Azərbaycanın "Express Baku” voleybol klubunun direktoru, ömrünün 44 ilini ölkədə voleybolun inkişafına həsr etmiş təcrübəli mütəxəssis, Əməkdar Məşqçi İntizar Məmmədova Voleybol Federasiyasından (AVF) şikayət edib. Mütəxəssisin şikayəti AVF-nin onun rəhbərlik etdiyi komandaya diqqətsizliyi, əziyyətini dəyərləndirməməsi və 9 aydır əməkhaqqı almaması ilə əlaqədardır.

Qaynarinfo-ya açıqlamasında AVF-yə sərt ittihamlar səsləndirən Məmmədova haqqını tələb etdiyini bildirir:

"Mən 1978-ci ildən Azərbaycan Dövlət Bədən Tərbiyəsi və İdman Akademiyasının voleybol üzrə məşqçilik fakültəsini fərqlənmə diplomu ilə bitirmişəm. 20 il ölkəmizin ali məktəblərinin birində bədən tərbiyəsi və idman kafedrasında baş müəllim, 2001-2010-cu illərdə "Azərneft” voleybol klubunda təlimatçı kimi çalışmışam. 2011-2014-cü illərdə Azərbaycanın kişilərdən ibarət voleybol üzrə millisinə rəhbərlik etmişəm. 2014-cü ildə "Express Baku”nu Azərbaycan Voleybol Federasiyasının vitse-prezidenti Faiq Qarayevin göstərişi ilə yaratmışam və klubun direktoruyam. İstedadlı gənclərin voleybola cəlb olunmasında zəhmətim az olmayıb. Rəhbərlik etdiyim "Express Baku” voleybol klubu 8-9 ildir ki, Azərbaycan çempionatında çıxış edir. Klubun tərkibində daim gənc və perspektivli oyunçular olub. 2022-ci ilin iyulunda AVF-nin iclasında "Express Baku”nun növbəti oyun mövsümündə iştirak etməyəcəyi fikri kiminsə tərəfindən səsləndirilib. Əlbəttə, mən həmin iclasa dəvət olunmamışdım və onların bu qərarını başqa insanlardan eşitdim. Voleybol Federasiyasının rəsmilərinin bu qərarının əsl motivi mənə gün kimi aydındır – onların başlıca məqsədi, "Express Baku”nu yenidən dağıtmaq (bu artıq sayca dördüncü təxribat idi) və oyunçuları "oğurlamaq” idi”.

O, AVF-nin prezidenti Cavid Qurbanovla görüşmək istəsə də, bütün səylərinin boşa çıxdığını deyir:

”2022-ci ilin avqust-sentyabr ayında Rəqəmsal İnkişaf və Nəqliyyat Nazirliyində qəbula yazılmağıma baxmayaraq, Cavid Qurbanov məni nə qəbul etdi, nə də qulaq asdı. Bununla əlaqədar dörd ay müddətində dəfələrlə federasiyada oldum, vitse-prezident Faiq Qarayevlə, baş katib Fərid Xəlilovla görüşdüm. Lakin mənə yalnız bir söz deyilirdi: "pul yoxdur". Onların sözlərinə görə, Cavid müəllim yalnız iki klubu – "Azərreyl” və "Murov”u, həmçinin Federasiyanı saxlaya biləcəyini, qalan klublara isə pul ayırmaq fikrində olmadığını deyir. Federasiyadan təklif etdilər ki, "Ekspress Baku” bu mövsüm Birinci Liqada oynasın. Bilirsiniz niyə? Çünki Birinci Liqaya ümumiyyətlə, pul ayrılmır”.

Təcrübəli mütəxəssis oyunçuların "oğurlanması” məsələsinə də aydınlıq gətirib. O, hələ keçən il klubları Superliqa oyunlarında çıxış edərkən, bütün məşqçlərin oyunçuları böyük maraqla izlədiyini bildirir:

"Ümumiyyətlə, həmişə belə olub. Azərbaycan çempionatının istər Birinci Liqa, istərsə də Superliqa yarışlarında iştirak edərkən, 15-16 oyunçumuz meydançada görünürdü və hər kəsdə təəccüb, maraq yaranırdı ki, İntizar xanım bu qədər oyunçunu hardan tapa bilib? Keçən mövsüm Superliqa yarışları başa çatdıqdan sonra iki oyunçumuz – Rəşad Əliyevlə Ələsgər Mustafayev millinin heyətinə dəvət olundular və bir müddət təlim-məşq toplanışında iştirak etdilər. İndi həmin oyunçular və əlavə daha 3 nəfər mənə məlumat verilmədən "Neftçi”yə aparılıblar. Həmin 5 oyunçudan ikisinin boyu 200 sm-dir. Azərbaycan voleybolunda neçə belə ucaboylu oyunçu var? Daha bir voleybolçum isə razılığım olmadan ”Xarıbülbül”ə getdi. Məsələ ilə əlaqədar, dəfələrlə Neftçi İdman Sağlamlıq Mərkəzinin rəhbəri Sadıq Sadıqova müraciət etdim və oyunçularımın bu şəkildə aparılmasına öz etirazımı bildirdim. Çünki oyunçunun bir klubdan digərinə keçməsi reqlament ilə nizamlanır. Əlbəttə, sözügedən hadisələrin bu cür qeyri-qanuni şəklidə cərəyan etməsində AVF-nin da böyük günahı var. Çünki onlar öz yazdıqları və qəbul etdikləri reqlamentə hörmət etmirlər. Bu oyunçu "oğurluğu” deyilsə, bəs nədir?"

Mütəxəssis onun klubuna qarşı qərəzli mövqe sərgiləndiyini də bildirir:

"Uzun illər bu oyunçularla işləmişəm. Hətta əmək haqqı almadığım dövrlərdə belə həmin oyunçuları klubda saxlamağı bacarmışdım. 8 il iştirak etdiyim çempionatda, klubumuza ayrılan vəsait çox cüzi olub və bu, ancaq 3-4 mövsümü əhatə edib. Təsəvvür edin, mənə ayrılan vəsait 2019-2020-ci il oyun mövsümündə cəmi 4000 manat olub. İndi Cavid Qurbanovdan soruşuram: Azərbaycanda hansı kollektiv idman növündə bu məbləğə klub maliyyələşdirilir? Xahiş edirəm sualımı cavablandırın. Hazırda AVF-də vəzifə tutan rəhbər işçilərin əmək haqları 5000 manatdır. Yeganə klub rəhbəri mənəm ki, mütəxəssis və Azərbaycanın Əməkdar Məşqçisi olmağıma rəğmən, 9 aydır əmək haqqından məhrum ediblər. "Azərreyl”in prezidenti Dağıstan Hüseynov, "Murov”un rəhbəri Zaur Musayev, "Abşeron”un prezidenti İlkin Qasımov, federasiyanın 70 yaşlı vitse-prezidenti Əbülfəz Hüseynov, həmçinin adlarını çəkmək belə istəmədiyim başqa şəxslər Cavid Qurbanovun qohum-əqrəbası, yaxın adamlarıdırlar və Azərbaycan voleyboluna heç bir aidiyyatı olmayan insanlardır. Onların əksəriyyəti banklardan, restoranlardan, nə bilim, barlardan AVF-yə dəvət olunur və yüksək əmək haqqı alırlar. Belə qənaətə gəlmək olur ki, Qurbanov AVF-ni maliyyələşdirmək adı altında, sadəcə, öz qohum-əqrəbasını saxlayır. Təkcə yuxarıda qeyd etdiyim şəxslərin əmək haqlarını bir yerə toplasaq, 3 klubu maliyyələşdirmək mümkündür”.

İntizar xanım AVF-nin baş katibi Fərid Xəlilovun özünə yüksək maaş yazdığını da deyir:

"Əvvəla, qeyd edim ki, onu heç kim baş katib vəzifəsinə seçməyib. Xəlilovun da voleybola heç bir aidiyyatı yoxdur. Onun adamı Azərbaycan Dəmir Yolları QSC-nin sədr-müavini Vüsal Aslanovdur. Xəlilov məhz bu insanın vasitəsi ilə AVF-nin baş katibi vəzifəsinə gəlib. Avropa ölkələrinin voleybol federasiyalarında baş katib vəzifəsini icra edən şəxslər ictimai əsaslarla işləyirlər. Avropada bu qədər yüksək əmək haqqını vitse-prezidentlər belə almır. Orada əsas güc, yəni maliyyə vəsaitləri klublara yönləndirilir. Çünki uşaqlar, yeniyetmələr, gənclər klublarda yetişir və sonradan milli komandalarda formalaşırlar. Bizdə isə bu tam əksinədir. Soruşa bilərsiniz, mən bunları hardan bilirəm? 2011-2014-cü illərdə kişilərdən ibarət yığmamıza rəhbərlik edərkən, dəfələrlə Avropanın müxtəlif şəhərlərində keçirilən tədbirlərdə olmuşam. Görüşdüyüm insanlarla ünsiyyət qurmuşam, ölkə federasiyaları və klublar haqqında məlumat toplamışam. Yeri gəlmişkən deyim ki, AVF-nın baş katibi Xəlilov bu vəzifəni ələ keçirdikdən sonra özünə 5000 AZN maaş təyin edib. Hətta sürücüsünə təyin etdiyi əmək haqqı, bizim voleybol federasiyasının bəzi əməkdaşlarının məvacibindən qat-qat yüksəkdir. Federasiyaların baş katibləri adətən bütün təşkilati işləri aparan, demək olar, bu qurumların "çalışan beyinləri” hesab olunur. Onlar qurumlarda bütün problemləri həll edən, hər bir məşqçi, oyunçu və klub rəhbərinə öz kömək əlini uzadan şəxslərdirlər. Fərid Xəlilov isə ancaq öz mənfəətini güdür. Belə olmasaydı, o, özünə maliyyəçi adı qoyaraq, klublara ayrılan pullarla şəxsi problemlərini həll etməzdi. "Murov” və "Azərreyl” "Çağırış Kuboku”na qatıldılar. Amma mübarizəni tez dayandırmalı oldular. Hər bir klubun, istər "Çağırış Kuboku”, istərsə də CEV kubokuna qatılmaq haqqı var. Buna zəmin olmalıdır. Federasiya rəhbərliyi maliyyənin kifayət qədər olmamasını əsas gətirirsə, bəs nəyə görə işlər bu qədər qeyri-peşəkarcasına icra olunur? "Murov” və "Express Baku”nu maliyyə cəhətdən müqayisə etsək, dəhşətli fərqlə üzləşərik. "Murov”a hər ay 150000 AZN pul ayrılır. Bizim kluba isə bir qəpik belə dəstək göstərilmir. Bunun hansı səbəbdən baş verdiyini gəlin analiz edək.

Mən "Murov”un işi ilə yaxından tanışam. Bu vaxta qədər klubda bir nəfər oyunçu yetişdirilməyib. Hər mövsüm yüksək maliyyə ilə təmin olunmalarına baxmayaraq, onlar oyunçu yetişdirmək marağında deyillər. Yüksək əməkhaqqı, ən yaxşı şərait və daha çox vəsait hesabına illərdir ki, bu klubun məşqçiləri başlarını girələyirlər. Məqsədləri hər zaman xarici ölkələrdən oyunçu gətirmək və bu oyunçuların hesabına çempionatın medallarını qazanmaq olub. "Çağırış Kuboku”nda da işlər ancaq bu istək üzərində qurulub. Qonşu ölkələr, istər Rusiya, istər Türkiyə və həmçinin Avropa ölkələri "Çağırış Kuboku”nda gəncləri, 17-18 yaşlı oyunçuları cəlb edirlər. Bizdə isə 30-35 yaşlı kişiləri meydançaya çıxarmaqla sensassiya yaratmaq istǝyirlər. "Çağırış Kuboku”nda iştirak etmək üçün "Murov”un rəhbərliyi tərəfindən xarici ölkələrdən dəvət olunmuş yararlı və yararsız oyunçuların hər biri ilə 4000 manat məbləğində imzalanmış müqavilələri, onların icazəsi üçün beynəlxalq qurumlara ödənilən rüsumları, yol, ev və yemək xərclərini, sonradan dəvət olunan daha "peşəkar” oyunçular üçün çəkilən xərcləri nəzərə alsaq, görərik ki, külli miqdarda vəsait göyə sovrulur və dağıdılır. Bu qədər səriştəsiz qurulmuş işlərin nəticəsində "Murov” "Çağırış Kuboku”nda öz çıxışını yarımçıq dayandırmalı oldu”.

Keçmiş voleybolçu maliyyə vəsaiti üçün klub rəhbəri kimi digər qurumlara da müraciət ünvanladığını deyir:

"Hələ sentyabrın əvvəllərində maliyyə məsələsi ilə əlaqədar bir neçə iş adamına məktub vasitəsilə müraciət etdim. Lakin nəticəsiz qaldı. "Express Baku”nun tərkibinin əsasən yeniyətmə və gənc oyunçulardan ibarət olmasını nəzərə alaraq, Azərbaycan Respublikasının Elm və Təhsil naziri Emin Əmrullayevə də məktub göndərdim. Həmin məktubda klubumuzun üzvləri arasında həm yuxarı sinif şagirdləri, həm də ali məktəbin 1-ci, 2-ci kurs tələbələri olduğunu nəzərə çatdırdım. Amma mənə bildirildi ki, nazirliyin xərclər smetasında sponsorluq məqsədi üçün vəsait nəzərdə tutulmayıb. Həmin məktubu alandan sonra, belə qənaətə gəldim ki, cənab Əmrullayev Azərbaycan Basketbol Federasiyasının prezidenti vəzifəsini icra edir. Heç bir basketbol klubu Cavid Qurbanova məktub yazıb, ondan köməklik istəmirsə, mənim də Əmrullayevdən umacağım nə ola bilər ki? Noyabrın əvvəlində Azərbaycan Respublikasının Gənclər və İdman naziri Fərid Qayıbovun qəbulunda oldum. 2 həftə sonra nazir müavini Mariana Vasilyeva da məni qəbul etdi. Həm Fərid müəllim, həm də Mariana xanımın yanında olarkən, onlara ailə durumumun və mənzil şəraitimin ağır olması barəsində məlumat verdim. Həmçinin klubun problemi haqqında da onları məlumatlandırdım. Mənzil şəraitimin ağır olması ilə əlaqədar hələ 2022-ci ilin fevralında cənab prezident İlham Əliyeva məktub göndərmişdim. Həmin məktubda, Azərbaycan idmanında 44 illik zəhmətimin olduğunu və mənzil şəraitimin yaxşılaşdırılması üçün köməklik göstərilməsini xahiş etmişdim. Fərid müəllimin qəbulunda olarkən, Prezident Administrasiyasından köməklik göstərilməsi üçün nazirliyə daxil olan məktub barəsində onlar artıq məlumatlı idilər. Ancaq nə fayda? Nə klubuma vəsait ayrıldı, nə də mənzil şəraitim yaxşılaşdırıldı. Cənab nazir qəbulda əyləşmiş bütün komissiya üzvlərinin yanında mənə bildirdi ki, Faiq Qarayev kimə desə, mənzili ona verəcəyik. Həqiqətən belə oldu”.

Məmmədova Cavid Qurbanova açıq şəkildə suallarını da ünvanlayır:

"Son sözümü, əlbəttə ki, AVF-nin prezidenti Cavid Qurbanova və Azərbaycan Respublikasının Prezidenti cənab İlham Əliyevə demək istərdim. Qurbanova demək istərdim ki, Azərbaycan Voleybol Federasiyasına prezident seçildiyiniz 6-7 il ərzində siz gənc klub olan "Express Baku”nun nə oyunçuları, nə məşqçilərinin problemləri ilə əfsuslar olsun ki, heç vaxt maraqlanmamısınız. Halbuki, bu, federasiya prezidenti olaraq vəzifə borcunuz idi. Yazdığım məktublar, müraciətlər cavablandırılmadı. Əksinə, Sizin adamlarınız tərəfindən mənə qarşı olan təzyiqlər getdikcə daha da şiddətlənirdi. Bugün də həmin vəziyyət davam edir. Yaddan çıxarmayın, nə mən, nə də oyunçularım erməniyik. Sizin qohum-əqrəbanız və adamlarınız AVF-də yaxşı vəzifədədir, qazandıqları pullar sayəsində istədikləri kimi yaşayırlar. Lakin elə fikriləşməyin ki, başqa voleybol mütəxəssislərinin işi əla gedir. Tutduğunuz prezident vəzifəsini icra edə bilmirsinizsə, oradan ayrılın. İnanın, bu, təkcə mənim deyil, Azərbaycan voleybol ailəsinin çoxdankı arzusudur. Azərbaycan Respublikasının Prezidenti cənab İlham Əliyevə müraciət edib demək istərdim ki, mən uzun illər öz işimi sədaqətlə və qüsursuz şəkildə icra etmişəm. 44 illik zəhmətimin qarşılığında gördüyüm yeganə mükafat, "Əməkdar məşqçi” adı olub. Buna görə də mərhum nazirimiz Azad Rəhimova minnətdaram. Rəhbərlik etdiyim klubun oyunçuları öz vətənpərvərliyi ilə həmişə seçilib. 44 günlük Vətən müharibəsində klubumuzun yetirməsi Rzayev Laçın Daxili Qoşunların, Elvin Hidayətzadə isə Milli Ordunun tərkibində böyük döyüş yolu keçərək medallarla təltif olunublar. Voleybolda olduğum 44 il ərzində gənclərlə işlədim, onları vətənpərvər ruhda tərbiyə etdim. Vətən sevgisi aşıladım və buna nail oldum. Yuxarıda qeyd etdiyim iki yetirməm buna bariz nümunədir. Təəssüf ki, bu illər ərzində yalnız və yalnız haqsızlıqlarla qarşılaşdım, aldadıldım”.

Qlobal.az

"DogruXeber.az"ın əməkdaşı bu gün günorta saatlarında Bakı-Şamaxı yolunda antisanitar görüntüləri lentə alıb.
Belə ki, Bakı-Şamaxı yolunun "Hökməli dairəsi"ndən üzü Şamaxı istiqamətində təqribən 1-2 kilometr məsafədə - magistral yolun hər iki tərəfində qoyulmuş zibil qablarının ətrafında antisanitar vəziyyət hökm sürür.
Vaxtında boşaldılmadılmayan zibil qabları dolduğu üçün, yaxınlıqda yaşayan sakinlər tullantıları qabın ətrafında toplayıblar.
Qeyd edək ki, sözügedən ərazi Abşeron rayonu ərazisidir.
Abşeron rayon Mənzil Kommunal Təsərrüfat Birliyinin məsuliyyətsizliyi yaşayış ərazisində bu cür xəstəlik mənbəyi olan antisanitar vəziyyət vəziyyətin yaranmasına səbəb olur.

Qeyd edək ki, Abşeron rayonuna aid olan bir çox ərazilərdə - eləcə də Xırdalan şəhərinin bir neçə küçələrində bu cür görüntülərə rast gəlmək mümkündür.

Redaksiyamız hər kəsin söz haqqını tanıyır.

Neftçalanın gənc icra başçısı Mirhəsən Seyidov geridə qalan iki il ərzində fəaliyyəti ilə heç bir rəğbət qazana bilməyib. Onun rayondakı missiyası elə fəaliyyətsizlik, narazılıq yaratmaq olub. Reportyor.info-ya verilən məlumata görə, M. Seyidov əhalinin problemlərinin həllinə dəstək olmaq əvəzinə, mane olur. Misal üçün gələn şikayətdə deyilir ki, icra başçısı fermer təsərrüfatının inkişafına əngəl törədir. İddialara görə, fermerlər icarəyə götürdükləri torpaqlarla bağlı müqaviləni uzatmaq istədikdə müəyyən “şərtlərlə” qarşılaşırlar. Belə ki, icarə müqaviləsi bitdikdən sonra torpaq elə icarədara təklif olunmalıdır. Düzdür, təklif olunur, amma bunun “şərti” var. Bildirilir ki, torpağın hər hektarına görə 1 000 manat tələb olunur. Bu pulu vermədikdə torpaq hərraca çıxarılır və kim 1000 verirsə, ona peşkəş olunur

İddia olunur ki, bütün bu işlərin başında əvvəllər Neftçala rayon İcra Hakimiyyətinin Sosial-iqtisadi inkişafın təhlili və proqnozlaşdırılması Şöbəsinin Baş məsləhətçisi işləmiş, hazırda Dairə Seçki Komissiyasının sədri olan Zaur Kərimov dayanır. Bununla bağlı bir qrup fermerin mediaya ünvanladığı müracətdə maraqlı iddialar yer alıb: ”Həsənabad qəsəbə sakini İsayev Asif Əmiraslan oğlu ilə iş birliyinə girərək, rayonun müxtəlif ərazilərində ona torpaq sahələri verib gəlirin on faizinə şərik olub. Ötən il Kürağzı dövlət fond torpağında, dənizin qorunma zolağında Ələkbərov Sərvər Sərdar oğluna hektarı 70 manatdan olmaqla 250 hektar torpaq satıb. Halbu ki, həmin ərazidə Zaur Kərimovla anlaşmadığı üçün İsbat Bayramov adlı fermer haqda inzibati tədbir görülmüşdü. Bu il isə, N saylı hərbi hissənin ərazisini şumlatıraraq əkin sahəsi kimi satmaq istəyir. Torpağın icarə müqaviləsi bitən fermerlərdən 1500 manat pul alaraq torpağın qanunsuz istifadəsinə şərait yaradır. Belə fermerlərdən biri rayonun Boyat kənd sakini Z. Kərimovla bu yaxınlarda eyni qiymətə anlaşıb. Lerik obasında Tofiq adlı şəxsin əli ilə fermerlərdən qanunsuz olaraq xərac yığır. Xol qəsəbəsində isə eyni işi Z. Kərimovun Vüsal adlı adamı görür. Birinci Mayak ərazisində Rəsul adlı şəxs Zaurla anlaşaraq 300 hektar ərazini əkir. Həmin ərazinin bələdiyyə sədri Nağıyev İmamnəzər Z. Kərimovun maxinasiya ortağıdır”.
Bu iddiaların ardınca Z.Kərimov torpaq məsələlərinin onun səlahiyyətinə aid olmadığını bildirsə də ortada konkret zərərçəkmişlər var. Məsələn,
Neftçala rayon sakini birinci Vətən müharibəsi iştirakçısı İslam Bayramov İH tərəfindən aldadılmasını iddia edərək bilirib ki, 2020-ci ilin sentyabr ayında Neftçala rayonu 2-ci Mayak kəndi yaxınlığında yerləşən “Kürağzı dövlət fond torpağı”nda 100 hektar torpaq sahəsi almaq üçün rəsmi qaydada Neftçala Rayon İcra Hakimiyyətinin başçısı Mirhəsən Seyidova müraciət edib:” 2020-ci ilin oktyabr ayında mənə həmin ərazidə monitorinq işləri bitdikdən sonra torpaq ayırılacağı ilə bağlı cavab verdilər”.

O , 2021-ci ilin fevral ayında rayon torpaq komissiyasının sədri Zaur Kərimovun onu dəvət etdiyini, M.Seyidovun tağşırığına əsasən ona torpaq sahəsi veriləcəyini bildirdiyini qeyd edib: “Bütün lazımi sənədləri onlara təhvil verməyimi istədilər. Fevral ayından vaxtı uzatdılar və nəhayət sentyabr ayında iqtisadiyyat bölməsinin baş məsləhətçisi Vüsal Ağabəyov və iqtisadiyyat bölməsinin şöbə müdürü Aqil Quliyevin iştirakı ilə sənədlər hazırlandı, mən 5 yerə imza çəkdim. Mənə “torpaq artıq sənindir, narahat olma” deyib yola saldılar.

Kimsə qeyri-qanuni işlədiyimi deməsin deyə, sənədi tələb etdim. Dəfələrlə Mirhəsən Seyidovun qəbuluna gedib şəxsən özü ilə danışdım ki, dəqiq mən o torpaqda iş görə bilərəmmi? İcra başçısı hər görüşdə mənə dedi ki, torpağı mən sizə vermişəm, heç kim o torpağı sizdən ala bilməz, ora sizindir.

Lakin 10 dekabr 2021-ci il tarixində biz cinayət məsuliyyətinə cəlb olunduq. Bizə torpağı verən şəxslərdən biri Aqil Quliyev məhkəmədə şahid qismində iştirak edərək bizə torpağın verilmədiyini dedi”, deyə İ.Bayramov deyib.

Bildirək ki, Zaur Kərimov bundan əvvəl Əmək və Əhalinin Sosial Müdafiəsi Nazirliyiyinin yerli şöbəsinin müdiri olub. İşində yol verdiyi nöqsanlara görə tutduğu vəzifədən azad edilib. Lakin hansısa “sehrli əlin” dəstəyi ilə icra hakimiyyətində Baş məsləhətçi vəzifəsinə təyin edilib. Zaur Kərimovun qanunsuz əməlləri və buna görə işdən çıxarılması barədə mediada da yazılıb.

Rayon fermerlərinin sözlərinə görə Zaur Kərimov torpaq bazarlıqlarını açıq aşkar DSK binasında aparır və bütün fəaliyyətini icra başçısı ilə razılaşdırdığını bildirir. Aldığımız məlumata görə bütün bu fəaliyyəti və qanunsuzluqları ilə bağlı Z.Kərimov Mərkəzi Seçki Komissiyasına çağrılıb və onun vəzifəsi ilə vidalaşacağı gözlənilir.

Məlum olduğu kimi Azərbaycan Milli Elmlər Akademiyasının oktyabr ayının 25-də keçirilən ümumi yığıncağında, səsvermənin nəticəsinə əsasən, akademik İsa Həbibbəyli yekdilliklə AMEA-nın yeni prezidenti seçildi. Buna qədər, yəni 2019-2022-ci illərdə prezident olmuş Ramiz Mehdiyevin dövründə Milli Elmlər Akademiyasının ətrafında çox qalmaqallı hadisələr yaşandı. Ən böyük qalmaqal isə AMEA-nın bəzi institutlarında baş verən maliyyə pozuntuları ilə bağlı oldu. Belə ki, Hesablama Palatasının 2021-ci ildəki açıqlamasında AMEA-nın bəzi institutlarında dövlət satınalmalarının keçirilməsi zamanı yol verilmiş nöqsanlar satınalma prosesinin bütün mərhələlərini əhatə etdiyi, bir sıra prosedur pozuntuları ilə yanaşı vəsaitlərin satınalma keçirilmədən icra olunmasına yol verildiyi də göstərilirdi. Eynən Azərbaycan Milli Elmlər Akademiyası Gəncə Bölməsində olduğu kimi.

Aktualinfo.org sözügedən qurumun Tender Komissiyası tərəfindən keçirilmiş satınalma prosedurları ətrafında araşdırma aparmışdır. Araşdırmada AMEA-nın Gəncə Bölməsində illik satınalma planlarına daxil edilmiş, onlara uyğun keçirilmiş kotirovka sorğusu prosedurlarında ciddi qanun pozuntularına yol verildiyinə, “Dövlət Satınalmaları Haqqında” Azərbaycan Respublikası Qanununun tələblərinə əməl edilməməsinə, zəruri mal-materialların və xidmətlərin satın alınması üzrə qanunla müəyyən edilmiş qaydada tender və kotirovka sorğularının keçirilməsində saxtakarlıq hallarına yol verilməsinə, habelə bağlanmış müqavilələrdə qanun pozuntularına yol verilməsinə, satın alınan malların (xidmətlərin) qiymətlərinin süni şəkildə şişirdilməsinə şübhə yaradan bir sıra hallar məlum oldu.

Qeyd edək ki, Azərbaycan Milli Elmlər Akademiyası Gəncə Bölməsinin Tender Komissiyası 2022-ci ildə satınalma planlarına 8 lot üzrə müxtəlif mal-materialların və xidmətlərin satın alınmasını daxil eymişdir. Amma apardığımız araşdırmalar zamanı Elmlər Akademiyası Gəncə Bölməsinin Tender Komissiyası il ərzində kotirovka sorğularında iştirak etmək üçün iddiaçılara qanunla nəzərdə tutulmuş qaydada heç bir elektron dəvət elanı verməmişdir. Amma 2022-ci il ərzində dövlət satınalmalarının vahid internet portalı vasitəsi ilə bir neçə kotirovka sorğusunun keçirildiyi barədə məlumatlar açıqlamışdır.Onu da necə deyərlər, ala-yarımçıq.

Azərbaycan Milli Elmlər Akademiyası Gəncə Bölməsinin Tender Komissiyası kitabların satınalınması üzrə keçirdiyi kotirovka sorğusunda qalib “RƏBUNƏ” Məhdud Məsuliyyətli Cəmiyyətini seçib. Bununla bağlı Tender Komissiyası üç dəfə məlumat yerləşdirib. Birincidə 8 adda kitabın alınması üçün 35 910 manat elan olunub. Sonra komissiya güya qiyməti 60 manat aşağı salaraq 35 850 manat müəyyən edib. Daha sonra 90 manat da endirim edərək 8 adda hər biri 300 ədəd olmaqla 2400 kitabın alınması üzrə 35 760 manat məbləğində satınalma müqaviləsi nəzərdə tutub ki, kitabın biri 14,9 manata alınacaq.

Dövlət satınalmalarının vahid internet portalına yerləşdirilmiş məlumatlarda Elmlər Akademiyası Gəncə Bölməsinin Tender Komissiyası eyni adda və eyni sayda kitabların alınması üzrə 35 580 manat məbləğində bir satıanlma müqaviləsi də “OTAKA AZ COMPANY” Məhdud Məsuliyyətli Cəmiyyəti ilə bağladığını 19.12.2022-ci ildə açıqlayıb. Maraqlıdır, kotirovka sorğusu prosedurundan başı çıxmayan birisi bunları necə başa düşəcək? Elmlər Akademiyası Gəncə Bölməsi eyni kitabların alınmasına neçə dəfə kotirovka keçirib, nə qədər vəsait ayırıb?

Tender Komissiyası dövlət satınalmalarının vahid internet portalına cari təmir işlərinin satınalınması üzrə eyni işlərin görülməsi üçün də iki kotirovka sorğusunun keçirdiyi barədə məlumatlar yerləşdirib. Onlardan biri “F.N.C.UNİVERSAL” Məhdud Məsuliyyətli Cəmiyyəti ilə 21 611.18 manat məbləğində, ikincisi isə “MM İNŞAAT GROUP” MMC ilə 25 011.93 manat məbləğində nəzərdə tutulub. Burada da müqavilənin hansı MMC ilə bağlanıldığı məlum olmur.

Sözügedən Tender Komissiyası tərəfindən dəftərxana və təsərrüfat mallarının satınalınması üzrə də iki kotirovka sorğusunun nəticəsi açıqlanıb. Birinci 39 260 manat məbləğində 11.09.2022-ci ildə, ikinci isə 39 100 manat məbləğində 30.10.2022-ci ildə. Burada isə qalib “MNM-TƏCHİZAT” Məhdud Məsuliyyətli Cəmiyyəti seçilib.

Akademiyanın Gəncə Bölməsinin Tender Komissiyası “MNM-TƏCHİZAT” MMC-ni xüsusi təyinatlı avadanlıqların satınalınması üzrə keçirdiyi kotirovka sorğusunun da qalibi seçib və iki kotirovka sorğusunun nəticəsini açıqlayıb. Birinci 47 255 manat məbləğində 17.08.2022-ci ildə, ikinci isə 47 198 manat məbləğində 30.10.2022-ci ildə, 57 manat endirimlə.

İnventarın satınalınması üzrə keçirilmiş kotirovka sorğusunda isə qalib “ŞAHLAR-M OPTİMAL” Məhdud Məsuliyyətli Cəmiyyəti seçilib. Bu məqsədlə MMC ilə 24 360 manat məbləğində nəzərdə tutulan satınalma müqaviləsi barədə elan 25.07.2022-ci ildə açıqlanıb.

Qeyd edək ki, Azərbaycan Milli Elmlər Akademiyası Gəncə Bölməsinin Tender Komissiyası 2021-ci ildə satınalma planlarına daxil etdiyi tikili və avadanlıqların cari təmiri, maşın və avadanlıqlar, sair torpaq, tikili və avadanlıqlar, mətbəə məhsulları, dəftərxana və təsərrüfat malları, abadlaşdırma xidmətləri üzrə nəzərdə tutulmuş 6 lot kotirovka sorğusunun keçirilməsi barədə nə elektron elan vermiş, nə heç birinin nəticələrini açıqlamamışdır. Amma 2020-ci ildə satınalma planlarına daxil edilmiş 8 lot kotirovka sorğusundan dördünün nəticələrini açıqlamışdır. 2020-ci ildə satınalma müqavilələri bağladığı MMC-lərlə 2022-ci ildə də işbirliyi davam etdirilmişdir.

AMEA Gəncə Bölməsi Tender Komissiyasının satınalma müqaviləsi bağladığı “F.N.C.UNİVERSAL” Məhdud Məsuliyyətli Cəmiyyəti 02.06.2020-ci ildə dəftərxana və təsərrüfat mallarının alınması üzrə kotirovkanın qalibi olmuş “BM-SİTY MMC -nin qanuni təmsilçiləri eyni adamdır, İsayev Bəhlul Calal oğlu.Qeyd edək ki,Elmlər Akademiyasının Gəncə Bölməsi sözügedən MMC ilə eyni malların satın alınması üzrə 43 814 manat məbləğində bir satınalma müqaviləsi də 2020-ci ildə bağlayıb.

Bundan başqa “ŞAHLAR-M OPTİMAL” Məhdud Məsuliyyətli Cəmiyyəti ilə 2020-ci ildə maşın və avadanlıqların satın alınması və sair torpaq, tikili və avadanlıqların satın alınması üzrə iki kotirovka sorğusunda ümumi olaraq 66 580 manat məbləöində satınalma müaviləsi bağlamışdır.

Dövlət satınalmalarının vahid internet portalına yerləşdirilmiş məlumatlardan da görsəndiyi kimi AMEA Gəncə Bölməsinin Tender Komissiyası yuxarıda göstərilən tarixlərdə kotirovka sorğularının ilkin nəticələrini açıqlasa da, kotirovka sorğularının keçirilməsi barədə rəsmi internet saytında heç bir elan verməmişdir. Bununla belə kotirovka sorğularının nəticələri biabırçı bir şəkildə açıqlanmışdır. Belə ki, hər lot üzrə keçirilmiş kotirovka sorğunun ən son nəticəsi açıqlanmalı olduğu halda, AMEA Gəncə Bölməsinin Tender Komissiyasının səriştəsizliyi ucbatından, yaxud da bilərəkdən müsabiqələrin ilkin qiymətləndirilməsi açıqlanmış, amma müqavilələrin bağlanılması barədə heç bir məlumat verilməmişdir. Bununla da AMEA Gəncə Bölməsinin Tender Komissiyası keçirilmiş kotirovka sorğularında “Dövlət Satınalmaları Haqqında” Azərbaycan Respublikası Qanununun bir çox maddələrinin tələblərini kobud şəkildə pozmuşdur.

Buradan suallar yaranır.

AMEA Gəncə Bölməsinin Tender Komissiyası il ərzində heç bir kotirovka sorğusunun keçirilməsi barədə iddiaçılara elektron dəvət elan verməmişsə, açıqladığı kotirovka sorğularını necə keçirmişdir?

Bir çox kotirovka sorğularının keçirilməsi barədə iddiaçılara elektron dəvət elanı verilməmişsə bu kotirovka sorğularının qalibi necə müəyyən edilib? Yəni qalib olan iddiaçı kotirovka sorğusunun keçirildiyini haradan bilib?

Əgər kotirovka sorğulrının keçirilməsi barədə əvvəlcədən qanunla müəyyən olunmuş şəkildə dövlət satınalmalarının vahid internet portalı vasitəsi ilə elektron qaydada iddiaçılara dəvət elanı verilməmişsə bu satınalma prosedurları hansı üsullarla keçirilmişdir?

Göründüyü kimi Azərbaycan Milli Elmlər Akademiyası Gəncə Bölməsinin Tender Komissiyası keçirilmiş bir çox kotirovka sorğularının təşkilini qanunla müəyyən edilmiş qaydada həyata keçirməmiş, dövlət satınalmalarının vahid internet portalı vasitəsi ilə iddiaçılara elektron dəvət elanı verməmiş, bununla belə, keçirilmiş kotirovka sorğularının müxtəlif məbləğlərdə ilkin qiymətlərmələri barədə açıqlamalar vermişlər. Bütün bunlar da keçirilmiş kotirovka sorğusu prosedurlarında saxtakarlıq hallarına yol yerildiyinə əsaslı şübhələr yaradır. Elmlər Akademiyası Gəncə Bölməsinin Tender Komissiyası bununla həm də ictimaiyyətin gözünə kül üfürür, güya kotirovka sorğularının şəffaf keçirildiyini göstərməyə çalışır. Halbuki, dövlət qurumları müxtəlif mal-materialların və xidmətlərin alınmasını artıq neçə illərdir satınalmalar yolu ilə həyata keçirir. Amma dövlət satınalmalarının vahid internet portalının bazasında 2017-2018-ci illərdən sonra Milli Elmlər Akademiyası Gəncə Bölməsinin keçirdiyi satınalmalar barədə məlumatlar ümumiyyətlə yox dərəcəsindədir. Bu isə o deməkdir ki, Elmlər Akademiyasının Gəncə bölməsində neçə illərdir gizlin-gizlin dövlət vəsaitlərini mənimsəyirlər, yəni xəlvətcə pul qırırlar.

Qeyd edək ki, Azərbaycan Milli Elmlər Akademiyası Gəncə Bölməsinə 2015-ci ildən akademik Fuad Əliyev sədrlik edir. Buna qədər isə Fuad Əliyev Azərbaycan Milli Elmlər Akademiyasını Gəncə şəhərində olan Gəncə Regional Elm Mərkəzinin rəhbəri olub. Hər yerdə olduğu kimi, bu qurumda da satınalmaların təşkilinə əvvəlcədən yaradılmış Tender Komissiyası nəzarət edir. Qanun görə idarənin rəhbəri komissiyanın sədri ola bilməz. Komisiyaya qurumun digər məsul vəzifəli şəxsləri sədrlik etməlidir. Bu bölmə sədrinin birinci müavini də ola bilər. Təsərrüfat işləri üzrə sədr müavini, yaxud da maliyyə şöbəsinin müdiri də ola bilər.

Milli Elmlər Akademiyası Gəncə Bölməsində satınalmaların təşkilinə kim cavabdehdi? Maliyyə–iqtisad və mühasibat uçotu şöbəsinin müdiri Akif Bağırov, baş mühasib Yeganə Əliyeva, yoxsa işlər idarəsinin müdiri Rasim Tağıyev? Çox istərdik ki, adıçəkilən bu şəxslər Elmlər Akademiyasının Gəncə Bölməsində satınalmaların belə bərbad bir şəkildə, qanunun tələblərinə əməl edilmədən təşkil olunmasının səbəbini açıqlasınlar.

Ana Vətən Partiyasının (AVP) sədri, deputat Fəzail Ağamalının qızı Günay Ağamalının rəhbəri olduğu “Buta” bağçası ilə bağlı qalmaqal davam edir. Bakı sakini Mehriban Fərruxlu bu dəfə Günay Ağamalıdan prokurorluğa şikayət etmək niyyətindədir. Oxuculara aydın olsun deyə xatırladırıq ki, Mehriban Fərruxlunun 4 yaşlı qızı Firəngiz Fərruxlu ötən il noyabrın 23-də “Buta” bağçasında çarpayldan yıxılaraq ayağını sındırıb. Qızcığazın anası bu faktı nəzarətsizliyin təzahürü kimi dəyərləndirərək Nərimanov Rayon Polis İdarəsinin 16-cı polis bölməsinə şikayət edib. Lakin polis faktla bağlı cinayət işi başıanmasınl rədd edib. Buna səbəb ekspertizanın rəyidir. Rəydə qeyd olunub kii, Firəngiz İsmayılovanın xəsarətləri öz ehtiyasızlığı üzündən yıxılması nəticəsində əmələ gələ bilər.
Əvvəla, Firəngiz İsmayılovanın 4 yaşı var. Ona nəzarət olunmalıdır. 4 yaşlı uşağı başlı-başına buraxıb, sonra da ehtiyatsızlıq etməkdə günahlandırmaq başadüşülən deyil. Hər halda bu yaşda olan uşaqların ehtiyatlı olub-olmamaq barədə bəlkə də ibtidai təsəvvürü belə, yoxdur.
İkincisi, uşağın yıxılmasını əks etdirən videodan da görünür ki, o nəzarətsiz buraxılıb. Bağçanın əməkdaşı faktiki olaraq məsuliyyətsizlik edib. Həmçinin qızcığaza ilkin tibbi yardım göstərilməyib.
Firəngiz İsmayılovanın anası Mehriban Fərruxlu isə hesab edir ki, bu məsələdə Fəzail Ağamalının deputat mandatı daşıması ilə əlaqədar ola bilər. Yəni, vətəndaşda AVP sədrinin deputat səlahiyyətlərindən və nüfuzundan istifadə edərək məsələni ört-basdır etmək istənəsi barədə qənaət formalaşıb. Ona görə də Mehriban Fərruxlu prokurorluğa müraciət edərək hadisənin obyektiv araşdırılmasına nail olmaqda israrlıdır.
Günay Ağamalının rəhbərlik etdiyi bağça ilə bağlı bundan əvvəl də oxşar hallar yaşanıb. Bir müddət əvvəl isə Türkiyə vətəndaşı Abdurrahman Kumaşın 7 yaşlı daun sindromlu övladının “Buta”da xəsarət alması ilə bağlı məlumat yayılmışdı. Bu məsələnin də ört-basdır edildiyi barədə iddialar var.
Reportyor.info

Cahan Ticarət Mərkəzində fəaliyyət göstərən ticarətçilər onlardan alınan icarə haqlarının çox olması ilə bağlı narazılıqlarını bildirirlər. Kirayə və xidmət haqlarının həddindən artıq çox olduğunu deyən Ticarət Mərkəzində çalışanlar muxtar respublikada alıcılıq qabiliyyətinin də çox aşağı olduğunu qeyd edirlər.

Tanınmış jurnalistlər Aygün Muradxanlı və Tural Səfərov Naxçıvana səfərləri zamanı Cahan Ticarət Mərkəzində çalışan ticarətçilərlə görüşüb, onların problemlərini ictimailəşdiriblər.

Ticarətçilər deyib ki, dükanların əksəriyyəti onlara yox, bəzi məmurlara və ticarətlə əlaqəsi olmayan digər şəxslərə satılıb. Həmin sahibkarlar isə 8-10 kvadratmetrlik dükanlar üçün ticarətçilərdən 400-600 manat kirayə haqqı alırlar. Bundan əlavə ticarət mərkəzi tərəfindən isə sahibkarlardan müqavilədə 175 manat göstərildiyi halda, 280-300 manat arası xidmət haqqı alınır. Onlar bildiriblər ki, karqo şirkətləri də qiymətləri qaldırıb. Təbii ki, bütün bunların hamısı qiymətlərə öz təsirini göstərir.

3-cü Ordu Korpusunun komandiri polkovnik Oruc Abdullayevin tabeliyindəki hərbi hissələrin materiallarından istifadə etməklə özünə ferma tikdirdiyi iddia olunur.
TEREF.AZ yeniavaz.com-a istinadla xəbər verir ki, bu barədə sosial şəbəkələrdə görüntülər yayılıb.
Videoda danışan şəxs bildirib ki, ərazisində olduğu ferma polkovnik Abdullayevindir və orduya məxsus materiallarla tikilib. O bildirib ki, fermanın tikintisində istifadə olunan bütün taxtalar, metal borular və digər avadanlıqlar hərbi hissələrdən gətirilib.
Fermanı lentə alan şəxs ərazidə Müdafiə Nazirliyinə məxsus qida məhsullarının – yağ, pendir, cem, ət, balıq konservlərinin qutularını da nümayiş etdirib və iddia edib ki, bu qidalardan fermadakı çobanlar istifadə ediblər.
O qeyd edib ki, görüntüləri Müdafiə Nazirliyinə təqdim edəcək:
“Dövlətə məxsus olan nə varsa, Oruc Abdullayev hamısını talayır”.


Qeyd edək ki, videonu “TikTok” sosial şəbəkəsində “rafael151177” adlı istifadəçi paylaşıb.
İddialarla bağlı Müdafiə Nazirliyinə ünvanladığımız sorğuya reaksiya verilmədi.

Goranboy sakinləri bildirilər ki, Azərbaycan Respublikası Elm və Təhsil Nazirliyi Gəncə – Daşkəsən Regional Təhsil İdarəsinin Goranboy-Naftalan Təhsil sektorunun tabeliyində fəaliyyət göstərən kənd və qəsəbələrdəki tam orta məktəblərdə nəzarət sistemi sözün əsl mənasında çökdürülüb.
Bəs bu kimi məsələlərə səbəb nədir və qarşısının alınması üçün nə kimi tədbirlər görülməlidir? Hansı addımlar atmaq lazımdır?
Fond pulu, summativ pulu, yaxud süpürgə pulu adı altında valideynlərdən müxtəlif ödənişlər alınır. Belə baxanda indiyə kimi heç səs-küy də yayılmayıb. Buna səbəb isə odur ki, valideynlər bir-biri ilə bəhsə girmək xatirinə, “mənim övladım heç kimdən geri qalmasın”- deyərək bununla razılaşıblar. Doğrudur, bəlkə də hansısa valideyndən 5-10 manatın alınması rüşvət kimi görünmür. Biz artıq buna vərdiş etmişik, övladıma daha yaxşı dərs keçirilsin düşüncəsi şirinlik adı ilə bu işləri görürük. İstər attestatların satılması, uşaqların aylığa buraxılması, müəllimlərin üzərinə dərsdənkənar dərnək məşğlələrinin yazılıb pulunun onlardan alınması, yaxud diaqnostik balı az olan müəllimlərə çox dərs verilib pulunun yarısının mənimsənilməsi halları faktdır ki, 90% Goranboy məktəblərində var.
Bu haqda Dünyanınsəsi.Az sayına Goranboy rayon, M. Zeynalov adına Dəliməmmədli şəhər tam orta məktəbində təhsil alan bir qrup şagirdin valideyinləri tərəfindən video-şikayət göndərilib.
Şikayətçi valideyinlər saytımıza göndərmiş olduqları videofaktda qeyd edirlər ki, yeni təyin olunmuş sektor müdiri Xayal Mammadov rəhbərliyi sayəsində övladlarımızdan summativ və digər adlar altında yenə də pullar yığılır.Amma X. Məmmədov bununla Elm və Təhsil Nazirliyinin eləcə də cəmiyyətin digər təbəqələrinin gözlərinə “kül” üfürməkdə davam edir.Amma mətbuat orqanlarına vermiş olduğu müsahiblərdə danışır ki, a4 kağızının anbarda sayı bu qədərdir.Amma sektor müdirinin danışdıqları tam ağ yalan olmaqla tabeçiliyində olan direktorlarla əlbir olaraq özü üçün pul qazanmaqla məşğul olduğu iddia edilir.Əgər belə deyilsə nədən Dəliməmmədli şəhər Mahmud Zeynalov adına tam orta məktəbin direktoru Güntəkin Cəfərovanın pul yığımını dayandıra bilmir?
Pul yığımı direktor Güntəkin Cəfərovanın rəhbərlik etdiyi məktəbin 5 b sinifində baş verdiyi iddia edilir.
Redaksiya olaraq qarşı tərəfin də mövqeyini dərc edə bilərik.
Summativlə bağlı pul yığımının videofaktını təqdim edirik: