 |
|
|
Ukraynada İrana məxsus 6 pilotsuz uçuş aparatı (PUA) və Rusiyanın Su-25 qırıcısı vurulub.
UNİAN xəbər verir ki, PUA-ları Ukrayna Hərbi Hava Qüvvələri zərərsizləşdirib.
Rusiya İran istehsalı olan kamikadze-dronu “Geran-2” adı ilə istifadə edir.
Qeyd edək ki, İran hərbi dronlarının Rusiyaya çatdırılması ilə bağlı xəbərlər bu ilin iyul ayında yayılmışdı. BBC-nin məlumatına əsasən, bura birinci sinfə aid taktiki dronlar, kvadrokopterlər və təyyarələr, ikinci və üçüncü sinfə aid uçuş hündürlüyündən asılı olaraq “uzun uçuş müddətli” kimi təsnif edilən orta və ağır PUA-lar daxildir (MALE UAV və HALE UAV). Rusiyaya verilən “Mohajer-6” PUA-ları təsnifata görə ikinci sinfə aiddir.
Məlumata görə, iranlılar hələ 1990-cı illərin sonlarında onlardan Əfqanıstanda istifadə ediblər. Ümumi adına baxmayaraq, “Şahed-129” və “Şahed-191” çox fərqli PUA-lardır. Onlar Qərb istehsalının prototiplərindən fərqlidir. Belə hesab edilir ki, “Şahed-129” İran mühəndislərinin əlinə keçən İsrailin “Hermes 450” dronu əsasında yaradılıb. “Şahed-191” isə ABŞ-ın “Q-170 Sentinel” dronuna əsaslanır.
ABŞ və Fransanın Ermənistandakı səfirliklərinin öz vətəndaşlarını Azərbaycanla sərhəddən uzaq durmağa çağırması Ermənistanın yenidən Azərbaycana hücum etməyə hazırlaşmasının əlaməti kimi yozulmalıdır.
200-300 nəfərlik itkidən sonra Ermənistanın srağagün və dünən yenidən Azərbaycan mövqelərinə atəş açması Ermənistanın sakitləşmək fikrində olmadığını göstərir.
Ola bilsin ki, ABŞ və Fransadan Ermənistana açıq və gizli vəd edilən silahların ilk partiyası İrəvana çatdırılıb. Fransa və ABŞ ordularının təlimçilərinin Ermənistanda olmasını heç kim təkzib də etmədi. BMT TŞ-da müzakirələr də Ermənistanı şirnikləndirmiş ola bilər. Mümkündür ki, Ermənistana növbəti toqquşmaların olacağı təqdirdə Azərbaycanı işğalçı kimi tanıyan qətnamənin qəbul ediləcəyi vədi də verilib.
12-13 sentyabr döyüşlərindən sonra ABŞ və Fransanın Ermənistana verdiyi siyasi dəstək də Ermənistanı müharibəyə şirnikləndirən faktorlardan biri ola bilər.
Azərbaycan Qərb silahlarına qarşı tətbiq edə biləcəyi yeni silahlar əldə etmək haqda düşünməlidir. Ermənistan artıq Rusiyanın yox, ABŞ və Fransanın ön cəbhəsidir. Azərbaycanın hazırlıqları buna qarşı olmalıdır. Paralel olaraq dünya və daxili ictimai-siyasi rəyində Ermənistanın planlarıyla bağlı kommunikasiya işi qurulmalıdır.
Putin azərbaycanlıları da döyüşə göndərir-İki ölkə öz vətəndaşlarına Ukrayna ilə bağlı xəbərdarlıq etdi, bəs biz nə etməliyik?
Rusiya prezidenti Vladmir Putinin qismən səfərbərlik haqqında fərmanı ölkədə ajiotaj yaradıb. Sosial mediada yayılan xəbərlərdən görünür ki, əhalinin böyük əksəriyyəti bu xəbəri narazılıqla qarşılayıb.
Yenixeber.org: Dünən paytaxt Moskva da daxil olmaqla bir neçə iri şəhərdə kütləvi etiraz aksiyaları keçirilib. Minlərlə insanın qatıldığı anti-rejim aksiyalarında Putin hakimiyyətinin əleyhinə şüarlar səsləndirilib, habelə hakimiyyətdən Ukraynadakı işğalçı müharibənin dayandırılması tələb olunub.
Rusiya Daxili İşlər Nazirliyi etirazaçıların üstünə daxili qoşunları, habelə xüsusi hazırlıqlı polis qüvvələrini göndərib. Nəticədə nümayişlər zorakılıqla dağıdılıb, yüzlərlə aksiya iştirakçısı saxlanılıb. Sosial şəbəkələrdə yayılan məlumatlara görə dünən gün boyu mindən artıq rusiyalı saxlanılaraq polis bölmələrinə aparılıb.
Xatırladaq ki, səfəbərlik qərarı Rusiyadan kütləvi qaçışa da rəvac verib. Dünən gün ərzində Rusiya ilə viza rejimi olmayan Türkiyə və postosvet ölkələrinə təyyarə biletləri qısda müddətdə satılaraq bitib. Bəzi aviakompaniyalar bilet qiymətlərini hətta 10 min avroya qədər bahalaşdırıblar.
Rusiya bu müharibəyə həm də bu ölkədə yaşayıb, işləyən miqrantları da cəlb etməyə çalışır. Bu məqsədlə Rusiya vətəndaşlığı almaq üçün proseduralar xeyli sadələşdirilib. Belə ki, Rusiya ordusunda ən azı bir illik xidmətlə bağlı müqavilə bağlayanların dərhal vətəndaşlıq alacağı açıqlanıb.
Bəzi postsovet ölkələri öz vətəndaşlarının Rusiya tərəfindən Ukraynaya qarşı vuruşmasını istəmir. Məsələn, dünən Qırğızıstan və Özbəkistan hakimiyyəti Rusiyadakı miqrant vətəndaşlarına xəbərdarlıq edib ki, Ukraynada müharibə aparan Rusiya ordusuna yazılmasınlar.
Moskvadakı Qırğızıstan səfirliyinin sentyabrın 21-də yaydığı bəyanatda bildirilir ki, xarici ölkələrin ərazisində hərbi fəaliyyətdə hər hansı formada iştirak muzdlu fəaliyyət hesab ediləcək, 10 ilədək həbs, əmlakın müsadirəsilə cəzalandırılacaq. Səfirlik vətəndaşlarına bildirir ki, onlara hərbi əməliyyatlara qoşulmağa çağıran sənəd gələrsə diplomatik təmsilçiliyə müraciət etsinlər.
Özbəkistan səfirliyi də oxşar bəyanatla çıxış edib, xarici ordulara qoşulmağın qanunsuz olduğunu, 10 ilədək həbslə cəzalandırılacağını bildirib.
Qırğızıstan həmsərhəd olmayan ölkələrlə ikili vətəndaşlığı tanıyır. Rusiyadakı qırğız əmək miqrantlarının çoxunun Rusiya vətəndaşlığı da var və səfərbərliyə cəlb oluna bilərlər.
Özbəkistan isə ikili vətəndaşlığı tanımır. Rusiyadakı 1.2 milyon özbək miqrantın çoxu Rusiya vətəndaşlığı almaq istəyir, bəziləri bundan ötrü Rusiya silahlı qüvvələrində xidmət keçir.
Bəs ikili vətəndaşlığı qadağan edən Azərbaycan bu məsələdə hansı mövqeni tutmalıdır? Məlumdur ki, Rusiyada 2 milyonadək azərbaycanlı işləyir və yaşayır. Onların bir hissəsi bu ölkənin vətəndaşlığını qəbul edib, qalan hissəsi də iş icazələri ilə müvəqqəti qeydiyyatdadırlar. Rusiya hökumətinin vətəndaşlığı Ukraynaya qarşı döyüşməyin qarşılığında asan şərtlərlə verməsi bir çoxlarına cazibəli təklif kimi görünə bilər.
Bu da var ki, Rusiya vətəndaşlığı olan azərbaycanlılar hakimiyyətin səfərbərlik tələbindən yayına bilməyəcəklər. Çünki sentyabrın 20-də Dövlət Dumasında Cinayət Məcəlləsinə edilən dəyişikliklərə görə, Rusiya silahlı qüvvələrinə qoşulmaqdan imtina edən Rusiya vətəndaşları üçün uzunmüddətli həbs cəzaları nəzərdə tutulur.
Belə olan halda Rusiyadakı azərbaycanlılar nə etməlidirlər? Səfərbərliklə bağlı onları nə gözləyir? Ukraynaya qarşı vuruşan Azərbaycan vətəndaşına ölkəmizdə hüquqi münasibət necə olacaq ?
Hüquqşünas Hafiz Həsənov məsələni şərhində bildirib ki, Rusiyadakı azərbaycanlılar bu ölkənin vətəndaşlarıdırsa, həmin şəxslər səfərbərliyə cəlb edilə və ya könüllü olaraq hərbi əməliyyatlara cəlb edilə bilərlər: “Rusiyada yaşayan Azərbaycan vətəndaşları isə hakimiyyət tərəfəindən səfərbərliyə cəlb edilə bilməzlər. Onların könüllü olaraq Rusiya Federasiyası tərəfindən aparılan hərbi münaqişələrdə iştirak etmələrinə görə Cinayə Məcəlləsində konkert maddə nəzərdə tutulmayıb. Yalnız 2014-cü ildə CM-yə 283-1. “Azərbaycan Respublikasının hüdudlarından kənarda silahlı münaqişələrdə iştirak etmək məqsədi ilə sabit qrup yaratma” adlı 283-1.-ci maddə əlavə edilib. Burada dini məzhəbləri yaymaq, dini ayinlərin icrası adı altında, yaxud dini düşmənçilik, dini radikalizm və ya dini fanatizm zəminində Azərbaycan Respublikasının hüdudlarından kənarda aparılan silahlı münaqişələrə cəlb etmə və bu cür silahlı birləşmədə iştirakdan söhbət gedir”.
Hüquqşünas bildirir ki, əgər Cinayət Məcəlləsinə bu məsələ barədə konkret maddə əlavə edilməsə, Rusiya tərəfindən Ukraynaya qarşı vuruşan azərbaycanılar cinayət məsuliyyətinə cəlb edilməyəcəklər.(pressklub)
Rusiyada 10 ildən daha az müddətə vətəndaşlıq almış şəxslərin məcburi hərbi xidmətə cəlb edilməsinə dair təkliflər hazırlanır.
Redaktor.az xəbər verir ki, bu barədə Rusiya Prezidenti yanında Vətəndaş Cəmiyyətinin və İnsan Hüquqlarının İnkişafı Şurasının üzvü Kirill Kabanov məlumat verib.
K.Kabanov qeyd edir ki, qərar Mərkəzi Asiya ölkələri - Qazaxıstan, Qırğızıstan, Tacikistan və Özbəkistandan olan şəxslərə şamil olunacaq.
“Hərbi vəzifəni yerinə yetirməkdən imtina yalnız hərbi xidmətə cəlb olunmaqdan boyun qaçıran şəxsin deyil, həm də onun ailə üzvlərinin Rusiya vətəndaşlığından məhrum edilməsinə səbəb olmalıdır. Bu təşəbbüsün həyata keçirilməsi yuxarıda adları çəkilən ölkələrin hakimiyyət orqanları tərəfindən öz vətəndaşlarının xüsusi hərbi əməliyyatlarda könüllü olaraq iştirakına dair rəsmi qadağaya adekvat cavab olacaq”, - deyə K.Kabanov vurğulayıb.
Xatırladaq ki, Kollektiv Təhlükəsizlik Müqaviləsi Təşkilatına üzv olan Qazaxıstan, Özbəkistan və Qırğızıstan öz vətəndaşlarının Ukraynaya qarşı müharibədə iştirakına qarşı çıxıblar.
Əgər bu ölkələrin vətəndaşları Ukraynadakı hərbi əməliyyatlarda iştirak edərlərsə, onları vətənlərində beş ildən 10 ilə qədər həbs gözləyə bilər.
ABŞ-ın Oklahoma ştatının qubernatoru Kevin Skitt Azərbaycan Ordusu ilə tərəfdaşlıqla bağlı bəyannamə yayıb.
“Report” xəbər verir ki, bəyannamə Oklahoma Ştatı Milli Qvardiyası ilə Azərbaycan ordusu arasında Dövlət Tərəfdaşlığı Proqramının 20 illiyi münasibətilə imzalanıb.
Bəyannamədə Azərbaycanın 1991-ci ilin 18 oktyabrında müstəqilliyini elan etməsi, ABŞ-la, o cümlədən Oklahoma ştatı ilə müxtəlif sahələrdə əməkdaşlığın genişlənməsi vurğulanıb.
Azərbaycan Respublikasının ABŞ-dakı fövqəladə və səlahiyyətli səfiri Xəzər İbrahim öz növbəsində qubernatora təşəkkür edib. Səfir bunun əsl tərəfdaşlıq və dostluq olduğunu bildirib.
Xatırladaq ki, daha əvvəl Amerika Birləşmiş Ştatlarının Oklahoma Ştatının Milli Qvardiyasının komandanı general-mayor Maykl Tompsonun başçılıq etdiyi nümayəndə heyəti Azərbaycana səfər və Müdafiə Nazirliyinin rəsmiləri ilə görüşüb. Görüş zamanı Azərbaycan Respublikası ilə Amerika Birləşmiş Ştatları arasında təsdiq olunmuş “Ştatla Tərəfdaşlıq” proqramı əsasında Azərbaycan Ordusu ilə Oklahoma Ştatının Milli Qvardiyası arasında müxtəlif sahələrdə ikitərəfli əməkdaşlığın yeni istiqamətləri müəyyən olunub, birgə layihələr müzakirə edilib.
Tərəflər Azərbaycan Ordusu ilə Oklahoma ştatının Milli Qvardiyası arasında qarşılıqlı əlaqələrin daha da inkişaf etdirilməsinin vacibliyini vurğulayıblar.
Hərbi xidmətdə bədbəxt hadisə nəticəsində həlak olanlara şəhid statusunun verilməsi təklif olunur. "Şəhid adlarının verilməsi və şəhid ailələrinə edilən güzəştlər haqqında” qanuna dəyişiklik olmalıdır. Milli Məclisin İnsan hüquqları komitəsinin bu gün keçirilən iclasında deputat Elşad Mirbəşir deyib.
Deputat bildirib ki, bununla bağlı təkliflərini Milli Məclisə təqdim edib: “Vətən müharibəsi dövründə hərbi xidmət keçən zaman və yaxud hərbi vəzifəsini yerinə yetirən zaman hər hansı bədbəxt hadisə nəticəsində həyatını itirənlərə də şəhid adı verilsin. Bu mənim təklifimdir və çox həssas məsələdir. Vətən müharibəsi dövründə bəzi əsgərlərimiz avtomobil qəzası, silahla ehtiyatsız davranma, yanğın zamanı və bu kimi bədbəxt hadisələr nəticəsində həyatlarını itiriblər. Onlara şəhid adının verilməsi mövcud qanunvericiliyin müddəalarına əsasən mümkün olmur: “Hesab edirəm ki, sözügedən qanuna belə bir dəyişikliyin edilməsi Vətən müharibəsi dövründə hər hansı bir bədbəxt hadisə nəticəsində həyatını itirmiş əsgərlərimizin doğmaları və yaxınları üçün böyük təsəlli olardı”.
Qeyd edək ki, Türkiyə qanunlarına görə isə hərbi xidmətə çağırıldığı ilk gündən düşmən gülləsindən və ya ehtiyatsızlıqdan, hətta arı sancmasından, xəstəlikdən və ya hansısa bədbəxt hadisə nəticəsində vəfat edən əsgər şəhid statusu alır. DİA.AZ-ın məlumatına görə, hərbi ekspert Üzeyir Cəfərov “Şərq”ə açıqlamasında millət vəkilinin təklifini dəstəkləyib və bu problemin bir çox valideynləri ciddi narahat etdiyini deyib:
“Ölkə başçısı İlham Əliyevin Hərbi məsələlər üzrə köməkçisi, general-polkovnik Məhərrəm Əliyevin qəbulunda olan valideynlər illərdir bu dəyişikliyi gözləyir. Valideynlər haqlı olaraq Vətənin müdafiəsi üçün hərbi xidmətə yola saldığı övladının xidmət vaxtı başına hər hansı bir bədbəxt hadisə gəlibsə, ona şəhid adının verilməsini tələb edir. Amma burada hərbi qulluqçuların xidmət etdiyi ərazi mütləq nəzərə alınmalıdır. Bakıda, Sumqayıtda asfaltın üstündə hərbi xidmətdə olan əsgərlə sərhəd rayonlarında və Qarabağda düşmənlə üzbəüz hərbi hissələrdə xidmət vəzifəsini icra edərkən bədbəxt hadisə nəticəsində həyatını itirmiş əsgərlərimiz arasında fərq olmalıdır. Sərhəddən kənarda, paytaxtda və ya digər mərkəzi şəhərlərdə hərbi qulluq edən hərbçilərimiz isə döyüş tapşırığı ilə bağlı təlimlərdə, poliqonda başına gələn hər hansı bir qəzada dünyasını dəyişərsə, bu zaman onlara da şəhid statusunun verilməsi mütləqdir. Şəhidlik çox müqəddəs və uca mərtəbədir. Ucdantutma, hər hansı səbəbdən həyatını itirən bütün hərbiçilərə bu statusun verilməsi torpaq və vətənin müdafiəsi uğrunda canından keçən şəhidlərimizin ruhuna qarşı hörmətsizlik olar”.
Ekspertin sözlərinə görə, Kəlbəcərdə hər an ölüm təhlükəsi altında hərbi xidmət keçən zabit və ya əsgərlə Sumqayıtdakı “N” saylı hərbi hissədə xidmət edən hərbi qulluqçular arasında fərqli yanaşmaq mütləqdir. Hansısa bir əsgər hərbi hissədən özbaşına çıxıb harasa gedirsə, lap komandirin tapşırığı əsasında belə hərbi hissəni tərk edən zaman yolda avtoqəza keçirib ölürsə, onu şəhid adlandırmaq olmaz:
“Amma ön xətdəki istənilən bir postda xidmət edən əsgər öz əsgər yoldaşının açdığı atəş nəticəsində həlak olsa belə ona mütləq şəhid statusu verilməlidir. Valideynlər haqlı olaraq sual edir ki, Nardaranda, Gəncədə xidməti vəzifəsini icra edərkən həyatını itirən polis əməkdaşı şəhid adı alır, amma düşmənlə üzbəüz postlarda Vətənin ərazi bütövlüyü uğrunda mübarizə aparan əsgər, gizir və ya zabit döyüşdən kənar xidməti vəzifəsini icra edərkən vəfat edərsə, o, şəhid sayılmır?! Ümid edirəm ki, deputatın təklifi digər parlamentarilər tərəfindən də dəstəklənəcək və yaxın zamanlarda dəyişikliklər qəbul ediləcək. 200-dən artıq valideyn məhkəmələrdə Müdafiə Nazirliyi, Dövlət Sərhəd Xidməti, Daxili Qoşunların qapılarında qalıb, hərbi vəzifəsini icra edən zaman dünyasını dəyişən övladlarına şəhid statusunun verilməsini tələb edirlər.
Mövcud qanunvericiliyə əsasən, Azərbaycan Respublikasının azadlığı, süverenliyi və ərazi bütövlüyü ilə əlaqədar Azərbaycan Respublikasının qanunvericiliyi ilə müəyyən edilmiş digər hadisələrdə, o cümlədən atəşkəs dövründə döyüş şəraitində olan hərbi hissələrdə və ya daxili işlər, milli təhlükəsizlik orqanlarında döyüş tapşırığının və ya döyüş təminatı ilə bağlı tapşırıqların yerinə yetirilməsi üzrə xidməti vəzifəsinin icrası zamanı həlak olmuş, itkin düşmüş və məhkəmənin qərarına əsasən ölmüş hesab edilən şəxslər şəhid hesab edilirlər".
"Bəzi sosial şəbəkə hesablarında guya Azərbaycan Ordusunun mövqelərinin atəşə tutulması barədə əsassız məlumatlar paylaşılır. Bu məlumatları qəti surətdə təkzib edirik".
Bu barədə Müdafiə Nazirliyi məlumat yayıb.
"Vətəndaşlarımızı bu cür yalan məlumatlara aldanmamağa və rəsmi təsdiqini tapmayan məlumatları paylaşmamağa çağırırıq", - məlumatda deyilir.
XalqXeber.Az
Ukraynanın yenidən silahlanmasına yardımın göstərilməsi qərara alınıb: qısa, orta və uzunmüddətli perspektivdə
Ukraynanın müdafiə naziri Oleksey Reznikov qeyd edib ki, Ukrayna Müdafiə Təmas Qrupunun (Ramşteyn-5) 5-ci iclasında Ukraynaya uzunmüddətli dəstək kursu müəyyən edilib. Yardımın artması onu deməyə əsas verir ki, Ukrayna öz tərəfdaşlarını təkcə Rusiyanın hücumunu dəf etmək deyil, həm də ərazisini geri almaq qabiliyyətinə inandırmaq üçün uzun bir yol keçib.
Bunu gördükdən və inandıqdan sonra yardım paketləri böyüməyə başladı. Biz tank əleyhinə raketlər və MANPADS alan ölkədən hava hücumundan müdafiə və HIMARS formasında yardım alan ölkəyə çevrilmişik. Bundan əlavə də çox iş görülüb. Çünki əvvəllər bütün tərəfdaşlar Ukraynanın silaha olan real ehtiyaclarını dərhal başa düşmürdülər.
Ola bilsin ki, bəzi ölkələr yenə də öz “ehtiyatlı mövqeyinə” sadiq qalmağa davam edəcək, lakin tərəfdaşların əksəriyyəti əmin olub ki, Ukraynaya yardım artırılmalıdır. Bu gün onun həcmlərinin gələcəkdə artmağa davam edəcəyini proqnozlaşdırmaq olar.
"Ramşteyn-5” bizim üçün də önəmlidir. Birincisi, NATO və tərəfdaş ölkələrin proqramları çərçivəsində təhsil alacaq Ukrayna hərbçilərinin sayının artırılması ilə bağlı razılıq əldə edilib. İkincisi, laylı hava hücumundan müdafiə sisteminin yaradılması və Ukraynanın yenidən silahlanmasına yardımın göstərilməsi qərara alınıb: qısa, orta və uzunmüddətli perspektivdə.
Başa düşmək lazımdır ki, biz həm hava qüvvələrini, həm də hava hücumundan müdafiəni yeniləmək üçün "Lend-liz" və "Ramşteyn"in mexanizmlərini cəlb etməliyik. Əlamətdar hadisə həm də ABŞ dövlət katibi Antoni Blinkenin Ukraynaya səfəri oldu. Bununla ABŞ Ukraynanın Rusiyanın təcavüzünə qarşı mübarizə və ərazilərin azad edilməsi hərəkatını açıq şəkildə dəstəklədi. Səfər verilən qərarlarla üst-üstə düşdü.
Mühüm məqam ondan ibarətdir ki, Ukrayna qüvvələrinin bu uğurlu irəliləyişi bütün növ yardımların və ondan səmərəli istifadənin nəticəsidir. Axı HIMARS sistemləri və gəmi əleyhinə "Harpoon" raketləri və M-777 artilleriya sistemləri, özüyeriyən artilleriya sistemləri - bütün bunlar bu gün Baş Qərargahın açıqladığı qələbəmizə kömək etdi.
Amma silahlardan başqa, əlbəttə ki, taktika mühüm rol oynayır. Düşməni tükəndirmək strategiyası, ukraynalı əsgərlərin qəhrəmanlığı və Ukrayna qüvvələrinin əhval-ruhiyyəsi. Bu baxımdan, müharibənin bir çox hərbi taktika və strategiya dərsliklərində yer alacağı şübhəsizdir.
Müəllif: Aleksandr Musienko - Hərbi Hüquq Araşdırmaları Mərkəzinin rəhbəri
Mənbə: UNİAN
Tərcümə AYNA-ya məxsusdur
Müəllif: Turan Abdulla
"Cənab Müdafiə Nazirliyi.
Ancaq bu başdan deyim ki, məni nə prokurorluğa vermək lazımdır, nə
də üzr istətmək. Çünki böhtan atmaq , lağ etmək mənim işim deyil. Konkret.
Ordunun təhcizatı haqda çoxundan məlumatlıyam. Deyim ki, 100 faiz də olmasa, haqqı danışaq, normaldır. Ərazidə yeni HH lərin tikintisi, Hərbi strukturun bərpası da öz yerində. Görmüşəm, alqışlayıram. Bildiyiniz kimi Ordu ilə uzun zamandır birlikdəyəm, hər bir işə də adekvat yanaşmağım məlumunuzdur. "
Teref.az yazır ki, bunu hərbi ekspert Abuzər Əbilov yazır.Daha sonra hərbi ekspert yazır:
"Lakin son günlər "Müasir Ordu " anlamında müşahidə elədiyim və mənası, lazımlılığı çox vacib olan bir sıra ləvazimatların, qoruyucu vasitələrin olamasıdır.
Bunlardan biri də Taktiki, Ballistik eynəklərin şəxsi heyətdə olmamasıdır. Sözsüz ki, bu eynəklər Xüsusi Təyinatlılarda və müxtəlif xüsusi xidmər orqanlarının qruplarında var. Lakin atəş altına düşən tək onlar deyil.
Məlumat üçün: Taktiki eynəklər xüsusi istifadəli olaraq, döyüşlər zamanı döyüşçünün gözünü xırda qəlpələrdən, tozdan, partlayışlar zamanı yerdən qalxan müxtəıif ziyanverici predmetlərdən qorumaqla yanaşı, linzaları dəyişdikdə, günəş şüalarından və digər təbii faktorlardan qoruyur.
Azərbaycan əsgərinin hərbi-döyüş ləvazimatlarının içərisində bu vacib əşyanın olmaması, nəylə izah edilir?
Müasir orduların silahlanmasında bu və digər köməkçi predmetlərə xüsusi diqqət ayrılır. Azərbaycan ordusu da hal hazırda Qafqazlarda ən müasir, döyüş hazırlıqlı ordudur.
Mənim düşüncəmə görə və müasir dünyanın lokal və məhəlli münaqişələrində ,döyüşçülərin istifadəsində olan bu predmetin olmaması, sadəcə çatışmamazlıq və təəssüf hissi doğurur.
Son savaş xronikalarına baxanda, məhz bu predmetin heç bir əsgərdə,MAXE-də olmasına rast gəlmədim."
Teref.az
ABŞ Birləşmiş Qərargah Rəisləri Komitəsinin hazırkı sədri, general Mark Milli Polşanın paytaxtı Varşavada hərbi bazaya baş çəkib.
Polşa səfərindən sonra general Milli bəzi açıqlamalar verib.
General Rusiyanın Ukraynaya qarşı müharibəsində böyük uğursuzluqlarla üzləşməkdə davam etdiyini bildirib. Bu səbəbdən də ehtiyatı əldən verməməyə çağırıb.
O, Moskvanın son uğursuzluqlara nə reaksiya verəcəyinin gözlənilməz olduğunu qeyd edib. Buna görə də qoşunları gərgin vəziyyətdə ayıq-sayıq olmağa çağırıb.
Mark Milli həmçinin əlavə edib ki, ABŞ-ın Avropadakı qüvvələri təhlükə altında hesab olunmur. Lakin o, buna baxmayaraq, ehtiyatı əldən verməməyin zəruriliyini vurğulayıb.
“İndi müharibə Rusiya üçün o qədər də yaxşı davam etmir. Ona görə də hamımız yüksək səviyyədə hazırlığı, ayıq-sayıqlığı qorumağa borcluyuq. Müharibə zamanı bundan sonra nə olacağını yüksək dərəcədə əminliklə bilmək olmur”, – deyə o bildirib.
Millinin Varşavadakı bazaya səfəri müxtəlif müdafiə sistemlərinin, o cümlədən “Patriot” raketləri batareyalarının sınaqdan keçirilməsini də əhatə edib.
Məlumata görə, əgər Rusiya qoşunları bazaya hücum edərsə, ABŞ və onun NATO müttəfiqləri ilə daha çox münaqişə riski yaranarsa, raketlərin “son müdafiə xətti” olması nəzərdə tutulur. Tədbirdə iştirak edən mətbuat nümayəndələrindən Millinin ziyarət etdiyi bazanın konkret adının təhlükəsizlik səbəbilə açıqlanmaması istənilib.