 |
|
|
Ukrayna pilotsuz təyyarələri Rusiya aerodromlarına hücum etdikdən sonra Rusiya ən qiymətli hərbi təyyarəsini Ukraynadan çıxarıb.
TEREF xəbər verir ki, bu barədə “The Telegraph” yazıb.
Məlumata görə, ruslar iki Tu-160 strateji bombardmançı təyyarəsini cəbhə xəttindən 4000 mil (təxminən 6437 kilometr) uzaq “Anadır” aviabazasına köçürüb.
Maraqlıdır ki, ona yalnız hava və dəniz yolu ilə çatmaq olar, bunu peyk görüntüləri sübut edir. Nəşr qeyd edir ki, bu aerodrom Alyaskadan təqribən 660 km məsafədə, yaşayış olmayan Çukotka yarımadasında yerləşir. O, Soyuq Müharibə dövründə - Rusiyanı Amerika Birləşmiş Ştatlarının potensial hücumlarından qorumaq üçün yaradılıb.
"Tu-160 səsdən sürətli bombardmançı təyyarələri nüvə silahı daşıya bilir və Rusiya arsenalında ən bahalısıdır, birinin qiyməti təxminən 500 milyon dollardır. Müqayisə üçün, Amerika bombardmançı donanmasının əsasını təşkil edən B-52 Stratofortress təxminən 94 milyon dollar dəyərində qiymətləndirilir", - müəlliflər vurğulayıblar.
Lakin Tu-160-lar təkcə bahalı bombardmançılar deyil, həm də olduqca nadirdir. Rusiyada bu təyyarələrdən yalnız 16-nın xidmətdə olduğu güman edilir. Bununla belə, Ukrayna bu Tu-160-ların bəzilərinin “Hörümçək toru” əməliyyatı çərçivəsində 1 iyun hücumu zamanı zədələndiyini bildirib.
Kral Birləşmiş Xidmətlər İnstitutunun hava qüvvələri üzrə baş elmi işçisi, professor Castin Bronkun qeyd edib ki, “Anadır” bazasından alınan görüntülər Kremlin "sonrakı dron hücumları riskini azaltmağa çalışdığını" göstərə bilər.
Publika.az
ABŞ İsrailin İrana qarşı həyata keçirdiyi hərbi hücumlarda nə iştirak etdiyini, nə də hər hansı bir yardım göstərdiyini bəyan edib.
Musavat.com xəbər verir ki, bu barədə ABŞ dövlət katibi Mark Rubionun açıqlaması CNN telekanalı vasitəsilə yayımlanıb.
“Bu axşam İsrail İrana qarşı birtərəfli hərbi əməliyyatlar həyata keçirdi. ABŞ bu hücumlarda iştirak etməyib və heç bir yardım da göstərməyib. Hazırda bizim əsas prioritetimiz regionda yerləşən amerikalı hərbçilərin təhlükəsizliyidir,” – deyə Rubio bildirib.
O əlavə edib ki, İsrail bu əməliyyatların özünü müdafiə məqsədilə həyata keçirildiyini ABŞ tərəfinə bildirib.
“Prezident Tramp və onun administrasiyası regiondakı qüvvələrimizin qorunması və tərəfdaşlarımızla sıx koordinasiyanın təmin olunması üçün bütün zəruri addımları atıb,” – deyə dövlət katibi vurğulayıb.
Rubio həmçinin İranı ABŞ maraqlarına və hərbi personalına qarşı istənilən hücumdan çəkinməyə çağırıb:
“Bunu aydın şəkildə bildirmək istəyirəm – İran ABŞ-ın maraqlarına və ya personalına qarşı hücum etməməlidir".
Musavat.com
Səudiyyə Ərəbistanı və Oman İsrailin İrana qarşı hücumunu qınayıb.
Musavat.com xəbər verir ki, Oman bu hadisəyə reaksiya verən ilk ərəb dövləti olub.
Səltənət rəsmiləri bildiriblər ki, hücum diplomatik səylərə zərbə vurur və bölgədə sabitliyə ciddi təhlükə yaradır.
Qeyd edək ki, Oman uzun müddətdir Vaşinqtonla Tehran arasında vasitəçi kimi çıxış edir və İranın nüvə proqramı ilə bağlı danışıqlarda mühüm rol oynayır.
Musavat.com
Demokrat senator Aleks Padilla Daxili Təhlükəsizlik nazirinin iştirak etdiyi Los-Ancelesdəki tədbirdə qandallandı.
Senator Aleks Padilla Daxili Təhlükəsizlik nazirinin mətbuat konfransını qısa müddətə dayandırmışdı.
azadlıq.az
Gürcüstan hökuməti Avropa Birliyi ölkələrinin üz-üzə gəlməkdən qorxduğu heyvandır.
Sitat.info xəbər verir ki, bu sözləri Macarıstanın Baş naziri Viktor Orban Budapeştdə gürcü həmkarı İrakli Kobaxidze ilə danışıqlardan sonra keçirilən mətbuat konfransında deyib.
"Hələ 2022-ci ildə qlobal liberallar ölkələrimizin indiki hökumətlərini qoruyub saxlamasına mane olmaq üçün - həm sizdə, həm də burada - vəziyyəti sabitsizləşdirməyə çalışdılar. Gürcüstan hökuməti Brüsselin üzləşməkdən qorxduğu heyvandır. Müqavimət göstərmək qərarına gələn ilk Gürcüstan oldu. Və bu hiss bizə yaxındır", - deyə Orban bildirib.
Macarıstanın baş naziri həmçinin Gürcüstanın iqtisadi artımını Budapeştin də əldə etmək istədiyi heyranedici nailiyyət adlandırıb.
Moskva Azərbaycanın Donetsk və Luqansk “xalq respublikaları”, Xerson və Zaporojye vilayətləri, eləcə də Krımı Rusiya ərazisi kimi tanıyacağına ümid edir. Bu barədə RIA Novosti öz mənbəsinə istinadla xəbər yayıb.
“Moskva, Azərbaycanın Xarici İşlər Nazirliyinin Rusiya prezidentinin köməkçisi Vladimir Medinskinin Qarabağla bağlı açıqlamasına reaksiyası fonunda, Bakının Moskvanın Ukraynada apardığı xüsusi hərbi əməliyyat və Krım, Sevastopol, DXR, LXR, Zaporojye və Xerson vilayətlərinin Rusiyaya məxsusluğu məsələsində yanaşmasının ədalətli olduğunu qəbul edəcəyinə ümid edir”, – agentliyin həmsöhbəti bildirib.
Adının açıqlanmasını istəməyən mənbə əlavə edib ki, Moskva Rusiya və Azərbaycan arasında müttəfiqlik münasibətlərindən çıxış edir. Bu münasibətlər 22 fevral 2022-ci il tarixində prezidentlər Vladimir Putin və İlham Əliyev tərəfindən imzalanmış Bəyannamə ilə rəsmiləşdirilib.
Xatırladaq ki, bundan əvvəl Azərbaycanın Xarici İşlər Nazirliyi Rusiya prezidentinin köməkçisi Vladimir Medinskini Qarabağ münaqişəsi ilə bağlı faktları təhrif etməkdə ittiham etmişdi. Bakı həmçinin Rusiyalı məmuru səlahiyyətlərini aşmamağa və aidiyyəti olmayan məsələlərə müdaxilə etməməyə çağırmışdı.
Maraqlıdır, Moskvanın üstüörtülü formada, “mənbə” adı ilə verdiyi açıqlama nə deməkdir? Bu, nəyə hesablanıb? Axı, Kreml çox gözəl başa düşür ki, iki ölkə arasında münasibətlər xeyli gərginləşib. Bunun səbəbi də məhz Moskvadır – Putinin Azərbaycanın “Embraer” sərnişin təyyarəsinin vurulmasında Rusiyanın günahını qəbul etmək, məsuliyyət daşımaq istəməməsinə görə. Üstəlik, Moskva Ukraynanın xarici işlər nazirinin Azərbaycana son səfərindən də xəbərdardır. Hansı ki, 2022-ci ilin fevraldan sonra Moldova və Baltikyanı ölkələr çıxmaq şərti ilə keçmiş postsovet respublikalarından heç biri belə qəbul həyata keçirməyib. Kremlin çox yaxşı bildiyi başqa məqam da var – Azərbaycan və Ukrayna arasında uzun illərdir mövcud olan və bu gün də davam edən strateji tərəfdaşlıq münasibətləri. Rəsmi Bakı həmişə Ukraynanın ərazi bütövlüyünü dəstəklədiyini bəyan edib və bunu indi də edir.
Bu şəraitdə Rusiyanın Azərbaycana Ukraynaya qarşı silahlı təcavüzü və onun işğal etdiyi ərazilərin Rusiyaya məxsusluğu ilə razılaşmağı təklif etməsi necə başa düşülməlidir? Moskvada kimsə Azərbaycan rəhbərliyi ilə münasibətləri tamamilə korlamaq istəyir? Bəs bunun məqsədi nə ola bilər?
Pressklub.az mövzu ilə bağlı tanınmış xarici ekspertlərin rəyini öyrənib.
Kiyev Dünya Siyasəti İnstitutunun direktoru Yevgeni Maqda bildirib ki, son vaxtlar Rusiyanın təşəbbüslərini görəndə onda yalnız bir sualı yaranır: niyə bu təşəbbüslər hansısa ölkənin rəhbərliyini “Tanrı, çarı qoru” oxumağa və ya Kremlin çaldığı mahnıya oynamağı nəzərdə tutmalıdır?
“Məsələ ondadır ki, Rusiya öz hərəkətləri, bəyanatları və mövqeyi ilə paralel siyasi reallıq yaratmağa çalışır. Məntiqdən uzaq, sağlam düşüncəyə zidd olan paralel dünya. Mənə hazırkı dövrdə hansısa siyasətçinin bu cür təklifləri ciddiyə ala biləcəyini təsəvvür etmək çətindir. Axı, sağlam düşüncəsi olan istənilən siyasətçi başa düşür ki, həyat sabah bitmir və Rusiya da son instansiyası deyil. Ona görə də, Rusiyanın təkliflərini ciddiyə almayacaq. Azərbaycanın rəhbərliyinin də bu “böyük imperiya axmaqlığını” ciddiyə almayacağına azacıq da olsa şübhəm yoxdur. Bu, sadəcə tarix üçün qalacaq. Bir müddət sonra isə hüquqi araşdırmalar mövzusu olacaq. Nəticə belə olacaq”, – deyə Maqda bildirib.
Gürcüstan Strateji Analiz Mərkəzinin (GSAC) aparıcı eksperti Gela Vasadze isə qeyd edib ki, Azərbaycanla Ukrayna arasında strateji münasibətlər 2022-ci ildə də olub. Amma bu, Moskvanın Bakı ilə Müttəfiqlik haqqında Bəyannamə imzalamasına mane olmadı. Ona görə də hesab edir ki, əsas məsələ keçmiş yox, indiki vəziyyətdir.
“Hazırda biz Rusiyanı mənfi mənada izləyirik. Kreml Trampın prezident postuna qayıtmasından da istifadə edə bilmir. Onun son ümidi Cənubi Qafqaz və Mərkəzi Asiyada Çinin maraqlarının keşiyində durmaqdır. Halbuki, Bakı Çin ilə münasibətləri Moskvanın vasitəçiliyi olmadan, müstəqil şəkildə özü də uğurla inkişaf etdirir.
Rusiya zəiflədikcə Avrasiya məkanında geosiyasi funksiyasını itirir. Buna görə də Kreml əsəbiləşib və Bakıya guya sərt mesajlar ötürməyə çalışır – guya vəziyyət dəyişə bilər. Bakı isə mənalı şəkildə susur. Bu susqunluq isə o deməkdir ki, vəziyyət dəyişəndə, gəlib danışarsınız”, – Vasadze fikrini tamamlayıb.
Rauf Orucov
İsrail İran ərazisinə, o cümlədən yaşayış binalarına zərbələr endirib.
“Report” “İRNA”ya istinadən xəbər verir ki, bunu İran Baş Qərargahının sözçüsü, briqada generalı Əbülfəzl Şekarçi bəyan edib.
Onun sözlərinə görə, Tehran İsrailin ABŞ-nin dəstəyi ilə həyata keçirdiyi hücumlara sərt cavab verəcək.
Qeyd edək ki, İsrail Hərbi Hava Qüvvələri Tehran yaxınlığındakı hərbi bazalara, o cümlədən Natanz nüvə obyektinə hücum edib.
Aleksandr Xara: “Kalininqrad regionu Kreml üçün Baltikyanı ölkələrə çıxış, eləcə də Rusiya nüvə qüvvələrinin yerləşdirilməsi üçün vacibdir”
“Rusiyanın Ukraynada “yay hücumu”nu gözləyərkən unutmaq olmaz ki, Rusiya Federasiyası strateji məqsədə - NATO-nun faktiki məhvinə nail olmaq üçün həm hibrid üsullardan, həm də birbaşa təcavüzdən istifadə edə biləcəyi bir neçə, potensial məqamlar var. Məsələn, təcavüzün hədəfi Estoniya ola bilər. Yaxud da, Qara dənizdə ilk növbədə Rumıniyaya qarşı hansısa təxribatlar mümkündür. Amma Rusiya Federasiyasının öz təcavüzünü istiqamətləndirməyə cəhd edə biləcəyi ən çox ehtimal olunan vektorlardan biri Suvalki dəhlizidir. Axı Kalininqrad regionu Kreml üçün Baltikyanı ölkələrə çıxış, eləcə də Rusiya nüvə qüvvələrinin yerləşdirilməsi üçün vacibdir. Ona görə də burada aqressiyanın hibrid variantından – “rusdillilərin müdafiəsi” və ya “humanitar dəhlizin təmin edilməsindən” istifadə oluna bilər. Bu pərdə altında da Belarusun iştirakı ilə təcavüz mümkündür. Nəzərə almaq lazımdır ki, Belarusun Prezidenti Aleksandr Lukaşenko Çinə bu yaxınlarda etdiyi səfərdən sonra Kalininqrad qubernatoru ilə görüşüb və Rusiyanın bu regionuna ərzaq tədarükü ilə bağlı “danışıqlar” aparıb. Unutmayaq ki, Lukaşenkonun əslində Rusiyanın əmrindən imtina etmək variantı yoxdur”.
Bu sözləri ukraynalı ekspert Oleksandr Xara yazdığı analitik məqaləsində qeyd edib. Analitik hesab edir ki, potensial olaraq, Rusiya Federasiyasının seçimi bu cür təcavüzə əl atmaqdır: “Çünki burada bir neçə vacib amil var. Birincisi, Rusiyanın Ukraynaya qarşı müharibəsinin məqsədi təkcə Ukraynaya nəzarət etmək və Ukraynanın suverenliyini məhdudlaşdırmaq deyil, həm də Qərbin Ukraynaya dəstək verməməsi ilə bağlıdır. Əslində Moskva NATO-nun işləmədiyini göstərmək istəyir. Çünki məsələn, aqressiya varsa və heç bir reaksiya yoxdursa, bu, NATO-nun təşkilat olaraq artıq mövcud olmaması deməkdir. Gərginliyə səbəb ola biləcək ikinci amil, təbii ki, NATO-nun Avropa hissəsinin acınacaqlı vəziyyətidir. Bu günlərdə Alyansın baş katibi Mark Rutte bildirib ki, təşkilatın qarşıdan gələn sammitində müdafiə xərclərini artırmağa hazırlaşırlar. Nəzərə alsaq ki, bu cür qərarlar qəbul olunarsa, NATO-ya üzv ölkələr təhlükəsizliyə daha çox sərmayə qoymağa başlayacaqlar. Bununla da bir neçə ildən sonra Alyansın Rusiyanı daha çox cilovlamaq qabiliyyətinə malik olacağı aydındır. İndi isə prinsipcə, ehtiyatlı münaqişədə Rusiyanın üstünlüyü var”.
“ABŞ Milli Kəşfiyyatının direktoru Tulsi Qabbardın bəzi efemer qlobalist elitaların dünyanı nüvə münaqişəsinə sövq etməsi - o ad çəkməsə də, Rusiyanı nəzərdə tuturdu, - və bunu etmək mümkün olmadığı barədə bəyanatlarını nəzərə alsaq, bu, ABŞ-ın risk almağa hazır olmadığına işarədir”, - deyə Xara qeyd edib.
Onun sözlərinə görə, üçüncü amil isə ABŞ Prezidenti Donald Tramp faktorudur: “Əmin deyiləm ki, münaqişə baş verərsə, Tramp Estoniya və ya Litvaya kömək etməyə hazır olacaq. Onun Putinə pərəstişini, NATO-ya skeptisizmini və Rusiyanın NATO-nun şərqə doğru genişlənməsinin Rusiya-Ukrayna müharibəsinə səbəb olması ilə bağlı təbliğatını mahiyyətcə təkrarlayan ritorikasını nəzərə almaq lazımdır”.
“Ukraynaya gəlincə, NATO-nun Avropa hissəsi ilə Rusiya Federasiyası arasında münaqişə yaranarsa, müttəfiqlərimizin bütün diqqəti orada cəmləşəcək. Və təbii ki, bu, bizim üçün çox yaxşı deyil. Bundan əlavə, belə bir potensial eskalasiya üçün rusların Ukraynadan çoxlu qüvvələr çəkəcəyini gözləməməliyik. Mənə elə gəlir ki, onlar Avropa ölkələri ilə genişmiqyaslı münaqişənin olmasını istəmirlər. Ruslara güclü görünən və kollektiv təhlükəsizlik prinsipinə uyğun gələn bir şey lazımdır. Bunun üçün isə onlara ordu, korpus və yüz minlərlə əsgər lazım deyil. Bunun üçün bir neçə on minlərlə təlim keçmiş qoşun kifayətdir”, - analitik fikrini tamamlayıb.
Müəllif: Turan Abdulla
Azərbaycan Prezidenti İlham Əliyev rusiyalı həmkarı Vladimir Putini təbrik edib.
Gundeminfo.az məlumatına görə, təbrikdə deyilir:
"Hörmətli Vladimir Vladimiroviç.
Dövlət bayramı- Rusiya Günü münasibətilə səmimi təbriklərimi və xoş arzularımı qəbul edin.
Azərbaycan və Rusiya xalqlarını əsrlər boyu ənənəvi sıx dostluq, mehriban qonşuluq və qarşılıqlı dəstək münasibətləri birləşdirir. Bu gün həmin nəcib ənənələr dövlətlərarası əlaqələrimizin hərtərəfli inkişafı və məsələlərin geniş spektri üzrə əməkdaşlığın dərinləşdirilməsi üçün etibarlı bünövrədir.
Əminəm ki, dost xalqlarımızın və ölkələrimizin maraqları naminə biz bundan sonra da Azərbaycan-Rusiya münasibətlərinin möhkəmlənməsi, strateji tərəfdaşlıq və müttəfiqlik ruhunda çoxplanlı qarşılıqlı fəaliyyətin genişləndirilməsi üçün bütün səyləri göstərəcəyik.
Hörmətli Vladimir Vladimiroviç, bu əlamətdar gündə Sizə möhkəm cansağlığı və uğurlar, Rusiyanın bütün vətəndaşlarına isə əmin-amanlıq və tərəqqi arzulayıram".
ABŞ Prezidenti Donald Tramp etirazlar səbəbindən Milli Qvardiya qüvvələrinin Los-Ancelesə yeridilməsinin düzgün qərar olduğunu hesab edir.
İndex.az xəbər verir ki, o, bu barədə “Truth Social” sosial şəbəkəsində yazıb.
“Əgər bizim qoşunlarımız Los-Ancelesə girməsəydi, o, indi evlərin böyük hissəsi yandığı kimi, tamamilə yanıb kül olardı. Los-Ancelesin gözəl sakinləri çox şanslıdırlar ki, mən kömək etməyə qərar verdim!!!”, – o qeyd edib.
Daha əvvəl Pentaqon rəhbərinin xüsusi köməkçisi Brin Ullakott Makdonnell qoşunların yeridilməsinin ABŞ dövlət xəzinəsinə 134 milyon dollara başa gələcəyini bildirib.
İyunun 6-da Los-Ancelesdə qanunsuz miqrantların kütləvi saxlanılmasına başlanılıb, iyunun 7-si axşam saatlarına qədər miqrasiya qanunvericiliyini pozmaqda ittiham olunan ən azı 44 nəfər həbs edilib.