Azərbaycan səhiyyə sistemi acınacaqlı gündədir. Konstitusiyamızın 41-ci maddəsinə görə, hər kəsin sağlamlığını qorumaq və tibbi yardım almaq hüququ olsa da, çox az adamın bu hüquqdan yararlanmaq imkanı var. Bunun bir səbəbi insanların aldığı maaşla tibbi xərclər arasında böyük fərqlərin olmasıdırsa, digəri ölkəmizdə səhiyyə xidmətinin yararsızlığıdır.

Vətəndaşlar adi bir sağlamlıq problemi üçün bir illik maaşlarını sərf etsə də nəinki sağala bilmirlər, əksinə mübtəla olduqları xəstəliklər getdikcə böyüyür, bir çox hallarda ölümlərlə nəticələnir. Məhz bu səbəbdən hər il Azərbaycandan xarici dövlətlərə müalicəyə gedənlərin sayı durmadan artır.

Səhiyyə sistemimizin bu hala düşməsinin ən mühüm səbəbi onu şəfaverici qurumdan çox pulkəsən aparat kimi xidmət göstərməsidir. Heç kimə sirr deyil ki, ölkəmizdəki bir çox klinikalar və həkimlər bəzən sırf pul qazansınlar deyə, xəstələri ehtiyac oldu-olmadı əməliyyat masasına yatırır, onlara bahalı dərman yazır və bunun müqabilində əczaxanalardan öz haqlarını alırlar.

Dərd burasındadır ki, bunlar hələ xırda maxinasiyalardır. Səhiyyə Nazirliyinin müxtəlif strukturlarında çalışan idarəçilərin müxtəlif vasitələrlə böyük korrupsiya əməllərinə qurşanması faktları da az deyil. Üstəlik, bu maxinasiyaların başında səhiyyə sisteminin ən yüksək postunu tutanlar dayanır.

Bəllidir ki, Azərbaycanda Səhiyyə Nazirliyinə ən uzun müddət rəhbərlik edən şəxs Oqtay Şirəliyev olub. Sələfi Əli İnsanovun 2005-ci ildə həbsindən sonra onun kreslosuna əyləşən Oqtay həkim 2021-ci ilə qədər öz yerini heç kimə qapdırmayıb. Nəticədə 16 il sərasər nazir adı daşıyıb və ictimaiyyət arasında ən məsum, heç kimə zərəri toxunmayan məmur kimi tanınıb. Amma onun dövründə Səhiyyə Nazirliyində baş verən maxinasiyalarla tanış olduqca ataların “suyun lal axanı” ifadəsi yada düşür. Ən təəccüblüsü isə budur ki, Oqtay Şirəliyevin himayədarlıq etdiyi maxinasiyaları nazir postundan sonra da davam edir. Hər halda Azpolitika.info-nun bir müddət əvvəl yayımladığı bir araşdırma yazısı belə düşünməyə əsas verir.

Ovqat.com-un məlumatına görə, “Elsəvər Ağayev və qudasının şirkətləri “səhiyyə bazarı”nda...” sərlövhəli yazıda bildirilir ki, “uzun illərdir Səhiyyə Nazirliyinin tibb avadanlıqları və ləvazimatlarının alınmasında "favorit” şirkəti "Arash Medical Company”dir. Nazirlər dəyişsə də, sözügedən şirkətin nazirliyin tenderlərindəki qalib mövqeyi dəyişmir”.

Nəşr qeyd edir ki, "Arash Medical Company” bu gün belə təsadüfən "tender kralı” hesab olunmur: “Bu şirkət ləğv olunan "Araş Medikal” MMC-nin aktivləri əsasında təsis edilib. Şirkətin 2011-ci ildə yaradıldığı deyilir, amma hələ 2010-cu ilin müsabiqə reyestrlərinə əsasən, Tibb Unversiteti yeni adı ilə ondan 917 173,54 manatlıq tibbi avadanlıqlar satın alıb.

Ümumilikdə isə "Araş Medical” MMC və "Arash Medical Company” həmin il xüsusilə Səhiyyə Nazirliyi və digər qurumlardan 13 398 507,06 manat dəyərində 46 tender qazanıb. Təkcə bir ildə İnnovasiya və Təchizat Mərkəzinin xəttilə 7 399 455,98 manatlıq tender udub. Azərbaycan Tibb Universiteti də "Arash Medikal Production LTD” adlı şirkətdən 8 099 515,79 manatlıq Tədris-Terapevtik Klinikasının inventarlarını satın alıb.

Həmin illərdən başlayaraq, şirkət səhiyyə sistemilə bağlı demək olar bütün böyük tenderləri qazanıb. Özü də təkcə tibbi avadanlıqların, ləvazimatların satışı və quraşdırılması deyil, xəstəxanaların tikintisi və təmiri ilə bağlı satınalmalar da bu şirkətə verilib. Bunun nəticəsi olaraq, şirkət təkcə 2019-cu ilə qədər ümumilikdə 250 milyon(!) manatlıq tender qazanıb. Sonrakı illərdə də eyni temp saxlanılıb. Təkcə ötən il şirkət 27 tender udub. Bu, hər aya 2-dən artıq tender deməkdir. Bu ilin əvvəlindən də tenderlər üst-üstə qazanılmaqdadır və onların dəyəri ilk 3 ayda artıq 1 milyon manata yaxınlaşıb. Ötən il bu məbləğ 4.5 milyon manata yaxın olub”.

Bəli, bəli, bu araşdırma yazısı 2023-cü ildə qələmə alınıb. Oqtay Şirəliyevin yarıtmaz fəaliyyəti nəticəsində nazir postundan uzaqlaşdırıldıqdan 2 il sonra.

Sual edə bilərsiniz: Bəs, bu şirkətin Oqtay Şirəliyevə nə dəxli var?

İlk baxışdan şirkətin Oqtay Şirəliyevlə heç bir bağlantısı görünmür. Amma “Araş Medikal”ın yarandığı və ən çox tender qazandığı dövrlərin Oqtay Şirəliyevin nazir olduğu zamanlara düşməsi insanın beynində bəzi şübhələrə yol açır. Məlumatlar təsdiqləyir ki, müxtəlif zamanlarda gah "Araş Medical” MMC, gah "Arash Medical Company”, gah da “Arash Medikal Production LTD” adıyla əldə etdiyi tenderlər hesabına qaz vurub qazan dolduran şirkət uzun illər Oqtay Şirəliyevin xeyir-duası ilə fəaliyyət göstərib.

Hərçənd bir çox nəşrlərdə onun gerçək sahibinin Oqtay Əsədov olduğu göstərilir. Zənnimizcə, bu yanılma da əslində Oqtayların adının qarışdırılmasından qaynaqlana bilər. Üstəlik, şirkətə 2018-ci ilə qədər rəhbərlik edən şəxsin də soyadı Əsədov olub – Cavid Əsədov. Görünür, bu ad və soyad bənzərliyi media orqanlarını çaşdırıb və hər kəs Oqtayın ayrı Oqtay olduğunu düşünüb. Bəlkə də ona görə ki, Oqtay Şirəliyev ictimaiyyət arasında əlindən heç bir iş gəlməyən, ancaq kabinetində zamanı milçək qovalamaqla yelə verən nazir kimi tanınıb. Onun adaşı Oqtay Əsədov isə maşallah, maşallah, kanalizasiya müdirliyindən tutmuş parlament spikerliyinə, hətta Moskvada adı dillər əzbəri olan bar sahibliyinə qədər müxtəlif biznes sahələrində silinməz izlər buraxıb. Deməli, məntiqlə, şirkətin gerçək sahibi Oqtay Əsədov olsaydı və Cavid Əsədovla onu hansısa qohumluq əlaqələri bağlasaydı, onda adını çəkdiyimiz ikinci şəxs bu günə qədər öz vəzifəsini qoruyardı.

“Azpolitika” da öz yazısında bu ehtimalın üzərində dayanaraq yazır: “Mətbuatda gedən bəzi məlumatlarda göstərilirdi ki, şirkətin sahibi Milli Məclisin sabiq sədri Oqtay Əsədovun qohumudur, Lakin əslində, Cavid Əsədov Oqtay Əsədovun yox, digər sabiq millət vəkili Hadı Rəcəblinin qohumu, daha konkret desək, bacısı oğludur. Sözsüz ki, bu amilin də "Arash Medical”-ın "uğurlarında” əhəmiyyətli payı var”.

İddialara görə, şirkətin formal sahibi Şamo Fərzəlibəyov adlı biri iş adamıdır. Şamo Fərzəlibəyovin bundan əlavə “Caspian International Hospital” və “BADAM MEDICAL CENTER” klinikaları da var. Azərbaycan reallığında bu qədər geniş imkan alın təriylə və halal zəhmətiylə çörək pulu qazanan sadə vətəndaşa qazandırılmazdı. Həmin sadə vətəndaş bir balaca “tüklənən” kimi yolunar, ətcə cücəyə çevrilərdi. Maraqlıdır ki, Şamo Fərzəlibəyov isə günü-gündən “tüklənib”. Bəs, bu qeyri-adi böyümənin sirri hardan qaynaqlanır?

Müxtəlif media orqanlarının iddialarına inansaq, Şamo Fərzəlibəyov sabiq səhiyyə naziri Oqtay Şirəliyevin müavini Elsevər Ağayevlə qudadır. Görünür, əsl himayədar ilə “sadə vətəndaş” arasındakı münasibət də bu ortaq dostluqlardan yaranıb.

Maraqlıdır ki, Elsevər Ağayev Səhiyyə Nazirliyində Oqtay Şirəliyevdən əvvəl iş fəaliyyətinə başlayıb. Şəxsi tərcümeyi-halına nəzər salsaq görərik ki, nazirlikdəki iş fəaliyyətinə 1999-cu ildə başlayan Elsevər Ağayev ilk dəfə sabiq nazir Əli İnsanovun müavini olub. 2005-ci ildə nəinki nazirlikdəki, hətta bütün səhiyyə sistemindəki insanovçuların təmizlənməsinə start verilsə də, E.Ağayevə toxunan olmayıb. Beləcə, E. Ağayev Əli İnsanovun olduğu kimi, yeni nazir Oqtay Şirəliyevin də ən yaxın adamına çevrilib. Bəlkə də onun bu toxunulmazlıq statusu qazanmasında şəxsi keyfiyyətəri qədər, “təchizatçılıq” qabiliyyətləri də rol oynayıb. Mediadakı iddialara inansaq, onun “təchizat” sahəsində arxalandığı əsas şirkət isə “Araş” olub. Həmin sehirli çubuq vəzifəsini icra edən “Araş” isə yenə sabiq nazir Oqtay Şirəliyevin dövründə təsis olunub. Şirkətin indiyə qədər səhiyyə sistemindəki bu avantajlı mövqeyini itirməməsi də həm Elsevər Ağayevin, həm onun qudasının “işgüzar” təcrübələrindən, həm də Oqtay Şirəliyevin himayədarlığından qaynaqlana bilər.

Növbəti sual ortaya çıxır: “Araş” şirkətini bu qədər güclü qılan nədir?

Zənnimizcə, bu sualın ən yaxşı cavabı da “Azpolitika”nın adını çəkdiyimiz araşdırma yazısında gizlidir. Sayt yazır: “Arash Medical”-ın tenderləri necə "udduğuna” dair daha dolğun və faktlara əsaslanan nümunə kimi Azərbaycanda fəaliyyət göstərən "Qardaşlar Mebel” QSC-nin ölkə başçısına, Səhiyyə, İqtisadiyyat və digər nazirliklərə, eləcə də hüquq-mühafizə orqanlarına məktubunu göstərmək olar. Məktubda deyilir ki, "Qardaşlar Mebel” QSC 2021-ci ilin sonunda Səhiyyə Nazirliyinin 3 böyük tenderini udsa da, onu qalib elan etməyiblər və milyonlarla dollarlıq tenderlər şişirdilərək başqa şirkətlərə, daha doğrusu məhz "Arash Medical”a verilib: "Şirkətimiz tərəfindən dəfələrlə bu məsələ ilə əlaqədar Səhiyyə Nazirliyinə ünvanlanan müraciətlərimiz təəssüf ki, cavabsız qalmışdır. Belə qənaətə gəlmək olar ki, həmin müsabiqələrdə nəzərdə tutulan şirkətin qalib olmaması Səhiyyə Nazirliyini çox narahat edir. Bundan irəli gələrək Səhiyyə Nazirliyi həmin müsabiqələrin nəticələrinin gələn ilə keçməsini və ayrılan vəsaitin dövlət büdcəsinə qaytarılmasına nail olaraq həmin tenderlərin ləğvini istəyir. Eyni zamanda bu müsabiqələrdə simvolik qiymət təklifi təqdim edərək kənarda qalan, amma bütün proseslərə özünün kənardan dəvət etdiyi "SEM-AZ” MMC şirkəti üzərindən həyata keçirən "ARASH” firması "ARASH MEDİCAL” MMC şirkətinin törəməsidir. "ARASH MEDİCAL” MMC-nin faktiki rəhbərinin isə Səhiyyə Nazirinin müavini və nazirliyin tender komissiyasının sədri Ağayev Elsevər Məmməd oğlu cənabları ilə yaxın qohumluq əlaqəsi vardır. Buna sübutu Səhiyyə Nazirliyinin Dövlət Satınalmalarının Vahid İnternet Portalının "Keçirilmiş müsabiqələr” bölməsinə daxil olmaqla görmək mümkündür. Həmin bölmədə nazirliyin bu tip satınalma predmeti üzrə keçirdiyi müsabiqələrin qalibinin yalnız "ARASH MEDİCAL” MMC olduğu qeyd olunub. Həmçinin həmin müsabiqələrdə ikinci şirkət olaraq hər zaman "SEM-AZ” MMC iştirak edir. Məhz buna görə də satınalan təşkilat üç müsabiqə üzrə yüksək, yəni 13736908.52 (on üç milyon yeddi yüz otuz altı min doqquz yüz səkkiz manat əlli iki qəpik) manat qiymət təklifi vermiş "SEM-AZ” MMC-ni qalib seçmək niyyətindədir. Eyni zamanda qalib olduğumuza baxmayaraq, Səhiyyə Nazirliyi müxtəlif yollarla müsabiqədə təqdim etdiyimiz qiymət təklifindən imtina etmək üçün bizə təzyiqlər göstərir. Üç müsabiqə üzrə qiymət təklifimiz 8580934.28 (səkkiz milyon beş yüz səksən min doqquz yüz otuz dörd manat iyirmi səkkiz qəpik) manat təşkil edir. Göründüyü kimi, qiymət təkliflərimizin qalib seçildiyi təqdirdə 5155974.24 (beş milyon bir yüz əlli beş min doqquz yüz yetmiş dörd manat iyirmi dörd qəpik) manat məbləğində vəsait dövlət büdcəsinə qaytarılacaq. Qənaət olan vəsaitin hesabına 44 günlük müharibədə düşmən tərəfindən dağıdılmış ərazilərin tezliklə bərpasına töhfə verilə bilər...”

Doğrudur, bu müraciətdən sonra sözügedən tenderlərin nəticələri ləğv olundu və həmin tenderləri "Arash Medical” uda bilmədi. Əslində, bu da gerçək rəqabət şəraitində şirkətin nəyə qadir olduğunun, qalib gələ bilmədiyinin bariz nümunəsidir.

Ancaq maraqlı olan həm də budur ki, həmin müraciətə əsasən "Arash Medical”-ın arxasından daha bir ad, özü də dəfələrlə korrupsiyada hallanan ad çıxır. Söhbət 1997-cü ildən Səhiyyə Nazirliyinin "Əczaçılıq və Tibb Sənayesi” EİB baş direktoru, 1999-cu ildən ötən ilin fevralına qədər, yəni 23 il(!) isə Səhiyyə nazirinin müavini vəzifəsini daşımış, nəticədə Azərbaycanın az qala ən imkanlı oliqarxlarından birinə çevrildiyi bildirilən Elsəvər Ağayevdən gedir.

Məktubdan belə məlum olur ki, E.Ağayevin də "Arash Medical”-ın "tender qələbələri”ndə ciddi rolu var. Əldə etdiyimiz məlumata görə, məktubda qeyd olunan, ancaq adı çəkilməyən "Elsəvər Ağayevin qohumu” isə Şamo Fərzəlibəyov adlı şəxsdir. Şamo Fərzəlibəyov Elsəvər Ağayevin qudasıdır. Heç yerdə adı keçməyən bu şəxs həm "Caspian International Hospital” və "BADAM MEDICAL CENTER” klinikalarının sahibidir.

Yeri gəlmişkən, istər "Arash Medical”-ın, istərsə də Elsəvər Ağayevin qudasının yuxarıda adı çəkilən "Caspian International Hospital” və "BADAM MEDICAL CENTER” klinikalarının qazandıqları milyonların qarşılığında vergidən yayınması ilə bağlı da bəzi iddialar var. Ancaq yəqin ki, bu və digər iddialar və açıq görünəın faktlar yalnız "Arash Medical” və buna bənzər şirkətlərin dövlət satınalmalarını, tenderləri necə "udduqları” və necə "tender kralları”na çevrildikləri üzə çıxarılan zaman araşdırılacaq. Bu isə kifayət qədər çətin görünür”.

“Azpolitika”ya nə qədər inandırıcı görünməsə də artıq “Araş” şirkətinin fəaliyyətinin yoxlanılmağa başlanıldığı barədə bəzi məlumatlar mediada yer almağa başlayıb. Valyuta.az-ın məlumatına görə, ““Arash Medical Company” QSC barəsində İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmaması) maddəsi ilə inzibati iş açılıb.

İş baxılması üçün Nəsimi Rayon Məhkəməsinə göndərilib.

430.4-cü maddəyə əsasən, vəzifəli şəxslər inzibati xətanın bilavasitə obyekti olmuş valyuta vəsaiti məbləğinin 10 faizindən 20 faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin 20 faizindən 30 faizinədək məbləğdə cərimə edilir.

“Arash Medical Company” QSC 22 iyun 2011-ci ildə qeydiyyata alınıb. Nizamnamə kapitalı 2000 AZN olan şirkəti hüquqi ünvanı Bakı şəhəri Nəsimi rayonu, Abdulvahab Salamzadə küçəsi, ev 26-da yerləşir. QSC-nin qanuni təmsilçisi isə Məmmədov Kamran Abid oğludur”.

Düzdür, açılan bu iş inzibati xətalarla əlaqədarla bağlıdır. Amma o da istisna deyil ki, şirkətin fəaliyyətində iddia olunan maxinasiyalar təsbit olunarsa, bu işi cinayət qanunvericiliyinə görə araşdırılması da baş tuta bilər.

Ovqat.com

Bu günlərdə əldə etdiyimiz məlumata görə, Baş Prokuror yanında Korrupsiyaya qarşı Mübarizə Baş İdarəsi Ali Attestasiya Komissiyasında əməliyyat-axtarış işlərini AAK əməkdaşlarının əksər hissəsinin məzuniyyətdə olmasına görə intensiv şəkildə davam etdirə bilmir. Amma çoxsaylı şikayətləri nəzərə alaraq Korrupsiyaya qarşı Mübarizə Baş İdarəsi sentyabr ayında yoxlamaları yenidən bərpa edəcək. GundemXeber.Az-ın əldə etdiyi digər məlumata görə isə, AAK sədri Famil Front oğlu Mustafayev bu günlərdə ən yaxın adamlarının yanında bildirib ki, onun çox yuxarıda adamı var və buna görə ona heç kim heç nə edə bilməyəcək. “Yuxarıda adam” deyəndə görəsən Famil Front oğlu kimi nəzərdə tutub? Prezident Aparatında bu sahəyə dolayısı ilə nəzarət edən Humanitar siyasət, diaspora, multikulturalizm və dini məsələlər şöbənin müdiri Fərəh xanım Əliyevanımı? Bildiyimizə görə, F.Əliyeva rüşvət və korrupsiyadan uzaq xanımdır, Azərbaycan xalqının qürur duyduğu bir kişinin-professor Şirməmməd Hüseynovun qızıdır, onun adının rüşvət, korrupsiya qalmaqalında çəkilməsi ədalətsizlik olar.
Famil Front oğlu bəlkə Azərbaycan Respublikası Prezidentinin Administrasiyasının Dövlət nəzarəti məsələləri şöbəsinin müdiri Kərəm Həsənovu nəzərdə tutur? Çünki o, 1996–1999-cu illərdə Azərbaycan Respublikası Dövlət Əmlak Komitəsində şöbə rəisi vəzifəsində çalışıb və Kərəm Həsənovla hədsiz yaxın münasibətləri olub. Ona görə də Famil Front oğlu keçmişdə Əmlak Komitəsində işləyənlərə, xüsusən K. Həsənova yaxın şəxslərə Elmi ad və dərəcələr verilməsində “xüsusi güzəştlər” tətbiq edir. Çünki vaxtilə komitədə də ona belə güzəştlər edilib. O, K. Həsənovun himayəsi altında vaxtilə Dövlət Əmlak Komitəsindəki vəzifəsindən bəhrələnərək dövlət əmlakında xüsusi paya sahiblənib.
İrəlidə bu məsələyə geniş toxunacağıq. Amma burası da var ki, indi Famil Front oğlu özünü K. Həsənovdan daha güclü hesab edir. AMEA alimlərinin Prezidentə müraciətində onun hələ AAK-da sədr əvəzi olarkən Mikayıl Cabbarova güvəndiyini və onun hesabına tezliklə AAK-ın sədri olacağını yaxın adamlarının yanında dilə gətirdiyi bildirlir. Amma inanmaq olmur ki, yuxarıda adı çəkilən bu adamlar Famil Front oğlunun rüşvət və korrupsiya maxinasiyalarında adlarının hallanmasını istəyələr.
Famil Front oğlu Mustafayevin Azərbaycan dövlətinə ən böyük zərbəsi gənclərin elmə gedən yolunun qarşısını almasıdır. O, bu göstərişin ona Prezident Aparatından verildiyinə dönə-dönə işarə edir. Sanki bununla o, Prezidentlə gənclər arasında uçurum yaratmağa çalışır, AAK-ın bütün imtina məktublarında 2019-cu ildə Prezident tərəfindən təsdiqlənən “Əsasnamə”ni xüsusi vurğulamaqla ölkə başçısının adını qəsdən mənfi mənada dövriyyəyə gətirir. Belə çıxır ki, Prezident bilərəkdən belə bir Əsasnamə hazırlatdırmışdır ki, gənclərin elmə gedən yolunun qarşısını kəssin. Halbuki cənab Prezident bütün çıxışlarında və əməli fəaliyyətində gənclərə meydan verilməsinə, onların irəli çəkilməsinə çağırış edir. Möhtərəm Prezidentin gənclərə qayğısı ilə bağlı 1 fevral 2019-cu ildə Gənclər günündə etdiyi çıxışdan iki cümləni burada xatırlatmaq yerinə düşər: “Mənim tövsiyəm ondan ibarətdir ki, gəncləri dövlət təşkilatları önə çəksinlər. Çünki gənclərin həm potensialı, həm fəallığı, həm də məsələlərə yeni baxışları cəmiyyət üçün çox lazımdır”.
Etiraf edək ki, Famil Front oğlu birmənalı şəkildə Prezidentin bu tövsiyyəsini inkar edir və gənclərin elmə, tədqiqata gələn yolunu bağlayır və fəxrlə deyir ki, AAK bir ildə 246 elmi işdən imtina edib. Həm də həmin işlərin böyük əksəriyyəti xırda texniki problemlə bağlı geri qaytarılıb. Onu da qeyd edək ki, bu məsələdə Elm və Təhsil Nazirliyi onun əsas köməkçisinə çevrilib. Həmin nazirliyin bir nəfər əməkdaşı bizimlə söhbətdə açıq şəkildə bizə bildirdi ki, Elm və Təhsil Nazirliyinin bəzi əməkdaşları AAK-la birgə müəyyən korporativ maraqları bölüşdüklərindən vətəndaşların haqlı şikayətləri təmin olunmur və sonda bütün ittihamlar Prezidentə yönəldilir. Əks halda, AAK-ın 2019-cu ildə qəbul etdiyi Əsasnaməni geriyə, 2018-ci və ondan əvvəlki illərdə doktoranturaya qəbul edilmiş gənclərə tətbiq etməsi ilə bağlı yol verdiyi qanunsuzluqla əlaqədar gənclərin Elm və Təhsil Nazirliyinə müraciətləri başdansovdu cavablandırılmazdı. Yaxud vətəndaşa bir cavab, AAK-a başqa bir cavab göndərilməzdi. Azərbaycan Respublikasının Konsititusiyasının 149-cu maddəsinin VII bəndində açıq-aydın deyilir ki, “normativ hüquqi aktların qüvvəsi geriyə şamil edilmir”. Vətəndaş yuxarıda qeyd edilən normativ-hüquqi aktın qanunsuz olaraq geriyə, yəni Əsasnamənin qəbul edildiyi tarixdən əvvəl doktoranturaya qəbul olumnmuş şəxslərə tətbiq edildiyini bildirdikdə, ölkə qanunlarını və konsititusiyasını qorumaq birbaşa vəzifəsi olan nazirlik məsələyə tam aydınlıq gətirməli idi. Təbii ki, nazirliyə gələn məktubların hamısının nazir tərəfindən oxunduğunu və nazirin özünün birbaşa onlara cavab yazdığını güman etmək sadəövhlük olardı. Bunun üçün nazirlikdə yüksək əmək haqqı alan aparat işçiləri var. Cavabları da onlar hazırlayır və nazirə imzalatdırırlar. Əlbəttə, həmin məktubu hazırlayan, nazirə imzalatdıran şəxslər qanunu pozduqlarının fərqində olmalıdırlar. Digər tərəfdən, NBA üzrə magistr diplomunda nazirlik tərəfindən açıq-aşkar yazılır: “bu diplom növbəti pillədə təhsili davam etdirməyə icazə verir”. Nazirlik bu ifadənin həmin şəxslərin yalnız “iqtisadiyyat” üzrə müdafiə etməsinə icazə verdiyini deyir. Onda bu halda konkret yazılmalı idi ki, “bu diplom iqtisadiyyat üzrə növbəti pillədə təhsili davam etdirməyə icazə verir”. Amma belə yazılmayıb. Qanun qadağan etmirsə, niyə icazə olmamalıdır?
Gənclərə qarşı 2019-cu il “Əsasnamə”sindən istifadə edərək onların yolunu bağlayan AAK sədrinin bəs öz fəaliyyəti necə, əsasnaməyə uyğun olubmu? AAK dakı rüşvət və korrupsiya faktından, elmi ad və dərəcələrin şıdırığı alverindən, AAK-ın Ekspert Şurasının üzvü və katibi professor Şəfa Əliyevin bu yaxınlarda Baş Prokuror yanında Korrupsiyaya qarşı Mübarizə Baş İdarəsi tərəindən rüşvətlə yaxalanması məsələsindən demək olar ki, ölkə mətbuatı hər gün yazır. Bu, görünür, AAK-ın fəaliyyət prinsipidir. Bəs rəhbərin özünün fəaliyyət prinsipi?
Famil Front oğlu kimdir? O, hansı yollarla AAK-ın rəhbərliyinə gəlib çıxıb? Onun AAK-ın səhifəsindəki tərcümeyi-halı ilə real tərcümeyi-halı arasında xeyli fərqlər var. AAK-ın səhifəsində onun 1992–1994-cü illərdə Azərbaycan Respublikası Dövlət Antiinhisar Siyasəti və Sahibkarlığa Kömək Komitəsində şöbə rəisi, Sahibkarlığa Kömək Milli Fondunun direktor müavini, 1994–1996-cı illərdə “Azərbaycan İnvestisiya Şirkəti” SC-nin vitse-prezidenti, prezidenti, 1996–1999-cu illərdə Azərbaycan Respublikası Dövlət Əmlak Komitəsində şöbə rəisi, Milli Depozit Mərkəzinin icraçı direktoru, prezidenti, 1999–2000-ci illərdə Azərbaycan Respublikasının Prezidenti yanında Qiymətli Kağızlar üzrə Dövlət Komitəsində Milli Depozit Mərkəzinin prezidenti kimi vəzifələrdə işləməyi göstərilməyib. Çünki, bu vəzifələrin heç birisi ona Azərbaycan elminə rəhbərlik etmək səlahiyyəti vermir. “Kupçanın”, “qiymətli kağızların” elmlə nə bağlılığı? Yəqin ki, Famil Front oğlu özü də bunu başa düşüb, ona görə də elmə dəxli olmayan bu vəzifələri AAK-ın səhifələrində sadalamayıb.
Digər tərəfdən, Famil Front oğlu, guya, 1998–2002-ci illərdə Bakı Dövlət Universitetinin Hüquq fakültəsində hüquqşünaslıq ixtisası üzrə təhsil alıb və universiteti fərqlənmə diplomu ilə bitirib. Halbuki həmin dövrdə (1999–2000-ci illərdə) o, Azərbaycan Respublikasının Prezidenti yanında Qiymətli Kağızlar üzrə Dövlət Komitəsində Milli Depozit Mərkəzinin prezidenti olub. Onun vaxtı və imkanı vardımı ki, gedib BDU-da tələbəlik etsin? Özü də guya fərqlənmə diplomu alıb! Çox ehtimal ki, bu diplomu Abel Məhərrəmov bir elli kimi ona hədiyyə edib. Onun həmin dövrdə necə təhsil alması ilə bağlı universitetə artıq sorğu göndərilib. Famil Front oğlunun təkcə hüquq diplomu şübhəlidirmi? 2019-cu ildə AMEA-nın alimləri Azərbaycan Respublikasının Prezidenti İlham Əliyevə müraciət edərək AAK-ın sədr əvəzinin (o zaman F.Mustafayev AAK-da sədr əvəzi vəzifəsində çalışırdı) professor diplomunun saxta olduğu barədə geniş yazı ilə çıxış etmişdilər. Moderator.az saytı vasitəsi ilə yayımlanan həmin müraciətdə deyilirdi: “Möhtərəm Cənab Prezident! AAK-ın sədr əvəzi Famil Mustafayevin professor diplomunun verilməsində AAK-ın “Elmi adlar və elmi dərəcələrin verilməsi qaydaları haqqında” Əsasnamənin 6-cı bəndinin 45-ci maddəsi kobud şəkildə pozulmuşdur. Belə ki, maddəyə əsasən kafedra üzrə professor elmi adı almaq üçün elmlər doktoru diplomu təsdiqləndikdən 4 il keçdikdən sonra AAK-a professorluğa sənədlər təqdim edilə bilər. Famil Mustafayevin isə “Elmlər doktoru” dərəcəsi 24 iyun 2011-ci ildə təsdiq olduğu halda, “İqtisadi nəzəriyyə” kafedrası üzrə professor elmi adı 06 iyun 2014-cü ildə təsdiq edilmişdir. Yəni, heç 3 il keçməmişdir. Əgər nəzərə alsaq ki, sənədlər AAK-da 4-5 fq ekspertiza olunur, deməli, təxmin etmək olar ki, müddətdən 2 dəfə tez olaraq Famil Mustafayevin sənədləri qəbul edilmişdir. Onda adam dəhşətə gəlir!!! Bu qədər də prosedur pozuntusu olarmı?! Olar! Famil Front oğlu Mustafayevə olar! Bu adam yuxarıların onun arxasında dayandığını deyirsə, demək ona hər şey olar! Bu yuxarı kimdir? Bunu F. F. Mustafayev birbaşa niyə dilinə gətirmir? Müraciət müəlliflərinin yazdığına görə, həmin dövrlərdə Famil Front oğlu Mustafayev AAK-ın İqtisadiyyat üzrə Ekspert Şurasının sədri olub: “Deməli, Famil Mustafayev həm də həmin dövrdə vəzifə səlahiyyətlərindən sui-istifadə edərək, Əsasnaməni kobud şəkildə pozmuşdur. Əsasnamə isə gördüyünüz kimi dəqiq, mütləq 4 il müddətini hamı üçün qeyd-şərtsiz zəruri edir. Hər bir halda F. Mustafayevin bugünki professor diplomu legitim deyildir, prosedur pozuntusuna yol verilmişdir və deyə bilərik ki, SAXTADIR!”.
Famil Front oglu onlarla gənc alimin yolunu məhz həmin “Əsasnamə” ilə kəsmişdir. Amma özü həmin “Əsasnamə”ni hamıdan çox pozub. Bunu biz demirik AMEA-nın Prezidentə müraciət etmiş alimləri yazır: “Əsasnamənin 9-cu “Elmi dərəcələrədən və elmi adlardan məhrumetmə və onların bərpa edilməsi” bölməsinin 54-cü maddəsində yazılır ki, elmi dərəcə və ya elmi ad bu Əsasnamənin tələbləri pozulmaqla verildiyi halda, həmin şəxs elmi addan məhrum edilir. Deməli, birmənalı şəkildə Famil Mustafayev professor diplomundan məhrum olmalıdır! Çünki saxtakarlığa yol verilmişdir! Həm də o, məsuliyyətə cəlb olunmalıdır, vəzifə səlahiyyətlərindən sui-istifadə etdiyi üçün”. Həqiqətən adama təəccüblü gəlir, bu qədər qanun pozuntusuna yol vermiş şəxs sonradan mükafatlandırılır, ona AAK sədri vəzifəsi verilir??? Famil Front oğlu əvəllər çalışdığı vəzifələrdə də bu cür saxtakarlıqlara yol vermişdir. O, 90-ci illərdə Əmlak Komitəsində işləyərkən dövlətin əmlakını da Bakı Mexaniki Təmir zavodunu bu yolla özününküləşdirmişdir. İndi həmin zavod “Konteks” MMC adı altında fəaliyyət göstərir. O, çox böyük var - dövləti də saxtakarlıq yolu ilə əldə etmişdir. Port-Bakuda ən bahalı mənzillərə sahibdir.
Bundan əlavə, AMEA əməkdaşları öz müraciətlərində Famil Mustafayevin doktorluq dissertasiyasının da plagiat məsələlərinə toxunmuşlar. “Famil Mustafayevin dissertasiyası, əsasən 1998-2002-ci illərdə Rusiyada müdafiə olunmuş dissertasiyaların birləşməsinin tərcüməsindən ibarətdir”-, deyə alimlər yazır. Yaxşı, bu qədər saxtakarlığa yol vermiş insan niyə indiyə qədər heç bir cəza almamışdır. Əksinə, vəzifə pillələri ilə sürətlə irəliləmişdir. Bu gün onun toxunulmazlığının səbəblərindən biri kimi DTX rəisinin bacısı Mahirə xanım Nağıyevanın AAK-da Famil Front oğlu tərəfindən filologiya üzrə ekspert şurasına sədr təyin edilməsi göstərilir. Amma biz hörmətli Əli müəllimin dövlətçilyin, milli-mənəvi dəyərlərin keşiyində ləyaqətlə dayandığını yaxşı bilirik, çox ehtimal ki, bu faktı Famil Front oğlu özü qəsdən dövriyyəyə gətirir ki, toxunulmaz olduğunu göstərsin.
Yazını AMEA əməkdaşlarının bir cümləsi ilə tamamlayıram: “Ali Attestasiya
Komissiyasının nüfuzunu alverçi təfəkkürlü şəxsin deyil, yalnız nüfuzlu alimin rəhbərliyi ilə qaldırmaq mümkündür!”.
(Davamı var)

Güney Nəsirov
GUNDEMXEBER.AZ

Fətullah Gülən məsələsi sadə bir məsələ olsaydı, biz bir media olaraq bunun üzərində təkrar-təkrar dayanmazdıq. Təsəvvür edirsiniz, Türkiyə kimi qosqoca və qüdrətli bir ölkə 2016-cı ilin 15 iyulunda Fətullah Gülənin hazırladığı çevrilişin qarşısını çətinliklə ala bildi, yüzlərlə insan dünyasını dəyişdi və s.
Fətullah Gülənin hiyləgərliyi orasındadır ki, özü Amerikada otursa da, dünyanın bir çox ölkələrində təhsil mərkəzləri açıb, adamlarını orduya, polisə, məhkəməyə, universitetlərə, liseylərə və s. yerləşdirib.
Biz hələ ki, çox dərinə getmək istəmirik, amma gələcək araşdırmalarımızda Kənd Təsərrüfatı Nazirliyindəki, Dini qurumlarla iş üzrə Dövlət Komitəsindəki və digər qurumlardakı FETÖ-çularla bağlı araşdırma aparacağıq.
Yeri gəlmişkən, bir neçə il əvvəl Prezident Aparatında çalışan vəzifə sahiblərindən biri öz doğma anasından Fətullah Gülənə salam və sevgi söyləmişdi və demişdi ki, “Validəm də Sizə....O MƏSƏLƏ...”
Sözün qısası, yuxarıda dediyimiz kimi Fətullah Gülən daha çox təhsil müəssisələrinə, universitetlərə, liseylərə üstünlük verib. Belə liseylərdən biri də Azərbaycanda fəaliyyət göstərən ZİRVƏ hazırlıq kurslarıdır. Zirvə Kurslarının Təsisçisi - Direktoru isə Rahib İmrahimovdur.
Müavini isə Rahib İmrahimovun baldızı Rita xanımdır. Yuxarıda qeyd etdiyimiz ..” Validəm də...” məsələsində olan kimi deyirlər Rahibin baldızı Rita xanımın da Fətullah Gülənə böyük sevgisi və sayqısı var.
Nə isə, əsas mövzudan yayınmayaq. Deməli, liseyin www.zirve.edu.az saytına daxil olaraq bəzi məlumatlara nəzər salırıq. Çoxları elə bilir ki, Zirvə hazırlıq kursu ancaq şagirdləri ali məktəblərə hazırlayır. Amma qurumun saytında qeyd olunur ki, burada Abituriyent hazırlığı, Məktəbəqədər hazırlıq, Təkmilləşdirmə, MİQ hazırlığı, Magistr hazırlığı, Xarici dil hazırlığı, YÖS hazırlığı, Liseylərə hazırlıq, Kompüter hazırlığı kursları fəaliyyət göstərir.
Yəni söhbət adi bir hazırlıq kurslarından getmir. Üstəlik Zirvə kursunun, az qala, hər qəsəbədə, Bakıda, Sumqayıtda, Tovuzda və başqa bölgələrdə filialları fəaliyyət göstərir. Yəqin oxucuda aydın təsəvvür yarandı ki, ZİRVƏ kursu dövlətimizin bütün ərazisində öz təhsil şəbəkəsini qurub. Və vaxtilə Fətullah Gülənin Türkiyədə tətbiq elədiyi və “Mən kasıb balalarına sahib çıxacam” metodunu ZİRVƏ-nin direktoru Rahib İmrahimov Azərbaycanda tətbiq eləməyə başlayıb.
Kasıb uşaqlarını dini təriqətə cəlb etmək üçün onlara pulsuz kitablar paylayıb, Fətullah Güləni təbliğ edib və üstəlik, həmin uşaqları pulsuz hazırlaşdırıb...
Müdriklərin yaxşı bir sözü var: Deyirlər pulsuz, müftə ancaq tələdəki pendir ola bilər... Yəni bütün bu oyunların başında gənc nəsli FETÖ tələsinə salmaq dayanırdı...
Biz bir daha təkrar edirik ki, bizim məqsədimiz ZİRVƏ kursu deyil, dövlətimizin maraqlarıdır və biz hətta Direktor Rahib İmrahimovun özəl həyatına, həyat yoldaşı Humay xanımla başlarına gələnlərə toxunmuruq. Ancaq onu qeyd etməliyik ki, Azərbaycanda FETÖ-çulara qarşı əməliyyat keçirilən kimi Rahib İmrahimov 180 dərəcə dəyişdi, tez profilini dəyişdirdi və özünü elə aparmağa başladı ki, sanki FETÖ ilə heç bir əlaqəsi yoxdur.
Ancaq bilənlər bilir ki, direktorun bütün kitabları Türkiyədə çap olunub Azərbaycana gətirilir. Ancaq bir məsələ də maraqlıdır ki, direktor Rahib İmrahimov öz müavini və baldızı olan Rita xanıma daha çox hüsni-rəğbətlə yanaşır, hətta evindəkilərdən də çox qayğı göstərir. Bəli, Rahib İmrahimov baldızı Rita xanıma çox bahalı CİP avtomobili alıb bağışlayıb...
Biz bir söz demirik, varlığa nə darlıq. Amma direktorun gəlir mənbələri, FETÖ ilə əlaqələri ciddi araşdırılmalıdır.
P. S. Növbəti yazımızda özünü ağıllı kimi cəmiyyətə təqdim edən bambılı, çoxyaşlı haqqında yazı dərc edəcəyik.
gundelik baki.com

Mehriban Vəliyeva 1989-cu ildən pedaqoji fəaliyyətə başlayıb, Bakı şəhəri 278 nömrəli tam orta məktəbdə, Heydər Əliyev adına Müasir Təhsil Kompleksində və Akademik Zərifə Əliyeva adına liseydə işləyib. 2014-2020-ci illərdə Akademik Zərifə Əliyeva adına liseyin direktoru vəzifəsində çalışıb. Təhsil nazirinin əmri ilə 2020-ci il 11 dekabr tarixində Bakı Şəhəri üzrə Təhsil İdarəsinin müdiri vəzifəsinə təyin edilib.
Fikir verdinizmi, biz əbəs yerə yazmadıq ki, Mehriban Vəliyeva neçənci ildə BDU-ya daxil olub, neçənci ildə bitirib..? 1964-cü ildə anadan olan Mehriban Vəliyeva 25 yaşında əmək fəaliyyətinə başlayıb. Niyə..? Onun tay-tuşları 22 yaşında BDU-nu bitirib 3 ildir çalışırdılar, amma Mehriban Vəliyeva bu 3 ildə harada olub..? Yəni bunların adi tərcümeyi-halları xırda tənqidə davam gətirmir. Bütün bunları qoyaq bir kənara, keçək Mehriban Vəliyevanın əsas fəaliyyətinə. Artıq bir neçə ildir ki, Mehriban Vəliyeva Bakı boyda şəhərin təhsilinə, məktəblərinə, uşaq bağçalarına, körpələr evinə nəzarət, daha doğrusu, SAHİBLİK edib.
Bəli, nəzarət və SAHİBLİK fərqli məsələdir. Belə ki, Mehriban Vəliyevanın dövründə nəinki yerdəyişmələr, hətta orta məktəblərin 1-ci siniflərinə qəbul rüşvət obyektinə çevrilib. Rus bölmələrinə qəbulun qiyməti isə 3-4 dəfə bahalaşıb. Təsəvvür edirsiniz, 1-ci sinifə, yaxud uşaq bağçasına qəbul ancaq pulla, rüşvətlə mümkündür. Baxın, bu gün Bakı şəhərində məktəbəqədər təhsil müəssisələrində çalışan minlərlə tərbiyəçinin nəinki ali təhsili, heç orta ixtisas təhsili yoxdur. Bunlar hansı yolla işə düzəliblər..? Bunu Mehriban Vəliyeva gözəl bilir, pulunu ver, işə düzəl.
Bu hələ harasıdır...? Bakıdakı məktəblərin, uşaq bağçalarının çoxunda nəinki ağac, heç kol da yoxdur, amma yüzlərlə bağban dövlətdən hər ay maaş alır. Əslində bağbanlar almır ee, Mehriban Vəliyeva alır...

Biz hələ uşaqlara ayrılan qida və ərzaq məhsullarının satılmasından danışmırıq... Biz məktəblərdəki “ölü canlardan, 3 nəfərin yerinə işləyən mühafizəçilərdən danışmırıq... Bəli, Mehriban Vəliyeva paytaxt təhsilinə rəhbərlik etdiyi az müddətdə milyonçu-oliqarxa çevrildi. Şübhəniz varsa, buyurun, tanış olun: Bakı Şəhəri üzrə Təhsil İdarəsinin müdiri Mehriban Vəliyeva Fatmayı bağları adlanan ərazidə, daha dəqiq desək, “Araz” marketin arxasında dəyəri 500 min manata olan villa alıb.
İndi isə keçək Mehriban Vəliyeva ilə bağlı ən son məlumatlara. Deməli, Mehriban Vəliyevanın bacısının əri Müdafiə Nazirliyinin Təchizat İdarəsinin rəisi olub. Təsəvvür edirsiniz, bu idarənin rəislərinin adı həmişə böyük korrupsiyada hallanıb. Mehriban Vəliyevanın bacısının oğlu, yəni həmin Təchizat İdarəsi rəisinin oğlu isə Azərbaycanda bərk gedən generallardan birinin balaca qızına 900 min manat pul atıb və bu günədək qaytarmır.
Məlumat üçün qeyd edək ki, generalın qızı ilə Mehriban Vəliyevanın bacısı oğlu Zərifə Əliyeva adına liseydə sinif yoldaşı olublar və o vaxtdan dostluq ediblər. Yeri gəlmişkən, Mehriban Vəliyeva həmin illərdə liseyin direktoru olub.
Sözün qısası, generalın evində yəqin ki, 9 milyarda yaxın pul olub ki, balaca qızın 900 min dostuna verməsindən gec xəbər tutublar... Sözün qısası, Mehriban Vəliyevanın ətrafında proseslər dərinləşməkdə davam edir və hər gün ortaya yeni faktlar çıxır, yəni çəmbər daralır... Bizi izləyin. //gundelik-baku.com//

Göyçay rayon sakinləri tərəfindən ölkə rəhbərliyinə müraciət ünvanlanıb. Bir nüsxəsi də DİA.AZ-a daxil olan müraciətdə deyilir:

"İcra başçısı Natiq Ağayev Göyçayı şəxsi mülki kimi idarə edir.Vəzifəyə təyin olunduğu ilk gündən birinci işi özünə trollar komandası yığmaq oldu.Hər bir troluna və onun ailə üzvülərinə maaş kartları verib.Əlində bir neçə əxlaqsızı saxlayıb haqqın tələb edən insanları şantaj etdirir.Həmin trollar isə öz əxlaqlarına uyğun sosial şəbəkələrdə namuslu insanlar barədə yazdıqları söyüşlərdən isə Natiq Ağayev sanki həzz alır buda onun dürüst adam olmadığını göstərir.

Ciblərində maaş kartları olan trollar işə gəlmədən qanunsuz davamiyyət yazılaraq hər ay müftə maaş alırlar.

İcra başçısı Natiq Ağayev Bakı şəhər sakini olan yaxın dostu Cavanşir Qədirov adlı işinin öhdəsindən gələ bilməyən yaramazı Göyçay Şəhər Təsərrüfatı İdarəsinə müdir təyin edib. Həmin idarə Mənzil İstismarı, Sanitar Təmizlik, Yaşıllaşdırma və abadlaşdırma İdarələrinə nəzarəti həyata keçirir.Cavanşir Qədirovun idarəçilik anlayışı olmadığı üçün Göyçay Şəhər Təsrrüfatı idarəsi iflic olub deyə rayon zibillik, çirkab içində itib batır, ağaclar susuzluqdan və baxımsızlıqdan kütləvi quruyur.Gözdən pərdə asmaq üçün Göyçay şəhərinin bir iki küçələri təmizlənilir ancaq digər küçələr baxımsız vəziyyətdədir.Zibillər süpürülmür vaxtlı-vaxtında götürülmür deyə ətrafa antisanitariya saçır.Həttda zibillər yerdə topalanaraq yandırılır.Buna görə Göyçayın küçələri tez-tez tüstüyə bürünür ekologiya çirklənir.
Həmin adı qeyd edilən bu 3 idarənin maaş kartlarının əksəriyəti trollara və onların ailə üzvülərinə verilib onlarda işə çıxmırlar.İşçi qüvvəsi olmadığı üçün rayonda təmizlik işləri vaxtlı-vaxtında aparılmır.
Cibində maaş karı olan trollar sosial şəbəkələrdə yazırlar ki, bundan əvvəlki başçıların dövründə pis idi indi yaxşıdır.

Ancaq qeyd edək ki, bundan əvvəl icra başçısları ağacları isti aylarda tez-tez sulatdırırdı, budayırdılar, rayonun küçələri vaxtlı-vaxtında təmizlənirdi.
İndi isə Natiq Ağayev sanki şahlıq yaradıb iş bacarmayan səriştəsiz təcrübəsi olmayan yaxın dot tanışını mühüm idarələrə rəhbər təyin edib.
Sosial şəbəkədə kimlər ki, Natiq Ağayev barədə tərif yazırsa bilin ki, həmin adamın özünün və ailə üzvülərinin cibində maaş kartları var, işədə getmədən maaş alırlar.Bunu isə yoxlamaq çox asandır.
Nəticə isə göz qarşısında rayon zibiliik içində itib batır trollar kef edir sakinlər əziyyət çəkir Natiq Ağayev isə bu xoşagəlməz mənzərədən həzz alır".

İddia olunanlarla bağlı dia.az olaraq qarşı tərəfi də dinləməyə hazırıq...

Gundelik-baku.com xəbər verir ki, Sahil Babayevin Şərqi Zəngəzura rəis təyin etdiyi Sənan Məmmədov özünə yarım milyonluq 90 SM 777 dövlət qeydiyyat nişanlı yeni BMW X7 avtomobili alıb.Avtomobil Məmmədzadə Sənan Raqub oğlunun(11.02.1986 təvəllüdlü,Ağdam qeydiyyatında olan)adınadır və atası Məmmədov Raqub Allahverdi oğluna sürmək üçün etibarnamə verib.Xatırladaq ki,Sənan Məmmədov bu təyinatadək Abşeron-Xızı Regional Məşğulluq İdarəsinə müdiri vəzifəsində çalışırdı.Bir neçə gün öncə, Abşeron-Xızı Regional Məşğulluq filialının müdiri Məmmədzadə Sənan Raqub oğlu vəzifəsindən azad olunub və Şərqi Zəngəzur Regional Məşğulluq filialının müdiri təyin edilib.Sənan Məmmədov Abşeron-Xızı Regional Məşğulluq İdarəsinə müdiri vəzifəsində çalışarkən iclaslarda qızları idarəyə yığıb nöqsanlara yol verdiyinə görə səlahiyyətli şəxslər tərəfindən danlandığı da deyilirdirdi.

Qeyd edək ki, o, Ağdamın sabiq icra başçısı Raqub Məmmədovun oğludur.

ZİRVƏ hazırlıq kursunun təsisçisi və direktoru Rahib İmrahimov aztəminatlı ailələrin uşaqlarına dərs keçir, yoxsa..?
Biz hələ müstəqil Azərbaycan dövlətinin vətəndaşı deyil, sovet vətəndaşı olduğumuz dönəmdə, yəni 1990-cı ildə Fətullah Güləni tanıdıq. Bilməyənlər üçün qeyd edək ki, 1990-cı ilin Qanlı Yanvarında sovet qoşunları Bakıda qanlı genosid törətdi və xeyli sayda soydaşlarımızı qanına qəltan elədi.
Təəssüf ki, o zaman bizim səsimizə səs verən tapılmadı. Ulu Öndərimiz o zaman həyatını riskə ataraq Moskvada iclas keçirdi və dünyaya bu qanlı hadisəni bəyan elədi. Bu zamanlar hamının gözü dikilmişdi dünyaya... Amma dünyanın gözləri kor, qulaqları isə kar olaraq qalırdı...
Belə məqamda heç kimin tanımadığı Fətullah Gülən adında birisi televizorda göz yaşı axıdıb, ağlayıb-sıtqıyıb, başına-gözünə döyərək 20 Yanvar şəhidlərindən danışmağa başaldı.
Sözün düzü, o zaman hamımıza təsəlli olan bu olayı sonralar analiz edəndə Fətullah Gülənin ARTİSTLİYİ açıq-aşkar hiss olunurdu. Və beləcə 1 ildən sonra SSRİ dağıldı...
Fətullah Gülənin emissarları Bakıya ayaq açdı. Beləcə heç kimin hiss eləmədiyi tərzdə Bakıda və bəzi bölgələrdə Fətullah Gülənin liseyləri, kursları, ali məktəbləri işə düşdü. Bu o zaman çoxlarına adi hadisə kimi gələ bilərdi. Amma Fətullah Gülən bu məqsədlə yüz milyonlarla pul buraxmışdı. Və məqsəd məktəblər vasitəsilə özünün gələcək davamçılarını hazırlamaq idi.
Sözün qısası, Azərbaycanda bu istiqamətdə qısa zamanda xeyli təhsil ocaqları, hazırlıq kursları yaranmağa başaldı.
Belə FETÖ ocaqlarından biri də ZİRVƏ hazırlıq kurslarıdır. Hazırlıq kursu ilə ümumi tanışlıq üçün qurumun www.zirve.edu.az saytına daxil olaraq bəzi məlumatlara nəzər salırıq. Çoxları elə bilir ki, Zirvə hazırlıq kursu ancaq şagirdləri ali məktəblərə hazırlayır. Amma qurumun saytında qeyd olunur ki, burada Abituriyent hazırlığı, Məktəbəqədər hazırlıq, Təkmilləşdirmə, MİQ hazırlığı, Magistr hazırlığı, Xarici dil hazırlığı, YÖS hazırlığı, Liseylərə hazırlıq, Kompüter hazırığı kursları fəaliyyət göstərir.
Yəni söhbət adi bir hazırlıq kurslarından getmir. Üstəlik Zirvə kursunun, az qala, hər qəsəbədə, Bakıda, Sumqayıtda, Tovuzda və başqa bölgələrdə filialları fəaliyyət göstərir. Yəqin oxucuda aydın təsəvvür yarandı ki, ZİRVƏ kursu dövlətimizin bütün ərazisində öz təhsil şəbəkəsini qurub. Zirvə Kurslarının Təsisçisi - Direktoru isə Rahib İmrahimovdur.
Biz heç kimin fəaliyyətinə kölgə salmaq fikrində deyilik. Amma qardaş Türkiyədə baş verənlər bizi gənc dövlət olaraq həmişə düşündürməlidir. Amerikada oturub böyük bir casus şəbəkəsi quran Fətullah Gülən də ilk işlərini təhsil sahəsindən başlamışdır. Və Fətullah Gülən deyirdi ki, mən Türkiyədə kasıb balalarına sahib çıxacağam, onların yüksək təhsil almasına dəstək olacağam.
Bizi qınamayın, eyni fikirlərə ZİRVƏ kurslarının saytında da rast gəlirik. “Zirvə Kursları "Ürəklər gülsün" layihəsinə qoşulub, aztəminatlı ailələrin övladlarına təmənnasız dərs keçir və s... İstər-istəməz eyni dəst-xətt yada düşür... Bir daha təkrar edirik ki, bizim kiminsə fəaliyyətinə kölgə salmaq fikirimiz yoxdur, bizi bu məsələdə dövlətimizin gələcəyi düşündürür... Və heç kimə sirr deyil ki, FETÖ layihəsi Azərbaycanda az qala təhsil sahəsinin bütün orqanlarına yerimişdi...
Neçə-neçə ali məktəbdə FETÖ-nün nümayəndələri fəaliyyət göstərir. Biz əsas mövzudan kənara çıxmaq istəmirik, amma yazmağa məcburuq ki, FETÖ-nün nümayəndələri təkcə təhsil müəssisələrində deyil, nazirliklərdə, komitələrdə mövcuddur. Bir zamanlar, Kənd Təsərrüfatı Nazirliyində kimlərin FETÖ-yə qulluq etməsindən də danışılırdı. Yəni ZİRVƏ kurslarının nümayəndələri elə bilməsin ki, məqsədimiz ZİRVƏ ilə bağlıdır. Bu çox geniş mövzudur. Və bu məsələdə çox ayıq-sayıq olmalıyıq. Və biz də bir Azərbaycan dövləti olaraq Türkiyəyə VƏFA BORCUMUZU verməliyik.
Bəli, redaksiyamıza daxil olan məlumata görə, ZİRVƏ kurslarının təsisçisi və direktoru Rahib İmrahimov baldızı Rita xanımı və digər yaxın qohumlarını, dostlarını quruma işə qəbul edərək, sanki ailə şirkəti, ailə məktəbi yaradıblar. Yuxarıda qeyd etdiyimiz kimi bu “AİLƏ MƏKTƏBİ”nin nümayəndələri yaşadıqları ərazidə yeniyetmələri, gəncləri başlarına yığıb dini mövzularda təlimlər keçirlər, kimlərisə təbliğ edirlər, onları məktəblərə pulsuz hazırlaşdırırlar... Bir sözlə, əsl FETÖ metodları...
Biz ZİRVƏ rəhbərliyinin özəl həyatına qarışmırıq, Kürdəmir yolunda həyat yoldaşı Humay xanımla avtoqəza keçirib salamat qalmalarından və s. bəhs etmirik. Bizi ancaq dövlətimizin gələcəyi maraqlandırır.
Məlumdur ki, son vaxtlar hüquq-mühafizə orqanlarımız ölkəmizdəki FETÖ-çulara qarşı ciddi əməliyyatlar keçirib. Biz demirik ki, ZİRVƏ kurslarının rəhbəri Rahib İmrahimov FETÖ-çudur, amma bizə elə gəlir ki, ZİRVƏ kursları da ciddi nəzarətə götürülməli və orada yoxlamalar aparılmalıdır.
P. S. Zirvə kurslarının rəhbəri Rahib İmrahimov nədənsə özünü məşhur türk kinosundakı Kimsəsiz Doğan obrazında görür. Bu haqda geniş araşdırmamız olacaq. //gundelik-baku.com//

Haqqında söz açdığımız orta yaşlı iş adamı Ceyhun Həsən oğlu Abbasov 1996-cı ildə Azərbaycan Texniki Universitetini “Mühəndis-elektronik-konstruktor” ixtisasını fərqlənmə diplomu ilə bitirib. 1992-ci ildən etibarən bizneslə məşğuldur. Biznesinin də ixtisası ilə heç bir əlaqəsi yoxdur. Belə çıxır, adam universitetə daxil olanda bilirmiş ki, ixtisas bilgiləri ona gərək olmayacaq, sadəcə diplomu imtiyaza görə almaq lazım imiş. Hərçənd, ölkəmizdə elektronik konstruksiyalar hazırlamaq, sahəsində elə bir uğura imza atmış mühəndis yoxdur ki, səsi – sorağı ölkımizin sərhədini aşsın. Elə bir iş adamı da yoxdur ki, elektronika məhsullarının istehsalı və satışı ilə məşğul olsun. Bir sözlə, bizdə elektronçu mühəndis böyük kapital qazanmaq üçün yalnız alverçi Ceyhun Abbasovun yolu ilə gedə bilər, elektrikli və sürücüsüz avtomobillər istehsal edən İlon Maskın yolu ilə deyil. Özü də biznesə haram qatmaqla. Elə bugünkü söhbətimiz də Ceyhun Abbasovun haramxorluğundan gedəcək.
Ceyhun Abbasov da elektronika mühəndisliyindənsə, alverçiliyi seçib. Hazırda fəaliyətini qurucusu və rəhbəri olduğu “Avrora Qrup”un prezidenti kimi davam etdirir. Şirkət distribüter daha peşəkar və davamlı həyata keçirmək üçün mərkəzi ofisi Bakıda olmaqla Gəncə, Lənkəran, Bərdə, Quba, Göyçay, Şəki və Saatlıda filialları fəaliyyət göstərir. Hal-hazırda qida sektorunda ölkəmizin ən monopolist distribüter şirkətlərindən biridir. Beynəlxalq şirkətlərin, zavod və fabriklərin “toxunulmaz” partnyoru olan “Avrora Qrup”un portfoliosuna “Danone”, “Ehrman”, “Arla”, “Rolton”, “Hochland”, “KraftHeinz” “Pernod Ricard”, “Diageo”, “Carlsberg”, “Jagermeister”, “Gruppo Campari”, “Brown Forman”, “Bacardi Limited” və s. kimi aparıcı şirkətlər daxildir. 12000-dən çox ticarət nöqtəsinə 1000-dən çox məhsul çeşidinin satışını həyata keçirir. Şirkətin istehsalat sahələrini özündə birləşdirən “Avrora Sənaye Parkı”nda Makaron fabriki, Qənnadı fabriki, Qazlı və qazsız içkilər fabriki, Karbon Dioksid fabriki, Un istehsalı fabriki vardır. Fabriklərdə İsveçrənin “Buhler”, “Franz Haas”, İtaliyanın “İmaforni”, “CFT”, “Fava”, “Ricciarelli”, “Landucci”, Almaniyanın “KRONES” və digər avadanlıqlar quraşdırılmışdır. 2010-cu ildə Bolmart Supermarketlər Şəbəkəsi xalqın xidmətinə verilib.
2014-cü ildə İtalyanın CFT avadanlıqları əsasında qazlı sərinləşdirici içki zavodu fəaliyyətə başlayıb. Zavodda “Bizon” markası ilə qazlı sərinləşdirici içki istehsal olunur. Zavod həmçinin Go, Jaguar və Berg qazlı sərinləşdirici içkilərinin rəsmi istehsalçı partnyorudur.
Göründüyü kimi, enerji içkilərinin istehsalı və satışı Ceyhun Abbasovun təsisçisi olduğu şirkətin fəaliyyətinin yalnız bir, amma həm də vacib istiqamətidir. Əslində bu içkilər də narkotik kimi insanlarda asılılıq yaradır. Belə energetik içkilərdən biri də BİZON-dur. Hətta məşhur reklamı da var: BİZ ONU SEÇDİK. Bu məhsulun Azərbaycanda istehsalçısı “Avrora” MMC tərəfindən istehsal olunan “Bizon Energy”dir. Energetik içkilərin, o cümlədən BİZONUN zərərindən, dünyada qadağan olunmasından çox danışılıb. Amma, sən demə, Ceyhun Abbasovun hər gün yüz minlərə, bəlkə də milyonlara satdığı və üzərində energetik içki ( “ENERGY” və “CHARGE YOUR POWER”) yazdığı BİZON saxta imiş. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən “Avrora” MMC barədə antiinhisar qanunvericiliyinin pozulması əlamətləri üzrə iş qaldırılıb. Bəlli olub ki, alkoqolsuz içkilərin üzərində, “alkoqolsuz” sözlərinin istifadə olunması, istehlakçılarda həmin məhsulun enerji içkisi olması təəssüratının yaradılması, xassələri və keyfiyyəti barədə düzgün olmayan məlumatların verilməsi əlamətləri müəyyən edilib. Yəni iş adamı Ceyhun Abbasov neçə ildir ki, istehlakçıları aldadır – “BİZON” enerji içkisi deyilmiş…
Ekspertlər qeyd edir ki, “Enerji içkilərinə dair müvəqqəti sanitariya normaları və qaydaları”na əsasən, alkoqolsuz içkilərin tərkibində insan orqanizminin mərkəzi sinir sistemini stimullaşdırmaq xüsusiyyətinə və antisedativ təsirə malik olan kofein, taurin, qlükoronolakton, amin turşuları, B qrupu vitaminlər və s. kimi maddələrdən və ya bitki ekstraktlarından ən azı ikisi mövcud olduğu təqdirdə, yaxud həmin maddələrdən yalnız kofein olduqda və miqdarı 15 mq/100 ml-dan artıq olarsa, həmin alkoqolsuz içkilər enerji içkisi hesab edilir. Amma Ceyhun Abbasovun BİZON-u bu qayda və normalara cavab vermir. Ceyhun Abbasov öz müsahibələrinin birində energetik içkilərə aksizlərin tətbiq olunmasını pisləyir, hətta özündən razı bu adam deputatları, dövlət qurumlarını ittiham edir. Onu tanıyanların dediyinə görə, Ceyhun Abbasov hər yerdə “Mən Ordubadlı Ceyhunam….yuxarılarda….hüquq-mühafizə orqanlarında adamlarım var…kimi istəsəm “nakazat” edərəm” deyir….
“Bizon”un yeniyetmə və gənclərə, hamilə qadınlara, süd verən analara, ürək -damar xəstəliyindən əziyyət çəkənlərə, böyrək və qaraciyər xəstələrinə tövsiyə olunmaması C.Abbasovun heç vecinə də deyil. Energetik içkilər qəfil ölümlərə səbəb ola bilir. Bunu mütəxəssislər deyir. Belə ki, bu içkilər insanın istər psixoloji durumuna, istərsə də ürək-damar sisteminə, maddələr mübadiləsinə mənfi təsir göstərir, yuxu, əsəb sistemini pozur. Hətta Milli Məclisdə bütövlükdə energetik içkilərin ölkəmizdə satışı ilə bağlı müəyyən qadağaların tətbiq edilməsinə təşəbbüslər də hələ ki, nəticəsiz qalıb. Halbuki energetik içkilərin istehsalı, satışı, reklam edilməsi bir çox qabaqcıl Avropa ölkələrində (Norveç, Danimarka, Fransa və s.) qanunla qadağan edilib. Qonşu Rusiyada da, nəhayət, prezidentin işə qarışması sayəsində məsələ həllini tapıb. Yəqin, bizdə də gərək mütləq məsələyə Prezident özü şəxsən müdaxilə etsin.