Gürcüstanda 2026-cı il martın 1-dən etibarən qüvvəyə minəcək yeni qərar minlərlə miqrant üçün ciddi sosial-iqtisadi problem yarada bilər. Sənədə əsasən, xarici vətəndaşların taksi sürücüsü, kuryer və tur bələdçisi kimi çalışmasına tətbiq olunan kvota sıfırlanır. Bu isə faktiki olaraq həmin sahələrdə miqrant əməyinə qadağa qoyulması deməkdir. Qərarın xüsusilə Gürcüstanda çalışan azərbaycanlılara ağır təsir edəcəyi bildirilir.

Musavat.com xəbər verir ki, bu barədə İrakli Kobaxidze fərman imzalayıb.

Tiflisdə fəaliyyət göstərən “Yandex Partner” taksi şirkətinin sahibi, iş adamı Arif Lələyev Musavat.com-a açıqlamasında bildirib ki, martın 1-dən etibarən taksi və çatdırılma (delivery) sahəsində çalışan miqrantlar üçün kvota sıfırlanır: “Çatdırma və tur rəhbərliyi birbaşa bizə aid deyil. Amma taksi fəaliyyəti ilə bağlı qərar bizi ciddi şəkildə təsirləndirir. Burada xeyli azərbaycanlı çalışır. Təkcə mənim şirkətimdə xeyli azərbaycanlı sürücü var, digər şirkətlərdə də vəziyyət eynidir. Martın 1-dən sonra bu insanlar ümumiyyətlə, işləyə bilməyəcəklər. Bir var müəyyən prosedurlar tətbiq oluna – qeydiyyat, oturum icazəsi, iş icazəsi və sair. Digər sahələrdə çalışan miqrantlara bu imkan verilir. Amma taksi sürücüləri üçün heç bir keçid mexanizmi və ya icazə proseduru nəzərdə tutulmadan, birbaşa qadağa qoyulur. Bu isə bizim üçün çox ağır qərardır”.

Arif Lələyevin sözlərinə görə, Gürcüstanda xüsusilə Banqladeş və Hindistandan gələn miqrantların sayı çoxdur: “Əgər məqsəd həmin ölkələrdən gələnlərin sayını azaltmaqdırsa, bu, dövlətin qərarıdır. Amma azərbaycanlıların onlarla eyni kateqoriyada dəyərləndirilməsi bizə ağır gəlir. Azərbaycan və Türkiyə vətəndaşlarını istisna etmək olar. Biz istəyirik ki, vergimizi ödəyib, qanuni şəkildə fəaliyyətimizi davam etdirək”.

İş adamı bildirir ki, qərar qüvvəyə mindikdən sonra miqrant sürücülər üçün ciddi cərimələr nəzərdə tutulur: “Martın 1-dən sonra miqrant sürücü taksi fəaliyyəti ilə məşğul olsa, sürücüyə 2000 lari (1300 manat), iş verən şirkətə isə ilkin mərhələdə 3000 lari (1900 manat) cərimə tətbiq olunacaq. Təkrar hal baş verərsə, cərimələr 7000–8000 lariyə qədər arta bilər. Bu şərtlər altında işləmək faktiki olaraq mümkünsüzdür”.

Onun sözlərinə görə, Gürcüstanda ümumilikdə “Yandex” platformasında fəaliyyət göstərən azərbaycanlılara məxsus 16 taksi parkı var. “Bolt” platformasında da oxşar vəziyyət hökm sürür. Əsas problem vətəndaşlığı olmayan şəxslərlə bağlıdır.

Arif Lələyev qeyd edir ki, Gürcüstanda çalışan azərbaycanlıların əksəriyyəti ağır sosial durumda olan insanlardır:

“Burada Ukraynadan gələn azərbaycanlı da var, Bakından və rayonlardan gələnlər də. İnsanlar ailələrinə çörək pulu göndərirlər. Quru yolun beş ildir bağlı olması da vəziyyəti çətinləşdirib. Çoxunun nə geri qayıtmağa imkanı var, nə də yeni iş tapmağa. Mən şəxsən neçə-neçə insanı işlə təmin etmişəm, maşın icarəyə vermişik ki, bir tikə çörək qazansınlar”.

İş adamı Azərbaycan hökumətindən məsələyə müdaxilə edilməsini arzulayır: “Qərarın ən azı yumşaldılması və ya keçid dövrünün tətbiqi vacibdir”.

İqtisadçı Natiq Cəfərli Musavat.com-a bildirib ki, orada çalışan soydaşlarımızın səfirlik və konsulluq xidmətləri, eləcə də vəkillik xidməti vasitəsilə iş icazələrinin alınmasına dəstək göstərilə bilər. Belə bir hüquqi yardım mərkəzi yaradılması mümkündür.

Afaq Mirayiq,

Qazaxıstan hökuməti Xəzər dənizinin öyrənilməsi və qorunması üçün təxminən 2,5 milyon dollar (1,1 milyard təngə) vəsait ayırıb.

Musavat.com xəbər verir ki, Qazaxıstanın baş naziri Oljas Bektenovun imzaladığı sərəncama əsasən, vəsait "Qazaxıstan Xəzər Dənizi Elmi-Tədqiqat İnstitutu"na ayrılıb.

Məqsəd Xəzər dənizinin hərtərəfli öyrənilməsi, ekoloji dayanıqlığın dəstəklənməsi və regionun ətraf mühitinin qorunmasıdır.

Qazaxıstan hökumətinin mətbuat xidməti bildirir ki, ayrılan maliyyə institutun elmi potensialını artıracaq.

Vəsait dəniz monitorinqi üçün avadanlıqların alınması, eləcə də hidrobioloji və hidrokimyəvi laboratoriyaların təchiz edilməsinə sərf olunacaq.

“Bu dəstək institutun birbaşa dənizdə sistematik monitorinq aparmasına, hidrometeoroloji və bioloji ətraf mühit parametrlərini izləməsinə imkan yaradacaq. Nəticədə Qazaxıstan hissəsində dəniz prosesləri haqqında elmi əsaslı məlumat bazası genişlənəcək”, - açıqlamada qeyd olunub.

Musavat.com

Ukrayna Prezidenti Volodimir Zelenski ölkəsinin hava hücumundan müdafiə (HHM) sistemləri ilə bağlı üzləşdiyi ən böyük maneəni açıqlayıb.

Musavat.com xəbər verir ki, dövlət başçısı BBC News telekanalına verdiyi müsahibədə qeyd edib ki, bu gün Ukrayna üçün HHM məsələsi ən mürəkkəb və həlli çətin olan problemdir.

Zelenski qərbli tərəfdaşların Ukraynaya texnoloji lisenziyalar verməkdən imtina etdiyini bildirib: "Təəssüf ki, tərəfdaşlarımız hələ ki, bizə məsələn, "Patriot" sistemlərini özümüzün istehsal etməyimiz üçün və ya heç olmasa əlimizdə olan sistemlər üçün raket istehsal etmək üçün lisenziya vermirlər. Hələlik bu məsələdə uğur qazana bilməmişik".

Prezident vurğulayıb ki, müharibənin gedişatını dəyişməyin yolu Ukrayna səmasını tamamilə bağlamaqdan keçir. Onun sözlərinə görə, əgər mülki əhali və infrastruktur qorunarsa, iqtisadiyyat işləyəcək, uşaqlar məktəbə gedəcək və toplanan vergilər cəbhəyə yönləndiriləcək. "Bu, ordumuzu gücləndirməyin ən sürətli yoludur, lakin təəssüf ki, lisenziya və çatışmazlıq səbəbindən hələ də buna nail ola bilmirik", - deyə o əlavə edib.

Xatırladaq ki, Ukrayna rəhbərliyi artıq bir neçə aydır ki, ABŞ və digər müttəfiqlərindən hərbi sənaye kompleksinin yerli istehsala keçməsi üçün icazələr almağa çalışır, lakin Vaşinqtonun bu məsələdə "iqtisadi praqmatizm" nümayiş etdirdiyi bildirilir.

Musavat.com

Bir müddətdir Emin və Mehman Hüseynov qardaşlarının siyasi mübarizə çərçivəsini aşan və söyüş ritorikasına əsaslanan fəaliyyətləri müzakirə olunmaqdadır. Açıq şəkildə görünür ki, Azərbaycan dövlətinə qarşı sistemli və total informasiya xətti formalaşdırılıb.

Və bu xəttin üzvləri əxlaqi keyfiyyətlərdən uzaq – amoral, milli-genetik kimliyi əsaslı suallar doğuran, erməni təşkilatlarının koordinasiyalı təsiri altına düşən və hətta ən elementar mənəvi-mental dəyərlərdən imtina edən şəxslərdən təşkil olunub.

Hədəfləri bəllidir: Azərbaycan Prezidentinin, onun ailə üzvlərinin və bütünlükdə dövlət atributlarının təhqir olunması, bununla da aqressiv kütlədə dövlət aparatına qarşı etimadsızlıq immuniteti formalaşdırmaq, dəyərlərin aşağılanaraq adiləşdirilməsi və dövlət sisteminə qarşı “istənilən mübarizə üsulu”nun tətbiq olunmasının mümkünlüyünü təbliğ etmək.

Prezident İlham Əliyev başda olmaqla, atributların mənəvi və hüquqi müstəvidə qorunması dövlətin, hər bir vətəndaşın strateji hədəfi olmalıdır. Hər hansı videolara baxıb “pıçı-pıçı” ilə danışmağın yox, ortaya mövqe qoymağın zamanıdır.

Mehman Hüseynov çıxışında ona ötürülən məlumatların rus dilində yazılmış mətnlərdən ibarət olduğunu deyir. Rusiya ilə münasibətlərin heç də yaxşı olmadığı bir ərəfədə Azərbaycana qarşı “kompromat”ların məhz bu ölkənin xüsusi xidmət orqanlarından ötürüldüyünü etiraf etmək də məsələnin maraqlı tərəfidir. Amma necə olur ki, xüsusi xidmət orqanları dövlət atributlarının təhqir olunmasını məhz sizə – iki qardaşa həvalə edir?! Sizdə hansı “keyfiyyət”lər var ki, onların tələblərinə cavab verirsiniz!?

Hüseynov qardaşları paralel olaraq, “maraqlı” bir xətt də nümayiş etdirirlər. Məsələn, kim Prezidenti və öz dövlətini müdafiə edəcəksə, Mehman o adamların da şəkillərinin göstərərək söyməli və bunula da dövlətin ideoloji cəbhədəki fəaliyyətini də tərksilah etməlidir. Özləri açıq etiraf etməsələr də, söyüşlə insanları öz dövlətinin müdafiəsindən çəkindirməyə çalışırlar. Yəni, “heç kəs özünü söydürmək istəməyəcək” ümidi ilə “söyüş arxitekturası” qurublar.

Bir müddət əvvəl Hüseynov qardaşlarının şahmatçı HARRİ KASPAROVla görüşməsi də çox maraqlı məqamdır. Bu görüşün təlimatları, səbəbləri və öhdəlikləri də tezliklə ortaya çıxacaq.

Bir şey aydın görünür: nə qədər özlərini neoliberal libasında sırımağa çalışsalar da, onların addım-addım əsl simalarını ifşa edirlər. Erməni lobbisinə xidmət edən, Azərbaycanın getdikcə münasibətlərinin korlandığı Rusiyanın xüsusi xidmət orqanlarının agentinə çevrilən bu adamların etdikləri Vətənə xəyanətdən başqa bir şey deyil.

Hüseynovların anlamadığı, lakin ciddi müşahidə olunan mənzərə tamam başqadır: Azərbaycan dövləti bütün bu şantajların qarşısında aciz deyil.

Əgər Azərbaycan xalqının bir hissəsi – diasporası, siyasətçiləri, jurnalistləri, həkimləri, müəllimləri, alimləri, idmançıları, qaziləri, şəhid ailələri “mənəvi səfərbərlik” elan etsələr, nə Hüseynov qardaşları, nə də onları “kompromat”larla təmin edən şəxslər bu prosesin qarşısında dura bilməyəcəklər. Yəni, proses göründüyü kimi sadə deyil, sadəcə Azərbaycan ictimaiyyəti bütün bu məsələlərə hələki əxlaqi çərçivədə reaksiya verir.

Müəllif: Samir Feyruzov