 |
|
|
Terrorçuluğun maliyyələşdirilməsi ittihamı ilə mühakimə edilən Xəqani Ömərov, Anar Salamzadə və Elçin Əzizovun barəsində Dövlət Təhlükəsizliyi Xidmətində (DTX) başlanılmış cinayət işi üzrə məhkəmə istintaqı başlayıb.
“Qafqazinfo”nun məlumatına görə, Bakı Ağır Cinayətlər Məhkəməsində hakim Nigar İmanovanın sədrliyi ilə keçirilən iclasda əvvəlcə dövlət ittihamçısı tərəfindən ittiham elan olunub.
İttihama görə, mütəşəkkil dəstənin üzvləri Şükür Həmidli və Elşən Mustafayev “İraq-Şam İslam Dövləti” (İŞİD) terror təşkilatının tərkibində silahlı münaqişələrdə iştirak ediblər. Onlar Suriya Ərəb Respublikasının ərazisində müxtəlif terrorçu qruplaşmaların tərkibində döyüşlərə qoşulub və hökumət qüvvələrinə qarşı silahlı əməliyyatlarda iştirak ediblər. Həmçinin onların xarici ölkə ərazisində insanların vahiməyə salınması məqsədilə törədilən partlayışlar və digər cinayətlərdə iştirakları müəyyən edilib.
İttihamda qeyd olunur ki, Xəqani Ömərov, Anar Salamzadə və Elçin Əzizov sosial şəbəkələr vasitəsilə terrorçuluğun maliyyələşdirilməsinə çağırışlar ediblər. Onlar imkansız insanlara yardım adı ilə ianələr toplayaraq həmin vəsaitləri mütəşəkkil dəstənin digər üzvlərinə ötürüblər və bununla da terrorçuluğun maliyyələşdirilməsinə dəstək veriblər.
DTX-də aparılan istintaqla təqsirləndirilən şəxslərin terror fəaliyyətinə dəstək məqsədilə xarici ölkələrdəki müəyyən şəxslərə maliyyə vəsaiti köçürdüklərini sübut edən dəlillər toplanıb.
Anar Salamzadə ifadəsində deyib ki, o, heç bir terror fəaliyyətini maliyyələşdirməyib. Sadəcə Suriyada yaşayan və ailə quran uşaqlıq dostu Şükür Həmidliyə humanitar məqsədlə maddi yardım edib:
“Onun imkanı yaxşı deyildi. Mən də onun dolanışığı üçün sədəqə toplamışam. 2015-ci ildə Suriyaya gedib və orada yaşayıb. O deyirdi ki, müharibə gedir, qaçqınlar çadırlarda yaşayır. Mən də yardım məqsədilə pul göndərmişəm. Mən onun İŞİD üzvü olmadığını bilirdim. O, digər silahlı qruplaşmanın üzvü idi və “zalımlara qarşı döyüşdüyünü” deyirdi. Göndərdiyim pullarla çadır, ərzaq və dərman aldığını göstərən videolar da göndərib”.
Salamzadə qeyd edib ki, “Şəki paxlavası” satmaqla məşğul olub, həm Azərbaycanda, həm də xarici ölkələrdəki ehtiyaclı şəxslərə yardım etməyə çalışıb. O, pul göndərdiyi şəxslərdən rəsmi hesabat tələb etmədiyini bildirib, sadəcə çəkilən videolardan pulların ehtiyaclara xərcləndiyinə əmin olub:
“Elşən kart lazım olduğunu dedi və ailəsini dolandırmaq üçün pul yığmaq lazım olduğunu bildirdi. Mən də öz adıma kart aldım, həmin karta müxtəlif şəxslər pul atıb. Ümumilikdə 30 min dollar pul toplandı”.
Digər müttəhim Xəqani Ömərovun sözlərinə görə, işdə adı keçən Elşən Mustafayev onun yeznəsi olub. Ömərov qeyd edib ki, bacısı 2013-cü ildə birinci həyat yoldaşı Elxan ilə Suriyaya köçüb:
“Orada bacımın birinci ailəsi dağıldı. Sonra bacım Elşən Mustafayev ilə ailə qurub. Bacım orada özünə ev alıb. Mən də buna görə bacıma pul göndərmişəm. Amma nə qədər pul göndərdiyimi unutmuşam. Amma bacım Elşən Mustafayev ilə ailə qurandan sonra pul göndərmişəm. Elşən də öz işi ilə məşğul olan şəxs olub. Orada müharibə getdiyi üçün bacımı geri göndərməsini xahiş etmişəm. Amma onunla Sumqayıtda ev almaq barədə söhbətimiz olmayıb. Amma Elşənin anası, bacısı Sumqayıtda yaşayıblar. Onlar da Elşənə yardım ediblər. Yardım üçün toplanan pulları kartdan çıxarmışam və özümdə saxlamışam. 30 min dollar toplandı, mən də həmin pulu onlara verdim. Üstünü düzəldəndən sonra orada ev aldılar. Pulu kimin göndərməsini bilməmişəm və tanımamışam”.
Xəqani Ömərov əlavə edib ki, Elşən Mustafayevin Suriyada “Abu Usama” ləqəbi ilə tanındığını bilib, lakin onun konkret hansı fəaliyyətlə məşğul olduğunu dəqiqləşdirməyib.
Məhkəmə prosesi mayın 27-də davam etdiriləcək.
Qeyd edək ki, təqsirləndirilən şəxslər barəsində Cinayət Məcəlləsinin 214-1-ci (terrorçuluğun maliyyələşdirilməsi) maddəsi ilə ittiham irəli sürülüb. Bu maddə ilə 10 ildən 14 ilədək azadlıqdan məhrumetmə cəzası nəzərdə tutulur.