Mobil operator avtomobil sahibləri üçün nəzərdə tutulmuş “SMSRadar” xidmətində “Premium” abunəliyi istifadəyə verib. Yeni abunəlik sürücülərə avtomobillə bağlı daha detallı məlumatlara vahid platforma üzərindən sürətli və rahat çıxış imkanı yaradır.

“SMSRadar Premium” çərçivəsində istifadəçilər avtomobilin qeydiyyat və sığorta məlumatlarını izləyə, cərimələrə və sürücülük vəsiqəsi ilə bağlı mövcud məhdudiyyətlərə nəzarət edə bilirlər. Bununla yanaşı, xidmət çərçivəsində pulsuz sınaq imtahanlarına və “Sual-Cavab” bölməsinə giriş də təmin olunur.

Xidmətə qoşulmaq üçün abunəçilər “P” yazıb 5666 qısa nömrəsinə göndərə bilərlər. Premium abunəliyin aylıq xidmət haqqı 1 AZN təşkil edir.

“SMSRadar” tətbiqi “Google Play Store” və “Apple App Store” mağazalarında əlçatandır.

X şirkəti ona inteqrasiya olunmuş süni intellekt çatbotu Grok-a nəzarəti təmin etməsə, bunu Böyük Britaniya hökuməti edəcək.

Musavat.com xəbər verir ki, bu xəbərdarlıqla Böyük Britaniyanın Baş naziri Keir Starmer çıxış edib.

O, hakim Leyborist Partiyasının üzvləri ilə görüşdə bu barədə danışıb: "Əgər X Groku idarə edə bilmirsə, biz edəcəyik və bunu tez bir zamanda edəcəyik, çünki zərər və zorakılıqdan qazanc əldə etsəniz, özünüzü tənzimləmək hüququnuzdan məhrum olursunuz. Aydın olsun ki, biz buna dözməyəcəyik, çünki dünya nə qədər qeyri-sabit və ya mürəkkəb olursa olsun, bu hökumət öz dəyərlərinə əsaslanacaq. Biz güclülər qarşısında həssasları qoruyacağıq".

Baş nazir bu açıqlamanı 12 yanvarda, Britaniya media tənzimləyicisi Ofcom-un Grok tərəfindən yaradılan şəkillərlə bağlı X-ə qarşı araşdırma başlatdığı gün verib. Çatbot, X-ə də sahib olan İlon Musk-ın xAI şirkəti tərəfindən hazırlanıb.

Britaniyanın Elm, İnnovasiya və Texnologiya üzrə Dövlət Katibi Liz Kendall ölkəsinin razılıq olmadan intim şəkillərin yaradılmasını cinayət hesab edəcəyini açıqladı. Bu cür tətbiqlərin yaradıcılarına da şamil ediləcək müvafiq qanunun bu həftə qüvvəyə minməsi planlaşdırılır. The Daily Telegraph-ın məlumatına görə, Londonun qəzəbi X ilə inteqrasiya olunmuş çatbotun istifadəçilərin istəyi ilə yaratdığı qadın və uşaqların açıq-saçıq şəkillərindən qaynaqlanır. Qəzet qeyd edir ki, artıq Britaniya taxtının varisinin həyat yoldaşı Uels şahzadəsi Ketrin Middleton, Britaniya məşhurları, kabinet nazirləri və parlament üzvlərinin belə fotolarının yaradılması halları qeydə alınıb.

Musavat.com

İran hakimiyyəti tarixində ilk dəfə Starlink peyk internetinin ölkə daxilində fəaliyyətini effektiv şəkildə məhdudlaşdıra bilib.

Musavat.com xəbər verir ki, Forbes nəşrinin yazdığına görə, Tehran buna Çin və Rusiya mənşəli yeni radio-elektron mübarizə və siqnal boğma sistemləri sayəsində nail olub. Bu addım etirazlar zamanı informasiya axınını nəzarətə almaq baxımından kritik dönüş nöqtəsi kimi qiymətləndirilir.

 Etirazlar səngiyir, SEPAH geri çəkilmir

Məlumata görə, İranda son günlər küçə etirazlarının intensivliyi azalır. Beynəlxalq təzyiqlərə və daxili narazılıqlara baxmayaraq, SEPAH (İslam İnqilabı Keşikçiləri Korpusu) rejimin yanında qalmaqda davam edir və təhlükəsizlik arxitekturasının əsas dayağı kimi mövqeyini qoruyur.

Vaşinqton–Təl-Əviv xətti: növbəti addım nə olacaq?

Diqqətlər Vaşinqtona yönəlib. The New York Times yazır ki, etirazçılara real dəstək vermək üçün ABŞ və İsrailin daha sərt addımlar atması müzakirə olunur. Məlumata əsasən, Donald Trump sabah təhlükəsizlik kabineti ilə xüsusi iclas keçirəcək. Gündəmdə SEPAH-ın hərbi imkanlarının hədəfə alınması, o cümlədən kiber, informasiya və qeyri-kinetik ssenarilər var.

Sual açıq qalır

Starlink-in “susdurulması” ilə Tehran informasiya üstünlüyünü qismən bərpa edibmi, yoxsa bu addım daha geniş qarşıdurmanın anonsudur? ABŞ–İsrail tandeminin növbəti qərarları regionda balansı dəyişə bilər.

Musavat.com

Süni intellekt sahəsində tanınmış mütəxəssis və "OpenAI"nin keçmiş əməkdaşı Daniel Kokotajlo inkişaf etmiş süni intellektin potensial təhlükələri ilə bağlı əvvəlki proqnozlarını yeniləyib. Onun sözlərinə görə, süni intellekt sistemlərinin tam muxtar kodlaşdırma qabiliyyəti əldə etməsi və superintellekt mərhələsinə çatması əvvəl düşünüləndən daha uzun zaman ala bilər.

Milli.Az xəbər verir ki, Kokotajlo bu ilin əvvəlində geniş rezonans doğuran "Süni intellekt 2027" ssenarisi ilə çıxış etmişdi. Həmin ssenaridə nəzarətsiz inkişaf edən süni intellektin dünya liderlərini üstələyəcəyi, nəticədə isə bəşəriyyət üçün ekzistensial təhlükə yaradan superintellektual bir varlığın formalaşacağı iddia olunurdu.

Bu ssenari həm dəstək, həm də ciddi tənqidlərə səbəb olmuşdu. ABŞ-ın vitse-prezidenti Cey Di Vens ABŞ-Çin süni intellekt rəqabətini müzakirə edərkən bu işə istinad etmiş kimi görünsə də, bir çox ekspertlər proqnozları qeyri-real və həddindən artıq pessimist hesab etmişdi.

Mütəxəssislər bildirirlər ki, süni ümumi intellektə (AGI) - yəni insanların yerinə yetirdiyi əksər idrak tapşırıqlarını yerinə yetirə bilən süni intellektə - çatma müddəti süni intellekt təhlükəsizliyi müzakirələrinin əsas mövzularından biri olaraq qalır. 2022-ci ildə "ChatGPT"nin istifadəyə verilməsi bu zaman xəttini xeyli sürətləndirmiş, bir sıra siyasətçilər və tədqiqatçılar AGI-nin bir neçə il və ya onillik ərzində mümkün olacağını irəli sürmüşdülər.

Kokotajlo və komandası əvvəlcə süni intellektin 2027-ci ilə qədər tam muxtar kodlaşdırma qabiliyyətinə çatacağını ehtimal edirdi. Lakin son təhlillər bu proqnozun həddindən artıq nikbin olduğunu göstərib. Onun fikrincə, real dünyanın mürəkkəbliyi və praktik bacarıqlara olan ehtiyac süni intellektin inkişaf tempini yavaşıdır.

Süni intellekt risklərinin idarə edilməsi üzrə mütəxəssis Malkolm Murrey qeyd edir ki, sahədəki irəliləyişlər gözlənildiyi qədər stabil deyil. Fransanın SaferAI qeyri-kommersiya təşkilatının icraçı direktoru Anri Papadatos isə bildirir ki, süni intellekt daha çoxşaxəli olduqca "AGI" termini öz aktuallığını itirə bilər.

Yeni açıqlamaya görə, bəşəriyyəti potensial olaraq məhvə apara biləcək superintellekt səviyyəsinə çatmaq üçün yeni hədəf ili 2034-cü ildir.

Çinli hakerlər ABŞ Nümayəndələr Palatasının əsas komitələrinin əməkdaşlarının elektron poçt sistemlərini sındırıblar.

Musavat.com xəbər verir ki, məlumatı Financial Times (FT) mənbələrə istinadən yayıb.

Qəzetin məlumatına görə, bu, Çin hökuməti ilə əlaqəli olduğu bildirilən "Salt Typhoon" qrupu ilə bağlıdır. Mənbələrə görə, qrup Nümayəndələr Palatasının Çin üzrə Komitəsinin bəzi əməkdaşları, eləcə də Xarici İşlər, Kəşfiyyat və Silahlı Qüvvələr komitələrinin köməkçiləri tərəfindən istifadə edilən elektron poçt sistemlərinə daxil ola bilib.

Qəzetin mənbəyinə görə, hakerlərin qanunvericilərin elektron poçtlarına daxil olub-olmadığı hələlik məlum deyil. Fakt dekabr ayında aşkar edilib. ABŞ Konqresindən hələlik rəsmi təsdiq yoxdur.

Musavat.com