Ankarada Musiqi və Gözəl Sənətlər Universitetinin daxili küçəsinə dahi Üzeyir Hacıbəylinin adı verilib.

“Qafqazinfo” xəbər verir ki, bu barədə Mədəniyyət Nazirliyi məlumat yayıb.

Bildirilib ki, bu gün açılış məqsədilə universitetdə Azərbaycan Mədəniyyət Mərkəzinin Üzeyir Hacıbəyli yaradıcılığına dair hazırladığı konsert proqramı təqdim olunacaq.

Qeyd edək ki, dahi Azərbaycan bəstəkarı, Türk dünyası musiqisinin zirvəsi Üzeyir Hacıbəylinin 140 illik yubileyi Azərbaycanla yanaşı, bütün dünyada geniş qeyd olunur.

Bir ilin tamam olması həm də əlamətdar hadisələrlə yadda qalır.

Yazıçı-şairlər üçün ən əlamətdar hadisələrdən biri də onların çap olunan yeni kitablarıdır.

Gununsesi.info 2025-ci ildə yeni kitabı işıq üzü görən yazıçıların siyahısını təqdim edir.

Belə ki, ilin sonlarına yaxın çap olunan kitablardan biri də Nadir Yalçının “Lal ev” hekayələr kitabı oldu.

O cümlədən Rüstəm Behrudinin “Sənin gözlədiyin qərib türkəm mən” adlı şeirlər kitabı çap olundu.

Bundan əlavə, Şərif Ağayarın əvvəlcə “Rəng mühəndisi”, daha sonra “Mənim tanıdığım Ələsgər” adlı kitabları da işıq üzü gördü.

Bp-nin dəstəyi ilə Qismət, Rəvan Cavid, Ulucay Akif, Elroman, Ruslan Dost Əlinin də kitabları bu il işıq üzü gördü.

İlqar Kamilin “9-cu mərtəbə” romanı da oxuculara təqdim edilib.

Əlavə olaraq, “Park nəşriyyatı” tərəfindən Salam Sarvanın “Fikir oyunları”, Seymur Baycanın “Həyata yekun vurarkən” adlı ikicildliyi, Mirmehdi Ağaoğlunun “Həcc gündəliyi” və Seymur Baycanla Vüqar Vanın həmmüəllif olduğu “Pişiyə qalib gələn qəhqəhələr” kitabları çap edilib.

Məşhur “İşıqları sınmış küçələr” teleserialında rol almış tanınmış teatr və kino aktyoru Nikolay Denisov 80 yaşında vəfat edib.

Gununsesi.info xəbər verir ki, bu barədə “Kino-teatr.ru” portalı məlumat yayıb.

Portalın məlumatına görə, aktyor 19 dekabrda vəfat edib. Onun ölüm səbəbi açıqlanmayıb.

Denisov 1 oktyabr 1945-ci ildə anadan olub. 1970-ci ildə Leninqrad Teatr, Musiqi və Kinematoqrafiya İnstitutunun (indiki Rusiya Dövlət Səhnə Sənəti İnstitutu-red.) aktyorluq fakultəsini oxuyub və orada professor T.Q.Soynikovanın rəhbərliyi altında təhsil alıb. O, məzun olduqdan sonra A.S.Puşkin adına Pskov Dram Teatrında aktyor kimi çalışıb. Denisov həmçinin 10 il “Na Liteini” Leninqrad Regional Teatrında da aktyor kimi işləyib. 2005-ci ildən Sankt-Peterburq Dövlət Teatrı “Benefis”də, 2021-ci ildən isə Moskva Dram Truppasının “Səyyah Ulduzlar”ında aktyor kimi fəaliyyət göstərirmiş. O, Rusiya Federasiyasının əməkdar artistidir (2005).

Bundan başqa, Denisov şair və dramaturq idi. Onun şeirləri əsasında hazırlanan mahnıları Valeri Leontyev, Lyudmila Qurçenko, Nikolay Karaçentsov, Edita Piexa, Nadejda Babkina, Larisa Dolina, Mixail Boyarski, Filipp Kirkorov, Mixail Şufutinski, Nikolay Baskov, Maksim Averin və başqa məşhurlr ifa ediblər.

Gununsesi.info

Tanınmış telejurnalist Mirşahin Ağayev vəfat edən qəzəlxan Kərim haqqında yazıb.

Gununsesi.info həmin qeydi təqdim edir:

Azərbaycanın müasir dövr şifahi xalq ədəbiyyatının ən görkəmli nümayəndələrindən biri Kərimi həmişə istedadı, səmimi və mərd bir yaradıcı insan kimi xatırlayacam. Hazırcavablığı ilə fərqlənirdi. Yaxşı yadımdadır. “De gəlsin” layihəsində növbəti mərhələyə qafiyə axtarırdıq. Çətin və dərin mənalı olmalıydı. Dəqiq yadımda deyil, hansı il idi, amma il ilan üstündə təhvil olacaqdı. Qafiyə ya köhnə ilə, ya da yeni ilə aid olmalı idi. Kərim bədahətən dedi:
-Kirpi şaddı, il ilan üstündədi!
İlan fikirdən tikan üstündədi!”
…Biologiya, zoologiya, məntiq və poeziyanın mükəmməl sintezi! Heyrətamiz adam idi, Kərim. Hazırcavab, ağsaqqal, müdrik…

Biz onun simasında əsl meyxana ustadını itirdik. Allah rəhmət eləsin! Şifahi xalq ədəbiyyatında, xiridarların yanında qazandığı yer həmişə görünəcək!

Gununsesi.info

Dekabrın 19-da Naxçıvan Dövlət Universitetinin Beynəlxalq Kembric  məktəbində  Azərbaycan Respublikasının Prezidenti cənab İlham Əliyevin Azərbaycan dilinin qorunması, inkişafı və ədəbi normalara uyğun istifadəsi ilə bağlı verdiyi tapşırıqların icrasını təmin etmək məqsədilə “Azərbaycan ədəbi dilinin saflığının qorunması” mövzusunda tematik görüş keçirilib.

Gununsesi.info  xəbər verir ki,  tədbirdə Naxçıvan Dövlət Universitetinin rəhbərliyi, professor-müəllim heyəti, elmi işçilər, tədqiqatçılar, tələbələr, eləcə də NDU nəzdində İngilis dili təmayüllü Gimnaziyanın şagirdləri də iştirak ediblər.
Naxçıvan Dövlət Universitetinin rektoru Elbrus İsayev tədbiri giriş sözü ilə açaraq vurğulayıb ki,  Azərbaycan dilinin dövlət dili kimi qorunması və saflığının təmin edilməsi Azərbaycan Respublikasının Prezidenti cənab İlham Əliyevin müəyyən etdiyi strateji dövlət siyasətinin əsas istiqamətlərindən biridir.
Rektorun sözlərinə görə, dövlət başçısının ana dilinin saflığının qorunmasına dair prinsipial mövqeyi ali təhsil müəssisələrinin üzərinə xüsusi məsuliyyət qoyur və bu məsələyə Naxçıvan Dövlət Universitetinin tədris prosesi, elmi araşdırmalar və ictimai mühitində ardıcıl şəkildə yanaşılır.
Elbrus İsayev onu da vurğulayıb ki, ana dilinə hörmət yalnız normativ tələblərin icrası ilə məhdudlaşmır, bu eyni zamanda milli düşüncə tərzinin və vətəndaş məsuliyyətinin formalaşmasının mühüm göstəricisidir.
Rektorun sözlərinə görə, Naxçıvan Dövlət Universiteti ana dilinin qorunmasını institusional dəyər kimi qəbul edərək bu istiqamətdə maarifləndirici və davamlı elmi-ictimai mühit formalaşdırır.
Tematik görüşün əsas məruzəçisi filologiya elmləri doktoru, professor Mahirə Hüseynova Azərbaycan ədəbi dilinin tarixi inkişaf yolu, dövlət dili kimi mövqeyinin möhkəmləndirilməsi və müasir dövrdə dilin qarşılaşdığı problemlər barədə ətraflı məlumat verib.
Professor qeyd edib ki, Prezident İlham Əliyevin Ana dilinin saflığının qorunmasına dair ardıcıl çağırışları dilçilik elmi və təhsil sistemi üçün mühüm istiqamətverici rol oynayır.
Mahirə Hüseynova ana dilinin qorunmasının yalnız elmi müstəvidə deyil, gündəlik ünsiyyət, ictimai davranış və xüsusilə də,  təhsil prosesində prinsipial mövqe tələb etdiyini diqqətə çatdırıb.
Onun sözlərinə görə, qloballaşma şəraitində Azərbaycan ədəbi dilinin elmi əsaslarla tədrisi və düzgün tətbiqi milli kimliyin və milli yaddaşın qorunmasının əsas təminatlarından biridir.
Professorun qənaətincə, dövlət başçısının ana dilini milli yaddaşın və milli təhlükəsizliyin əsas elementi kimi dəyərləndirməsi cəmiyyətin bütün təbəqələrində dilə məsuliyyətli münasibətin formalaşmasına xidmət edir.
Məruzədə o da vurğulanıb ki, beynəlxalq təhsil proqramlarının tətbiq olunduğu mühitlərdə Azərbaycan ədəbi dilinin qorunması Prezident İlham Əliyevin müəyyən etdiyi milli dil siyasətinin praktik təzahürüdür.
Bu baxımdan, Naxçıvan Dövlət Universitetinin nəzdində fəaliyyət göstərən Beynəlxalq Kembric Məktəbi və İngilis dili təmayüllü Gimnaziya Ana dilinin qorunduğu və yüksək səviyyədə tətbiq edildiyi nümunəvi təhsil ocaqları kimi dəyərləndirilib.
Görüş çərçivəsində dilin ictimai-siyasi həyatda rolu, kütləvi informasiya vasitələrində dil mədəniyyətinin qorunması və tədris prosesində ədəbi dil normalarına riayət edilməsi kimi mövzularda geniş fikir mübadiləsi aparılıb.
Tədbirin sonunda Naxçıvan Dövlət Universitetinin rektoru Elbrus İsayev Ana dilinin qorunması və təbliği istiqamətində universitetlə mütəmadi elmi-ictimai əməkdaşlığa verdiyi töhfələrə görə Naxçıvan Dövlət Universitetinin fəxri professoru Mahirə Hüseynovaya minnətdarlığını bildirib.
Rektor vurğulayıb ki, bu cür davamlı görüşlər və elmi müzakirələr ali təhsil mühitində ana dilinə məsuliyyətli münasibətin formalaşmasına, elmi yanaşmanın güclənməsinə və milli dil siyasətinin uğurla həyata keçirilməsinə mühüm töhfə verir.
Sonda qeyd olunub ki, Naxçıvan Dövlət Universitetində Azərbaycan Respublikasının Prezidenti cənab İlham Əliyevin müəyyən etdiyi milli dil siyasətinə uyğun olaraq Ana dilinin qorunması, ədəbi saflığının təmin edilməsi və gənc nəslə aşılanması istiqamətində elmi-ictimai tədbirlərin təşkili bundan sonra da ardıcıl şəkildə davam etdiriləcək.

Gununsesi.info