 |
|
|
Bu barədə ABŞ Ədliyyə Nazirliyinin saytında deyilir. Bildirilir ki, İŞİD-Xorasan terror təşkilatının üzvü, “Cəfər” kimi tanınan Məhəmməd Şərifullah həbs edilib.
Martın 2-də o, bir sıra terror aktları - 2021-ci ildə Əfqanıstanın Kabil hava limanında baş verən partlayış və ötən il Moskva vilayətində "Crocus City Hall"a silahlı hücum - hazırlamaqda ittiham olunub.
Şərifullah dindirmə zamanı etiraf edib ki, o, İŞİD-Xorasan adından "Crocus"da terror aktı hazırlayan silahlılara təlim keçib. O, Rusiyada həbs edilən terror aktını törədənlərdən ikisini tanıdığını, onlara pulemyot və digər silahlardan necə istifadə edilməsi barədə göstərişlər verdiyini deyib.
ABŞ prezidenti Donald Tramp Cənubi Afrika Respublikasına (CAR) ayrılan maliyyə yardımını dayandırmaq qərarına gəlib.
O, bu barədə "Truth Social" platformasında yazıb.
Trampın sözlərinə görə, bu addımın atılmasının əsas səbəbi təhlükəsizlik məsələləri olub. O, ölkəni tərk etmək istəyən CAR fermerlərinə ABŞ-yə köçmək imkanı yaradılacağını bildirib.
Tramp qeyd edib ki, fermerlər ailələri ilə birlikdə ABŞ-yə dəvət olunacaq və onlara sürətləndirilmiş vətəndaşlıq prosesi tətbiq ediləcək. Proqramın dərhal qüvvəyə minəcəyi və müraciətlərin tez bir zamanda qəbul ediləcəyi bildirilib.
Bu qərarın CAR-da torpaq islahatları və təhlükəsizlik problemləri ilə bağlı olduğu ehtimal edilir.
Rusiya Təhlükəsizlik Şurasının sədr müavini Dmitri Medvedev sosial şəbəkədə Fransa prezidenti Emmanuel Makronu tənqid edib.
TEREF xəbər verir ki, Makronun Rusiyanı Avropa üçün təhdid kimi təsvir etməsinə gəlincə , Medvedev, “O, ən geci 14 may 2027-ci ildə əbədi olaraq yoxa çıxacaq və əldən verilməyəcək” dedi.
Makronun adını “Mikron” olaraq yazan Medvedev “Mikronun özü təhlükə yaratmır” deyib.
Fransa lideri dünən xalqa müraciətində bildirib ki, Rusiya 2030-cu ilə qədər ordusunu 3000 tank və 300 döyüş təyyarəsi ilə daha da genişləndirməyi, 40 milyard avrodan çox xərcləməyi planlaşdırır.
Makron bəyan edib ki, Moskva Avropanın təhlükəsizliyinə təhdid olaraq qalır.
Gununsesi.info
“İran hakimiyyətində ardıcıl yaşanan istefalar sistem daxilində bir neçə il əvvəl başlanmış böhranın dərinləşdiyini göstərir”.
Bu sözləri Güney Azərbaycan üzrə araşdırmaçı jurnalist Elman Cəfərli “Cebheinfo.az”-a açıqlamasında deyib.
O bildirib ki, İran beynəlxalq təcrid vəziyyətindən çıxa bilməsə, Məsud Pezeşkianın aqibəti yaxşı olmayacaq:
“Əslində azərbaycanlı Məsud Pezeşkianın prezidentliyə yolunun açılması ilə molla rejimi bir neçə hədəfə çatmaq istəyirdi. Əvvəla, Pezeşkian islahatçı qanada mənsubdur. Onun komandasının “boz kardinalı” isə ABŞ ilə münasibətləri qaydaya salmağa nail olmuş Həsən Ruhani hökumətinin xarici işlər naziri olmuş Məhəmməd Cavad Zərifdir.
Bu komandanın ABŞ ilə münasibətləri qaydaya salacağına ümidlər vardı. Lakin ABŞ-də ötən prezidentliyi dönəmində İrana qarşı sərt tutm sərgiləmiş Donald Tramp yenidən hakimiyyətə gəldi”.
Həmsöhbətimiz diqqətə çatdırıb ki, türk dilində danışan azərbaycanlı Prezident Azərbaycan və Türkiyə ilə münasibətləri qaydasına qoymalı idi:
“Pezeşkianın prezident seçilməsindən 7 ay keçib, hələ də qoyulan hədəflərə nail olunmayıb. Yalnız türk dövlətlərinə münasibətdə yumşalma hiss olunur. Amma hələ də türk dilində və digər qeyri-fars dillərində məktəblər açılmayıb.
Arada türk dilində şeirlər söyləsə də, Pezeşkianın bu problemin həlli istiqamətində ciddi addımlar atacağı real deyil. Azərbaycan türklərinin başını dil məsələsi ilə aldadıb səs toplayıb, reytinq də yığıb, amma İran təkcə türklərdən ibarət deyil. Ölkədə iqtisadi böhran dərinləşir. Əhalinin alıcılıq qabiliyyəti aşağı düşüb, yoxsulluq artıb. Kasıb əhalinin başını milli şüarlarla qatmaq olar, amma bu, limit bir gün bitəcək”.
Ekspert hesab edir ki, ABŞ-nin təzyiqləri güclənərsə, İranda siyasi böhran qaçılmaz olacaq:
“Donald Tramp İrana və onun Yaxın Şərqdəki proksi qüvvələrinə qarşı hər zaman sərt olub. Onun İrana qarşı iqtisadi sanksiyaları daha gücləndirəcəyi ehtimal edilir.
Bu halda İranın adekvat davranmaqdan başqa yolu qalmayacaq. Sülhpərvər və humanist prezident imicli Pezeşkianın iqtidarda möhkəmlənməsi də real görünmür. Mühafizəkarlar onu hakimiyyətdən kənarlaşdırmağa və ABŞ-yə qarşı daha sərt bir şəxsi gətirməyə çalışacaqlar”.
Onun sözlərinə görə, Pezeşkian yalnız bir halda uğursuzluqdan yaxa qurtara bilər:
“O, seçkidən öncə söylədiyi islahatları davam etdirsə, qeyri-fars millətlərinin ana dili hüququnu bərpa etsə, “vilayəti-fəqih” sistemini sıradan çıxarmağa nail olsa, özünü də, İran xalqını da xilas etmiş olacaq. İranın etnik yapısı ilə bağlı ən ədalətli status-kvo 3 dilin: fars, türk və ərəb dillərinin rəsmi dil elan olunmasıdır.
Hazırda SEPAH daxilində də narazı generallar var. Onlar da bu sistemin ömrünü bitirdiyini görürlər. Pezeşkian onların dəstəyini alaraq hazırkı rəhbər sistemini aradan qaldırmalıdır. Yəni xomeynizmin ömrü bitmək üzrədir. Qanlı inqilablardan yan keçmək üçün yuxarıdan dinc islahatlar vacibdir”.
Ağ Evdə ABŞ Prezidenti Donald Tramp və vitse-prezident Ceyms Devid Vens ilə Ukrayna Prezidenti Volodimir Zelenski arasında baş vermiş məlum qalmaqala aid yeni epizodlar üzə çıxır. Əslində diplomatiya tarixində bu səviyyədə rüsvayçı görüş olmamışdı. ABŞ-dən dəstək alan, bölgədə onun siyasətini həyata keçirən Ukrayna liderinin Oval sarayda belə bir vəziyyətə düşməsi təəcüblü idi.
Bu sözləri Teleqraf-a “Bakı” politoloqlar klubunun rəhbəri, siyasi ekspert Zaur Məmmədov Oval saraydakı məlum qalmaqalı şərh edərkən deyib.
“Bu Tramp və Vens tərəfindən Zelenskiyə qarşı olan hiddət və qəzəbin nəticəsi idi. Vens Ukrayna prezidenti və Avropa liderlərinə qarşı qəzəblidir. O hətta senatda Rusiya əleyhinə olan qərarlara qarşı çıxırdı. İndi isə özünü sanki Rusiya prezidenti Vladimir Putin kimi aparır. Belə davranışlar ABŞ-in mövqeyinə zərbədir. Zelenskiyə, Ukraynaya münasibətdən asılı olmayaraq Amerikanın növbəti dəfə partnyorunu meydanda tək qoyması yaxşı əlamət deyil”, - o qeyd edib.
Politoloq Zelenskinin Ağ Evdə bir neçə dəfə təhlükəsizlik zəmanəti kimi ifadələrdən istifadə etməsinə diqqət çəkib: “ABŞ ilə Ukrayna arasında razılaşma imzalansa, bu, birbaşa təhlükəsizlik zəmanəti olardı. Amerika Ukraynada mineral yataqlarda həyata keçirəcəyi işlər fonunda ərazidə sabitliyin olmasına çalışacaqdı. Ola bilsin ki, Zelenski Oval sarayda ABŞ-lə həmin sazişi imzalamaqda maraqlı olmayıb”.
“Ukrayna ciddi böhranla üz-üzədir. Avropa ölkələri, Britaniya Kiyevə hərbi kontingent göndərməyəcəksə və ABŞ ilə həmrəylik olmayacaqsa, ölkənin vəziyyəti çətinləşəcək. Hətta qərb rayonlarına da təhlükə yarana bilər. Sözsüz ki, Trampla Zelenski arasında olanlar Amerika ətrafında dövlətlərin sayının azalması, Avropanın Rusiya ilə yaxınlaşmasına səbəb olacaq. MDB məkanında olan dövlətlərin Rusiya ilə bağlı yeni qərarlar qəbul etməsi ilə nəticələnəcək”, - Zaur Məmmədov bildirib.
Qeyd edək ki, fevralın 28-də Ağ Evdə ABŞ Prezidenti Donald Tramp və vitse-prezident Ceyms Devid Vens ilə Ukrayna dövlət başçısı Volodimir Zelenski arasında diplomatik qalmaqala səbəb olan mübahisə baş verib. Nəticədə, Zelenski ABŞ səfərini yarımçıq qoyaraq Londona gedib.
Erməni bloger İşxan Verdyan Azərbaycan Prezidenti İlham Əliyevə müraciət edərək, siyasi sığınacaq istəyib.
Axar.az xəbər verir ki, o, bu barədə Teleqram kanalında məlumat yayıb.
“Hörmətli cənab Prezident, nəzərinizə çatdırım ki, Qarabağı Azərbaycan ərazisi olaraq açıq şəkildə tanıdığım üçün Ermənistanda mənə qarşı cinayət işi açılıb. İrəvan Azərbaycan və Ermənistanın suverenliyinin qarşılıqlı tanınması lehinə çıxış etdiyimə, həmçinin “artsax” kvazi-dövlət qurumu və onunla bağlı hər şey haqqında tənqidi bəyanatlarıma görə mənə ömürlük həbs cəzası vermək istəyir. Onu da nəzərinizə çatdırım ki, Ermənistana qayıtmağım istər-istəməz həbsimə gətirib çıxaracaq və barəmdə elan olunmuş beynəlxalq axtarış Ermənistanda həbsxanadan başqa istənilən yerdə mənə qapıları bağlayır.
Hörmətli cənab Prezident, mövcud reallıqları nəzərə alaraq və qaçılmaz repressiyalarla bağlı səbəblərə görə vətəndaşlığım olduğu ölkəmə qayıtmağımın mümkünsüzlüyünü nəzərə alaraq, Azərbaycanda siyasi sığınacaq vermənizi xahiş edirəm. Hörmətlə, İşxan Verdyan”, - o qeyd edib.
PKK terror təşkilatının bu ilin aprel ayında özünü buraxmaq üçün qurultay keçirəcəyi gözlənilir.
Məlumatı “Haber Global” yayıb.
Bildirilib ki, ötən həftə qruplaşmanın başçısı Abdulla Öcalan təşkilata özünü buraxıb tərksilah olunmaqla bağlı müraciət etmişdi. Məlumata görə, Öcalanın da qurultayda iştirak edəcəyi ehtimal olunur.
Fevralın 13-də - Rusiyanın Ukraynaya tammiqyaslı hücum başlatmasının üçüncü ildönümü ərəfəsində ABŞ Ədliyyə Departamenti bir Ohayo şirkəti ilə bağlı üç nəfəri həbs etdiyini açıqlayıb. Onlar ABŞ qanunlarını pozaraq toplam dəyəri 2 milyon dollar olan mülki təyyarə hissələrini Rusiyaya ixrac etməkdə suçlanırlar.
ABŞ fərd və qurumları son üç ildə, azı, beşinci dəfədir Rusiyaya təyyarə hissələri göndərmək üçün sxem qurmaqda ittiham edir. Bu sonuncu halda suçlananların hər üçü Rusiyaya təyyarə hissələri satan bir şirkətin filialı olan "Flighttime Enterprises"in indiki və keçmiş işçiləridir.
Dərin böhran var
Qaçaqmalçılıq hallarının artması Rusiyada mülki aviasiya sahəsində yaranmış geniş və dərin böhrandan xəbər verir.
Berkli Risk və Güvənlik Laboratoriyasının direktoru Lea Uolker deyir ki, Çin də ABŞ aviasiya sənayesini hədəf alır, ancaq əqli mülkiyyəti oğurlamaqdan ötrü kiber üsullardan yararlanır. Rusiya isə ehtiyat hissələri qaçaqmalçılıq yolu ilə əldə etməyə üstünlük verir.
ABŞ-də istehsal olunan "Boeing" və Aİ-də istehsal olunan "Airbus" təyyarələri Rusiya kommersiya donanmasının 2/3-ni təşkil etsə də, sərnişinlərin 90 faizə qədərini daşıyır. Bütün təyyarələr kimi, onların da sertifikatlı mütəxəssislər tərəfindən müntəzəm yoxlanmaya və rəsmi ehtiyat hissələrindən istifadə edilməklə təmir olunmağa ehtiyacı var.
Qərbin sanksiyaları bu təyyarələrə xidmət göstərilməsini və onların hissələrinin yenilənməsini mümkünsüz edir. Bu da Rusiya hava şirkətlərini ağır seçimlər qarşısında qoyur. Onlar ya yoxlama və təmir vaxtı çatan təyyarələri qalaqlayıb bir yerə yığmalı, sanksiyaların bitməsini gözləməli, ya sərnişinlərin həyatını təhlükəyə atmaq riski qarşısında təyyarələrdən istifadəni davam etdirməli, ya da sertifikatlı ehtiyat hissələrini qaçaqmalçılıq yolu ilə ölkəyə gətirib, qanunu pozaraq mütəxəssislərə pul verməklə təyyarələrin texniki baxış və təmirini gerçəkləşdirməlidirlər.
Əsasən, son iki variant seçilib
Rusiya hava şirkətləri, əsasən, son iki variantı seçib. Nəticələr göz önündədir. Avadanlıq və mühərrikin sıradan çıxması kimi hallara get-gedə daha çox rast gəlinir.
Təkcə dekabrın 1-dən yanvarın 20-dək Rusiya mülki təyyarə parkında 11 təyyarənin mühərriki sıradan çıxıb. Bundan öncəki iki ay ərzində cəmi beş belə hal qeydə alınıb.
Yanvarın əvvəlində "Ural Hava Yolları" şirkətinin "Airbus A321" təyyarəsi Misirdə məşhur kurort şəhərlərindən birindən Yekaterinburqa yola düşərkən, mühərriki sıradan çıxdığı üçün hava limanına qayıtmalı olub. Olay zamanı heç kim xəsarət almayıb. Sanksiyalar "Ural Hava Yolları"nın rəsmi mütəxəssislər dəvət edərək mühərrikə baxış keçirməsinə imkan verməyib.
"Çox güman, təyyarə sanksiyalar aradan qaldırılanadək, ya da "Ural Hava Yolları" onu satanadək elə Misirdə paslanacaq", - bir rusiyalı pilot AzadlıqRadiosunun rus xidmətinə belə deyib.
Rusiyanın Novosibirsk vilayətinin Ubinskoye kəndi yaxınlığında qəza enişi edən "Ural Hava Yolları" təyyarəsi.
"Novaya Gazeta Europe" yazır ki, Rusiyada aviasiya insidentləri ötən il 25 faiz artıb. İlin ilk 11 ayında 208 belə insident baş verib. 2023-cü ilin eyni dövründə bu göstərici 161 olub. Ötən ilin rəqəmi hələ hesablanmayıb.
Azı, 90 belə insidentdə sistem pozuntuları üzündən təyyarəni yerə endirmək gərəkib. Bu halların çoxunda mühərrik və enmə avadanlığında nasazlıqlar qeydə alınıb.
Aviasiya mütəxəssisləri sanksiyalar aradan qaldırılmazsa, texniki baxış aparılmadığından bu il durumun daha da pisləşəcəyini düşünürlər.
Hər 18-24 aylıq, yaxud 3-6 min saatlıq uçuşdan sonra təyyarələrin strukturu, sistem və hissələri çox ciddi texniki baxışdan keçirilməlidir. Bu cür yoxlamalarda təyyarə bir neçə həftə boyunca istismarda olmur.
Hər 6-12 ildən bir təyyarələr sökülür, ehtiyat hissələri yoxlanır, gərəkirsə, təmir edilir, ya da əvəzlənir. "D Check" adlanan bu proses iki ayadək sürə bilər.
Ancaq bunların heç biri təyyarəni istehsal edən şirkətlərlə birbaşa əməkdaşlıq olmadan mümkün deyil. Bir rusiyalı uçuş güvənliyi eksperti AzadlıqRadiosunun rus xidmətinə deyib ki, sanksiyaların dördüncü ilinə qədəm basıldığı indiki dövrdə Rusiyanın mülki aviasiyası böhran nöqtəsinə gəlib çatıb.
Bu il Rusiya təyyarələrinin çoxunun qanuni istismar müddəti bitir?
"Əlimdə bütün Rusiya təyyarələrinin ömrünə dair dəqiq bilgi yoxdur, ancaq 2025-ci il onların çoxu üçün qanuni istismarın sonuncu ili olacaq". AzadlıqRadiosu rus xidmətinin materialları əsasında Todd Prinsin hazırladığı bu yazıda istinad edilən digər mütəxəssislər kimi, o da anonimlik şərtiylə danışıb.
Rusiya hava şirkətləri ABŞ və Avropadakı qeyri-rəsmi qaynaqlardan ehtiyat hissələrini qaçaqmalçılıq yolu ilə əldə etmək, qeyri-rəsmi texniki baxış aparmaq və uçuş tezliklərini azaltmaqla təyyarələrin istismar müddətini uzatmağa çalışır.
Əksər hallarda bu hissələr Türkiyə, Ermənistan və Qazaxıstan kimi üçüncü ölkələr vasitəsilə keçirilib.
Ukraynanın Krım bölgəsini Rusiyanın ilhaq etməsi və Donbas bölgəsində münaqişə yaratmasının ardınca son 10 ildə Moskva ilə Qərbin münasibətlərində gərginlik çoxalıb. Kreml ABŞ və Avropa təyyarələrindən asılı olmamaq üçün yerli aerokosmik sənayesinə investisiyalarını artırıb.
Bu gün Rusiyanın mülki təyyarə donanması 700 xarici təyyarədən və 150 "Sukhoi Superjet"dən ibarətdir. Ancaq sanksiyalar yerli təyyarələrə də təsir göstərir, axı onların da istehsalında Qərbin ehtiyat hissələrindən istifadə edilir.
"Superjet"in füzelyajı və qanadları Rusiyada hazırlanır, ancaq təyyarənin əsas hissələri – mühərrikləri, avionikası, elektrik sistemləri, eniş avadanlığı, yanacaq sistemləri Qərb istehsalçılarından gəlir.
Rusiya istehsalı olan PD-14 mühərrikli M-21-310 sərnişin təyyarəsi İrkutskda sınaq uçuşu zamanı.
Yerli istehsal təyyarələrin də ehtiyat hissələri Qərbdən gətirilməlidir
"Superjet"in C və D yoxlamaları Rusiya daxilində aparıla bilsə də, yenilənmə üçün gərəkən ehtiyat hissələr yenə Qərbdən gəlməlidir. Hava Yolları onları əldə etməkdə çətinlik çəkir.
"Həm xarici təyyarələr, həm də "Superjet"lər son nəticədə ehtiyat hissələri çatışmadığından yerdə qalacaq. "Superjet"lər yalnız bir il daha artıq davam gətirəcək", - daha bir uçuş güvənliyi ekspertinin sözləridir.
Rusiya Qərb aerokosmik texnologiyalarından asılılığını azaltmaq üçün MC-21 adlı yeni yerli təyyarə istehsal etməyi planlaşdırır.
2022-ci ildə hazırlanan hökumət planına əsasən, Rusiya 2030-cu ilədək 1036 təyyarə istehsal etməli idi. Onların arasında 270 MC-21, 142 "Superjet", 70 Tu-214 də olmalıydı.
Ancaq Qərbin qoyduğu texnoloji sanksiyalar, qismən də resursların müharibənin ehtiyaclarına yönləndirilməsi üzündən kütləvi istehsal illərlə ertələnib.
"Biz təyyarənin gövdəsini hazırlamaqda çox yaxşıyıq – sovet füzelyajları və qanadları ən güclüdür. Ancaq sanksiyalar üzündən mühərrik və avionikamız yoxdur", - rusiyalı pilot belə deyir.
Texnoloji baza yetərsizdir
MC-21-lərin xarici hissələrini dəyişmək xüsusilə çətindir. Təyyarə Amerika mühərrikləri və avionikası ilə dizayn olunub. Onları əvəzləmək üçün Rusiyanın texnoloji bazası yetərli deyil.
"Mühərrik texnologiyası sahəsində biz 40 il geridəyik. Mürəkkəb materiallarla bağlı durum da elədir", - bunu uçuş güvənliyi eksperti vurğulayıb.
Rusiyanın böhran içərisində olan bir çox digər yerli sektoru kimi, bu sahədə də rusiyalılar öz təyyarə mühərriklərini istehsal edən Çinə üz tuta bilərlər. Ekspertlərə görə, Çin Rusiyanı güvənli mühərriklərlə təchiz edə bilsə, MC-21-in gələcəyi ola bilər, ancaq bu 2029-cu ildən tez baş verməyəcək.
Çinin C919 təyyarəsində hazırda Qərb mühərriklərindən istifadə olunur. Bu da onu Rusiya üçün əlçatmaz edir. Ancaq Çin bu il, yaxud gələn il yerli mühərrik istehsal etməyi planlaşdırır.
"Son nəticədə Çinin təcrid olunmuş dövlətlər – İran, Şimali Koreya və Rusiya üçün təyyarəsi olacaq", - AzadlıqRadiosuna danışan ekspertlərdən biri belə deyib.
pressklub
Rusiya Təhlükəsizlik Şurasının sədr müavini Dmitri Medvedev Ukrayna prezidenti Vladimir Zelenskini və Avropa İttifaqının (Aİ) rəhbərliyini təhqir edən yazı dərc edib.
Publika.az xəbər verir ki, Medvedev “VKontakte” sosial şəbəkəsində Zelenskinin və Aİ rəhbərliyinin ünvanına 7 müxtəlif təhqiramiz ifadə işlədib.
O, Ukrayna prezidentini “legitimliyini itirmiş qüllə”, “yarımçıq fürer”, “köhnəlmiş kloun” və “köhnəlmiş Kiyev mələyi” adlandırıb.
Rusiyalı siyasətçi Avropa İttifaqının dövlət başçılarını isə “yazıq avropalı havadarlar”, “qoyma dişlərini nümayiş etdirən ağbirçək” adlandırıb. Təhlükəsizlik Şurasının sədr müavini sözügedən geosiyasi məkanı “soyuq Avropa” adlandırıb.
Dmitri Medvedevin sözlərinə görə, Aİ-də “əsl anti-Tramp sui-qəsdi” hazırlanır. O əlavə edib ki, Avropa liderləri arasında razılaşmaların nəticələri tamamilə gözlənilməz ola bilər.
ABŞ artıq Ukrayna ilə kəşfiyyat məlumatlarını bölüşməkdən imtina edir. Lakin Vaşinqton məlumatları NATO müttəfiqlərinə ötürməkdə davam edir.
Bu fikirlər "Financial Times"da dərc olunan məqalədəndir. Nəşr Britaniya rəsmilərinə istinad edib.
Müəllif yazıb ki, Vaşinqton bir müddət öncə gözlənilmədən Ukraynaya gedən kəşfiyyat "kanallarını" dondurub: "Amma ABŞ hələ də ən yaxın müttəfiqlərinə, o cümlədən Britaniyaya Rusiya və Ukrayna ilə bağlı kəşfiyyat məlumatları təqdim edir”.
"Daily Mail" qəzeti də öz mənbələrinə istinad edərək kəşfiyyatla bağlı yayılan məlumatların doğru olduğunu yazıb: "Bəli, ABŞ Britaniyaya belə Amerika kəşfiyyat məlumatlarının Ukraynaya verilməsinə qadağa qoyub".
Məqalədə qeyd edilib ki, Böyük Britaniya ilə yanaşı, Kiyevin Avstraliya və Yeni Zelandiya kimi digər Qərb müttəfiqləri də Amerika kəşfiyyatının informasiyalarını Ukrayna ilə bölüşürmüş.
Xatırladaq ki, bir neçə gün öncə Vaşinqtonda olan Zelenski ilə Tramp arasında siyasi və diplomatik qalmaqallar yaşanıb. Siyasətçilərin sərt mübahisələri bağlı qapılar arxasında deyil, jurnalistlər qarşında olub.
Bundan sonra Donald Tramp Ukraynaya bütün hərbi yardımların dayandırılmasına dair əmr imzaladı. Ağ ev-in əmrlə bağlı bəyanatında deyilir ki, "prezident açıq şəkildə sülhü hədəflədiyini elan edib. Biz tərəfdaşlarımızın da bu məqsədə sadiq qalmasını istəyirik. Biz yardımımızı dayandırırıq və onun həllə töhfə verməsini təmin etmək üçün nəzərdən keçiririk”.
AzVision.az