 |
|
|
"Temperaturun hətta kiçik dəyişikliyi daha tez-tez və ekstremal hava hadisələrinə səbəb ola bilər..."
Yer üzündə istilik artır. 2024-cü ildə qlobal istiləşmə 1,5°C-lik kritik həddi keçib.
Bu barədə "bbc.com" nəşri məlumat verib.
"Berkeley Earth"-dən iqlimşünas Zik Hausfater izah edir ki, dərəcənin hər onda bir hissəsinin əhəmiyyəti var: temperarurun artması ilə nəticələr daha dağıdıcı olur.
2015-ci ildə 195 ölkə tərəfindən imzalanan Paris Sazişi iqlim dəyişikliyinin ən təhlükəli təsirlərindən qaçmaq üçün istiləşməni 1,5°C səviyyəsində saxlamağı nəzərdə tutub.
Nəşr "Copernicus" iqlim xidmətinin dərc etdiyi yeni məlumatlara istinadən bildirir ki, 2024-cü il müşahidə tarixində ən isti il olub və planetin orta temperaturu sənaye inqilabından əvvəlki səviyyə ilə müqayisədə ilk dəfə 1,5°C-i keçib. Buna baxmayaraq, uzunmüddətli göstəricilər hələ də bu həddən aşağıdır, lakin temperatur artımı meyli aydın şəkildə görünür.
Təəccüblü deyil ki, son onillik tarixdə ən isti dövr olub. Qlobal istiləşmənin əsas səbəbi isə hələ də atmosferdə toplanmağa davam edən karbon qazı kimi insan mənşəli istixana qazı emissiyalarıdır.
Bundan əlavə, təbii iqlim fenomeni olan El-Ninyo da istiləşməyə öz təsirini göstərib, lakin əsas amil
insan fəaliyyətidir. "Copernicus"-un direktor müavini Samanta Berdcesin sözlərinə görə, istixana qazlarının yüksək konsentrasiyası iqlim dəyişikliklərinin əsas səbəbidir.
Alimlər xəbərdarlıq edir ki, hətta temperaturun kiçik dəyişiklikləri daha tez-tez və intensiv ekstremal hava hadisələrinə səbəb ola bilər.
2024-cü ildə dünya Qərbi Afrikada ekstremal istilik, Cənubi Amerikada uzunmüddətli quraqlıq, Mərkəzi Avropada güclü yağışlar və Şimali Amerika ilə Cənubi Asiyada dağıdıcı tropik qasırğalarla üzləşib.
Bəzi alimlər bu prosesin istiləşmə sürətini artıracağından narahatdır. Tədqiqatçılardan biri qeyd edib: "2023 və 2024-cü illərdə temperatur bizi təəccübləndirib. 1,5°C həddini bu qədər tez keçəcəyimizi gözləmirdik."
Tədqiqatlar göstərir ki, Los-Anceles uzunmüddətli quraqlıq səbəbindən böyük meşə yanğınlarından əziyyət çəkib.
Planet 1,5°C həddinə sürətlə yaxınlaşmaqda davam etsə də, alimlər vurğulayır ki, istixana qazı emissiyalarının azaldılması istiləşmə sürətini azalda bilər.
Fransanın Strasburq şəhərində iki qatar toqquşub.
Xarici media xəbər verir ki, ilkin məlumatlara görə, 30-dan çox insan xəsarət alıb.
Son günlər sosial şəbəkələrdə dələduzluğun yeni bir növü geniş müzakirə mövzusuna çevrilib.
Taksi şirkətləri tərəfindən sertifikatsız və ya 2015-ci ildən köhnə modelləri olan avtomobillər bloklansa da, bəzi şəxslər bu qaydalardan yan keçmək üçün yeni fırıldağa əl atıblar.
Belə ki, cəmi bir neçə dəqiqəyə və müəyyən bir məbləğ qarşılığında köhnə avtomobillər sertifikatlı və 2015-ci ildən yeni görünür.
Sosial şəbəkələrdəki şərtlərə nəzər salanda bu xidmətdən istifadə etmək istəyənlərin çoxluğu diqqət çəkir. Görünür, qaydaları pozaraq qeyri-qanuni yolla işini davam etdirmək istəyənlərin sayı az deyil. Bu prosesin nə dərəcədə real olduğu isə hələlik sual altındadır.
"Sürücünün hesabı qeyri-qanuni formada bloklananda mütəxəssis problemin aradan qaldırılması üçün onun adından müraciət edir. Bu zaman araşdırma aparılaraq hesab analiz edilir və qeyri-qanuni fəaliyyətin olmadığı sübut edildikdə blokdan çıxarılır. Qeyri-qanuni fəaliyyət nəticəsində bloklanma olduqda isə bəzi şəxslər xüsusi manipulyasiyalar vasitəsilə sürücünün məlumatlarını başqa formada təqdim edərək bloku aradan qaldıra bilərlər. Lakin həmin şəxslər bunu çox vaxt insanları aldatmaq, pullarını mənimsəmək məqsədilə edirlər", - deyə İT mütəxəssis Əmrah Mövsümzadə mövzu ilə bağlı açıqlamasında deyib.(oxu.az)
Daha ətraflı Baku TV-nin süjetində:
Los-Ancelesdə başlayan güclü yanğınları söndürmək çətinləşib: onlarla ev yanıb, yüz minlərlə insan təxliyə edilib
ABŞ-ın Kaliforniya ştatının Los-Anceles bölgəsində güclənən meşə yanğınları fəlakətin miqyasını artırmaqdadır. Yanğınlar bölgədə ağır ziyanlara, evakuasiyalara və yol bağlanmalarına səbəb olub. Yanğın çərşənbə axşamı günü axşam saatlarında Los-Ancelesin şimal-şərqindəki təbiət qoruğu yaxınlığında başladıqdan sonra sürətlə yayılıb. Qısa zamanda yanğın yaxınlıqda olan “yaşlılar evi”nə yayılıb. Mərkəzin işçiləri əlil arabalarında və xəstəxana çarpayılarında olan onlarla sakinlərini təcili sürətdə təxliyə ediblər. Təcili yardım maşınları, avtobuslar və digər vasitələr onları təhlükəsiz yerə aparmaq üçün gələnə qədər sakinlər yataq paltarları ilə orada gözləməli olublar.
Digər bir yanğın isə məşhur Pasifik Palisades məhəlləsində evləri və avtomobilləri yandırıb. Sakinlər əşyalarını götürərək, piyada qaçmağa məcbur olublar. Bu barədə “Amerikanın Səsi” məlumat yayıb. “Palisades Drive”da yaranan tıxac təcili yardım maşınlarının keçməsinə mane olub. Əraziyə gətirilən buldozer vasitəsi ilə avtomobillər itələndikdən sonra təcili yardım və yanğınsöndürən maşınlar üçün cığır açılıb.
Üçüncü meşə yanğını isə yerli vaxtla saat 22:30 radələrində başlayıb. Los-Ancelesin ən şimal məhəlləsi olan San Fernando Vadisi icması olan Sylmarda təcili şəkildə təxliyə olunub.
Yanğınlar, xüsusilə ərazidə əsən Santa Ana küləkləri tərəfindən daha da qızışır. Külək yanğınsöndürmə işlərini çətinləşdirib. Los-Anceles Yanğınsöndürmə Departamenti ehtiyat yanğınsöndürən briqadalardan kömək istəyib. Külək səbəbindən yanğınlara havadan müdaxilə etmək mümkün olmayıb.
Yaranmış vəziyyət Prezident Co Baydenin Riverside qraflığına səfər planlarını ləğv etməsinə səbəb olub. O Los-Ancelesdə pəncərəsindən yanğının tüstüləri görünən oteldən yanğınlar haqqında məlumatlandırılıb.
Yanğınlar təxminən 150 min insanın evakuasiya olunmasına səbəb olub. Ştat qubernatoru Qavin Nyusom fövqəladə vəziyyət elan edib və vəziyyətin daha da pisləşəcəyi barədə xəbərdarlıq edib.
Prezident Bayden Kaliforniyadakı meşə yanğınları ilə əlaqədar fövqəladə vəziyyət elan edib və əraziyə əlavə resursların yönəldilməsinə göstəriş verib. Prezident xəbərdarlıq edib ki, ərazinin dirçəlişi vaxt aparacaq.
Los Anceles Qraflığının Yanğınsöndürmə Departamenti azı 10 adamın ölümünə səbəb olmuş dörd təhlükəli yanğınıla üz-üzə qalındığını açıqlayıb. Bu yanğınlar nəticəsində mindən çox ev yanıb, yüz minlərlə insan evakuasiya olunub.
“Departamentimiz bir, yaxud iki meşə yanğını ilə çapışmağa hazırdır, lakin dördü ilə yox – ələlxüsus belə bir küləkli və quraqlıq hava şəraitində,” Los Anceles Qraflığının Yanğınsöndürmə Departamentinin rəisi Antoni Marron bildirib. Onun sözlərinə görə, 2,000 hektar sahə tamamilə yanıb və yanğın yayılmaqda davam edir.
Rəsmilər yerli sakinləri təxliyə edilmək barədə göstərişlərə riayət etməyə və lazım olduqda evlərini tərk etməyə çağırıb.
Meteoroloqlar quru şəraitin və yanğınların yayılmasına şərait yaradan güclü küləklərin həftə sonunadək davam edəcəyini bildiriblər. Güclü küləklər yanğınlarla mübarizədə istifadə edilən təyyarələri yerə endirməyə məcbur edib.
ABŞ Prezidenti Co Bayden Kaliforniyada meşə yanğınları ilə mübarizəyə kömək etmək üçün federal yardım və resursların sərbəst buraxılması üçün federal fövqəladə vəziyyət elanını təsdiqləyib. Ağ Evdən bildirilib ki, Bayden İtaliyaya planlaşdırılan səfərini ləğv edib. Səbəb isə "qarşıdakı günlərdə yanğınlarla mübarizəni diqqətdə saxlamaq" göstərilib.
“Biz bu yanğınların qarşısını almaq və yenidən qurmağa və normal vəziyyətə qayıtmağımıza kömək etmək üçün lazım olan müddətdə hər şeyi etməyə hazırıq. Bu, çox uzun bir yol olacaq. Bu, zaman alacaq", Bayden deyib.
Pentaqon Kaliforniyaya “əlavə yanğınsöndürmə personalı və imkanlar” təqdim edildiyini açıqlayıb.
Rəsmilər bu həftə şərtləri nəzərə alaraq Los-Anceles bölgəsində meşə yanğınları ehtimalı barədə xəbərdarlıq etsə də, yanğınlar gözləniləndən daha geniş olub. Hollivud ərazisi ilə yanaşı, Sakit okean Palisades, Altadena, Pasadena və Silmarda da aktiv yanğınlar olub.
Yanğınların vurduğu ziyan 135-150 milyard dollara çatıb. Bu barədə məlumatı “AccuWeather” xidməti yayıb. Bildirilib ki, Los-Ancelesə dəyən ziyanın və iqtisadi itkilərin məbləği təxminən 135-150 milyard dollar arasında qiymətləndirilir.
Yanğınsöndürmə rəsmiləri yanğınların səbəbinin hələ aydın olmadığını, lakin aktiv araşdırmanın aparıldığını deyirlər.
Los-Anceles dairəsinin şerifi Robert Luna bildirib ki, yanğınlar onun indiyədək gördüyü “ən dəhşətli yanğınlardan” biridir. “sanki bu ərazilərə atom bombası atılıb”, - deyə qeyd edib.
Son məlumata görə, Los Ancelesdə yanğınlar hələ də davam etməkdədir. Külək yanğınların məhdudlaşdırılmasına əngəl törədir. Rəsmilər bildirirlər ki, insanların həyatlarının xilas edilməsi üçün bütün tədbirlər görülür. Yanğının söndürülməsinin nə vaxt mümkün olacağını isə proqnozlaşdırmaq çətindir.
Yeri gəlmişkən, Los-Ancelesdə baş verən yanğında tüstüdən zəhərlənən, evləri yananlar barədə Azərbaycanın Baş Konsulluğuna məlumat daxil olmayıb. Xarici İşlər Nazirliyinin (XİN) mətbuat katibi Ayxan Hacızadə bildirib ki, 7 yanvar 2025-ci il tarixindən etibarən Amerika Birləşmiş Ştatlarının Los Anceles şəhərinin qərbində başlamış yanğınlarla əlaqədar, Azərbaycan vətəndaşlarının təhlükəsizliyinin təmin edilməsi məqsədilə Azərbaycan Respublikasının Los Anceles şəhərindəki Baş Konsulluğu tərəfindən müvafiq iş aparılır.
“Belə ki, Baş Konsulluğumuza məxsus sosial media hesablarında xəbərdarlıq elanı və təcili əlaqə nömrəsi (+13109234540) yerləşdirilib.
Həmçinin vətəndaşların yanğınlarla bağlı məlumat əldə etmələri və təhlükəsizlik təlimatı ilə tanış olmaları üçün müvafiq internet səhifəsinə keçid linki paylaşılıb.
Əlavə olaraq, Baş Konsulluğun yerləşdiyi binanın müvəqqəti olaraq evakuasiya edilməsinə baxmayaraq, distant qayada Baş Konsulluğun fəaliyyəti davam edir, hadisələrin gedişatı izlənilir və vətəndaşlarla əlaqə kanalları daim açıq saxlanılır”, - XİN rəsmisi vurğulayıb.
Bu Şəhərdə” layihəsinin tanınmış ssenaristi Müşviq Abbasov “Flydubai” aviaşirkəti ilə bağlı ciddi narazılığını ifadə edib.
XALQ.AZ xəbər verir ki, o və ailəsi uçuş üçün qeydiyyat prosesini tamamlamalarına baxmayaraq, reysdən səbəbsiz şəkildə çıxarılıblar.
Müşfiq Abbasovun sözlərinə görə, hadisə uçuşa iki saat qalmış baş verib:
“Sadəcə uçuşa iki saat qalmış bizim 4 yerimiz yoxa çıxdı. Biz olduq yersiz. Bizə dedilər “yerinizi bilin”.
Pasportunuzu təpənizə çırpıb “uzatmayın, rədd olun aeroportun otelində qalın” dedilər.”
Abbasovun sözlərinə görə, məsələ ilə bağlı “Flydubai”nin Bakıdakı rəhbərliyi ilə görüşmək və rəsmi şikayət etmək cəhdləri də nəticəsiz qalıb. Aviaşirkət yalnız standart üzrxahlıq mesajı ilə kifayətlənib:
“Bizim üçün hər sərnişin vacibdir. Sizdə yaranan problemə görə üzr istəyirik”, – deyə bildirilib. Lakin nə kompensasiya verildi, nə də problemin səbəbi açıqlandı”.
Ssenarist insanlara bu aviaşirkətdən uzaq durmalarını məsləhət görüb.
“Flydubai”ın Bakı nümayəndəliyindən bu məsələ ilə bağlı heç bir açıqlama almaq mümkün olmadı.
Bakı şəhər Səbail rayonu Nizami küçəsi 96 ünvanında yerləşən “Haven” restoranının icarədarı Ələkbər Həbibov obyektin mülkiyyətçisini onu işlədiyi yerdən qeyri-qanuni şəkildə çıxarmaqda ittiham edir.
“Qafqazinfo”ya müraciət edən Ə.Həbibov 807 kvadrat metr sahəsi olan obyektin sahibi Mahmud Kərimovun Bakı Apellyasiya Məhkəməsindən qanunsuz qərar çıxartdığını və icarə müqaviləsinin şərtlərini pozduğunu iddia edir.
Həm də tanınmış idmançı olan şikayətçi bildirib ki, obyekt əslində Ədliyyə Nazirliyi Qeydiyyat Notariat Baş İdarəsinin keçmiş rəisi ədliyyə generalı İlqar Məmmədova məxsusdur: “Onunla aramızda centlmen razılığı əldə etdikdən sonra heç bir müqavilə olmadan ona məxsus, şəhərin mərkəzində yerləşən “Haven” restoranına 2,5 milyon manat sərmayə qoyaraq təmir etdirdim və orada fəaliyyətə başladım. Şifahi olaraq razılaşdıq ki, obyektin əsaslı təmirinə qoyduğum sərmayə müqabilində İlqar Məmmədov obyekti mənə uzunmüddətli (ən azı 10 il) icarə müqaviləsi bağlamaq şərti ilə verəcək. Lakin obyektin sahibi təmir bitdikdən sonra öz vədinə əməl etməyərək cəmi 1 illik müqavilə bağladı. Həmin müqavilə bir neçə dəfə uzadıldıqdan sonra öz hüququndan sui-istifadə edərək məndən əsassız olaraq obyekti boşaltmağımı tələb edirlər”.
Ə.Həbibov iddia edir ki, general İlqar Məmmədov öz əlaqələrindən istifadə edərək heç bir əsas olmadan restoranın fəaliyyətinin dayandırılması və istifadəsinin qadağan edilməsi üçün qanunsuz və ədalətsiz qərar qəbul etdirib: “Bakı Apellyasiya Məhkəməsi qərarında işin hallarını qəbul olunmuş qərar şəklində təqdim edir, lakin əslində bu, iddianın təmin olunmasına dair müvəqqəti tədbir idi ki, bu da məhkəmənin mahiyyəti üzrə baxışının nəticəsini əvvəlcədən müəyyənləşdirdi. Halbuki qanuna görə, iddianın təmin olunması üçün müvəqqəti tədbirə dair məhkəmə qərarı, məhkəmə baxışının nəticəsini müəyyən etməməlidir. Hakimlər beləliklə bütün məhkəmə prosesinin taleyini həll ediblər. Həmçinin verilmiş qərarda nə mənim vaxtında ödənilmiş icarə haqlarım, nə də ki obyektə buraxılmış sərmayəm barəsində bir məlumat verilir. Qanunla icarə müqaviləsinin ləğv edilməsi və ya icarə haqqının tutulması ilə bağlı məhkəməyə müraciət etmək imkanı olduğu halda, faktiki icarədar, Ədliyyə Nazirliyinin sabiq Baş Qeydiyyat və Notariat İdarəsinin rəisi İlqar Məmmədov (obyekt onun doğma dayısı Mahmud Kərimovun adına rəsmiləşdirilib İ.Ə) öz əlaqələrindən istifadə edərək məhkəmə prosesinə müdaxilə edib və mənə qarşı qanunsuz və ədalətsiz qərar qəbul etdirib”.
Şikayətçi əlavə edib ki, geridə qalan illər ərzində obyektin sahiblərinə bir milyon manatdan çox icarə haqqı ödəyib: “Həmin obyektdə göstərdiyi sahibkarlıq fəaliyyətindən dövlət büdcəsinə 400 000 manata yaxın vergi də ödəmişəm. İcarə müqaviləsi yalnız tərəflərin qarşılıqlı razılığı əsasında və ya məhkəmə qərarı ilə ləğv edilə bilər. Lakin Bakı Apellyasiya Məhkəməsi bu vacib məsələni nəzərə almır və qərarın “müvəqqəti xarakter daşıdığına” istinad edir. Digər tərəfdən, hakimlər Elnur Həsənov, Təranə Mahmudova və Ziya Şirinov verdikləri qərarla mahiyyəti üzrə işin nəticəsini faktiki olaraq həll ediblər ki, bu da qanunsuzdur və məhkəmə təcrübəsinə ziddir. Hakimlər mənimlə yanaşı, orada çalışan 35 əməkdaşı işsiz qoymaqla onların ailəsinə zərər vurublar”.
Şikayətçi məsələyə ədalətli münasibətin göstəriləcəyinə ümid etdiyini vurğulayıb.
Qeyd edək ki, Ə.Həbibov tanınmış heykəltaraş, SSRİ Dövlət Mükafatı laureatı və Azərbaycanın Xalq Rəssamı İbrahim Zeynalovun nəvəsidir.
Bakı Apellyasiya Məhkəməsindən sorğumuza cavab olaraq bildirilib ki, sahibkarın şikayətində qeyd etdiyi məsələlərlə bağlı araşdırma aparılıb: “Baxılmış müvəqqəti təminat tədbiri ilə bağlı yayınlanmış məqalələrdə yer alan fikirlərlə bağlı bildiririk ki, baxılan iş üzrə tərəflər arasında bağlanmış icarə müqaviləsində müqavilənin 19.10.2024-cü il tarixinə qədər qüvvədə olacağı, icarə haqqının ardıcıl 20 gün ödənilməməsi halında müqaviləyə “İcarə verən”in təşəbbüsü ilə birtərəfli qaydada xitam veriləcəyi, müqavilənin ləğv edilməsinin tərəflərin bir ay qabaqdan yazılı ərizəsinə müvafiq olaraq həyata keçiriləcəyi razılaşdırılmış, icarəyə verən (mülkiyyətçi) icarəyə götürənin icarə haqqı borcunu vaxtında ödəməməsini əsas gətirərək məhz icarə müqaviləsində nəzərdə tutulan qaydada müqaviləni birtərəfli qaydada ləğv etdiyi barədə iradə ifadəsini bəyan etməklə müqavilə münasibətlərini sonlandırılıb.
Apellyasiya instansiyası məhkəməsi də tərəflər arasında bağlanmış icarə müqaviləsinin icarəyə verənin (mülkiyyətçinin) birtərəfli iradə ifadəsi əsasında ləğv olunduğunu nəzərə alaraq müvafiq qərardad qəbul edib. Nəzərə alınmalıdır ki, qanunvericiliyə görə, məhkəmənin müvəqqəti təminat tədbirinin tətbiqi barədə qərardadı müvəqqəti xarakter daşıyır və işin qabaqcadan mahiyyəti üzrə həll edilməsi hesab olunmur".
DogruXeber.az: - Bakının məşhur və ilk restoranlarından biri olan “Şuşa” restoranı sökülüb. Nərimanov rayonu, Təbriz küçəsində yerləşən restoranın söküntüsünə bu gün başlanılıb. Restoran tam olaraq sökülüb. Bu barədə məlumatı restoranın sahibi Elxan Qasımovun qızı verib. Onun sözlərinə görə restoran qanunsuz və onların xəbəri olmadan sökülüb. Söküntü işləri aparılan zaman tərəflər arasında mübahisə də yaşanıb. Söküntünü aparan şəxlər mülk sahiblərinin çəkiliş aparmasına mane olmağa çalışıblar. O, restoranın ADA universitetinin prorektoru Şahmar İbadov tərəfindən söküldüyünü iddia edib.
Bəs kimdir bu Şahmar İbadov? Uzun illər Nərimanov rayon İcra Hakimiyyəti başçısının birinci müavini işləmiş İbadov hazırda Prezident Adminstrasiyasının İşlər İdarəsində sektor müdiri vəzifəsində çalışır. Şahmar İbadov var-dövləti ilə seçilən məmurlardandır. Onun obyektləri və özünə tikdirdiyi villalar buna misal ola bilər. Məsələn qalmaqallarda adı hallanan “Ariva” hotelin, Nərimanov rayonunda “Çanaqqala”, “Pürrəngi”, Nərimanov parkının içində yerləşən obyektlərin onun təsir dairəsində olduğu bildirilir. Onu da qeyd edək ki, cənab İbadov biznes fəaliyyətinə hələ 90-cı ilin əvvəllərində Binəqədidə (“pasyolka kirov”da) başlayıb. Kifayət qədər geniş maddi imkanlara malik olan İbadovun adı ölkədəki FETÖ şəbəkəsi ilə də hallanıb.
Bununla bağlı cumhuriyyet.az bildirir ki, Şahmar İbadovun Gülənin Azərbaycanda fəaliyyət göstərən “komandasının” rəhbərlərindən birinın olması ilə bağlı hətta türk mətbuatı da geniş məqalə dərc etmişdi. Bundan başqa Şahmar İbadovun Elnur Aslanov və Ceyhun Osmanovla ilişkilərinin olması da artıq sübut olunub.
Parlament sədrinin köməkçisi vəzifəsindən, Nərimanov İcra Hakimiyyətinə şöbə müdiri təyinatı və ən qısa zamanda icra başçısının I müavini təyin olunması, burdan uzaqlaşan kimi isə Prezident Adminstrasiyasında vəzifə alması da onun hansısa qüvvələr tərəfindən himayə olunduğunu düşünməyə əsas verir. Bu imkanlar qalmaqallı məmurun övladlarına təsir edib. Şahmar müəllimin oğlu Elmar İbadov 2017-ci il avqustun 22-də idarə etdiyi “Range Rover” markalı avtomobillə yaşlı qadını vurub. Bir neçə gündən sonra qadın ölüb. Abşeron Rayon Məhkəməsinin hökmü ilə Elmar İbadov 5 il müddətinə azadlıqdan məhrum olunub. Məhkəmə onun cəzasının məntəqə tipli cəzaçəkmə müəssisəsində çəkməsi haqqında qərar qəbul edib.
Daha sonra Sumqayıt Apellyasiya Məhkəməsi ona tam bəraət alıb. Hakim Məhəmmədəli Rzayevin məhkəmə-hüquq sisteminin tarixinə “qızıl” hərflərlə “imza” atdığı bu qərara Şahmar İbadovun zərərçəkmişin ailəsinə hədiyyə etdiyi təzə avtomobil mühüm rol oynayıb. Şahmar İbadovun o biri Totu ləqəbli oğlunun isə 555 qeydiyyat nişanlı milyon manatlıq avtomobil kolleksiyası var. Bir sözlə, Şahmar İbadov və oğlanları bu məmləkətdə nə lazımdırsa edirlər. Bunlar üçün qayda-qanun-zad kağız üstündədir. Məlumata görə qalmaqallı tarixçəyə malik İbadov rayonların birinə icra başçısı və ya nazir müavini getməyə hazırlaşır.//cumhuriyyet.az
Bakıda tragikomik hadisə yaşanıb.
Bu barədə həkim Elnur Eldaroğlu sosial şəbəkə hesabında paylaşım edib.
Belə ki, həkim sifariş verdiyi taksinin sürücüsünün yuxulu olduğunu və hərəkətə belə davam etməyin təhlükə yaratdığını gördükdən sonra avtomobili özü idarə edib. Bu zaman isə taksinin sürücüsü arxa oturacaqda yatıb. Mənzil başına çatdıqdan sonra isə həkim taksi sürücüsünü ayıq sürücü çağıraraq yola salıb.
bizim.media
Yanvarın 8-də Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın və Baku Media Mərkəzinin rəhbəri Arzu Əliyevanın iştirakı ilə paytaxtın Nizami və Xətai rayonlarında 3000-dən çox sakinin yaşadığı çoxmərtəbəli binaları əhatə edən yenilənmiş həyətlər sakinlərin istifadəsinə verilib.
Leyla Əliyeva və Arzu Əliyeva IDEA könüllüləri ilə birlikdə həyətlərdə keçirilən ağacəkmə aksiyalarına qatılıb, həmin ərazilərdə yaşayan azyaşlı sakinlərə hədiyyələr təqdim edib.
“Bizim həyət” layihəsi çərçivəsində abadlaşdırılmış digər ərazilərdə olduğu kimi, yenidən qurulmuş növbəti həyətlərdə də sağlamlıq imkanları məhdud insanların rahat hərəkəti nəzərə alınıb, bütün yaş qrupları üzrə uşaqların inkişafı üçün əlverişli şəraitin yaradılması, gənclərin asudə vaxtlarının səmərəli təşkili və onlarda idmana marağın artırılması məqsədilə ərazidə süni örtüklü mini-futbol meydançası, müxtəlif idman qurğuları, şahmat meydançası, uşaqlar üçün oyun meydançası salınıb. Eyni zamanda, həyətyanı sahələrdə söhbətgahlar, çoxsaylı oturacaqlar, quş yuvaları və pişik evləri quraşdırılıb. Bundan əlavə, həyətlərdə yeni işıqlandırma dirəkləri, müşahidə kameraları quraşdırılıb, binaların fasad və blokları tam təmir olunub, asfalt və dam örtüyü, elektrik xətləri yenilənib. Həyətlərin ərazisindəki mövcud yaşıllıqların bərpası ilə yanaşı, müxtəlif növ ağaclar, kol bitkiləri əkilərək yaşıllıq zolağı salınıb. Bununla yanaşı, həyətlərin ətrafında sıx bitən və havanın çirklənməsinin qarşısını almaq məqsədilə adi daşsarmaşığı və digər sarmaşan bitkilər əkilərək “yaşıl sədlər” yaradılıb.
Xatırladaq ki, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə 2017-ci ildən etibarən “Bizim həyət” layihəsi icra olunur. Layihənin əsas məqsədi paytaxt ərazisində həyətlərin ekoloji cəhətdən təmiz və abad olması, yaşıllıqların bərpası, mənalı istirahət mühitinin formalaşdırılması, sakinlər üçün təhlükəsiz və rahat yaşam şəraitinin yaradılmasıdır. “Bizim həyət” layihəsi çərçivəsində bu günədək 156 ümumi yaşayış sahəsi abadlaşdırılaraq sakinlərin istifadəsinə verilib.
Qeyd edək ki, IDEA İctimai Birliyi həyətlərin abadlaşdırılması və yenidənqurma işlərinin aparılması istiqamətində sakinlərin təklif və müraciətlərini İctimai Birliyə təqdim etməyə çağırır. Müraciətlərinizi IDEA İctimai Birliyinin qaynar xətti “1113” və ya e-mail ünvanına (info@ideacampaign.org) göndərməyiniz xahiş olunur.
"Fövqəladə Hallar Nazirliyi Dövlət Yanğından Mühafizə Xidmətinin İmişli Rayon Yanğından Mühafizə Hissəsinin rəisi vəzifəsində işləmiş daxili xidmət polkovnik-leytenantı Dədəş Əlbağış oğlu Ataşov 2023-cü ilin noyabr ayında xidmətdə olmanın son yaş həddi ilə əlaqədar təqaüdə göndərilib".
Bu barədə Fövqəladə Hallar Nazirliyinin Mətbuat Xidmətindən bildirilib.
Məlumatda qeyd olunur ki, İmişli Rayon Yanğından Mühafizə Hissəsinin rəisi vəzifəsi 2024-cü ilin iyun ayından daxili xidmət polkovnik-leytenantı Əhmədov Elgün Vahid oğlu tərəfindən icra olunur.