Avropa Komissiyasının Prezidenti Ursula von der Leyen gələn ayın əvvəlində Fransa Prezidenti Emmanuel Makronla birlikdə Çinə səfər edəcək.

"Politico" xəbər verir ki, bu barədə Aİ liderlərinin Brüsseldə keçirilən sammitindən sonra mətbuat konfransında Emmanuel Makron deyib.

O, aprelin 4-də Leyenə onu Çinə səfərində müşayiət etməyi təklif etdiyini deyib və əlavə edib ki, bu, onların “vahid mövqedən” danışa bilməsi üçün də vacibdir.

"Mənim Avropa mandatım yoxdur, çünki Fransanın müstəqil diplomatiyası var, amma mən Avropa koordinasiyasına bağlıyam" deyə Makron əlavə edib.

Avropa Komissiyasının sözçüsü də Ursula von der Leyenin Makronla birlikdə səfərini təsdiqləyib.

Çinə səfərindən əvvəl von der Leyen gələn cümə axşamı (30 mart) Brüsseldə Aİ-Çin münasibətləri ilə bağlı çıxış edəcək.

Fransa Prezidenti həmçinin Almaniya Kansleri Olaf Şolts ilə Çinə səfəri müzakirə etdiyini və ikisinin "ortaq bir baxış"a sahib olduğunu söyləyib. Qeyd olunub ki, bu baxış Rusiyaya təzyiq etmək üçün Çinlə əlaqə saxlamaqla bağlıdır.

"Biz ərazi suverenliyi də daxil olmaqla, beynəlxalq hüquqa riayət edərək münaqişəni dayandırmaq üçün hər şeyi etməliyik" Makron deyib.

Xatırladaq ki, bu həftə Çin lideri Moskvada Rusiya prezidenti Vladimir Putinlə görüşüb.

Suriya və Səudiyyə Ərəbistanının hakimiyyət orqanları diplomatik münasibətlərin kəsilməsindən on bir il sonra səfirliklərinin işini bərpa etmək qərarına gəliblər.

Ər-Riyad və Dəməşqdəki səfirliklərin işə başlama vaxtı barədə məlumat verilməyib və tərəflər hələlik bu mesajı rəsmi şəkildə şərh etməyiblər.

Xatırladaq ki, Səudiyyə Ərəbistanı və bir sıra digər ölkələr 2012-ci ildə prezident Əsədi müxalifəti zorakılıqla sıxışdırmaqda ittiham edərək onun siyasətinə etiraz olaraq Suriyadakı diplomatik nümayəndəliklərini bağlamışdı.
Hazırda bir sıra ərəb ölkələri Suriyanın Ərəb Liqasına qaytarılması üçün səylər göstərirlər.

Mənbə: inosmi.ru

Putinin ritorikasında ilk dəfə eşitdik ki, o, Çinin “sülh təkliflərini” əsas götürmək və onları rəhbər tutmaq üçün sənədi nəzərdən keçirir

Çin lideri Si Cinpinin Moskvaya səfəri başa çatdı. Təbii ki, bu səfər Putin üçün daha simvolik və əhəmiyyətli idi. O mənada ki, Putin beynəlxalq təcriddə olmadığını göstərmək istəyirdi. Axı Rusiya Federasiyası Prezidentinin həbsinə dair Beynəlxalq Cinayət Məhkəməsinin orderindən sonra Si Cinpin dünya ictimaiyyəti qarşısında Putinin vəkili kimi çıxış etdi. Bununla da Çin rəhbəri Qərbə nümayiş etdirdi ki, o, xarici təzyiqlərə boyun əyməyən müstəqil siyasət yürüdür.

Bu səfər ərəfəsində onun Putinlə görüşündə “Ukrayna böhranı”nın həllinin müzakirə edildiyi açıqlanıb. Bütün dünya bu səfəri izlədi və yekun konfransda səs-küylü bəyanatlar gözlədi. Amma necə deyərlər, möcüzə baş vermədi.

Zənnimcə, əhəmiyyətli nəsə elan edilə bilməzdi. Si Cinpin danışıqlar yolu, sülh yolu ilə nizamlanmaya növbəti çağırış etdi. Və Putinin mövqeyi baxımından, biz ancaq eşitdik ki, Çinin “sülh planı” Qərb və Kiyev hazır olduqda “sülh yolu ilə nizamlanma üçün əsas götürülə bilər”.

Tam olaraq nə nəzərdə tutulduğu aydın deyil. Amma Putinin ritorikasında ilk dəfə eşitdik ki, o, Çinin “sülh təkliflərini” əsas götürmək və onları rəhbər tutmaq üçün sənədi nəzərdən keçirir.

Qərb mətbuatında ekspertlər hesab edirlər ki, bu, hazırda mövcud olan demarkasiya xətləri ilə müharibəni dayandırmaq cəhdidir. Amma biz başa düşürük ki, bu halda söhbət münaqişənin dondurulmasından gedir və təbii ki, nə Ukrayna, nə də Qərb tərəfdaşları belə şərtlərlə razılaşacaqlar.

Çox güman ki, Rusiyadan Çindən ölümcül silahların ötürülməsi ilə bağlı xahişlər olub. Amma bu məsələdə Si və Putinin danışıqlarından sonra çox güman ki, heç nə dəyişməyəcək. Çünki Çin münaqişənin tərəfi olmamaq üçün müdaxilə etməmək siyasətinə üstünlük verir. Digər tərəfdən, ikili təyinatlı malların tədarükü və Rusiya Federasiyası və Çinin hərbi təlimləri davam edəcək. Amma bu, yeni bir məsələ deyil, çünki eyni təlimlər 2005-ci ildən keçirilir.

Çin və Rusiya liderlərinin dörd saatdan çox təkbətək nəyi müzakirə etdiklərini yalnız təxmin etmək olar. Fikrimcə, Cinpinin səfəri digər məsələlərlə yanaşı, izahatları eşitmək və Putinin Ukraynaya genişmiqyaslı işğalı motivasiyasını anlamaq istəyi ilə bağlı idi. Yəni mənə elə gəlir ki, Putin 4,5 saat ərzində konkret nə baş verdiyini izah etməyə çalışdı.

Ancaq belə bir təəssürat yaranır ki, Cinpin və Putin bu təkbətək söhbətlər zamanı qarşılıqlı anlaşma əldə edə bilməyiblər. Və buna görə də Pekinin növbəti addımlarla bağlı qərarları hardansa “asıldı”: onlar əlavə məsləhətləşmələr tələb etdiyi üçün bir müddət kənara qoyuldu. Təbii ki, bu, təxmindir. Ancaq əslində elan edilən yalnız o idi ki, Sinin Moskvaya səfəri Çinin konstruktiv rolunu oynaması üçün “sülh səfəri”dir. Amma bu görüşün nəticəsi olaraq konstruktiv heç nə görmədik.

Birmənalı fakt ondan ibarətdir ki, koronavirus pandemiyası başa çatdıqdan və Si Cinpinin üçüncü müddətə yenidən Çin lideri seçilməsindən sonra o, beynəlxalq siyasətdə kifayət qədər fəallığını davam etdirəcək.

Ola bilsin ki, Moskva səfərindən sonra Çin tərəfi Avropa liderləri ilə məsləhətləşmələr aparmaq istəyini ifadə etsin. Biz bilirik ki, Çin həqiqətən də Rusiya-Ukrayna müharibəsini istəmir. Müharibə səbəbindən Avropada yaranan böhran Çin iqtisadiyyatına təsir etdiyi üçün Pekin rahat deyil. Ona görə də ola bilsin ki, Avropa liderləri ilə müəyyən görüşlər olsun.

Həmçinin yaxın vaxtlarda ABŞ Prezidenti Baydenin Çin rəhbərinə zəng edəcəyini gözləmək olar. Onlar həm onun Moskvaya səfərini, həm də ABŞ-Çin münasibətlərini müzakirə edəcəklər.

Müəllif: Vita Qolod – Ukrayna-Çin Araşdırmaları Assosiasiyasının İdarə Heyətinin sədri

Mənbə: UNİAN

Tərcümə AYNA-ya məxsusdur.

Avropa İttifaqı Azərbaycanda siyasi partiyalar haqqında yeni qanunla tətbiq edilmiş məhdudiyyətlərdən narahatlığını bildirib. Azərbaycan hakimiyyəti Venesiya Komissiyasının və ATƏT DTİHB-nin tövsiyələrini yerinə yetirməyə çağırılıb. Bu barədə Aİ-nin Xarici Siyasət Xidmətinin 22 mart tarixli bəyanatında deyilir.


“Avropa İttifaqı siyasi partiyalar haqqında yeni qanunla tətbiq edilmiş məhdudiyyətlərdən narahatdır. Bu, Azərbaycanda siyasi plüralizmə və birləşmək, fikri ifadə etmək və dinc toplaşmaq azadlığı kimi əsas hüquq və azadlıqlara çəkindirici təsir göstərə bilər”, deyə Aİ-nin Xarici Siyasət Xidmətinin saytında yer alan bəyanatda bildirilir.

Bu hüquqlar “demokratik cəmiyyətin fəaliyyəti üçün əsasdır”. Aİ israrla Azərbaycanı Avropa Şurası Venesiya Komissiyasının əvvəlki siyasi partiyalar haqqında qanunla bağlı köhnə tövsiyələrini, habelə Venesiya Komissiyasının və ATƏT DTİHB-nin yeni qanunla bağlı 13 mart tarixli rəyində yer alan tövsiyələri yerinə yetirməyə çağırır.

“Siyasi partiyalar siyasi özünüifadənin əsas kollektiv aləti olaraq vətəndaşların siyasi iradəsini ifadə etməsinə şərait yaradır.

Dinamik, hesabatlı və inklüziv çoxpartiyalı sistemlərə zəmanət verilməlidir”, deyə bəyanatın sonunda bildirilir.

"Türkiyənin Finlandiyanın NATO-ya daxil olmasını təsdiqləmək qərarı sevindirici xəbərdir".

Bunu Böyük Britaniyanın müdafiə naziri Ben Uolles bildirib.

O xatırladıb ki, Böyük Britaniya ötən ilin may ayında Finlandiya və İsveç ilə ikitərəfli birgə təhlükəsizlik sazişləri imzalayıb. O, bu iki ölkənin "NATO-ya qəbulu zamanı və sonrasında təhlükəsizliyi ilə bağlı Böyük Britaniyanın sarsılmaz sadiqliyi"ni vurğulayıb.

"İsveçin ən qısa zamanda qəbul olunmasını təmin etmək üçün Türkiyə ilə sıx işləyəcəyəm. Eyni zamanda Böyük Britaniya istənilən Rusiya təhlükəsinə qarşı İsveçlə çiyin-çiyinə dayanacaq", - Böyük Britaniyanın müdafiə naziri vurğulayıb.

“Bəşəriyyətin üzləşdiyi yeni çağırışlara ədalətli həll yolları tapa bilməyən beynəlxalq sistem daim yeni böhranlara səbəb olur”.

Bu sözləri Türkiyə Respublikasının Prezidenti Rəcəb Tayyib Ərdoğan Türk Dövlətləri Təşkilatının Dövlət Başçılarının Fövqəladə Zirvə görüşünün yekunları ilə bağlı yerli və xarici jurnalistlər üçün keçirdiyi brifinqdə bildirib.

“Dünən və bu gün Özbəkistan Prezidenti, Azərbaycan Prezidenti, Qırğızıstan Prezidenti, Qazaxıstan Prezidenti, Türkmənistan Xalq Məsləhətinin sədri, Macarıstanın Baş naziri ilə ikitərəfli görüşlər keçirdim. Liderlər kimi imzaladığımız sammit bəyanatı ilə biz müxtəlif sahələrdə əməkdaşlığımızı gücləndirmək iradəmizi açıq şəkildə nümayiş etdirdik.

Dünya siyasətində önə çıxan ölkələr və birliklər səhiyyədən maliyyəyə, təhlükəsizlikdən ksenofobiyaya, qeyri-qanuni miqrasiyadan siyasi və sosial qeyri-sabitliyə qədər bir çox problemlə mübarizə aparır. Bəşəriyyətin üzləşdiyi yeni çağırışlara ədalətli həll yolları tapa bilməyən beynəlxalq sistem daim yeni böhranlara səbəb olur”, - deyə Prezident Rəcəb Tayyib Ərdoğan vurğulayıb.

Hindistan bu ölkədə keçiriləcək “G20” sammitinə 43 dəvətnamə göndərdiyini bəyan edib. “AzPolitika.info” xarici mətbuata istinadla xəbər verir ki, dəvət olunan liderlərin 20-si təşkilata üzv ölkələrin başçıları, 9-u xüsusi dəvət olunan ölkə liderləri, 14-ü isə beynəlxalq qurumların rəhbərləridir.

Hindistanın sammitin təşkilinə görə cavabdeh olan rəsmisi Amitabx Kant dəvət olunanların hamısının sammitə qatılıb-qatılmayacağı barədə qəti fikir söyləyə bilməyəcəyini deyib. Ukrayna Prezidenti Volodimir Zelenskinin də sammitə dəvət olunmasının mümkünlüyü barədə suala cavab verən Hindistan rəsmisi deyib ki, bu barədə danışmaq hələ tezdir.

Vladimir Putinə gəlincə, Kremlin sözçüsü Dmitri Peskov bildirib ki, Rusiya başçısının sammitdə iştirakı istisna olunmur. Lakin hələlik bununla bağlı qəti qərar verilməyib.