Ermənistanın Ərazi İnkişafı və İnfrastruktur Nazirliyi Gorus hava limanının yenidən işə salınması üçün ilkin araşdırmalar aparır.
Departament bu barədə “Sputnik Ermənistan”ın sorğusuna cavab olaraq məlumat verib.
“Nəzərinizə çatdırırıq ki, nazirlik Gorus hava limanının yenidən işə salınması, o cümlədən binanın və uçuş-enmə zolağının bərpası ilə bağlı ilkin araşdırma aparır”, - deyə məlumatda bildirilir.
Nazirlikdən onu da qeyd ediblər ki, bərpa işlərinin dəyəri və müddəti tədqiqatlar başa çatdıqdan sonra müzakirə oluna bilər.
Bundan əvvəl Ermənistanın ərazi idarəetmə və infrastruktur naziri Qnel Sanosyan bildirib ki, hakimiyyət Gorus aeroportunu bərpa etmək niyyətindədir.
Qeyd edək ki, Gorus hava limanı 70-ci illərin sonlarında tikilib. Gündə 8-ə qədər uçuş qəbul edib. İrəvandan buraya An-2 və Yak-40 təyyarələri uçub. (Publika.az)

Kolumbiyada bir vaxtlar dünyanın ən böyük narkotaciri hesab olunan Pablo Eskobar tərəfindən ölkəyə gətirilən, sonra isə hədsiz sürətlə çoxalmağa başlayan “kokain” begemotlarının sterilizasiyasına başlanılıb. Hökumət bu yolla heyvanların sayını azaltmaq istəyir.

Ancaq hökumət nümayəndələrinin sözlərinə görə, sterilizasiya uzun vaxt tələb edir, çünki heyvanların yerini tapmaq və onları tutmaq çətindir.

Hazırda iki erkək begemot və bir dişinin sterilizasiyası həyata keçirilib. Proqrama əsasən ildə təxminən 40 begemot bu prosedurdan keçməlidir.

Məlumata görə, ölkədə ilk “kokain” begemotları Eskobarın təşəbbüsü ilə peyda olub. Belə ki, narkobaron dörd Afrika begemotunu Hasienda-Napoles malikanəsindəki şəxsi zooparkına gətirdib. Bu gün onların sayının 169 olduğu təxmin edilir, tədbir görülməsə 2035-ci ilə qədər begemotların sayı 1000-ə çata bilər.

Bu heyvanlar üçün Kolumbiyadakı yırtıcılar tərəfindən təhdid yoxdur, bu səbəbdən onlar ekosistemi poza biləcək invaziv növ elan ediliblər.

Qeyd edilir ki, sterilizasiya heyvanlar üçün nəzərdə tutulan üç tədbirdən biridir. Belə ki, heyvanların bəzilərini köçürmə, bəzilərini isə “etik səbəblərə görə” evtanaziya gözləyir.

Xatırladaq ki, Yeni Zelandiyada da elan edilib, invaziv növ sayılan vəhşi heyvanların kütləvi məhvinə başlanılıb. 2050-ci ilə qədər bütün siçovullar, sincablar, opossum və vəhşi pişiklər bu siyasətin qurbanı olacaqlar.


Mənbə: Gazeta.ru

"Azərbaycan İrqi Ayrı-seçkiliyin Bütün Formalarının Ləğv Edilməsi haqqında Beynəlxalq Konvensiyanın (CERD) tətbiqi ilə bağlı Ermənistanın Azərbaycana qarşı iş üzrə Beynəlxalq Ədalət Məhkəməsinin 17 noyabr 2023-cü il tarixli müvəqqəti tədbirlər barədə qərarını qeydə alıb".

Bu barədə Xarici İşlər Nazirliyindən məlumat verilib.

"Biz Məhkəmənin Azərbaycanın suverenliyini və ərazi bütövlüyünü bir daha təsdiq edən, Ermənistanın Azərbaycanın Qarabağ üzərində uzun müddətdir qəbul edilmiş və beynəlxalq səviyyədə tanınmış suverenliyini şübhə altına alan tələbini rədd edən qərarını alqışlayırıq. Həmçinin diqqətəlayiq haldır ki, Məhkəmə Azərbaycanın bütün hərbi və hüquq-mühafizə orqanlarının şəxsi heyətinin Qarabağ bölgəsindən çıxarılması ilə bağlı əsassız və gülünc tələbini də rədd edib", - nazirlikdən bildirilib.

Qeyd olunub ki, məhkəmə tərəfindən qeyd olunan tədbirlər Azərbaycan hökumətinin Qarabağın erməni sakinləri ilə bağlı artıq bəyan olunmuş siyasətini qəbul edir: "Bu, milli və ya etnik mənşəyindən asılı olmayaraq bütün sakinlərin təhlükəsizliyini və mühafizəsini təmin etmək barədə öhdəliyimizi əhatə edir. Azərbaycan heç vaxt erməni sakinlərini Qarabağdan çıxarmayıb və regionu tərk etməmək barədə Azərbaycanın çağırışlarına baxmayaraq, Ermənistana və digər ölkələrə köçmək onların qərarı olub. Azərbaycan öz Konstitusiyasına və müvafiq beynəlxalq öhdəliklərinə uyğun olaraq, Qarabağın erməni sakinlərinin insan hüquqlarını Azərbaycanın digər vətəndaşları ilə bərabər əsasda müdafiə etməyə sadiqdir.

Məhkəmənin Ermənistanın BMT agentliklərinin Qarabağ bölgəsinə səfərini asanlaşdırmaq və Beynəlxalq Qızıl Xaç Komitəsi (BQXK) ilə əməkdaşlığa dair tələbi ilə bağlı heç bir tədbir görməyi tələb etməməsi faktı Azərbaycanın bu sahədə göstərdiyi açıqlığın və əməkdaşlığın etirafıdır. Bu, ölkəmizə qarşı irəli sürülən bütün ittihamları mahiyyətcə əsassız edir.

Azərbaycan milli qanunvericiliyə və beynəlxalq öhdəliklərə uyğun olaraq şəxsi mülkiyyəti, mədəniyyət abidələrini, artefaktları, habelə qeydiyyat sənədlərini qoruyur. Beləliklə, Məhkəmənin bu sahələri qeyd etməməsi eyni zamanda Azərbaycanın həyata keçirdiyi tədbirlərin təsdiqidir.

Məhkəmə Ermənistanın Azərbaycan Respublikası Cinayət Məcəlləsinin qüvvədə olan maddələrinə uyğun olaraq hərbi təcavüz, separatizmi qızışdırmaq, terror aktları və s. ittihamlarla saxlanılan qanunsuz separatçı rejimlə əlaqəsi olan şəxslərlə bağlı Azərbaycanın istintaq tədbirlərinə dair Ermənistanın iddiasını eyni şəkildə təmin etməyib. Azərbaycan Ermənistanın və bütün digər tərəflərin qanuni istintaq tədbirlərinə müdaxiləsini dayandıracağını gözləyir.

Azərbaycan CERD üzrə öhdəliklərinə ciddi yanaşır. Biz beynəlxalq hüquq çərçivəsində bu öhdəlikləri və bütün insanların hüquqlarını qorumağa sadiq qalırıq və diqqətimizi dinc və firavan bir regionun qurulmasına yönəltmişik".

BMT Baş Assambleyasının Sosial, Humanitar və Mədəni Məsələlər Komitəsi “İran İslam Respublikasında insan hüquqlarının vəziyyəti haqqında” qətnaməni təsdiqləyib. Sənəd İranın “online və oflayn rejimdə qadınlara və qızlara qarşı artan, məqsədyönlü repressiyasını ” pisləyir. Maraqlıdır ki, Ermənistan və Hindistan bu qətnamənin əleyhinə səs verib .
Qırmızı və sarı rənglə işarələnmiş, yəni səsvermədə iranı müdafiə edən və iran əlehinə səsvermədə iştirak etməyən ölkələri birləşdirən ortaq xüsusiyyətləri sayıram, kasıblıq, insan haqlarının kobud pozulması və müsəlman ölkələri.
Həmçinin o ölkələr Ukraynada Rusiya işğalına biganə qalan ölkələrdir.
Teref. Xocanın Blogu

Ermənistanın Təhsil, Elm, Mədəniyyət və İdman Nazirliyi tədris materiallarının ekspertizasının keçirilməsi zərurəti bəhanəsi ilə Rusiyanın məktəblərə hədiyyə etdiyi rusdilli dərsliklərin paylanmasını dayandırıb.

Moderator.az xəbər verir ki, Tert.am-ın yaydığı məlumata görə, bu barədə RF Federal Şurasının sədr müavini Yuri Vorobyov noyabrın 16-da özünün telegram-kanalında yazıb.

Onun sözlərinə görə, “Ermənistan Milli Assambleyasının təşəbbüsü ilə Rusiya-Ermənistan parlamentlərarası komissiyasının iclaslarında erməni deputatların dəfələrlə müraciətləri nəticəsində Federal Şura rəhbərliyinin bilavasitə dəstəyi ilə Rusiya tərəfi 50 mindən çox dərslik alınması və rus dilini tədris edən erməni məktəblərinə əlavə ianə üçün əlavə büdcə vəsaiti tapmağa nail olub.

Noyabrın 11-də dərsliklər Ermənistana gətirilib və tələbatın çox olduğu məktəblərdə onların paylanmasına başlanılıb.

Ermənistanın Təhsil və Elm Nazirliyinin bu prosesi dayandırdığını biləndə çox təəccübləndim. Erməni həmkarlarımızın özləri bizə lazımi dərsliklərin konkret siyahısını göndərmələri xüsusilə qəribədir.

Çox təəssüf ki, ilk olaraq bizim qardaş erməni xalqının sadə oğlan və qızları belə uzaqgörən siyasi intriqalardan əziyyət çəkirlər”, - deyə Vorobyov bildirib.

O qeyd edib ki, Bişkekdəki Rusiya nümayəndə heyəti Ermənistan parlamentinin sədr müavini qarşısında bu məsələni qaldırıb və yaxın vaxtlarda bütün maneələrin aradan qaldırılacağına ümid etdiyini bildirib.

Fransa Şərqi Qüdsün Qədim şəhərin məhəlləsində yaranmış gərgin vəziyyəti dərin narahatlıqla izləyir.

Axar.az xəbər verir ki, bu barədə Fransanın Qüdsdəki konsulluğunun ermənilərlə polis qüvvələri arasında baş vermiş qarşıdurma ilə bağlı məlumatında deyilir.

“Fransa israilli köçkünlərin əhaliyə təzyiq etdiyi Qədim şəhərin erməni məhəlləsində davam edən gərginliyi dərin narahatlıqla izləyir”, - deyə bildirilib.

Qeyd edək ki, ötən gün erməni icmasının nümayəndələri ilə polis qüvvələri arasında növbəti qarşıdurma baş verib. Dörd erməni polis tərəfindən saxlanılıb, bir müddət sonra onlar sərbəst buraxılıb.

Azərbaycan Parlamentinin deputatı Vahid Əhmədov 44 günlük Vətən Müharibəsinin qələbə ilə bitməsindən sonra ölkədə həllini tapmalı olan məsələlərdən biri -İnsan Hüquqları haqqında danışıb.

Gununsesi.info-ya müsahibəsində Vahid Əhmədov deyib ki, həbsdəki siyasi fəallar azadlığa buraxılmalıdır.

Həmin açıqlamanı təqdim edirik:

Ermənistan silahlanır. Silahı isə əsasən Hindistan və Fransadan alır. Hindistan Ermənistana silahı İran, Fransa isə Gürcüstan üzərindən ötürür. Gecə-gündüz şiə həmrəyliyindən danışan molla rejimi Azərbaycandakı şiələrə qarşı Ermənistanın silahlanmasına açıq şəkildə yardım edir. “Dostum, qardaşım” dediyimiz Gürcüstan da Azərbaycanla düşmənçilik edən Fransaya qucaq açır.

Azərbaycanın isə əsas silah aldığı ölkə İsraildir. Belə bir fonda Azərbaycanda özünü “ağıl dəryası” hesab edənlər deyirlər ki, HƏMAS-İsrail müharibəsində Azərbaycan HƏMAS-a dəstək verməlidir. İsrailə qarşı sərt mövqedən çıxış etməlidir. Yaxşı, biz də qoşulduq sizə və başladıq İsraili İran mollarının ağzı ilə söyməyə. Sonra nə olacaq? Azərbaycan silahı kimdən alacaq?

Bilməyənlər üçün deyim ki, 2022-ci ildə İsrailin hərbi ixracatı 12.5 milyard dollar olub. Dünyada İsrail silahına tələbat ilbəil artır. Məsələn, 2021-ci ildə bu göstərici 11.4 milyard dollar idi.

Yəni “ağıl dəryaları”na qulaq assaq İsrail ilə düşmən olmalıyıq. Təbii ki, İsrail də öz düşmənlərinə silah satacaq qədər sadəlövh deyil.

Silah alış-verişi ilə bağlı bir şeyi də vurğulayım. Bəziləri elə düşünürlər ki, silah almaq üçün əsas məsələ pulun olmasıdır. Silah bazarı da kolxoz bazarı kimi bir şeydir. Bazara girib istədiyini ala bilərsən. Təbii ki, belə düşünənlər dünyada mövcud olan reallıqlardan xəbərsiz adamlardır. Silah strateji məhsuldur. Bu məhsulu yalnız dostlara satırlar, düşməninə silah satanlar sonda o qədər peşman olub ki. Həm də ultra-müasir silahlar, hansını ki, biz İsraildən alırıq, elədir ki, istehsal edən ölkə həmin silaha satışdan sonra da nəzarət edir. Bunun üçün elektron kodlar mövcuddur. Kodlar tez-tez dəyişdirilir. Sən o kodu bilmədən o silahdan yararlana bilməzsən. İsrail bu məsələdə də Azərbaycana ciddi üstünlüklər verib.

Hərdən düşünürəm ki, nə yaxşı ki, Azərbaycanı belə “ağıl dəryaları” idarə etmir. İnanın ki, bunlar bütün dünya ilə Azərbaycanı düşmən edərlər. Ölkə darmadağın olub gedərdi…

Diqqət edin, 2020-ci ildə “İbrahim anlaşması” (Abraham Accords) kimi tanınan sazişlə İsraillə münasibətləri normallaşdıran Birləşmiş Ərəb Əmirlikləri, Bəhreyn və Mərakeş yəhudi dövlətindən ən çox silah alan ölkələrdir.

Bizim ağıllılar deyir ki, siz ərəbləri boş verin, ancaq biz İsraildən silah almayaq. Bəs kimdən alaq? İrandan alsaq necə olar?..

XXI əsrdə yaşayırıq. Bunlar hələ də “Danabaş kəndinin əhvalatları” səviyyəsində düşünürlər.

Özü də biz İsraildən təkcə silahmı alırıq? WikiLeaks-ın yaydığı 2010-cu ilə aid gizli materialda İlham Əliyevin İsrail-Azərbaycan münasibətlərini aysberqə bənzətməsi haqqında istər Azərbaycan, istərsə də İsrail, bütövlükdə Qərb mediasında dəfələrlə yazılıb. Aysberq nə deməkdir? Yəni üzdə görünən bütövün vur-tut onda biridir. Aysberq-buz dağının-onda doqquzu suyun altındadır. Bu isə o deməkdir ki, İsrail-Azərbaycan münasibətlərinin çox dərin qatları var və o qatlar haqqında hər hansı məlumat dünya mediasına çox nadir hallarda sızır.

1992-ci ildə Konqres üzərindən Azərbaycana ABŞ-ın birbaşa dövlət yardımını qadağan edən 907-ci düzəliş qüvvəyə mindi. Sənəd erməni lobbisinin təşəbbüsü ilə qəbul olundu. Azərbaycan yeganə keçmiş Sovet dövləti idi ki, Amerika ona qarşı belə bir qadağa tətbiq etmişdi. Özü də AXC dönəmində. Azərbaycanda demokratların iqtidarda olduğu dönəmdə demokratiyadan dəm vuran Amerika belə bir addım atdı. Ən pisi isə o idi ki, o vaxt ermənilər Azərbaycan torpaqlarını işğal edirdilər. Amerika bu işğala dəstək vermək amacı ilə belə bir yaramazlıq etdi. Adını da qoydular ki, Azərbaycan Dağlıq Qarabağı blokadada saxlayır…

Diqqət edin, Azərbaycan Laçın dəhlizini ləğv etdi. 9 ay Qarabağ erməniləri çıxılmaz vəziyyətdə qaldı. Daha sonra Azərbaycan 1 gün ərzində anti-terror əməliyyatı keçirdi. Ermənilər kütləvi şəkildə Qarabağdan çıxıb getdi. Ancaq Amerikadan səs çıxmadı. Niyə çıxmadı? Erməni lobbisi Amerikada indi də öz yerindədir. Əvvəlkindən də güclüdür. Bəs nədən bir iş görə bilmirlər? Çünki Amerikadakı yəhudi lobbisi buna imkan vermir. Niyə vermir? Çünki onlar yaxşı bilirlər ki, İsrail ilə Azərbaycan arasında “aysberq” münasibəti var…

Başqa bir məqama diqqət edək. Hər il ABŞ Azərbaycana hərbi yardım kimi 120 milyon dollara yaxın vəsait ayırır. Bəs Ermənistana nə qədər ayırır? Heç bir şey. Erməni lobbisi neçə ildir ki, özünü öldürür ki, Amerika “ermənilərə qarşı genosid siyasəti yeridən” Azərbaycana hərbi yardımı dayandırsın və həmin yardımı Ermənistana versin. Ancaq Amerika erməni lobbisini heç vecinə də almır. Niyə almır? Çünki yəhudi lobbisi erməni lobbisindən ən azı 10 dəfə güclüdür. Məhz onlar buna imkan vermirlər…

Özü də onu da bilmək lazımdır ki, 907-ci düzəlişin əsas müəlliflərindən biri Amerikanın hazırkı prezidenti Co Baydendir. O, qondarma “erməni genosidi”ni rəsmən tanıyan ilk Amerika prezidentidir. Ermənipərəstlik baxımından Amerikanın ən stajlı siyasətçisi sayıla biləcək Co Bayden belə Azərbaycana qarşı çıxmır. Niyə çıxmır? Çünki yəhudi lobbisi buna imkan vermir.

Çox təəssüf ki, Azərbaycanda bir çoxları bu kimi sadə məsələlərdən xəbərsizdir. İranın ağzı ilə danışan belələri adətən deyirlər ki, biz müsəlman HƏMAS-ı yox, musəvi İsraili müdafiə edirik. Guya ki, biz sionistik. Bəli, biz İsraili müdafiə edirik. Ancaq niyə edirik? Çünki Azərbaycanın maraqları bunu tələb edir.

Mahiyyətdə biz İsraildən daha çox Azərbaycanın yanındayıq.

ABŞ, Böyük Britaniya və SSRİ Faşist Almaniyasına qarşı birgə mübarizə aparıblar. Müttəfiq kimi bir-birlərinə dəstək veriblər. İndi vəziyyət necədir? ABŞ, Böyük Britaniya, bütövlükdə Qərb Ukrayna üzərindən Rusiyaya qarşı vuruşur. Yəni dünənki müttəfiqlər bu gün düşməndir. Niyə onlar bir-birinə düşmən kəsiliblər? Çünki tərəflərin maraqları arasında antaqonist ziddiyyətlər yaranıb.

HƏMAS-la bağlı bir şeyi də deyim. Bəllidir ki, İran HƏMAS-ı maliyyələşdirən əsas dövlətdir. İran eyni işi Livanda Hizbullahla da görür. Yəməndə üsyançı husilər, İraqda xeyli təşkilat rəsmi Tehrandan dolanır. Hizbullah lideri Həsən Nəsrullahın bir məşhur fikri var. Deyir ki, bizim içdiyimiz suyun da, yediyimiz çörəyin də pulu İran verir.

İranla Azərbaycan arasında müharibə ehtimalı varmı? Var. Özü də bu ehtimal xeyli böyükdür. Mən soruşuram: belə bir müharibə olsa, HƏMAS kimin yanında yer alacaq? Nəyinki HƏMAS, İranın su və çörəyini verdiyi bütün terror şəbəkəsi molla rejiminin Azərbaycana qarşı açdığı cəbhədə yer alacaq. Buna kiminsə şübhəsiz varmı?

Bəli, İsrail bizə silah verir, yəhudi lobbisi bizim yanımızdadır. Özü də təkcə Amerikada yox, digər Qərb ölkələrində də yəhudi lobbisinin sözü keçir. Özü də şıppıltı ilə. Azərbaycanın İsrail ilə siyasi-iqtisadi əlaqələri də çox yüksək səviyyədədir…

Ermənistan özünə təzə müttəfiqlər axtarır. Niyə təzəsini axtarır? Çünki Türkiyə və Azərbaycan əl-ələ verərək Rusiyanı ermənipərəst mövqedən türkpərəst mövqeyə çəkib apara bildilər. Yoxsa Azərbaycan “Laçın dəhlizi”ni ləğv edib, orada buraxılış-keçid məntəqəsi qura bilərdimi? Anti-terror əməliyyatı necə, həyata keçirə bilərdimi? Əlbəttə ki, yox. Hətta olsaydı belə bu, son dərəcə böyük itkilərin hesabına baş tuta bilərdi. Amma belə daha yaxşı deyilmi? Daha az itki ilə daha böyük hədəflərə varmaq siyasi məharət tələb edir. Biz Azərbaycan olaraq bunu bacardıq. Ona görə də Ermənistan təcili şəkildə özünə yeni müttəfiq axtarır. Azərbaycanın isə hal-hazırda kifayət qədər ciddi müttəfiqləri var. Bu sırada İsrail ilə yanaşı Böyük Britaniya da yer alır. Türkiyəni heç demirəm. Mənim üçün Türkiyə Azərbaycanın davamıdır.

Ermənistan çıxılmaz vəziyyətdədir. Nikol Paşinyan erməni hiyləgərliyinə xas olan bir tərzdə istəyirdi ki, Rusiyanı Azərbaycana qarşı qaldırsın. Azərbaycanda da Rusiyaya qarşı çağırışlar səslənirdi. Xüsusən bizim müxalifət iddia edir ki, Azərbaycan Qərbə üz tutmalıdır. Rusiya Azərbaycana düşmən ölkədir. İqtidar adından qərar verənlər zamanında bu kimi çağırışlara qulaq assaydılar, Azərbaycan indi təxminən Ukrayna kimi Rusiya ilə müharibə aparırdı. Bütün ölkə də xarabaxanaya dönmüşdü. Bəli, Rusiya 200 ildən çoxdur ki, ermənilərə dəstək verir. Məhz Rusiya Azərbaycan torpaqlarında qondarma Ermənistan dövləti yaradıb. Ancaq bu və ya digər olaylar dövlətlərin maraqlarını da dəyişir. Türkiyə və Azərbaycan Rusiyanın ermənipərəst siyasi oriyentasiyasını dəyişə bildi. Belə işlər ağılla olur, emosional yanaşma ilə belə möhtəşəm nəticələrə varmaq mümkün deyil…

Rusiyadan əli üzülən Ermənistan niyə Fransaya üz tutdu? Ən azı ona görə ki, Rusiya və ABŞ-dan sonra ən böyük erməni diasporu Fransadadır. Məhz Fransa ilk Avropa dövlətidir ki, 2001-ci ildə qondarma “erməni genosidi”ni tanıyıb. 2006-cı ildə isə “erməni genosidi”ni inkar edən şəxslərin qanunla məsuliyyətə cəlb olunmasına parlament səs verib.

Orasını özünüz düşünün. Biz bir çox strateji məsələlərdə Azərbaycana dəstək verən avtoritar Rusiya dodaq büzməliyik, yoxsa erməni separatizminə yenidən can verməyə çalışan demokratik Fransanı alqışlamalıyıq? Şəxsən mənim üçün fərqi yoxdur. İstər demokrat olsun, istərsə də avtoritar (adam ya da dövlət). Azərbaycana qarşı çıxan istənilən tərəf mənim üçün düşməndir. Azərbaycanın maraqlarını nəzərə alan tərəfə isə ehtiram göstərərik. Siyasətin oyun qaydası belə tələb edir…

ABŞ-ın 32-ci prezidenti Franklin Ruzvelt 1939-cu ildə diktator Samos haqqında jurnalistlərin sualına cavab olaraq belə demişdi:

“Bəli, o, it oğlu itdir, ancaq bizim itimizdir”. Bizim olmayan, xüsusi ilə bizim düşmənimizin yanında yer alan kimliyindən asılı olmayaraq bizə düşməndir. Düşmən ilə isə düşmən kimi rəftar etmək lazımdır…

Baxın, Amerikadan çox demokratiyadan, insan haqlarından danışan ölkə yoxdur. Ancaq Co Bayden suyu süzülə-süzülə Ər-Riyada getdi. Camal Qaşıqçının ölümünə fərman vermiş Səudiyyə taxtının varisi Məhəmməd ibn Salmanla görüşdü. Halbuki 2019-cu ildə-prezident seçkisi zamanı and içmişdi ki, bütün dünyanın nifrətini qazanmış vəliəhdi Səudiyyədən rədd edəcək. Bacarmadı. Əksinə, Amerikanın maraqları naminə qoca Bayden gənc vəliəhdin ayağına getmək zorunda qaldı…

Cənubi Qafqazda qarşılıqlı münasibətlər 3+3 formatında (Türkiyə, Rusiya, İran və Azərbaycan, Gürcüstan, Ermənistan) tənzimlənəcək. Azərbaycanın təklif etdiyi bu formata alternativ yoxdur. Olanlar da mövcud reallıqlardan çox uzaqdır…
/globalinfo.az/

kyivindependent: NATO-nun baş katibi Yens Stoltenberq noyabrın 14-də Brüsseldə Aİ-nin Xarici İşlər Şurası qarşısında verdiyi şərhlər zamanı Rusiyanın Gürcüstanın işğal olunmuş regionu olan Abxaziyada hərbi-dəniz bazası yaratmaq planlarını kəskin tənqid edib. Stoltenberqin açıqlamaları Gürcüstan mediası Civil.Ge tərəfindən yayımlanıb.

“Biz Gürcüstanın ərazi bütövlüyünü və suverenliyini qətiyyətlə dəstəkləyirik və əlbəttə ki, bu parçalanmış ərazilərin Rusiya tərəfindən hərbi bazalar yaratmaq üçün istifadə oluna biləcəyi ilə razılaşmırıq”, Stoltenberg dedi.

O, həmçinin bu planın “Rusiyanın Ukraynadakı hərbi hədəflərinə çatmaq üçün nə qədər getməyə hazır olduğunu” nümayiş etdirdiyini vurğuladı.

Rusiya qoşunlarının Abxaziyada yerləşən Qara dəniz Oçamçir limanında planlaşdırılan “daimi” yerləşdirilməsi barədə bəyanat, Rusiyanın Abxaziyada bir sirdaşı tərəfindən dəstəklənən Aslan Bjania tərəfindən verildi və oktyabrın 5-də Rusiya dövlətinin nəzarətində olan “İzvestiya” mediası tərəfindən yayımlandı. Ancaq Rusiya hakimiyyəti bu planları rəsmi olaraq şərh etməyib.

Gürcüstan Xarici İşlər Nazirliyi bu planları Gürcüstanın ərazi bütövlüyünün pozulması hesab edərək qətiyyətlə pisləyib. Rusiya qoşunları və vasitəçi əsgərlər 2008-ci il Rusiya-Gürcüstan müharibəsindən bəri Gürcüstanın başqa bir işğal olunmuş bölgəsi olan Abxaziya və Cənubi Osetiyada iştirak edirlər. Bu münaqişədən əvvəl hər iki bölgədə 1990-cı illərin əvvəllərindəki qarşıdurmaların səbəb olduğu Rus “sülhməramlıları” yerləşdirildi.

Həm Abxaziya, həm də Cənubi Osetiya faktiki olaraq müstəqil olsalar da, 2008-ci il müharibəsindən əvvəl qanuni olaraq Gürcüstanın bir hissəsi olsalar da, Rusiyanın bu bölgələri işğal etməsi orada Rusiya hərbi bazalarının yaranmasına səbəb oldu.

Abxaziyada Rusiyanın Qara Dəniz Donanması üçün dəniz bazasının yaradılması əhəmiyyətli bir eskalasiyadır və Gürcüstanın Rusiya ilə Ukrayna arasında birbaşa münaqişəyə cəlb oluna biləcəyindən narahatdır.

Ukrayna Prezidenti Vladimir Zelenski oktyabrın 24-də Rusiyanın Abxaziyada baza yaratmaq planlarının Rusiya gəmilərini “Ukrayna raketlərindən və dəniz dronlarından mümkün qədər uzaq”aparmaq istəyi ilə diktə edildiyini irəli sürdü. O əlavə etdi:” Biz onları hər yerdə tanıyacağıq”, Ukraynanın qanuni olaraq Gürcüstanın bir hissəsi olan Abxaziyadakı Rusiya aktivlərini hədəf ala biləcəyini ifadə etdi.

Limanın dərinliyi Rusiyanın Qara Dəniz Donanmasının daha böyük hərbi gəmilərinin yerləşməsi üçün yetərli olmasa da, ən vacib Logistika Mərkəzi ola bilər. Bəzi ekspertlər hesab edirlər ki, Rusiyanın Abxaziyada baza yaratmaq səyləri münaqişə zonasını Gürcüstan sərhədlərinə yaxın genişləndirmək cəhdidir.

Gürcüstanın müxalif “Lelo” Partiyasının lideri Badri Caparadize bildirib ki, bu gəmilər Ukraynaya hücum üçün istifadə olunarsa, de-yure Gürcüstanın bir hissəsi olan bir bölgədə yerləşsələr də, potensial olaraq qanuni hədəf ola bilərlər.(Turan)

İsrail Müdafiə Qüvvələri Qəzzada dövlət qurumlarına nəzarəti ələ keçirib.

Bu barədə İsrail Müdafiə Qüvvələrinin rəsmi “Telegram” kanalında məlumat verilib.

“7-ci briqadanın və “Qolani” briqadasının qüvvələri HƏMAS-ın mərkəzi idarəetmə mərkəzlərinə nəzarəti təmin edib və terrorçuları zərərsizləşdiriblər.
Şeyx İclin və Rimalda əməliyyatlar həyata keçirilib və HƏMAS-ın hərbi məqsədlər üçün istifadə etdiyi dövlət qurumlarına nəzarət təmin edilib.

7-ci briqadanın birləşmiş döyüş qüvvələri HƏMAS-ın qanunvericilik və hökumət binasını, HƏMAS-ın polis baş qərargahını, silah istehsalı və hazırlanması üçün istifadə olunan mühəndislik fakültəsini nəzarətə götürüb. Əməliyyat zamanı qüvvələr HƏMAS-ın təlim mərkəzlərinin, əməliyyat otağının, saxlanma və dindirilmə otaqlarının yerləşdiyi Qizat kompleksinə nəzarəti ələ keçirib. Obyektdə HƏMAS-ın silahları, eləcə də maarifləndirici və tədris materialları olub. Bundan əlavə, “Qolani” briqadasının birləşmiş döyüş qüvvələri HƏMAS-ın istifadə etdiyi obyekt kimi təyin edilən qubernator iqamətgahını uğurla ələ keçirib. Binada HƏMAS-ın hərbi və polis idarələri, həmçinin hərbi kəşfiyyat idarələri, qərargahları və təşkilatın müxtəlif postları yerləşirib. Bu postlardan bəziləri HƏMAS tərəfindən oktyabrın 7-də İsrailə hücuma hazırlıqlar zamanı təlimlər üçün istifadə edilib”, - deyə məlumatda qeyd edilib.