"Caliber” layihəsinin "YouTube” kanalında yayımlanan yeni süjet Laçın yolunda Azərbaycan nəzarət keçid məntəqəsinin qurulmasına həsr olunub.

"Bu o deməkdir ki, Ermənistandan Qarabağa hərbçilərin, silah və sursatın daşınması daha mümkün olmayacaq. Artıq bölgəyə erməni siyasətçiləri, məmurları da səfər edə bilməyəcəklər. Daha vacibi isə, artıq bizim ərazilərimizə ermənilərin xarici havadarları da baş çəkmək iqtidarında olmayacaqlar”, - deyə videomaterialda bildirilir.

Qeyd olunur ki, məhz bundan sonra inteqrasiya tərəfdarı olmayanlar kütləvi şəkildə bölgəni tərk etməyə başlayacaq və Ermənistana köç üçün uzun növbələr yaradacaqlar.

Daha ətraflı "Caliber”in süjetində:

Məhəmməd Əsədullazadə: “Sülhməramlılar gərəkən işləri görsəydilər, bütün bunlar baş verməzdi”

Rusiya prezidentinin mətbuat katibi Dmitri Peskov Azərbaycanın Laçın-Xankəndi yolunun başlanğıcında nəzarət-buraxılış məntəqəsi quraşdırmasını şərh edərkən bildirib ki, vəziyyət dərindən təhlil olunmalıdır:

“Rusiya Azərbaycanla Ermənistan arasında vasitəçilik etməkdə davam edir, lakin vəziyyət asan deyil. Bakı və İrəvan isə anlamalıdır ki, nizamlanma üzrə üçtərəfli sazişlərin bütün müddəalarına alternativ yoxdur. Rusiya bunun üzərində həm İrəvan, həm də Bakı ilə birgə fəaliyyətini davam etdirəcək. Biz təmasları davam etdiririk, vəziyyət həqiqətən çətindir, əlavə səylər tələb edir, ən əsası isə, qeyd olunan ölkələrin sözügedən sazişlərin həyata keçirilməsinə alternativ olmadığını başa düşməsidir”.

Bütün bu deyilənlərin fonunda, Peskovun və Rusiyanın Laçın yolunda nəzarət-buraxılış məntəqəsi məsələsinə reaksiyasını necə başa düşmək olar? Nə təhlil olunacaq ki?

“Bu bizim konstitusion hüququmuzdur və bundan ötrü Moskvadan icazə alası deyilik”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Rusiya Azərbaycanın nəzarət tədbirlərini gücləndirməsini istəmir: “Əvvəla, Rusiyanın Azərbaycanın Ermənistanla sərhəddə, Laçın yolunun başlanğıcında nəzarət-buraxılış məntəqələri qurması məsələsinə belə riyakar münasibət bildirməsi siyasi cəhətdən bizim üçün önəmli deyil. İlk növbədə ona görə ki, Azərbaycan özü öz təhlükəsizliyini təmin edir. Bu bizim konstitusion hüququmuzdur və bundan ötrü Moskvadan icazə alası deyilik. Nəzərə almaq lazımdır ki, məhz Rusiya sülhməramlı qüvvələrinin fəaliyyəti nəticəsində bu yoldan Ermənistan hərbi məqsədlər üçün istifadə edib. Əldə olunan razılaşmalara nə Rusiya, nə də Ermənistan əməl edir. Ermənistan bu yoldan hərbi məqsədlər üçün istifadə edərək yeni təxribatlara hazırlaşırdı. Əgər sülhməramlılar gərəkən işləri görsəydilər, bütün bunlar baş verməzdi. Ona görə də Azərbaycan özü addım atır və prosesi müsbətə doğru davam etdirir. Məhz Azərbaycan Laçın yoluna nəzarəti bərpa etməklə, İrəvanın planının qarşısını qətiyyətlə almış oldu. Xankəndidə oturan separatçıların Ermənistana sərbəst giriş-çıxışının qarşısının alınması labüddür. Rusiyanın mövqeyi və vasitəçilik missiyası artıq heç nəyi dəyişməyəcək. Məhz onların birbaşa himayəsi ilə proseslər böhrana gətirib çıxarır. D.Peskov birgə fəaliyyəti nəzərdə tutursa, iki ildir ki, bizim ərazimizdə Rusiyanın fəaliyyəti yalnız separatizmə dəstəkdən ibarət olub. Ona görə də nəzarət-buraxılış məntəqəsi ilə bağlı məsələlərində üçüncü ölkənin mövqeyinin də əks edilməsinə imkan verməməliyik. Rusiyanın burada mövqeyi praktiki olaraq gərginliyə gətirib. Hazırda isə Rusiya reallıqları qəbul etməlidir. Azərbaycanın öz ərazisində gördüyü işlərlə bağlı hansısa təhlildən söhbət gedə bulməz. Ona görə də Peskov yaxşı olardı ki, işlətdiyi cümlələrə fikir versin”.

Vidadi ORDAHALLI

“Biz birləşib türklərin qarşısını kəsməsək, İrəvana çatacaqlar”.

Hurriyyet.Az xəbər verir ki, bunu 2020-ci ilin noyabrında Şuşa şəhərindən “taktiki olaraq geri çəkilən”, özünü “Şuşa meri” adlandıran Artsvik Sarkisyan deyib.

“Biz cavab zərbəsi endirməyə hazırıq, lakin rus sülhməramlılarının müdaxiləsi ilə qarşımıza çıxır. Biz onları “yumruğumuzla əzib keçə bilərik”.

Çağırışım belədir: birləşək, yeni mübarizəyə başlayaq. Biz türkün üzünə vurmayana qədər bizi dinləməyəcəklər və geri çəkilməyəcəklər. Belə davam edərsə, onlar İrəvana da çatacaqlar”, – deyə Sarkisyan sərsəmləyib. \\KONKRET.az

2020-ci il 10 noyabr tarixli üçtərəfli Bəyanata zidd olaraq Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısının alınması məqsədilə və Ermənistan tərəfindən aprelin 22-də birtərəfli qaydada Azərbaycan ilə sərhəddə Laçın-Xankəndi yolunun girişində nəzarət buraxılış məntəqəsinin qurulmasına adekvat olaraq aprelin 23-ü saat 12:00-da Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulub.

Bu barədə Dövlət Sərhəd Xidməti məlumat yayıb.

Bildirilib ki, bu barədə Rusiya sülhməramlı kontingenti və Rusiya-Türkiyə Monitorinq Mərkəzinin komandanlıqlarına məlumat verilib.

“Ermənistanın baş naziri Nikol Paşinyan yenə də ənənəsinə sadiq qalaraq Azərbaycanın ərazi bütövlüyü ilə bağlı konkret mövqe ortaya qoymayıb. Deyib ki, beynəlxalq ictimaiyyət Ermənistanın ərazi bütövlüyünü tanısa, biz də Azərbaycanın ərazi bütövlüyünü tanıyacağıq. Cənab Prezident İlham Əliyevin də qeyd etdiyi kimi, vaxtilə “Qarabağ Ermənistandır və nöqtə” deyən Ermənistan bu gün “Qarabağ Azərbaycandır və nida” sözlərini təkrar etməlidir. Onlar Qarabağın adını çəkməməlidirlər”.

Bunu Teleqraf.com-a açıqlamasında politoloq Ramiz Alıyev bildirib. Onun sözlərinə görə, Paşinyanın ciddi psixoloji problemləri var: “Paşinyan çıxışlarında tez-tez “beynəlxalq ictimaiyyət” ifadəsini işlədir. Amma bilinmir ki, bu zaman erməni baş nazir konkret hansı qurumları nəzərdə tutur. Beynəlxalq təşkilatlar, BMT ölkələrin ərazi bütövlüyünü tanıyırlar. Ermənistanın da ərazisi bəllidir. Belə olan halda Paşinyan qeyd-şərtsiz olaraq Azərbaycanın ərazi bütövlüyünü tanımalı və buna hörmət etməlidir. Özünü dünyaya sülh tərəfdarı kimi təqdim edən Paşinyan bunu əməlində təsdiq etməlidir. Bir neçə gün öncə İrəvanda onun da açılışında iştirak etdiyi beynəlxalq idman yarışında Azərbaycanın bayrağı yandırıldı. Mən başa düşürəm ki, 44 günlük Vətən Müharibəsində aldıqları sarsıdıcı zərbə erməni toplumunda ağır psixoloji izlər buraxıb. İndi onların gücü bayraq yandırmağa, dumanlı havada yolunu azaraq Ermənistana keçmiş gənc əsgərlərə işgəncə verməyə çatır. “Bayraq yandırmaq” müharibədə uduzmuş əzik toplumlar üçün xarakterik “peşədir”. Maraqlıdır ki, hətta torpaqlarımız işğal altında olan dövrdə biz Bakıda keçirilən yarışlarda ermənilərin bayraqlarını yandırmadıq. Özümüzü çox soyuqqanlı apardıq. Ermənilər bu kopleksdən çıxa bilmirlər. Hətta ölkənin baş nazirinin iştirak etdiyi tədbirdə ona qarşı saymazyanalıq edirlər. İrəvanda bayrağımızın yandırılması, həmçinin Türkiyə bayrağı ilə birgə cırılaraq asılması Ermənistanın əsl simasını göstərir. Əgər Paşinyanın erməni cəmiyyətində hörməti olsaydı, heç kəs orada bu cür təxribata əl atmazdı. Paşinyan Ermənistan dövlətinin timsalında beynəlxalq yarışın təhlükəsizliyinin qarantıdır. Amma üzərinə düşən görəvi yerinə yetirə bilmədi. Bayrağı yandıran erməni əslində Paşinyanı təhqir etdi. Beynəlxalq idman qurumları İrəvanda baş vermiş o biabırçılığı beynəlxalq idman yarışına kölgə salan fakt kimi qiymətləndirdilər. Əgər Ermənistan hökuməti Azərbaycanla sülh müqaviləsi bağlamaqda səmimidirsə, bunu praktikada sübut etməlidir. Bayrağımıza hörmətsizlik edən şəxslər məsuliyyətə cəlb edilməlidir. Əks təqdirdə belə təəssürat yaranır ki, baş verən təxribat Paşinyanın kabinetində hazırlanıb”.

Politoloq onu da qeyd etdi ki, Ermənistan Azərbaycanla sərhəddə təxribat xarakterli əməllərdən imtina etməlidir: “Paşinyanın dedikləri ilə Ermənistanda Azərbaycana qarşı atılan addımlar üst-üstə düşmür. Unutmasınlar ki, bugünki, Azərbaycan ordusu nəyinki 1992-1993-cü illər, hətta 2020-ci ildə Zəfər qazanmış ordumuzdan daha güclüdür. Ordumuzun güclənməsi üçün son iki ildə böyük işlər görülüb. Ordumuz baş verə biləcək bütün neqativ hallara qarşı hazırlıqlıdır”.