 |
|
|
Azərbaycan Prezidenti İlham Əliyev Tacikistana səfər edəcək və sentyabrın 14-15-də Düşənbədə keçiriləcək Mərkəzi Asiya dövlət başçılarının görüşündə fəxri qonaq qismində iştirak edəcək.
Gununsesi.info xəbər verir ki, bu barədə TASS-a Tacikistan Xarici İşlər Nazirliyi məlumat verib. Beləliklə, bu sammitdə ilk dəfə olaraq regiondan kənar dövlət başçısı iştirak edəcək.
“Azərbaycan Prezidenti Mərkəzi Asiya Dövlət Başçılarının Beşinci Məşvərət Görüşündə fəxri qonaq qismində iştirak edəcək”, – Xarici İşlər Nazirliyinin nümayəndəsi bildirib.
Tədbirin proqramına əsasən, Tacikistan prezidenti Emoməli Rəhmonla İlham Əliyev arasında ikitərəfli görüş, o cümlədən İlham Əliyevin Mərkəzi Asiya dövlət başçılarının görüşündə çıxışı nəzərdə tutulub.
Qeyd edək ki, 2018-ci ildən keçirilən məşvərət görüşlərində əvvəllər Mərkəzi Asiyadan kənar ölkələrin dövlət başçıları iştirak etmirdilər. Eyni zamanda, onlara ən yüksək dövlət vəzifəsini tutmayan ölkələrin nümayəndələri də qatılıblar. Xüsusilə, Astanada keçirilən ilk iclasda Türkmənistanı o vaxtkı parlamentin rəhbəri Akca Nurberdiyeva təmsil edib. 2019-cu ildə Daşkənddə keçirilən görüşdə Qazaxıstanı eks-prezident Nursultan Nazarbayev təmsil edib. 2020-ci ildə təkbətək sammit keçirilməyib, 2021-2022-ci illərdə isə Türkmənistanın Avaza və Qırğızıstanın Çolpon-Ata şəhərlərində keçirilən görüşlərdə yalnız beş ölkənin prezidenti iştirak edib.
Proqrama əsasən, Rəhmonun Qazaxıstan prezidenti Kasım-Jomart Tokayev, Qırğızıstan prezidenti Sadır Japarov, Türkmənistan prezidenti Serdar Berdiməhəmmədov və Özbəkistan prezidenti Şavkat Mirziyoyev ilə də ikitərəfli görüşləri nəzərdə tutulub. İclasda bütün dövlət başçılarının çıxış edəcəyi də planlaşdırılır.