HƏMAS siyasi bürosunun rəhbəri İsmayıl Haniyənin öldürüldüyünü təsdiqləyib.

Qruplaşmanın yaydığı məlumatda qeyd olunur ki, İ.Haniyə İranın yeni seçilmiş Prezidenti Məsud Pezeşkianın andiçmə mərasimindən sonra iqamətgahına qayıdıb. İsrailin raket zərbəsi nəticəsində Haniyə və bir mühafizəçisi ölüblər.

Mənbə: TASS

İyulun 26-da Bakı şəhəri üzrə məktəbəqədər təhsil müəssisələrinə qəbul başlanıb.
Qaynarinfo-nun məlumatına görə, məktəbəqədər təhsil müəssisələrinə uşaqların qəbulu elektron qaydada www.bq.edu.az elektron sənəd qəbulu sistemi vasitəsilə aparılsa da, 4 gün ərzində bütün yerlər dolub.
Xeyli sayda uşaq bağçalara qəbul olmaq hüququndan məhrum edilib. Bunlar arasında jurnalistlərin övladları da var.
Elm və Təhsil Nazirliyi isə bağçada oxumaq hüququndan məhrum olan uşaqlarla bağlı heç bir tədbir görmür.
Məktəbəqədər və Ümumi Təhsil üzrə Dövlət Agentliyi bağçalara qəbul oluna bilməyən uşaqların valideynlərinə “yer yoxdur” deməklə kifayətlənir.
2021-ci ildən yerli icra hakimiyyəti orqanlarının tabeliyində olan dövlət məktəbəqədər təhsil müəssisələri Elm və Təhsil Nazirliyinin tabeliyinə verildikdən sonra paytaxtda bağçalara qəbul planı bir qədər də artıb.
Bağçalarda valideynlərdən əlavə “aylıq ödənişlər” tələbi ləğv edilməsə də, nədənsə qəbulda problemlər yaradılır.
Məktəbəqədər və Ümumi Təhsil üzrə Dövlət Agentliyi hər bağçada qəbul proseduruna uyğun olaraq say müəyyən edib. Həmin saydan bir nəfər də artıq şagird qəbul edilmir.
Nəticədə 180 nəfər şagirdin təhsil almaq imkanı olan bağçalarda qəbul sayı kəskin azaldılıb. Valideynlər övladlarını daha çox özəl bağçalara yönəltməyə məcbur edilir.
İllərdir Yeni Yasamalda yerləşən 98 saylı bağçada 150 nəfərdən çox şagird təhsil alırdısa, hazırda bu say həddi azaldılıb. Səbəbi isə guya bir sinifdə 30-32 uşaqdan artıq təhsil vermək imkanının olmamasıdır.

Aylar əvvəl məktəbəqədər təhsil müəssisələrinə uşaqların qəbulu elektron qaydada www.bq.edu.az elektron sənəd qəbulu sistemi vasitəsilə aparan valideynlərin hesabları silinib. Hər kəsdən Elm və Təhsil Nazirliyinin nəzdində Məktəbəqədər və Ümumi Təhsil üzrə Dövlət Agentliyinin “finiş fitini” gözləmək tələb edilib.
İyulun 26-da Məktəbəqədər və Ümumi Təhsil üzrə Dövlət Agentliyi “finiş fitini” çalan kimi bağçalarda qəbul başlanılıb. Üzərindən 4 gün keçməsinə baxmayaraq, nədənsə bağçalarda qəbul planı dolub.
Məktəbəqədər və Ümumi Təhsil üzrə Dövlət Agentliyi silinən valideyn sorğuları ilə bağlı tələbləri isə rədd edir.
20 noyabr 1989-cu ildə “Uşaq hüquqları haqqında” Konvensiya BMT tərəfindən qəbul edilib və dünyanın hər bir yerində yaşayan uşaqlara konvensiya ilə müəyyən edilmiş hüquqları təmin edən birinci universal kodeksdir. Bu kodeksə görə hər bir uşağın təhsil almaq hüququ var!

Şəki Ağır Cinayətlər Məhkəməsində ehtiyatsızlıqdan zərərçəkmiş şəxsin ölümünə səbəb olmaqda təqsirləndirilən Elçin Mirzəzadənin cinayət işi üzrə məhkəmə iclası başa çatıb. Pravda.az-ın əldə etdiyi məlumata görə, hakim Tural Əfəndizadənin sədrliyi ilə keçirilən prosesdə hökm oxunub. Məhkəmənin hökmü ilə Elçin Mirzəzadə cəzasını ümumi rejimli cəzaçəkmə müəssisəsində çəkməklə 9 il müddətinə azadlıqdan məhrum edilib. Qeyd edək ki, 2023-cü il sentyabrın 30-da İsmayıllı şəhər sakini 1958-ci il təvəllüdlü Füzuli Ağamalıyevin müalicə aldığı xəstəxanada ölməsi barədə rayon prokurorluğuna məlumat daxil olub. İlkin araşdırma zamanı 1979-cu il təvəllüdlü Elçin Mirzəzadənin şəhər ərazisində yerləşən ictimai-iaşə obyektlərindən birində kəsici-deşici alətlə Füzuli Ağamalıyevə xəsarət yetirməsi və sonuncunun həmin xəsarət nəticəsində ölməsinə əsaslı şübhələr müəyyən edilib. Faktla bağlı İsmayıllı Rayon Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanaraq istintaq aparılıb. Elçin Mirzəzadə iş üzrə şübhəli şəxs qismində tutulub.
Son zamanlar belə cinayyət hadisələrinin kiçik kafelərdə baş verdiyini görürük. Maraqlıdır, buna səbəb nədir?

Məsələ ilə bağlı fikirlərini bölüşən sosioloq Elçin Bayramlı “Sherg.az”a bildirib ki, bu kimi obyektlərdə daha çox kriminal ünsürlər, normal ailə tərbiyyəsi almayan, qanun sevməyən insanlar toplaşır:

''Beləki, həmin yerlərdə limitsiz içkilər verilir. Onların içərisi kimyəvi tərkibli olduğuna görə də insanda güclü aqressiya, qıcıq yaradır. Belə yerlərdə mənəvi dəyərlərin olmadığı hallar, məsələn, qızlara, ofsiant qadınlaraa sataşmalar üstündə davalar baş verir. Nəticə isə faciəvi sonluqla bitir. Doğrudur, iri obyektlərdən fərqli olaraq belə məkanlarda nəzarət yoxdur. Şəhərin mərkəzində yerləşən səviyyəli məkanların yaxınlığında polislər olduğu üçün xoşagəlməz hadisələrə anında müdaxilə edirlər. Lakin gözdən uzaq kiçik kafelərdə nəzarət yoxdur deyə, bu kimi hadisələrin olması qaçınılmazdır. Çünki minlərlə belə obyektə polis nəzarətini davamlı təşkil etmək mümkün deyil. Həmçinin, kafenin də əlavə olaraq nazərətçini işlətməyə imkanı yoxdur. Bu durum artıq cəmiyyətin mənəvi-psixoloji vəziyyəti ilə bağlıdır. Məsələn, keçmişdə də bu tip çayxana və kafelər var idi. Ancaq ölümlə nəticələnən davalar olmurdu. Nadir hallarda yüngül mübahisələr yaranırdı. Çünki həmin vaxtda cəmiyyətdə stress, gərginlik, psixoloji problemlər, narkomaniya bu səviyyədə deyildi. Əslində, bunların hamısında indiki qidaların da rolu var. Hətta, sübut olunub ki, bir çox məhsullar insanda aqressivlik yaradır. Həmçinin, buna işsizlik də təsir edir. Çünki insanlar enerjilərini işdə sərf edirlər. Bu kimi halların qarşısını almaq istəyiriksə, sosial-iqtisadi vəziyyət yaxşılaşdırılmalı, hüquqi-sosial dövlət qurulmalıdır, mənəvi seqreqasiyanın qarşısı alınmalıdır''.

Noyabrda Azərbaycanda COP29 (Tərəflər Konfransı) keçirilməsi ilə əlaqədar müəyyən məhdudiyyətlərin tətbiqi nəzərədə tutulur. İnfrastruktur, nəqliyyat, təhlükəsizlik və digər məhdudiyyətlərin tətbiq olunacağı söylənilir.
Teleqraf.com məsələyə Milli Məclisin deputatı Fazil Mustafanın münasibətini öyrənib.
O deyib ki, COP29-da nəqliyyatla bağlı məhdudiyyətlər olacaq: “Müəyyən müəssisələrin fəaliyyəti 10 gün ərzində dayandırıla bilər. Belə məhdudiyyətlər tədbirin daha sakit şəraitdə keçirilməsi, effektiv olması üçün vacibdir. Nəzərdə tutula bilər ki, insanların müəyyən dərəcədə şəhərdən başqa bölgələrə tətilə getməsi kimi stimullaşdırıcı addımlar atılsın. Məqsəd gələn qonaqlar üçün hansısa sıxlıq yaradılmasını önləməkdir. Bu istiqamətlərdə gözləntilərim var. Başqa daha sərt məhdudiyyətlərin olacağını düşünmürəm”.

“SOCAR-AQŞ” MMC-nin 54 milyonluq mənimsəmədə ittiham olunan keçmiş baş direktoru Ramin İsayevin məhkəməsi başlayıb.

“Qafqazinfo”nun məlumatına görə, Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən hazırlıq iclasına jurnalistlər buraxılmayıb.

Məhkəmədən prosesin qapalı keçirildiyi bildirilsə də, səbəbi açıqlanmayıb.

Yalnız onu əldə etdik ki, hazırlıq iclasının predmetinə uyğun olaraq təqsirləndirilən şəxsin anket məlumatları dəqiqləşdirilib, təqsirləndirilən şəxsin ev dustaqlığına buraxılması ilə bağlı vəsatət təmin edilməyib.

Elektron məhkəmə sistemindən görünür ki, iş üzrə baxış iclası avqustun 2-nə təyin edilib.

Qeyd edək ki, Ramin İsayev 2020-ci ildə “SOCAR-AQŞ” MMC-nin baş direktoru vəzifəsindən azad edilib.

Ötən ilin iyulunda həbs edilib. İş üzrə “SOCAR-AQŞ”dən başqa, “Abşeron Qazma” MMC və “Aqrarkredit” QSC Bank olmayan Kredit Təşkilatı da zərərçəkmiş qismində tanınıb.

Daxili İşlər Nazirliyi (DİN) vəkil Toğrul Rzayevin peşə fəaliyyətini yerinə yetirərkən polis tərəfindən təzyiqə məruz qalması iddialarına aydınlıq gətirib.

DİN-in Mətbuat Xidmətinin media və ictimaiyyətlə əlaqələr şöbəsinin rəisi Anar Qafarov bildirib ki, vəkil Toğrul Rzayevin Nəsimi Rayon Polis İdarəsinin İstintaq şöbəsində cinayət işi üzrə hüquqlarını müdafiə etdiyi şəxslə görüşməsinə şərait yaradılmadığına dair iddiaları şəxsi mülahizələridir.

"Vətəndaş N.İsrəfilov 23.07.2024-cü il tarixdə Nəsimi Rayon Polis İdarəsinə müraciət edərək Cavadxan küçəsi 30 ünvanında yerləşən iş otağından ona məxsus qızıl-zinət əşyalarının tanışı Zəkiyev Asif Şükür oğlu tərəfindən oğurlandığını bildirməklə tədbir görülməsini xahiş edib.

Fakta görə Cinayət Məcəlləsinin oğurluq maddəsi ilə cinayət işi başlanılaraq A.Zəkiyev şübhəli şəxs qismində tutulub. Elə həmin gün 23.07.2024-cü il tarixdə vəkil Toğrul Rzayev şübhəli şəxs A.Zəkiyevin hüquqlarının müdafiə olunması məqsədi ilə order təqdim edib və ona şübhəli şəxslə konfidensial şəraitdə görüş üçün şərait yaradılıb. Buna baxmayaraq iyulun 25-də A.Zəkiyev ibtidai araşdırmaya qoşulan digər vəkilin iştirakı ilə ərizə ilə müraciət edərək T.Rzayev tərəfindən hüquqlarının müdafiə olunmasından könüllü imtina edib. Buna görə həmin tarixdə vəkil T.Rzayevin cinayət prosesində iştirakına xitam verilib", - Anar Qafarov deyib.

Nazirlik rəsmisi qeyd edib ki, A.Zəkiyevin ifadəsi yerində yoxlanılıb və yaşadığı ünvandan oğurluq yolu ilə ələ keçirdiyi 2 700 manat dəyərində 1 ədəd qızıl üzük, 8.000 manat dəyərində 1 ədəd qızıl qolbağ və 4 500 manat dəyərində 1 ədəd qızıl qol saatı götürülüb:

"İfadənin yerində yoxlanılması zamanı cinayət prosesində iştirakına xitam verilməsinə baxmayaraq vəkil T. Rzayev hadisə yerinə gələrək istintaq hərəkətinin keçirilməsinə qəsdən müdaxilə etməklə maneçilik göstərib.

Qeyd olunub ki, təqsirləndirilən şəxsin ondan imtina etməsinə baxmayaraq T.Rzayev məqsədli şəkildə əsassız olaraq səs-küy salıb, vəkillik fəaliyyəti ilə bir araya sığmayan hərəkətlərə yol verib.

Vəkil T. Rzayevin fəaliyyətinə polis əməkdaşları tərəfindən müdaxilə edilməyib, təqsirləndirilən şəxsin başqa vəkilə müraciəti nəzərə alınaraq o, prosesdən kənarlaşdırılıb".

Hazırda cinayət işi üzrə istintaq hərəkətləri davam etdirilir.