TvPress.Az-ın redaksiyasına keçmiş dəmiryol işçisi tərəfindən şikayət məktubu göndərilib. Məktubu olduğu kimi oxucularımızın və müvafiq təşkilatların diqqətinə çatdırırıq.

Hörmətli redaksiya. Dəmir yolundan məcburi şəkildə öz imzamızla mədəni surətdə kütləvi olaraq bizi işdən qovdular. 2 min manat da təzminat aldıq. Qərara gəldim ki, borc həmişə var, pulu dəyərli yerə yatırım, xərcləməyim. Getdim Bakı şəhəri, Təbriz küçəsi 17 ünvanında yerləşən Dəmiryolu və Metropoliten üzrə dövlət peşə təhsil mərkəzinə. Zülfüqar Əsgərov adlı rektora yaxınınlaşdım və dedim ki qiyabi oxuya bilərəmmi, çünki işə gedirəm. Zülfüqar müəllim dedi ki, ölkədə bu il ilk dəfə gecə növbəsi olacaq, ödənişli istəsəniz oxuya bilərsiz. Dedim lap yaxşı, mənim 11 illik təhsilim yoxdur, 9 illik varımdır, qəbul edirsinizmi, əgər qəbul etməsəniz, vaxtım var, gedim rayona regional təhsil idarəsinə müraciət edim, 11 illik təhsilimi alım. Zülfüqar müəllim dedi ki, ilk dəfədir axşam qrupu təşkil olunur, ona görə də mən də dəqiq bilmirəm, gözləyin Elm və Təhsil Nazirliyi yanında Peşə Təhsili üzrə Dövlət Agentliyindən soruşum. Soruşdu və qəbul etdilər. Sentyabrda tam sənədlərimi topladım verdim, pulumu da ödədim- 2 dəfəyə 650 manat.

Kurs 1 illik idi və başladım oxumağa, daha doğrusu vaxt itirməyə. Səhər saat 7-də evdə çıxıb küçə süpürməyə gedirdim 28 may metrosu ərazisinə. 283 manat maaşla. 17.30-da işdən çıxıb yolpulu verməyim deyə Peşə məktəbinə piyada qaça-qaça getmişəm, 5 ay zülüm çəkmişəm evə saat 11-də gəlmişəm. Gecə mütamadi olaraq yoxlama gəlirdi məktəbə. Nəyi necə yoxlayırdılarsa, düz gəlib düz də gedirdilər. 5 ay sonra ayıldılar ki, bıy, biz səhv etmişik, 11 illik attestatı olmayanları çıxartdılar və məktəbdən qovdular. Ödədiyiniz pulu geri almaq üçün də yeni bank hesabı açın deyirlər. Mən təbii ki, qəbul etmədim. Lap mənə ödədiyim pulu geri verdilər, bəs 5 ay çəkdiyim əziyyət, qarda-qışda zülümlə gecə yollarda qalmağım, bunu necə ödəyəcəksiz. Peşə Təhsili Agentliyi deyir məktəb günahkardır, məktəb də deyir agentlik. İndi siz deyin kimdir günahkar?

Hörmətlə- Ballı İbrahimova

Redaksiyadan.

Ümidvarıq ki, Elm və Təhsil Nazirliyi vətəndaşın pozulmuş hüququnu bərpa edəcək və ona dəyən zərərin ödənilməsini təmin edəcək.

“Veysəloğlu” Şirkətlər Qrupuna daxil olan “Oba” mağazalar şəbəkəsi ilə bağlı problemlər və şikayətlər səngimir. İstehlakçılar “Oba market”ləri saxta, keyfiyyətsiz və vaxtı keçmiş ərzaq məhsulları satmaqda, işçiləri amansız istismar etməkdə ittiham edirlər. Belə faktlar adi gözlə də görünür.


Sosial şəbəkələrdə tez-tez “Oba” marketlərin rəflərində vaxtı keçmiş məhsulların tapılması, rəfdəki qiymətlə kassadakı qiymətin fərqli olması kimi yerində çəkilmiş videoların yayılması, mağazada tələb olunandan xeyli az işçinin işlədilməsi, fəhlənin və ya xidmətçinin həm də kassada işləməsi, işçilərin 350-400 manata gündə 8 saat əvəzinə 10-12 saat işlədilməsi kimi faktları hamımız görürük. Təəssüf ki, bu problemlərə son qoyulmur.

Səs Tv bu məsələlərlə bağlı maraqlı süjet hazırlayıb. Teref.Az həmin süjeti təqim edir.

Paytaxda yerləşən “ADA” Universitetinin yeni korpusu üçün tikinti işinin aparılması məqsədi ilə Bakı şəhəri, Nərmanov rayonu, Tələt Şıxaəliyev 18 ünvanında yerləşən evlər kompensasiya qarşılığında vətəndaşlardan alınır.

AzFakt.com-a daxil olan məlumata görə, vətəndaşlara verilən kompensasiya ilə bağlı narazılıqlar yaranıb.
Məlumata görə söküntü işinə nəzarət edən Nərmanov rayon icra başçısının keçmiş birinci müavini Şahmar İbadov vətəndaşlara "ADA" Universiteti adından hədə-qorxu gələrək, istdəyi kompensasiyanı ödəyir.

Şikayətçi Alimə Əliyeva bildirir Tələt Şıxaəliyev 18 ünvanında yerləşən evimizin söküntüsü zamanı haqssızlıqla üzləşib. Evimizin söküntüsü zamanı mənim payıma düşən 3 otaq 70 kvadrat metr ərazi üçün 70 (yetmiş min) AZN konpensasiya ödənildi. Məsələ ilə bağlı dəfələrlə söküntüyə məsul şəxs olan Şahmar İbadovla əlaqə yaratsamda heç bir nəticə olmadı. Şahmar İbadov açıq şəkildə bildirdi ki, "get ver məhkəməyə onsuzda "ADA" Universiteti ilə mübarizə apara bilməzsən, uduzacaqsan".

Alimə Əliyevə qeyd edir ki, Şahmar İbadov 10 sentyabr 2022-ci il tarixinda mənə zəng edərək 9№-li notariat kontoruna getməyimi və oradakı sənədə imza atmağımı tələb etdi. Ancaq mən sənədə imza atmadım, çünki sənəddə üstün alıcılıq hüququndan imtina etməyim qeyd edilmişdi. Bu zaman Şahmar İbadov mənimlə yenidən telefonda danışdı və eyni ünvanda yaşayan eyni hüquqa malik bacıma 200 (iki yuz) min manat təzminat və ev verildiyini dedi. Hətta qonşulara belə mənə verilən kompensasiyadan dəfələrlə artığı ödənilib.

Alimə Əliyeva qeyd edir ki, Şahmar İbadov ona hədə qorxu gələrək bildirib ki, notariat kontordakı sənədə imza atmasa onun ölkədən çıxışına qadağa qoyduracaq.

Baş verənlərlə bağlı Alimə Əliyeva "ADA" Universitetinin rektoru Hafis Paşayevə yazılı ərizə ilə dəfələrlə0 müraciət edib. Ancaq etdiyi müraciətlərin qarşısını Şahmar İbadov alıb. Hətta Şahmar İbadov ona "şanlı məktubunuzu mən aldım" deyərək məsxərəyə qoyub.

Məsələni ilə bağlı video müraciət yayan həkim Alimə Əliyeva kömək üçün Birinci vitse-prezident Mehriban Əliyevaya müraciət edib.

Həmin müraciəti təqdim edirik.

Sumqayıt şəhəri, 17-ci mikrorayon, Niyazi küçəsində fəaliyyət göstərən, fiziki şəxs Ağazadə Cahid Nadir oğluna məxsus “Zəngəzur” restoranında planlı yoxlama keçirilib.
Azərbaycan Qida Təhlükəsizliyi Agentliyindən (AQTA) bildirilib ki, müəssisə qida təhlükəsizliyi qeydiyyatına alınmadan fəaliyyət göstərib. Gigiyena tələblərinə əməl edilməyib, işçi heyətin tibbi müayinədən keçirməyib. Yuyucu maddələr və dezinfeksiyaedici vasitələrin ayrıca saxlanması üçün xüsusi yerlərin və ya dolablar yoxdur. Müəssisədə həmçinin son istifadə müddəti bitən, üzərində markalanması aparılmayan və mənşəyi məlum olmayan müxtəlif növ qida məhsulları aşkarlanıb. Nöqsanlarla bağlı qanunvericiliyə uyğun olaraq inzibati protokol tərtib edilib, müəssisənin fəaliyyəti məhdudlaşdırılıb.

AQTA əhalinin sağlam qida ilə təmin edilməsi sahəsində mütəmadi olaraq müvafiq tədbirlər həyata keçirir.

TEREF.AZ-ın məlumatına görə, mövzu ilə bağlı “Sherg.az”a danışan Azad İstehlakçılar Birliyinin (AİB) sədri Eyyub Hüseynov bildirib ki, Agentlik planlı yoxlamanı çox yaxşı keçirib:

“ Planlı yoxlamada belə böyük büroktratiya mövcuddur. Yoxlanılan təşkilat öncədən bilir ki, kim və necə araşdıracaq. Hökumət qida sahəsində yoxlamalarda bürokratiyanı aradan qaldırmalıdır. Bu, digər biznes qurumlarına şamil oluna bilər. AİB olaraq biznes qurumları üçün rahat şəraitin yaradılmasının tərəfdarıyıq. Onsuz da Azərbaycanda rahat şərait yaradılıb. Biznes qurumları heç kimə rüşvət verməsin. Çünki verilən rüşvətlərin bədəlini istehlakçılar ödəyir.
Qəfildən yoxlamalar aparılımalıdır. Yoxlanılan tərəf öncədən bilməməlidir. Vətəndaş təhlükəli qidanın satıldığını görəndə müvafiq quruma müraciət etməlidir. Lakin hazırda cəld reaksiya mexanizmi yoxdur.
AQTA əsasnaməsində dəyişikliklər aparılmaldır. AQTA cəld reaksiya mexanizmi səlahiyyəti verilməlidir. Saat 18:00-dan sonra restoranlar, şadlıq evləri fəaliyyətə başlayır, AQTA işçiləri o vaxt istirahətdə olurlar. Sutkanın istənilən vaxtında müraciətə operativ reaksiya vermə mexanizmi qurulmalıdır. İctimai nəzarətə də geniş yer verilməlidir”.

E.Hüseynov bildirib ki, restoran zallarında mətbəxi müşahidə edən monitorlar yerləşdirilməlidir:

“Telelayihə çərçivəsində Bakı şəhərinin mərkəzində ən bahalı restoranlarda müşahidələr apardıq. Şəhərin mərkəzindəki bəzi prestijli restoranlarda zal bərli-bəzəkli gözəldir, amma mətbəx bərbad gündədir. Hardasa bişirilib gətirilən soyuq yeməklər təqdim edilir. Antisanitar və natəmiz şəraitdir. Mətbəxə keçid tamamilə qadağandır.

“Kolorit” adlı restoranda zalda monitor qoymağa nail olmuşduq. Zalda əyləşən istehlakçılar mətbəxdə, hətta anbarda nə baş verdiyini monitordan izləyirdilər. Çox təəssüf ki, bildiyim qədərilə Nizami küçəsində yerləşən filialında həmin monitor götürülüb. Gözəl təşəbbüs idi, davam etmədi. Bütün restoranları belə bir sistemin yaradılmasını çağırırıq. İstehlakçı mətbəxdə və anbarda gedən prosesləri görməlidir.
Restoran sahibindən rüşvət istəyənlərə gəldikdə isə həmin sahibkarlara səslənirəm; heç kimə nə rüşvət, nə də yemək verin. Dövlət orqanları arxanızdadır. Hökumət istehlakçılara qarşı səhv siyasət yürüdür. İstehlakçı hüquqları arxa planda qalıb, yalnız biznes qurumları dəstəklənir”.

E.Hüseynov söyləyib ki, sahibkar istehlakçının istədiyi məlumatı verməyə borcludur:

“AİB alıcı hüquqlarını qorusa da, əhali bizə də məlumat verə bilər. Sizdən alınan rüşvətlərin qarşısını ala bilərik. AQTA qaynar xəttinə (1003) də zəng etmək olar. AQTA-nın əməkdaşlarının rüşvət istədiyini güman etmirəm. Həmin qurumda ictimai şuranın üzvüyəm. Daim AQTA-nı tənqid edirəm ki, onlar mediada yayımlanan məsələləri izləmirlər. Əhalinin telefon zənglərinə adekvat cavab verilməlidir, ictimai nəzarətin böyük rolu var. Xüsusən regionlarda, fəxrlə danışdığımız ipək yolu üzərində olan restoranlarda belə hallara rastlanılır.

İşçilərin tibbi yoxlamadan keçməsi ilə bağlı sənədlərinin əskəriyyəti saxtadır. Sovet vaxtından qalan ənənədir. Restoran xidmətindən istifadə edən istehlakçının malın və xidmətin istənilən parametri barədə məlumat almaq hüququ var.

Bu istehlakçıların hüquqlarının müdafiəsinə dair qanunda öz əksini tapıb. İstehlakçılar zalında monitor, mətbəxi və anbarı açıq izlənilməsi mümkün olan restoranlara üstünlük verməlidilər”.

Bakıda məşhur restoranın rəhbərliyi ağacları qanunsuz olaraq kəsdirib.

Bu barədə "Report"a Dövlət Ekoloji Təhlükəsizlik Xidmətindən məlumat verilib.

Belə ki, Xidmətin əməkdaşlarının keçirdiyi nəzarət tədbirləri zamanı Bakı şəhərinin Nizami rayonunda, eyni zamanda Lənkəran, Xaçmaz, Bərdə və Goranboy rayonları ərazisində ağacların qanunsuz kəsildiyi müəyyən edilib.

Xidmət rəsmisi Bəhruz Məhəmmədov bildirib ki, araşdırma zamanı ağacların Nizami rayonu Mikayıl Əliyev küçəsi 9 ünvanında “Neolit” restoranı, Lənkəran rayonu Təngivan kəndində “Profco” MMC, Xaçmaz-Xudat avtomobil yolunun kənarında Nərəcan kənd inzibati ərazi dairəsi üzrə nümayəndəliyi, Bərdə rayonu Tumaslı kəndində kənd sakini Taleh Orucov, Goranboy rayonu Səfikürd kəndində kənd sakini Arif Yusifov tərəfindən kəsildiyi məlum olub.

Faktlarla bağlı akt tərtib edilib.

Hər bir fakt üzrə yaşıllıqlara dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış sənədlər Baş Prokurorluğa göndərilib.

Son günlər Bakı Slavyan Universitetinin (BSU) Əlavə və Qiyabi Təhsil Şöbəsinin sabiq müdiri Dürdanə Əliyevanın cinayət işi üzrə məhkəmə araşdırması mətbuatda geniş müzakirələrə səbəb olub.

Belə ki, Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən prosesdə barəsində məcburi məhkəməyə gətirilmə qərarı qəbul olunmuş BSU-nun sabiq rektoru Nurlana Əliyevanın ölkədə olmadığı elan olunub. Məlum olub ki, N. Əliyeva məcburi gətirilmə ilə bağlı vəsatət müzakirə olunan vaxt ölkədən gedib. Bir çoxları bunu sabiq rektorun məhkəmədən yayınmaq üçün ölkədən qaçması kimi təqdim etməyə başladılar.

Hakim Əli Məmmədov deyib ki, aidiyyəti orqanlar vasitəsilə Nurlana Əliyevanın ölkə sərhədlərinə daxil olmadığı barədə məlumat alıb. Onun hazırda Türkiyənin Ankara şəhərində olduğu bildirilir. Qeyd edək ki, məhkəmə N. Əliyeva barəsində yanvarın 18-də keçirilən iclasda qəbul olunan qərarı qüvvədə saxlayıb. O, ölkəyə daxil olan kimi polis vasitəsilə məhkəməyə gətiriləcək.

Məlumat üçün qeyd edək ki, Baş Prokurorluq Dürdanə Əliyevanın tələbələrin təhsil haqlarını mənimsəməsi ilə bağlı 25 yanvar 2021-ci il tarixdə cinayət işi açıb. D.Əliyeva Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə), 32.4, 312.2 (rüşvət verməyə təhrik etmə), 311.1 (rüşvət alma) maddələri ilə ittiham olunur.

Onun universitetdə ikinci ali təhsil alan 100 tələbənin 1000-7000 civarında təhsil haqqını xəzinəyə köçürməyərək mənimsədiyi, həmçinin bir sıra şəxslərdən universitetdə işə düzəltmək və başqa adlarla pul alaraq onları aldatdığı bildirilir.

“Aydan arı, sudan duruyam”

Qeyd edək ki, sabiq rektor yerli mətbuata açıqlamasında ölkədə olduğunu, barəsində yayılan xəbərlərin həqiqəti əks etdirmədiyini bildirib: “Mən Türkiyədə olduğuma görə, məhkəmə proseslərinə gedə bilməmişdim. Mənim məhkəməyə zorla aparılmağıma lüzum yoxdur, növbəti prosesə özüm gedəcəyəm. Mənim ölkədən qaçmağım barədə deyilənlər yalandır. Mən aydan arı, sudan duruyam, hazırda evimdə oturmuşam. Məhkəməyə də ona görə getməmişəm ki, bu barədə mənə hər hansı rəsmi bildiriş gəlməyib”.

“Təkbaşıma etməmişəm...”

Ötən ilin fevralında keçirilən məhkəmə iclasından sonra BSU-nun eks-şöbə müdiri Dürdanə Əliyeva mətbuata açıqlamasında sözügedən əməli təkbaşına törətmədiyini bildirərək, BSU-nun sabiq rektoru Nurlana Əliyevanın və həmin vaxt mühasib işləyən şəxsin də məsuliyyətə cəlb olunmasını tələb edib.

“Musavat.com”un əldə etdiyi məlumata görə, sabiq rektor mətbuata açıqlamasında “növbəti məhkəməyə gəlib ifadə verəcəm” desə də, ölkəyə qayıtmayıb.

Onu da qeyd edək ki, haqqında yayılan rüşvət məsələləri ilə daim gündəmdə olan sabiq rektor hazırda sözügedən məhkəmə proesində şübhəli şəxs statusunda deyil. Nədənsə 1 ildən artıqdır davam edən istintaq prosesində hadisələrin mərkəzindəki əsas fiqur hesab olunan Nurlana xanım indiyə qədər bir dəfə də olsun məhkəmədə iştirak etməyib. Əvəzində belə qalmaqallı işdə adı hallanan və elə və bu yeyinti faktı əsasında kreslosuyla vidalaşan Nurlana Əliyeva ölkədən qaçaraq, bütün diqqətləri öz üzərinə çəkib.

Bəs, görəsən 77 yaşlı sabiq rektoru bu yaşında Ankaraya aparan səbəb nədir? “Aydan arı, sudan duruyam” deyən N. Əliyeva niyə məhkəməyə gəlməkdən boyun qaçırır? İstər-istəməz belə qənaət yaranır ki, N. Əliyeva vaxtilə vəzifədə olarkən yol verdiyi nöqsanlara görə cəzalandırılmaqdan, korrupsiya cinayətlərinin üstünün açılmasından və bu yaşında ömrünün son illərini dəmir baramaqlıqlar arxasında keçirməkdən qorxur.

Qeyd eək ki, filologiya elmləri doktoru, professor, AMEA Nizami adına Dilçilik İnstitutunda Şura üzvü, Azərbaycan Respublikası Əməkdar Müəllimi, “Şöhrət” ordeni sahibi, 1990-2016-cı illərdə(26 il) M.Ə.Sabir adına Pedaqoji Kollecin direktoru, 2016-2021-ci illərdə Bakı Slavyan Universitetinin rektoru, 2009-2021-ci illərdə (12 il) YAP Qadınlar Şurasının sədri olan N. Əliyeva daim qalmaqallı hadisələrlə gündəmə gəlib.

“Susmaq razılıq əlamətidir”

Sabiq rektor 2016-c ildə BSU-ya təyin olunduğu ilk gündən “adından söz etdirməyi” bacarmışdı. Onun da ilk işi sələfləri kimi, öz kreslosunu və otağındakı mebelləri yeniləmək olmuşdu. Ancaq sabiq rektor öz otağıyla kifayətlənməmiş, binanın fasadını da yeniləməyi qərara almışdı. Rektorun qərarı əsasında BSU-nun giriş hissəsinin fasadında Azərbaycanın tanınmış şair və yazıçılarının - Nizami, Mirzə Fətəli Axundov, Nəsimi, Nəriman Nərimanov və Məhsəti Gəncəvinin təsvir olunduğu mozaika sökülmüşdü.

Böyük narazılığa səbəb olan həmin hadisəyə sabiq rektor bu cür reaksiya vermişdi: “Əvvəl mozaika söküldü, sonra yarıda saxlanıldı. Təhsil nazirinə məktub yazdıq. Fasadın dizaynını da göndərdik. Təhsil Nazirliyində məktuba baxıldı, ancaq bizə cavab gəlmədi. Sözün düzü, mən belə başa düşdüm ki, yəqin, razıdırlar və ona görə cavab vermirlər. Razı olmasaydılar, zəng vurub deyərdilər ki, sökülmə prosesini dayandırın”.

Xatırladaq ki, 2016-cı ilin 2 sentyabr tarixində Təhsil Nazirliyində ali təhsillə bağlı kollegiya iclası keçirilmiş, həmin iclasın yekununda BSU-da aparılan təmir işlərinə zəruri nəzarətin təmin edilməyərək qanunvericiliyin tələblərinin və icra intizamının pozulmasına görə təhsil müəssisəsinin rektoru N. Əliyevaya ciddi xəbərdarlıq edilmişdi.

BSU-da “korrupsiya tüğyanı”

N. Əliyevanın BSU-dakı rektorluğunun birinci ilindən etibarən universitetdə korrupsiya, rüşvət və “tapşırıq” ön plana çıxmışdı. Ümumiyyətlə, bu günün acı reallığı budur ki, bütün təhsil müəssisələrimizdə üzdə olmasa da, rüşvət mövcuddur.


BSU-nun bu təhsil ocaqlarından fərqi onda idi ki, rüşvət açıq-aşkar istənilirdi və alınırdı da. Hazırda qiymətin dəyişib-dəyişmədiyini deyə bilmərik, amma N. Əliyevanın fəaliyyəti dövründə kəsirə görə 200 manat civarında rüşvət alınırdı. İmtahana daxil olmadan ödəniş edən tələbələrə “güzəşt” tətbiq olunurdu və bu zaman 150 manat rüşvət ödənirdi. Korrupsiya şəbəkəsinə isə dekan və dekan müavinləri daxil idi.

Dekan müavinləri semestr imtahanları dövründə topladıqları pulları dekanlara, onlar da öz növbəsində başdakı şəxsə çatdırırdılar. Bu ənənə 2016-2020-ci illərdə sözügedən formada davam edib. Həmin dövrdə BSU-da rüşvət alınmayan tələbə tapmaq müşkül idi. Çünki suni əngəllərlə (aşağı bal yazaraq, imtahan vərəqini təkrar-təkrar yoxlayaraq və s.) tələbəni əmin edirdilər ki, imtahana girməyin heç bir anlamı yoxdur. Ona görə də tələbələrin əksəriyyəti 50 manatlıq “güzəşti” nəzərə alıb, elə imtahan öncəsi bu pulu verməyə məcbur olurdu.

Rusiya səfirliyinin təlimatı və Yevgeni Primakova həsr olunan müsabiqə...

2019-cu ildə BSU-da böyük rezonans doğuran daha bir hadisə həmin ilin oktyabrında tələbələr arasında Azərbaycan xalqına düşmən münasibət bəsləyən, keçmiş Sovet İttifaqının və Rusiyanın rəhbərliyində təmsil olunan Yevgeni Primakovun 90 illik yubileyi münasibətilə keçirilən esse müsabiqəsi idi.

1990-cı il yanvar ayının 20-də Sovet qoşunlarının Azərbaycan paytaxtına soxulmasında və qanlı hadisələrin törədilməsində, Qarabağ məsələsində, eləcə də ümumilikdə Rusiyanın imperiyaçılıq siyasətində ən aparıcı fiqurlardan olan Primakovun Azərbaycanda görkəmli dövlət xadimi kimi anılması səs-küysüz ötüşməmişdi. O vaxt yerli mətbuat və sosial şəbəkə istifadəçiləri Nurlana Əliyevanı Azərbaycanın milli maraqlarına xəyanət etməkdə suçlayaraq, onun cəzalandırılmasını tələb etmişdilər.

Həmin vaxt BSU rəhbərliyinin bu məsələyə münasibəti isə daha biabırçı olmuşdu: “Yevgeni Primakovun 90 illik yubileyi və onun XX-XXI əsrin qovşağında beynəlxalq münasibətlərdə rolu ilə bağlı keçirilmiş esse müsabiqəsi Rusiya Federasiyasının Azərbaycandakı Səfirliyinin layihəsi olub. BSU-nun yazı müsabiqəsinin qalibi olmuş tələbələri Səfirliyin BSU-ya rəsmi məktubu əsasında həmin yazı müsabiqəsində iştirak ediblər. Bir faktı da xüsusi qeyd etmək istəyirik ki, Rusiya Federasiyası Azərbaycanın böyük və qüdrətli qonşusudur. Tarixən ölkələrimiz arasında sıx siyasi, iqtisadi, mədəni əlaqələr mövcud olub”.

Göründüyü kimi, sabiq rektorun tapşırığı əsasında hazırlanan açıqlamada Azərbaycan xalqından üzr istəmək əvəzinə, Rusiya səfirliyinin ölkəmiz əleyhinə olan (Həmin vaxt Rusiya səfirliyi Azərbaycan Dillər Universitetinə də Y. Primakovla bağlı müsabiqə keçirməyi təklif etmiş, lakin ADU bu təklifi rədd etmişdi-red.) bu addımına dəstək ifadə olunub.

Onu da qeyd edək ki, N.Əliyevanın bu anti-milli addımından sonra mətbuatda bir sıra ilginc iddialar yayılmışdı. Bu iddialarda hətta N. Əliyevanın erməni kökənli olduğu bildirilmişdi. Qeyd olunmuşdu ki, N. Əliyevanın anası Tamara adlı erməni qadını, atası isə azərbaycanlı olub...

“Harda müxalif düşüncəli adam gördüz, tüpürün üzünə”

Öz çıxışlarında jarqonlara üstünlük verən və bununla da öz səviyyəsini nümayiş etdirən N. Əliyeva universitet tədbirlərindəki çıxışlarında tez-tez müxalif şəxsləri, siyasətçiləri (Əbülfəz Elçibəyi misal göstərərək-red.) aşağılamağa, hətta təhqir etməyə çalışırdı.

Məsələn, 2019-cu ildə universitetdə H. Əliyevə həsr olunan tədbirlərdən birində çıxış edən N. Əliyeva belə bir cümlə işlətmişdi: “Harda müxalif düşüncəli adam gördüz, tüpürün üzünə”.

Bəli, bu, hər hansı küçə adamının yox, universistet rəhbərinin, illərin pedaqoqunun gənc tələbələr qarşısında işlətdiyi cümlədir...

Sadalanan faktlardan da aydın olur ki, sabiq rektor heç də özünün ifadə etdiyi kimi, “aydan arı, sudan duru” olmayıb. Əksinə, onun “BSU macəraları”yla bağlı düzgün araşdrıma aparılarsa, xeyli sayda gizli cinayətlərin üstü açıla bilər.

Elvin Bəyməmmədli

“AzPolitika.info”