 |
|
|
PKK/YPG ünsürləri silahlarını yerə qoymalı və Suriyanı tərk etməlidirlər. "Report" xəbər verir ki, bunu "Reuters" agentliyinə açıqlamasında Türkiyənin rəsmi şəxsi deyib.
O qeyd edib ki, münaqişənin əsas səbəbi rəsmi Ankaranın bölgəyə baxışı deyil.
Adı açıqlanmayan mənbə qeyd edib ki, qarşıdurmanın əsas səbəbi PKK/YPG terror təşkilatının mövcudluğudur.
Ukrayna üçün Avropa ölkələri arasında güclü koalisiya qurmaq çox çətindir. Məsələn, Almaniya tarixi səbəblərə görə Ukraynaya sülhməramlı qoşun göndərmək istəmir. Polşanın Baş naziri Donald Tusk isə Fransa Prezidenti Emmanuel Makronla görüşündə ölkəsinin həm Ukraynaya dəstək, həm də NATO-nun şərq cinahının müdafiəsi baxımından artıq ən ağır yükü daşıdığını bildirib.
Axar.az xəbər verir ki, bu barədə "Faynənşl Tayms" məlumat yayıb.
Qeyd olunur ki, Finlandiya Prezidenti Aleksandr Stubb və Danimarkanın Baş naziri Mette Frederik hesab edirlər ki, yalnız Şimali Atlantika Alyansına üzvlük Ukraynanın suverenliyinə təminat verə bilər.
Bəzi diplomatlar isə bildirir ki, ABŞ-ın dəstəyi olmadan sülhməramlılardan ibarət koalisiya təşkil edilə bilməz - xüsusən də kəşfiyyat sahəsində.
Tramp Ağ Evə qayıtmamış ermənipərəst senatorlar tələsik növbəti üzdəniraq qətnamə hazırlayıblar - Bakıdan sərt etiraz
Amerikalı ermənipərəst senatorlar - Qari Piters və Bill Kessidi Senata Azərbaycan əleyhinə ikipartiyalı qətnamə layihəsi təqdim ediblər.
Layihədə Bakı Qarabağda etnik təmizləmə aparmaqda ittiham olunur, Azərbaycan hakimiyyətinə qarşı sanksiyaların tətbiqinə çağırış edilir, “əsir” ermənilərin dərhal azad olunması və Bakıya hərbi yardımın (görəsən hansı hərbi yardımdan söhbət gedir? - red.) dayandırılması, “Qarabağ xalqının geri qayıtmaq hüququnun həyata keçirilməsi” tələb olunur. “Yeni Müsavat” yazır ki, bu barədə “Daşnaksütyun”un mərkəzi ofisindən məlumat verilib. Layihənin həmmüəllifi Kessidi bu xüsusda deyib: “Azərbaycan Avropanı enerjiyə görə girov saxlayır, lakin Luiziana Avropanın ehtiyaclarını ödəmək üçün kifayət qədər enerjiyə malikdir”. Mətndə həmçinin iddia olunur ki, beynəlxalq hüquq ekspertləri, o cümlədən Beynəlxalq Cinayət Məhkəməsinin keçmiş baş prokuroru Luis Moreno Okampo (ermənilərin çoxdan ələ aldığı fırıldaqçı prokuror - red.) və BMT baş katibinin soyqırımın qarşısının alınması üzrə keçmiş xüsusi müşaviri (Okamponun başqa bir tayı, o da çoxdan rəsmi vəzifə daşımır - red.) Xuan Mendez hesab edirlər ki, “Dağlıq Qarabağın azərbaycanlılar tərəfindən blokadaya alınması BMT-nin Soyqırım Konvensiyasına görə, qanun pozuntusudur”. Və bu kimi digər absurd, əsassız ittihamlar, şər-böhtanlar...
Belə görünür ki, yeni prezident Donald Tramp öz komandasını formalaşdırıb qurtarmamış erməni lobbisinin satın aldığı bu dələduzlar vasitəsilə Konqresdən hansısa anti-Azərbaycan sənədini keçirib onu fakt qarşısında qoymaq istəyirlər. Ancaq layihənin Konqresdən keçmə ehtimalı nə dərəcədədir? Keçərsə Tramp onu imzalayarmı? Xatırladaq ki, ABŞ-ın erməni lobbisi son prezident seçkilərində Trampı dəstələyən bəyanatla çıxış etməyib. Yəni ondan əlini üzmüş kimi idi. Ona görə də senatorlar tələm-tələsik bir üzdəniraq qətnamə layihəsi hazırlayıblar ki, yeni rəhbər Ağ Evə gəlməmiş Azərbaycana xainlik etsinlər.
Qabil Hüseynli
Professor Qabil Hüseynlinin “Yeni Müsavat”a sözlərinə görə, 4 il ərzində çoxsaylı qətnamə layihələri olub, lakin heç biri keçməyib. O inanmır ki, bu bədnam ideya da reallaşa. Professorun fikrincə, son akkordlarını vuran hazırkı Ağ Ev rəhbərliyi hakimiyyəti iflasla tərk etməkdədir: “Azərbaycan dövləti Birləşmiş Ştatlarla səmimi, dürüst davranmağa çalışdı, hər dəfə qarşı tərəf münasibətləri korlamağa başladı. İndi biz Bayden dövrünü unudub irəli baxmalıyıq. Çünki Tramp dönəmi gəlir və Bakı Vaşinqtonla əlaqələri sahmana salmağa ümid edir. Hazırkı gərginlik bizim ucbatımızdan olmayıb. Azərbaycan nə supergüclə qarşıdurmada maraqlıdır, nə də strateji tərəfdaşını itirmək istəyir. Biz mühüm layihələr icra edir, ABŞ üçün Avropanın enerji təhlükəsizliyində vacib rol oynayır, Rusiya və İran kimi iki nəhəng gücün ortasında balans siyasəti yürüdürük. Bu həqiqətləri nəzərə almadan, Bayden komandası 4 il dayanmadan üzərimizə gəldisə, deməli, reallıq hissini itiriblər”.
Professor qətnamənin qəbul edilməyəcəyinə əmindir və ümid edir ki, yeni administrasiya Konqres üzərindən cılız oyunlara getməyəcək: “Azərbaycan elan etdi ki, Dövlət Departamenti Konqresə təlimat verir. Hətta Milli Məclisdə sazişləri dayandırmaq təklif olundu. Ardınca ABŞ səfirliyi səviyyəsində kampaniya başladı. Beləliklə, ssenariləşdirilmiş bir təzyiq siyasəti müşahidə olunur. Sadəcə, Azərbaycan dövləti haqsızlığa susmur və bu, Amerika olsa belə cavabını verir. Bundan sonra da hansısa əsgi parçası qəbul olunsa, nəticə dəyişməyəcək. O layihəni hazırlayanlar əla bilirlər ki, nə ermənilər qovulub, nə dediklərində sübut var”.
Q.Hüseynli sanksiyaların tətbiqini istisna edir və bu çağırışlara məhəl qoyulacağını gözləmir: “Azərbaycan Avropanın enerji təminatında mühüm paya malikdir və Vaşinqton bizim hansı əhəmiyyət daşıdığımızı dərk edir. Ukraynada gedən müharibə fonunda Azərbaycana sanksiya tətbiq edilməsi mümkün deyil. Məncə, ermənipərəst senatorlar ilin sonuna yaxın lobbidən aldıqları pulların axırıncı xidmətini yerinə yetirirlər. Bununla erməni lobbisinə göstərirlər ki, ”biz axıra qədər əlləşib-vuruşduq, qanun layihələri hazırladıq, onların Konqresdən keçməsinə cavabdeh deyilik".
Ehtiram Mehdiyev
Milli Cəbhə Partiyasının sədr müavini Ehtiram Mehdiyev korrupsiyaya bulaşmış senatorların növbəti iyrənc addım atdıqlarını düşünür. Onun sözlərinə görə, ABŞ-dakı səfirliyimiz, həmçinin, orada olan azərbaycanlı icma və diaspor təşkilatları etirazlarını bildirməlidirlər: “Amerikalı senatların hərəkətləri əndazəni aşmaqdadır. Hər dəfə bir qətnamə ilə çıxış edirlər. Təbii ki, heç bir hüquqi çəkisi olmayan layihələrdir, amma Amerikadakı azərbaycanlı fəallar da səsini çıxarmalıdırlar, diplomatlarımız çıxış etməlidirlər. Çünki ABŞ kimi nəhəng bir dövlətdə senatorların açıqlamalarını dünya izləyir və beynəlxalq ictimaiyyəti inandırmağa çalışırlar. Halbuki Qarabağdan gedən ermənilərin bir qismi Ermənistan vətəndaşlarıdır, bir hissəsi işğal dövründə süni şəkildə məskunlaşdırılmış ərəb ölkələrindən gətirilən ermənilərdir, qalanı da ümumiyyətlə, Rusiya və Avropaya köç edib. Bu müddət ərzində Qarabağdan gedən ermənilərdən bir qrup çıxıb deməyib ki, bizi qovdular, etnik təmizləməyə məruz qoydular. Onların yerinə niyə senatorlar danışmalıdırlar? Deməli, erməni lobbisinin sifarişidir və xəritədə yerini bilmədikləri ərazi haqda cəfəngiyyat danışırlar”.
Partiya funksioneri hesab edir ki, etnik təmizləmə uydurmadır və bircə fakt olsaydı, çoxdan Ermənistan həşir qoparmışdı: “Bu bəhanələr Azərbaycana təzyiqləri artırmaq məqsədi daşıyır. Əsas niyyət bizi gözdən salmaq, aqressor kimi təqdim etmək, nüfuzumuza zərər vurmaqdır. Azərbaycan isə ermənilər köçəndə onları hər bir ehtiyacları ilə təmin etmişdi. Hətta avtobuslar ayrılmışdı. Dövlət onlara qalmağı təklif etdi, razılaşmadılar. Bəs, senatorların arzusu nədir? Yəni orada xunta rejimi mövcudluğunu davam etdirməliydi və erməni əhalisi onlara tabe olmalıydı? Bunu yuxularında görəcəklər. Azərbaycan separatizmi məhv edib və oradakı etnik erməni əhaliyə də vətəndaşlıq təklif edib. Azərbaycanda digər etnik millətlər yaşayır, hamı kimi eyni hüquqlara malikdirlər, onlara heç bir ayrı-seçkilik edilmir. Etnik ermənilərin isə talışlardan, ləzgilərdən, avarlardan heç bir üstünlüyü yox idi ki, əksikliyi ola bilərdi - çörəyimizi yeyib, suyumuzu içib bizə xainlik etdiklərinə görə...”
Emil SALAMOĞLU,
“Yeni Müsavat”
Rusiya Somalinin SSRİ tərəfindən verilmiş kreditlər üzrə 48,1 milyon dollar borcunu silib.
Müvafiq sənəd normativ hüquqi aktlar portalında dərc olunub.
Bildirilir ki, 1984-cü il oktyabrın 1-dək Sovet hökumətinin Somaliyə verdiyi uzunmüddətli kreditlər üzrə yığılmış faizlər silinib.
Rusiya prezidenti Vladimir Putin noyabrda keçirilən Rusiya-Afrika Tərəfdaşlıq Forumunda bildirib ki, Rusiya Federasiyası ilə Afrika ölkələri arasında əlaqələrin inkişafı daha intensiv və çoxşaxəli xarakter alır.
Onun sözlərinə görə, bu faktı nazirlərin konfransının məzmunlu proqramı tam təsdiq edir.
Tədbirlərin hazırlanması üzrə təşkilat komitəsinin icraçı katibi Anton Kobyakov bildirib ki, Rusiya Federasiyası 2030-cu ilə qədər Afrika ilə müstəqil hesablaşma sistemi yaratmaq niyyətindədir.
Avropa Şurası və Gürcüstan rəhbərliyi ölkədə etirazlara səbəb olan “Xarici təsirin şəffaflığı haqqında” Qanuna dəyişiklik edilməsini müzakirə edəcəklər.
“Kommersant” xəbər verir ki, bu barədə Avropa Şurasının Baş katibi Alen Berse Tbilisiyə üçgünlük səfərindən sonra mətbuat konfransında danışıb.
Onun sözlərinə görə, sözügedən qanuna dəyişiklik edilməsinin müzakirəsi üçün İşçi Qrupun yaradılması ilə bağlı Gürcüstan rəhbərliyi ilə razılığa gəlib. Berse bildirib ki, Gürcüstanın hakim “Gürcü arzusu” partiyası Avropa Şurası yanında yaradılan komissiya hansı dəyişikliklərin tələb olunduğunu müəyyən edərsə, həmin qanuna dəyişiklik etməyə razılaşıb: “Qütbləşmə Gürcüstanda demokratik proseslərə zərbə vurur. Bütün qüvvələr dialoqda iştirak etməli, demokratik prinsipləri qorumalı və ona hörmətlə yanaşmalıdırlar”.
Gürcüstanın Baş naziri İrakli Kobaxidze isə öz növbəsində brifinqdə bildirib ki, ölkə rəhbərliyi istənilən formatlarda, eləcə də Avropa Şurasının iştirakı ilə müzakirələrə hazırdır: “Qanunun yenidən nəzərdən keçirilməsinə gəldikdə isə, burada vacib bir məqam var – bu qanunun hüquq prinsiplərini məhz necə pozduğunu bizə əsaslandırmalıdırlar. Bizə hüquqi nöqsanların mövcudluğunu təsdiq edən əsaslandırmalar təqdim edilərsə, əlbəttə, biz qanunu yenidən nəzərdən keçirməyə hazırıq”.
Xatırladaq ki, Gürcüstan parlamenti “Xarici təsirin şəffaflığı haqqında” Qanunu may ayında qəbul edib. Bu qanun xaricdən maliyyələşən bütün qeyri-hökumət təşkilatlarının və Kütləvi İnformasiya Vasitələrinin (KİV) xüsusi reyestrdə qeydiyyatdan keçirilməsini nəzərdə tutur. Avropa İttifaqı tərəfindən tənqid edilən qanun layihəsinin müzakirəsi və daha sonradan parlamentdə qəbulu ölkədə kütləvi etiraz aksiyalarının keçirilməsinə səbəb olmuşdu. Gürcüstan müxalifəti “xarici agentlər” haqqında bu qanunu Rusiyada mövcud olan qanunla müqayisə edirdi.
Sabiq Suriya prezidenti Bəşər Əsədin Rusiyadakı həyatı ciddi məhdudiyyətlərlə müşayiət olunur
Musavat.com xəbər verir ki, Rusiyanın yüksək səviyyəli siyasi qərarı ilə sabiq Suriya prezidenti Bəşər Əsəd və onun ailəsinə Moskvada sığınacaq verilməsi ilə bağlı yeni detallar ortaya çıxıb. Məlum olub ki, Əsədin həyat şərtləri ciddi nəzarət altında təşkil edilib və onun fəaliyyətinə ciddi məhdudiyyətlər tətbiq olunub.
Bəşər Əsədə tətbiq olunan məhdudiyyətlər
Siyasi fəaliyyət qadağası: Bəşər Əsədin hər hansı siyasi fəaliyyətlə məşğul olması tamamilə qadağan edilib. O, nəinki Rusiyada siyasi çıxışlar edə, həm də beynəlxalq arenada hər hansı şəkildə iştirak edə bilməz. Bundan əlavə, Əsədin Moskvadan kənara çıxması yalnız Rusiya hakimiyyətinin xüsusi icazəsi ilə mümkündür. Bu addım onun Suriya siyasətindən tamamilə kənarlaşdırılması məqsədi daşıyır.
Ailənin şəxsi vəziyyəti
Əsədin həyat yoldaşı Əsma Əsəd Rusiya məhkəməsinə boşanma ərizəsi ilə müraciət edib. O, ərizəsində Londona köçmək niyyətini ifadə edib. Lakin Rusiya tərəfi bu məsələni hələ yekunlaşdırmayıb, vəkil mənbələrinə görə, Əsma Əsədin müraciəti “siyasi və humanitar nəticələr baxımından” araşdırılır.
Maliyyə və aktivlərin dondurulması
Bəşər Əsəd və onun ailəsinə məxsus olan bütün maliyyə aktivləri və əmlaklar dondurulub. Bu qərar Rusiya tərəfindən təhlükəsizlik tədbiri kimi qəbul edilib. Əsədin aktivlərinin idarə olunması və istifadəsi yalnız Rusiya strukturlarının qərarlarına əsaslanır.
Mahir Əsədin durumu
Bəşər Əsədin qardaşı Mahir Əsəd isə Rusiya tərəfindən sığınacaq almayıb. O, ailəsi ilə birlikdə ev həbsində saxlanılır və onun müraciətinə baxılma prosesi davam edir. Hazırda Mahir Əsədin Suriya məsələlərində iştirak etməsi tamamilə məhdudlaşdırılıb.
Rusiya-Suriya münasibətlərində yeni mərhələ
Bu hadisələr fonunda diqqətçəkən məqam Rusiya rəhbərliyinin son illik iclasında Suriyadakı bazalarla bağlı heç bir açıqlama verməməsi olub. NATO ilə münaqişələr, Ukrayna müharibəsi və daxili sosial məsələlərin müzakirə edildiyi toplantıda Suriyanın tamamilə gündəmdən kənarda qalması beynəlxalq mətbuatın, o cümlədən The New York Times kimi nəşrlərin diqqətini çəkib.
Analitiklərin fikrincə, Rusiya ilə Suriya arasında olan münasibətlərdə qeyri-müəyyənlik yaranıb. Bu vəziyyət, xüsusilə də Bəşər Əsədin məhdudiyyətlərlə üzləşməsi, tərəflər arasındakı siyasi gərginliyi artırır. Beynəlxalq ictimaiyyət isə bu addımların Əsədin Suriyada tamamilə siyasi arenadan çıxarılmasına yönəldiyini düşünür.
Nəticə
Bəşər Əsədin Rusiyadakı həyatı məhdudiyyətlər və nəzarətlə doludur. Bu vəziyyət təkcə onun şəxsi taleyinə deyil, həm də Rusiya-Suriya münasibətlərinə təsir göstərir. Ailə daxilindəki gərginliklər, maliyyə blokadaları və beynəlxalq izolyasiya Əsədin gələcəkdəki mövqeyini daha da zəiflədir. Rusiya isə bu prosesdə öz strateji mövqeyini gücləndirmək məqsədi güdür.
Mənbə: https://cursorinfo.co.il/
Musavat.com
Brüsseldə keçirilən mətbuat konfransında Ukrayna Prezidenti Vlodimir Zelenski Donald Trampın yenidən prezidentlik vəzifəsinə başlaması ilə bağlı fikirlərini bildirib.
Musavat.com xəbər verir ki, Zelenski Trampı "güclü şəxsiyyət" adlandıraraq onun Ukraynaya dəstək verəcəyinə ümid etdiyini ifadə edib. O, Trampla münaqişə məsələlərini müzakirə etməyi planlaşdırdığını və hər iki tərəfin mövqelərini aydınlaşdırmağın vacib olduğunu vurğulayıb.
Zelenski bildirib ki, ABŞ-ın dəstəyi Ukrayna üçün xüsusi əhəmiyyət kəsb edir və bu istiqamətdə əməkdaşlıq davam etdirilməlidir.
Abxaziya “parlament”ində atışma baş verib.
“İnterfaks” xəbər verir ki, insident nəticəsində “deputat” Vaxtanq Qolandziya həlak olub, digəri Kan Kvarçiya isə yaralanıb.
İlkin məlumata görə, sözügedən şəxsləri Adqur Xaraziya adlı “deputat” güllələyib. Onun hadisə yerindən qaçdığı bildirilir.
Xəstəxanaya yerləşdirilən Kvarçiyanın həyatı üçün təhlükə olmadığı qeyd olunub.
Bununla belə, insidentin səbəbi açıqlanmayıb.
ABŞ-nin yeni seçilmiş prezidenti Donald Tramp xarici görünüşündə dəyişiklik edib.
Tribunainfo.az “The Economics”ə istinadən xəbər verir ki, o, Florida ştatının Palm-Biç şəhərindəki “Trump International Golf Club”a səfəri zamanı yeni saç düzümü ilə kameralara tuş gəlib.
Sosial şəbəkələrdə yayılan videoda Tramp ziyarətçilərə yaxınlaşaraq onlardan yaxşı vaxt keçirib-keçirmədiklərini soruşur. Daha sonra yeni seçilmiş prezident vətəndaşlara üz tutaraq “hər kəs respublikaçıdır?” sualını ünvanlayır. Onun bu sualları salonda alqışlarla qarşılanır.
Qeyd edək ki, Tramp illərdir saç düzümünü dəyişməyib. Buna görə də əksər sosial şəbəkə izləyiciləri Trampın saçlarını dəyişməsinə inanmayıblar.
Türkiyə Suriyanın ərazi bütövlüyünü heç vaxt güzəştə getməyəcək.
"Report" xəbər verir ki, bunu Türkiyə Prezidenti Rəcəb Tayyib Ərdoğan Livanın Baş naziri Nəcib Mikati ilə danışıqlardan sonra keçirdiyi mətbuat konfransında deyib.
“Bizim prioritetimiz tikinti vasitəsilə suriyalıların gündəlik həyatını normallaşdırmaqdır. Suriyanın ərazi bütövlüyünün qorunub saxlanması bizim ölkənin heç vaxt güzəştə getməyəcəyi bir məsələdir”, - Türkiyə lideri bildirib.
Livanın yardımından danışan Ərdoğan qeyd edib ki, hər iki ölkə birlikdə hərəkət etməli olduqlarını qəbul ediblər.
"Suriyanın sabitliyi son 13 ildə qeyri-sabitlikdən əziyyət çəkən bütün regionun sabitliyi deməkdir. Türkiyə kimi Livan da suriyalı qardaşlarımızı (qaçqınları - red.) qəbul etməkdən çəkinmədi. Ortaq məqsəd Suriyanı diriltmək üçün həm Türkiyə, həm də Livan üçün öhdəmizə düşəni yerinə yetirməkdə davam edəcəyik”, - Türkiyə Prezidenti vurğulayıb.