Xəbər verdiyimiz kimi, separatçı rejimə məxsus "lider”lərin həbs olunması fonunda Vitali Balasanyanın da həbs edilməsi ilə bağlı Azərbaycan xüsusi-xidmət orqanları tərəfindən cinayət işinin başlandığı qeyd olunub.

Lakin Vitali Balasanyanın Ermənistana qaçdığı iddia olunur. Bu barədə Ermənistanın "Past” qəzeti məlumat yayıb. "Vitali Balasanyan Ermənistandadır, ürəyində ciddi problem var və hazırda həkimlərin nəzarəti altındadır. Digər təfərrüatlar hələlik məlum deyil”, - məlumatda deyilib.

Bəs Balasanyan Azərbaycan tərəfindən həbs oluna bilər? Onun İrəvandan Bakıya gətirilməsi mümkündür?

Məsələ ilə bağlı AZXEBER.COM-a danışan politoloq Məhəmməd Əsədullazadə deyib ki, Balasanyanın Azərbaycana təhvil verilməsi yalnız iki dövlət arasında sülh müqaviləsi imzalanacağı halda baş verə bilər:

"Birinci Qarabağ müharibəsində Azərbaycana qarşı hərbi cinayətlər törətmiş Vitali Balasanyanın həbs olunması istiqamətində addımlar atılsa da, onun həbs olunması mümkün olmadı. O, müəyyən yollarla Ermənistana qaçmağı bacardı. Digər separatçılar Arayik Arutyunyan, Ruben Vardanyan, Davit Babayan, Bako Saakyan, Arkadi Qukasyan həbs edilsə də, Vitali Balasanyan bu həbslərdən yayına bildi. Düşünürəm ki, baş verən bu həbslərlərdən xəbər tutan Balasanyan ermənilərlə birgə Ermənistana gedə bilib. Onun Azərbaycana təhvil verilməsi istiqamətində ilk növbədə Ermənistanla Azərbaycan arasında bir sülh müqaviləsi olmalıdır. Tərəflər arasında sülh müqaviləsi bağlandıqdan sonra hüquqi müstəvidə razılaşmalar olmalıdır və onun həbsi həyata keçirilməlidir.

Hesab edirəm ki, Ermənistan tərəfi onu Azərbaycana qəti şəkildə təhvil verməyəcək, yalnız Azərbaycanın təhlükəsizlik orqanları onu zərərsizləşdirə bilər. Əgər Balasanyan hansısa bir üçüncü ölkəyə getməyə cəhd edərsə, bu zaman onun həbsi mümkün olar. Düşünürəm ki, o, Ermənistan ərazisində olduğu müddətdə onun həbsi və onu mühakimə etmək mümkün olmayacaq”.

Zəngəzur Dəhlizinin Azərbaycan hissəsi 2024-cü ildən fəaliyyətə başlayacaq.

Hurriyyet.Az xəbər verir ki, bunu "Azərbaycan Dəmir Yolları” (ADY) QSC-nin Kommunikasiya departamentinin rəhbəri Aybəniz İsmayılova deyib.

A.İsmayılovanın sözlərinə görə, artıq Füzuli-Ağbənd dəmiryolu xəttinin 60 %-dən çoxu hazırdır:

"3 ildən az bir müddətdə multimodal Zəngəzur dəhlizinin 110,4 kilometrlik birxətli dəmir yolu seqmentinin üçdə ikisindən çoxu artıq döşənib.

Dəhliz boyu 3 tunel, onlarla körpü və 9 dəmir yolu stansiyası tikiləcək. Türkiyə şirkətləri tərəfindən Həkəri çayı üzərindən 418 metrlik dəmir yolu körpüsünün tikintisi yaxın vaxtlarda yekunlaşaraq istifadə üçün hazır olacaq".

Qeyd edək ki, Azərbaycan Prezidentinin 2021-ci ilin febralın 15-də Füzuliyə səfəri zamanı Horadiz-Ağbənd dəmir yolu xəttinin təməli qoyulub.

Ötən həftə Şərqi Zəngəzur dəhlizi adlandırılan, Araz çayının sol sahili boyu uzanıb Azərbaycanı Naxçıvanla birləşdirən nəqliyyat kommunikasiyalarının həyata keçirilməsi üçün Zəngilanda ilk təməlqoyma mərasimi keçirilib. İranın yollar və şəhərsalma naziri Mehrdad Bazrpaşın və Azərbaycanın Baş nazirinin müavini Şahin Mustafayevin iştirak etdiyi mərasimdə Horadiz-Ağbənd dəmir yolunu və çoxzolaqlı avtomobil yolunu İrana birləşdirmək üçün Araz çayı üzərindən salınacaq yeni dəmir yol və avtomobil yolu körpüsünün təməli qoyulub.

2020-ci il sentyabrın 27-də Ermənistan silahlı qüvvələrinin cəbhəboyu törətdiyi genişmiqyaslı təxribatlara cavab olaraq Azərbaycan Ordusu “Dəmir yumruq” adlı əks-hücum əməliyyatına başladı. 44 gün davam edən Vətən müharibəsi təxminən otuzillik işğala son qoyulması və ərazi bütövlüyümüzün bərpası ilə nəticələndi. Müzəffər Ali Baş Komandan İlham Əliyevin rəhbərliyi ilə qazanılmış möhtəşəm zəfər tariximizə qızıl hərflərlə yazıldı.

Vətən müharibəsinin 13-cü gününün xronikasını təqdim edirik.

Hadrut qəsəbəsi, Çaylı, Yuxarı Güzdək, Gorazıllı, Qışlaq, Qaracallı, Əfəndilər, Süleymanlı və Sur kəndləri işğaldan azad olunub. Azərbaycan Prezidenti, Ali Baş Komandan İlham Əliyev bununla əlaqədar xalqa müraciət edib.

Prezident İlham Əliyev “CNN International” televiziya kanalının “Connect the World“ verilişində müsahibə verib.

“Sky News” telekanalı Azərbaycan Prezidenti İlham Əliyevin müsahibəsini yayımlayıb.

Müdafiə Nazirliyinin məlumatına görə, Azərbaycan Ordusunun bölmələri cəbhənin mühüm istiqamətlərində düşmənə ağır zərbələri endirərək onun hərəkət fəaliyyətini tam məhdudlaşdırıb və aktivliyinin qarşısını qətiyyətlə alıb. Ümumilikdə düşmənin 13 ədəd T-72 tankı, iki ədəd PDM-i, dörd ədəd BM-21 “Qrad” yaylım atəşli reaktiv sistemi, iki ədəd 2S3 “Akasiya” özüyeriyən artilleriya qurğusu, üç ədəd D-30 haubitsa topu, iki ədəd radar sistemi və xeyli sayda avtomobil texnikası məhv edilib. Ermənistan silahlı qüvvələrinin 49-cu tank briqadasına məxsus altı ədəd T-72 tankı tam işlək vəziyyətdə ələ keçirilib.

Müdafiə Nazirliyi Cəbrayıl rayonunun işğaldan azad olunan ərazilərində Azərbaycan bayrağının dalğalanmasını əks etdirən görüntüləri paylaşıb.
Ermənistan silahlı qüvvələrinin yaşayış məntəqələrimizi ağır artilleriya qurğularından və raket sistemlərindən intensiv atəşə tutması nəticəsində 9 oktyabr saat 17:00-a olan məlumata görə, 31 mülki şəxs həlak olub, 168 nəfər isə xəsarət alıb. Həmçinin 1 091 ev, 143 mülki obyekt və 45 çoxmənzilli yaşayış binası yararsız vəziyyətə düşüb. Bu barədə Baş Prokurorluq məlumat yayıb.

Şanlı Azərbaycan Ordusunun daha bir uğurlu əməliyyatı nəticəsində Ermənistan silahlı qüvvələrinin 30-a yaxın tankı və piyada döyüş maşını ələ keçirilib.

Baş Prokurorluq: “Döyüşlərdə Ermənistan tərəfindən iştirak etmiş Fransa vətəndaşı Artur Oqanisyan və Gürcüstan vətəndaşı Vaaqn Çaxalyan barəsində cinayət işi başlanıb”.

Azərbaycan Ordusu bölmələrinin keçirdiyi döyüş əməliyyatları nəticəsində düşmənin xeyli sayda “Qrad” yaylım atəşli reaktiv sistemi sıradan çıxarılıb.

Müdafiə Nazirliyi: “Ermənistan ərazisindən Mingəçevir şəhəri istiqamətində atılan ballistik hədəf Azərbaycanın hava hücumundan müdafiə sistemləri tərəfindən aşkarlanaraq 20 kilometrdən artıq hündürlükdə məhv edilib”.

Müdafiə Nazirliyi düşməndən azad edilən Suqovuşan yaşayış məntəqəsinin görüntülərini paylaşıb.

Azərbaycan ərazisində müvəqqəti yerləşdirilmiş Rusiya sülhməramlıları daha iki daimi müşahidə məntəqəsini bağlayıb.

Teref.az “Report”a istinadən xəbər verir ki, bu barədə Rusiyanın Müdafiə Nazirliyi məlumat yayıb.

Qeyd edilir ki, gün ərzində iki müşahidə məntəqəsi bağlanıb.

Xatırladaq ki, Rusiya sülhməramlıları oktyabrın 6-da 3, 7-də bir müşahidə məntəqəsini bağlayıblar.

2020-ci il noyabrın 10-da Qarabağda hərbi əməliyyatların bitməsi və atəşkəs barədə Azərbaycan, Ermənistan və Rusiya liderlərinin birgə bəyanatına əsasən, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyəti ilə bağlı tərəflərdən hər hansı biri çıxış etməsə, müddət avtomatik olaraq növbəti 5 ilə uzadılır.

Rusiya sülhməramlıları Qarabağdakı məntəqələrini ləğv edir, bu gün Xocalıda, daha öncə isə keçmiş Ağdərə və Əsgəran rayonlarında, o cümlədən, Şuşa istiqamətindəki postlar götürülüb. Bunun fonunda Rusiya hərbi təyyarəsinin Füzuli hava limanına eniş etməsi haqda məlumatlar da hərbi inventarın Azərbaycan ərazisindən çıxarıldığı deməkdir.
Antiterror tədbirlərindən sonra Qarabağdakı vəziyyət sülhməramlıların ümumiyyətlə nəzarət zonasının qalmadığını deməyə əsas verir. Çünki az sayda erməni sakinləri Xankəndində qalıb və sülhməramlıların müvəqqəti fəaliyyəti bu şəhərdə ola bilər. Lakin Xankəndində də patrul xidmətini sülhməramlılarla birlikdə Azərbaycan hərbçiləri həyata keçirir. Bu da şəhərə nəzarətin Azərbaycanda olduğu deməkdir. Hətta erməni əhalisinin bir qismi geri qayıtsa belə, eyni vəziyyət davam edəcək, çünki şəhərdə dövlət qurumları fəaliyyətə başlayıb.
Asif Nerimanli
Teref.az

Hər şey bir tərəfə, ermənilər bir ətək pul töküb ABŞ-ın xeyli ştatında qondarma Qarabağı müstəqil dövlət kimi tanıtdırmışdı. Amerika Erməniləri Milli Komitəsi bu işdə xüsusi fəallıq göstərirdi...
Cox vaxt “Artsax” erməni xalqına onu pantürkizmdən qoruyan “qalxan” kimi təqdim olunurdu. Məşhur erməni terrorçusu Monte Melkonyan I Dağlıq Qarabağ müharibəsi zamanı döyüşçülərinə mühazirə oxuyarkən “Biz bu torpağı itirsək, erməni tarixinin son səhifəsini çevirmiş olacağıq”, deyirdi.
“Artsax”ın məhvi ilə birlikdə erməni xaliqini pantürkizmdən qoruyan “qalxan” da əldən çıxıb. Məntiqlə 3 milyonluq erməni nüfuzu bölgədəki 100 milyonluq türk nüfuzu qarşısında çoxdan diz çəkməli idi. Ancaq türk düşmənləri bu qaçılmaz məğlubiyyətin qarsısın uzun müddət ala bildilər. İndi isə obrazlı desək, bölgədə türklər əli qılınclı dayanıb, ermənilərin isə özünü qorumaq üçün qalxanı belə yoxdur...
Elbəyi Həsənli
Teref.az

Ermənistanın keçmiş müdafiə naziri Arşak Karapetyan videomüraciət yayaraq, yeni hərəkata başladığını bəyan edib. TEREF.AZ JAMAZ.İNFO-ya istinadla xəbər verir ki, o, müraciətində işdən çıxarılmasının səbəblərini də açıqlayıb.

Karapetyan bildirib ki, o, Azərbaycan Ordusunun təqdim etdiyi ultimatumu qəbul etməyib. “Həmin vaxt sərhəddə gərginlik var idi. Hökumət rəhbərliyi atəş açılmaması haqqında göstəriş vermişdi. Lakin bu əmrə tabe olmadım və atəş açmaq barədə əmr verdim”.

Keçmiş müdafiə naziri onu da deyib ki, Nikol Paşinyan onu işdən çıxararkən bildirib ki, Qarabağa “müdafiə ordusu”na rəhbərlik üçün bu addımı atıb. “Ölkəmiz və regionumuz ətrafında son dərəcə sürətlə inkişaf edən təhlükəli geosiyasi proseslər şəraitində biz Ermənistan hökumətinin qorxaqlığı və satqınlığı nəticəsində baş vermiş Qarabağın dəhşətli bədbəxtliyinin şahidi olduq. Qarabağlıların taleyin ümidinə buraxdılar. Qarabağdakı ordunun buraxılması isə xəyanətdir”.

Xəbər verdiyimiz kimi, Azərbaycanın hüquq-mühafizə orqanları özünü buraxdığını elan etmiş Qarabağdakı qondarma rejimin “rəhbər şəxsləri”ndən bir neçəsini saxlayaraq Bakıya gətiriblər.
TEREF.AZ Yeniavaz.com-a istinadla xəbər verir ki, Ermənistanın “Hraparak” nəşri sözügedən şəxslərin son ana qədər Rusiya sülhməramlı kontingentinin iqamətgahında olduqlarını yazıb.
Bildirilib ki, ruslar tərəfindən onlara sağ-salamat Ermənistana aparılacaqlarına dair vəd verilib:
“Lakin ruslar yalan danışıb, vədlərinə əməl etməyiblər. Əvəzində bəziləri Azərbaycanın siyahılarında olan bəzi şəxslərin ölkədən çıxarılması müqabilində külli miqdarda pul qazanıblar. Bizə çatan mötəbər məlumata görə, onlar bu avtomobillərin sərhəddən maneəsiz keçməsi üçün bir nəfərdən 280 min dollar alaraq Həkəridə azərbaycanlılara iki maşının nömrəsini veriblər. İllərlə ruslarla isti münasibətdə olan Arayik Arutyunyan əmin idi ki, ruslar onu Azərbaycan tərəfinə təhvil verməyəcəklər”, - nəşr yazır.
Qeyd edək ki, indiyədək Azərbaycanın hüquq-mühafizə orqanları tərəfindən erməni separatçılarının keçmiş “prezident”ləri Araik Arutyunyan, Arkadi Qukasyan və Bako Saakyan, həmçinin Qarabağın millətçi “Daşnaksütyun” partiyasının lideri, “parlamentin keçmiş sədri” David İşxanyan, həmçinin keçmiş “dövlət naziri” Ruben Vardanyan və separatçı qurumun “prezidenti aparatının rəhbərinin müavini, prezidentin xarici siyasət məsələləri üzrə köməkçisi, xarici işlər naziri və xüsusi tapşırıqlar üzrə prezidentin köməkçisi vəzifələrində” işləmiş Davit Babayan, eləc də 2015-2018-ci illərdə qondarma rejimin “müdafiə naziri” vəzifəsində işləmiş, Azərbaycan Respublikası ərazisində fəaliyyət göstərmiş qanunsuz hərbi silahlı qrupun üzvü olan Lyova Henrixi Mnatsakanyan saxlanılıblar.
Azərbaycan tərəfi rəsmi şəkildə sadəcə son üçünün saxlanılması xəbərini təsdiqləyib. Araik Arutyunyanın isə saxlanılmasını əks etdirən kadrlar yayılıb.
Ötən gün isə qondarma rejimin “sonuncu prezidenti” Samvel Şahramanyanın da saxlanılması ilə bağlı xəbər yayılsa da, daha sonra TASS onun artıq Ermənistanda olduğunu açıqladı.