İkinci əl məhsullar, adətən, ucuz olduğundan vətəndaşların onlara marağı da yüksək olur. Ancaq bəzən bu məhsullar alındıqdan bir müddət sonra oğurluq olduğu ortaya çıxır.

Bu barədə ARB TV-nin süjetində deyilir.

Qeyd olunan məsələ ilə bağlı fikrini bildirən hüquqşünas Fərhad Mehdiyevin sözlərinə görə, şəxs almaq istədiyi ikinci əl məhsul haqqında müəyyən qədər məlumata malik olmalıdır. Əgər alıcı həmin məhsul haqqında araşdırma etməkdən yayınırsa, biz ehtimal edə bilərik ki, o bunun oğurluq olduğunu bilir.

“Oğurluq məhsulunu əldə edənlər, satanlar və oğurluq məhsul olduğunu bildiyi halda əldə edən alıcılar Cinayət Məcəlləsinin 194-cü maddəsinə əsasən, min manatdan üç min manatadək cərimə və ya üç ilədək müddətə azadlığın məhdudlaşdırılması, yaxud əmlakı müsadirə edilməklə dörd ilədək müddətə azadlıqdan məhrumetmə ilə cəzalandırılır”.

Ətraflı videosüjetdə:

İş yerini dəyişdirmək istəyən müəllimlər üçün növbəti vakansiya seçimi başladı. Bakı, Sumqayıt və Abşerona yerdəyişmə mümkün olmayacaq. Müəllimlərin iş yerinin dəyişdirilməsi müsabiqəsinin növbəti vakansiya seçimi mərhələsinə bu gün saat 11:00-da start verilib.

Proseslə bağlı “Xəzər Xəbər”ə Məktəbəqədər və Ümumi Təhsil üzrə Dövlət Agentliyindən məlumat verilib.

Qeyd edilib ki, yerdəyişmə prosesində son işlədiyi təhsil müəssisəsində üç ildən artıq çalışan müəllimlər iştirak edirlər.

Vakansiya seçimi üçün elektron sistem 29 aprel saat 11:00-dək aktiv olacaq.

Məlumat üçün bildirək ki, müəllimlərin yerdəyişməsi Naxçıvan Muxtar Respublikasında da ilk dəfə olaraq həyata keçiriləcək.
Naxçıvanın MR Təhsil Nazirliyindən verilən məlumata görə, müəllimlər qarşılıqlı razılıq əsasında iş yerlərini dəyişə biləcəklər.

Müvəqqəti qaydalara əsasən, hərbçi və şəhid ailə üzvlərinin iş yerinin dəyişdirilməsi prosesi ildə bir dəfə nazirlik tərəfindən həyata keçiriləcək.

Ətraflı süjetdə:

Ali məktəblərə qəbulda bəzi ixtisas qruplarında gərgin rəqabətin olacağı gözlənilir.

Xezerxeber.az-ın məlumatına görə, indiyədək qəbul imtahanının 2-ci mərhələsinin 1-ci cəhdində iştirak etmək üçün 50 minə yaxın abituriyent qeydiyyatdan keçib.

Belə ki, I ixtisas qrupu üzrə müraciət edənlərin sayı 16 min 135 nəfərdən çoxdur. II ixtisas qrupu üzrə 14 min 650 nəfər, III qrup üzrə 14 min 330 nəfər, IV qrup üzrə isə 3 min 820 nəfər qeydiyyatdan keçib.

Təhsil eksperti Kamran Əsədov deyir ki, bu il ali təhsil müəssisələrinə qəbul olmaq istəyənlərin sayı kifayət qədər çoxdur.
Onun sözlərinə görə, müəyyən ixtisaslarda seçim zamanı rəqabətin artacağı proqnozlaşdırılır.

Qeyd edək ki, qəbul imtahanlarına qeydiyyat mayın 6-dək davam edəcək.

Ətraflı süjetdə:

Azərbaycanda şadlıq saraylarında gələn ay üçün sifarişlərin sayı kəskin azalıb.

İqtisadiyyat.az paytaxtdakı bəzi şadlıq sarayları arasında sorğu keçirib.

Sorğu nəticəsində məlum olub ki, may ayında toy mərasimlərinin keçirilməsi ilə əlaqədar sifarişlərin sayında azalmalar mövcuddur. Qeyd edilir ki, əvvəlki aylarda demək olar, hər gün üçün sifarişlərin mövcud olmasına baxmayaraq, may ayı üçün bu rəqəm təxminən bir həftəyə enib.

Buna səbəb isə bu ayda toy etməyin uğursuzluqla nəticələnəcəyi ilə bağlı iddia olunan ənənə göstərilir. Restoran rəhbərləri deyir ki, buna baxmayaraq əvvəlki illərlə müqayisədə son illər may ayında toy edənlərin sayında artım müşahidə olunur.

Bəs may ayında niyə toy etmək olmaz?

AMEA-nın Folklor İnstitutunun aparıcı elmi işçisi, filologiya üzrə fəlsəfə doktoru Elyar İslamoğlu İqtisadiyyat.az-a açıqlamasında deyib ki, may ayında toy edilməməsi ilə bağlı bu günə qədər heç bir dini, psixoloji, astroloji əsasa rast gəlinməyib.

Onun sözlərinə görə, əksinə, bu ay gül-çiçəyin daha çox olduğu, ağacların çiçəkləndiyi, havaların isindiyi ən gözəl aylardan biridir. E.İslamoğlu deyir ki, sadəcə bir qayda olaraq Azərbaycan toylarının payızda keçirildiyinə rast gəlinir:

"Çünki payız aylarında meyvələr yetişir, dənli bitkilər biçilir, bir sözlə bolluq olur. Bununla yanaşı, həm də toy vaxtı kəsiləcək heyvanlar daha ətli-canlı olurlar. Amma yaz aylarında isə xüsusilə də mayda mal-heyvan qışdan yeni çıxdığına görə onlar arıq və kəsimə bir o qədər də yararlı sayılmırlar. Bu da təbii ki, toy vaxtı ət tədarükünü qarşılamağa bir az çətinlik yaradır. Mayda toy etməməklə bağlı bundan başqa elə bir ciddi problem yoxdur. Amma hal-hazırda restoranlarda, şadlıq evlərində toylar keçirilir və ilin istənilən fəslində bütün meyvələri, eləcə də digər azuqələri tapmaq mümkündür. Ona görə də insanlar rahat şəkildə may ayında toylarını edə bilərlər".

Müsahibimiz söyləyib ki, Azərbaycanda may ayında toy etməməklə bağlı inancların formalaşması, əsasən, rus və ermənilərdən keçib: "Belə ki, ermənilər qondarma soyqırımlarına aprel ayının sonlarından başlayaraq yas saxlamağa çalışırlar və 40 gün davam edən dövr may ayını da əhatə etmiş olur. Bununla yanaşı, ruslarda da mayda toy edilməməsi ilə bağlı formalaşmış inanclar var. Onlar inanclarını mayın çətin, ağır ay olması ilə əsaslandırmağa çalışırlar. Ona görə də onlar may ayında toy etmirlər. Yəni may ayında toy etməməyin Azərbaycanla heç bir bağlılığı yoxdur. Əksinə, insanlar istədiyi formada may ayında rahat şəkildə toy edə bilərlər. Bu ayda toy edənlərin bədbəxt olması, xoşbəxt olmaması, güzəranların çətin olması ilə bağlı heç bir əsas yoxdur".

Azərbaycan Respublikası Əmək Məcəlləsinin daha bir maddəsində uyğunsuzluq var, əgər müvafiq düzəliş və ya əlavələr edilməzsə, bu normanın da praktikada tədbiqi ilə əlaqədar əmək mübahisəsi yaranacaq və ya yaranır:
1.AR Əmək Məcəlləsinin 69.3-cü maddəsinə əsasən, işçilər başqa işəgötürənlə əmək müqaviləsi bağladıqda, ərizəsində göstərdiyi gün əmək müqaviləsi ləğv edilə bilər.
2. Əmək Məcəlləsində olan bu norma qəbul olunanda əmək müqavilələrinin elektron qaydada qeydiyyata alınması barədə norma yox idi.
3 . Hal hazırda Əmək Məcəlləsinin 49.1-ci maddəsinə edilın dəyişikliyə əsasən: Əmək müqaviləsinin bağlanılması, bu müqavilənin- elektron informasiya sistemində qeydiyyata alınmasından və bu barədə işəgötürənə elektron qaydada məlumat göndərilməsindən sonra hüquqi qüvvəyə minir.
4.Yeni qəbul olunmuş normaya uyğun olaraq yeni işəgötürən də təbii olaraq işçi ilə yeni əmək müqaviləsi bağlamayacaq, bağlasa da, başqa işəgötürənlə əmək müqaviləsi olduğu üçün hüquqi qüvvəyə minməyəcək.Nəticədə isə Əmək Məcəlləsinin 69.3-cü maddəsinin tədbiqində problemlər, işçi ilə işəgötürən arasında isə əmək mübahisəsi yaranacaq.
5. AR Əmək Məcəlləsinin 49.1-ci maddəsinə edilən dəyişiklikləri əsas tutaraq hesab edirəm ki, AR-sı Əmək Məcəlləsinin 69.3-cü maddəsinin bu hissəsində də müvafiq dəyişiklik və ya əlavələr edilməli, bu halda bu hakın tədbiq edilməsi barədə konkret qayda müəyyən edilməlidir.
Azer Quliyev
TEREF

Böyük Britaniyanın baş naziri Rişi Sunak İordaniya kralı II Abdullah ilə Qəzza zolağına çatdırılan humanitar yardımın həcminin artırılması imkanlarını müzakirə edib.

Bu barədə Britaniyanın hökumət başçısının dəftərxanasının yaydığı bəyanatda deyilir.

Sənəddə deyilir: "Qəzza zolağına humanitar yardımı əhəmiyyətli dərəcədə artırmaq üçün birgə səylər müzakirə edilib, bura İordaniyanın rəhbərlik etdiyi əməliyyatda Böyük Britaniyanın hava daşıması, Qəzzaya quru humanitar dəhlizi və Qəzza ilə Kipr arasında dəniz dəhlizi daxildir".

Sunak həmçinin vurğulayıb ki, London anklava yardımın çatdırılması və HƏMAS hərəkatı tərəfindən saxlanılan girovların azad edilməsi üçün dərhal humanitar fasilə elan etməkdə israrlıdır.

"Baş nazir qeyd edib ki, Böyük Britaniyanın son məqsədi israillilər və fələstinlilər üçün iki dövlətli həllə nail olmaqdır. Liderlər Fələstin ərazilərində sabitlik və firavanlığı təmin etmək üçün Fələstin Milli Administrasiyasını dəstəkləməyin və islahatların aparılmasının vacibliyi barədə razılığa gəliblər", - Sunakın ofisi əlavə edib.

ABŞ-da Bakıdakı Səfirliyi 2025-2026-cı illər üzrə Hubert H. Humphrey Təqaüd Proqramı üçün müraciətlərin qəbulunu elan edib.

Səfirliyin məlumatında deyilir ki, bu, bir illik qeyri-dərəcə peşəkar inkişaf proqramı yerli və qlobal problemlərin həlli sahəsində əməkdaşlıq edən beynəlxalq ekspertlərə liderlik bacarıqlarını artırmaq üçün imkan yaradacaq.

Müraciətlərin qəbulu iyunun 4-dək davam edəcək.

2025-2026-cı təhsil ilində Maliyyə və Bankçılıq, Dövlət Siyasətinin Təhlili və Dövlət İdarəçiliyi, Texnologiya Siyasəti və İdarəetmə, Ünsiyyət və Jurnalistika, Hüquq və İnsan Hüquqları, Kənd Təsərrüfatı və Kənd İnkişafı, Təbii Sərvətlər, Ətraf Mühit Siyasəti və İqlim Dəyişikliyi, Şəhər və Regional Planlaşdırma, İctimai Səhiyyə Siyasəti və İdarəetmə, Maddələrdən Sui-istifadənin Maarifləndirilməsi, Müalicəsi və Qarşısının Alınması, Təhsilin İdarə Edilməsi, Planlaşdırılması və Siyasəti üzrə ixtisaslara yer verilib.

ABŞ səfirliyi bildirir ki, Hubert H. Humphrey Təqaüd Proqramı yerli və qlobal problemləri həll etmək, kollektiv rifah üçün dəyişiklikləri təşviq etmək məqəsdi ilə əməkdaşlıq edən beynəlxalq peşəkarlar arasında liderliyi artırır. ABŞ-lı həmkarları ilə akademik təhsil və peşəkar inkişaf yolu ilə bu böyüyən qlobal şəbəkə ən yaxşı təcrübələri bölüşür, ictimai və institusional potensialı inkişaf etdirmək, insan hüquq və azadlıqlarını təşviq etmək, dayanıqlı torpaqları təmin etmək və çiçəklənən icmaları inkişaf etdirmək üçün kritik əhəmiyyət kəsb edən sahələrdə təcrübə qurur. Gələcək liderlərə və siyasətçilərə ABŞ ali təhsili, cəmiyyəti, mədəniyyəti və peşəkar təşkilatlarında təcrübə təqdim etməklə, proqram amerikalılar və onların xaricdəki peşəkar həmkarları arasında davamlı, məhsuldar əlaqələr üçün əsas yaradır.

Rəsmi statistikaya görə, Humphrey məzunlarının 61 faizi evə qayıdır və hökumətlərdə müəyyən vəzifələrdə işləyirlər. Digərləri siyasət aparan, yeni ən yaxşı təcrübələri tətbiq edən və təşkilatlarında innovativ idarəetmə üsullarını tətbiq edən sahələrdə liderdir.

Məzunların 46 faizi milli siyasətlər işləyib hazırlamış, milli proqramlar yaratmış, milli təlimçi kimi fəaliyyət göstərmiş və öz ölkələrində qanunvericilik üzrə dövlət məmurlarına məsləhətlər vermişdir.

Ümumi (9 illik) orta təhsil səviyyəsi üzrə 2024-cü il martın 17-də keçirilən buraxılış imtahanının nəticələri elan olunub.

Redaktor.az xəbər verir ki, bu barədə Dövlət İmtahan Mərkəzi (DİM) məlumat yayıb.

Bildirilib ki, imtahanda iştirak edən 9-cu sinif şagirdləri verilmiş keçidə (https://www.e-gov.az/az/services/read/2641/0?tqdk_xdm=19) daxil olaraq iş nömrəsi və şəxsiyyəti təsdiq edən sənədin nömrəsindən (və ya FİN kodundan) istifadə etməklə öz imtahan nəticələri, cavab vərəqinin qrafik təsviri ilə tanış ola bilərlər. İmtahan iştirakçıları iş nömrələrini buradan öyrənə bilərlər.

Şagirdlər imtahan nəticələri haqqında məlumatı (hər fənn üzrə ümumi balı) mobil operatorlar (Azercell, Bakcell, Nar, Naxtel) vasitəsilə bu imtahan üçün nəzərdə tutulan buraxılış vərəqəsində göstərilən kodu 7727 nömrəsinə göndərməklə də öyrənə bilərlər.

Yazı işlərinin (açıq tipli tapşırıqların cavabları) yoxlanılması prosesi onlayn şəkildə həyata keçirilib. Belə ki, hər marker yoxlama prosesinə öz evindən qoşularaq proqramın onun kompüterinə təsadüfi göndərdiyi işləri yoxlayıb. Qeyd edək ki, onlayn (evdən) yoxlama prosesində üztanıma texnologiyası tətbiq edilib və yoxlama prosesinin bütün tələblərinə (meyarların təkmilləşdirilməsi, işlərin şifrələnməsi, markerlərin hər tapşırıq üzrə yoxlamadan əvvəl kalibrləmədə iştirak etməsi, yoxlama ərzində "seeding" (markerlərə sayıqlığı itirməmək üçün əvvəlcədən hazırlanan və kalibrə edilən sualların mütəmadi olaraq göndərilməsi) prosesinin tətbiqi, işlərin markerlərə proqram tərəfindən təsadüfi göndərilməsi, imtahan protokollarının araşdırılması və s.) əməl olunub.

Yazı işlərinin onlayn (evdən) yoxlanılması üçün proqram təminatı Dövlət İmtahan Mərkəzinin mütəxəssisləri tərəfindən hazırlanıb.

Bu imtahanlarda iştirakı nəzərdə tutulan 46741 nəfərdən 485 nəfər imtahana gəlməyib. Tələb olunan imtahan qaydalarını pozduğu üçün 5 nəfərin nəticəsi ləğv olunub.

İmtahan iştirakçıları arasında 6 nəfər (siyahı) maksimal olan 300 bal toplamaqla ən yüksək nəticəni göstərib.

İmtahan nəticələri ilə bağlı müraciətlərə baxılması üçün DİM-də Apellyasiya Komissiyası fəaliyyət göstərəcək. Apellyasiya Komissiyasına müraciət etmək istəyənlər 30 aprel və 1, 2 may tarixlərində DİM-in saytında yerləşdiriləcək elektron ərizəni doldurmaqla qeydiyyatdan keçə bilərlər. Göstərilən müddət ərzində qeydiyyatdan keçməyənlər sonradan Apellyasiya Komissiyasına müraciət edə bilməyəcəklər. Elektron ərizədə haqqında müraciət edilən tapşırığın nömrəsi seçilməli, onunla bağlı müraciətin məzmunu yazılmalı və meyarın hansı bəndinə uyğun hesab edildiyi göstərilməlidir. Elektron ərizədə müraciətin məzmunu qeyd olunmadığı halda ərizə qəbul edilmir və həmin müraciət araşdırılmır. Apellyasiya prosesi aşağıdakı ardıcıllıqla aparılır:

Apellyasiya Komissiyası tərəfindən haqqında müraciət olunan bütün işlər araşdırılır;
Şagirdlərin müraciət etdikləri tapşırıqlar üzrə ekspert rəyi (yazılı şəkildə) apellyasiya ərizələrinə əlavə edilir;
Şagirdlərin apellyasiya ərizələrində qeyd etdikləri telefon nömrəsinə apellyasiya prosesinin başa çatması ilə bağlı “sms” göndərilir.

Bundan sonra şagirdlər apelyasiya.dim.gov.az saytında ərizələrinə daxil olaraq apellyasiyanın nəticəsi ilə tanış ola və ekspert rəyini oradan çap edə bilərlər.

Cavab vərəqində təlimata uyğun olmayan formada qeyd olunmuş cavablar, o cümlədən cavabın optik qurğu tərəfindən səhv kimi nəzərə alınması ilə nəticələnən düzəlişlərlə (məsələn qapalı sualda iki dairənin qaralanması və s.) bağlı müraciətlərə baxılmayacaq.

Apellyasiya Komissiyasına müraciət etməmişdən əvvəl şagirdlər DİM-in saytında, imtahan nəticələri ilə bağlı səhifədə öz nəticələri, cavab vərəqinin qrafik təsviri, hər bir açıq tipli tapşırıq üzrə qiymətləndirmə meyarları ilə, həmçinin tapşırıqların şərti və izahlarla (https://eservices.dim.gov.az/ejurnal/) tanış ola bilərlər. Ötən imtahanların təcrübəsi göstərir ki, apellyasiya üçün ərizə yazanların təqribən 15%-i ümumiyyətlə tapşırığa cavab verməyib və ya öz cavabı ilə mümkün doğru cavabları, qiymətləndirmə şkalasını müqayisə edib tanış olmadan komissiyaya müraciət ediblər. Abituriyentlərin nəzərinə çatdırırıq ki, bu tip müraciətlərə baxılmayacaq.