Əfsanəvi “Karvan” qrupunun yaradıcısı, Azərbaycanın ilk qadın klip rejissoru və prodüseri Sevinc Kərimova 70 yaşında vəfat edib.

Gununsesi.info xəbər verir ki, bu barədə məlumat sosial şəbəkələrdə yayılıb.

Uzun müddət ABŞ-də yaşayan sənətçi bu yaxınlarda Bakıya qayıtmışdı və son aylarda ağır xəstəlikdən əziyyət çəkirdi.

Qeyd edək ki, Sevinc Kərimova bu gün Prezident İlham Əliyevin Sərəncamı ilə Azərbaycan diasporunun inkişafındakı xidmətlərinə görə “Tərəqqi” medalı ilə təltif olunmuşdu.

Gununsesi.info

Çox əziz media nümayəndələri, dəyərli sosial media istifadəçiləri!

Son günlər doğuş zamanı baş vermiş ana ölümü ilə əlaqədar olaraq sosial şəbəkələrdə və bəzi media resurslarında konkret bir həkimin “ölüm cinayətində günahlandırılması” ilə bağlı paylaşımlar yayılır. Bu cür yanaşma həm hüquqi, həm tibbi, həm də etik baxımdan ciddi suallar doğurur.

İlk növbədə qeyd edilməlidir ki, cinayət işinin açılması hələ günahın sübut edilməsi demək deyil. Azərbaycan Respublikasının qanunvericiliyinə əsasən, məhkəmə hökmü olmadan hər kəs təqsirsiz sayılır. İstintaqın başlanması hadisənin obyektiv araşdırılması məqsədi daşıyır və bu mərhələdə hər hansı şəxsin ictimai şəkildə günahkar kimi təqdim edilməsi düzgün deyil.

Əziz dostlar! Doğuş zamanı ana ölümü tibbin ən ağır və mürəkkəb fəsadlarından biridir. Bu tip hallar çox zaman bir neçə tibbi amilin üst-üstə düşməsi nəticəsində baş verir və dünyanın ən inkişaf etmiş səhiyyə sistemlərində belə bəzən qarşısı alına bilməyən hadisələr sırasına daxildir. Belə vəziyyətlərdə nəticəni yalnız bir həkimin fəaliyyəti ilə əlaqələndirmək elmi və peşəkar yanaşma deyil.

Hər bir tibbi hadisə yalnız müstəqil ekspertiza, klinik protokollara uyğunluğun qiymətləndirilməsi və ətraflı araşdırmadan sonra dəyərləndirilə bilər. Sosial şəbəkə paylaşımları və emosional başlıqlar tibbi məsuliyyətin müəyyən olunması üçün əsas ola bilməz.

Bu tip xəbərlərin tələsik və ittihamedici formada yayılması cəmiyyət üçün də risklidir. Bu, səhiyyə işçilərinin peşə nüfuzuna zərər vurmaqla yanaşı, gələcəkdə ağır və riskli xəstələrə tibbi yardım göstərilməsində tərəddüd və qorxu yarada bilər. Nəticədə zərər təkcə bir həkimə yox, bütün cəmiyyətə dəyir.

Media və ictimai platformalar bu kimi həssas mövzularda daha məsuliyyətli davranmalı, araşdırma tamamlanmadan şəxsləri hədəf göstərməkdən çəkinməlidir. Həqiqət yalnız istintaq və tibbi ekspertiza başa çatdıqdan sonra ortaya çıxır.

Bütün bunları qeyd edərkən nə cəmiyyətimizi, nə də sosial media istifadəçilərini qınamaq niyyətim yoxdur. Eləcə də məqsədim hansısa həkimi və ya sistemi kor-koranə müdafiə etmək deyil. Sadəcə anlamaq lazımdır ki, məsuliyyətsiz və emosional ittiham dili ölkə səhiyyəsinin inkişafına mənfi təsir göstərməklə yanaşı, sabah hamımızın ən kritik anlarında canımızı tərəddüdsüz etibar edəcəyimiz peşəkarların azalmasına, hətta belə yükü üzərinə götürməyə hazır insan tapmağın çətinləşməsinə səbəb ola bilər. Ona görə də bu mövzuda daha ehtiyatlı, daha diqqətli davranmağı vacib hesab edirəm.

Hörmətlə,
Rəşad Mahmudov
Milli Məclisin Səhiyyə komitəsinin sədr müavini

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Dünya Azərbaycanlılarının Həmrəyliyi Günü və Yeni il münasibətilə 1 və 2 saylı uşaq evlərində, eləcə də 1 saylı körpələr evində yaşayan azyaşlılar üçün bayram şənliyi təşkil olunub.

IDEA-dan Gununsesi.info-ya bildiriblər ki, bayram tədbirində İctimai Birliyinin könüllüləri uşaqlara hədiyyələr təqdim edib, balacalarla birlikdə müxtəlif əyləncəli oyunlar və fəaliyyətlər həyata keçiriblər. Bu təşəbbüs balacalara sevinc və bayram əhval-ruhiyyəsi bəxş edib.

Qeyd edək ki, Leyla Əliyevanın təşəbbüsü ilə həm ölkəmizin müxtəlif regionlarında, həm də dünyanın bir sıra ölkələrində humanitar, təhsil, səhiyyə, sosial, ekoloji və digər sahələri əhatə edən genişmiqyaslı layihələr mütəmadi olaraq həyata keçirilir. Xüsusilə bayram günlərində uşaq evlərində, internat müəssisələrində, eləcə də müalicə və qayğıya ehtiyacı olan uşaqlar üçün bayram tədbirlərinin təşkili bu təşəbbüslərin əsas istiqamətlərindən biridir. Himayədən məhrum olmuş, qayğıya daha çox ehtiyac duyan uşaqların sevindirilməsi, onların bayram ab-havasını hiss etmələri məqsədilə bu cür tədbirlər mütəmadi olaraq təşkil olunur.

Gununsesi.info

Biləsuvarda toy karvanında ağır qəza baş verib.

Gununsesi.info xəbər verir ki, toy karvanında hərəkətdə olan “Lexsus” markalı nəqliyyat vasitəsi idarəetmədən çıxaraq yol kənarından Mil-Muğan su kanalına aşıb.

İlkin məlumata görə, qəza nəticəsində iki nəfər ölüb. Avtomobildə 6 qadın olub.

Hazırda hadisə yerində müvafiq qurumların əməkdaşları araşdırma aparılır.

Gununsesi.info