"Oralarda necədir?" rubrikasının yeni buraxılışı yayımlanıb.

Bu dəfə Bakıdan 3 518 kilometr uzaqlıqda yerləşən, özünəməxsus adətləri, dili və təbiəti olan Himalay dağ silsiləsi ilə əhatələnən Nepal və onun paytaxtı Katmandudan bəhs olunub.

Katmandu təhlükəsiz şəhər hesab olunur. Ən böyük problemləri isə rüşvətxorluqdur. Maaşlar az olduğuna görə hər kəs daha çox pul qazanmaq üçün rüşvət alır. Amma bu amil ruhən təmizlənmək üçün bura gələn turistlərin sayını azaltmır.

Nepallılar dindardırlar. Onların hətta canlı və müqəddəs hesab etdikləri, 5 yaşındakı Kumari adlanan ilahələri var.

Kumari ilahəsi olan balaca qız məbəddə ailəsi ilə birlikdə yaşayır və o, bütün günü orada oturur.

Kumari ilahəsi vəzifəsini yerinə yetirəcək balaca qızlar ciddi müsabiqə əsasında seçilirlər. Katmandu əhalisi inanır ki, seçilən qızın daxilində müqəddəs ruh məskən salıb. Balaca müqəddəslər cinsi yetkinliyə çatana qədər Kumari ilahəsi statusuna malik olurlar. Daha sonra isə bunun üçün yeni müsabiqə elan olunur. Amma bu müsabiqə yalnız xüsusi kasta nümayəndəsi olan kiçik qızlar arasında keçirilir.

Kumari ilahəsi seçilmək üçün balaca qızlar 32 parametrə cavab verməlidirlər. Məsələn, kirpikləri inəkdəki kimi uzun olmalı, bütün süd dişləri yerində olmalı və qaranlıq otaqda səssiz oturmalıdırlar. Namizədlərdən kim daha çox qaranlıq otaqda qala bilsə, o da Kumari ilahəsi adını qazanır.

Adi və kasıb nepallı balaca qız bir anda ilahə olur və hər kəs ona ibadət edir. Qayğısız keçən bir neçə il xalqın sevgisini hiss edirlər. Vaxtı çatanda isə məbədi tərk edib adi həyata qayıdırlar. Bu, onlar üçün asan olmur.

Nepalda ölməyə həyatın sonu kimi baxmırlar. Bu, yeni həyatın başlanğıcıdır. Yenidən dünyaya gəlmək üçün xüsusi ritualdan keçmək lazımdır.

Katmandudakı məşhur Paşupatinakh məbədindəki krematoriyada dünyasını dəyişən insanı doğmalarının gözü önündə yandırırlar. Katmandu əhalisinin, bəlkə də, hamısı o biri həyatlarına burada bu ritual vasitəsilə keçid etməyi arzulayır. Amma bu, hər kəsə nəsib olmur.

Kremasiya 132 dollar, yəni 224 manat təşkil edir. Buna pulu çatmayanlar 40 dollara, yəni 68 manata elektrikli krematoriyaya müraciət edirlər. Ritual ümumilikdə dörd saat çəkir. Üç saat ərzində dünyasını dəyişən insan külə dönür və bu kül çaya səpilir. Çay isə onu müqəddəs hesab edən Qanq çayına axıdır. İnanca görə, bu an ruh yenidən dünyaya gəlir.

Ətraflı Baku TV-nin süjetində:

Bakıda xəstəxanaların birində USM müayinədən dərhal sonra əməliyyata alınan qadının yumurtalığı nəhəng kistlə birgə çıxarılıb.
Bakupost.az xəbər verir ki, USM mütəxəssisi Nazir Allahverdi pasiyentdən çıxarılmış nəhəng yumurtalığı göstərib.
“Total histereskopiya əməliyyatı ilə xaric edilmiş sol yumurtalığın böyük ölçülü kistin içərisində solid komponentlər görünür. Kistanın ölçüsü 20 sm-i keçirdi. Kist histoloji analizə göndərilib”.

“Mən efir adamıyam. 28 ildir Azərbaycan mediasına, dövlətinə, xalqına, millətinə alnıaçıq, üzüağ xidmət edən jurnalistəm, aparıcıyam. Televiziya aparıcısı əlbəttə ki, televiziyada olmalıdır. Nəhayət ki, mən də qayıtdım”

Bunu Moderator.az -a açıqlamasında tanınmış teleaparıcı Aytən Səfərova deyib. O daha sonra bildirib ki, baş verən avtomobil qəzasında o günahkar deyil.

“İşimlə bağlı istintaq hələ ki, davam edir. Azərbaycanın hüquq-mühafizə orqanlarının bu məsələdə obyektiv qərar çıxaracağına inanıram. Kadrlar var. Kadrlarda da hər şey görünür. Allah qoysa o kadrlar ictimailəşəndə hamı gör deyəəcək və biləcək ki, mənim orada heç bir günahım yoxdur” deyə aparıcı bildirib.
Aytən Səfərova övladlarından da danışıb.

“Balaca oğlun Nizami 1-ci sinfə getdi. Ortancıl oğlum artıq 4-cü sinif şagirdidir. Qızım da 2-ci kurs tələbəsidir. Gələcəyin psixoloqudur. Kliniki psixologiya ixtisasında təhsil alır. Gələcəkdə Azərbaycanda hüquq-mühafizə orqanlarında psixoloq kimi çalışmaq istəyir. İnşallah, təki elə də olsun. 4-cü sinifdə oxuyan oğlum polis olmaq istəyir. Mən elə bilirdim ki, bu sadəcə bir həvəsdir, görürəm ki, yox israrlıdır. Balaca oğlum da hələ heç bilmir məktəb nədir?” deyə aparıcı bildirib.

Kamala Harris və Donald Tramp arasında ABŞ prezidentliyi uğrunda yarışı gərgin olaraq qalır. Lakin Harrisin kişilərdən daha yüksək nisbətdə səs verən qadınlar arasında əhəmiyyətli bir üstünlüyü var. Harrisin yarışa gec daxil olması siyasi partiyalar arasında gender fərqini genişləndirib

1984-cü ildən bəri ABŞ-da keçirilən prezident seçkilərində kişilərdən daha çox qadınlar səs verir. Onların əksəriyyəti Respublikaçılardan daha çox demokratları dəstəkləyir. Vitse-prezident Kamala Harrisin prezident Co Baydenin iyul ayında geri çəkilməsindən sonra yarışa qəfil daxil olması bu səsvermə blokunu daha da ruhlandırıb.

"Bir çox fərqli demoqrafik göstəricilər arasında olduqca əhəmiyyətli bir dəyişiklik gördük, bu, xüsusən də Bayden olduğu vaxtdan daha çox Demokrat namizədə səsvermə ehtimalı olan qadınlarla gəlib" Cook siyasi hesabatın əməkdaşı Erin Kovi deyib.

Bu seçki ilində təxminən hər beş qadından biri abort hüquqlarının onların əsas problemi olduğunu deyir. 2022-ci ildə o vaxtkı prezident Donald Tramp tərəfindən irəli sürülən Ali Məhkəmənin hakimləri abortla bağlı konstitusiya hüquqlarının aradan qaldırılmasına yardım edib.

Tramp abort qanunlarına hər bir ştatın özünün qərar verməsini istəyir. Harris bütün ölkədə reproduktiv azadlığı qorumaq üçün federal qanunların tərəfdarıdır . Buna görə də bu seçicilər Harrisi dəstəklədiklərini deyirlər.

"O, insanların öz qərarları, bədənləri, seçimləri ilə bağlı hüquqlarının olduğu bir dünya yaratmağa çalışır. Qadın hüquqları", viskonsinli Klo Lonqmayr bildirib.

“Onun insanlar üçün mesajını bəyənirəm - bu, mənim olduğum orta sinif üçündür. Qadınların hüquqları ilə bağlı qanunlar”, Arizona seçicisi Letişa Qullen deyib.

Qadın seçicilər arasında ən son sorğular Harrisin Trampdan 9-13 faizlə irəlilədə olduğunu göstərir.

"O, namizədliyi ilə həqiqətən həyəcanlanan müstəqil, 50 yaşdan aşağı, bir çoxu 40-dan aşağı olan gənc qadın seçici qazanıb" - deyə, FM3-də sorğu təşkilatından Pol Maslin bildirib.

“Qaradərili qadınların indi Harrisə səs vermə ehtimalı daha çoxdur. İspan qadınlar. Beləliklə, onun bu xüsusi irqi və ya təhsil demoqrafiyaları ilə daha yaxşı işlədiyini gördüyümüz kimi, biz bu dəyişikliyin həqiqətən qadınlardan gəldiyini görürürk”, Erin Kovi deyib.

Corciya və Montanadan Tramp tərəfdarları isə…

"Birincisi, onun namizəd olması mənim üçün dəhşətdir, çünki ilk növbədə, o, prezident olmağa hazır deyil" Corciya seçicisi T. Stanli deyib.

“Kamala Harris birdən Demokratlar Partiyasının namizədi oldu, amma o, heç vaxt namizədliyini irəli sürməyəcəkdi. O, birdən-birə ortaya çıxdı”, Montana seçicisi Aleks Lastiq bildirib.

Meredit Kollecindən David MakLennanın dediyinə görə, 27 yaşdan aşağı kişilərin əksəriyyəti Trampa üstünlük verir.

"Bəzi Gen Z gəncləri arasında təkəbbürə heyranlıq baxımından artım var."

MakLennan deyir ki, gənc kişilər onlayn mənbələr tərəfindən siyasi cəhətdən ictimailəşirlər, burada onlar tez-tez qadın liderlər haqqında xoşagəlməz fikirlər görür və eşidirlər.

"Onlar inanırlar ki, əgər Birləşmiş Ştatlar müharibə etsə və ya beynəlxalq böhranla üzləşsə, qadınlar sərt qərarlar verə bilməz. Onlar qadınların qətiyyət, sərt çağırış etmək qabiliyyətinə malik olduğuna inanmırlar."

Ağdərili qadınlar 2016-cı ildə Trampın qələbəsinin açarı olmuşdu. O, 2020-ci ildə də ağdərili qadınların əksəriyyətinin səsini qazanmışdı.

Bu yarışda isə son sorğular Harris və Trampın ağ qadınlar arasında statistik baxımdan bərabər olduğunu göstərir.

Bu günlərdə mətbuatda dərc edilən məlumata görə, uzun illər Ailə, Qadın və Uşaq Məsələləri Üzrə Dövlət Komitəsinin sədri olmuş, hazırda isə yenidən deputat edilən Hicran Hüseynova uzaq Fransada, dəniz sahilində istirahət kompleksi tikdirir. Xəbərdə deyilir ki, H.Hüseynova və bacısı dəniz sahilindəki 5 milyon avroluq villanı sökdürərək, yerində öz yeni obyektini inşa etdirir.

Xəbərin yayılmasından bir həftəyə yaxın vaxt keçsə də, məmur-deputat xanım Hüseynova onu nə təsdiq, nə də təkzib edir. Susur. Azərbaycanda isə susmaq təkcə razılıq deyil, həm də saymazlıq, arxayınlıq, özündənrazılıq əlamətidir ki, bunun da tez-tez bizim bir çox “toxunulmaz” iri məmurlarımızın, nazirlərimizin, deputatlarımızın ifasında müşahidə edirik.

O da sirr deyil ki, bu adamları cəmiyyət, dövlət qarşısında hesabat vermək məsuliyyətindən azad edən hökumətdəki mövqeləri, əlaqələri və bütün bunların sayəsində topladıqları sərvət, var-dövlətdir...

Azərbaycanda sanballı varidat sahibi, hətta bəzilərinin “oliqarx” adlandırdıqları (əslində, oliqarx termini daha geniş mənaya malikdir) zərif cinsin nümayəndələri az deyil. Onları birləşdirən ümumi cəhət nadir hallarda özlərinin, əksər hallarda isə ərlərinin yüksək, gəlirli vəzifə sahibləri olması, onlar üçün büdcə vəsaitlərinin, ölkə sərvətlərinin əlçatanlığıdır...

Bu günlərdə Azərbaycanın pullarının talanması üzrə “ulduz” simalardan biri – Beynəlxalq Bankın keçmiş sədri Cahangir Hacıyevin xanımı Zamirə Hacıyevanın da ətrafında həm yerli, həm də xarici mətbuatda müxtəlif məlumatlar dolaşır. Britaniya məhkəməsi gah onun on milyonlarla dollarlıq əmlaklarını, bank hesablarını, qızıl-zinət əşyalarını müsadirə edir, gah qızıllarını qaytarır, gah qaytarmır, gah o məhkəmə-bu məhkəmə süründürür və sair.
Ortalıqda uçuşan on milyonlar, yüz milyonlar isə Azərbaycanın, sosial müavinətə möhtac qoyulan Azərbaycan vətəndaşının boğazından kəsilən, oğurlanan, talanan sərvətləridir.

Daha bir “oliqarx” xanım AZAL-ın sabiq prezidenti Cahangir Əsgərovun həyat yoldaşı Zərifə Əsgərova sayıla bilər. Rəsmən iş adamı hesab edilən, "Gazelli Group"-un sahibi, “Caspian Energy Club”ın İdarə Heyətinin üzvü və s. adlar daşıyan Z.Əsgərovanın 100 milyonlarla hesablanan kapitalının əsasını ərinin “qazandığı” pulların təşkil etdiyi çətin ki, kimdəsə şübhə doğurur.

Həmçinin, bu ailənin şirkətlərinin Gürcüstanda və digər xarici ölkələrdə tikintidən tutmuş bir çox digər sahələrə on milyonlar, yüz milyonlarla pul yatırdığına dair dəfələrlə məlumatlar yayılıb, sənədlər, sübutlar təqdim olunub.

Yaxud, olsun Milli Məclisin sabiq sədri Oqtay Əsədovun xanımı Zemfira Əsədovanın “biznesi”. Rusiyada onun adına “Arizarum Qrup” adlı şirkət yaradılıb. Eyni zamanda da Nizami rayonunda yerləşən 175 saylı Körpələr evi-uşaq bağçasının müdiri olan bu xanımın Rusiyadakı böyük biznesi necə idarə etdiyi “heyrət doğurur”.

3 il əvvəl mətbuatda gedən məlumatlardan aydın oldu ki, Zemfira Əsədova həm də Moskvanın Bakı küçəsində yerləşən striptiz kluba sahibdir. Hətta Moskva polisinin “Kapriz” adlı həmin klubda narkotik alverinə qarşı xüsusi əməliyyat keçirdiyi də bildirildi. Bu klub Z.Əsədovanın adına olan “Arizarum Qrup”-un balansında olub. Həmçinin, ailənin Rusiya paytaxtında, Türkiyədə, Böyük Britaniyada, Almaniyada və s. ölkələrdə hər biri on milyonlarla ölçülən mülkləri, biznesləri barədə məlumatlar var.

Müvafiq dövlət qurumlarından heç kim yuxarıda sadaladığımız və sadalamadığımız bu cür “işgüzar” ailələrdən malik olduqları yüz milyonların mənbəyini soruşmayıb, onlara “gözün üstə qaşın var” deyən olmayıb – sanki belə də olmalı imiş...

İlkin kapitalı, “mayası” məmur ərlərinin bu millətdən taladığı pullar hesabına formalaşan “business women”-lərin siyahısını uzatdıqca uzatmaq olar. Bunları birləşdirən əsas amillərdən biri də ərlərinin, bəzi hallarda isə özlərinin(Hicran Hüseynova kimi-red.) burada “qazandıqları”nı xaricə daşımalarıdır. Bir sözlə, kişili-arvadlı - daşıyan-daşıyanadır...

Görünən həm də odur ki, iş pula, talançılığa, acgözlüyə, haramçılığa, tamahkarlığa gələndə bəzi xanımlarımız kişilərdən geri qalmır, hətta onları üstələyir...

Əlbəttə, hər bir ölkədə qadın iş adamlarının, milyonçuların olması yaxşı haldır. Bu, həmin cəmiyyətlərin inkişafından, müasirləşməsindən, hətta çiçəklənməsindən xəbər verir. Amma nə yazıq ki, bizim qadın milyonçularımız, “business women”-lərimiz də bu ölkədəki bir çox adlar, statuslar kimi süni və saxtadır...

Yəqin ki, nə vaxtsa Azərbaycanda da real, halal iş adamı olan qadınlar yetişəcək(Bəlkə də hazırda tək-tük də olsa belələri var). Ancaq bu, yalnız gerçək, monopoliyasız, məmur biznesinin at oynatmadığı, rüşvətsiz, azad bazar iqtisadiyyatı, normal gömrük-vergi sistemi, əlçatan bank sektoru, ədalətli məhkəmə, şəffaf hüquq-mühafizə sistemi və s. olanda olacaq. Azərbaycanda isə bütün bunları nə zaman görəcəyimizi nəinki siyasətçilər, ictimai xadimlər, iqtisadçılar, digər mütəxəssislər və sair, hətta bəzi xanımlarımızın tez-tez baş çəkdiyi falçılar da bilmir...

Cəlal Məmmədov

“AzPolitika.info”

Hüquq müdafiəçisi Novella Cəfəroğlu Müsavat Partiyasından istefa verməsi ilə bağlı bəyanatla çıxış edib.

Pravda.az-a daxil olan bəyanatda deyilir:

“Bu gün Müsavat Partiyasına istefamı göndərdim. İsa Qəmbər məktubumu aldı. 100% əminəm ki, istefamı qəbul edəcəklər. Bilirsiniz ki, Müsavat böyük bir partiyadır. Mənim üzümdən bir neçə dəfə belə məsələlər olub. Ayrı mövqedə olan insan deyiləm. Müsavatçıyam, müsavatçı da qalacağam. Bu, babalarımdan gələn hissdir. Naxçıvanda hələ o zamanlar Müsavatın yaranmasında babam Mirzalı bəy Bəktaşinin böyük iştirakı olub. Ailəmiz həmişə Müsavata sadiq qalıb. Bu gün mən Müsavat Partiyasından gedirəm, lakin Müsavatın ideyaları həmişə qəlbimdədir, hamısı mənimlədir. Müsavatda çoxlu dostlarım, qardaşlarım var. Onlarla bir yerdəyəm. Nə vaxt lazımdırsa, həmişə onların yanındayam. Amma bu gün dediyim iki sözdən ötrü Müsavatı tənqid edirlər, onlara təzyiq göstərirlər. Partiyanın güclü olmasını istədim, mənə görə təzyiq altında qalmasını istəmədim. Buna görə də istefa verdim. İstəyirəm ki, Müsavat güclü partiya kimi qalsın. Mən dövlətin yanındayam, dövləti qoruyuram. Mən bu gün milli barışıq istəyirəm. Millətlə birgə, hamımızın birlikdə olmasını istəyirəm. Dörd tərəfdən düşməni olan ölkənin qorunmasını istəyirəm. Azərbaycana xələl gətirməyən məsələlərdə həmişə, axıra qədər dövlətin yanında olacağam. Çox sual verirlər ki, sən YAP-a keçəcəksən? Yox, mənim özüm bir partiyayam. Heç bir partiyaya getmək istəyim yoxdur. Lazım olsa, partiya yarada bilərəm. Bu mənim üçün böyük iş deyil. Çox yaşım olmasına baxmayaraq... Xeyli sayda qadınlar deyirlər ki, partiya yaradaq, sənin yanındayıq. İşləyə bilirəm, sözümü deyə, çatdıra bilirəm. Həm burada, həm də beynəlxalq təşkilatlara. Yanımda güclü dostlarım, tərəfdaşlarım var. Mən heç nədən qorxmuram. İstəyərdim ki, Azərbaycanda iki böyük partiya olsun. Təbii ki, kiçik partiyaların da olması vacibdir. Amma iki güclü partiya olsun ki, rəqabəti də onlar aparsınlar. 30 ildir, Müsavatdakı dostlarımın yanındayam. Çox söz deyə bilərəm, demirəm. Dostlarıma böyük hörmətim var. Onlar da məni dəstəkləyirlər. Zəng edirlər, dəstək üçün yanımda durublar. Buna görə də Müsavata işlərində uğurlar arzulayıram. Bir sözlə, bundan sonra Müsavatda olmasam da, Müsavatın da yanındayam. Mən çox sərbəst insanam. Dövlətimi isə dəlicəsinə sevirəm. Bütün partiyalardan da, hər şeydən də başda dövlətimi sevirəm. Dövlətin uğrunda da mübarizəmi aparacağam. Nə söz lazımdırsa, deyəcəyəm. “Demokratik” demək lazımdırsa, deyəcəyəm. Çünki mən dövləti qoruyuram. Məni vurmurlar ki, Müsavatı vururlar. Məni hədəf kimi götürüblər. Baş verənlər Müsavata qarşıdır, mənə yox. Bunu hamınız gözəl bilirsiniz. Deyirlər ki, İsa Qəmbər Novella Cəfəroğlunun dostudur, amma o, partiya rəhbərliyinə qayıtdıqdan sonra Novella Cəfəroğluya basqı etdilər. Yalan sözdür. İsa Qəmbər də, Arif Hacılı da mənim dostumdur, yaxın qardaşlarımdır. Heç vaxt onlardan imtina etməmişəm, etmərəm də. Dostlarından imtina edəcək insan deyiləm. Yüz adam yüz söz deyir. Bu, sadəcə, mənim əlimlə Müsavatı vurmaqdır. Mən isə Müsavatın mənim əlimlə vurulmasını istəmirəm. İstefa məktubumdan sonra İsa bəylə danışmışam. Dedi ki, bizim üçün çətin olsa da, istefanı qəbul edəcəyik. Yenə deyirəm, Müsavatdan ötrü istefa vermişəm ki, partiyaya söz gəlməsin. Dövlət naminə hər şeydən imtina edə bilərəm. Təki dövlətim, millətim bir olsun. Millətim bir-biri ilə savaş etməsin. Bir-biri ilə danışmağa dil tapsın. Nifaq olmasın. Həm hökumətdən, həm siyasi partiyalardan da bu addımı gözləyirəm. Bir-biriləri ilə dostluq etsinlər. Bir-birinizi başa düşün. Sentyabrın 1-də keçirilən seçkilərlə bağlı hansı dairələrdə narazılıqlar, pozuntular ortaya çıxıbsa, mübahisələndirəcəyik. Sözsüz ki, təkcə Müsavatda yox, bütün partiyalarda olan haqsızlıqları müdafiə edəcəyəm. Parlamentdə oturmaqdansa, dövləti qorumaq mənim üçün hər şeydən vacibdir. Dövlət üçün nə lazımdırsa, həmişə edəcəyəm! Hər şeyə görə çox sağolun, hamınıza minnətdaram”.

Şahzadə Uilyam həyat yoldaşı Keyt Middltonun xərçəng müalicəsini başa vurmasından danışıb.

Onun sözlərini “Daily Mail” sitat gətirir.

Sentyabrın 10-da Şahzadə Uilyam Llanellidəki İsveçrədəki Lianvell məktəbində görünüb. Jurnalistlərin məlumatına görə, yerli sakinlərdən ibarət izdiham təhsil ocağının yaxınlığında kral ailəsinin üzvünü gözləyirmiş.

Şahzadə Uilyam Keyt Middltonun pərəstişkarlarından açıqcalar toplayıb və onları həyat yoldaşına çatdıracağına söz verib.

Sentyabrın 9-da Keyt Middlton xərçəng xəstəliyinin müalicəsini başa vurduğunu açıqlayıb. Şahzadə Uilyamın həyat yoldaşı bildirib ki, son doqquz ay həm onun özü, həm də kral ailəsi üçün inanılmaz dərəcədə çətin dövr olub. Uels şahzadəsi qeyd edib ki, o, hazırda mümkün qədər uzun müddət remissiyada qalmasını təmin etməyə diqqət yetirir. Middlton onu da vurğulayıb ki, kimyaterapiyanın bitməsinə baxmayaraq, onun sağalması üçün gediləsi uzun yol var.

Uels şahzadəsi kimyaterapiyanın ilkin mərhələlərini keçdiyini mart ayında açıqlayıb. Middlton bu il heç bir tədbirə qatılmayıb. İyunun 15-də o, uzun müddət sonra ilk dəfə ictimaiyyətə çıxıb.

Azərbaycan Beynəlxalq Bankının keçmiş rəhbəri Cahangir Hacıyevin həyat yoldaşı Zamirə Hacıyevanın milyonlarla dollarlıq qızıl-zinət əşyaları və mülklərinin müsadirə olunması ilə bağlı məhkəmə işi davam edir.

Böyük Britaniyanın Milli Cinayət Agentliyi (NCA-National Crime Agency) Zamirə Hacıyevanın qanunsuz yolla əldə etdiyi deyilən zinət əşyalarının böyük qisminin qaytarılması barədə qərar qəbul edib.

Məlumat üçün deyək ki, NCA Zamirə Hacıyevanın Londonun məşhur “Harrods” univermağında qızıl-zinət əşyaları da daxil olmaqla alış-verişə 16 milyon funt sterlinqdən çox məbləğ xərclədiyini üzə çıxardıqdan sonra məsələ ilə bağlı araşdırma açılmışdı.

Nəşrin xəbərinə görə, indi Zamirə Hacıyevanın həmin qızıl-zinət əşyalarını qanuni vəsait hesabına aldığı öz təsdiqini tapdığı üçün onların sahibinə qaytarılacağı rəsmiləşib.

Onu da deyək ki, Zamirə Hacıyeva agentliyin mülklərinə qoymaq istədiyi müsadirə tələbi ilə ötən ay razılaşıb. Buraya onun Naytsbrikdəki 14 milyon funt sterlinq dəyərindəki malikanəsi və Berkşirdəki qolf klubu daxildir.

Məhkəmənin qərarına görə, hər iki əmlak çirkli pulların yuyulması nəticəsində satın alınıb.

Zamirə Hacıyeva isə öz növbəsində müsadirə qərarı ilə razılaşsa da, iddiaları təkzib edib.

Onun ərinin sərvətinin qeyri-qanuni mənbəyi barədə hər hansı məlumatı olub-olmaması barədə isə heç bir nəticə əldə olunmayıb.

Yazıda o da qeyd olunub ki, sözügedən məsələlərlə bağlı işin icrasının bu ay davam etdirilməsi nəzərdə tutulsa da, NCA bu prosesi də açıqlanmayan sövdələşmə əsasında dayandırdığını bəyan edib.

Nəşr aydınlaşdırıb ki, qərarla Hacıyevanın mülklərinin və dəbdəbəli daş-qaşlarının 30 faizlik hissəsi müsadirədən uzaqlaşdırılaraq, onun şəxsi aktivlərinə geri qaytarılacaq.

Sözügedən zinət əşyalarının dəyəri təxminən 10 milyon funt-sterlinqdən artıq qiymətləndirilib.

NCA-nın sərvət dəyərindəki qiymətli zinət əşyaları ilə bağlı bu qərarı araşdırma işlərinin əsas amillərə yönəldiləcəyi ilə əlaqələndirilib.

Buna baxmayaraq, yerli anti-korrupsiyaçılar qərarı risk kimi gördüklərini dilə gətiriblər.

Qeyd edək ki, 60 yaşlı Z. Hacıyeva Böyük Britaniyada çirkli pulları hədəf alan “McMafia” qanunvericiliyinə görə məsuliyyətə cəlb olunan ilk xarici vətəndaş və qadın olub. O bu ölkədə ilk dəfə tətbiq edilən “İzahedilməz Sərvət Sərəncamı” (UWO) çərçivəsində 2018-ci ilin noyabrın 6-da London polisi tərəfindən həbs olunmuş, 2 gün sonra sərbəst buraxılmışdı.


Redaktor.az