Xəbər verdiyimiz kimi, Naxçıvan Beynəlxalq Hava Limanı İran tərəfindən dron zərbəsinə məruz qalıb.

Musavat.com xəbər verir ki, İran İslam İnqilabı Keşikçiləri Korpusunun (SEPAH) rəsmi “Telegram” kanallarından birində Naxçıvan hava limanına dron hücumu ilə bağlı paylaşım edilib.

Həmin kanal “Reuters” agentliyinə istinad edərək, sanki kənar müşahidəçi kimi Naxçıvanın bombalanması ilə bağlı məlumat paylaşıb.

Qeyd edək ki, hazırda İranın hərbi elitası başsızdır və SEPAH-ın əlinə bir fürsət düşüb, sağa-sola bomba atır. SEPAH Türkiyəni, Azərbaycanı və İslam dünyasını İrana qarşı qaldırır.

Xatırladaq ki, dünən İrandan buraxıldığı və İraqla Suriya hava məkanından keçərək Türkiyə istiqamətinə yönəldiyi müəyyən edilən bir ballistik raket Şərqi Aralıq dənizi üzərində NATO-nun hava və raketdən müdafiə sistemləri tərəfindən zərərsizləşdirilib.

İqbal RZAYEV,
Musavat.com

İran ucuz dronlarla ABŞ və müttəfiqlərinin raket ehtiyatlarını tükəndirir.

Musavat.com xəbər verir ki, bu mövqe "The New York Times" (NYT) qəzetinin hazırladığı materialda yer alıb.

Bildirilir ki, ABŞ İran üzərindəki hava məkanına hakimdir. Lakin maddi baxımdan bu üstünlük Amerikanın tərəfində deyil. Belə ki, İran Yaxın Şərqdə dəqiq zərbələr endirmək üçün ucuz dronlardan istifadə edir. ABŞ və müttəfiqləri İranın ballistik raket və dronlarının böyük əksəriyyətini ələ keçirə bilən hava hücumundan müdafiə sistemlərinə malikdirlər ki, bu da mürəkkəb, lakin bahalıdır. Texasda yerləşən dron istehsalçısı Hylio şirkətinin baş direktoru və həmtəsisçisi Artur Erickson qeyd edir ki, "dronu vurmaq, şübhəsiz ki, onu havaya qaldırmaqdan daha bahadır": "Bu, pul oyunudur. Hər atış üçün xərc, hər ələ keçirmə nisbəti ən yaxşı halda 10-a bərabərdir. Lakin xərc baxımından bu, İranın xeyrinə 60 və ya 70-ə bərabər ola bilər."

Qeyd olunur ki, ABŞ və İsrail hücumları başlayandan bəri İran tək bir istiqamətdə 2000-dən çox dron buraxıb ki, bunlardan bəziləri milyardlarla dollarlıq hava hücumundan müdafiə sistemlərinə baxmayaraq hədəflərinə çatıb. Bu, təkcə Yaxın Şərqdə deyil, həm də hər yerdə qloballaşan bir problemdir. Hücum dronlarının ucuz və onlara qarşı müdafiənin baha olduğu bir dünyada, xərclər sonda qadağanedici hala gələ bilər.

Musavat.com

ABŞ Hərbi Dəniz Qüvvələri əməliyyat şəraiti imkan verən kimi Hörmüz boğazından keçən kommersiya gəmilərini müşayiət etməyə başlaya bilər.

Musavat.com xəbər verir ki, bunu ABŞ Enerji naziri Kris Rayt "Fox News"un ABŞ Hərbi Dəniz Qüvvələri gəmilərinin Hörmüz boğazından keçən tankerləri müşayiət etməsi ehtimalı ilə bağlı sualına cavab olaraq deyib:

"Xeyr, hələ yox. Bunu mümkün qədər tez edəcəyik. Hazırda Hərbi Dəniz Qüvvələrimiz və əlbəttə ki, hərbçilərimiz başqa şeylərə, yəni İran rejiminin tərksilah edilməsinə diqqət yetirirlər".

Xatırladaq ki, dünən İran İslam İnqilabı Keşikçiləri Korpusu (SEPAH) Hörmüz boğazına tam nəzarət etdiyini və keçid etməyə çalışan hər hansı bir gəminin raket və ya dronlarla vurulma riski olduğunu bəyan edib.

Bazar günündən bəri Hörmüz boğazında və bitişik sularda bir neçə tankerə hücum edilib. Bəzi gəmilər boğaza yaxınlaşmamaq barədə radio xəbərdarlıqları aldığını bildiriblər.

ABŞ Prezidenti Donald Tramp bu xəbərlər fonunda qeyd edib ki, ABŞ Hərbi Dəniz Qüvvələri lazım gələrsə, tankerləri Hörmüz boğazından keçirəcək.

Musavat.com

İslam İnqilabı Keşikçiləri Korpusu(SEPAH) İraq Kürdüstanının muxtar bölgəsindəki kürd paramilitar mövqelərinə raket zərbəsi endirib.

Musavat.com xəbər verir ki, SEPAH baş qərargahının müvafiq açıqlamasını"Əl-Mayadin" televiziya kanalı yayıb.

Açıqlamada qeyd olunur ki, zərbələr İraq Kürdüstanında “İran əleyhinə olan kürd qruplarının yerləşdiyi yerlərə” endirilib.

İranın Ali Milli Təhlükəsizlik Şurasının katibi Əli Laricani isə bəyan edib ki, İran Silahlı Qüvvələri sərhədlərdəki vəziyyəti tam nəzarətdə saxlayır və separatçı qrupların heç bir tədbir görməsinə icazə verməyəcək: "Separatçı qruplar hər hansı bir hərəkətə cəhd etsələr, onlara heç bir güzəşt etməyəcəyik. Silahlı Qüvvələr sərhəddəki vəziyyətə tam nəzarət edir".

Bu açıqlamalardan sonra İraq Kürdüstanından İranın sərhəd bölgələrindəki hərbi qüvvələri atəşə tutulub.

Musavat.com