NATO-nun baş katibi Mark Rütte Rusiya xarici işlər naziri Sergey Lavrovun alyansın mümkün dağılması ilə bağlı son şərhlərinə münasibət bildirib.

APA xəbər verir ki, bu barədə Rütte "Fox News" telekanalına müsahibəsində danışıb.

“Lavrov – o, İsa Məsihin doğulduğu zamandan bəri Rusiya xarici işlər naziridir, yox? Və o vaxtdan bəri onun ağzından faydalı heç nə eşitməmişik. Ona görə də gəlin cənab Lavrova artıq diqqət yetirməyək”, – Rütte deyib.

Rüttenin bu fikirlərinə Rusiya XİN-in sözçüsü Mariya Zaxarova da cavab verib:

“Sergey Lavrov NATO-nun baş katibini İsa Məsihi xatırlamağa vadar edirsə, deməli, bu qədər illəri boş yerə işləməyib”.

Pərvanə Baxşəliyeva: “İnsanların bədbəxtləşməsinin içində birinci yerdə sosial şəbəklərdə gedən təbliğat yatır”

Son 5 ildə Azərbaycanda psixoloji problemi olan insanların sayı sürətlə artmaqdadır. Statikstikaya görə, bu say 2020-ci ildə 12334 nəfər, 2021-ci ildə 14409 nəfər, 2022-ci ildə 18651 nəfər, 2023-cü ildə 22273 nəfər, 2024-cü ildə isə 24228 nəfər olub. Əlbəttə, narkotik istifadələrinin sayı 350 000 nəfər, cinayət törətmiş şəxslərin sayı 22 485 nəfər (2024), məhkumların sayı 15 885 nəfər olan ölkə üçün psixoloji problemli insanların sayının 24 228 nəfər olması heç də kiçik rəqəm deyil. Bəlkə də narkotikə, oyun asılılığına, alkoqolizmə, cinayətə gedən yol elə psixoloji problemlərdən başlayır. Bu barədə psixoloq Pərvanə Baxşəliyevanın fikirlərini öyrəndik.

- Pərvanə xanım, statistikaya görə, ölkəmizdə psixoloji problemli insanların sayı ilbəil artır. Sizcə, bu, nədən qaynaqlanır, bu faktın altında hansı səbəblər yatır?

- Bizim bir yaradılışımız, doğuluş halımız var. Əminliklə sizə deyə bilərəm ki, insanlar öz təbiətlərindən uzaqlaşdığı üçün o problemlər yaşanmağa başlayır. Təbiətimizdən uzaqlaşmaq nədir? İnsan kimi bizi formalaşdıran xüsusiyyətlər var. Yəni dəyərlərimiz, inandığımız şeylər, inanclarımız, bizi formalaşdıran nələrsə var. Bugünki insanlar ancaq qaçaqaçdadırlar, nəyisə əldə etməyə çalışırlar, amma böyük əksəriyyəti bədbəxtdir. Xoşbəxt insanların sayı getdikcə azalır. Baxırsan ki, insanın maddi olaraq hər şeyi - karyerası, pulu, maşını var, yetərincə səyahətlər edir, amma bu adamın nəyisə çatmır, xoşbəxt deyil.

İstər qadın, istər kişi olsun, fərq etmir, bunu seans otağında da illərdir görürəm. Həmişə deyirəm ki, pul insanı xoşbəxt etmir, pul sadəcə insanın ehtiyaclarını ödəmək üçündür, əsla xoşbəxtlik vermir. Bunu əminliklə deyə bilərəm. Və insan bu gün xoşbəxtliyi pulda, pulla alacağı şeylərdə axtardığı üçün həm öz yaradılışından, həm də mənəviyyatının, ruhunun ehtiyac duyduğu qidalardan da uzaqlaşdığı üçün, bax bu qədər yolunu azıb. Pis mənada yox, amma o mənada ki, insan təbiətindən çox uzaqlaşıb. Nəticədə bu gün bahalı, lüks evlərdə yaşayan, vəzifə masası arxasında işləyən, amma yetərincə psixoloji problemi olan insanlara yetərincə rast gəlirik. Depressiyası olsun, panik atakı olsun, tükənmişlik sindromu olsun, OKP-si olsun – nə qədər desəniz psixoloji problemlərdən əziyyət çəkən yetərincə insan var. Mən o insanlara izah etməyə çalışıram ki, insanı insan edən onun ruhudur, mənəviyyatıdır. Biz onu qoymuşuq kənara, onunla məşğul deyilik. O da qida istəyir. Bu gün biz ancaq bədənimizi doyuzdurmaq üçün çalışırıq. Ona görə də bu hallar yaşanır.

- Belə anlaşılır ki, mənəviyyatımızla bağlantını itirdiyimiz, yaxud ona barmaqarası baxdığımz üçün toplum olaraq ictimai depressiyaya qapılmışıq...

- Bəli, təəssüflər olsun ki, elədir. Yetinməzlik, doyumsuzluq... Əlində hər şey var, amma yetinmir, doymur. Çünki nələrsə çatmır və o çatmayan şeyin nə olduğunu dərk etmir. Elə bilir ki, o yenə maddiyyatdır, o maddiyyatın alacağı şeylərin ardınca düşür, bu problemlər daha da dərinləşir. İnsanı insan kimi saxlayan onun ruhudur, mənəviyyatıdır. Fiziki tərəfi deyil, çünki fiziki tərəfimizi də qidalandıran ruhumuzdur. Psixosomatika deyilən bir şey var, bütün xəstəliklərin kökündə bizim ruhi xəstəliklərimiz yatır. Ruhumuza nə qədər yaxşı baxsaq, bədənimiz də o qədər sağlam olacaq.

- Bəs, sizcə, çıxış yolu nədir? İlk olaraq fərdlərdən başlayaraq nə etməliyik ki, sonra bu cəmiyyətə sirayət etsin, yansısın?

-Mən bu gün fərdi şəkildə o insanlarla işləyirəm və hər birinə izah etməyə çalışıram ki, məsumluq dönəminə qayıt, əvvəlinə - özünü çox xoşbəxt hiss etdiyin vaxlarına dön. Səni nələr xoşbəxt edirdi? İnsanlar deyir ki, ailəm, onlarla birlikdə zaman keçirmək. Mən həmişə onları yönləndirirəm, deyirəm, sən həmişə indiki kimi olmamısan, bədbəxt olmamısan, sənin də xoşbəxt olduğun vaxtlar olub. Ancaq son illər o qədər qaçaqaç içində olmusan ki, bəzi şeyləri unutmusan. Mən insanlara ilk öncə xoşbəxt olduğu anları, onu nələrin xoşbəxt etdiyini xatırladıram. Və baxırsan ki, o xoşbəxtliyin içində həqiqətən maddiyyat yox idi, mənəvi şeylər var idi.

Digər tərəfdən, insanların bədbəxtləşməsinin içində birinci yerdə sosial şəbəklərdə gedən təbliğat yatır. Sosial şəbəkələrdə müxtəlif influenserlər, profillər olsun, hansı ki, o profillərin çoxunun saxta olduğunu sizə əminliklə deyə bilərəm. Onlar süni intellekt vasitəsilə bu toplumun beynini yeməkdən ötrü yaradılır. Guya onlar düzənli bir həyatı olan, hər səhər idman edən, guya sağlam qidalanan xoşbəxt ailələr, xoşbəxt insanlardır. Sosial şəbəkələrdə hər gün bunları görən insanlar onlar kimi olmağa can atır. Və təəssüf ki, bu da mümkün olmadığı üçün insan özünü daha yetərsiz, uğursuz, əskik görməyə başlayır. Düşünür ki, həm bu gözəl şeylərə layiq deyil, həm də bacarıqsızdır. Amma fərqində deyil ki, sən insansan, sənin öz yolun olmalıdır, o yolda sənin öz bacarıqlarınla göstərdiyin səylər, çalışmalar olmalıdır. O yol heç kəsin yolunun təkrarı olmamalıdır.

- Dediklərinizdən belə anlaşılır ki, sosial şəbəkələrdə kimlərsə bunu təlqin edir, bu yaşam tərzini aşılayır. Bunu kim edir? Bu tendensiyanı kimlər yaradır?

-Baxın, cəmiyyəti idarə etmək istəyirsənsə, o cəmiyyətin sağlam olmaması gərəkdir. Çünki sağlam şüur, sağlam düşüncə və sağlam cəmiyyəti idarə edə bilməzsən. Bir cəmiyyəti idarə etmək üçün onu öncə idarə olunacaq vəziyyətə gətirmək lazımdır.

-Yəni cəmiyyətin mənən xəstə olması lazımdır?

- Bəli, çünki mənəvi cəhətdən xəstə və xəstə şüurlu cəmiyyəti idarə etmək çox rahatdır. Sən sağlam insanı idarə edə bilməzsən, çünki sağlam insanın özünün oturuşmuş düşüncələri, əmin olduğu şeylər var və sən ona söz keçirə bilməzsən. Sağlam insan özünün əmin olduğu şeyləri edəcək. Amma xəstə şüurlu cəmiyyəti idarə etmək çox rahatdır. Və cəmiyyətin fərdlərini də mənən xəstə hala salmaq üçün sosial şəbəkələr birinci yerdə gəlir. Əvvəl bu “missiya”nı yerinə yetirən televiziyalar var idi. Bu gün artıq televiziyaya o qədər də baxan yoxdur. Televiziya da artıq sosial şəbəkələrə daşınıb.

-Demək, sosial şəbəkələrdən dəyərsizliklər bizə aşılanır, biz bu bunu mənimsəyirik, dəyərizliyə doğru gedirik...

-Dəyərlərimiz məhv oldu, təəssüflər olsun ki, sosial şəbəkələr bütün dəyərlərimizi məhv etdi – insani dəyərləri, ailə dəyərlərini, hamısını. Bu deyilənlərlə yanaşı, belə bir şey sezirəm. Sanki insana o qədər hədəflər qoyurlar ki, insan o hədəflərə çata bilməsə, bədbəxt olmağa məhkumdur. Bu sanki “koç”lar tərəfindən, yaxud kimlərsə tərəfindən aşılanır. Ki, insan bu, bu...hədəflərə çatmalıdır. O hədəflərə çatanda xoşbəxt olacaq və s. İnsanın nə qədər ömrü var ki, həyatını o hədəflərin hamısına çatmağa həsr eləsin?! Bəlkə insana heç o hədəflər lazım deyil...

“Koç”luqdur, hansısa aparılan təlimlərdir, ümumiyyətlə son 30 ildə həyatımıza daxil olan sahələr ki, var - sosioloqlardır, “koç”lardır, kosmetologiyadır –onlar həyatımıza daxil olandan sonrakı gedən prosesləri müşahidə edin. Hər biri kapitalizmin bizə əlimizdən alıb, pulla satdığı xidmətlərdir. “Koç”luq da bunun kimi bir şeydir. Öncə sosial şəbəkələrdə sənin özgüvənini, özünə inamını sındırır, “sən heç nəsən, dəyərsizsən” deyir, eləcə də “sən gözəl deyilsən”, “gözəl olmaq belə bir şeydir”, “xoşbəxt olmaq istəyirsənsə, gözəl olmalısan” deyir...

-Yəni hansısa standartları bizə sırıyır...

-Bəli, bəli. Hansısa kosmetoloji prosesdurları mütləq etdirməlisən, uğurlu bir insan olmaq üçün sənin mütləq fərdi bir “koç”un olmalıdır... Nə baş verdi? Kapitalizm bunları səndən aldı və başladı sənə pulla geri satmağa. Ağıllı insanlar bu tələyə düşmədi. Amma bu çox az bir kütlədir. Baxsaq ki, hər kəs ağıllı deyil, o tələyə çox asanlıqla düşən təbəqə var. Və onlar artıq o cərəyanın köləsidir. O insanlar üzərindən yetərincə pul qazanılır – həm sağlamlıqlarını, həm maddiyyatlarını itirirlər. Bunu o insanlara dəfələrlə desən də onlar bunun fərqində deyillər, bunu görmürlər, normal sayırlar. Çünki toplumun böyük bir hissəsi bu axının içindədir, ona görə bunu normal sayırlar. “Koç”luq da belə xidmətlərdən biridir. Məgər, 30 il əvvəl uğursuz insanlar az idi?

- Xeyr, onlar bunu özlərinə dərd etmirdilər. Amma indi insanlara elə standartlar sırıyıblar ki, belə olmasan sən fərsiz, uğursuz insansan, əskik insansan, ya da yarıminsansan.

- Bəli, kapitalizm insanları elə bir hala salıb ki, insan öz hədlərini aşmaq istəyir. Çünki kapitalizmin səndən istədiyi budur. Amma bu mümkün deyil, çünki sən insansan, robot deyilsən. Yəni mənəviyyatdan, hisslərdən, duyğulardan, ətdən, ruhdan – hər şeydən ibarət bir varlıqsan, çatışmamazlıqlarınla birlikdə.

-Yəni kapitaizm bizə təlqin edir ki, bunarı etsən ideal, mükəmməl insan olacaqsan, halbuki ideal insan yoxdur...

-Bəli. Birincisi, ideal insan yoxdur, insan öz qüsurlarıya insandır, tamdır. Qüsursuz insan yoxdur.

-Və xoşbəxt insan olmaq üçün ideal insan olmaq lazım deyil. Hər bir insan özü olmalıdır. Kiməsə oxşamalı deyil.

-Doğrudur. Dediyim kimi, indi xoşbəxtlik sandartları, gözəllik standartları dəyişdirilib. Sonda bu, mənfi nəticələrə gətirib çıxarır. Ona görə, mən əsasən “koç”larla işləyən insanlara, hətta mənim özümlə işləyən insanlara deyirəm ki, sən özün də mənsiz bu problemin öhdəsindən gələ bilərsən. Onarı özümdən asılı vəziyyətə salmıram. Mən onlara özlərinin də problemlərn öhdəsindən mənsiz gəlməyi öyrədirəm ki, əslində, sənin psixoloqa ehtiyacın yoxdur. Sən özün də bunu bacara bilərsən, sadəcə görmək lazımdır.

- Siz onlarda fərqindəliyi oyadırsınız.

- Bəli, mən onları aylarla özümdən asılı salmıram. Çünki mən özüm də bunun fərqindəyəm ki, mənim peşəm də kapitalizmin irəli sürdüyü sahələrdən biridir. Mən bunun fərqinə illər sonra vardım. Onun üçün insanları öyrədirəm ki, bunu sən özün mənsiz edə bilərsən. Yəni fərqindəlik qazansınlar. Mənim son illər ən çox işlədiyim bu istiqamətdir. Demək olar ki, öyrəndiyim psixologiyanı qoymuşam bir tərəfə, artıq çalışıram ki, 20 illik təcrübə ilə insan həyatından topladıqlarımı bir arada birləşdirərək, bu istiqamətdə yön göstərim.

-Yəni siz onlara özünəinam, özgüvən aşılayırsınız. Bu işə yarayırmı? Effekt necə olur?

-İtirdikləri özgüvənlərini onların özlərinə qaytarmağa çalışıram və özünə də göstərirəm ki, görürsən, bunu sən özün bacardın, sadəcə bunun fərqində deyildin, mən sənə fərqində olmağı öyrətdim, qalanını sən özün etdin. Bu gün insanların ən böyük problemlərindən biri də fərqindəliyi itirməsidir. Bunun da səbəbi sosial şəbəkələrlə, qidalarla beynin yuyulmasıdır. Beyin bunlarla yuyulur, insan öz yaradılışından uzaqlaşır. Elə bilir ki, tək heç nəyi bacarmayacaq.

-Bəs, ictimai şəkildə insanlara necə aşılamalıyıq ki, onlar özünə inamı heç kimin ağzından nəsə eşitməyə möhtac olmadan bərpa etsinlər?

-Bir neçə il əvvəl bu sualı mənə versəydiniz, deyərdim ki, televiziyalar, dövlət, qurumlar bu işə əl atmalıdırlar. Çünki bu, böyük həcmli bir işdir. Mənim kimi insanların xidmətləri kiçik nəticələr verir. İndi yenə də deyirəm ki, dövlət bu işə əl atmalıdır. Öncə bütün televiziyalardakı verilişləri bağlamalıdır, həmişə loru dildə deyirəm ki, traktorun altına verib şumlamalıdır. Çünki orada insan üçün yararlı bir dənə də olsun veriliş yoxdur. Əksinə bütün insani dəyərlərimizi məhv edən verilişlərin hamısı oradadır. Bu da planlı bir şeydir.

-Bəs, bu mövzuda sıradan insanlara nə deyərdiniz?

-Mən sosial şəbəkə profilimdən də insanlara tez-tez müraciət edirəm, deyirəm ki, sən insansan, robot deyilsən, otur düşün. Düşün ki, sən dünyaya necə gəlmisən, hansı yollardan keçmisən, bir təfəkkür et. Sən hər zaman belə gücsüz, aciz, qorxaq olmusan? Bu şəkildəmi olmusan? Əlbəttə ki, xeyr, sənin də xoşbəxt olduğun zamanlar, arzuların, xəyalların, nələrisə bacardığın zamanlar olub. Sadəcə müəyyən bir yaşa gəlib çatandan sonra sən də gəlib o “sürü”yə qoşulmusan. Otur düşün, o “sürü”yə qoşulmamışdan öncəki vaxtını tap. Bu fərqindəlikdir. O dönəmi tap, düşün ki, nəyi səhv etdim. Nəyi dəyişdirəndən sonra sənin həyatın daha pis tərəfə getdi. Həmişə deyirəm ki, sosial şəbəkələrdən uzaq durun. Əvvəllər gənclərə tövsiyə edirdim ki, kitablar oxuyun. Artıq son 5 ildir ki, gənclərə kitab da tövsiyə edə bilmirəm. Çünki son 5 ildə dərc olunan kitablar ki var, onlar da kapitalizmin əlindədir. Bütün gənclərin beynini məhv etdi, şüurunu, düşüncəsini dəyişdi. Gəncləri ideal olmağa, mütləq uğurlu olmağa sövq etdi, insani tərəflərdən uzaqlaşdırdı. Gənclərə deyirəm ki, oxumaq istəyirsənsə, klassiklərə müraciət et, Tolstoyu, Dostoyevskini oxu... Həyat onların kitablarında idi.

-Deməli, son 100 ildə kapitalizm çox şey dəyişdirib.

- Bəli, bu dəyişə-dəyişə də gedəcək.

Söhbətləşdi: Ülviyyə ŞÜKÜROVA

Stopnarkotik.az

Cəmiyyətin ağrılı nöqtələrinə toxunmaq hər sənətçinin cəsarət göstərə biləcəyi addım deyil. Bu gün sosial ədalətsizliklər, zorakılıq halları, haqsızlıqlar barədə danışan məşhurların sayı barmaqla sayılacaq qədər azdır. Onlardan biri müğənni Nura Suri, Xalq artisti Şeyx Əbdül Mahmudbəyov, biri də sənətkar Akif İslamzadədir. Onlar zaman-zaman gündəmin ən həssas mövzularına münasibət bildiriblər.

Bəs niyə əksər şou nümayəndələri bu cür mövzularda səssiz qalır? Onlar nə düşünür, nə hiss edir və niyə danışmırlar?

Yenisabah.az olaraq bu sualları müğənni Nura Suriyə ünvanladıq. Marqarita pizza

Müğənni bildirib ki, hər mövzuda fikirlərini yazır və bu onun vətəndaş mövqeyidir:

“Mən cəmiyyətdə nə görsəm, nə eşitsəm, onsuz da bu barədə özümün feysbuk hesabımda yazıram. Hər mövzuda da fikirlərimi bildirirəm. Bu həm də mənim vətəndaş mövqeyimdir. Bunun mənim müğənni olmağıma heç bir aidiyyatı yoxdur. Sırf xarakter məsələsidir. Bizim cəmiyyətdə insanlar çox danışan adamlardan qaçır. Yəni bu danışıb, yazdıqlarım mənə heç bir xeyir gətirmir. Bütün bunları kimsə haqqımda yaxşı, ya pis nəsə düşünsün deyə etmirəm. Hamısını içimdən gəldiyi üçün edirəm. Loru dildə desək, ürəyim partlamasın deyə yazıram”.

O həmçinin qeyd edib ki, bu yazdıqlarına görə, bir çox telekanallarda qara siyahıya salınır və senzuralara məruz qalır:

“Haqsızlıq edən başqa, görüb susan isə başqa məsuliyyət daşıyır. Bir insan olaraq mənim də mövqeyim bu yöndədir. Bu mənə heç bir xeyir də vermir, əksinə ziyan gətirir. Bir çox hallarda bəzi telekanallar tərəfindən qara siyahıya salınıram, senzuralara məruz qalıram. Hətta bəzi insanlar açıqsözlü olduğum üçün məni məclislərə də çağırmaqdan çəkinirlər. Amma yenə də gecə yatanda əlimi vicdanıma qoyub, rahat yata bilməyim mənim üçün daha önəmlidir. Bu hallarla da qarşılaşanda özümə söz verirəm ki, bir daha heç nə yazmayacam, deməyəcəm, amma yenə də olmur”.

Onun sözlərinə görə, Murad Arif və Faiq Ağayev də ara-sıra öz fikirlərini açıq şəkildə yazıb, paylaşırlar:

“Mən fikir vermişəm ara-sıra Murad Arif də bu cür fikirlər yazır, paylaşır. Çox gözəl də yazır. Doğru düzgün fikirlərini də çatdıra bilir. Onlardan biri də Faiq Ağayevdir. Bütün bunlar məni sevindirir. Hər ikisi də öz intelektual səviyyəsi ilə seçilir. Mən düşünürəm ki, belə insanları daha çox işıqlandırmaq lazımdır ki, başqalarına da örnək olsunlar. Bu insanları da həmin siyahıda qeyd etmək lazımdır. Əfsuslar olsun ki, bu sənətçilərin yazdıqları mətbuat tərəfindən az işıqlandırılır. Mən özümə qarşı onu deyə bilmərəm. Çünki mənim yazdıqlarımı hər zaman işıqlandırırlar. Mənim mediadan heç bir şikayətim yoxdur. Bu da mənə daha çox ilham verir”.

Müğənni müsahibə verməməsinin səbəblərini də açıqlayıb. O qeyd edib ki, demək olar, bütün verilən suallar haqqında danışıb və özünü təkrarlamaqdan bezir:

“Müsahibə verməməyimin səbəbi də odur ki, hər hansı bir problemi işıqlandırıramsa, o bu ana aiddir. Onu təkrar-təkrar vurğulamaq anlamsızdır. Müsahibəyə gəldikdə isə o verilən suallar haqqında ayrı-ayrı vaxtlarda feysbuk səifəmdə status yazaraq, cavab vermişəm. Bu da təkrarçılıq kimi çıxır və özüm-özümü təkrarlamaqdan bezirəm. 21 ildir bu səhnədəyəm və 21 ildir ki, yazıram. 21 ildir də müsahibə verirəm və demək olar ki, danışmadığım mövzu da qalmayıb. Hətta elə olub ki, yutub kanalında yayımlanan video müsahibə üçün 1 saat danışmışam, onun sadəcə 20 dəqiqəsi verilib. Qalan hissələri senzuraya görə kəsilib. Bu kəsiləcəksə, redaktə olunacaqsa, hansısa fikrim, sözüm dəyişəcəksə niyə yadnışıram. O qədər məni olmadığım kimi təqdim ediblər ki, ona görə də qorxuram. Öz fikrimi rahat şəkildə yaza bilirəm. Video müsahibədə isə bütün fikirlərim montaj olunur və insanlarda başqa fikir yaradır. Ona görə də müsahibə vermirəm”.

Aydan Hacıbalazadə

Estoniyanın təhsil naziri Kristina Kallas aparıcının səkkiz dəfə dördün neçə olduğu sualına cavab verə bilməyib.

Bu barədə vesti.ru xəbər verir.

Müsahibə zamanı aparıcının sualına nazir "təhsil yalnız riyazi düsturlar deyil", - deyə cavab verib. Sual təkrarlandıqda isə Kallas "bilmirəm" deyib.

Qeyd edək ki, Kristina Kallas təhsil və inteqrasiya sahəsində ekspert, siyasətçi və dövlət xadimidir. 2016-cı ildə o, politologiya üzrə doktorluq dissertasiyası müdafiə edib.

Yekaterinburqda OMON-çuların azərbaycanlılara hücumu zamanı 2 nəfər qətlə yetirilib, 5 nəfər isə saxlanılıb. Saxlanılan şəxslər xüsusi amansızlıqla döyülərək ağır işgəncələrə məruz qalıblar.

Şair və tərcüməçi Səlim Babullaoğlu Yekaterinburqda baş vermiş faciəli hadisə ilə bağlı Baku TV-yə açıqlama verib.

O, hadisənin milli-etnik zəmindəki gərginlik və bəzi şəxslərin şəxsi maraqları ilə əlaqəli olduğunu bildirib:

"Rusiya mediası yalan məlumat yayır. Bu məsələdə hüquq-mühafizə orqanlarının da iştirak etdiyinə dair ciddi şübhələr var. Biz bu hadisənin açıq şəkildə araşdırılmasını və ədalətin bərpa olunmasını tələb edirik".

Ətraflı süjetdə:

Tennis İdman Kompleksində qiyymətlər süni şəkildə qaldırılıb. Gənclər və İdman Nazirliyinin balansında olan Əlövsət Əbdurrəhmanov ünvanındakı bu kompleksdə teniss saatlarının qiyməti 20 manatdan 60 manatfadək artırılıb.

Bu iddianı “Xəzər Xəbər”ə müsahibəsində ehtiyatda olan zabit Ədalət İbrahimov səsləndirb. Qeyd edib ki, kompleksin rəhbərliyinin fəaliyyəti formal xarakter daşıyır, klub qeyri rəsmi formada kənar şəxslər tərəfindən idarə olunur. 2024-cü ildən klub üzvlərinə yaradılan şərait kənar şəxslərin idarəçiliyindən sonra sıxışdırılır:

Ədalət İbrahimov qeyd edib ki, baş verənlərlə bağlı klubun 35 nəfərlik üzvü Gənclər və İdman Nazirliyinə müraciət edib:

İddialara aydınlıq gətirmək məqsədi ilə Gənclər və İdman Nazirliyi ilə əlaqə saxladıq. Nazirlikdən məəsələ ilə bağlı araşdırma aparılacağı bildirildi.

Xezerxeber.az mövzu ilə bağlı daha ətraflı videomaterialı təqdim edir.

“İsrail İran rejiminin ömrünü uzatdı”

"Prezident Tramp tarixdə heç bir liderin bacarmadığına nail oldu - İran rejiminin nüvə proqramının məhv edilməsi və İsrail ilə İran arasında görünməmiş atəşkəs. Bu, həqiqətən heyrətləndiricidir!"

Donald Tramp öz səhifəsində İranla İsrail arasında atəşkəs elan edənədən sonra bu “bəy tərifini” Ağ Evin mətbuat katibi Karolin Levitt yayımlayıb...

Tramp özü isə NBC telekanalına müsahibəsində deyib: "Bu, Amerika üçün, Yaxın Şərq üçün böyük gündür. İşin öhdəsindən gələ bildiyimə görə şadam. Bu atəşkəs sonsuza qədər davam edəcək".

Tramp iddia edib ki, İsrail və İran münaqişənin sona çatması və sülhün bərqərar olması üçün “demək olar ki, eyni vaxtda” ona müraciət ediblər: “İsrail və İran demək olar ki, eyni vaxtda mənə müraciət edib “Sülh!” dedilər. Bilirdim ki, vaxtdır. Sülh və Yaxın Şərq əsl QALİBİDİR! Hər iki ölkənin böyük sevgi, sülh və firavanlıq gələcəyi var, onların qazanacaqları çox şey var”.

Üstəlik, Amerika lideri həm İsrailə, həm də İrana təşəkkür edib. O İrana ki, Tramp günlərdir onun rəhbərliyini bu savaşın əsas günahkarı hesab edir, hətta az qala terror yaymaqda ittiham edirdi. Əhalinin isə bu rejimi devirməli olduğuna eyham vurudu...

Beləliklə, tərəflər nəyə qadir olduqlarını göstərdilər. İsrail göstərdi ki, İranın hava məkanına sahib olmaq, istənilən nöqtəsində, istədiyi əməliyyatı keçirmək, istədiyi obyekti vurmaq imkanına malikdir. Üstəlik, yüksək çinli generalları, ordu və SEPAH rəhbərlərini məhv etməklə göstərdi ki, demək olar, İran həbi-siyasi rəhbərliyində heç kim özünü təhlükəsizlikdə hiss edə bilməz...

İran göstərdi ki, İsrailin “dəmir qübbəsi” keçilməz deyil. Atdığı raketlərin böyük əksəriyyəti vurulsa da, ara-sıra hədəfə çata biləni olur. Göstərdi ki, onu bombalayan ABŞ-nin hərbi bazasının yan-yörəsinə raket atmaq və atmazdan əvvəl də ABŞ-ni xəbərdar etmək “şakərindən” vaz keçməyib. Göstərdi ki, ABŞ və İsrailin regionda apardığı siyasətin bir parçası olaraq qalmaqdadır...

ABŞ isə dünyanın ən böyük bombardmançıları olan təyyarələrindən Fordo və Natanza 4 milyard dollar(!) dəyərində səkkiz superbomba atmaqla göstərdi ki, o, dünyanın ən zəngin və ən güclü, eyni zamanda da ən qəti və gözlənilməz addımlar atmağa qadir ölkəsi olaraq qalır...

Nəhayət, hər üç tərəf göstərdi ki, dünyada beynəlxalq hüquq, beynəlxalq nizam, ümumilikdə bəşəri dəyərlər, əxlaq, mənəviyyat adında heç nə qalmayıb. Dünya 3-5 başıpozuq, qəddar, yırtıcı liderin əlində qalıb...

Bəs bununla da Yaxın Şərqdəki İran-İsrail qarşıdurması, Fələstin məsələsi, proksi müharibələr və s. bitdimi? Əlbəttə ki, yox. Bundan sonra da hərə öz rolunu oynamaqda davam edəcək...

Azərbaycana gəlincə, İrandakı məlum qüvvələrin ermənilərlə birgə Azərbaycana qarşı təxribat cəhdləri baş tutmadı. Azərbaycanın guya İsrailin hücumu üçün şərait yaratdığı barədə şər kampaniyası heç bir effekt vermədi...

İrandakı hakim rejimin və xalqın aqibətinə gəlincə, ABŞ-də yaşayan ən nüfuzlu iranlı müxalifətçilərdən biri olan jurnalist Məsih Əlinejad bununla bağlı maraqlı fikir söyləyib. O deyib ki, İsrailin zərbələri müxalifətin hakimiyyət dəyişikliyinə olan ümidlərini puça çıxarıb və ayətullah rejiminin ömrünü faktiki olaraq 15-20 il də uzadıb. Bəlkə də əsas nəticə və ən düzgün qiymət də budur...
“AzPolitika.info”