Xəbər verdiyimiz kimi, Prezident Administrasiyasının sabiq rəhbəri Ramiz Mehdiyevə aid olduğu iddia edilən, paytaxtın Tbilisi prospektində dəyəri 8 milyon dollar olan dəbdəbəli villa satışa çıxarılıb.

Məsələ ilə bağlı "Unikal"a açıqlama verən Ramiz Mehdiyev bildirib ki, villa ona məxsus deyil: "Satışa çıxarılan villanın qətiyyən bizimlə əlaqəsi yoxdur. İlk dəfədir sizdən eşidirəm.

Bizim satışa çıxarılan villamız yoxdur. Kimə aid olduğunu bilmirəm", - deyə o qeyd edib.

Zaqatalada qanunsuz olaraq çoxsaylı ağac kəsməkdə təqsirləndirilən şəxs barədə cinayət işi məhkəməyə göndərilib.

Tribunainfo.az xəbər verir ki, bu barədə Baş Prokurorluğun Mətbuat xidməti məlumat yayıb.

Qeyd olunub ki, rayon ərazisində kütləvi şəkildə qanunsuz ağac kəsmə faktlarının aşkarlanması ilə bağlı Baş prokuror yanında Korrupsiyaya qarşı Mübarizə Baş İdarəsində başlanmış cinayət işinin bir hissədə ibtidai istintaqı yekunlaşdırılıb.

İstintaqla Azərbaycan Avtomobil Yolları Dövlət Agentliyinin “14 nömrəli Yol İstismarı” Məhdud Məsuliyyətli Cəmiyyətinin direktoru Rüstəm Paşayevin cari ilin fevral ayında rəsmi icazə sənədlərinə yalan məlumatlar daxil etməklə Zaqatala rayon sakini Muhuma Qudayev tərəfindən rayonun Maqov kəndi ərazisindən keçən yolun üzərindəki 136 min manat dəyərində olan müxtəlif növ ağacların şəxsi məqsədlər üçün ekoloji tələblərə zidd olaraq kəsilməsini təşkil etməsinə, bununla da çoxsaylı ağacların bioloji inkişafına mənfi təsir göstərən nəticələrə səbəb olmasına əsaslı şübhələr müəyyən edilib.

Toplanmış sübutlar əsasında Rüstəm Paşayevə Cinayət Məcəlləsinin 32.3, 259.4 (xüsusilə külli miqdarda ziyan vurmaqla qanunsuz olaraq ağacları, kolları və ya digər yaşıllıqları kəsməni təşkil etmə), 309.2 (vəzifə səlahiyyətlərini aşma ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham elan edilərək barəsində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs, Muhuma Qudayevə isə həmin Məcəllənin 259.4 (xüsusilə külli miqdarda ziyan vurmaqla qanunsuz olaraq ağacları, kolları və ya digər yaşıllıqları kəsmə), 32.5, 309.2 (ağır nəticələrə səbəb olan vəzifə səlahiyyətlərini aşmaya köməkçilik) və 32.5, 313-cü (vəzifə saxtakarlığının törədilməsinə köməkçilik) maddələri ilə ittiham elan edilərək barəsində polisin nəzarəti altına vermə qətimkan tədbiri seçilib.

Cinayət işi baxılması üçün aidiyyəti üzrə Şəki Ağır Cinayətlər Məhkəməsinə göndərilib.

Bundan başqa, Baş idarədə istintaq edilən digər cinayət işi üzrə isə Azərbaycan Avtomobil Yolları Dövlət Agentliyinin “8 nömrəli Avtomobil Yollarının Yaşıllaşdırılması” MMC-nin direktoru İlham Novruzov Zaqatala rayonunun Lahıc kəndi ərazisindən keçən avtomobil yolu üzərindəki 88 min manat dəyərində olan çoxsaylı ağacların rayon sakini Anar Hüseynov tərəfindən qanunsuz olaraq kəsilməsini təşkil etməsinə, bununla da ağacların bioloji inkişafına mənfi təsir göstərən nəticələrə səbəb olmasına əsaslı şübhələr müəyyən edilib.

Eyni zamanda hər iki halda Zaqatala rayonu Maqov və Lahıc kəndlərində ağacların qanunsuz olaraq kəsilməsi ilə bağlı Ekologiya və Təbii Sərvətlər Nazirliyinin 7 saylı Regional Ekologiya və Təbii Sərvətlər İdarəsinin sabiq rəisi Akif Məmmədovun vəzifə səlahiyyətlərini aşmaqla qanunsuz rəy verməsi və vəzifə saxtakarlığı törətməsinə əsaslı şübhələr müəyyən olunub.

İlkin sübutlarla İlham Novruzov Cinayət Məcəlləsinin 32.3,259.4 və 309.2-ci, Akif Məmmədov həmin Məcəllənin 309.2 və 313-cu, Anar Hüseynova isə 259.4 və 32.5, 309.2-ci maddələri ilə ittiham elan edilərək barələrində polisin nəzarəti altına vermə qətimkan tədbiri seçilib.

Hazırda sözügedən cinayət işi üzrə ibtidai istintaq davam etdirilir.

Bakının bəzi ərazilərində köhnə tikililərin sökülməsinə başlanılıb.

TEREF İTV-yə istinadən xəbər verir ki, paytaxtın 20-ci sahə adlanan ərazisi, Çernyaxovski küçəsində artıb sakinlərin bir qismi köçürülür.

Lakin verilən kompensasiya ilə razılaşmayanlar da var.

Məsələ ilə bağlı Dövlət Şəhərsalma və Arxitektura Komitəsindən bildirilib ki, mövcud evlərin sökülməsi və ərazinin abadlaşdırılması planlaşdırılır. Artıq həmin ünvanlarda yerləşən 34 mənzil üzrə kompensasiya ödənilib.

Sakinlərin köçürülməsi təmin edilib.

Digər ərazilərdə yaşayan vətəndaşlarla da notarial qaydada razılaşma müqavilələrinin bağlanması və ödənişlərin həyata keçirilməsi nəzərdə tutulur.

Ətraflı süjetdə:

Bakıda istismar müddətini başa vurmuş, eyni zamanda şəhərin görkəminə xələl gətirən tikililərin sökülməsi ilə əlaqədar iki komissiya yaradılıb.

AzFakt.com xəbər verir ki, aidiyyəti qurumların təmsil olunduğu Komissiya Bakı şəhərinin yeni Baş Planına uyğun olaraq paytaxtda və ətraf ərazilərdə 20-ci əsrin əvvəllərində tikilmiş və istismar müddətini başa vurmuş, eyni zamanda şəhərin görkəminə xələl gətirən tikililərin sökülməsi zərurəti, habelə mühəndis-kommunikasiya qurğularının yenilənməsi, ərazinin abadlaşdırılması ilə əlaqədar Bakı şəhəri, Yasamal rayonu, Azərbaycan prospekti, Nizami, Rza Quliyev, Nabat Aşurbəyova, Mirzə Fətəli Axundzadə, Çingiz Mustafayev və Mirzəağa Əliyev küçələrinin əhatə etdiyi ərazidə yerləşən yaşayış və qeyri-yaşayış obyektlərinin satınalınaraq köçürülməsi sahəsində səlahiyyətli olacaq.

Komissiya Yasamal rayonu, Mirzə Fətəli Axundzadə küçəsi, 4 saylı ünvanda fəaliyyət göstərir. Yuxarıda göstərilən ərazidə yaşayan sakinlərdən sahibi olduqları tikililərə dair müvafiq sənədlərlə Komissiyaya müraciət etmələri xahiş olunur.

Ümumi prosesə, şəffaflığın təmin olunmasına nəzarəti isə Nazirlər Kabineti yanında yaradılmış xüsusi Komissiya həyata keçirəcək.

Xəzər dənizinin Qazaxıstan sahilində 88 suitinin cəsədi aşkarlanıb.

Bu barədə TNS "Sputnik Kazaxstan" saytına istinadla xəbər verir.

Qeyd olunub ki, onların ölüm səbəblərini müəyyən etmək çətindir. Buna səbəb heyvanların ehtimal olunan ölümlərindən 2-3 həftə sonra tapılmasıdır.

Bildirilir ki, bu dövrdə bölgədə qərb küləyi üstünlük təşkil edib, bu da suitilərin cəsədlərinin sahilə çıxmasına səbəb olub.

Paytaxtın Xətai rayonunda dörd çoxmərtəbəli binadan ibarət yaşayış kompleksində bir nəfər belə yaşamır. Qəribədir ki, uzun illər əvvəl binanın tikintisi başa çatsa da, mənzillər hələ satışa çıxarılmayıb. Binanın qəzalı olduğu da deyilir, amma maraqlıdır ki, aşağı mərtəbələrdə obyektlər fəaliyyət göstərir.

Bəs niyə belə bir vəziyyət yaranıb?
TEREF milli.az-a istinadən xəbər verir ki, binada yaşayış olmasa da, obyektlər icarəyə verilir. Həmin şirkətlə əlaqə saxlayıb məsələni aydınlaşdırmağa çalışsaq da, heç bir nəticə olmadı. Telefonu götürən şəxs bildirdi ki, o, sadəcə vasitəçidir. İcarəyə verilən obyektlərdən sadəcə faizini götürür. Binalarla bağlı ətraflı məlumatlı deyil.

Məsələ ilə bağlı təhlükəsizlik eksperti Elmar Nuraliyev bildirir ki, bina qanunvericilikdə nəzərdə tutulan formada istismara verilməyibsə, qeyri-yaşayış obyektlərinin fəaliyyəti də qanunsuzdur:

"Binanın qəzalı vəziyyətdə olmasına dair rəy verilibsə, orda yaşayış və qeyri-yaşayış sahələrində insanların yerləşdirilməsinə və yaxud hansısa bir kommersiya payının həyata keçirilməsinə icazə verilmir".

44 günlük Vətən müharibəsi günlərində Azərbaycan Mərkəzi Bankının tövsiyəsi ilə Azərbaycan Banklar Assosiasiyasının üzvləri olan banklar yekdil olaraq qərar verdilər ki, şəhid, qazi, yaralı hərbçilərimizin, düşmən təxribatı nəticəsində zərər çəkmiş mülki vətəndaşlarımızın kredit borcları bağışlanılsın, faizləri dondurulsun. Əksər banklar bu qərara sadiq qalsalar da, bəzi istisnalar da var.

“Kapital Bank” artıq həyatda olmayan qazi Təbriz Şəmsi oğlu Əliyevin ailəsindən onun sağlığında aldığı kreditin qaytarılmasını tələb edir.

Bu barədə "Azərbaycan Reallığı"na Təbriz Əliyevin həyat yoldaşı Günel Əliyeva məlumat verib.

Deyib ki, “Kapital Bank”ın çağrı mərkəzindən onunla əlaqə saxlayaraq mərhum yoldaşı Təbriz Əliyevin kredit borcunun ödənməsi tələb olunub:

“Təbriz müharibədə kontuziya almışdı. Yanında mərmi partlamışdı. 3-cü qrup əlil idi. Müharibədən sonra bankdan kredit alıb heyvandarlıqla məşğul olmaq istədi. Lakin psixoloji durumu ağır idi deyə müalicəsinə xərclədi. Ötən ilin dekabrında da Səfikürd kəndinin mərkəzində özünü asaraq intihar etdi.

Bankdan dedilər ki, Təbrizin vərəsələri övladlarıdır, dövlət onların saxlanılması üçün müavinət verir. Kredit borcu da müvafiq olaraq onun övladlarına ödənilən müavinətə yönləndiriləcək”.

Hazırda mərhum Təbriz Əliyevin iki övladı böyüyür.

Günel Əliyevanın sözlərinə görə, bankdan zəng edən şəxs deyib ki, könüllü ödənmə üçün iyun ayına qədər vaxt verilir:

“Əgər iyun ayına qədər ödəmə etməsək, dedi ki, kredit borcunu uşaqların saxlanılması üçün dövlətin ödədiyi müavinətdən tutacaqlar”.

Günel Əliyeva ölkə rəhbərliyinə müraciət edərək həyat yoldaşının sağlığında aldığı kredit borcunun silinməsini xahiş edir.

Naxçıvanlı gənc Elçin Hümbətovun polis işgəncəsindən başını götürüb Türkiyəyə qaçması haqqında iki gün əvvəl məlumat vermişdik. Bu məlumat yayıldıqdan sonra yerli DİN onun yaxınları ilə əlaqə saxlayıb, geri qayıtmasını xahiş edib. Bu haqda “Gündəlik Naxçıvan”a Elçin Hümbətovun özü məlumat verib.
O, deyir ki, həbs olunmayacağı və yenidən işgəncəyə məruz qalmayacağı ilə bağlı zəmanət aldıqdan sonra geri qayıtmağı qərara alıb:
“Dedilər, yuxarıdan tapşırıq var ki, səninlə işləri olmasın, qayıt, gəl. Həbs qoyduqları maşınımı da geri qaytaracaqlarını söz verdilər. Qohumlarım da mənə zəmanət verdilər. Bir neçə belə zəngdən sonra inandım və geri qayıtdım. Gələn kimi maşınımı heç nəsiz geri qaytardılar. Halbuki, əvvəl 2 min manat rüşvət istəyirdilər. Mən buna qane olmuram. Mənə ağır işgəncələr verən polislər cəzalanmalıdırlar. Mətbuat işıqlandırmasaydı, maşınımı da qaytarmayacaqdılar.”
Bir neçə gün əvvəl polislər Elçin Hümbətovun iş yerinə gəlib və ona çuğulluq təklifi ediblər. O, təklifi qəbul etməyib və bir müddət sonra şəhərdə olduğu zaman polislər tərəfindən tutularaq nazirliyə aparılıb. Orada ona ya təkliflə razılaşmalı olduğu, ya da pis nəticələrlə qarşılaşacağı bildirilmişdir. Lakin, Elçin Hümbətov yenə də razılaşmayıb və onlara "Məni öldürsəniz də, sizə iş verməyəcəyəm" deyib. Bunun ardınca, polislər ona ağır işgəncələr verib. Axşam saatlarında isə, Elçin Hümbətov məhkəməyə aparılaraq 300 manat cərimə edilib, lakin cərimənin səbəbini heç bir şəkildə öyrənə bilməyib.
Ancaq, polislər yenə də ondan əl çəkməyiblər. Evə buraxıldıqdan sonra, səhər saatlarında polislər onun maşınına əl qoyub, cərimə meydançasına aparıblar. Maşını geri almaq üçün isə ondan 2 min manat rüşvət tələb ediblər. Polislər ona bildirib ki, ya işverənlik təklifini qəbul etməli, ya da 2 min manat verməli, ya da cibinə narkotik atıb həbs edəcəklər. Elçin Hümbətov isə, şərlənərək həbs ediləcəyindən qorxub, Türkiyəyə qaçmışdı.

Azərbaycan Dövlət Neft Akademiyasında (ADNA) (Azərbaycan Dövlət Neft və Sənaye Universiteti – red.) törədilən terror hadisəsindən 16 il ötür.

Globalinfo.az xatırladır ki, 2009-cu il aprelin 30-da səhər saatlarında ADNA-nın Bakı şəhəri Dilarə Əliyeva küçəsi, 227 ünvanında yerləşən ikinci korpusuna daxil olan Gürcüstan vətəndaşı, 1980-ci il təvəllüdlü Fərda Qədirov binanın birinci mərtəbəsindən altıncı mərtəbəsinədək qarşısına çıxan şəxslərə “Makarov” tipli tapançadan atəş açıb.

F.Qədirov hadisə zamanı 12 nəfəri öldürüb, 13 nəfəri yaralayıb. Sonra özünü də öldürüb.

Milli Məclisin deputatı Arzu Nağıyev deyib ki, həmin terror aktından artıq 16 il ötür:

“Azərbaycan dövləti terror aktı nəticəsində həyatını itirən və yaralanan şəxslərin ailələrinə müvafiq maddi yardımlar ayırdı. Prezident İlham Əliyevin birbaşa göstərişi ilə bu məsələ nəzarətə götürüldü. Hadisəni törədən cinayətkar Fərda Qədirov Gürcüstan əsilli azərbaycanlı idi. Əməliyyat-axtarış tədbirləri nəticəsində məlum oldu ki, bu qətl sifarişli şəkildə həyata keçirilib. Respublika Baş Prokurorluğu, Daxili İşlər Nazirliyi və xüsusi xidmət orqanlarının birgə fəaliyyəti nəticəsində cinayətin sifarişçisinin Gürcüstan vətəndaşı, erməni əsilli Mardun Qumaşyan olduğu müəyyənləşib və ona qarşı “İnterpol” xətti ilə beynəlxalq axtarış elan olunub”.

Deputat onu da əlavə edib ki, bu iş üzrə 2010-cu il avqustun 10-da Ağır Cinayətlərə Dair İşlər üzrə Məhkəmənin qərarı ilə cinayətdə əli olan bir neçə şəxs Cavidan Əmirov, Nadir Əliyev, Arif Qabulov və Nəcəf Süleymanov cəzalandırılıb:

“Hesab edirəm ki, bu sifariş Ermənistan tərəfindən verilib. Təqsirli şəxslər qanun qarşısında cavab verməli və cəzalandırılmalıdır. Bu cür terror hadisələri yalnız fərdi qətllər deyil, eyni zamanda dövlətçiliyə və cəmiyyətin sabitliyinə qarşı yönəlmiş ciddi təhlükələrdir”.

Politoloq Oqtay Qasımov isə bildirib ki, ADNA-da baş vermiş hadisə Azərbaycan xalqını dərin şəkildə sarsıdıb:

“Terrorçu manyak soyuqqanlı şəkildə tələbələri qətlə yetirdi. İstintaqın təfərrüatları barədə danışmaq çətindir, lakin ümumi məlumata əsasən, onun Gürcüstanda ermənilərlə əlaqələrinin olduğu ehtimal olunur. Bu terror aktı xaricdən verilmiş sifariş əsasında həyata keçirilmişdi və məqsəd Azərbaycan cəmiyyətində qorxu yaratmaq, xaos və qeyri-sabitlik törətmək idi. Ancaq bu çirkin planlar nəticə vermədi. Cinayətin arxasında konkret olaraq hansı ölkənin dayandığını dəqiq söyləmək indiki mərhələdə çətin olsa da, ehtimallar əsasən Ermənistan və onun havadarlarına yönəlir”.