“Qarabağ” yay fasiləsində ikinci əcnəbi transferini açıqlayıb.

Ağdam klubu sosial şəbəkə vasitəsilə braziliyalı vinger Juninyonun keçidini elan edib.

27 yaşlı hücumameyilli oyunçu Portuqaliyanın “Çaves” klubundan transfer olunub. O, yeni komandası ilə 3 illik müqavilə imzalayıb. Juninyo "Qarabağ"da 18 nömrəli formanı geyinəcək.

Qeyd edək ki, “Qarabağ”ın transfer dönəmində ilk keçidi “Zirə”dən fransalı vinger Hamidu Keyta olub.

Azərbaycanın karate üzrə beşqat dünya və onbirqat Avropa çempionu Rafael Ağayev “Karate Kombat” turnirində qələbə qazanıb.

Teleqraf.com xəbər verir ki, titullu idmançımız Florida ştatının Mayami şəhərində keçirilən döyüşdə ABŞ-dan olan Coş Kuayhagenə qalib gəlib.

Qeyd edək ki, Rafael Ağayev "Karate Combat" turnirində 2018-ci ildə debüt edib.

Belçika millisinin sabiq futbolçusu Sedrik Russel vəfat edib.

"Report" "Daily Mail" nəşrinə istinadən xəbər verir ki, veteran hücumçu 45 yaşında ürəktutmasından dünyasını dəyişib.

Qeyd edək ki, Belçikanın əsas yığmasında 3 oyun keçirmiş forvard karyerası ərzində ölkəsinin "Gent", "Genk", "Zulte Varegem", İngiltərənin "Vulverhempton" və İtaliyanın "Breşiya" klublarında da çıxış edib.

Bu yaxınlarda fransalı yarımmüdafiəçi Bubakar Kamara ailə həyatı qurub.

Lent.az-ın xarici mediaya istinadla xəbərinə görə, “Aston Villa”nın oyunçusunun seçdiyi şəxs sosial mediada 2 milyondan çox izləyicisi olan 27 yaşlı Korali Porrovekkio olub. Yeni evlənənlər möhtəşəm şənlik keçiriblər və bu mərasimdə Pol Poqba, Kilian Mbappe, Felipe Koutinyo, Unai Emeri və başqa futbol ulduzları iştirak ediblər.

Belə parlaq və alovlu bayramdan sonra, gözlənildiyi kimi, gənclər çoxdan gözlənilən bal ayı səyahətinə çıxıblar. Futbolçunun planları Maldiv adalarında bir neçə gün həyat yoldaşının yanında olmaq idi, hər şey həmişəkindən daha yaxşı gedib. Günəş, dəniz, qum, sevimli həyat yoldaşın da yanında - başqa nə xəyal edə bilərsiniz? Sonradan məlum olduğu kimi, bir şey başqa səmtə yönəlibmiş...

Bubakar Kamara uzun müddətdir ki, milli komanda səviyyəsində özünü göstərmək arzusunda olub. Ötən mövsüm o, İngiltərənin "Aston Villa"sının sıralarına qoşulub. Gənc futbolçu özünü yaxşı tərəfdən göstərib, xüsusən də onun köməyi ilə komanda avrokubok zonasına düşə bilib. Bununla belə, yarımmüdafiəçi bütün müsahibələrində əsas məqsədlərindən birinin Fransa millisində yer almaq olduğunu qeyd edib. Bəli, bir çox futbolçular bunu arzulayır, amma hər kəs öz istəkləri uğrunda fədakarlıq etməyə hazır deyil.

Xoşbəxt Kamara artıq gənc həyat yoldaşı ilə çimərlikdə əyləndiyi zaman, birdən özünü sübut etmək şansı yaranıb - zədəli Adrien Rabionun əvəzinə yarımmüdafiəçi Fransa millisinə çağırılıb. Bütün işlərini və həyat yoldaşını tərk edən futbolçu ölkəsinin köməyinə gedib. Həvəslənən və ruhlanan Bubakar artıq Avro 2024-ün seçmə mərhələsində necə oynaya biləcəyini səbirsizliklə gözləyib.

Fransa yığması Cəbəllütariq və Yunanıstan komandaları ilə iki oyun keçirib. Hər iki oyun sonda müvafiq olaraq 3:0 və 1:0 hesab ilə fransızların qələbəsi ilə başa çatıb. Bütün bu hekayədə ən diqqətçəkən məqam odur ki, Didye Deşam yalnız üç oyunçunu - Markus Tyuram, Jordan Veret və bədbəxt Bubakar Kamaranı bu görüşlərdə meydana buraxmayıb. Yığmanın baş məşqçisi 23 yaşlı futbolçu ilə bağlı yaranmış bütün vəziyyəti öyrəndikdən sonra Deşam deyib: "Ümid edirəm ki, madam mənə çox əsəbiləşməyəcək".

İndi hər kəsi sual maraqlandırır: “Bubakar Kamaranın gənc həyat yoldaşı onun hərəkətinə necə reaksiya verəcək?”

Azərbaycanın yeniyetmə cüdoçusu Məhəmməd Məmişov Portuqaliyanın Odivelas şəhərində keçirilən Avropa çempionatında qızıl medal qazanıb.

50 kq çəki dərəcəsində çıxış edən idmançı final görüşündə macarıstanlı cüdoçu Benke Qalo ilə qarşılaşıb.

Rəqibinə qalib gələn Məmişov fəxri kürsünün ən yüksək pilləsinə qalxıb.

Portuqaliyanın məşhur “A Bola” nəşri “Qarabağ”a aid maraqlı iddia ortaya atıb.

Həmkarlarımızın iddiasına görə, yerli “Maritimu”nun futbolçusu Diderik Joel karyerasını Azərbaycanda davam etdirə bilər.

Belə ki, “Qarabağ”ın 30 yaşlı hücumçu ilə maraqlandığı bildirilir.

Nəşr “Maritimu” aşağı liqaya düşdüyü üçün kamerunlu forvardın növbəti mövsüm komandada qalmayacağının dəqiq olduğunu yazır.

Ağdam təmsilçisinin həm kluba, həm də oyunçuya təklif göndərdiyi vurğulanıb. Son qərarı Madeyra təmsilçisinin verəcəyi diqqətə çatdırılıb.

Diderik Joel son olaraq icarə əsasında Səudiyyə Ərəbistanında “Əl-Həzm”in formasını geyinib. Afrikalı hücumçu 15 matçda 7 qola imza atıb.

“A Bola”nın yaydığı informasiya doğrudumu? Əgər yaxın keçmişə boylansaq, bəli. Azərbaycan çempionu kamerunlu hücumçuya düz 2 il öncə təklif göndərib.

Ondan qabaqkı illərdə də belə bir dəvət olub. Sadəcə, Joel həmin vaxt Azərbaycana gəlmək istəməyib. İndi isə “köhlən atlılar” onun xidmətinə maraq göstərmir.

Çünki şərtlər üst-üstə düşmür. Adını çəkdiyimiz hücumçu minimum 3 illik müqavilə tələb edir. Üstəlik, daim əsas heyətdə yer almasına zəmanət gözləyir.

Təbii ki, Qurban Qurbanov bununla razılaşmır. O, yaşı 30-u haqlayan, son iki mövsümü qeyri-sabit keçirən, məhsuldarlığı aşağı düşən afrikalının adını artıq transfer siyahısından çıxarıb.

Portuqaliyanın Odivelas şəhərində keçirilən cüdo üzrə yeniyetmələr arasında Avropa çempionatında Azərbaycan cüdoçuları 4 qızıl və 1 bürünc medal əldə edib.

Turnirin ilk günündə 6 çəki dərəcəsində 8 cüdoçumuz medallar uğrunda mübarizə aparıb.

Oğlanlar arasında Məhəmməd Məmişov (-50 kq), Mirxaliq İskəndərov (-55 kq), Məhəmməd Musayev (-60 kq), qızlar arasında isə Vüsalə Hacıyeva (-48 kq) bütün rəqiblərini məğlub edərək fəxri kürsünün ən yüksək pilləsinə qalxıblar.

Həmçinin oğlanlar arasında Əhməd Rüstəmov (-50 kq) çempionatın bürünc medalını qazanıb.

21 yaşadək futbolçular arasında bu gün start götürən Avropa çempionatının ilk qolunu ötən mövsümü icarə əsasında "Sabah"da keçirmiş Ukrayna millisinin futbolçusu Aleksey Kaşuk vurub.

23 yaşlı hücumameylli yarımmüdafiəçi Xorvatiya yığması ilə matçın 19-cu dəqiqəsində fərqlənib. O, Artyom Bondarenkonun ötürməsini qola çevirib.

Qeyd edək ki, müqavilə ilə ölkəsinin "Şaxtyor" (Donetsk) klubuna məxsus olan Aleksey Kaşuk ötən mövsüm "Sabah"ın heyətində 31 çempionat oyununda 16 qol və 10 məhsuldar ötürmə ilə yadda qalıb.

AVRO-2024-ün seçmə mərhələsində IV turun daha 10 oyunu keçirilib.

Azərbaycan millisinin yer aldığı F qrupunda iki qarşılaşma baş tutub. Canni De Byazinin kollektivinin istirahət etdiyi turda qrupun lideri Avstriya seçməsi evdə İsveçi 2 cavabsız qolla məğlub edib.

Üç gün əvvəl Bakıda Azərbaycan yığması ilə heç-heçə edən Estoniya isə doğma meydanda Belçikaya müqavimət göstərə bilməyib - 0:3.

Portuqaliya seçməsi səfərdə İslandiyaya çətinliklə qalib gəlib. Kriştianu Ronaldunun 89-cu dəqiqədə vurduğu qol qonaqlara 3 xal qazandırıb.

AVRO-2024 seçmə mərhələ

20 iyun

A qrupu

Norveç – Kipr - 3:1

Qollar: Ola Solbakken, 12. Erlinq Holann,56 (penalti); 60 - Qriqoris Kastanos, 90+3

Xal durumu: Şotlandiya – 9 xal (3 oyuna), Gürcüstan - 4 (2), Norveç – 4 (4), İspaniya - 3 (2), Kipr - 0 (3)

E qrupu

Moldova – Polşa - 3:2

Qollar: Yon Nikolaesku, 48; 79. Vladislav Baboqlo, 85 - Arkadiuş Milik, 12. Robert Levandovski, 34

Farer adaları – Albaniya - 1:3

Qollar: Odmar Feryö - Nedim Bayrami, 20. Kristian Aslani, 51. Ernest Muçi, 90+1

Xal durumu: Çexiya – 7 xal (3 oyuna), Albaniya – 6 (3), Polşa – 3 (3), Moldova – 5 (4), Farer adaları – 1 (3)

F qrupu

Avstriya – İsveç - 2:0

Qollar: Kristof Baumqartner, 81; 89
Estoniya – Belçika - 0:3


Qollar: Romelu Lukaku, 37; 40. Yohan Bakayoko, 90

Xal durumu: Avstriya – 10 xal (4 oyuna), Belçika – 7 (3), İsveç – 3 (3), Estoniya – 1 (3), Azərbaycan – 1 (3)

G qrupu

Macarıstan – Litva - 2:0

Qollar: Barnabas Varqa, 32. Roland Şallai, 83

Bolqarıstan – Serbiya - 1:1

Qollar: Kiril Despodov, 47 - Darko Lazoviç, 90+6

Xal durumu: Macarıstan - 7 (3 oyuna), Serbiya – 7 xal (3), Monteneqro – 4 (3), Bolqarıstan – 4 (2), Litva – 1 (3)

J qrupu

İslandiya – Portuqaliya - 0:1


Qol: Kriştianu Ronaldu, 89

Bosniya və Herseqovina – Lüksemburq - 0:2

Qollar: Borjes Sançes, 4. Danel Sinani, 74

Lixtenşteyn – Slovakiya - 0:1

Qol: Denis Vavro, 45+1

Xal durumu: Portuqaliya – 12 xal, Slovakiya – 10, Lüksemburq – 7, Bosniya və Herseqovina – 3, İslandiya – 3, Lixtenşteyn – 0.

Qeyd edək ki, A qrupunda Şotlandiya - Gürcüstan matçı isə davam edir. Buna ilk hissənin əvvəlində güclü yağışın yağması və matçda məcburi fasilənin yaranması səbəb olub. Hazırda görüşdə 35-ci dəqiqə oynanılır və hesab meydan sahiblərinin xeyrinədir.

Bakıdakı təlim-məşq toplanışında olan 21 yaşadək futbolçulardan ibarət Azərbaycan millisi yoldaşlıq oyunu keçirib. "Report"un məlumatına görə, Samir Əliyevin baş məşqçi olduğu komanda Qırğızıstanın U-23 yığması ilə qarşılaşıb.

"Dalğa Arena" oynanılan görüşdə qalib müəyyənləşməyib - 1:1. Hesabı 61-ci dəqiqədə Murad Vəliyev açıb. Lakin qonaqlar 79-cu dəqiqədə Mirlan berberdinovun qolu ilə məğlubiyyətdən qaçıblar.

Qeyd edək ki, Azərbaycanın U-21 yığması daha əvvəl türkiyəli həmyaşıdlarına 1:0 hesabı ilə uduzub.