 |
|
|
“Buraxılış və qəbul imtahanlarına hazırlıq əsasən dərsliklər deyil, test kitabçaları və əlavə tədris resursları əsasında aparılır. Məhz bunun nəticəsidir ki, dərs ilinin başa çatmasına iki-üç həftə qalmış əksər məktəblərdə dərsliklərin yığılıması artıq bir növ ənənə halını alıb. Baxmayaraq ki, ölkədə tədris ili iyunun 15-də başa çatır. Bu da cəmiyyətdə belə fikir yaradır ki, məktəblərdə dərsliklər yığılırsa, şagirdlər 1 aya yaxın boşuna məktəbə gedirlər”.
Bunu Bizim.Media-ya müsahibəsində təhsil üzrə ekspert Nadir İsrafilov deyib.
O qeyd edib ki, bu məsələ bir sıra suallar doğurur:
“Bütün bu kimi anlaşılmazlıqlar əsasən tədris ilinin 1 sentyabr - 31 may tarixlərinin 15 sentyabr - 15 iyun tarixləri ilə əvəz olunmasından sonra başladı. O ki qaldı dərsliklərin hansı vaxtda yığılmasına, şagirdlərin sinifdən-sinfə keçməsi ilə bağlı 1 may 2014-cü ildə 522 saylı əmr təsdiq edilib. Həmin əmrdə göstərilir ki, qiymətləndirmə tədris ilinə 2 gün qalmış başa çatmalıdır. Yəni Böyük Summativ Qiymətləndirmə (BSQ) iyunun 11-də keçirilməlidir. Bu məntiqlə dərsliklər iyunun 12-13-də yığılmalıdır.
Burada problemin kökü ondan ibarətdir ki, heç kəsə gizli deyil ki, Dövlət İmtahan Mərkəzi bütün məktəblərdə aparıcı sinif olan buraxılış siniflərinin imtahanlarını öz qrafikinə uyğun, tədris ilinin başa çatmasına 10-12 həftə qalmış həyata keçirir. Problemin kökü də məhz ondadır ki, imtahanlardan sonra buraxılış siniflərinin şagirdlərinin məktəbə gəlmələrinə həvəs və maraqları azalır ki, bu da digər siniflərin də davamiyyətinə təsirsiz ötüşmür”.
Dərsliklərin yığılması o deməkdir ki, artıq həmin fənlər tədris olunmur...
Müsahibimiz hesab edir ki, əgər dərsliklər yığılırsa, bu o deməkdir ki, formal olaraq dərslərin tədrisi də dayandırılır:
“Bir çox şagirdlərin dərsə gəlməməsindən, dərslikləri məktəbə təhvil verməmələrindən ehtiyatlanaraq bir çox məktəblərdə “erkən dərslik yığımına” başlanılır. Lakin nizam-intizamı güclü olan məktəblərdə dərsliklər tədris ilinin son günlərində yığılır.
Əlbəttə, bu kimi halların bütün məktəblərdə baş verdiyini israrla bildirmək ədalətsizlik olardı. Bununla belə hesab edirəm ki, məktəblərdə nizam-intizam məsələlərinə, xüsusilə də dərsə davamiyyətə nəzarət gücləndirilməli, dərs ili uzun sınaqlardan çıxmış əvəlki qaydada – sentyabrın 1-də başlamalı, mayın 24-də başa çatdırılmalı, buraxılış imtahanı ilə qəbul imtahanları birləşdirilərək təkpilləli imtahan modelinə keçilməlidir.
Bu, Dövlət İmtahan Mərkəzi ilə Elm və Təhsil Nazirliyi arasında uzun illərdən bəri davam edən qarşılıqlı ittihamlara son qoymaqla yanaşı, həm də məzunlarımızı əlavə yükdən, vaxt itkisindən, psixoloji gərginlikdən, fiziki və mənəvi sağlamlıqları üçün təhlükə yaradan stressdən azad etmiş olar. Eyni zamanda, ali təhsil müəssisələrinə qəbul qaydalarının sadələşdirilməsi ali təhsil üçün xarici ölkələrə axının qarşısını ala bilər”.