Türkiyənin Kocaeli vilayətində yaşayış binasında məişət qazının sızması nəticəsində yanğınla müşayiət olunan partlayış baş verib.

AYNA “TGRT” telekanalına istinadən xəbər verir ki, bu barədə vilayətin valisi Əlhami Aktaş məlumat verib.

Onun sözlərinə görə, 3 mərtəbəli binada baş verən partlayışda 10 nəfər xəsarət alıb. Həyata keçirilən tədbirlər nəticəsində yanğının qarşısı alınıb.

Aktau yaxınlığında AZAL təyyarəsinin qəzaya uğramasını araşdırmaq üçün ballistik və partlayış texniki ekspertizası təyin edilib.

APA xəbər verir ki, bu barədə Qazaxıstan hökumətindən bildirilib.

Qeyd edilib ki, qəzanın səbəbləri ilə bağlı araşdırma hazırda 17 beynəlxalq ekspert tərəfindən aparılır.

Dövlət Təhlükəsizliyi Xidməti (DTX) tərəfindən istintaqı aparılmış cinayət işi üzrə saxlanılan şəxslər barəsində məhkəmə prosesi olub.

APA xəbər verir ki, Sumqayıt Ağır Cinayətlər Məhkəməsinin hakimi Fəhmin Hümbətovun sədrliyi ilə iş üzrə baxış iclası keçirilib.

Təqsirləndirilən Elvin Şirinovun müdafiəçisi vəsatətlə çıxış edərək məhkəmələrin qapalı keçirilməsini istəyib. Digər müdafiəçilər də ittiham aktında kommersiya sirlərinin olduğunu əsas gətirərək eyni vəsatətlə çıxış ediblər.

Məhkəmə vəsatəti əsassız sayaraq qəbul etməyib.

Daha sonra dövlət ittihamçısı ittiham aktını elan edib.

“Hidayətov Zöhrab Raqub oğlu Azərbaycan Respublikasının qanunvericiliyi ilə müəyyən edilmiş qaydada dövlət qeydiyyatına alınmadan və xüsusi razılıq tələb olunduğu halda belə razılıq olmadan xüsusilə külli miqdarda gəlir əldə etmək üçün sahibkarlıq fəaliyyəti ilə məşğul olmuş, habelə qabaqcadan əlbir olan bir qrup şəxs halında sənədlərdən aldatma yolu ilə istifadə etməklə və düzgün bəyan etməməklə xüsusilə külli miqdarda malları Azərbaycan Respublikasının gömrük sərhədindən keçirərək qaçaqmalçılıq cinayəti törətmişdir.

Belə ki, o, 1 yanvar 2022-ci il tarixindən 24 dekabr 2023-cü il tarixinədək olan müddət ərzində Xudat, Bərdə, Yevlax, həmçinin 25 dekabr 2023-cü il tarixində Xudat, Xaçmaz, Bərdə və digər rayonlarda dövlət qeydiyyatına alınmadan kənd təsərrüfatı istehsalçılarından, bu sahədə qeyri-rəsmi gömrük broker xidməti göstərən şəxslərdən 1 nəqliyyat vasitəsi, yəni yük avtomobili, vaqon üçün 100 manat məbləğində qeyri-rəsmi haqq müqabilində sonuncuların kənd təsərrüfatı məhsullarının vergi orqanlarında fərdi sahibkar kimi qeydiyyata alınmasını təmin etdiyi Şirinov Elvin Valeh oğlunun və Hümbətov Qaçqın Şura oğlunun adından ixrac edilməsini təşkil edib qanunsuz sahibkarlıq fəaliyyəti ilə məşğul olaraq ümumilikdə 1 559 400 manat məbləğində xüsusi külli miqdarda gəlir əldə edib, E.Şirinov və Q.Hümbətovla qabaqcadan əlbir olan bir qrup şəxs halında həmin məhsulların ixrac üçün ərazi gömrük orqanlarına mallar barədə sahiblik, sərəncam vermə hüquqlarını təsdiq edən sənədlərində həmin məhsulların guya E.Şirinov və Q.Hümbətova məxsus olmalarına dair qeydlər aparmaqla, müvafiq sənədlərdən aldatma yolu ilə istifadə etməklə və düzgün bəyan etməyərək 326 milyon 69 min 684 manat məbləğində xüsusilə külli miqdarda malları Azərbaycan Respublikasının Gömrük sərhədindən xarici ölkələrə keçirməklə qaçaqmalçılıq əməlləri törətmişdir".

Təqsirləndirilən şəxslər ibtidai istintaq zamanı özlərini təqsirli bilib etirafedici ifadələr verməklərinə baxmayaraq, məhkəmə zamanı elan olunan ittiham ilə tam razılaşmayıblar.

Məhkəmə şahid ifadəsi ilə davam edib.

Məhkəməyə şahid kimi dəvət olunmuş şəxs ifadəsində təqsirləndirilən şəxsləri tanımadığını, iş materiallarına əlavə olunmuş gömrük sənədlərində təqsirləndirilən şəxslərin guya ondan kənd təsərrüfatı məhsulunu satın alıb xaricə ixrac etdikləri göstərilsə də o, heç kimə mal satmadığını, həmin şəxslərlə iş birliyinin olmadığını və bu şəxslərin belə saxta sənədlər tərtib etdiklərindən xəbərsiz olduğunu göstərmişdir.

Daha sonra, məhkəmə iclasa gəlməyən digər şahidlərin məhkəməyə məcbur gətirilməsi barədə qərar qəbul etmişdir.

Növbəti məhkəmə prosesi 2025-ci il yanvarın 16-na təyin olunub.

Qeyd edək ki, təqsirləndirilən şəxslər Cinayət Məcəlləsinin 192.3.2 və 206.3.2-ci maddələri ilə ittiham olunur.

Təqsirləndirilən şəxslərdən Elvin Şirinov barədə bəzi maraqlı detallar mətbuata məlumdur.

Belə ki, ötən illər üzrə İqtisadi İslahatların Təhlili və Kommunikasiya Mərkəzi (İİTKM) “İxrac icmalı”larına əsasən, əvvəllər, məsələn 2021-ci ildə Elvin Şirinov ümumiyyətlə qeyri-dövlət (özəl) ixracatçı subyektlər sırasında yer almadığı halda, 2023-cü ildə qeyri-dövlət ixracatçı subyektlərin sıralanmasında birdən-birə ilk onluqda 1-ci yeri tutub.

Belə bir reytinq sıçrayışı mətbu orqanların da diqqətindən qaçmamış, “kiçik bir torpaq sahəsi belə olmayan” 2700187092 VÖEN-li fərdi sahibkar - kənd təsərrüfatı məhsulları ixracatçısı barədə təbii suallar səsləndirilmişdi.

DTX-də aparılan istintaqla müəyyən olunub ki, Elvin Şirinov digər təqsirləndirilən şəxs Zöhrab Hidayətov tərəfindən qurulmuş kölgə iqtisadiyyatı maxinasiyasının iştirakçılarından yalnız biridir.

Belə maxinasiyalar ilə xarici valyuta ölkədən kənd təsərrüfatı mallarının satışı adı ilə çıxarılır. Lakin sonradan qanunvericiliyin tələblərinə zidd olaraq ölkəyə geri qaytarılmır.

Göygöl Rayon Mərkəzi Xəstəxanasının həkim-pediatrı Əmirxan Mövlayevə cinayət işi açılıb.

Qaynarinfo-nun məlumatına görə, Əmirxan Mövlayevlə bağlı Cinayət Məcəlləsinin 314.2-ci (Səhlənkarlıq, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə iş başlanılıb.

İş baxılması üçün Göygöl Rayon Məhkəməsinə göndərilib və 10.01.2025-ci ildə hakim Mübariz Məmmədovun sədrliyi ilə baxılacaq.

Qeyd edək ki, Göygöl Rayon Mərkəzi Xəstəxanasının həkim-pediatrı Mövlayev Əmirxan Ramazan oğlu 03.01.1955-ci ildə Ermənistan Respublikası Amasiya rayonunun Əzizbəyov kəndində anadan olub.

Əmirxan Mövlayev 1973-1979-cu illərdə Azərbaycan Dövlət Tibb Universitetinin Pediatriya fakültəsində təhsil alıb. 1980-1987-ci illərdə Xanlar Mərkəzi Rayon Uşaq xəstəxanasının baş həkim vəzifəsində çalışıb. 1987-2023-cü illərdə Göygöl Rayon Mərkəzi Xəstəxanasının Poliklinika şöbəsində həkim-pediatr vəzifəsində işləyib. 2023-cü ildən tibb müəssisəsinin Uşaq şöbəsinin müdiri vəzifəsində çalışır.

İmişli rayon Ağsaqqallar Şurasının sədri Saleh Səmədova məxsus olan nəhəng parnikdə yanğın baş verib.

Mia.az xəbər verir ki, hadisə bu gün İmişlidə - Araz çayının kənarında yaşanıb.

Yayılan videodan görünür ki, parnikdə çox güclü yanğın başlayıb.

Xatırladaq ki, Salaeh Səmədov İmişlidə spirt/konyak zavodundan tutmuş, çox obyektlərə sahiblənib. Onun Rusiyaya qədər uzanan geniş biznesi var.

Yanğına aşağıdakı videodan baxa bilərsiniz:

“Baş vermiş təyyarə qəzası böyük faciədir. Dövlət başçısı təyyarə qəzası haqqında məlumat alan kimi Sankt-Peterburqa səfəri dərhal təxirə salır və yarı yoldan geri qayıdaraq hava limanında fövqəladə müşavirə keçirir. Həm də hadisənin səbəblərinin araşıdırılması üçün komissiya yaradaraq Aktauya ezam edir. Dövlət başçısının tapşırığı ilə bütün lazımı tədbirlər görülür. 26 dekabr matem elan edildi. Xalqımız həlak olanların ruhuna etiram göstərərək onların yaxınlarının dərdinə şərik olduğunu nümayiş etdirir. Həm də həm həlak olanların və yaralıların ölkəyə gətirilməsi ilə bağlı bütün tədbirlər görülür. Qəzanın nədən baş verdiyini mütəxəssislər tərəfindən araşdırılır və müvafiq hüquqi qiymət veriləcəkdir”.
Bu barədə Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov Bizimyol.info xəbər portalına açıqlamasında bildirib ki, bu, dövlət başçısı üçün xalqın taleyinin hər şeydən üstün olduğunun göstəricisidir. Deputat vurğulayıb ki, belə ağır günlərdə hamı həmrəylik göstərərək dəmir yumruq kimi birləşib səbr nümayiş etdirir.

“Ölkəmizdə fəaliyyət göstərən 26 siyasi partiyasından 24-nün bu məsələdə eyni mövqe sərgiləyərək bəyanat səsləndirməsi təqdirəlayiq addımdır və bu, taleyüklü məsələlərdə siyasi baxışlarından asılı olmayaraq hamının eyni mövqeni nümayiş etdirməsi və dövlətin gördüyü ədalətli işə töhfə verməsi deməkdir. Bu cür bəyanatlar, faciənin ciddi və kədərli bir hadisə olduğunu vurğulamaq, qurbanların ailələrinə başsağlığı vermək və həmçinin ölkədəki ümumi həmrəylik və birliyi nümayiş etdirmək məqsədi daşıyır. Yerdə qalan 2 siyasi partiya xalqın çətin günlərində digər partiyalar kimi xalqın və dövlətin yanında olduğunu göstərmir. Hətta bəziləri təyyarə qəzasından siyasi spekulyasiya vasitəsi kimi öz maraqları üçün istifadə etməyinə çalışır. Bəli, təyyarə qəzasının siyasi spekulyasiya vasitəsi kimi istifadə edilməsi yolverilməzdir. Təyyarə qəzası ciddi bir insan itkisidir və bu kimi faciələr üzərində siyasi məqsədlərlə spekulyasiya etmək, həm insanlıq prinsiplərinə, həm də etik dəyərlərə ziddir”-deyə deputat xüsusi olaraq vurğulayıb.

"Azərbaycan Hava Yollarının Qazaxıstanda qəzaya uğrayan təyyarəsinə aid daha bir "qara qutu" tapılıb".

APA xəbər verir ki, bunu jurnalistlərə Manqistau vilayətinin nəqliyyat prokuroru Abılaybek Ordabayev deyib.

O həmçinin əlavə edib ki, zərərçəkənlərin və havalimanının yerüstü xidmətlərinin əməkdaşlarının izahatları alınıb: “Dispetçerlərlə ekipaj arasındakı danışıqların səs yazıları götürülüb. Hazırda bütün şahidlərin əhatə dairəsi müəyyənləşdirilir. Eyni zamanda 4 min kv.km. ərazinin müayinə prosesi başa çatmaq üzrədir. Ərazinin mühafizəsi polis əməkdaşları tərəfindən təmin edilir”.