 |
|
|
Azərbaycanda son 5 il ərzində nikaha daxil olanların sayı azalıb, boşananların sayı isə artıb. Belə ki, 2018-ci ildə Azərbaycanda 62 484 nəfər nikaha daxil olub ki, bu da son 5 ilin ən aşağı göstəricisidir.
Mövzu ilə bağlı bu dəfə deputatlara, QHT rəhbərlərinə və ya Ailə, Qadın və Uşaq Problemləri üzrə Dövlət Komitəsinə müraciət etməmişik. Bu dəfə boşanmış xanımlar öz real hekayələrini danışıblar.
İlhamə Həsənli:
"Ayrılmağımdan heç vaxt peşman olmamışam, həmişə də deyirəm ki, yenə olsaydı, yenə də ayrılardım. Bunu da deyim ki, zaman çərçivəsində hər ailədə çətinliklər olur və onu geridə qoyana qədər kaş ki, boşanmazdım, belə olmazdı deyə bilirsən. Bu hislər keçdikdə isə boşandığına şükür edirsən.
Həmçinin boşanmaq çıxış yolu deyil və kiçik problemlər varsa, bunu həll etmək olar. Məndə isə vəziyyət başqa idi, ya ayrılmalı, ya da ki, ömür boyu xəstə olmağa razı olacaqdım. Ona görə də seçimim boşanmaq oldu".
Nigar Rzayeva:
"Artıq 2 ildir ki, boşanmışam. İnsanlardan qorxuram, utanıram və mənlə münasibət qurmaq istəyənlərlə də tanış ola bilmirəm. Özümlə isə bacarmıram, elə bilirəm ki, boşandıqdan sonra hamı mənlə pis davranacaq".
Ülviyyə Qafarova:
"Mənim evliliyim cəmi 5 ay davam edib. Ayrılmağımıza səbəb baldızım olub. Evdə mən hamı üçün özümü artıq hiss edirdim. Yoldaşım nə qədər dedi ki, sus, yola ver, amma mən bacarmadım və atam evinə gəldim. Elə bilirdim ki, yoldaşım bununla problemlərin qarşısını alacaq, ancaq heç nə dəyişmədi. Sonradan eşitdim ki, bacısı ona boşanmaq əmrini verib və beləcə, bizim əlaqələrimiz tamamilə qopdu".
İlahə Verdiyeva:
"Bu il ayrılmağımın 4 ili olacaq və peşman deyiləm. Bir oğlum var, ancaq tək ad olsun deyə, yanımda həyat yoldaşının olmasına görə yaşaya bilməzdim. Əlbəttə ki, heç kim boşanmaq istəməz, amma bəzən alınmır və çarə ancaq boşanmaqda qalır".
Günel Qafarova:
"Bir il ərzində ailəli olduq. Uşağımız olmadığı üçün qaynanam, qaynatamla birlikdə bizi boşatdırdılar. İndi isə hamı problemin məndə olduğunu düşünür, bəzən də uşağın olsaydı, boşanmazdın deyirlər".
Sevinc Tanrıverdiyeva: "Evlilikdə hörmətsizliyi, döyülməyə, söyülməyə, ailəyə baxmamağa göz yummaq olmaz. 4 ildir ki, boşanmışam, heç bircə dəfə belə peşman olmamışam. Şükür balamı da, qışqırıqsız, döyülüb söyülməkdən uzaq bir ailədə böyüdürəm".
Gültac İsayeva:
"Mən sevərək ailə qurmuşdum. 1 il rəsmi nikahlı qalsaq da, 5 ayın gəlini oldum. Bacısı ailəmi dağıtdı. Onlar gəlin yox, kölə istəyirdilər. Buna dözmədim və indi peşman deyiləm".
Nərmin Qasımzadə:
"Mənim sevdiyim var idi və həyat yoldaşıma xəyanət etməmək üçün boşandım. Əvvəllər də elə onu sevirdim, amma çox problemlər yaşamışdıq. Ayrıldıqdan sonra sevdiyimlə evləndim, indi isə uşaq gözləyirik və onunla xoşbəxtəm".
Günel Əlizadə:
"Sevdiyimlə 5 il sevgili qaldıq və evləndik. Sadəcə, evlilikdən sonra hər şey dəyişdi. Onu hazırda insan, dost kimi çox istəyirəm, ancaq evli kimi davam edə bilməzdik. Ayrılmaq bizim üçün çətin olsa da, bunu etdik və birgə qərar verdik. İndi isə oğlumuz vasitəsilə görüşür, danışırıq. Heç birimiz isə evlənməmişik. Hələ də çoxlarına təəccüblü gəlir ki, biz necə ayrıldıq. Çünki aramızda yalan, xəyanət olmamışdı. Sadəcə, evlilik və kiçik problemlər bizi yordu".
Xatirə İsmayılova:
"8 ildir ki, ayrılmışam və heç vaxt peşman olmamışam. Ondan sonra başqa biri ilə ailə qurdum və çox xoşbəxtəm. Hazırda azərbaycanlı qadınlar boşanmaqdan qorxur və dözür. İnsan xoşbəxtliyini düşünərək addım atmalıdır".
Son olaraq məsələyə münasibət bildirən psixoloq Rəna Mahmudova boşanmaq ərəfəsində olan xanımlara məsləhətlər verdi:
"Boşanarkən həmişə tərəzinin bir gözünə qazancınızı, o birinə isə itkinizi qoyun və müəyyənləşdirin ki, boşanma sonrası nə qazanıb, nə itirəcəksiniz. O cümlədən - maddi, mənəvi, seksual, qalacaq yer ehtiyaclarını və s. düşünün. Seksual tələbat çətin deyil, onu tapmaq asandır, amma əksinə, bunda da yanılmaq mümkündür. Məsələn, avara, narkoman, kriminal biri ilə də rastlaşa bilərsən. Bəs yerdə qalan tələbatlar? Əsas olan o birilərdir. Onları həll edə bilməyəcəksinizsə boşanmağa tələsməyin".
Qlobal.net bildirir ki, psixoloq əlavə etdi ki, boşandıqdan sonra mütləq qadınlar özlərini dolandıraraq, kiməsə möhtac olmamalıdırlar:
"Bundan başqa əgər ər evində daim əsəbiniz korlanırsa, ətrafınızdakı məsləhətçilərinizi dəyişə bilərsiniz. Bəlkə də ananız, bacınız, xalaqızınız onu sizin gözünüzdən salır, bəlkə də başqaları sizə ərinizi, baş verənləri fərqli təqdim edəcək. Hadisələrə başqa cür yanaşanda, baxanda bəzən problem daha asan həll olunur, əsəbilik itir.
Yox əgər heç biri mümkün deyil, heç bir tələbatınız təmin olunmursa, əksinə o sizin hesabınıza öz tələbatlarını ödəyir və ya ümumiyyətlə siz ancaq itirirsinizsə, bu ailə həyatından arxaya baxmadan getmək lazımdır. Çünki ailə qazanc (maddi, mənəvi, seksual və s.) əldə etmək üçündür. Yox əgər bu ailəlikdən siz heç nə qazanmırsınızsa, ondansa subay olmaq ondan yaxşıdır. Çünki bu zaman heç olmasa, əl-ayağına dolaşıb, yaşamağına mane olan şəxs olmur".
Qeyd edək ki, yazıda hekayələrini danışan xanımların adları şərtidir.
Həmçinin bu mövzu ilə bağlı növbəti yazımızda kişilər öz boşanma hekayələrini, səbəbləri danışacaqlar.
Teref. Xocanın bloqu
Bakıda özündən xeyli kiçik oğlanla sevgi münasibəti yaşamış evli qadın şantajla üzləşib.
Nəsimi rayonu ərazisində fəaliyyət göstərən “Atlas” klinikasında çalışan Zenfira Əhmədova (ad və soyad şərtidir) təsadüfən tanış olduğu şəxsin törətdiyi cinayətin qurbanına çevrilib.
Anar adlı şəxslə işlə bağlı danışan və daha sonra şəxsi münasibətləri inkişaf etdirən qadın hədə-qorxu ilə qarşılaşıb. Bundan sonra Z.Əhmədova Anarın əməlləri barədə Sabunçu rayon Polis İdarəsinin 12-ci şöbəsinə şikayət edib.
Faktın təsdiqini tapması ilə 1999-cu il təvəllüdlü Anar Məmmədov barəsində cinayət işi başlanılıb və dekabrın 20-də Sabunçu rayon Məhkəməsində təqsirləndirilən şəxsə hökm oxunub.
Məhkəmədə zərərçəkmiş qadın başına gələnlər barədə danışıb:
“2022-ci ilin yayından “28 May”da yerləşən “Atlas” adlanan klinikada ayı 300 manata operator menecer kimi işləməyə başlamışam. İşlərimdən biri də klinikanın verdiyi mobil telefonla bütün operatorlardakı mobil nömrələrə mesaj göndərməklə klinikada göstərilən xidmətlərin növləri və qiymətləri barədə məlumat vermək, geriyə zəng vuran şəxslərə xidmətlər barədə ətraflı izah etməkdən ibarət idi. 2022-ci ilin dekabr ayında sonradan adını bildiyim Anar adlı şəxsin də nömrəsinə xidmətlər barədə mesaj göndərdim. Anar xidmətlər barədə məlumat almaq adı ilə geri yığdı. Telefonda xidmətlər barədə məlumat verdim və vəzifəmə uyğun olaraq müştəri kimi Anarla mehriban danışdım”.
Bundan sonra Anar yalandan xəstəliyi barədə qadına danışıb və onun mobil nömrəsi ilə daimi əlaqə saxlamağa başlayıb. Onlar paytaxt ərazisində bir neçə dəfə görüşüblər və cinsi əlaqədə olublar. Lakin daha sonra Anar təsadüfən tanış olduğu qadını şantaj etməyə başlayıb: “2023-cü ilin martında Anar dedi ki, onun yaşadığı Suraxanı rayonu, Zığ qəsəbəsindəki evə gəlim, anası ilə birgə məni gözləyir. Anara yazığım gəldiyindən, həmçinin məndən 25 yaş balaca olduğundan razılaşdım. Meyvə və şirniyyat alaraq Anarın evinə getdim. Anar evdə tək idi, yataqda uzanmışdı. Anasının bir azdan gələcəyini dedi, xəstə bildiyim Anara meyvə soyub yedizdirdim, çay dəmləyərək perojnaları doğrayıb masaya yığdım, 1 saata yaxın Anarın yanında oturdum. O da mənə qayğıkeşliklə yanaşırdı, işimlə maraqlanırdı. Həmin vaxt meyvə və şirniyyat qablarını yuyub evdən çıxmaq üçün sağollaşdım. Sağollaşarkən Anar mənimlə selfi çəkdirməyi xahiş etdi, mən də etiraz etmədim. Anar əlini boynuma keçirərək öz telefonu ilə selfi çəkdi”.
Z.Əhmədova deyib ki, Anarın evində olarkən Anar icazəsiz olaraq onun övladlarının və ərinin nömrələrini götürüb və daha sonra onu hədələməyə başlayıb, görüntülərini ərinə göndərəcəyini deyib:
“Anarın bu kimi hərəkətindən şoka düşüb həyəcanlandım, bundan sonra onun tələbləri ilə razılaşmağa başladım. Ailəmin dağılmasından və övladlarımın üzünə necə baxacağımdan utanaraq 2023-cü ilin may ayında Anarın evinə getdim. Anara yalvarmaqla Anarda insanlıq hissi oyada biləcəyimi düşünürdüm. Onun qarşısında diz çöküb ağladım, izah etdim ki, ərim bilsə məni doğrayacaq. Anar bildirdi ki, məndən ötrü ölür, cinsi əlaqədə olmaq istəyir və təklif etdi ki, cinsi əlaqədə olsaq, əl çəkəcək. Mən də məcbur razı oldum”.
Bundan sonra ağır depressiyaya düşən qadın Anarın şantajlarına boyun əyib. O, həmçinin “Atlas” klinikasından işdən çıxıb və başına gələnlər barədə yaşlı anasına danışıb.
Z.Əhmədovanın anası da Anarla danışsa da, o hədə-qorxu ilə pul tələb etməkdə davam edib və hissə-hissə olmaqla 800 manata yaxın pul alıb. Z.Əhmədova Anardan qurtulması üçün telefonundakı vatsap proqramını silsə də, Anar onun övladlarına “Salam Zemfira xanım, zəhmət olmasa klinikanızdakı xidmətlər haqqında məlumatlar verin”, kimi, mesajlar yazaraq qadını qorxu içində saxlayıb.
Nəhayət Z.Əhmədova polisə şikayət edəndən sonra, Anar həbs edilərək məsuliyyətə cəlb edilib.
Sabunçu rayon Məhkəməsinin 20 dekabr tarixli hökmü ilə Anar Məlikov 3 il 6 ay müddətinə azadlıqdan məhrumetmə cəzasına məhkum edilib. (publika.az)
Dövlətlər və imperiyalar formalaşdıran, öz ixtiraları ilə bəşəriyyət tarixində dönüş yaradan qadınlar əsrlər boyu dünya tarixinin taleyini dəyişməkdə davam edirlər.
lent.az tarixin ən nüfuzlu qadınlarından bəzilərini təqdim edir:
Kösem Sultan
I Əhmədin həyat yoldaşı Kösəm Sultan oğlu IV. Muradın dövründə dövlət işlərində söz sahibi idi. Oğlu İbrahim taxta çıxanda qüdrəti daha da artdı. Kösəm Sultan 30 ilə yaxın dövlətin inzibati hakimiyyətini öz əlində saxladı.
Kleopatra
O, gözəlliyi, ambisiyası və zəkası sayəsində tarixin ən tanınmış qadın hökmdarlarından biridir. Əslən Yunanıstandan olan Kleopatra eramızdan əvvəl 69-cu ildə İsgəndəriyyədə anadan olub.
Çox ağıllı qadın olan Kleopatra 9 dil bilirdi. Bu dillərə yunan, ərəb, ibrani, həbəş və fars daxil idi. Kleopatra romalı general, dövlət xadimi Mark Antoni və Yuli Sezar ilə romantik münasibəti ilə tanınır. Bununla belə, yaşadığı hər münasibətdən sonra o, Ptolemey sülaləsinin hökmdarlarından qat-qat güclü oldu.
Kleopatra tarixdə bir çox dilləri mükəmməl bilməsi, cəlbedici və təsirli diplomat olması ilə tanınır.
Mariya Curiye
Fizika üzrə Nobel mükafatını alan ilk qadın Mariya Curiye həm də kimya üzrə Nobel mükafatına layiq görülüb. O, tarixdə iki dəfə Nobel mükafatına layiq görülən ilk şəxsdir.
Polonium və Radiumu kəşf edən Mariya Curiye radiumun kəşfi ilə böyük şöhrət qazandı. Çünki radium tibbdə xərçəngin müalicəsində istifadə oluna bilərdi. O, elm aləmində kişi hökmranlığı ilə mübarizə aparırdı. Mariyae Curiye həddindən artıq radiasiyaya məruz qalması nəticəsində qan xərçənginə tutuldu və tarixdə “elm üçün ölən qadın” adlandırıldı.
Kiyev kraliçası Olqa
Tarixin ən qanlı qisasına imza atan Olqa qadının nə qədər qəddar ola biləcəyini üzə çıxarıb. Olqa Kiyev Knyazlığının başçısı olan I İqorla evlənib və Svyatoslav adlı oğlu dünyaya gəlib.
I İqorun dövründə Drevlian Şərqi Slavyan tayfası vergi ödəmək istəmədiklərini bildirərək üsyana başladılar. Bundan sonra Drevlian qəbiləsinə ekspedisiya təşkil edən I İqor tayfanı vergi ödəməyə razı saldı. Lakin sonradan I İqor Drevlian qəbiləsindən daha çox vergi tələb edir və yenidən yola düşür. Bundan sonra Drevlian qəbiləsi I İqoru işgəncə ilə öldürdü.
Bu xəbəri eşidən Olqa qisas almağa and içir. Oğlunun cəmi 3 yaşı olduğu üçün Olqa dövlət adamları ilə birlikdə idarəçiliyi öz üzərinə götürür. Drevlian şahzadəsi Olqaya onunla evlənmək təklifi göndərir. Bu təklifi fürsət kimi qəbul edən Olqa gələn səfirlərdən gəmidə qalmağı xahiş edir və səfirləri diri-diri basdırır.
Olqa daha sonra xəbərsiz Drevlian şahzadəsindən onun təklifini qəbul etdiyini, lakin Drevlian zadəganlarının ora çatması üçün onu müşayiət etdiyini soruşur. Drevlian knyazı bu təklifi qəbul edir və ən sayılıb-seçilən zadəganları Olqaya göndərir. Olqa zadəganları hamamda çimmək üçün göndərir və onları diri-diri yandırır.
Bütün bunlarla kifayətlənməyən Olqa drevlilərin yanına gedərək yas yeməyi təşkil edir və onlar arasında qanlı müharibəyə son qoymağı təklif edir. Yemək zamanı Olqa əsgərlərinə spirtli içki içməməyi əmr edir və 5000 sərxoş Drevlialını qılıncla öldürtdürür.
Olqa Kiyevə qayıtdıqdan sonra Drevlyalılar elçilər göndərərək deyirlər ki, taxtdan əl çəkiblər və istəsələr vergi ödəyəcəklər. Olqa səfirlərə vergi istəmədiyini, sülh simvolu olaraq hər evdən 3 göyərçin və sərçə istədiyini bildirir. Sülhdən sevinən Drevlyalılar quşları yola salır, lakin Olqa quşların ayağına alovlu parçalar bağlayaraq, geri göndərir. Göyərçinlər gəldikləri yerə qayıdır və bütün evləri yandırırlar. Drevlilərin əksəriyyəti yandırılaraq öldürülsə də, qaçanlar qul olurlar və ya əsgərlər tərəfindən öldürülürlər.
Birinci Yelizaveta
Ömrü boyu döyüşmək məcburiyyətində qalan Yelizaveta tac taxanda Avropada din müharibələri gedirdi. Çətin zamanda ölkəsini böyük məsuliyyətlə idarə edən Yelizaveta bir çox sui-qəsdlərə məruz qalıb.
Yüksək intellektli bir qadın olan Kraliça Yelizaveta kişilərin dominant olduğu bir dünyada uzun illər padşahlıq etdi. Ömründə heç vaxt evlənməmiş kraliça Yelizaveta taxt-tacın gücünü sarsıtmaq istəmirdi. O, katoliklər və protestantlarla bağlı məzhəb müharibələrini qızışdırmaq üçün hərəkət etməyib.
Tomris Xatun
Tomris Hatun tarixdə tanınan ilk türk qadın hökmdarıdır. Onun eramızdan əvvəl VI əsrdə yaşadığı məlumdur. O, böyük Saka hökmdarı Alp Ər Tunqanın nəvəsi kimi tanınır. Tomris farsların Əhəməni imperiyası ilə böyük mübarizəyə girdi. Dinc bir quruluşa əhəmiyyət verən Tomris Hatun, fars imperatoru Böyük Kirlə vuruşaraq farsları məğlub etdi.
Kraliça Viktoriya
64 illik hakimiyyəti dövründə o, millətinin sənaye, sosial və ərazi ekspansiyasını təşkil etdi. Avropanın monarxiyaya baxışını dəyişdirən lider kimi tanındı. Kraliça Viktoriya ilə İngiltərədə çox şey dəyişdi.
Sumqayıt şəhərində 1986-cı il təvəllüdlü Samir münaqişə zəminində həyat yoldaşı Vüsaləyə (adlar şərti verilib – red.) xəsarət yetirib.
Hadisə Sumqayıt şəhəri, Novxanı bağlar massivindəki fərdi bağ evində baş verib.
Samir həmin evdə şəxsi münasibətlər zəminində aralarında baş vermiş mübahisə zamanı əl və yumruqla qeyri rəsmi həyat yoldaşı Vüsalənin başına, bədəninə, sonra isə taxta parçası ilə kürəyinə, qollarına və ayağına vurub.
Hadisəni törədən Samirin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Samir ona elan olunmuş ittiham üzrə özünü təqsirli bilib. O bildirib ki, 2010-cu ildə Bahar ilə rəsmi ailə həyatı qurub, birgə nigahlarından 2011 ci il təvəllüdlü 1 qız övladı olub: “Ailəm ilə içki aludəçisi olduğuma görə mübahisə nəticəsində boşanmışam. Boşandıqdan sonra 2022-ci ilin yanvarında Vüsalə ilə tanış oldum. Birgə yaşadığım müddətdə rəsmi nigaha daxil olmadım. Qeyri-rəsmi münasibətimiz zamanı oğlan övladımiz dünyaya gəldi. Adını Səfər qoydum. Övladım olduqdan sonra Vüsalə mənimlə kobud rəftarlar etməyə başladı. Sonra başqa bir şəxslə əlaqəsinin olmasından şühələndim. Vüsalədən soruşduqda boynuna almadı. Sonra isə həmin şəxsin Cəlil olduğunu öyrəndim. Cəlillə əlaqə saxladış Cəlil həyat yoldaşının xəstə olduğunu və Vüsalə ilə təzə tanış olduğunu bildirdi. İnanmadığım üçün Cəlili yaşadığı Sumqayıt şəhəri, H.Z.Tağıyev qəsəbəsinə gedərək həqiqətən yoldaşının xəstə olduğunu gördüm”.
Təqsirləndirilən şəxs qeyd edib ki, Cəlilə Vüsalədən uzaq durmağını bildirməsinə baxmayaraq onunla münasibətlərinin davam etdirib: “Buna görə də ona mane ola bilməyəcəyimi başa düşdüm. Hadisə günü, saat 22 radələrində müvəqqəti yaşadığım Novxanı bağlar massivində evdə olan zaman Cəlilin əlində araq şüşəsi ilə həyətə girdiyini gördüm. Vüsalədən Cəlilin niyə bura gəldiyini soruşdum. Vüsalə özü zəng edib çağırdığını dedi. Sonra birlikdə oturub evdə yeyib içdik. Həmin vaxt artıq gecəyarısı oldu”.
Samir bildirib ki, gecə təxminən saat 4 radələrində sərxoş olduğu üçün Cəlillə mübahisə edib: “Cəlil mənə cavab vermədiyi üçün qeyri rəsmi yoldaşım Vüsalənin üzərinə gələrək yumruqla onun başına və bədəninə vurdum. Vüsalə həyətə qaçanda arxası ilə getdim. Həyətdə yerdə olan taxtanı götürərək Vüsalənin kürəyinə, qollarına və ayağına vurdum. Sonra isə sakitləşib bir kənarda oturdum”.
İş üzrə zərərçəkmiş Vüsalənin sözlərinə görə, 2022-ci ilin yanvarında Samir ilə tanış olub: “Lakin nigaha daxil olmadıq. Onunla molla kəbini kəsdirdik. Samir ilə birgə yaşadığım müddətdə övladımız oldu. Həmin vaxtdan Sumqayıt şəhərinin bir neçə ünvanlarında kirayə qaldıq. Yaşadığım müddətdə mütamadi olaraq Samir spirtli içki qəbul edərək mənimlə mübahisə və münaqişələr yaradıb. Buna görə də 2022-ci ilin sentyabrında özümdən yaşca böyük Cəlil adlı şəxslə tanış oldum. Onunla münasibət yaratdım. Sonra bu münasibət barədə Samirə məlumat verdimş Ona görə də onları bir-biri ilə tanış etdim. Bizim münasibətimiz belə davam etdi”.
Zərərçəkmiş qeyd edib ki, hadisə günü Cəlilə zəng edib və yaşadığı Novxanı bağlar massivinə dəvət edib: “Cəlilə gələndə marketdən araqa almasını dedim. Cəlil təxminən saat 21 radələrində yaşadığım bag evinə gəldi. Orada yoldaşım Samir ilə oturub yeyib içdilər. Sonra Samir sərxoş vəziyyətdə Cəlili təhqir etdi. Lakin Cəlil ona cavab vermədi. Mübahisə başlayanda artıq gecə saat 4 radələri idi. Samir mənə tərəf gələrək yumruqla başıma və bədənimə vurdu. Samirin əlindən qaçaraq həyətə çıxdım. Bu zaman Samir arxamca gəldi və yerdən götürdüyü taxta parçası ilə kürəyimə, qollarıma və ayağıma vurdu. Həmin zaman Cəlil isə azyaşlı övladımı ağladığına görə qucağına alaraq saxladı. Münaqişə təxminən 10-15 dəqiqə davam etdi. Sonra hadisə barədə Daxili İşlər Nazirliyinin 102 xidmətinə zəng vurdum, məlumat verdim”.
İş üzrə şahid qismində ifadə verən Cəlilin sözlərinə görə, 2022-ci ilin sentyabrında Sumqayıt şəhərində “Karvan” ticarət mərkəzi ərazisində olan zaman bir qadın ona yaxınlaşaraq qida almasını və ac olmasını bildirib: “Mən də həmin qadına tərəvəz aldım və cibinə 25 manat qoydum. Sonradan həmin qadının Vüsalə olduğunu bildim. Vüsalə ilə söhbət edərkən münasibətimiz alındı və ondan əlaqə nömrəsini götürdüm. Bundan sonra münasibətlərimiz davam etdi. Söhbət əsnasında Vüsaləyə evli olduğumu, lakin yoldaşımın xəstə olması səbəbi ilə onunla fikrimin ciddi olduğunu, onunla evlənmək fikrində olacağımı bildirdim. Vüsalənin buna münasibəti yaxsı oldu. Lakin Vüsalə Samir adlı bir şəxsin onunla qeyri rəsmi həyat yoldaşı olduğunu, məni Samir ilə tanış edəcəyinə söz verdi. Sonra Samir ilə məni tanış etdi. Samir də mənim Vüsalə ilə münasibətimə normal baxdı”.
Şahid qeyd edib ki, hadisə günü Vüsalə ona zəng edib və qaldıqları Novxanı bağlarına gəlməsini, bir ədəd də araq almasını deyib: “Təxminən saat 21-22 radələrində Vüsalənin qaldığı bağa gəldim.m Həmin vaxt Samir evdə oldu. Saat 24-ü keçəndən sonra Samir ilə oturub yeyib içdik. Gecə təxminən saat 4 radələrində Samir sərxoş vəziyyətdə mənə təhqir edici sözlər işlətdi. Lakin mən Samirə cavab vermədim. Mənim cavab verməməyimdən əsəbləşən Samir Vüsalənin üzərinə getdi. Yumruqla Vüsalənin başına və bədəninə vurdu. Bu zaman Vüsalə qışqıraraq həyətə çıxdı. Samir isə Vüsalənin arxasınca həyətə çıxdı, həyətdə yerdə olan taxtanı götürərək Vüsalənin qoluna, belinə və ayagına vurdu. Onların mübahisəsi zamanı Vüsalənin azyaşlı övladı ağladığı üçün uşağı qucağıma alaraq saxladım”.
Bu cinayət işinə Sumqayıt şəhər Məhkəməsində baxılıb.
Məhkəmənin hökmü ilə Samir 9 ay müddətə azadlığın məhdudlaşdırılması cəzasına məhkum edilib.
Təqsirləndirilən şəxsin üzərinə axşam saat 23.00-dan növbəti gün saat 07.00-dək yaşadığı ünvan tərk etməmək, Sumqayıt şəhəri və Abşeron rayonunun hüdudlarından kənara çıxmamaq, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş yerinin dəyişdirilməsi və ya işə düzəlməsi barədə əvvəlcədən məlumatlandırmaq vəzifələri qoyulub.
Hökmün icrası təqsirləndirilən şəxsin yaşayış yeri üzrə Sumqayıt şəhər Probasiya Şöbəsinə tapşırılıb. (demokrat.az)
“Tezliklə ölkəmizin başçısı bütün qonşu dövlətlərin hökumətlərini təbrik etməyə və qarşılığında təbriklər almağa başlayacaq. Amma o ana qədər, nə qədər ki, cənab Paşinyan susacaq, mən ona kömək edəcəyəm və əvəzində İlham Əliyevi təbrik edəcəyəm. Onun adından yox, onun yerinə”.
Vətəninfo.az xəbər verir ki, bu fikirlər erməni jurnalist Nataly Aleksanyan Azərbaycan Respublikasının prezidenti İlham Əliyevi ad günü münasibəti ilə yaydığı açıqlamada qeyd edilir.
Nataly vurğulayır: “Hörmətli cənab Əliyev. Sizi ad gününüz münasibeti ile tebrik edirem. Mən əminəm ki, əmin-amanlıq olacaq və onun qurulması yolunda sizə uğurlar arzulayıram”.
Sarıqamış məğlubiyyəti 10 mindən çox Türk əsirin Çar Rusiyası ordusu tərəfindən Bakının ən qədim türməsi olan Nargin adasına salınmasına səbəb oldu. O günlərin bir qadın qəhrəmanı var - Sona xanım Hacıyeva...
Bu anım günündə Sona xanımı bir daha xatırlayaq....
Fotosu tapılmayan, sonu bəlli olmayan Sona xanım Hacıyeva...
Sona xanım Bakının zəngin və yüksək təhsilli xanımlarından biri idi. Milyonçu qlasnı (deputat) Kərbəlayi İsrafil ağa Hacıyevin həyat yoldaşı, Bakı Müsəlman Xeyriyyə Cəmiyyətinin Qadın Qolunun sədri idi.
Böyük mülkiyyəti ilə yanaşı Bakı buxtasında Sona xanımın mühüm hadisələrin iştirakçısı olan dəbdəbəli şəxsi gəmisi dururdu.
Məlum olduğu kimi Birinci Dünya Müharibəsinin ilk illərində 1914 -15-ci illərin qışında Sarıqamış məğlubiyyəti baş verdi. 90 minlik türk ordusu 40 dərəcə şaxtada davam gətirməyib məhv oldu. Ruslar minlərlə hərbi və mülki adamı əsir götürdülər. Təkcə Bakıya, Nargin adasına 10 min nəfər qadın, uşaq, yaşlı, əskər, zabit türk əsir yerləşdirildi. Əsirlər Bakı küçələrindən keçirilib adaya aparılarkən şəhər həyəcana gəlmiş, bu barədə Bakı qubernatoru Peterburqa məktub göndərmişdi. O, yazırdı: "Bakı əhalisi türklərin əsir alınmasına dözümsüzlük göstərirlər..."
Rus idarəetməsi türk əsirləri ölüm adası Narginə yerləşdirib əsas nəzarəti qatil kimi yetişdirdiyi erməni zabitlərinə və həkimlərinə tapşırmışdı.
Nərimanov adanı komissiya heyəti ilə ziyarət etdikdən sonra parlamentdə türk əsirlərin vəziyyəti haqda kəskin bir çıxış etdi. Dedi: "Erməni həkimlər yüzlərlə əsirin gözlərində əməliyyat edib kor ediblər. Hər gün susuzluqdan, acından, yoluxmadan, ilançalmadan yüzlərlə insan ölür".
Bu xəbərdən Bakı təlatümə gəldi. Təzə-pir məscidinin axundunun fətvası ilə hər kəs məscidə ərzaq, paltar, ayaqqabı, dərman daşıdı. Bu yardımı bir ay adaya daşıyıb bitirmək mümükün olmadı. Bakı qadınları gecədən səhərə yun corab, şal, canlıq toxuyub məscidin həyətinə gətirirdilər.
İctimai təpki 200 nəfər qadın və uşağın hökumətin icazəsi ilə adadan alınıb Bakıya gətirilməsinə səbəb oldu.
Lakin hökumətin bu addımı şəhəri sakitləşdirmədi. Mətbuatda və məscidlərdə müzakirələr və etirazlar səngimədi.
Sona xanım Hacıyeva isə həmin tarixin qəhrəmanına çevrildi. O, öz gəmisi ilə Narginə ərzaq aparmağa başladı. Qohumları, xidmətçiləri ilə adaya gələn, araba-araba ərzaq, geyim, yataq gətirən Sona xanım rus rəislərə rüşvət verib gəminin yoxlanmasının qarşısını alır, hər dəfə geri dönəndə yüksək rütbəli türk zabitlərini üç-üç, beş-beş gəmisinə alırmış. Əsirlər təğyir-libas olub ərzaq gətirən xidmətçilərə qoşularaq gəmiyə mindirilirmiş. Sonra da Sona xanım onlara şəxsiyyət vəsiqəsi düzəldib İrana keçirirdi. Oradan isə Türkiyəyə yola salırdılar.
Bu minvalla Sona xanım az bir vaxtda Nargin adasından yüz nəfərdən çox zabit qaçırır. O zabitlərin adları yazılı sənədlərdə qalır.
Şəhərdə xəbər gəzirdi ki, rusların səlahiyyət verdiyi ermənilər yüksək rütbəli zabitləri əsirlər arasından seçib qətlə yetirir, ayaqlarına daş bağlayıb dənizin dibinə yuvarlayırlar.
Bu, Bakı camaatının heysiyyatına toxunur, qəzəb və həyəcan doğururdu.
Həmin günlərdə Bakının bircə dərdi vardı: türk əsirlər...
Bakıda, Abşeron kəndlərində kimin gəmisi, hətta kiçik bir balıq təknəsi vardısa, gecələr gizlincə Nargin adasına yaxınlaşır, oradan əsir alıb qaçırdı.
Bu işi ardıcıl və nizamlı həyata keçirən isə Sona xanım idi.
Bu yolla Bakıda xeyli türk əsir toplanmışdı. Ziyalıların və ruhanilərin çağırışı ilə Bakı baqqalları, əsnafları, tacirləri əsirlərə pulsuz ərzaq, geyim-keçim, barınacaq verirmiş.
Türk əsirlərə yardım etmək şəhərin şərəf işinə çevrilmişdi.
Bir gün bir əsirin bir erməni dükanına girməsi ilə işin üstü açılır. Erməni çuğulluq edir. İstintaq başlayır. Adada siyahıyaalma aparan hökumət əsirlərin sayında böyük əskiklik görür. Araşdırma başlayır.
Sona xanım Hacıyeva istintaqa cəlb edilir.
Arxivlərdə Sona xanımın 110 səhifəlik ifadəsi var. Günlərlə ifadəsi alınıb. Sona xanım məhkəmədə etiraf edir ki, Bəli, əsirlərə yardım etmişəm. Yardım cinayət deyil. Yardım insaniyyətdir!
İstintaq əsirlərin qaçırılmasını sübut edə bilmir.
Mənbələr deyir, bu istintaq sovet dövründə belə davam etmişdir. Bakı zənginlərindən və din xadimlərindən xeyli adam məhkəmələrə çəkilmiş, adları hökumətin qara siyahısına salınmış, repressiya olunmuşdular.
Sona xanım Hacıyeva Bakının ən mütərəqqi, ən zəngin, ən fədakar, ən səxavətli xanımlarından biri olub. O, əsl Cümhuriyyət qadını idi. Rəhbəri olduğu qadın xeyriyyə komitəsi xətti ilə ictimai və siyasi proseslərin önündə durur, təhsil və maarif işində misilsiz xidmətlər göstərir və digər zəngin xanımları da bu işə təşviq edirdi.
Lakin arxiv sənədlərində birdən-birə xətt qırılır... iz itir...
Dövrün araşdırmaçıları ilə söhbətimdə onun fotosunu və sonrakı taleyini gördüm deyən olmadı. Dövlət arxivində Nargin hadisələri və Sona xanım haqda məlumat var. Lakin nə fotosu var, nə də sonu haqda xəbər.
Bu dəyərli xanımın taleyi nə oldu, necə oldu, bilən yoxdur...
Amma əminəm, bu iş belə qalmayacaq, o Cümhuriyyət qadınının qutsal surətini görmək, taleyini öyrənmək bizə nəsib olacaq.
Bunun üçün əlimdən gələni edəcəyəm.
Çünki Sona xanım Hacıyeva tanınmağa, anılmağa, ictimai ehtirama layiq olan xanımlarımızın önündə gələnlərindəndir...
Bu ad xatirələrdə yaşamalı, ehtiramla anılmalı və Cümhuriyyət Qadınlarını təmsil etməlidir.
Ruhu şad olsun...
Mehriban Vezir
Teref. Xocanın Blogu
Səhifəmiz hamnın üzünə açıqdır
Azərbaycan Respublikasının Birinci vitse-prezidenti Mehriban Əliyeva Prezident İlham Əliyevi doğum günü münasibətilə təbrik edib.
Mehriban Əliyeva bu barədə sosial şəbəkə hesabında paylaşım edib:
“24.12.2023. Doğum gününüz mübarək, cənab Prezident! Sizə möhkəm cansağlığı, sevinc və nur, uğur və qələbələrlə dolu uzun ömür arzulayıram! Tanrı Sizə güc və səbir versin! Biz Sizinlə fəxr edir və Sizi çox sevirik! Uca Allah Sizi və Azərbaycan xalqını qorusun!”
Şairə Nazilə Səfərli paylaşımı ilə diqqət çəkib.
Olay yazır ki, o, instaqramda ad çəkmədən kiməsə söz atıb.
"Qadın yar yoldaşının aynasıdır. Mərifətsiz qadın yarını gözdən salar. Qoy, bizdən uzaq olsun", - deyə, Nazilə vurğulayıb.
Lənkəran rayonunda 1967-ci il təvəllüdlü Sayalı fala baxmaq adı ilə həmyerlisi Aytənə (adlar şərti verilib - red.) qarşı dələduzluq edib.
Teleqraf.com xəbər verir ki, Lənkəran şəhəri mərkəzi bazarında Sayalıya müraciət edən Türkəkəran kənd sakini yaşayan Aytən ailə qura bilmədiyini və bununla bağlı çətinliklərinin olduğunu bildirib, ondan falına baxaraq köməklik istəyib.
Sayalı Aytənə həyatındakı problemlərin yaşadığı evin həyətinə basdırılmış cadu ilə əlaqəli olduğunu bildirib, cadunu zərərsiz vəziyyətə gətirmək üçün 600 manata razılaşıb. Məbləğin 100 manatını həmin vaxtı məkəzi bazarda, qalan 500 manatını isə Aytənin yaşadığı həyətin fərqli yerlərindən içərisində müxtəlif əşyalar olan 4 bükümü çıxardıqdan sonra alıb.
İstintaq orqanı tərəfindən Sayalının barəsində Cinayət Məcəlləsinin 178.1-ci (dələduzluq) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Sayalı ona elan olunmuş ittiham üzrə özünü təqsirli bilməyib. O bildirib ki, 2023-cü il tarixdə, günorta evində olduğu zaman sonradan adını bildiyi Aytən xanım onlara gəlib: "Aytən mənə dedi ki, Astara rayonunda özünə baxdırıb və orada ona bildiriblər ki, həyətlərində cadular basdırılıb, onları çıxartmaq lazımdır. O məndən həmin caduların çıxarılmasını xahiş etdi və bir cadunu neçə manata çıxardığımı soruşdu. Bildirdim ki, cadunun birini 150 manata çıxarıram.
Aytən xanım mənimlə razılaşdı, dedi ki, evə gedəcək, məsləhətləşdikdən sonra pulu hazır olsa, mənə zəng vuracaq".
Təqsirləndirilən şəxs qeyd edib ki, bir müddət sonra Aytən xanım zəng vurub və onu evlərinə dəvət edib: "Aytənin harada yaşadığını bilmədiyim üçün ondan ünvanını soruşdum. Evlərinin Lənkəran rayonunun Türkəkəran kəndində olduğunu bildirdi. Ondan kəndə məni aparmaq üçün maşın göndərməsini xahiş etdim. Aytən xanım bildirdi ki, taksi ilə gəlim, ödənişini özü edəcək.
Qonşuluqda yaşayan taksi sürücüsü Şahinə zəng vurdum. O da gəlib məni götürdü, birlikdə Türkəkəran kəndinə getdik. Kəndə daxil olanda Aytən xanımla telefon əlaqəsi saxladım. O mənə evlərinin istiqamətini bildirdi. Evə çatanda Şahin maşında qaldı. Aytən xanım məni qarşıladı və biz həyətə daxil olduq. Onlardan bel gətirmələrini xahiş etdim".
Təqsirləndirilən şəxs deyib ki, cadulardan birini özü, digərini isə Aytənin anası qazaraq çıxarıb: "Caduları çıxardanda sonra zəhmət haqqı 300 manat eləsə də, Aytən mənə 500 manat verdi. Daha 20 manatı da taksipulu kimi verdi. Ondan 300 manat əvəzinə niyə 500 manat verdiyini soruşdum. Dedi, zəhmət çəkmisən.
Biz evimizə qayıdanda Lənkəran şəhərində "Ləvəngi dairəsi" adlanan ərazidə polis əməkdaşları maşını saxlatdı. Bizi polis şöbəsinə apardılar. Şöbədə Bəşir və Natiq adlı polislər məndən 20 min manat pul istədilər. Anar adlı polis məni kişilərə aid söyüşlərlə söydü. Onlara "neyləmişəm ki, 20 min manat pul verim, hardan gətirim, mənim pulum yoxdur" dedim.
Şöbədə Aytənin mənə verdiyi 500 manatı aldılar. Onlara bildirdim ki, bu vaxta kimi heç vaxt məndən polisə şikayət olmayıb. Günorta saatlarından gecə yarısına kimi məni polis şöbəsində saxladılar, sonra evə buraxdılar".
İş üzrə zərərçəkmiş Aytənin sözlərinə görə, təqsirləndirlən Sayalını iş yoldaşlarının və kəndçilərinin həyətlərini cadulardan təmizləməsi ilə bağlı tanıyıb: "Ona qarşı düşmənçiliyim yoxdur. 25 mart 2023-cü ildəsəhər saat 9-da Lənkəran rayonu "Böyük bazar" adlanan yerdə Sayalı xanımı gördüm və ona bildirdim ki, Astarada molla yanında olmuşam, orada özümə baxdırmışam. Molla mənə bildirdi ki, həyətdə cadu var, gedib onları təmizlətdirim. Buna görə Sayalı xanımdan xahiş etdim ki, həyətimdəki caduları təmizləsin. O, narahat olmamağı, caduları təmizləyəcəyini bildirdi.
Bunun üçün nə qədər pul götürəcəyini soruşdum. Hər bir caduya görə 150 manat olmaqla 600 manat alacağını bildirdi. Əlavə olaraq bildirdi ki, onu bizim evə gətirən taksi sürücüsünə 20 manat da verəcəm. Üstümdə 100 manat vardı. Həmin pulu "Böyük bazar" adlanan yerdə Sayalı xanıma verdim. Qalan 500 manat pulu da taparaq ona xəbər verəcəyimi bildirdim.
İki saatdan sonra özüm Sayalı xanımın evinə getdim və bildirdim ki, evdəkilərlə bu barədə razılığa gəldim. Sayalı xanım öz mobil telefon nömrəsini verdi ki, onunla əlaqə saxlayım".
Zərərçəkmiş deyib ki, həmin gün günorta saatlarında Sayalı xanım onların kəndinə gəlib və həyətlərindən caduları çıxarıb: "Onlardan birini əvvəl Sayalı xanım özü qazıb çıxardı, digərlərini isə anam qazdı, cəmi 4 cadu çıxdı. Telefonumun kamersi ilə çəkiliş apardım ki, Sayalı xanım həqiqətən caduları aşkar edərək çıxarır, yoxsa yalandan özü gətirərək onları ora atır.
Çəkiliş apardığımı Sayalı xanım bilmədi. Çəkilişi öz marağım üçün etdim. Çıxan caduların içərisində sap, daş var idi. Sayalı xanım bildirdi ki, bizi bağlayıblar, nə yaxşı ki, ölməmişik. Bundan sonra bizdən su istəd. Mən ona su verdim".
Zərərçəkmiş deyib ki, Sayalı xanıma 500 manat pulu verib: "Sayalı xanım narazılıq eləyərək bildirdi ki, pulu az vermişəm. Halbuki o, daha çox cadu çıxarıb. Bundan sonra Sayalı xanım getdi. Həmin vaxt anamın halı pisləşdi. O gündən başlayaraq anamın və atamın xəstəliyi mənə mənəvi əzab verməyə başladı. Sonradan qonşumuz dedi ki, o, Sayalıya 1200 manat pul verib və çox peşimandır. Sayalı adamı aldadır. Mən də qonşuya bildirdim ki, Sayalı məndən də həyəti təmizləmək üçün pul alıb. Buna görə əvvəl Daxili İşlər Nazirliyinin 102 xidmətinə zəng vurdum, daha sonra isə şöbəyə gedərək şikayət verdim".
Məhkəmə araşdırması zamanı zərərçəkmiş təkrar ifadə verib və əvvəlki ifadəsini təkzib edib. O, növbəti ifadəsində deyib ki, əvvəki ifadələrində hadisənin olduğunu, Sayalı xanıma 500 manat pul verdiyini, həmin 500 manat pulun ona qaytarıldığını və 100 manat pulun Sayalı xanımın ona qaytarmalı olduğunu bildirib: "Əslində Sayalı xanıma yalnız həyətimdə 500 manat və 20 manat taksi pulu vermişəm. Bundan əvvəl Astara rayonuna Yetər xanımın yanına getmişəm. Ola bilsin, ona verdiyim pulla bu pulla qarışdırmışam. Mən polislərin qurbanı olmuşam və onlar mənə nə deyib, mən də onların dedikləri kimi etmişəm. Bunları müstəntiq Aqşin müəllim mənə deyib. Mən də Aqşin müəllimim dediyi kimi etmişəm. Hazıra mən ortalıqda tək qalmışam".
Zərərçəkmiş deyib ki, Lənkəran rayonu "Böyük bazar" adlanan yerdə təqsirləndirilən şəxs Sayalı xanımı görüb və ona əvvəlcədən 100 manat pul verməyib: "Mən həmin gün günorta saat 13 radələrində Sayalı xanımın yaşadığı Lənkəran rayonu, Göyşaban kəndinəki evinə getmişəm. Orada razılaşdım ki, Sayalı xanım bir cadunu 150 manata çıxaracaq. Bir müddətdən sonra Sayalı xanım bizim kəndimizdəki evimizə gəlib, bel istəyib, bel ilə birincini özüm, digərlərini isə anam qazaraq caduları çıxarıblar. Sayalı xanım cəmi 4 cadu çıxarıb".
Zərərçəkmiş əlavə olaraq bildirib ki, o, Aqşinlə əlaqə saxlayaraq məhkəmədə nə deməli olduğunu soruşmaq istəsə də, Aqşin ona cavab verməyib: "Bu hadisədən əvvəl mənim polislərlə şəxsi münasibətlərim olub. Mənə polis işçiləri deyiblər ki, hadisə barəsində Daxili İşlər Nazirliyinin 102 xidətinə zəng vurum, mən də onların sözlərinə əməl edərək həmin xidmətə zəng vurdum.
Bir daha bildirəm ki, ortalıqda tək qalmışam. Polislər nə deyib, nə yazıblar, mən də onları etmişəm. Çünki polislər məni tək saxlayıblar. Atamın əlinə poçt qəbzi düşüb və məndən soruşub ki, məhkəmədə nə gəzirsən, orada nə işin var. İstəmirəm ki, atam bilsin, məni məhkəməyə cağırıblar. Bu səbəbdən də məhkəmə bildirişlərinin evimizə göndərilməsini istəmirəm".
Bu cinayət işinə Lənkəran Rayon Məhkəməsində baxılıb. Məhkəmə təqsirləndirilən şəxsin törətdiyi əməl üzrə təqsirsiz hesab edib. Onun barəsində bəraət hökmü çıxarılıb.
Məhkəmə hesab edib ki, Sayalının əməli o zaman dələduzluq kimi qiymətləndirilə bilərdi ki, o, gizli yolla, qabaqcadan özü zərərçəkmiş şəxsin həyətində həmin caduları basdırıb, özü təşəbbüs göstərərək zərəçəkmişlə ünsiyyət quraraq onu "ələ alardı", sonradan onu özünə inandıraraq özü basdırdığı caduları çıxararaq təqdim edərdi. Hazırki hadisə isə bundan tamam fərqlidir. Burada "təhrikçi" rolunu məhz zərərçəkmiş şəxs oynayıb.
Hökmdə qeyd olunub ki, təqsirləndirlən şəxs qabaqcadan zərəçəkmiş şəxsi tanımayıb, hansı kənddə və hansı ünvanda yaşadığını bilməyib, qabaqcadan da bilə bilməzdi ki, zərəçəkmiş şəxs ona öz problemləri ilə əlaqədar müraciə edəcək. Buna görə də o, qabaqcadan orada hər hansi bir cadu basdıra bilməzdi.
Məhkəmə qeyd edir ki, elə insanlar var, onlarda öncəgörmə qabiliyyətləri olur. Misal üçün, Nostradamusu, Vanqanı, gürcü xanımı Cunanı, azərbaycanlı Zirəddin Rzazyevi göstərmək olar. Zərəçəkmiş şəxsin xahişi əsasında caduların yerini aşkar etməyə qabiliyyəti olan təqsirləndirlən şəxs heç vaxt olmadığı bir həyətdə basdırılmış caduların yerini dəqiq göstərirsə, bu dələduzluq əməli deyil. Onları neçə aşkar edir, artıq bu onun işidir.
Bu qabiliyyətə görə şəxsi cinayət məsuliyyətinə cəlb etmək olmaz. Təqsirləndirlən şəxs müəyyən muzd qarşılığında xidmət göstərib və xidmət haqqı olaraq zərəçəkmiş şəxs təqsirləndirlən şəxsə 300 manat istədiyi təqdirdə 500 manat pul verib. Zərəçəkmiş şəxs 20 manatı da taksi fəaliyyəti ilə məşğul olan sürücüyə görə verib.
Generala ərə getdi, 25 il sonra ilk sevgilisindən evlilik təklifi aldı...
Kulis.az məşhur diktor Nərgiz Cəlilova haqqında maraqlı faktları təqdim edir.
Nərgiz Cəlilova 1960-cı il iyun ayının 10-da Bakıda dünyaya gəlib. Ailədə iki bacı, bir qardaş olublar. Orta məktəbdə oxuduğu illərdə musiqi təhsili almağa başlayır. On illik musiqi təhsilini başa vurur. İncəsənətə həddindən artıq meylli olduğundan hamı düşünür ki, o, musiqi sahəsinə yönələcək. Amma gözlənilənin əksinə olaraq Nərgiz 1978-ci ildə Azərbaycan Dövlət Neft Akademiyasına qəbul olunur.
Akademiyanı bitirəndən sonra televiziyada müsabiqə olduğunu eşidir və ora qatılmaq qərarına gəlir. Müsabiqədəki komissiyanın tərkibində məşhur diktor Rafiq Hüseynov da olur. Bir neçə mərhələni uğurla keçən Nərgiz yaxşı nəticə əldə edərək, müsabiqədən tam formada keçərək 1983-cü ildə Azərbaycan televiziyasında çalışmağa başlayır. Sonralar Rafiq Hüseynovla Nərgizin ustam müəllim münasibəti dərin dostluğa çevrilir. Onlar birlikdə bir neçə mahnı da ifa edirlər. O, müsahibələrinin birində bu barədə belə deyir:
"Komissiyanın üzvləri arasında xalq artisti Rafiq Hüseynov da var idi. Mənə elə gəlir ki, Rafiq Hüseynov olmasaydı, mən də olmazdım. İllər ötdükcə o, ailəvi can dostuma çevrildi. Qızı Leyli dünyaya gələndə ilk mənə zəng elədi və dedi ki, Nara, birinci sənə zəng edirəm, xala olmusan. O, mənim can dostum idi, baxmayaraq ki, yaş fərqimiz var idi, ustadım idi".
15 ilə qədər AZ TV-də çalışan diktor 1998-ci ildə doğma televiziyasından ayrılmalı olur. Sonra illərdə isə ABA, Space və Lider kanallarında fəaliyyətini davam etdirir.
Nərgiz Cəlilova ali təhsil aldığı illərdə tələbə yoldaşı ilə məhəbbət yaşayır. Ailə qurmaq qərarına gələn cütlüyün yolları sonradan kədərli şəkildə ayrılır. Cəlilova öz müsahibələrində xatırlayır:
"Qərar verdik ki, dördüncü kursda nişanlanaq, bitirəndən sonra isə evlənək. Onu bir gün tələbə düşərgəsinə göndərdilər. Oradan qayıdanda onda dəyişiklik gördüm, artıq o münasibətləri davam etdirə bilmədik və ayrıldıq. Acılı ayrılıq yaşadım, amma o zaman bu tələb olunurdu.
Televiziyada çalışmağa başladığım illərdə bir gün mənə zəng gəldi. Bu zəng həmin tələbə yoldaşımdan idi. Etiraf edirəm ki, ayrıldığımız illər ərzində səbirsizliklə onun zəngini gözləyirdim. Zəngində bildirdi ki, mənimlə görüşmək istəyir. Görüşdük və mənə evlilik təklifi etdi. Əvvəlcə razılaşdım, adət-ənənələrə uyğun olaraq elçi gəldilər. Bir neçə gün keçdikdən sonra hiss etdim ki, daha əvvəlki duyğuları yaşaya bilmirəm. Bunu ona izah etdim, biz razılaşdıq və ayrıldıq. Daha sonra o, ailə qurdu və Amerikaya köçdü.
25 il sonra həmin insandan mənə yenidən zəng gəldi. Onda mən də, o da öz həyat yoldaşlarımızdan ayrılmışdıq. İkimiz də subay idik. 25 ildən sonra o, yenə də evlilik təklif etdi. Təbii ki, qəbul etmədim. Çünki axar suya ikinci dəfə girmək olmaz. Bu mənim xasiyyətimdir. Bir neçə il keçdikdən sonra o, ikinci dəfə evləndi, mən isə hələ də təkəm. Hərdən fikirləşirəm ki, ilk məhəbbətim məni rahat buraxmadı".
Beləliklə ilk məhəbbəti ilə heç cür qovuşa bilməyən diktor Rusiyanın ədliyyə orqanlarında işləyən ədliyyə general-leytenantı İlqar Əlihüseyn oğlu Qasımov adlı insanla ailə qurur. Bu evlilikdən onların Nərmin adlı qızları dünyaya gəlir. Qızının on yaşı olanda, aparıcı həyat yoldaşından ayrılaraq qızı ilə birgə yaşamaq qərarına gəlir.
Diktorun ən çox sevdiyi idman növü tennisdir. Tennis sevgisi haqqında o, belə deyir:
"Ən çox sevdiyim idman növü tennisdir. Əgər 25 yaşım olsaydı, mütləq tennislə peşəkar məşğul olardım. Təsəvvür edə bilməzsiniz, mən oyunları necə izləyirəm. Hətta baxanda qışqırıram. Yaxşı ki, evdə tək yaşayıram. Heç kim səsimdən qorxmur".
O, 2009-cu ildə Xəzər TV kanalında "Pəncərə", 2015-ci ildə isə AZ TV-də "Sevilənlər" adlı verilişin aparıcısı olub. Müxtəlif TV layihələrdə uğurla iştirak edib. Tələbələr və ardıcıllarını yetişdirib.
Nərgiz Cəlilovanın qızı Nərmin bir neçə il əvvəl uyğur vətəndaşı ilə ailə quraraq Çinə köçür. 62 yaşlı diktorun bir nəvəsi də var.
Məqaləyə dair fotomateriallar:
