Azərbaycanda hansı aktyorun həyatına baxırsan, ya özündən soruşursan, o dəqiqə dediyi bir söz var:

“Teatrda qalırdım”.

Əlbəttə, ola bilər. Müxtəlif səbəblərdən baş verə bilər belə şey. Onsuz da, sənət adamlarının imkanı yaxşı olmur. Amma məsələn, arvadı evdən qovub deyə teatrda qalan aktyor da gərək bundan özünə bioqrafiya düzəltməsin. Təəssüf ki, Azərbaycan aktyorları arasında belələri də var.

Eşitdiyimə görə, Hacıbaba Bağırovun da imkansızlıqdan teatrda qaldığı dövrlər olub.

Hacıbaba Bağırov, əslində, film kimi həyatı yaşayıb. Ancaq mən onu heç vaxt filmə yaraşdırmamışam. Beş dəfə evli olan Hacıbaba Bağırov insan kimi kefqom adam idi.

Bəs sənətkar kimi?

Ümumiyyətlə, mənə elə gəlir ki, sənət adamı vəzifə üstündə dəridən-qabıqdan çıxırsa, sənətini vəzifəyə alət edirsə, o, heç vaxt böyük ola bilməz.

Hacıbaba Bağırovun da belə hadisəsi olub.

Uzun illər dost olduğu Siyavuş Aslanla küsülü olublar. Onların mübahisəsi nə üstə olsa yaxşıdır? Heç nə. Musiqili Komediya teatrında direktorluq vəzifəsi üstündə. Başa düşmək olmur ki, iki sənət adamı bir-birini vəzifə üstündə niyə qırır? Buna görə də küsülümü qalmaq olar?

Dava isə belə sonlanıb: bir müddət sonra Hacıbaba Bağırov direktor olub, Siyavuş Aslan bədii rəhbər.

Elə bu, sənətin də sonlanmağı deməkdir.

Az qala bütün aktyorlar teatrda qaldığı kimi, bütün komediya aktyorları haqqında deyilən bir söz də budur:

“Həyatda çox ciddi adam idi”

Ə, di bəsdi də. Bezdirdiniz, vallah. Həyatda da gülməli olanda nə olacaq ki? Ümumiyyətlə, belə bir yalan nəyə lazımdır? Bunun bir səbəbi odur ki, bizdə gülüş hələ də ikinci dərəcəli sənət sayılır. Adamlar özləri də bunu ciddi qəbul etmir. Yumor və yüngüllük arasındakı fərqi bilmir. Guya adam səhnədə güldürürsə, evdə mütləq kədərli olmalıdır ki, balans qorunsun. Sanki gülüş günahdır, onu yumaq üçün şəxsi həyatında əzab çəkməlisən. Halbuki dünyanın ən böyük komediya ustalarının çoxu həyatda da zarafatcıl idi, yumorla düşünürdü, ironiyanı həyat tərzinə çevirmişdi.

Biz isə komediyaçını ciddi göstərməklə onu “böyütməyə” çalışırıq. Bu da bir növ kompleksdir: gülən adamı ciddi göstərməsək, guya hörmət etməyəcəyik. Bu isə həm də onun səhnədəki rollarının süniliyini göstərir.

Yaxud başqa cür:

“Çox istedadlı idi, amma dəyəri bilinmədi”.

Ömrü boyu eyni ampluada oynayan, bir obrazı yüz dəfə təkrar edib, özünü yeniləyə bilməyən adamın qədri hansı formada bilinməlidir ki?

Ümumiyyətlə, Hacıbaba Bağırov bəzi rollarını ortabab oynayıb. Ancaq heç vaxt rolunu yaşamayıb.

İnsanların yaddaşında daha çox bu söz qalıb:

“Nə istəyirsən, edim səninçün? İstəyirsən lap texnikoma girim, bazarı bağlatdırım”.

Düzü, dəfələrlə baxsam da, hələ də bu sözlərdə böyük bir şey görməmişəm. O qədər məhəlli səviyyədədir ki, adamların da yadında ancaq belə şeylər qalır. Ümumiyyətlə, onun bircə ciddi rolu da olmayıb. Hansı var? Kim deyə bilər? Hansı bir ciddi əsərdə möhürünü vura bilib?

Diqqət edin, adamlar da onun haha-hihi ilə tanıyıblar. Sənətində vurğulamağa o qədər bir şey yoxdur, haqqında hər yerdə də yazırlar ki, bəs bəy nəslindən olub, səliqəli geyinib. Ay başına dönüm, adam səliqəli geyinər də. Bunun bəy nəslinə nə dəxli var? Guya hansı aktyorumuz cında geyinib ki? Hətta dərinə getsək, burda da problem tapmaq olar. Məsələn, Hacıbaba Bağırov çox ağappağ kostyum geyinirdi. Başdan ayağa ağ geyinmək nə vaxtdan zövq olub? Adam belə geyimə baxanda da əsəbiləşir.

Bir sözlə, Hacıbaba Bağırovun komediya formatında bir ciddi rolu da yoxdur ki, baxanda deyək, hə, bax bu, əsl performansdır, sənətkar oyunudur. Olsaydı, heç nə ifadə etməyən, tamaşaçıya heç nə deməyən rollarından biri olan Şirbala obrazı şişirdilməzdi.

O cümlədən Mitoşbala, Sonqulu, Məmmədəli və digər bir sıra obrazları da.

Orxan Saffari
Gununsesi.info

“Televiziyada dil siyasəti institusional səviyyədə gücləndirilməlidir”.

Gununsesi.info bildirir ki, bu fikirləri deputat Fazil Mustafa Milli Məclisin iclasında deyib:

“Bu, sadəcə tövsiyə xarakterli çağırışlarla deyil, aydın mexanizmlər, daimi monitorinq və peşəkar dil redaktəsi sistemi ilə təmin olunmalıdır”.

Fazil Mustafa hesab edir ki, aparıcıların, şərhçilərin və ekspertlərin dil hazırlığına xüsusi önəm verilməlidir.

Deputat hesab edir ki, zərurət yarandığı halda, maliyyə vəsaiti ayrılaraq onların xüsusi kurslara göndərilməsi, vaxtaşırı təlimlərdə iştirakının təmin edilməsi vacibdir:

“Bu, onların daha bilikli və hazırlıqlı olmasına xidmət edər. İctimai Televiziya bu sahədə digər televiziya kanalları üçün nümunə rolunu oynamalıdır. Çünki İctimai TV AZTV ilə birlikdə dilin, etik davranışın və mədəni təqdimatın standartlarını müəyyənləşdirən əsas platformalardan biri sayıla bilər.

Ümid edirəm ki, İctimai TV-nin Yayım Şurasının yeni və əvvəlki üzvləri, eləcə də Audiovizual Şura başda olmaqla, ümumilikdə televiziya sahəsində fəaliyyət göstərən qurumlar və şəxslər bu məsuliyyəti dərindən dərk edəcəklər. Azərbaycan dilinin televiziya məkanında qorunması və inkişafı üçün prinsipial mövqe ortaya qoyulacaq”.

Şəbnəm

Gununsesi.info

Bu gün – 2 fevral Azərbaycanda Gənclər Günüdür.

Gununsesi.info xəbər verir ki, 1997-ci ildən 2 fevral tarixi ölkəmizdə Gənclər Günü kimi qeyd olunur.

2 feval tarixinin Gənclər Günü kimi elan olunması Ulu Öndər Heydər Əliyevin adı ilə bağlıdır. Ulu Öndərin hakimiyyətə ikinci dəfə qayıdışından sonra Azərbaycanda dövlət gənclər siyasətinin əsas qoyulub. 1994-cü ildə dövlət gənclər siyasətini icra edən Gənclər və İdman Nazirliyi yaradılıb. Ulu Öndərin prezidentliyi dövründə ölkə gəncləri onun diqqət və qayğısını daim öz üzrlərində hiss ediblər.

1996-cı il 2 fevral tarixində məhz Ulu Öndər Heydər Əliyev dəstəyi ilə gənclərin 1-ci forumu keçirilib. 1997-ci ildən Prezident sərəncamı ilə 2 fevral Azərbaycanda Gənclər Günü kimi qeyd olunmağa başlanıb.

Əsası Ulu Öndər Heydər Əliyev tərəfindən qoyulan siyasi kurs bu gün ölkə Prezidenti İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə həyata keçirilən dövlət gənclər siyasəti Azərbaycan gəncliyinin inkişafına təkan verib, onların özlərini cəmiyyətdə təsdiq etməsində mühüm rol oynayıb.

Prezident İlham Əliyev 2005-ci il avqustun 30-da “Azərbaycan Gəncliyi Dövlət Proqramının (2005-2009-cu illər) təsdiq edilməsi haqqında” sərəncam imzalayıb. Proqram çərçivəsində görülən işlər gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun təmin edilməsi, dövlət idarəçiliyi sistemində iştirakının gerçəkləşdirilməsi yönündə ciddi irəliləyişə gətirib çıxarıb.

Prezident İlham Əliyevin bu sahəyə olan diqqəti özünü ayrıca bir ilin (2007-ci il) “Gənclər ili” elan edilməsində də göstərib. 2007-ci ildə Prezident İlham Əliyev “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın təsdiq edilməsi barədə sərəncam imzalayıb. Bundan başqa, 2011-ci ilin 6 aprel tarixində Prezident İlham Əliyev “Azərbaycan gəncliyi 2011-2015-ci illərdə” Dövlət Proqramı haqqında sərəncam imzalayıb. Proqramın əsas məqsədi ölkəmizdə gənclər siyasətini daha da inkişaf etdirmək, gənclərin menecment sahəsində fəal iştirakına şərait yaratmaq, gənc mütəxəssislərin işlə təminatı və digər sosial-iqtisadi problemlərinin həllini təmin etmək olub.

Azərbaycanın gənclər siyasətində idmanın inkişaf etdirilməsi və onun kütləviliyinin artırılmasına xüsusi diqqət yetirilir. Prezident İlham Əliyevin böyük səyləri nəticəsində Azərbaycan dünyanın qabaqcıl idman ölkələrindən birinə çevrilib. Bu gün respublikamızda 43 Olimpiya İdman Kompleksinin fəaliyyət göstərməsi, ölkəmizin nüfuzlu beynəlxalq idman yarışlarına ev sahibliyi etməsi, idmançılarımızın Olimpiya və dünya çempionatlarında uğurlu çıxışları buna əyani sübutdur. Beynəlxalq yarışlarda qələbə qazanan gənc idmançıların layiqincə qiymətləndirilməsi onların yeni uğurlarında mühüm rol oynayır.

Gənclərin hərtərəfli inkişafını, cəmiyyətin həyatında fəal iştirakını bir qədər də stimullaşdırmaq məqsədilə dövlət başçısı 19 dekabr 2011-ci il tarixində Azərbaycan Prezidenti yanında Gənclər Fondunun yaradılması barədə sərəncam verib. Fondun qarşısında gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində maliyyələşdirmək məqsədi qoyulub. Prezident İlham Əliyevin gənclərə dəstək yönündə verdiyi mühüm və əlamətdar qərarlardan biri də ölkədə ilk dəfə “Gənclər üçün Prezident Mükafatı”nın təsis edilməsi olub.

Gənclər üçün ən həlledici sınaqlardan biri 2020-ci ilin sentyabrın 27-də başlayan və noyabrın 10-də Azərbaycanın qələbəsi ilə bitən Vətən müharibəsi olub. Azərbaycanın qəhrəman gəncləri rəşadətli Ordumuzun sıralarında vuruşaraq adlarını xalqımızın ən yeni tarixinə qızıl hərflərlə yazıblar. Məhz onların rəşadəti sayəsində əldə olunan Şanlı Zəfərlə Azərbaycan ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşub.

Sevindirici haldır ki, gənclərimiz Vətən uğrunda döyüşlərlə yanaşı, arxa cəbhədə də yüksək fəallıq göstərib, ölkəmizlə bağlı həqiqətlərin, işğalçı Ermənistanın əzəli torpaqlarımızda törətdikləri vandallıq aktlarının beynəlxalq ictimaiyyətin diqqətinə çatdırılmasında fəal iştirak ediblər.

Hazırda ölkəmizdə gənclər siyasəti uğurla həyata keçirilir. Sosial həyatın bütün sferalarına nəzər salsaq, görərik ki, orada gənclər əksəriyyət təşkil edir. Təbii ki, bu, Prezident İlham Əliyevin gənc kadrların irəli çəkilməsi ilə bağlı qarşıya qoyduğu vəzifənin reallaşmasının nəticəsidir. Ölkə gənclərinin hərtərəfli inkişafına ən yüksək səviyyədə diqqət və qayğı göstərən Prezident İlham Əliyevin 2019-cu il 26 iyul tarixli Sərəncamı ilə “Yüksəliş” müsabiqəsi təsis edilib. Bu müsabiqənin əsas məqsədi intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsi, dəstəklənməsi və ölkədə kadr ehtiyatı bankının yaradılmasıdır.

Dövlətimizin başçısının “Azərbaycan Respublikasının Gənclər Fondunun fəaliyyətinin dəstəklənməsi ilə bağlı əlavə tədbirlər haqqında” 2019-cu il 1 oktyabr tarixli Sərəncamına əsasən, Azərbaycanın şəhər və rayonlarında yaşayan gənc vətəndaşların dövlət gənclər siyasətinin tələblərinə uyğun şəkildə hərtərəfli inkişafının təmin olunması, habelə Azərbaycan xalqının ümummilli lideri Heydər Əliyevin dövlətçilik fəlsəfəsini, azərbaycançılıq məfkurəsini gənc nəslin daha dərindən mənimsəməsi işinə töhfə verilməsi məqsədilə ölkəmizin şəhər və rayonlarında fəaliyyət göstərən Heydər Əliyev mərkəzlərində Gənclərin İnkişaf və Karyera Mərkəzinin nümayəndəliklərinin yaradılması işi uğurla davam etdirilir.

Gənclərimizin potensialının, fəallığının, məsələlərə yeni baxışlarının cəmiyyət üçün çox lazımlı olduğunu diqqətə alan Prezident İlham Əliyev 2019-cu il dekabrın 30-da Azərbaycan Respublikasında 2020-ci ilin “Könüllülər ili” elan edilməsi haqqında Sərəncam imzalayıb.

Ölkəmizdə gənclərin məşğulluğunun təmin olunması da diqqət mərkəzindədir. Azərbaycanın Birinci vitse-prezidenti xanım Mehriban Əliyevanın rəhbərlik etdiyi Heydər Əliyev Fondu tərəfindən gənclərin istedad və bacarıqlarının üzə çıxarılması istiqamətində həyata keçirilən layihələr yetişməkdə olan nəslin gələcəyinin etibarlı təminatıdır. Eləcə də Heydər Əliyev Fondunun vitse-prezidenti Leyla Əliyevanın təşəbbüsü ilə xaricdə və ölkəmizdə reallaşan layihələr Azərbaycanın uğurlarının təbliğində, gənclərimizin fəallığının artırılmasında və onların fəaliyyətlərinin əlaqələndirilməsində mühüm rol oynayır.

Ölkəmizdə gənc nəslin problemlərinin həlli, onların cəmiyyət həyatında layiqli təbəqə kimi iştirakının təmin olunması üçün həyata keçirilən bütün zəruri tədbirlər Azərbaycan gəncliyini daha işıqlı sabaha aparacaq. Bu yolda gənclərimizin ən böyük himayəçisi və dəstəkçisi məhz Azərbaycan Prezidenti İlham Əliyevdir. Dövlətimizin başçısının “Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram” – sözləri Azərbaycan dövlətinin gənclərə etimadının, gənclərin isə Prezidentə məhəbbətinin və dəstəyinin bariz nümunəsidir.

Əziz gənclər, bayramınız mübarək!

Gununsesi.info