Naxçıvanda əvvəlki özbaşnalıqlar başlayıb! Məmurlar at oynatmağa davam edir!Naxçıvan Dövlət Filarmoniyası işçilərin maaşlarını vermir.

Gununsesi.info xəbər verir ki, Filarmoniya işçiləri deyirlər ki, son 8 ay ərzində 6 konsert veriblər, lakin təyin olunan pul mükafatları Mədəniyyət Nazirliyi tərəfindən mənimsənilib.
Musiqiçilər Novruz Bayramı ərəfəsində 5 gün açıq hava konserti veriblər. Lakin bunun üçün təyin olunan qonorarları da ala bilməyiblər.
Şikayətçilər deyirlər ki, Həsən Seyidov və Vəli Səfərovun pul mükafatlarını mənimsədiklərini bildirirlər.
Həsən Seyidov – Naxçıvan Mədəniyyət Naziri vəzifəsinin müvəqqəti icraçısı, Vəli Səfərov – Mədəniyyət Nazirliyi Aparatının rəhbəridir.
Vəli Səfərov indiki vəzifəsindən əvvəl elə həmin Filarmoniyada direktor müavini olub.
Maraqlıdır ki, Səfərov əvvəllər tamada olub. O, “Yeni Ulduz” müsabiqəsində də iştirak edib.

Vətəndaşların məcburi köçkünlər tərəfindən 1990-cı illərdə Qarabağ torpaqlarının işğalından sonra doğma yurdlarından məcburi köçkün düşən bir çox ailələr Bakıda, Sumqayıtda və başqa şəhərlərdə daha əvvəl hökümət tərəfindən ev almış vətəndaşların şəxsi mənzillərində məskunlaşdılar. 32 il öncə dövlətdən ev alan, lakin bir gün olsun belə, o evlərdə yaşaya bilməyən minlərlə insan var.

Çünki həmin evlərdə məcburi köçkünlər məskunlaşıb.

Qarabağa qayıdış başladıqdan sonra, məcburi köçkünlər üçün tikilmiş yaşayış massivlərində minlərlə mənzil boşaldı. Əmək və Əhalinin Sosial Müdafiəsi Nazirliyi məcburi köçkünlər üçün tikilən binalardakı boş mənzillərin satışa çıxarılacağını elan edib.

30 ildir ev həsrətində olan, bəzisi dünyasını dəyişən, ömrünün ahıl çağlarını yaşayan, illərdir kirayələrdə, ağır şəraitdə yaşamaq məcburiyyətində qalan insanların hüquqları pozulur. Beynəlxalq məhkəmənin həmin evlərin dərhal sahiblərinə qaytarılması ilə bağlı qərarı var.

Mövzu ilə bağlı Yenicag.az-açıqlama verən hüquqşünas Ramil Süleymanov deyib ki, şəxsi mənzillərdən məhrum olunduqlarına görə, mənzilləri zəbt olunmuş vətəndaşların əldən çıxmış fayda ilə bağlı yenidən Azərbaycan Respublikasının müvafiq qurumuna müraciət edərək, evlərinin zəbt olunduğu müddət üzrə kompensasiya tələb etmələrinə tam ixtiyarları var:

“Qeyd edim ki, torpaqlarımız işğal altına düşdükdən sonra, Bakı, Sumqayıt, Mingəçevir, Gəncə, o cümlədən, respublikamızın digər rayon və şəhərlərində boş qalmış mənzillər məcburi köçkünlər tərəfindən özbaşına qaydada tutuldu və bununla bağlı həmin mənzilləri müvəqqəti və ya müəyyən bir zaman üçün mənzillərini tərk etmiş vətəndaşlar faktiki olaraq, evsiz qalaraq, bir qismi kirayə ev tutmaq məcburiyyətində qaldı”, – deyə o bildirib.

R.Süleymanov deyib ki, həmin evlərin dərhal boşaldılması ilə bağlı bir çox məhkəmə qərarı var.
“Lakin o vaxt həmin mənzillərin dərhal boşaldılması icra oluna bilməmişdi. Vətəndaşlar daha sonra yenidən məcbur olaraq, məhkəmə qətnaməsinin icra olunmaması ilə bağlı Avropa İnsan Haqları Məhkəməsində Avropa İnsan Haqları Konvensiyasının 6-cı maddəsi – ədalətli məhkəmə hüququnun pozulması, eyni zamanda 1 saylı protokolun birinci maddəsi – mülkiyyət hüququnun pozulması ilə bağlı məhkəmələrə müraciət etmək məcburiyyətində qaldılar.
Əlbəttə, Avropa İnsan Haqları Məhkəməsi Azərbaycana qarşı bu pozuntunu tanıdı. Lakin az hallarda Azərbaycan dövləti tərəfindən ilkin yerləşdirmələrə əsasən, həmin məcburi köçkünlərin dövlət tərəfindən tikilən evlərə təcili yerləşdirilməsi həyata keçirildi, lakin bir çoxu icra edilmədi”, – deyə o əlavə edib.

Hüquqşünas qeyd edib ki, hazırda hökümət tərəfindən vaxtilə məcburi köçkünlərin yerləşmiş olduğu şəhərciklərdə, mənzillərdə artıq boşaldılmamalar başlanılıb və şükürlər olsun, onlar öz doğma yurdlarına geri qayıdırlar. Həmin mənzillərin təkrar satışı elan olunub:
“Şəxsi mənzillərdən məhrum olunduqlarına görə mənzilləri zəbt olunmuş vətəndaşların əldə çıxmış fayda ilə bağlı yenidən Azərbaycan Respublikasının müvafiq qurumuna müraciət edərək, mənzillərin zəbt olunduğu müddət üzrə kompensasiya tələb etmələrinə tam ixtiyarları var. Bu kompensasiya ödənilmədiyi halda, bununla bağlı məhkəməyə müraciət edərək, müvafiq kompensasiyanın ödənilməsini tələb edə bilərlər. Bu, əlbəttə, dövlət tərəfindən icra olunacaq bir layihədir”.

Bu gün Naxçıvan Muxtar Respublikasının keçmiş maliyyə naziri Rafael Əliyev və Dövlət Gömrük Komitəsinin tariflərin tənzimlənməsi və ödənişlər şöbəsinin rəisi vəzifəsində işləmiş Mənsur Əsgərovun cinayət işi üzrə növbəti məhkəmə prosesi keçirilib.

APA-nın Naxçıvan bürosu xəbər verir ki, Naxçıvan Muxtar Respublikasının Ağır Cinayətlər Məhkəməsində hakim Faiq Heydərovun sədrliyi ilə keçirilən prosesdə əvvəlcə Rafael Əliyev ifadə verib.

Rafael Əliyev bildirib ki, proses bəlli olub və ora kimin nəzarət etdiyi də bilinirdi: “Rüşvət sərhəddə alınırdı və komitəyə verilirdi. Bu fəaliyyətin qanunsuz olduğunu bilirdik. İşə qəbul olunan gömrük işçisi sabahı günü işə çıxanda artıq neçə işləyəcəyini bilirdi. İstər yaradılan TIR, istərsə də GRP (yük xəttinə aid yaradılan qanunsuz proqram) proqramlarına komitədən kiminsə girişinə icazəsi yox idi. Biz sadəcə, hesabatlar aparırdıq və gələn pulları eyniləşdirib komitə sədri Asəf Məmmədova, 2018-ci ildən isə Səhhət Həbibbəyliyə verirdik”.

Keçmiş maliyyə naziri bildirib ki, komitə sədri onlardan pulların dollar olaraq verilməsini istəyib: “Pullar gömrükçülərdən manat və dollar kimi alınırdı. Komitə sədri demişdi ki, pulları ona dollar kimi verək. Özü banklara zəng edib deyirdi, biz də gedib manatları dollara çevirirdik”.

Gömrük Komitəsində məhv edilən kompüterlərin hard-disklərinə (yaddaş cihazı) isə Rafael Əliyev belə aydınlıq gətirib: "Kompüterlərin hard-diskləri məhv edilib. Ancaq bu proses mən orda çalışdığım müddətdə olmayıb, məndən sonra olub. Disklərin məhv edilməsinin səbəbi, yəqin ki, proqramların ləğvi ilə bağlı olub. Sonradan bilinib ki, bu proseslər səhvdir və hər şey ləğv edilib, sənədlər də ləğv edilibsə, deməli, hər şey qeyri-qanuni olub”.

Maliyyə naziri işlədiyi dövrdə Rafael Əliyev qanunsuz olaraq 2017-ci ildə işə qəbul edilən 8 nəfərə verilən əməkhaqqına da aydınlıq gətirib. O bildirib ki, bu proseslər ondan əvvəlki dövrdə olub və maliyyə naziri işləyərkən həmin işçilərin adları dövlət qulluğunun reyestrində də olub. Aylıq paket olaraq 15 min manat aldığını qeyd edən Rafael Əliyev bildirib ki, o bunu maaş kimi alıb: "Bu mənə əməkhaqqı kimi təqdim olunurdu. Özümü təqsirli hesab edirəm, məsuliyyət mənim üzərimdədir".

Daha sonra zərərçəkən tərəf olan Azərbaycan Respublikası Maliyyə Nazirliyinin nümayəndəsi bildirib ki, istintaq müddətində dövlət büdcəsinə vurulmuş ziyanın bir hissəsi ödənilib, qalan hissənin də ödənilməsi davam edir: "Biz zərərçəkən tərəf olaraq dəyən ziyanın tam ödənilməsini tələb edirik və məhkəmədən bunun təmin edilməsini xahiş edirik".

Proses daha sonra şahidlərin ifadələri ilə davam edib.

Şahidlər bildiriblər ki, onlara öncədən göstəriş verilib və pullar yığılıb. Bu göstərişləri isə o zaman komitənin sədri olan Səhhət Həbibbəyli verib. Həmin müddətdə dövlətin rəsmi proqramına heç bir vəsait ödənilməyib. Sədərək Gömrük məntəqəsində yüklərdən (idxaldan) ay ərzində ortalama 800 min - 1 milyon manat yığılırdı.

Həmçinin, bu proses digər məntəqələrdə də olub. Ortalama olaraq hər ay TIR proqramı vasitəsilə 200 min manatdan çox vəsait mənimsənilib. Şahidlər deyib ki, gömrüklərdə hər ay bu məbləğ dəyişirmiş. Belə ki, ay ərzində hər bir gömrükdə 300-400 min manat, həmçinin 400-500 min dollar vəsait toplanırmış. Culfa gömrük məntəqəsində 3 il ərzində təqribən 12.5 milyon manat, Şahtaxtı gömrük məntəqəsində isə 1,2-1,4 milyon manat rüşvət yığılıb. Şahidlər vurğulayıb ki, komitədən onlara kompüterlərin hard-disklərinin dəyişdirilməsi tapşırılıb. 1 həftə ərzində 25-30 kompüterin hard-diski dəyişdirilib və onlar maddi təchizat şöbəsinin rəisinə verilib. Həmin yaddaş cihazları isə çilingər tərəfindən 4 yerə bölünərək məhv edilib.

Məhkəmə prosesi mayın 23-də davam etdiriləcək.

Qeyd edək ki, Rafael Əliyev və Mənsur Əsgərov 2022-ci ilin noyabr ayında Azərbaycan Respublikasının Dövlət Təhlükəsizliyi Xidməti tərəfindən həyata keçirilən araşdırma tədbirləri nəticəsində cinayət məsuliyyətinə cəlb ediliblər.

Moskvada küçədə rəqs edən azərbaycanlılar polis tərəfindən saxlanılıb.

Diaspora.TV xəbər verir ki, bu barədə görüntülər sosial şəbəkədə yayılıb.

Belə ki, ötən gün axşam saatlarında bir qrup azərbaycanlı gənc “Yaşa, Azərbaycan” mahnısının sədası altında avtomobil yolunun hərəkət istiqamətində rəqs edib.

Hadisədən sonra Rusiya polisi hərəkətə keçib və bu gün səhər saatlarında rəqs edən azərbaycanlılar müəyyənləşdirilərək saxlanılıblar.

Ermənistan 30 ilə yaxındır nəzarətində olan Azərbaycan kəndlərini geri qaytarmağa razılaşandan sonra Qazaxla sərhəd yaxınlığında yaşayanlar etiraz aksiyalarına başlayıb.

Onlar azərbaycanlılarla qonşuluqdan, təhlükəsizlik məsələlərindən narahatdılar.

Bəs bir kənddə, bir məhəllədə yaşayan azərbaycanlı və erməni əsilli Gürcüstan vətəndaşları bu qonşuluğun öhdəsindən necə gəlirlər?

Jurnalist Könül Şahin bu kəndlərdə, eləcə də paytaxt Tbilisidə bir-biriylə qonşuluq, hətta dostluq edən azərbaycanlılar və ermənilərlə danışıb.
Şulaveri kəndi Gürcüstanın Kvemo Kartli bölgəsində yerləşən və təxminən 83 faizi azərbaycanlılardan, 10 faizi ermənilərdən ibarət olan Marneuli şəhərindən maşınla 20 dəqiqəlik məsafədə yerləşir. Bu kənd Kvemo Kartli bölgəsində azərbaycanlılarla ermənilərin birgə yaşadığı kəndlərdən sadəcə biridir.

Ermənistanla Gürcüstanı birləşdirən avtomobil yolu da bu kənddən keçdiyi üçün burada Ermənistan seriyalı bir çox maşın da görmək mümkündür.
Kəndə daxil olanda sizi yolun hər iki tərəfində yerləşən üç iri market qarşılayır. Marketlərdən ikisinin sahibi azərbaycanlı, birinin sahibi isə ermənidir. Hər iki xalqın nümayəndələri isə bu marketlərdə birlikdə işləyirlər.

Şulaveridə doğulub boya-başa çatan erməni əsilli Lyova bu marketlərdən birinin qarşısında meyvə-tərəvəz satır.

Kənd sakinləri üçün qeyri-adi hal olmasa da, kənardan gələnləri təəccübləndirəcək bir şey də odur ki, yerlilər bir-birinin dilində sərbəst danışa bilirlər.

Elə Lyova ilə söhbətimiz də Azərbaycanca baş tutur.

“Dünyada Şulaveri kimi yaxşı bir yer yoxdur. Burada insanların bir-birinə göstərdiyi hörməti qardaş qardaşa göstərməz, - deyən Lyova ətrafdakı azərbaycanlı dostlarına işarə edərək əlavə edir. - Bir şeyə ehtiyacım olanda köməyimə ilk onlar qaçırlar”.

Biz söhbət edərkən uşaqlıq dostu Bayram gülümsəyərək bizə baxır.

“O məndən daha yaxşı ermənicə danışır, indi, sadəcə utanır” – Lyova deyir.

Söhbətimiz boyu Lyova uşaqkən atası ilə birlikdə Bakıya etdiyi səyahətlərdən, atasının Bakıda ona aldığı velosipeddən, Xəzər sahillərindən danışır.
Lyovanın marketinin qarşısındakı dükanın sahibi isə azərbaycanlı Dürdanədir. Dürdanə 6 ildir buranı idarə edir. Bu illər ərzində erməni həmkəndlisi Mari onunla birlikdə işləyib. Dürdanə deyir ki, Mari ərini itirəndən sonra bir müddət işinə ara verib, sonra yenidən qayıdıb:

“Yenidən işə başlamaq istəyəndə yolun qarşısındakı marketin (sahibi ermənidir) sahibi onu işə götürmək istədi, amma Mari getmədi. O vaxt mənim başqa işçim var idi, amma dedim ki, gəl, bir şey fikirləşərik” – deyə Dürdanə xatırlayır.

Marketdə işlər çox olanda Dürdanənin uşaqları da köməyə gəlirlər. O deyir ki, Ramazan ayında oruc tutmuşdu, Mari isə onların yorulmaması üçün işlərin çoxunu özü görməyə çalışırdı.

Mari mənə Ermənistanda istehsal olunan qəhvə və Azərbaycanda istehsal olunan çay təklif edib kəndlərinin çoxmillətliliyindən, azərbaycanlılarla ermənilərin bayram günlərində bir-birlərinə göstərdikləri qonaqpərvərlikdən danışır.

Dürdanə deyir ki, marketinə təkcə Şulaveri və ətraf kəndlərdən yox, elə Ermənistandan da alış-verişə gəlirlər.

“Yaşlı Tiqran dayı var, hər dəfə Gürcüstana gələndə burda maşından düşür, ərzaq alış-verişi edib gedir”, - Dürdanə deyir.

Diqqətçəkən bir amil də bu alış-verişdə yaranmış etibardır. Dürdanə xanımın mənə göstərdiyi nisyə dəftərində təkcə yerlilərin yox, Ermənistandan olan müştərilərinin də adı var.

Onlar marketdən nisyə alış-veriş edir, pulları olanda isə borclarını ödəyirlər.
Dürdanə yalnız bir dəfə xoşagəlməz hadisə ilə qarşılaşdığını bildirir:

“Mari mənə xəbərdarlıq etdi ki, Ermənistandan olan bir qadına nisyə mal verməyim, amma qulaq asmadım. Qadın pulu vermədi. Tiqran dayının qızı Svetlana onu Ermənistanda tapdı və pulu ondan alıb atası ilə birlikdə mənə göndərdi”, - deyə Dürdanə əlavə edir.

Bu kənddə Azərbaycanla Ermənistan arasındaki proseslər də müzakirə olunur, lakin insanlar bu məsələlərin qonşuluq və dostluq münasibətlərinə mənfi təsir göstərməsinə imkan vermədiklərini deyirlər.

Şulaveridən təxminən 10 dəqiqəlik məsafədə yerləşən, ermənilərin və azərbaycanlıların birlikdə yaşadığı Mirzoyevka kəndində də vəziyyət oxşardır. Bu kənddə ermənilər və azərbaycanlılarla yanaşı çox az sayda yunan, yəhudi, assuriyalı və gürcülər də yaşayırlar.

Kəndə getdiyim gün bir evin qarşısındakı qələbəlik və səslənən Azərbaycan musiqisi diqqətimi çəkir.

Kənd sakinlərindən birinin oğlunun sünnət toyuna, demək olar ki, bütün kənd camaatı toplaşmışdı.

Yerli erməni və azərbaycanlı qadınlar qonaqlar üçün birlikdə yemək bişirirdilər.
Toy sahibi qonaqlarını narahat etməmək üçün şəkil çəkilməsinə icazə verməsə də, qonaqlarından 77 yaşlı Məhərrəm Məmmədovdan kənd haqqında məlumat verməsini xahiş edir.

"Biz hamımız burda mehriban yaşayırıq. Baxın, toy gedir, hamı bir yerdədir”,- Məhərrəm dayı deyir.

O, orta təhsilini kənddəki erməni məktəbində alıb. Dəfələrlə Ermənistana gedib, hətta həyat yoldaşı xəstələnəndə onu müalicə üçün Yerevana aparıb.
Qonşu Gürcüstanda ermənilərlə azərbaycanlıların birlikdə yaşadığı yerlərdən biri də təbii ki, paytaxt Tbilisidir.

Gürcüstanın və Cənubi Qafqazın tanınmış sənətçilərindən biri olan erməni əsilli rejissor Sergey Paracanovun xatirəsinə təşkil edilən tədbirdə usta rejissorun Bakıda və İstanbulda çəkdirdiyi fotoşəkillərə baxanda bir səs eşidirəm:

“Paracanovun sənətinə göstərdiyiniz marağa görə təşəkkür edirəm”, – bir nəfər nəzakətlə deyir, sonra özünü təqdim edir: Qaqik Xaratov

Tbilisinin erməni əsilli sakini Qaqik Xaratov bu şəhərin çoxmillətli olması ilə qürür duyur.

“Arzu edirəm ki, bütün dünyada sülh olsun, xüsusən də ermənilərlə azərbaycanlılar arasında. Bu vəziyyət bizim insanlarımıza yaraşmır”, - o, emosional bir şəkildə deyir.

Daha sonra uşaqkən hər yay tətilində ailəsi ilə birlikdə Bakıya etdiyi səfərləri, orada keçirdiyi xoş vaxtları, azərbaycanlı dostlarını həsrətlə xatırlayaraq sözlərinə davam edir:

“İtirdiyimiz bütün yaxşı şeylərin geri qayıtmasını istəyirəm. Zaman keçir, zamandan dəyərli heç nə yoxdur. Biz uşaqlarımıza necə bir gələcək qoyub gedirik?”

Qaqik arzulayır ki, Azərbaycan və Ermənistan arasında qısa zamanda sülh təmin edilsin və iki ölkə arasında bütün nəqliyyat maneələri aradan qaldırılsın.

İki ölkə arasında sülh yaranandan sonra Bakıya gedib muğama qulaq asmaq Qaqikin arzularından biridir.

O deyir ki, canı çay istəyəndə çayxanaya gedib orada azərbaycanlı dostları ilə çay içib söhbət edir.

Qaqik Xaratovun dediyi çay evi Tbilisidə, "Köhnə Şəhər"də yerləşir. Keçmiş sahibi, azərbaycanlı Sabir vəfat edəndən sonra çayxana fəaliyyətini dayandırıbmış.

Yerləşdiyi məhəllə camaatının istəyi və təklifi ilə çayxana 3 ay əvvəl yenidən açılıb. Yeni sahibi də azərbaycanlıdır.

İndi Hüseyin Allahverdiyevun işlətdiyi çayxana hazırda "Köhnə Şəhər"də fəaliyyət göstərən yeganə çay evidir.

Mirzə Fətəli Axundov küçəsində yerləşən çayxana gürcü, rus və azərbaycan dillərində yazılmış “çay” sözü və rəngarəng eksteryeri ilə dərhal diqqət çəkir.

İçəri girəndə sizi tarixə meydan oxuyan köhnə kərpic divarlar, qədim xalçalar, şəhərin rəngarəng və çoxmədəniyyətli həyatını əks etdirən rəsmlər və təbii ki, çay içib nərd, domino oynayan müştərilər qarşılayır.
Burda söhbət edən müştərilərə qulaq kəsiləndə eyni anda azərbaycanca, ermənicə, gürcücə və kürdcə də daxil olmaqla 4-5 fərqli dil eşidə bilərsən.

Bu dilləri necə öyrəndiklərini soruşduqda isə hamısı eyni cavabı verir: “Uşaq vaxtı bir yerdə oyun oynayırdıq, belə öyrənmişik”.

Ərazidəki kafe-restoranlar əksəriyyəti təqaüdçü olan bu insanların büdcəsinə uyğun olmadığından, bu çay evi məhəllə sakinlərinin sosiallaşması üçün mühüm məkandır. Məhəllə sakinləri çayxanada dostları ilə görüşürlər, çay içib söhbətləşirlər, özlərinin dediyi kimi “nərd oynayıb dincəlirlər”.

Tbilisidə doğulub boya-başa çatan Eduard (Edik) Petrosyan çay evinə tez-tez gəlir. O, Ermənistanla Azərbaycan arasında müharibənin təsirini hiss edənlərdən biridir.
Petrosyanın atası Gürcüstan ermənisi, anası isə İran azərbaycanlısı olub. Özünün dediyinə görə, Eduard cəmi dörd aylıq olarkən anası Stalin dövründə Qazaxıstana sürgün edilib və o, uzun illər anasından ayrı qalıb. Daha sonra anası bir azərbaycanlı ilə ailə qurub Bakıya köçüb, atası da başqa bir qadınla evlənib. Bakıda ana tərəfdən qohumlarının yaşadığını deyən Eduard Azərbaycandan olan iki qardaşından da həsrətlə danışır.

Sovet vaxtı qardaşlar bir-birinə gedib-gəliblər, lakin Ermənistanla Azərbaycan arasında müharibə başlayanda onların arasında əlaqə kəsilib, anası rəhmətə gedəndə isə bağları tamamilə qopub. O mənə iki qardaşının yaşadığı şəhərləri, onların ad və soyadlarını deyir:

“Soyadıma görə Azərbaycana gedə bilmirəm. Bir gün qardaşlarımın böyüyünü görsən, onun mənə nə qədər bənzədiyini anlayacaqsan. Bizim üzümüz eynidir”, - deyə əlavə edir.

İkinci Qarabağ Müharibəsindən illər əvvəl Azərbaycan Xarici İşlər Nazirliyi bu məsələ ilə bağlı bir açıqlamasında bəyan etmişdi ki, "bəzi milliyyətcə erməni olan şəxslərin hələ də etnik zəmində təfriqəçiliyin yaranması istiqamətində işlər aparır və o səbəbdən də bu kimi tədbirlər həyata keçirilir."
Çayxananın yerləşdiyi küçədə doğulub boya-başa çatan Vaqif Novruzov da bu məkanın daimi sakinlərindəndir.

“Pis millət yoxdur, pis adam var” – deyə o, sözə başlayır və deyir ki, yaşadığı məhəllənin illərdir dəyişməyən bir qanunu var: hər cür etnik ayrı-seçkilik qadağandır.

“Bizdə ayrı-seçkilik yoxdur. Buraya həm ermənilər, həm azərbaycanlılar, həm kürdlər, həm də gürcülər gəlir. Biz hamımız dostuq. Biz dost olmasaq, bu davada qalib gələn olmayacaq"- deyə o əlavə edir.

"Karantin şərtlərini pozduqlarına görə tətbiq edilən cərimələr ancaq dövlət səviyyəsində ləvğ edilə bilər". Avtosfer.az xəbər verir ki, bunu Qaynarinfo-ya açıqlamasında hüquqşünas Əkrəm Həsənov deyib. Onun sözlərinə görə, bununla bağlı dövlət səviyyəsində qərar verilməlidir:

"Yoxsa, bu cərimələr həmin insanların adında qalacaq və hara da getsələr onlarla bağlı araşdırma aparan zaman sistemdə görünəcək. Yaxud da ayrı-ayrı fərdlər müraciət edib hüquq-mühafizə orqanlarından xahiş edə bilərlər ki, adlarında olan cəriməni ləvğ etsinlər. Tələb edə bilməzlər, çünkü onlar üçün bu müddət bitib. Gərək həmin vaxtlar bununla bağlı məhkəməyə şikayət edəydilər. Onu da etməyiblər. Hazırda onların üzərində bu cərimələr varsa, qanun üçün fərqi yoxdur, yəni bu karantinə, yaxud maska taxmamağa görə olub ya yox".

Əkrəm Həsənov qeyd edib ki, cəriməni tətbiq edən qurumun onu ləvğ etməsi inandırıcı deyil:

"Nəyə əsasən? Birini ləvğ edəcək, bəs o biriləri? Ona görə də bu dövlət səviyyəsində həll olunmalıdır".

Qeyd edək ki, Azərbaycanda 2020-ci ildən pandemiya ilə əlaqədar karantin qaydaları tətbiq edilib. Bu qaydalara əməl etməyənlərə hüquq-mühafizə orqanları tərəfindən müvafiq cərimələr tətbiq edilib.

Bu gün səhər 199 saylı sərnişin avtobusunda insident yaşanıb.

Yenicag.az xəbər verir ki, həmin marşrut avtobusunun sürücüsü ilə sərnişinlərin arasında baş verən mübahisə sərnişinlərdən birinin avtobusun şüşəsini yumruqlaması ilə nəticələnib.

Belə ki, Abşeron Gənclər şəhərciyinin qarşısındakı “Mebel evi” ticarət mərkəzinin dayanacağından sərnişin sıxlığı olduğu üçün sürücü orta və arxa qapıdan sərnişinlərin avtobusa minməsinə imkan yaradıb. Adətən, bu hal avtobusda sıxlıq olan vaxtlarda sürücülərin əksəriyyəti bu şəraiti yaradır. Yolboyu avtobusda sərnişin sıxlığlı artdığı üçün sərnişinlər dayanacaqda əlavə sərnişin götürməməsi üçün sürücüyə irad bildiriblər. Bu iradlara sürücü çox əsəbi tonda cavab verib. Hər dayanacaqda avtobusu uzun müddət saxlayıb, sərnişinlərlə mübahisə edən sürücü kobud ifadələr işlətməkdən belə çəkinməyib. “Dayanmadan sürəcəm”, “Bir də Yaşıl bazarda saxlayacam”, “Duxunuz çatırsa, səsinizi çıxarın” və s. bu kimi sözləri sərnişlərin etirazına səbəb olub.

Avtovağzaldakı dayanacaqda sərnişlərdən biri sıxlıqda irəli gedə bilmədiyi üçün sürücüdən ön qapını açmasını istəyib. Bu zaman sürücü əsəbi tonda qapını açmayacağını bildirib, təklif edib ki, sərnişin orta qapıdan düşsün. Sərnişinin təkidinə baxmayaraq, sürücü avtobusun qapısını açmayıb, avtobusu sürmək istəyib. Bu da sərnişini qəzəbləndirib, yumruqla şüşəyə zərbə endirib. Sərnişinlərin avtobusdan düşməsinə icazə verməyən sürücü qapıları açmaqdan imtina edib, 102-yə zəng edib. İşə gecikdiklərini bildirən sərnişinlərə isə sürücünün cavabı belə olub: “Polis və şirkətin işçiləri gələcək, onlara cavab verərsiniz”.

Uzun mübahisələrdən sonra sərnişinlər avtobusdan düşürülüb, sürücü avtobusu sürüb gedib.

Hadisə ilə bağlı “Xaliq Faiqoğlu” MMC-nin mətbuat xidmətinin rəhbəri Nizam Rzayev Yenicag.az-a bildirdi ki, baş verən insidentdən məlumatları var.

“99 JP 626 nömrə nişanlı avtobusun sürücüsü Zülfqarov Zahidlə sərnişin arasında saat 09:15-09:30 radələri arasında baş verən isnidentin kamera görüntüsünün çıxarılacaq və hadisə araşdırılacaq”, – deyə o bildirib.

“Arvad hər şeyə cavabdeh idi” - qeyri-qanuni immiqrant ailəsi olan Şapoşnikoblar Avropada partlayış və zəhərlənmələrin təşkilinə necə kömək ediblər?

Avropada Rusiya hərbi kəşfiyyatının təşkil etdiyi bir sıra partlayışlar və zəhərlənmələr 1990-cı illərin əvvəllərində Çexiyada siyasi sığınacaq almış evli cütlük Nikolay və Yelena Şapoşnikovla əlaqələndirilir. Bu barədə “The Insider”in araşdırmasında qeyd edilir.

Şapoşnikovların Çexiya vətəndaşlığı var - onlar bunu sonradan alıblar. Lakin cütlük tərcümeyi-hallarının bəzi təfərrüatlarını gizlədiblər. Nikolay Əfqanıstandakı xidməti barədə yerli hakimiyyət orqanlarına məlumat verməyib və özünü atası kimi təqdim edərək həyat yoldaşının birinci evliliyindən olan oğlu üçün saxta doğum şəhadətnaməsi təqdim edib.

Yelena 1992-ci ildə sığınacaq aldıqdan sonra Ukrayna pasportunu təhvil verdiyi barədə yalan danışıb və bu sənəddən Rusiya və Ukraynaya getmək üçün istifadə etməyə davam edib. Baxmayaraq ki, orada siyasi səbəblərə görə təqib oluna biləcəyini iddia edirmiş.

2000-ci illərin əvvəllərində Nikolay Çexoslovakiya dövlət təhlükəsizlik aparatının keçmiş məxfi agenti, əvvəllər əks-kəşfiyyat şöbəsində məlumat verən və Sovet qoşunları ilə sıx əlaqələr saxlayan Petr Bernatikin “İmex” qrupunda işə düzəlib. Şirkət silah ticarəti ilə məşğul idi və Şapoşnikov orada biznesin inkişafı üzrə menecer kimi işləyirdi: o, “Imex” üçün yeni müştərilər axtarır və mövcud müştərilərə məsləhət verirdi. Yelena isə ərinin işi ilə rəsmi əlaqəsi olmayan öz biznesini idarə edirdi. Lakin polis sonradan qadının “İmex”in fəaliyyətində tam iştirak etdiyini və QRU-nun 29155 saylı hərbi hissəsinin rəisi, general Andrey Averyanovdan göstəriş alaraq ərinin hərəkətlərini fəal şəkildə idarə etdiyini öyrənə bilib.

Nikolayın ayda təqribən 650 dollar qazanmasına baxmayaraq, cütlük Çexiyada daşınmaz əmlak, Yunanıstanda villa alıb və onları “turistlərə” icarəyə veriblər. İstintaq bildirir ki, villanın əsl qonaqları ondan təhlükəsiz ev kimi istifadə edən QRU zabitləri olub.

“The Insider” xəbər verir ki, evli cütlük kəşfiyyatçılar üçün məlumat toplayıb, həmçinin Çexiya və Bolqarıstandakı silah-sursat anbarlarında partlayışların təşkilinə kömək edib. Bolqarıstanlı silah alverçisi Emelyan Gebrevin zəhərlənməsində Şapoşnikovların da əli ola bilər. O zəhərlənmə zamanı Ukrayna Silahlı Qüvvələri üçün sursat tədarükçüsü hesab olunurdu. Gebrev özü sonradan bildirib ki, zəhərlənmədən az əvvəl Ukraynaya sursat verməyi dayandırıb.

2014-cü ildə Şapoşnikovlar, Averyanovun göstərişi ilə Mişkina və Çepiqa (daha yaxşı Boşirov və Petrov kimi tanınır - Sergey Skripal və qızı Yuliyanın Solsberidə zəhərlənməsinin iştirakçıları) mərmilərin satın alındığı Vrbetitsadakı anbara ziyarət təşkil etdilər, amma Gebrev tərəfindən saxlanılırlar. Onların ərazidə göründüyü gün anbarlardan birində güclü partlayış baş verib. Hadisə nəticəsində iki nəfər həlak olub.

Çex hüquq-mühafizə orqanları Şapoşnikovların QRU zabitləri ilə əlaqələrini və onların Çexiya və Bolqarıstandakı partlayışlarla əlaqəsini göstərən çoxlu sübutlar tapmağa müvəffəq olub. Həmin vaxt Yunanıstanda yaşayan cütlük dindirilmək üçün Çexiyaya gəlməkdən imtina etdiyi üçün yerli hakimiyyət nümayəndələri vasitəsilə onlarla müsahibə aparılıb. Cütlük 29155-ci bölmənin üzvləri ilə bütün əlaqələrinin "şəxsi" olduğunu və ya “Imex”in biznes maraqları ilə idarə olunduğunu təkid edib və həmçinin QRU-ya hər hansı təxribat əməliyyatında bilərəkdən kömək etmədiklərini iddia edib.

Şapoşnikovlar Çexiya hakimiyyətini rus mənşəli olduqlarına görə siyasi təqib etməkdə günahlandırdılar. Lakin “The Insider” Yelenanın gizli şəkildə Rusiya pasportunu aldığını və sonradan xaricə gedərkən həmin pasportdan istifadə etdiyini açığa çıxara bilib. Üstəlik, bu sənəd 29155-ci bölmənin üzvləri üçün nəzərdə tutulmuş nömrələr diapazonundan olub. Yelenanın bu pasportla Moskvaya səfərlərindən biri Vladimir Putinin öz fərmanı ilə ona Rusiya Qəhrəmanı adına layiq görüldüyü vaxta təsadüf edib.

Hüquq-mühafizə orqanlarının əməkdaşlarının diqqətini çəkən məqamdan biri Nikolay Şapoşnikovun spirtli içkilərdən istifadə etməyə başlaması olub. Nikolay ona yazılan dərmanlara laqeyd yanaşmağa başlayıb və 2024-cü ilin fevralında infarktdan ölüb. Yelena Şapoşnikova isə hazırda Yunanıstanda yaşayır.

Qeyd edək ki, aprelin 29-da Çexiya polisi və Milli Mütəşəkkil Cinayətkarlıqla Mübarizə Mərkəzi (NCOZ) 2014-cü ildə Vrbetisa anbarında baş verən partlayışlarda Rusiya hərbi kəşfiyyatını günahlandırıb. Eyni zamanda, idarədən qeyd edilib ki, bu, yeganə belə hərəkət deyil. Rusiya kəşfiyyatının Avropa İttifaqı və Ukrayna ərazisində "uzunmüddətli təxribat fəaliyyəti proqramının həyata keçirilməsinin" bir hissəsidir. Hüquq-mühafizə orqanları isə hələlik işə əlavə olaraq baxa bilmirlər, çünki şübhəlilər Rusiyadadırlar və Moskva onları Çexiya hakimiyyətinə verməkdən imtina edib.

2021-ci ilin aprelində Çexiya polisi Vrbetisadakı partlayışlarda əli olmaqda şübhəli bilinən Aleksandr Petrov və Ruslan Boşirovu (Mişkin və Çepiqu) axtarışa verib.

Müəllif: Turan Abdulla
ayna.az

Tanınmış uzman-doktor Zamin Həşimov sosial şəbəkə hesabında sensasiyaya səbəb olacaq qeydlər yazıb.

Gununsesi.info tanınmış həkimin üzləşdiyi olay haqqında qeydlərini təqdim edir.

“Marqans əməliyyatı” həyata geçirən dəstə mövcuddur . Həkimlərə qurulan bu hiylənin qurbanı bu gün mən olmalı idim .

Ssenari üzrə mənə zəng gəldi , övladının sünnət olduğunu və az miqdarda “marqans”a ehtiyacı olduğunu bildirdi .Daha sonra iş Otağıma girdi və stolumun üstünə 10 AZN qoydu . Pulunu geri qaytardıqdan sonra mən həmin şəxsi sorğu-suala aldım və məlum oldu ki onun dediyi ad soyadda sünnət olunan uşaq yoxdur .

( Güya Rahat doktor onun övladını sünnət edib , doktora həmin an zəng edib dəqiqləşdirdim ). Özünün də kimliyini gizlətdi . Həmin şəxsin videosunu öz razılığı ilə çəkdim . Videonu vəkilimlə məsləhləşdikdən sonra paylaşacam . Özünüz qiymət verəcəksiz .

Eşitdiyimə görə məndən əvvəl başqa həkimlərə eyni tələ qurulub 7000 AZN , 2000 AZN pul alıblar. Bu işin arxasında kimlər olduğunu deyə bilmərəm . Ancaq Gəncədə zərərçəkmişlər var .

Bəlkə də bizim alın tərimizlə qazandığımız pula gözləri düşüb . Bəlkə də bu gün bir şəhid atasını əməliyyat etliyim üçün idi . Bəlkə də 44 günlük müharibəni onlar kimi kresloda oturup “vodka” içərək deyil , Azərbaycan əsgərini həyata qaytarmaq üçün mücadilə etdiyimiz üçündür”.

Sonda Daxili İşlər Nazirliyinin sosial şəbəkə hesabını tağ edən Zamin Həşimov nazirlikdən bu olayın araşdırılmasını xahiş edib.