 |
|
|
Dövlət qurumlarının tender keçirməsi qanunla müəyyən edilmiş haldır. Daha dəqiq desək, bu qurumlar ehtiyacları olan şeyləri almaq üçün tender keçirmək məcburiyyətindədirlər.
"DogruXeber.az" Tribunainfo.az-a istinadən xəbər verir ki, bəzən bu tenderlərdə eyni şirkətin elə eyni qurumların tenderlərini udduğunun şahidi oluruq.
Eyni zamanda, bir çox şirkətlərdən fərqli olaraq, bəzi şirkətlərə daha çox imkanlar yaradılır. Bu yöndə apardığımız araşdırmalardan biri “VNM Servis” MMC ilə bağlıdır. Bu şirkət son 5 ayda 3 tenderin qalibi olub. Həmin tenderlər üzrə bağlanan müqavilələrin ümumi dəyəri isə 1 milyon 55 min 599 manat təşkil edib.
Qeyd edək ki, “VNM Servis”in son qatıldığı tender bu günlərdə qeydə alınıb. Mayın 5-də baş tutmuş tenderin nəticəsinə görə, şirkət Yaşıllaşdırma Təsərrüfatı Birliyi Avtomobil Nəqliyyatı İdarəsinə 69.880 manatlıq avtomobil ve mexanizmlərin ehtiyyat hissələri ve sürtkü yağları satacaq.
Bundan iki gün öncə isə sözügedən şirkət Gəncə MKTB ilə anlaşıb. Gəncə İcra Hakimiyyətini tabeliyində olan qurumla nəqliyyat vasitələrinə sürtgü yağlarının, təkərlərin, akkumulyatorların və ehtiyat hissələrinin satınalınmasına dair müqavilənin dəyəri isə 348 min 931 manat olub.
Tribunainfo.az xəbər verir ki, şirkət mayın 5-də daha bir tenderin qalibi olub. Bu dəfə “VNM Servis” Dövlət Sərhəd Xidməti ilə anlaşıb. MAZ-531605 markalı yük avtomobilləri üçün ehtiyat hissələri almağı əhatə edən bu anlaşmanın dəyəri isə 636 min 788 manat olub.
Bildirək ki, araşdırmalar zamanı “VNM Servis” şirkətinin 2024-cü ildə hər hansı tenderə qatıldığı barədə məlumat əldə etmək mümkün olmayıb. Lakin 2023-cü ildə bu şirkət Meliorasiya Və Su Təsərrüfatı QSC-nin 45 gün ərzində 33 tenderinin qalibi olub. Həmin il qurumun bütün yerli şöbələrinin keçirdiyi tenderi udan şirkət bundan 1 milyon manatdan çox pul qazanıb.
Dövlət Vergi Xidmətinin dövlət reyestrinə daxil edilmiş məlumatlarında “VNM SERVİS” Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 11.09.2019-cu il tarixdə dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ BİNƏQƏDİ RAYONU, BİLƏCƏRİ ŞTQ, SUMQAYIT ŞOSSESİ (BİLƏCƏRİ QƏS.), ev 5, MOSKVA PR. qanuni təmsilçisi kimi isə Nağıyev Vüqar Məhəmməd oğlu qeyd olunub.
MMC-nin qanuni təmsilçisi Nağıyev Vüqar Məhəmməd oğlunun barəsində də açıq mənbələrdə məlumatlar yoxdur.