İşəgötürən: əmək münasibətləri prosesində işçiyə vurduğu mənəvi ziyana görə hansı hallarda maddi (mənəvi) məsuliyyət daşıyır?
Əmək münasibətləri prosesində İşəgötürən və İşçi tərəfindən bir - birinin əmək və digər hüquqlarına hörmət etmək tərəflərin əsas vəzifələrindən biridir.
İşəgötürən tərəfindən işçiyə vurulan mənəvi ziyan dedikdə: işəgötürən və ona tabe olan vəzifəli şəxs tərəfindən hər hansı üsulla:
İşçinin şərəf və ləyaqətinin ləkələnməsi, ona böhtan atılması, alçaldılması, şəxsiyyətinin təhqir edilməsi, kollektiv arasında gözdən salınması məqsədi ilə barəsində həqiqətə uyğun olmayan, yalan məlumatlar yayması, habelə mənəviyyatına, əxlaq normalarına, milli qürur hissinə, etiqadına zidd olan digər əməllər və hərəkətlər başa düşülür.
Tərəflərlır arasında bu barədə yaranan fərdi əmək mübahisələrində: tərəflərdən biri -digərinin hüquqlarına hörmət edərək Əmək Məcəlləsi və AR-nın digər qanunvericiliyinin tələblərini,əmək müqaviləsi üzrə öhdəlikləri pozmamalıdır.
İşəgötürən tərəfindən işçiyə vurulan mənəvi ziyan vurularsa, işçinin - məhkəməyə İddia ərizəsi ilə müraciət etmək hüququ vardır.
İşçi tərəfindən bu barədə İddia ərizəsi ilə məhkəməyə müraciət etdikdə, o dövlət rüsumu ödəməkdən azad edilir.
İşəgötürən əmək münasibətləri prosesində işçiyə vurduğu mənəvi ziyana görə - maddi məsuliyyət daşıyır.
Mənəvi ziyan vurulduğunu iddia edən işçi, həmin ziyana görə iddia məbləğini - iddia ərizəsində göstərməlidir. İşçiyə dəyən mənəvi ziyanın pul hesabı ilə məbləği onun ərizəsi əsasında vurulan mənəvi ziyanın ictimai təhlükəlilik dərəcəsinə, işçinin və işəgötürənin şəxsiyyətinə, işin faktik hallarına və ədalətli qərar qəbul edilməsi üçün zəruri olan digər obyektiv hallara uyğun olaraq məhkəmə tərəfindən müəyyən edilir.
Tərəflər, o cümlədən də işəgötürənlər əmək mübahisələrini mahiyyəti üzrə həll edən məhkəmənin qətnaməsini (qərarını) yerinə yetirməyə borcludurlar.
İşçinin hüquqlarını və qanuni mənafelərini pozmuş işəgötürən fərdi əmək mübahisəsini həlli nəticəsində məhkəmə tərəfindən müəyyən edilmiş işçiyə dəyən maddi ziyanı tam məbləğdə ödəməlidir.
Müəllif: Azər Quliyev
Neftçilərin Hüquqlarının Müdafiəsi Təşkilatının
Eksperti - Dia-az.İnfo