 |
|
|
“Dövlət Sirrinin Mühafizəsi üzrə İdarələrarası Komissiya haqqında Əsasnamə”yə dəyişiklik edilib.
Bununla bağlı Prezident İlham Əliyev fərman imzalayıb.
Dəyişikliyə əsasən, komissiyanın funksiyalarına aşağıdakı bənd əlavə olunub:
- dövlət sirri təşkil edən məlumatların yayılması nəticəsində Azərbaycan Respublikasının təhlükəsizliyinə vurula biləcək ziyanın kəmiyyət və keyfiyyət göstəricilərinə dair normativ və metodiki sənədlərin layihələrinə rəy bildirir.
Bununla yanaşı, İdarələrarası Komissiyanın sədrinin vəzifələri artırılaraq aşağıdakı kimi təsnif edilib:
"İdarələrarası Komissiyanın fəaliyyətini təşkil edir və ona rəhbərlik edir;
İdarələrarası Komissiyanın iş planını təsdiq edir və onun icrasına nəzarət edir;
İdarələrarası Komissiyanın iclaslarının gündəliyini müəyyənləşdirir, iclaslar çağırır və iclaslara sədrlik edir;
İdarələrarası Komissiyanın qərarlarını, iclas protokollarını və İdarələrarası Komissiyanın fəaliyyəti ilə bağlı digər sənədləri imzalayır;
İdarələrarası Komissiyaya daxil olan müraciətlərə “Vətəndaşların müraciətləri haqqında”, “İnzibati icraat haqqında” və “İnformasiya əldə etmək haqqında” Azərbaycan Respublikasının qanunlarına uyğun olaraq baxır və qanunla müəyyən edilmiş qaydada tədbirlər görür;
dövlət orqanlarından (qurumlarından), yerli özünüidarəetmə orqanlarından və hüquqi şəxslərdən İdarələrarası Komissiyanın fəaliyyəti ilə bağlı zəruri məlumatları, sənədləri və materialları alır;
İdarələrarası Komissiyanın fəaliyyətini təmin edən idarələrarası ekspert qrupları yaradır;
müqavilə əsasında dövlət və qeyri-dövlət müəssisə, idarə və təşkilatlarını, habelə ayrı-ayrı mütəxəssis və ekspertləri analitik-tədqiqat işlərinin aparılması üçün cəlb edir;
Azərbaycan Respublikası Prezidentinin razılığı ilə Katibliyin rəhbərini, Katiblik rəhbərinin təqdimatı əsasında Katibliyin işçilərini vəzifəyə təyin və vəzifədən azad edir;
Katibliyin fəaliyyətinə nəzarət edir;
işçilərin say həddi daxilində Katibliyin ştat cədvəlini və ayrılmış büdcə təxsisatı daxilində xərclər smetasını təsdiq edir;
Katibliyin işçiləri barəsində həvəsləndirmə və intizam tənbehi tədbirləri görür, fərqlənən işçiləri İdarələrarası Komissiyanın təsis etdiyi döş nişanları ilə və fəxri fərmanlarla təltif edir;
qanunlarla, həmçinin Azərbaycan Respublikası Prezidentinin aktları ilə müəyyən edilmiş digər vəzifələri yerinə yetirir və hüquqlardan istifadə edir".
Bununla yanaşı, Əsasnamənin 9-cu hissəsi də yenilənib:
"İdarələrarası Komissiyanın iclasları sədr tərəfindən təsdiq olunmuş iş planı əsasında keçirilir.
Növbədənkənar iclaslar İdarələrarası Komissiya sədrinin və ya üzvlərinin yarıdan çoxunun təşəbbüsü ilə çağırıla bilər.
İdarələrarası Komissiyanın iclasları onun üzvlərinin üçdə ikisi iştirak etdikdə səlahiyyətli hesab edilir. Komissiya üzvünün iclasda iştirak etməsi mümkün olmadıqda, müzakirə edilən məsələlər barəsində onun fikri yazılı surətdə təqdim edilə bilər.
İdarələrarası Komissiyanın iclaslarında qərarlar açıq səsvermə yolu ilə, iclasda iştirak edən İdarələrarası Komissiya üzvlərinin sadə səs çoxluğu ilə qəbul edilir. Səsvermə zamanı üzvlərin bitərəf qalmasına yol verilmir. Qərar qəbul edilərkən səslər bərabər olduqda, İdarələrarası Komissiya sədrinin səsi həlledici hesab edilir.
İdarələrarası Komissiyanın hər hansı bir üzvü qəbul edilən qərarla razı olmadıqda, onun xüsusi rəyi iclas protokoluna əlavə edilir". Musavat.com
“Ukrayna ərazisinə gündəlik hücumları ilə Rusiya ABŞ ilə başladığı danışıqların effektliyində maraqlı olmadığını göstərir”.
Bunu aprelin 7-də Brüsseldə keçirdiyi brifinqdə Avropa Komissiyasının mətbuat katibi Anitta Hipper bildirib.
“Rusiyanın hər gün nümayiş etdirdiyi hərəkətlərdən, o cümlədən 9-u uşaq olmaqla azı 20 mülki şəxsin ölümünə səbəb olan son hücumlardan söhbət gedəndə, Rusiya danışıqlara tamamilə hörmətsizliyini göstərir. Rusiya hər gün onlara heç bir marağı olmadığını nümayiş etdirir”, - deyə Hipper vurğulayıb.
Onun sözlərinə görə, daimi və hərtərəfli sülh əldə etmək üçün atəşkəsi təmin etmək həqiqətən çox vacibdir: “Ancaq məsələ Putinə aid olanda və onun qanlı hücumlarını hər gün görəndə sadəlövh ola bilmərik”.
Avropa Komissiyasının sözçüsü bildirib ki, sülh danışıqlarının nəticəsi daha güclü Ukrayna olmalıdır, çünki Putin zəifliyə hörmət etmir.
“Ona görə də biz Ukraynanı güclü mövqeyə qoymalıyıq. Məhz buna görə də bu münasibətdə biz müdafiə dəstəyimizi və bununla bağlı imkanlarımızı artırmaq öhdəliyi götürmüşük”, - deyə Anitta Hipper söyləyib.
Xatırladaq ki, bir gün əvvəl Fransa prezidenti Emmanuel Makron bildirib ki, Rusiya Ukraynanın mülki əhalisinə zərbə endirməklə danışıqlar təkliflərini ələ salır.
Qərbin Ukraynadakı bir sıra səfirlikləri aprelin 6-da Krivoy Roqda həlak olan mülki şəxslərin, o cümlədən 9 uşağın xatirəsinə bayraqlarını endiriblər.
Türkiyənin Cümhuriyyət Xalq Partiyasının (CHP) sədri Özgür Özəl 1 171 səslə yenidən partiyanın rəhbəri seçilib.
Bu barədə “Halk TV” məlumat yayıb.
“CHP-nin <…> təşkil etdiyi 21-ci Fövqəladə qurultayında nümayəndələrin səsvermə prosesi başa çatdı. Qurultayda 1 171 nümayəndə səs verdi. CHP sədrliyi üçün yeganə namizəd olan Özgür Özəl, rəsmi olmayan nəticələrə görə, səslərin hamısını alaraq rekord səslə yenidən CHP-nin sədri seçildi”, – məlumatda bildirilib.
Namiq Bilal
ABŞ-nin İranla bağlı planlarında iki prioritet məsələ var. Bunlardan birincisi İslam Respublikasının nüvə potensialının məhv edilməsidir. Burda Ağ Evin geri addım atması mümkünsüzdür. İkinci prioritet məsələ isə molla rejiminin ayaqda saxlanmasıdır.
İlk baxışda ziddiyyətli görünür. Lakin ABŞ-nin və onun yanındakı İsrailin bu günə qədər reallaşdırdıqları Böyük Orta Doğu siyasəti ziddiyyətli kimi görünən bu iki xəttin yan-yana aparılmasıdır. Yol xeyli uzun oldu, amma sonuna yaxınlaşılır. Çoxdan gözlənilən qaynar hesablaşma gününün doğuracağı nəticələri hesablamaq üçün tərəflərin hansı qırmızı xəttlərinin olduğunu araşdırmağa çalışaq.
ABŞ - İsrail cütlüyü üçün qırmızı xətt İranın nüvə silahına sahib olmasıdır. Buna əsla imkan verməyəcəklər. İranın nüvə silahına sahib olması Birləşmiş Ştatların on illər boyunca qurduğu Böyük Orta Doğu arxitekturasını və İsrailin təhlükəsizliyi məsələsini darmadağın edərdi. İran atom bombası yaradacaqsa, Türkiyə və Səudiyyə Ərabistanı da avtomatik olaraq nüvə silahı əldə edəcəklər. Bir anlığa təsəvvür edək: İranın, Türkiyənin və Səudiyyə Ərabistanının əlində atom bombası var. Belə şəraitdə ABŞ - İsrail tandeminin Orta Doğudakı strateji üstünlüyündən söhbət belə gedə bilməz.
Yuxarıda deyildiyi kimi, ABŞ üçün İranla bağlı ikinci prioritet məsələ fars-molla rejiminin hakimiyyətdə qalmasıdır. Birləşmiş Ştatlar üçün fars rejimli İran iki mühüm funksiyanı yerinə yetirib. Bunlardan birincisi məzhəb düşmənçiliyi və İran - İsrail düşmənçiliyi üzərində qurulmuş idarə olunan konfliktlərdir. Bu kontrollu konfliktlər vasitəsi ilə Ağ Ev Böyük Orta Doğunu on illər boyunca bölüb və öz nəzarətində saxlayıb. İkinci mühüm funksiya isə odur ki, fars rejimli İran böyük Türk dünyasına qarşı ˝protivoves˝ rolunu oynayır. Türk dünyasını buxovlamaq üçün Qərb bu funksiyadan əsrlər boyu yararlanıb.
Qayıdaq molla rejiminin ABŞ ilə münasibətlərindəki qırmızı cizgiyə. Rəsmi Tehranın ən böyük qorxusu İranda iç toqquşmaların vüsət alması və dövlətin parçalanmasıdır. Bu məsələdə əsas təhlükə İran türklərindən gəlir. Son günlərin Urmiya hadisələri İrandakı türk faktorunun fars rejimi üçün nə qədər təhlükəli olduğunu bir daha aşkar şəkildə göstərdi. Çeşidli kəşfiyyat qurumlarının açıqladığı məlumatlara görə, fars rejimi nüvə bombası yaratmanın bir addımlığındadır. Deməli, manevr üçün əlavə vaxt yoxdur, İran nüvə silahı yaratmaqdan və raket texnologiyalarını inkişaf etdirməkdən vaz keçməsə, nüvə potensialı ağır bombalarla məhv ediləcək.
Planı həyata keçirmək üçün Pentaqon real hazırlıq işlərinə start verib. Hind okeanında, İrandan 4 min km məsafədə yerləşən və İngiltərənin nəzrətində olan Diyeqo Qarsiya adasına çox böyük ölçüdə silah-sürsat yığılır. Adaya yeraltı obyektləri dağıda bilən xüsusi bombalar və ağır bombardman təyyarələri yerləşdirilir.
Sual yarana bilər: ABŞ-nin Orta Doğu ölkələrində çox sayda hərbi bazası olduğu halda əməliyyatlar nə üçün belə uzaq adadan aparılacq?
Cavab sadədir. Tehranın cavab zərbələrindən ehtiyyat edən Orta Doğu ölkələri öz ərazilərindəki bazalardan İrana zərbə endirilməsinə izn vermirlər. Diyeqo Qarsiya detalı ABŞ-nin İranla bağlı planlarının gerçəkliyini göstərən faktor kimi nəzərdən keçirilə bilər.
Tərəflərin qırmızı cizgiləri bilinirsə, hadisələrin hansı istiqamətdə inkişaf edəcəyini də təxmin etmək olar. ABŞ real müharibə hazırlığı başladaraq öz qırmızı xəttindən geri addım atmayacağını göstərir. Birləşmiş Ştatlar üçün maksimum plan İranın nüvə potensialını yox etmək və fars rejimini hakimiyyətdə saxlamaqdır. İran üçünsə maksimum plan, nüvə potensialı da daxil, bütün hərbi strukturunu qoruyub saxlamaq, ölkəni iç toqquşmalardan və parçalanmaqdan qorunmaqdır.
Ağ Ev stavkasını edib, top İran tərəfdədir. Fars rejimi öz hərbi obyektlərinin vurulması halında İsraili və ABŞ-nin regiondakı bazalarını sərt şəkildə vürmaqla hədələyir. Bu, molla rejiminin blefidir. Belə ki, fars rejimi ABŞ bazalarını və İsraili həqiqətən vurarsa, qarşı tərəfin zərbələri yalnız nüvə obyektləri ilə məhdudlaşmayacq, İranın neft-qaz sənayesi başda olmaqla bütün infrastruktur obyektləri, həkimiyyət quruluşları və.s. çox ağır bombardmanlara məruz qalacaq. Həmin obyektlər yer altında gizlədilməyib, onları yerlə yeksan etmək üçün adi aviabombalar da yetərlidir. Belə ağır bombalama nə fars hakimiyyətinə, nə də İran adlı dövlətin bütöv qlmasına şans tanımaz.
Bu gün ABŞ və İran arasında bir sinir müharibəsi gedir. Tərəflər gərginliyi ən yüksək həddə qaldırırlar. Lakin fars rejimi Ağ Evin bombalama qərarının real olduğunu gördüyü anda, böyük ehtimalla, danışıq masasına oturacaq. İran qarşısında qoyulan şərtlər çox ağır və alçaldıcıdır. Ölkə həm nüvə silahı potensialından, həm də raket texnologiyalarından imtina etməlidir. Tehran gərginliyi o həddə qədər artırıb ki, təslimçi danışıqlar masasına oturması molla rejiminin ˝qorxudulduğu və sındırıldığı˝ anlamına gələcək. Bu səbədən, nisbətən daha kiçik ehtimal kimi, fars rejiminin bu texnologiyalardan imtina etməyəcəyi versiyası da nəzərdən keçirilməlidir.
İran məğlubiyyət masasına oturmayacaqsa, ABŞ İranın nüvə potensialına zərbələr endirəcək. Həmin zərbələrin nə dərəcədə effektli olacağı bilinmir. İstənilən halda molla rejimi nə İsrailə, nə də ABŞ-nin regiondakı bazalarına öldürücü zərbələr endirməyəcək. Çünki belə zərbələrin fars rejimi və İranın bütövlüyü üçün ölüm hökmü olduğunu rəsmi Tehran çoxdan hesaba alıb.
Nüvə potensialının məhv edilməsi isə fars rejiminin və İranın bütövlüyünün məhv edilməsi demək deyil.
azpolitika.info
Türkiyə ilə Azərbaycan arasında enerji sahəsindəki əməkdaşlıqda yeni səhifə açılır.
“Report” xəbər verir ki, bunu Türkiyənin enerji və təbii sərvətlər naziri Alparslan Bayraktar “Anadolu”ya müsahibəsində deyib.
O bildirib ki, Azərbaycanda istehsal olunacaq elektrik enerjisinin, xüsusilə də bərpa olunan enerjinin Gürcüstan və Naxçıvan üzərindən Türkiyəyə ötürülməsi imkanları nəzərdən keçirilir: “Əlbəttə, biz bunu Avropa bazarı ilə birləşdirmək istəyirik”.
Nazir, həmçinin söyləyib ki, Türkiyə bu il Türk Dövlətləri Təşkilatının (TDT) enerji nazirlərinin iclasına ev sahibliyi edəcək: “Azərbaycanla davam edən ikitərəfli əməkdaşlığı çoxtərəfli əməkdaşlığa çevirməyi və beləliklə iqtisadi həcmi genişləndirməyi planlaşdırırıq”.
Xəzər dənizindən təbii qazın əvvəlcə Türkiyəyə, oradan da Avropaya nəqlini təmin edən Cənub Qaz Dəhlizinin dünya miqyaslı layihə olduğunu vurğulayan Bayraktar bunun iki ölkə liderlərinin güclü siyasi iradəsi sayəsində həyata keçirildiyini qeyd edib.
"Məqsədimiz 16 milyard kubmetr tutumlu TANAP-ı 31 milyard kubmetrə çatdırmaqdır. Türkiyə hər zaman olduğu kimi həm mühüm bazar, həm də təbii qaz mərkəzi olaraq üzərinə düşəni etməyə hazırdır. Azərbaycan neftinin Bakı-Tbilisi-Ceyhan xətti ilə Türkiyə üzərindən nəqli dünya neft bazarlarına əhəmiyyətli töhfələr verir”
Türkiyə Prezidenti Rəcəb Tayyib Ərdoğanın ABŞ-a səfərinin tarixi hələ müəyyən edilməyib.
TEREF "Anadolu"ya istinadla xəbər verir ki, bu barədə ölkə lideri özü məlumat verib.
“Ancaq eyni zamanda xarici işlər nazirim (Hakan Fidan) və ticarət nazirim (Ömər Bolat) ABŞ-la bağlı görüşləri və ya səyahət planları ola bilər”, - Ərdoğan bildirib.
Ərdoğan həmçinin "Türkiyəyə qarşı gördükləri müsbət yanaşmanın konkret hərəkətlərə çevriləcəyinə" ümid etdiyini bildirib./publika.az
“Dağlıq Qarabağ”ın ləğvi haqqında fərmanın dərcindən sonra bu məsələ Ermənistan və Azərbaycan arasında dövlətlərarası münasibətlərin normallaşdırılması gündəliyindən çıxarıldı.
Axar.az xəbər verir ki, bu barədə Ermənistan XİN “Azadlıq” radiosunun erməni xidmətinin sualına cavab olaraq bildirib.
“Biz keçmişdə dəfələrlə bəyan etmişik ki, Azərbaycanla apardığımız danışıqlarda Ermənistan Dağlıq Qarabağ ermənilərinin təhlükəsizliyini və hüquqlarını təmin etməyə çalışır, o cümlədən bu məsələlərin həlli üçün beynəlxalq mexanizmin yaradılmasına cəhd edir.
Dağlıq Qarabağ ermənilərinin “məcburi köçürülməsi” (ermənilər könüllü olaraq, Azərbaycan vətəndaşlığını qəbul etmədikləri üçün köçüblər və bunu təsdiqləyən video, foto və sübutlar var – red.) və Dağlıq Qarabağın ləğvi haqqında fərman dərc edildikdən sonra bu məsələ Ermənistan Respublikası ilə Azərbaycan Respublikası arasında dövlətlərarası münasibətlərin tənzimlənməsi gündəliyindən çıxarılıb”, - deyə nazirlikdən vurğulanıb.
Qeyd edək ki, Prezident İlham Əliyev Almaniya Prezidenti Ştaynmayerlə Bakıda mətbuat konfransında Ermənistanın bu məsələni sülh sazişinə salmağa çalışdığını, yalnız antiterror əməliyyatından sonra bu absurd iddiasından əl çəkdiyini bildirmişdi.
İran Prezidenti Məsud Pezeşkian ABŞ Administrasiyasının danışıqlara çağırışları ilə İrana qarşı təhdidlərini ziddiyyət kimi qiymətləndirib və bunu tənqid edib.
TEREFz xəbər verir ki, o, Tehranın yalnız bərabərhüquqlu danışıqlara razılıq verəcəyini bildirib.
İranın xarici siyasətində digər dövlətlərlə münasibətlərin vacibliyini vurğulayan Pezeşkian amerikalı həmkarı Donald Trampın İranla danışıqlarla bağlı çağırışına cavab olaraq, ölkəsinin bərabər şərtlər əsasında dialoqun tərəfdarı olduğunu diqqətə çatdırıb.
O, ABŞ-ın İranı təhdid etmək, eyni zamanda danışıqlara çağırmaq kimi ziddiyyətli siyasətini rədd etdiyini söyləyib.
“Bu gün ABŞ təkcə İrana qarşı deyil, bütün dünyaya qarşı bu cür alçaldıcı davranır. Bu isə danışıqların ruhuna ziddir”, – deyə İran Prezidenti əlavə edib.
Qeyd edək ki, Tramp bir müddət əvvəl danışıqlara başlamaq üçün İrana məktub ünvanlayıb.
Pezeşkian buna cavabında ABŞ-la birbaşa danışıqları istisna etsə də, Tehranın dolayı danışıqları məqsədəuyğun variant kimi nəzərdən keçirdiyini bildirib. /APA
ABŞ Senatının üzvü Mayk Li Avropa İttifaqını (Aİ) hədələyib.
TEREF xəbər verir ki, o, bu barədə “X” hesabında yazıb.
“Aİ bunu etsə (Aİ “X”i cərimələməsə – red.), biz NATO-dan çıxacağıq”, - Li bildirib.
Qeyd edək ki, daha əvvəl “The New York Times” mənbələrə istinadən xəbər vermişdi ki, Avropa tənzimləyiciləri “X”ə 1 milyard dollardan çox cərimə tətbiq etməyi düşünürlər.
Yanvar ayında “Handelsblatt” qəzeti Aİ-nin yüksək vəzifəli rəsmilərinə istinadən xəbər vermişdi ki, Avropa Komissiyası (AK) “X” ilə bağlı araşdırmanı başa çatdırıb və 100 milyon dollardan çox cərimə ilə üzləşib. Aİ-nin “X” ilə bağlı araşdırması 2023-cü ilin dekabrında başlayıb. AK şirkətin məhkəmə qərarı olmadan Aİ-də qadağan olunmuş kimi qeyd olunan məzmunu silməyə məcbur edən Rəqəmsal Xidmətlər Aktını (DSA) pozmasından şübhələnir.
Yeniavaz.com
Musavat.com xəbər verir ki, Kremlin xüsusi nümayəndəsi Kirill Dmitriyev və ABŞ prezidenti Donald Trampın Rusiya üzrə danışıqlar nümayəndəsi Stiv Vitkoff arasında Vaşinqtonda Ağ Evdə iki günlük danışıqlar baş tutub.
Bu, 2022-ci ildə Rusiya-Ukrayna müharibəsinin başlamasından sonra iki ölkə arasında keçirilən ilk yüksək səviyyəli ikitərəfli görüşdür.
Görüş barədə ictimaiyyətə məhdud məlumat verilsə də, ABŞ rəsmiləri prosesin “birbaşa dialoqun bərpası” məqsədi daşıdığını bildiriblər.
Görüşü Rusiya tərəfi rəsmi şəkildə təsdiqləyib. Kirill Dmitriyev öz Telegram kanalında açıqlama yayaraq bildirib:
“Rusiya və ABŞ arasında məhsuldar dialoq seçim deyil, zərurətdir.”
Danışıqlar ABŞ administrasiyasının Ukraynada atəşkəs və münaqişənin diplomatik yolla həlli təşəbbüslərinin dayandığı bir vaxtda baş tutub. WSJ və Reuters-in məlumatına görə, Dmitriyev görüşlər zamanı enerji, strateji sabitlik və sanksiyaların qarşılıqlı nəticələri mövzusunda geniş təkliflər irəli sürüb.
O, ABŞ-ın Rusiyaya qarşı tətbiq etdiyi sanksiyaların təkcə Moskvanı deyil, həm də Amerika biznesini zərərli şəkildə təsirləndirdiyini bildirib və enerji və mineral resurslar sahəsində əməkdaşlığın bərpasını təklif edib.
ABŞ Senatında isə danışıqlara paralel olaraq bəzi senatorlar Rusiyaya qarşı yeni sanksiyalar paketi hazırladıqlarını açıqlayıblar. Bu, Tramp administrasiyasının Moskva ilə yaxınlaşma siyasətinə qarşı çıxan siyasi dairələrin fəallığını göstərir.
Kirill Dmitriyev bəyan edib ki, bəzi qüvvələr ABŞ və Rusiya arasında gərginliyi artırmaq və Moskvanın mövqeyini təhrif etmək istəyir. Onun fikrincə, Vaşinqton və Moskva arasında birbaşa danışıqlar qərarverici regional və qlobal məsələlərin həllində əvəzolunmazdır.
Musavat.com