşər özünü doğrultmadı”, - deyə müsahibimiz fikirləriniz yekunlaşdırıb.+6

Son günlərdə sosial şəbəkələrdə içməli suyun kanalizasiya suyunun qarışması ilə bağlı məlumatlar yayılıb.

Maraqlıdır, bu məlumat nə dərəcədə doğrudur? Ümumiyyətlə vətəndaş içməli suyunun kanalizasiya suyu ilə qarışıb-qarışmadığını necə müəyyən edə bilər?

Məsələ ilə bağlı Azad İstehlakçılar Birliyinin sədri Eyyub Hüseynov Lent.az-a açıqlamasında bildirib ki, suyun təmizlənməsi normal səviyyədə gedir.
Onun sözlərinə görə, lakin su infrastrukturu o qədər köhnəlib ki, sudan qum və ya lil gəlir:

“Məlumdur ki, Bakıda su dörd atmosferlə vurulur. Kanalizasiya suyu isə öz axarı ilə gedir. Kanalizasiya suyunun içməli suya qarışması mümkün deyil. İçməli su kanalizasiya suyuna qarışa bilər. Çünki içməli su təzyiqlə vurulur. Amma kanalizasiya suyu heç vaxt içməli suya qarışa bilməz. Bur birmənalı şəkildə səhv düşüncədir. Çünki kanalizasiya suyunun qoxusundan onu müəyyən etmək olar. Vətəndaş içməli suyunun təmiz olub-olmadığını yoxlamaq üçün 1003-ə zəng edə bilərlər. Bununla yanaşı özəl laboratoriyalar Bakıda, orda da yoxlada bilərlər. Yalnız onu deyək ki, həmin testin cavabı hüquqi sayılmır”.