Əməkdar incəsənət xadimi, Dövlət Dram Teatrının Bədii rəhbəri Mehriban Ələkbərzadə haqqında yayılan iddialara cavab verib.
Bakupost.az xəbər verir ki, o, bu barədə sosial şəbəkə hesabında yazıb.
M.Ələkbərzadə Əməkdar artist Məsmə Aslanqızının onunla bağlı iddialarının yalan olduğunu deyib:
“Mütamadi olaraq teatrda sözü olan, istəyi yaxud xüsusi xahişi olan aktyorlar rəhbərliyə müraciət edirlər. Arzusunu bildirirlər, bu, normaldır. Belə bir vəziyyət Məsmə Aslanqızı ilə də oldu. Qəbuluma gələrək bildirdi ki, çox çətin vəziyyətdədir. İstək isə evdir! Teatr məni evlə təmin etməlidir. Mən anlatdım ki, mənim ev verə bilmək səlahiyyətim yoxdur. O zaman o “20 Yanvar şəhidinin qızı kimi mənə ev düşür” dedi. Teatr bu məsələni – siz bu məsələni həll etməlisiniz!
Bütün deyilənlərə bir daha münasibət bildirərək yenə də bəyan etdim və edirəm ki, hətta 20 Yanvar şəhidinin qızı olsa belə, mən Teatrın Bədii rəhbəri kimi ev məsələsini həll edə bilmirəm.
Ev məsələsini başqa qurumlar həll edir. Biz də məhz şəhid qızı olduğu üçün onu Prezident mükafatı siyahısına salmışıq. Bir dəstək kimi. Amma bu ona yetərli deyil deyə bax belə həqiqətə uyğun olmayan və təhqirdən çəkinməyən ifadələr işlədir”.
O ki qaldi, mənim vətəndaşlıq mövqeyimə… Mənim yetərincə məhz vətənpərvərlik ruhuna xidmət edən fəaliyyətim var ki, onlar bizim ərazi bütövlüyümüz uğrunda savaşlardan, Vətən yolunda şəhid olan insanlardan bəhs edirdi. Heç kim mənim vətəndaşlıq mövqeyimə ləkə gətirə bilməz. Çünki buna əsas və fakt yoxdur”.
Qeyd edək ki, tanınmış aktrisa, Əməkdar artist Məsmə Aslanqızı sosial şəbəkədə Mehriban Ələkbərzadəni 20 Yanvar şəhidlərini təhqir etməkdə günahlandırıb.

“Mən Akademik Opera və Balet Teatrının solistiyəm. “Leyli və Məcnun” tamaşaları olur. Gəlib baxsınlar həmin tamaşaya gələn tamaşaçıların səviyyəsinə, sonra isə getsinlər baxsınlar öz verilişlərin səviyyəsinə. Nəyi nə ilə müqayisə edirlər?”

Bu sözləri Əməkdar artist Elnur Zeynalov qonaq olduğu “İncə səhər” verilişində deyib.

Sənətçi bildirib ki, əgər reytinq vermirsə, onu verilişlərə dəvət etməsinlər:

“Ciddi və klassik musiqinin tamaşaçıları az olur. O musiqini başa düşmək üçün o qədər savadlı, elit və düşüncəli insan olmalısan ki... Çox təəssüf ki, belə insanların sayı az olduğu üçün ola bilər ki, biz hansısa verilişə çıxanda reytinq aşağı olsun. Əgər reytinq vermiriksə, biz muğam ifaçılarını verilişlərinizə çağırmayın. Niyə ciddi və dövlət əhəmiyyətli tədbirlər olanda muğam ifaçılarını axtarırsınız? Niyə hansısa özəl tədbirlərdə muğam ifaçılarını axtarırsınız? Çağırmayın! Efir vasitəsi ilə səslənib deyirəm ki, əgər reytinq vermirəmsə, öz verilişlərinizə məni çağırmayın”. (olay)

Türkiyənin məşhur aktrisası Türkan Şoray ölkədə etirazlar zamanı saxlanılan, sonra həbs edilən 301 gəncə dəstək olub.
Bu barədə 79 yaşlı aktrisa sosial şəbəkə hesabında paylaşım edib.
“Sevgi əməkdir. Necə ki, gənclərimizi dinləmək, onları anlamaq, gələcəklə bağlı dərdlərinə çarə tapmaq... Biz ancaq bir-birimizi anlayaraq, sevərək, empatiya quraraq daha gözəl günlərə çata bilərik. Gənclərimiz hələ də həbsdədir. Mən anayam və buna görə kədərlənirəm. Gənclərimiz niyə saxlanılır? Demokratik hüquqlarından istifadə etmək istəyən gənclərin bayramı dəmir barmaqlıqlar arxasında keçirməsi hamımız üçün ən böyük ağrı olmalıdır. Onlar bizim övladlarımızdır, göz bəbəyimizdir, ölkəmizin gələcəyidir. Atatürk bu ölkəni onlara əmanət edib. Gənclərimiz tezliklə azadlığa qovuşmalıdır”, - aktrisa yazıb.
Türkan Şoray həmçinin paylaşımlarına görə işdən çıxarılan həmkarları barədə yazıb:
“Mən bir sənətkar kimi gənc həmkarlarımı çox yaxşı başa düşürəm. Sənət adamları sual verir... sorğulayır... Hər şeyi tənqid etmək, daha yaxşısını istəmək onların təbiətində var. Ölkələrini parlaq gələcəyə daşımaq, cəmiyyətə güzgü tutmaq məsuliyyəti daşıyırlar. Sənət və sənət adamları susdurulmamalıdır. Əslində hamımız eyni şeyi istəyirik. Daha gözəl, daha yaşayışlı ölkə. Buna görə də fikir və ifadə azadlığı əvəzolunmaz olmalıdır. Demokratik ölkə bizim üçün vazkeçilməzdir. Unutmamalıyıq ki, hamımız bir bütövün parçasıyıq, bir vətənimiz var. Biz bir-birimizi sevən, bir-birimizi qoruyan, başqasının haqqını tapdalamayan, dözümlü, yaralarımızı sağaldan insanlarıq... İndi bunu xatırlamağın vaxtıdır...”
Rübabə Səməndər Runa
TEREF

Bakı və Abşeron-Xızı regionları üzrə Mədəniyyət Nazirliyinin keçirdiyi attestasiyada 1686 müəllim iştirak edib. 1686 müəllimdən attestasiya komissiyalarının qərarına əsasən 492 nəfər tutduğu vəzifəyə uyğun hesab edilməyib.

TEREF APA-ya istinadla xəbər verir ki, onlardan 56 nəfər (11,4%) ali, 436 nəfər (88,6%) orta ixtisas təhsillidir.

56 nəfər ali təhsilli uğur qazanmayan müəllimdən 26 nəfəri Bakı Musiqi Akademiyası və Azərbaycan Dövlət Konservatoriyasının, 9-u Azərbaycan Dövlət Mədəniyyət və İncəsənət Universiteti, 9-u Azərbaycan Dövlət Pedaqoji Universiteti, 6-sı Azərbaycan Milli Konservatoriyası, 4-ü Naxçıvan DU, 1-i Lənkəran DU, 1-i isə Rəssamlıq Akademiyasının məzunlarıdır.

436 nəfər kəsilən orta ixtisas təhsil müəssisələri məzunlarından 196-sı Sumqayıt Musiqi Kolleci, 135-i Bakı Musiqi Kolleci, 32 nəfəri Şuşa Musiqi Kolleci, 18 nəfəri Şəki Musiqi Kolleci, 15 nəfəri Gəncə Musiqi Kolleci, 14 nəfəri Ağdam Musiqi Kolleci, 12 nəfəri Bakı Humanitar Kolleci, 7 nəfəri Naxçıvan Musiqi Kolleci, 4 nəfəri Lənkəran Musiqi Kolleci, 2 nəfəri Şuşa Humanitar Kolleci, 1 nəfəri Altay Musiqi Texnikumunu bitirən müəllimlərdir.

Hürmüz fatehi Şah Abbasın - o şanlı Səfəvi övladının Hürmüzdən tutmuş ta Türkün son məntəqəsi olan Türük-Terek (Şimali Qafqaz) çayına qədər 999 məscid, karvansara, hamam, bazar tikdirdiyini bilirsiniz.
Min deyil, məhz 999 əhvalatının bir hekayəsi də var... yazmışdım bir vaxt...
Yer üzünü bu qədər abad etmiş, qurmuş, yaratmış ikinci bir şah, sultan, kral... anasından olmayıb.
Di gəl, qədirbiləni yoxdur... bu da bir ayrı niskil...
Tiflis hamamları və məscidi o yüksək xidmətin qiymətli nümunələrindəndir.
Bu gün Tiflisə axınan turistə göstəriləcək nə varsa - içi Narın qala qarışıq Türk tarixinə aiddir və Türkün xidmətidir.
Amma və lakin... Qədirbilməzlərin əlinə düşüb... tariximizi danırlar...
Bu günkü Tiflisi Tiflis edən o abidələrin üstündə Şah Abbasın adını anan kiçicik bir lövhə belə görə bilməzsiniz.
Başqa söz demirik axı... `qarnım üçün deyil, qədrim üçün deyirəm...` məsəli bu yerdə deyilib...
Əlbəttə, Türkün belə niskilləri bir deyil, beş deyil, çoxdur... Tiflis də onlardan biridir...
Hər gəlişimdə Şah Babamın dünyaya bəxş etdiyi 999 möcüzədən birinin küncünə çəkilib... fikir çəkirəm...
Mehriban Vəzir
TEREF

Son günlər aktual məsələlərdən biri də musiqi müəllimlərinin attestasiyası ilə bağlıdır.

Belə ki, musiqi müəllimləri attestasiyaya cəlb olunublar və bu proses nəticəsində yüzlərlə müəllim imtahandan kəsilib. Mədəniyyət Nazirliyi bildirib ki, fevralın sonunda musiqi məktəblərində fəaliyyət göstərən müəllimlərin attestasiyası aparılıb. Proses ilk olaraq Bakı, Abşeron, Sumqayıt şəhərlərində fəaliyyət göstərən musiqi və incəsənət məktəblərini əhatə edib:

“Attestasiyanın ilk mərhələsi Bakı və Abşeron-Xızı regionları üzrə 47 musiqi və incəsənət məktəbinin 1759 nəfər fortepiano və musiqi nəzəriyyəsi müəllimini əhatə edib. Qanunvericiliyin tələblərinə uyğun olaraq 2024-cü ilin son rübündə növbəti ildə müəllimlərin attestasiyanın keçirilməsi təhsil müəssisələrinin iş planına daxil edilib, müəllimlərə müvafiq bildirişlər göndərilməklə yanaşı, onlara ən azı 3 ay əvvəl attestasiya proqramları təqdim edilib. Attestasiya prosesinin şəffaf təşkili, qiymətləndirmənin obyektiv aparılması məqsədilə peşəkar ekspertlər cəlb olunmaqla hər biri 5 nəfərdən ibarət 10 komissiya yaradılıb.

2025-ci ilin fevral-mart aylarında keçirilən attestasiyanın ilkin mərhələsində 1675 nəfər iştirak edib ki, bu da attestasiyaya cəlb olunmalı müəllimlərin 95,2 faizini təşkil edir. Attestasiyadan uğurla keçmiş 1183 müəllimin 650 nəfəri, başqa sözlə 55%-i bütün komissiya üzvləri tərəfindən müsbət qiymətləndirilməklə ən yüksək nəticə göstərib. Sevindirici haldır ki, son illərdə müsabiqə yolu ilə işə qəbul olan müəllimlər attestasiyadan uğurla keçib.

Bununla belə, 492 müəllim attestasiya komissiyalarının qiymətləndirməsinə əsasən tutduğu vəzifəyə uyğun hesab edilməyib. Onlardan 107 nəfər attestasiya komissiyasının bütün üzvləri, 273 müəllim bir nəfər (yerli həmkarlar təşkilatının nümayəndəsi) istisna olmaqla 4 komissiya üzvü tərəfindən tutduğu vəzifəyə uyğun olmayan kimi qiymətləndirilib. 112 nəfər təhsilverən isə komissiya üzvlərindən 2-si lehinə olmaqla, digər 3-ü tərəfindən tutduğu vəzifəyə uyğun hesab edilməyib.

Attestasiyada tutduğu vəzifəyə uyğun hesab edilməyən təhsilverənlərin musiqi və incəsənət məktəblərinə müəllimlərin işə qəbulu üzrə müsabiqədə iştirak etmək hüququ var. Mədəniyyət Nazirliyinin sistemindəki musiqi, incəsənət məktəb və mərkəzlərində çalışan müəllimlərin attestasiya prosesi davam edir. 2025-2026-cı illərdə bütün ixtisaslar üzrə müəllimlərin attestasiyasının keçirilməsi nəzərdə tutulub”.

Qeyd edək ki, attestasiyadan kəsilən bir qrup müəllim etiraz əlaməti olaraq aksiya keçirib. Attestasiyadan kəsilən müəllimlərdən biri, Səid Rüstəmov adına 13 saylı Musiqi Məktəbinin müəllimi Məhsəti Rəhimova “Cebheinfo.az”-a açıqlamasında proseslə bağlı etirazını bildirib. O qeyd edib ki, attestasiyada şəffaflıq olmayıb:

“ Mən 19 ildir ki, S.Rüstəmov adına 13 saylı Musiqi Məktəbində müəllim, konsertmeyster vəzifəsində çalışıram. Anam da musiqi müəllimidir və 3 nömrəli G. Əlieyeva adına Musiqi Məktəbində çalışır. Onun 33 il stajı var və bir ailədən iki nəfəri kəsiblər. Bu, hansı qanuna, hansı ədalətə sığır, mən bilmirəm. Tamamilə qeyri-şəffafdır. Şəxsən mən çalışdığım məktəbdə savadlı müəllimlərimiz də çoxdur, ancaq savadsız müəllim attestasiyadan keçib. Hər ikimiz xorda çalışırıq. Məktəbin müəllimləri, direktor da şahiddir ki, dəfələrlə mən o konsertmeystri əvəzləmişəm, konsert, tədbir, imtahanda həmişə onun əvəzinə ifa eləmişəm.

Ancaq həmin şəxs attestasiyadan keçib, mən kəsilmişəm. Dəfələrlə konsertlərdə, tədbirlərdə, dirijor Fəxrəddin müəllimin kamera orkestrində, Ramiz Quliyevin yubileyində Bakı Musiqi Akademiyasında ifa etmişəm. Həmçinin Şamaxı, Şəki və digər rayonlarda tədbirlərdə çıxışlarım olub. Ancaq bunun müqabilində mən attestasiyadan kəsilmişəm. Direktor özü də bunu təsdiqləyir. Gəlib araşdıra da bilərlər. Əgər mən savadsız müəlliməmsə, necə işləyirəm? Attestasiya zamanı müəyyən proqram verirlər. Həmin proqrama əsasən ifa elədim, məni yarımçıq saxladılar. Yəni primitiv bir səhvə görə saxladılar. İnsanıq, həyəcanlana bilərik, əllərimiz titrəyər.

Suallar verməyə başladılar. Onlardan ikisinə cavab verdim, üçünə cavab verə bilmədim. Dedilər ki, kəsilmisən. Yəni 19 illik işimizi 15 dəqiqəyə heçə verdilər. Bu, qəti düzgün deyil”. Müəllim deyir ki, proqrama əsasən hazırlaşıb:

“Hətta mən proqramdan əlavə bir əsər də ifa elədim. Onu da yarımçıq saxladılar. İfaçını yarımçıq saxlamaq düzgün deyil. İmtahandan əvvəl Elm və Təhsil Nazirliyinin rəsmisi Cəsarət Valehov 23 nömrəli məktəbdə bütün müəllimləri yığıb iclas etdi. Orada bildirdi ki, heç bir adam işdən azad olmayacaq, bu imtahan sadəcə bir məqsədlə- müəllimlərin bilik, bacarıqlarını yoxlamaq üçün keçirilir. Bizi belə arxayın edib, aldatdılar. Müdirləri də belə aldadıblar. Bizim məktəbin rəhbəri də bizə bildirdi ki, heç bir müəllim işdən azad olunmayacaq. Bir neçə gün öncə əmək kitabçalarını verdilər. Mən götürmədim. Mənim əlim gəlmədi ki, işdən ərizə yazım çıxım.

Mənim əmək kitabçam hələ də məktəbdədir. Yəqin ki, müdriyyət göndərəcək. Bizə bildirdilər ki, ərizənizi yazıb işdən çıxmalısız. O halda da nə məhkəməyə, nə apellyasiyaya verə bilirik. Əgər Əmək Məcəlləsinin 70 C bəndi ilə işdən çıxırıqsa, yenidən imtahan verib-verməyəcəyimiz də bəlli deyil. O da sual altındadır. Hər iki halda itirən müəllimdir”.

Həmsöhbətimiz çox çətin vəziyyət olduğunu deyib:

“Mədəniyyət Nazirliyinə müraciət etmişik. Gənc müəllimlərə ən azından stajı itməsin. Kəsilən müəllimlərin 99 faizi savadlıdır, baxmayaraq ki, texnikom bitiriblər, konsertə uşaq hazırlayırlar. Mən də texnikom bitirmişəm. Gəlsinlər mənim dərslərimdə iştirak etsinlər. Müəllimi yoxlamaq üçün çox yol var. Gəlib açıq dərs keçirsinlər. İl başa çatır, hələ məktəblərdə jurnal yoxdur. Biz 12, 36 vərəqdən jurnal tuturuq. Nəyə görə? Çünki pul yoxdur. Mənim kimi müəllimləri də kəsib işsiz qoyublar. Məqsəd yeni gələn kadrları hansısa vasitə ilə işə qəbul etməkdir. Mənim kimi neçə yüz müəllim var. Bizim məktəbdən bir neçə müəllim kəsilib ki, hamısı da savadlıdır. Mən yalnız özüm üçün deyil, onlara görə də narahatam. Hamısının problemi, evində xəstəsi, maliyyə çatışmazlığı var. Mən fikirlərimi açıq deyirəm. Heç kimdən də çəkinmirəm”.