Bir neçə gün əvvəl xaricdə məskunlaşan və tez-tez Azərbaycanla bağlı feyk xəbərlərlə gündəmə gələn səhifələrdə guya Azərbaycan Prezidentinin köməkçisi, Prezident Administrasiyasının Xarici Siyasət Məsələləri Şöbəsinin müdiri Hikmət Hacıyevin “Rus evi”nə dil öyrənməyə getməsi ilə bağlı məlumat paylaşılmışdı.

“Qafqazinfo”nun məlumatına görə, hansısa sənədlərə əsaslanaraq yayılmış dezinformasiya ciddi qəbul olunmasa belə, “Rus evi” dərhal bunu yalanlayaraq saxta olduğunu bəyan etdi, yayılmış “sənəd”lərin onlara məxsus olmadığını bildirdi. Lakin xaricdən servis edilən bu gülünc dezinformasiya bəzi məqamlara diqqəti çəkir.

Belə feyk sənədlər kimə sərf edir?

Görünür, bu kimi saxta sənədlər onlara həvalə olunmuş mühüm dövlət işlərini bir kənara qoyub vaxtlarını mənasız və səmərəsiz oyunbazlıqlara həsr edənlərin məhsuludur. Söyüş müxalifətinin məhz Bakıdakı müəyyən qüvvələrdən dəstək alması da sirr deyil.

“Biz palçıq ataq, atdığımız palçıq yapışmasa da, izi qalacaq” düşüncəsi ilə hərəkət edənlər dezinformasiya hazırlanarkən bir çox məqamları unudublar.

Əvvəla, haradan çıxıb ki, Hikmət Hacıyev rus dilini bilmir?! İkincisi isə, o, dil biliklərini təkmilləşdirmək istəsə belə, gedib “Rus evi”ndə “Maşa ilə Medved”in nağılını oxuyacaq qədər boş vaxta və yaşa sahib deyil.

Dil biliklərini təkmilləşdirmək üçün kifayət qədər vasitə və alternativlərin olduğu şəraitdə bu iddianı ortaya atmaq həmin dairələrin səviyyəsini ortaya çıxarır.

Daxili İşlər Nazirliyinin Kibercinayətkarlıqla Mübarizə Baş İdarəsi sosial şəbəkələrdə onlayn qumar oyunları təşkil edən daha bir mütəşəkkil dəstənin üzvlərinin ifşası məqsədi ilə xüsusi əməliyyat keçirib.

DİN-dən verilən xəbərə görə, müxtəlif adlar altında açılmış səhifələrdə vətəndaşların onlayn qumar oyunlarına cəlb edilməsi halları barədə Baş İdarədə hazırlanan xüsusi əməliyyat-texniki tədbirlərlə dəstəyə başçılıq edən 1980-ci il təvəllüdlü Elçin Quliyev, 1986-cı il təvəllüdlü Orxan Məmmədov və daha 4 nəfər saxlanılaraq məsuliyyətə cəlb olunublar.

Araşdırmalarla məlum olub ki, cinayətkar şəbəkəyə müxtəlif yollarla əməkdaşlığa cəlb edilən şəxslərin sayı 40-dan artıqdır. Şəbəkə üzvləri gizliliyi təmin etmək məqsədilə əsasən Rusiya, Gürcüstan, Ukrayna və s. ölkələrə məxsus mobil nömrələrdən istifadə edərək sosial şəbəkələrdə çoxsaylı səhifələr açıblar. Daha sonra həmin səhifələr vasitəsilə vətəndaşları xarici ölkələrə məxsus saytlar üzərindən qumar oyunlarına cəlb ediblər. “Fast Loto”, “CHCPlay”, “MostBet” kimi qeyri-leqal saytlara birbaşa adminlik statusu əldə edən şəbəkənin əsas üzvləri ölkə ərazisində virtual idarəetmə sistemi quraraq kirayə götürdükləri mənzillərdə dəstə başçılarının tapşırıqları əsasında fəaliyyət göstəriblər. Əməliyyat zamanı aşkar edilən 1000-ə yaxın bank kartı ayrı-ayrı vətəndaşlardan müxtəlif məbləğlər müqabilində alınaraq cinayətkar fəaliyyətdə istifadə olunub.

Məhkəmə qərarları əsasında dəstə üzvlərinin istifadə etdikləri gizli ofislər, mənzillər və saxlanc yerlərinə baxış zamanı çoxsaylı elektron sübutlar, bank kartları, saxta adlarla sənədləşdirilmiş xarici ölkələrə məxsus 30-dan artıq mobil telefon nömrəsi, 2 milyon manat nağd pul vəsaiti və sair maddi sübut kimi götürülüb. Şəbəkə üzvlərinin istifadə etdikləri bank hesablarının dövriyyəsinin 10.000.000 manatdan artıq olduğu aşkarlanıb.

E.Quliyev cinayət yolu ilə əldə etdiyi külli miqdarda pul vəsaitini leqal dövriyyəyə daxil etmək üçün çirkli pulların yuyulmasını həyata keçirərək özünün və yaxın qohumlarının adına heç bir fəaliyyəti olmayan şirkətlər açıb. O, iş adamı görüntüsü yaratmaq məqsədi ilə mütəmadi olaraq xarici ölkələrə, xüsusən də Gürcüstana səfərlər edib. E.Quliyevin həmçinin qanunsuz qumar oyunlarını təşkil edən transmilli cinayətkar dəstənin başçıları ilə dəfələrlə xarici ölkələrdə görüşərək yeni kiber sistemləri Azərbaycana gətirmək üçün gizli sövdələşmələr həyata keçirdiyi də məlum olub. Şəbəkə üzvlərinin qanunsuz yolla əldə etdikləri vəsaitlə aldıqları mənzillər, torpaq sahələri, bağ evləri, ticarət obyektləri və lüks avtomobillər müəyyən edilərək məhkəmə qərarları ilə üzərlərinə həbs qoyulub.

Faktla bağlı Baş İdarədə Cinayət Məcəlləsinin müvafiq maddələri ilə cinayət işi başlanılıb. Şəbəkəyə başçılıq edən E.Quliyev və daha 4 nəfər barəsində həbs qətimkan tədbiri seçilib.

Xaricdə və ölkə daxilində gizlənən dəstə üzvlərinin məsuliyyətə cəlb edilməsi istiqamətində də müvafiq hüquqi prosedurlar başlanılmaqla əməliyyat tədbirləri davam etdirilir

Əfqanıstandan Azərbaycana işləməyə gələn şəxs qanunsuz yolla Gürcüstana keçib. Sonra geri qayıdaraq 3 pakistanlını 2500 dollar qarşılığında Gürcüstana aparmaq istəyib. Bu zaman hərbçilərin xəbərdarlıq atəşi ilə saxlanılıblar.

2001-ci il təvəllüdlü Əfqanıstan vətəndaşı Balaqi Sukrullah 2018-ci ildə işləmək üçün Azərbaycana gəlib. Onun qardaşı da Bakıya gəlib və burada tikintilərdə çalışıblar.

İstintaqla müəyyən edilib ki, Balaqi Sukrullah daha əvvəl Azərbaycandan Gürcüstana qanunsuz yolla keçə bilib. 2024-cü ilin aprel ayında yenidən Azərbaycana qayıdıb. Məqsədi isə 3 pakistanlını 2500 dollar qarşılığında Gürcüstana keçirmək olub. Balaqi Sukrullaha bu işdə həmyerlisi, Gürcüstanda yaşayan Muhammad Qomini kömək edib, yol göstərib.

Sukrullah Dövlət Sərhəd Xidmətinin Sərhəd Qoşunlarının N nömrəli hərbi hissəsinin Samux rayonunun Kəsəmən kəndində yerləşən hissəsində Pakistan vətəndaşları ilə görüşüb. Oradan isə qanunsuz olaraq Gürcüstana keçmək istəyiblər. Dövlət Sərhəd Xidmətinin hərbi qulluqçuları 4 nəfəri də sərhədin 160 metrlik məsafəsində saxlayıb.

Pakistan vətəndaşları Avropada işləmək üçün Gürcüstana getməyi planlaşdırıblar. Onlar Azərbaycana qanuni yolla gəlsələr də, qanunsuz yolla Gürcüstana getməyi düşünüblər. Çünki Gürcüstana getmək üçün viza ala bilməyiblər.

Dövlət Sərhəd Xidmətinin hərbi qulluqçularının ifadəsindən məlum olub ki, təqsirləndirilən şəxslərə ilk dəfə “Dayan” əmri verilsə də, qaçmağa başlayıblar. Havaya bir dəfə xəbərdarlıq atəşi açılıb. Hərbi qulluqçular ikinci dəfə “Dayan” əmri verib. Lakin qaçaqlar yenə də dayanmayıb. İkinci xəbərdarlıq atəşindən sonra onlar təslim olublar.

Balaqi Sukrullah Cinayət Məcəlləsinin 318.1-ci (mühafizə olunan dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə), 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən, yaxud zor tətbiq etməklə və ya belə zor tətbiq etmə hədəsi ilə törədildikdə) və 29,318.2-ci (dövlət sərhəddini qanunsuz keçməyə cəhd etmə; qabaqcadan əlbir olan bir qrup şəxs və ya mütəşəkkil dəstə tərəfindən, yaxud zor tətbiq etməklə və ya belə zor tətbiq etmə hədəsi ilə törədildikdə) maddələri ilə təqsirləndirilərək həbs edilib.

3 Pakistan vətəndaşına qarşı isə Cinayət Məcəlləsinin 29,318.2-ci (dövlət sərhədini qanunsuz keçməyə cəhd etmə; qabaqcadan əlbir olan bir qrup şəxs və ya mütəşəkkil dəstə tərəfindən, yaxud zor tətbiq etməklə və ya belə zor tətbiq etmə hədəsi ilə törədildikdə) maddəsi ilə ittiham irəli sürülüb.

Məhkəmənin hökmü ilə Balaqi Sukrullah 2 il müddətinə azadlıqdan məhrum edilib. Cəzası başa çatdıqdan sonra ölkə sərhədindən məcburi şəkildə çıxarılacaq. Saxlanılan digər 3 Pakistan vətəndaşı isə məhkəmənin qərarı ilə deportasiya edilib.//Musavat.com

Bu il Azərbaycanda “Konstitusiya və Suverenlik İli” ilə əlaqədar adsız zirvələrə yeni adlar veriləcək.

Demokrat.az xəbər verir ki, bu barədə Azərbaycan Respublikasında 2025-ci ilin “Konstitusiya və Suverenlik İli” elan edilməsi ilə bağlı Tədbirlər Planında qeyd edilib.

Bundan başqa, Bakı şəhərində və digər böyük şəhərlərdə prospekt, küçə, meydan və müvafiq ərazi vahidlərinə, metro stansiyalarına yeni adlar veriləcək.

”Vaxtı ilə hakimiyyətdə olub, sonra bu dövlətə xəyanət edənlərin adlarını açıqlamışdım. Elə ötən gün onların adları açıqlandı. Lakin Rusiyaya işləyən agentura şəbəkəsi tək onlar deyil, sayları çoxdur”.

Bunu Musavat.com-a açıqlamasında Müasir Müsavat Partiyasının sədri Hafiz Hacıyev deyib.

O bildirib ki, Rusiyaya, İrana işləyən xəyanətkarların hamısı məhv edilməlidir:

“Nəcməddin Sadıkovu da bu siyahıya əlavə etmək lazımdır. O indi də zərərli işlərlə məşğuldur. Ramiz Mehdiyevin bağı xəyanət yuvası olub. Müəyyən adamlar oraya toplaşıb xüsusi iclaslar keçirirlər. Ad günü qeyd etmək adı altında dəniz qırağında restoranda yığışıb təxribatlarla məşğuldurlar. Buna görə də çox ciddi işlər görməli, hər an onları və övladlarını nəzarətdə saxlamaq lazımdır. Övladları xaricdə Azərbaycanın əleyhinə fəaliyyət göstərirlər. Çox ayıq olmalıyıq.

Ramiz Mehdiyevin, Eldar Mahmudovun, Nəcməddin Sadıkovun, Elmar Məmmədyarovun azadlıqda qalması təhlükəlidir. Onların ətrafında böyük güclər, əllərində isə kapitallar var. Ramiz Mehdiyev vəzifədən ayrılanda Gürcüstanda Rusiya prezidentinin köməkçisi Nikolay Patruşevə demişdi ki, bundan sonra tapşırıqlarınızı filankəslərə verin.

Belə məsələlərdə bütün varlığımızla cənab Prezidentin yanında olmalıyıq. İdeoloji baxımdan xalq arasında güclü təbliğat aparmalıyıq. Bakıda “Rus evi”nin fəaliyyətinin dayandırması ilə bağlı Azərbaycan xarici İşlər Nazirliyinin tələb qoyması ən düzgün addımdır”.

“Best Beef” əmtəə nişanlı “Ocaq” sosis məhsulunun (11.11.2024-cü il istehsal tarixli) müayinəsi nəticəsində etiket məlumatında bəyan edilmədiyi halda, tərkibində donuz əti DNT-si aşkarlanıb.
Bu barədə Qida Təhlükəsizliyi Agentliyi məlumat yayıb.

Bildirilib ki, bununla bağlı “Elite Food Company” MMC-yə məxsus kolbasa emalı müəssisəsində keçirilən plandankənar yoxlama zamanı 450 qramlıq “Best Beef” əmtəə nişanlı “Ocaq” sosisindən (07.01.2025-ci il istehsal tarixli) və 1,130 kiloqramlıq “Best Beef” əmtəə nişanlı bişmiş “Doktorskaya” kolbasasından (06.01.2025-ci il istehsal tarixli) nümunələr götürülərək laborator müayinələrə cəlb olunub.

Sınaq nəticəsinə əsasən, bu məhsullarda da donuz DNT-si müəyyən edilib.

Faktla bağlı sahibkar barəsində protokol tərtib edilərək inzibati məsuliyyətə cəlb edilib. Eyni zamanda həmin məhsulların istehsalının dayandırılması, həmçinin emal edilmiş məhsul partiyalarının satışının qadağan olunması ilə bağlı məhdudlaşdırıcı tədbirlərin tətbiqi barədə qərar qəbul edilib.

"Məni Rusiyaya işləməkdə ittiham etmək çox gülməlidir. Elmar Məmmədyarov 5 ildir vəzifədə deyil, görünür, ona görə də məni belə yolla yada salırlar".

Bunu Teleqraf-a açıqlamasında Rusiyanın Azərbaycandakı şəbəkəsinin üzvü olduğu iddia edilən sabiq xarici işlər naziri Elmar Məmmədyarov deyib.

O bildirib ki, bu ittihamın heç bir əsası yoxdur:

"Hansısa məmurların qarnı ağrıyır, çünki Elmar Məmmədyarov yenə gündəmdədir. Gün ərzində 20 jurnalistə müsahibə verirəm, həmin adamlar bundan narahatdırlar. Məni Moskva ilə əlaqələndirmək üçün heç hir tutarlı səbəb və əsas yoxdur. Mən həm Ukrayna, həm Rusiya, həm də ABŞ-da təhsil almışam. Bu o deməkdir ki, məni bu ölkələrin agenti adlandırmalıdırlar?!".

Qeyd edək ki, “Qafqazinfo” fevralın 10-da Rusiyanın Azərbaycandakı şəbəkəsinin ifşa olunması barədə xəbər yayıb.

İddiaya görə, şəbəkəyə hamının yaxşı tanıdığı, Prezident Administrasiyasının keçmiş rəhbəri, özünü “boz kardinal” statusunda görən Ramiz Mehdiyev rəhbərlik edib. Qrupa, həmçinin sabiq nazirlər Əbülfəz Qarayev, Azad Rəhimov, Elmar Məmmədyarov daxil olublar. Keçmiş milli təhlükəsizlik naziri Eldar Mahmudov da ara-sıra bu məclislərdə görünüb.

"Borc müqaviləsi mülki qanunvericiliyin ən əsas institutlarından biri olmaqla yanaşı, iqtisadi həyatın bütün sahələrində də geniş istifadə olunur. Lakin bu müqavilənin hüquqi təbiəti və tərəflərin öhdəlikləri ilə bağlı çoxsaylı suallar hələ də gündəmdədir.
Bəzən təcrübədə borc müqaviləsində qeyri-dəqiq və ya mübahisəli şərtlər müəyyən edilir ki, bu da tərəflər arasında mübahisələrin meydana çıxmasına səbəb olur. Yaxud da borc müqaviləsində ödənişin vaxtında yerinə yetirilməməsi ciddi hüquqi problemlərə səbəb ola bilir.

Ümumiyyətlə, bu müqavilənin anlayışı və forması qanunvericiliklə necə tənzimlənir? Borc müqaviləsi ilə bağlı tərəflər arasında yaranan mübahisələr necə həll olunmalıdır?".
Bu sözləri Moderator.az-a açıqlamasında hüquqşünas Yunis Xəlilov bildirib.
"Hər şeydən əvvəl, qeyd edək ki, bu müqavilə növünün tarixi klassik Roma hüququna qədər gedib çıxır. Belə ki, Roma hüququnda sözü gedən müqavilə “mutuum kontraktı” kimi tanınırdı. O dövrlərdə “Nexum” borcun ən qədim forması sayılırdı və adı çəkilən müqavilə forması XII cədvəl qanunlarında belə nəzərdə tutulurdu.
Hazırda borc müqaviləsi ilə bağlı mülki hüquq münasibətləri bir sıra ölkələrin qanunvericiliyi ilə də tənzimlənir. Məsələn, Almaniya mülki qanunvericiliyinin 2-ci kitabının 7-ci bölməsi, İtaliya Mülki Məcəlləsinin 4-cü kitabının 3-cü bölməsi, Hollandiya Mülki Məcəlləsinin 7-ci kitabı məhz borc müqaviləsinə həsr olunmuşdur.
Ölkəmizə gəlincə, Azərbaycan Respublikasının hazırda qüvvədə olan Mülki Məcəlləsinin 739-cu maddəsi borc müqaviləsinin anlayışı və formasını müəyyən edir. Belə ki, maddədə müəyyən olunur ki, borc müqaviləsinə görə bir tərəf (borcverən) pul vəsaitinə və ya digər əvəz edilən əşyalara mülkiyyət hüququnu digər tərəfə (borcalana) verməyi öhdəsinə götürür, borcalan isə aldıqlarını müvafiq olaraq eyni məbləğdə pul vəsaiti və ya eyni keyfiyyətdə və miqdarda olan eyni növlü əşyalar şəklində borcverənə qaytarmağı öhdəsinə götürür. Elə dərhal qeyd edək ki, bu müqavilənin predmeti pul vəsaiti olaraq təkcə Azərbaycan manatı deyil, xarici valyuta da ola bilər.
Bir çox hallarda borc müqaviləsinin formasına riayət olunmaması tərəfləri əlverişsiz vəziyyətə sala bilir. Xüsusilə yazılı borc müqaviləsi bağlanmadan borc verənlər borc tələbi üzrə məhkəmədə qaldırdıqları iddialar zamanı borc vermə faktının, ya da müqavilə şərtlərinin sübutu zamanı dəlil yetərsizliyi ilə üzləşə bilirlər. Təbii ki, şifahi bağlanan borc müqavilələrindən qaynaqlanan məhkəmə mübahisələrində əsas dəlillər şahid ifadələri olur ki, çox zaman da tərəflərin öz tələblərini sübut etmək üçün məhkəmədə dindirilməsini istədikləri şahidlərin əksəriyyəti işdə maraqlı ola bilir. Məsələn, tərəflərdən birinin qohumu olan şahidin verdiyi ifadə bəzən məhkəmədə həqiqəti ortaya çıxarmaq üçün yetərli olmaya bilir.
Bu baxımdan borc müqaviləsinin formasına ciddi riayət olunması tələb olnur. Əlbəttə, bu müqavilə şifahi bağlana bilər. Amma bu zaman mülki qanunvericiliyin tələblərinə əməl olunmalıdır. Mülki Məcəllənin yuxarıda söhbət açdığımız maddəsinə görə borc müqaviləsi predmetinin məbləği üç min manatdan çoxdursa və ya məbləğindən asılı olmayaraq, müqavilənin iştirakçılarından biri hüquqi şəxsdirsə, borc müqaviləsi yazılı formada bağlanılmalıdır.
Borc müqaviləsinin forması və şərtləri ilə bağlı xarici ölkələrin təcrübəsi də maraqlıdır. Məsələn, Almaniya borc müqavilələrinin bağlanması və icrası zamanı şəffaflığın təmin edilməsinə xüsusi diqqət yetirir. Müqavilənin bütün şərtləri yazılı şəkildə olmalıdır və şərtlər aydın şəkildə göstərilməlidir. Müqavilənin qeyri-dəqiq və ya anlaşılmaz şərtlərini nəzərə alaraq hüquq mühafizə orqanları belə mübahisələrin həllinə böyük önəm verir.
ABŞ-da da borc müqavilələrinin yazılı formada bağlanılmasına böyük önəm verilir. Ümumiyyətlə, bu ölkədə yazılı müqavilələr tərəflərin razılıqlarını dəqiq şəkildə əks etdirməlidir, çünki bu, məhkəmə mübahisələrində əsaslı sübut kimi qəbul edilir.
Ölkəmizdə borcun verildiyi günün müəyyən olunması da müddətin aydınlaşdırılması baxımından çox vacib praktiki məsələlərdən biridir. Qanunvericiliyə görə borcalanın və ya onun göstərdiyi üçüncü şəxsin borc müqaviləsinin predmetinə sərəncam hüququnun yarandığı gün borcun verildiyi gün hesab olunur. Borc müqaviləsinin predmeti pul vəsaiti olduqda və nağdsız qaydada verildikdə, borcun verildiyi gün borc məbləğinin borcalanın, yaxud onun göstərdiyi üçüncü şəxsin hesabına xidmət göstərən kredit təşkilatının və ya digər şəxsin hesabına mədaxil edildiyi gün hesab olunur. Borcverənin və borcalanın (və ya onun göstərdiyi üçüncü şəxsin) hesabları eyni təşkilatda olduqda borc vəsaitinin borcalanın və ya onun göstərdiyi şəxsin hesabına mədaxil olduğu gün borcun verildiyi gün hesab edilir.
Onu da qeyd edək ki, Mülki Məcəlləsinin 740-cı maddəsinə əsasən qanunda və ya müqavilədə ayrı qayda nəzərdə tutulmayıbsa, borcverən borcalandan müqavilədə nəzərdə tutulmuş qaydada və məbləğdə faiz almaq hüququna malikdir.
Mülki Məcəllədə ayrı qayda nəzərdə tutulmayıbsa, borcun verilməsinə görə faizin və (və ya) digər haqqın məbləği və ya hesablanma qaydası tərəflərin razılaşması ilə müəyyən edilir.
Borc müqaviləsi üzrə faizlərlə bağlı təfərrüatlı hüquqi tənzimləmə mülki qanunvericiliyin sözügedən maddəsində nəzərdə tutulur.
Adı çəkilən müqavilə ilə bağlı vətəndaşları daha çox maraqlandıran digər məsələlərdən biri də borc vermək və almaq öhdəliyinin birtərəfli qaydada ləğvinin mümkün olub-olmamasıdır. Qeyd edək ki, Mülki Məcəllənin 741-ci maddəsində birbaşa təsbit olunur ki, həmin məcəllədə ayrı qayda nəzərdə tutulmayıbsa, borcalanın əmlak vəziyyətinin əhəmiyyətli dərəcədə pisləşməsi və ya borcalanın borcverənə hər hansı yanlış məlumat verməsi səbəbindən borcun vaxtında qaytarılmayacağı açıq-aşkar bəlli olduqda, yaxud borcalan borcun verilməsi üçün borc müqaviləsində nəzərdə tutulmuş öhdəliyini icra etmədikdə, o cümlədən təminat təqdim etmədikdə, borcverən borc vermək öhdəliyini tam və ya qismən icra etməkdən birtərəfli qaydada imtina edə bilər. Borcalan borc müqaviləsi predmeti ona verilənədək borcun alınmasından tam və ya qismən birtərəfli qaydada imtina edə bilər.
Bəs, borc nə zaman qaytarılmalıdır? Mülki qanunvericilikdə bildirilir ki, borcalan borcu (həmçinin faizləri və (və ya) haqları) borc müqaviləsində nəzərdə tutulan müddətdə və qaydada (Mülki Məcəllənin 740-cı maddəsi nəzərə alınmaqla) borcverənə qaytarmalıdır. Borc predmeti borcverənə və ya borcverənin göstərdiyi üçüncü şəxsə verildiyi gün, müqavilədə ayrı qayda nəzərdə tutulmamışdırsa, qaytarılmış hesab olunur. Borc müqaviləsinin predmeti pul vəsaiti olduqda və nağdsız qaydada qaytarıldıqda, borcun qaytarıldığı gün borc məbləğinin borcverənin, yaxud onun göstərdiyi üçüncü şəxsin hesabına xidmət göstərən kredit təşkilatının və ya digər şəxsin hesabına mədaxil edildiyi gün hesab olunur. Borcverənin və borcalanın və ya onun göstərdiyi üçüncü şəxsin hesabları eyni təşkilatda olduqda borc vəsaitinin borcverənin və ya onun göstərdiyi şəxsin hesabına mədaxil olduğu gün borcun qaytarıldığı gün hesab edilir.
Əgər borc müqaviləsində borcun qaytarılması üçün müddət müəyyən edilməmişdirsə, borcverən borcun qaytarılmasını istənilən vaxt tələb edə bilər. Borcverənin icra tələbini almış borcalan bir ay müddətində borcu qaytarmalı, habelə faizləri və (və ya) haqları ödəməlidir, bu şərtlə ki, tərəflərin razılaşması ilə daha uzun müddət nəzərdə tutulmasın.
Mülki Məcəllədə ayrı qayda nəzərdə tutulmayıbsa, borcalan borcun verildiyi gündən qaytarıldığı günədək hesablanmış faizləri və (və ya) haqları ödəməklə, borcu vaxtından əvvəl qaytara bilər.
Beləliklə, sonda onu deyə bilərik ki, borc müqaviləsi bağlanarkən tərəflər arasında aydın anlaşma və razılaşmanın olması gələcəkdə yarana bilən potensial hüquqi mübahisələrin həllinə effektiv kömək ed bilər. Bu müqavilənin düzgün tərtib edilməsi və hüquqi baxımdan müvafiq standartlara cavab verməsi, həm borcverənin, həm də borcalanın maraqlarını qorumaq üçün əsas şərtdir".

Ötən həftə Prezident İlham Əliyevin sərəncamı ilə Anar Əliyev əmək və əhalinin sosial müdafiəsi naziri təyin edildi. Bu təyinatdan sonra mediada A.Əliyevin dosyesi yayıldı. Məlum oldu ki, yeni nazir tanınmış alimin oğludur.

A.Əliyevin atası filologiya elmləri doktoru, ədəbiyyatşünas, yazıçı Rəhim Əliyevdir.

Bu məsələ ümumilikdə hökumət rəsmilərinin ailələrini yenidən gündəmə gətirdi.

Bəs başqa hansı tanınmış şəxsin övladı, atası hökumətdə yüksək vəzifə daşıyır?

Globalinfo.az həmin şəxslərdən bir neçəsini təqdim edir:

Maliyyə naziri Sahil Babayevin atası tanınmış polis polkovniki Rafiq Babayevdir. Uzun müddət Daxil İşlər Nazirliyi Pasport və Qeydiyyat İdarəsinin rəisi postunu tutan R.Babayev polis sistemində nüfuzlu şəxslərdən olub.

Azərbaycan Milli Elmlər Akademiyasının (AMEA) sabiq prezidenti Ramiz Mehdiyevin oğlu Teymur Mehdiyev fövqəladə hallar nazirinin müavinidir.

Ombudsman Səbinə Əliyeva tanınmış diplomat, mərhum Yaşar Əliyevin qızıdır. Eyni zamanda o, deputat Siyavuş Novruzovun həyat yoldaşıdır.

“Odlar Yurdu” Universitetinin rektoru, Azərbaycan Milli Məclisinin III və IV çağırış deputatı, fizika-riyaziyyat elmləri doktoru, professor Əhməd Vəliyevin oğlu Samir Vəliyev VII çağırış Milli Məclisin deputatıdır.

2016-2021-ci illərdə isə Prezidentin işlər idarəsinin müdiri vəzifəsini icra edən Oqtay Şahbazovun oğlu Pərviz Şahbazov energetika naziridir.

1993-2018-ci illərdə Baş nazirin müavini vəzifəsini icra edən Elçin Əfəndiyevin qızı Humay Əfəndiyeva Konstitusiya Məhkəməsinin hakimidir.

Ana Vətən Partiyasının sədri, sabiq deputat Fəzail Ağamalının qızı Günay Ağamalı VII çağırış Milli Məclisin deputatıdır.

Vəzifəli şəxslər arasında qudalıq, başqa qohumluq əlaqələri də var. Əsasən köhnə hakim komandada da bu cür qohumluqlar yayğın idi. Onların istefasından sonra bu tendensiya xeyli azalıb.

Məlum olduğu kimi, Rusiyanın “Rossotrudniçestvo” təşkilatının Azərbaycandakı nümayəndəliyinin fəaliyyəti dayandırılıb. Prosesin detallarına dərindən varmadan deyə bilərik ki, bu qurumun Azərbaycanda casus şəbəkəsi yaratmaqda ittiham olunması ictimaiyyətdə böyük maraq doğurub.

Əslində, Rusiyanın Azərbaycanda belə bir şəbəkə qurduğu və onun vasitəsilə ictimai-siyasi proseslərə təsir göstərməyə çalışdığı bu günün söhbəti deyil. Zaman-zaman bəzi şəxslər Rusiyaya işləməkdə də ittiham olunublar, ən azından buna eyham vurulub.

Lakin “Qafqazinfo”ya daxil olan məlumat həqiqətən də belə bir şəbəkənin mövcud olduğuna heç bir şübhə yeri qoymur.

Əvvəla, qeyd edək ki, “Rus Evi” Bakının mərkəzində, Üzeyir Hacıbəyli küçəsində yerləşib. Bu yerin “Rus Evi” üçün təşkil olunması ilə bilavasitə Elçin Həsənov adlı iş adamı məşğul olub. Onun keçmiş gənclər və idman naziri Azad Rəhimovun qaynı olduğu deyilir.

Məsələnin maraqlı tərəfi də budur ki, “Rus Evi” həmin ünvandan çıxdıqdan sonra da Elçin Həsənov əl-ayağa düşərək “Rossotrudniçestvo”nun Bakı nümayəndəliyinin rəhbəri ilə birlikdə “Rus Evi”ə yeni ofis axtarışına çıxıb. Bir sözlə, E.Həsənov bu problemin həlli üçün bütün imkanlarını səfərbər edib və ciddi cəhdlə çalışır.

Azərbaycanda Rusiya şəbəkəsinə gəldikdə, artıq faktlarla da belə bir şəbəkənin mövcud olduğu təsdiqini tapıb. Şəbəkə üzvlərinin vaxtilə Bakı ətrafındakı yaşayış məntəqələrindən birində, bağda yığışdığı, yeyib-içmək məclislərinin təşkil olunduğu, sağlıqlar deyildiyi məlumdur. Şəbəkə Moskvadan təyin olunmuş və tez tez ölkəmizə gələn kəşfiyyat nümayəndəsi vasitəsilə idarə olunub.

Şəbəkəyə hamının yaxşı tanıdığı, Prezident Administrasiyasının keçmiş rəhbəri, özünü “boz kardinal” statusunda görən Ramiz Mehdiyev rəhbərlik edib. Qrupa həmçinin sabiq nazirlər Əbülfəz Qarayev, Azad Rəhimov, Elmar Məmmədyarov daxil olublar. Keçmiş milli təhlükəsizlik naziri Eldar Mahmudov da ara-sıra bu məclislərdə görünüb.

Bu şəxslərin indi vəzifədə olmaması o demək deyil ki, əlaqələr yoxa çıxıb. Hazırda da Rusiyanın kəşfiyyat nümayəndəsinin yanına gedənlər, ondan tapşırıqlar alaraq cəmiyyətimizə yanlış mesajlar ötürənlər, aranı qatmağa çalışanlar var. Amma bunlar yavaş-yavaş ifşa olunurlar və zamanla yeni faktların üzə çıxacağı istisna olunmamalıdır.