Saatlı rayon sakini Məmmədov Sənan Ağagül oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi Dövlət Tibbi Sosial Ekspertiza və Reabilitasiya Agentliyindən narazılığını bildirir:

“Mən, Məmmədov Sənan Ağagül oğlu, iki ilə yaxındır 2-ci mərhələ 4-cü dərəcəli, bədxassəli burun-udlağı karsinoması xərçəng xəstəliyindən əziyyət çəkirəm. Bir ildir Milli Onkologiya Mərkəzində qeydiyyatdayam. Son 7-8 aydır günümün 80-90%-ni yataqda keçirirəm, yeməyim-içməyim belə yatağıma qəlir.

Bir ildən çoxdur ki, burnumdan nəfəs ala bilmirəm, eşitmə qabiliyyətim də birtərəfli itib. Dözülməz baş-boyun və bədən ağrılarından əziyyət çəkirəm, gecələr yata bilmirəm. Bu səbəbdən demək olar ki, əsəblərim təmiz pozulub. Həftədə 3-4 dəfə, əsasən də gecələr burnumdan şiddətli qan açılır. Bir neçə dəfə yuxudan boğularaq ayılmışam. Buna görə də ailəm də mənimlə bir yerdə əziyyət çəkir.

Özüm ailəliyəm, 2 azyaşlı, məktəbli övladım və xəstə, yaşlı anam var. Özümüz də aztəminatlı ailəyik, ailədə heç kəs işləmir. Bu günə kimi ünvanlı sosial yardım və heç bir digər yardım almamışıq. Çünki, xəstəliyimə qədər özüm işləyib ailəmə baxmışam.

Onu da bildirim ki, atam Məmmədov Ağagül Əvəz oğlu da 10 ay bundan əvvəl Bədxassəli xərçəng xəstəliyindən vəfat edib. İlk atam xəstə oldu, bütün imkanımız onun müalicələri və əməliyyatı üçün sərf olundu.

Sizə müraciətimin əsl səbəbi odur ki, xəstəliyimlə bağlı pensiya verilməsi üçün bu il fevral ayının 12-də Saatlı Rayon Mərkəzi Xəstəxanaya müraciət etdim. İki-üç gün sonra Şirvan Şəhər Mərkəzi Xəstəxanasında həkim komissiyasından keçdim. Mart ayın 14-də TƏBİB sənədlərimi təsdiq edib, əlilliyin qiymətləndirilməsi və təyini üçün Əmək və Əhalinin Sosial Müdafiəsi Nazirliyinə göndərdi. Mart ayının 24-də mənə 3-cü qrup əlilliklə əlaqədar 150 manat müavinət təyin etdilər. Halbu ki, mən 20 dəqiqə ayaq üstə dura bilmirəm. Çünki dayanmadan burnumdan su qəlir, tez-tez qan açıldığına qörə də başım fırlanır, qözüm qaralır. Bunlardan dolayı adam içinə çıxa bilmirəm, nəinki gedib hər hansı bir işdə işləmək. Kaş ki, sağlamlığım yerində olaydı...
Mən, sizin sayt vasitəsilə səlahiyyətli qurumlardan xahiş edirəm, yuxarıda yazdıqlarımı nəzərə alıb, xəstəliyimlə bağlı əlillik qrupumun 1-ci və yaxud 2-ci qrupa dəyişilməsinə və aztəminatlı ailə olaraq ünvanlı sosial yardım almağımızda kömək olsunlar".

Məsələ ilə bağlı Dövlət Tibbi Sosial Ekspertiza və Reabilitasiya Agentliyindən bildirdilər ki, Saatlı rayon sakini 1985-ci il təvəllüdlü Məmmədov Sənan Ağagül oğlunun əlilliyi 01.04.2025-ci il tarixdə elektron sistem üzərindən qiymətləndirilib və ona orqanizm funkdiyalarının 55% pozulmasına görə 2 il müddətinə əlillik təyinatı aparılıb".

Onu da qeyd edək ki, nazirliyin əməkdaşları 10 gündür müraciət edən şəxslə əlaqə saxlaya bilmirlər. Heç bir telefon zənginə cavab vermir.

Jalə FAMİLQIZI

P.S. Hörmətli şikayətçi, xahiş edirik nəzərə alın, işinizlə bağlı hansısa quruma müraciət edirik, siz də məsuliyyətli olub, ən azı telefon zənglərinə cavab verin. Həm narazılıq edirsiz, həm də zənglərə cavab vermirsiniz.