Rusiya XİN başçısı Sergey Lavrovun Qarabağın Azərbaycan ərazisi olması barədə bəyanatı, həmçinin müharibədən öncə rayonların qaytarılması və statusun müəyyənləşməsi haqda ("5+2 rayon" təklifi) Kremlin vaxtilə təkliflər irəli sürməsi, İrəvanın razılaşmaması, 44 günlük müharibədən sonra isə vəziyyətin dəyişdiyini deməsi xüsusilə rusiyayönlü ermənilərdə şok effekti yaradıb.

Teref.az axar.az-a istinadən bildirir ki, erməni müxalif siyasilər və ekspertlər Lavrovun "bu qədər açıq danışmasının səbəbini" müəyyən etməyə çalışırlar.

S.Lavrov eyni zamanda Soçidə Rusiyanın sülh sazişinin imzalanması, Qarabağın "statusu"nun isə "gələcək nəsillərə saxlanması" barədə təkliflə çıxış etməyə hazırlaşdıqlarını da bildirib. Lakin deyib ki, İrəvan Praqa və Vaşinqtonda 1991-ci il Almatı bəyannaməsi ilə Azərbaycanın ərazi bütövlüyünü tanımaqla bu təklifin üstündən xətt çəkmiş oldu. Belə ki, Almatı bəyannaməsi keçmiş DQMV-nin Azərbaycan ərazisi olduğunu təsdiqləyir, öz ərazisindəki muxtar qurumu salayıb-saxlamamaq isə birbaşa Azərbaycanın işidir.

Mövzu ilə bağlı danışan "Ermənistan" blokunun deputatı Geqam Manukyan da bildirib ki, Praqa görüşündən sonra, Soçi görüşündən əvvəl onlar İrəvanın Qarabağı Azərbaycan ərazisi olaraq tanıdığı "narahatlığını" bildirmişdilər:

"İndi, təəssüf ki, bu barədə Rusiyanın xarici işlər naziri də danışır. Bamayaraq ki, mən Lavrovun Almatı bəyannaməsinin Qarabağın Azərbaycanın tərkib hissəsi olduğunu təsdiqlədiyi barədə interpretasiyası ilə razı deyiləm".

O deyib ki, indiyə qədər heç kim Almatı bəyannaməsi ilə Azərbaycanın ərazi bütövlüyünün tanındığını gündəmə gətirməmişdi. Yalnız Paşinyan bunu bildirməklə, əslində Qarabağın Azərbaycan ərazisi olduğunun indi deyil, 31 il öncə tanındığını elan edib.

"Nikol Paşinyan Soçi görüşü öncəsi demişdi ki, Rusiyanın öz təklifini verməsi yaxşı olardı. Təsəvvür edirsinizmi, Ermənistan Qarabağ məsələsini qaldırmır, Paşinyan bütün məsuliyyəti Rusiyanın çiyinlərinə qoyur. Bununla da İrəvan Soçidə Rusiya tərəfini çox pis situasiya ilə üz-üzə qoydu".

Lavrovun bu qədər açıq və sərt danışığına gəlincə, Manukyan deyib ki, Ermənistanda hər şeydə Rusiyanın günahlandırılmasından Moskva artıq bezib.

ABŞ Prezidenti Co Bayden Ukraynadakı münaqişənin genişlənməsinin qarşısını almağa çalışır, ABŞ Rusiya ilə müharibə istəmir.
Teref.az Trend-ə istinadən bildirir ki, bunu ABŞ Dövlət katibi Entoni Blinken “France 2” telekanalında deyib.
“Bayden üçün Ukraynada münaqişənin genişlənməsinin qarşısını almaq lazımdır. Biz münaqişəni tamamlamaq istəyirik, amma heç bir şəkildə onu genişləndirmirik. Biz Rusiya ilə müharibə istəmirik, xüsusən də Üçüncü dünya müharibəsini istəmirik. Səy göstərdiyimiz bu deyil”, – deyə Blinken bildirib.
Eyni zamanda o, ABŞ-ın Kiyev üçün Rusiya ilə danışıqların şərtlərini müəyyən etməyəcəyini, ancaq ukraynalıların qərarını dəstəkləyəcəyini bildirib.
E.Blinken həmçinin qeyd edib ki, ABŞ Rusiya ilə təmasdadır, dialoqun aparılması zəruri olan mühüm mövzular var.
“Məsələn, biz Rusiya ilə əlaqə saxlamağa davam edirik, çünki onun nüvə silahından istifadə edəcəyindən qorxuruq, bu, fəlakət ola bilər”, – deyə E.Blinken vurğulayıb.
Onun sözlərinə görə, ABŞ Rusiyanın bu istiqamətdə fəaliyyətini hələ görməsə də, narahatlıqlar qalmaqdadır.

“ATƏT-in Minsk Qrupunu fransızlar və amerikalılar basdırıb”

Rusiyanın xarici işlər naziri Sergey Lavrov Amerika Birləşmiş Ştatları, Fransa və Avropa İttifaqını Minsk qrupunun “dəfnində” ittiham edərək, onların Rusiya ilə hər hansı formatda əməkdaşlıqdan imtina etdiklərini qeyd edib.

Dekabrın 1-də Avropanın təhlükəsizlik məsələlərinə həsr olunmuş mətbuat konfransında Lavrov bildirib ki, Minsk Qrupunu artıq heç kim xatırlamır.

“Qərb bəyan edib ki, Rusiya ilə heç bir formatda əməkdaşlıq etməyəcək. Bununla da ATƏT-in Minsk Qrupunun artıq fəaliyyətini başa vurduğunu bəyan etdilər. Minsk Qrupu vaxtilə regionda nüfuzu olan, həm İrəvana, həm də Bakıya siqnal göndərə bilən, Rusiya və ABŞ-ın sədrliyi ilə işləməyə razılıq verən ölkələri bir araya gətirmək üçün yaradılıb. Fransa da müəyyən mərhələdə ATƏT-in Minsk qrupunun həmsədri oldu. Həmsədrlər o zamandan bu yana çox faydalı işlər görüblər, onlar Ermənistan və Azərbaycan liderləri ilə həm ayrı-ayrılıqda görüşüblər, həm də birgə tədbirlər keçiriblər”, – Rusiya XİN rəhbəri bildirib.

Lavrov vurğulayıb ki, 2020-ci ildə baş verən 44 günlük müharibədən sonra Rusiyanın vasitəçilik səyləri ilə atəşkəs əldə olunub, Rusiya, Ermənistan və Azərbaycan liderlərinin yüksək səviyyəli görüşləri nəticəsində bir sıra digər razılaşmalar əldə olunub. O, bununla yanaşı əlavə edib ki, “biz digər oyunçuların bu proseslərə qoşulmaq üçün əsəbi cəhdlərinin şahidi olduq”:

“Bizim bununla bağlı heç bir problemimiz yoxdur. İrəvan və Bakı ilə təmaslarımızda qeyd etdiyimiz yeganə şey o oldu ki, Qərb xüsusi hərbi əməliyyata başlayandan sonra Vaşinqton və Parisin dili ilə Rusiya ilə heç bir yerdə, heç bir formatda əməkdaşlıq etməyəcəyini bəyan etdi. Bununla da ATƏT-in Minsk Qrupunun artıq fəaliyyətini başa vurduğunu bəyan etdilər. Ona görə də, erməni tərəfdaşlarımız hərdən Minsk qrupunun adını çəkəndə deyirik ki, bu məsələ bizə ünvanlanmamalıdır. Bu sual ABŞ-a, Fransaya ünvanlanmalıdır, çünki onlar bundan sonra bu qrupu toplamayacaqlarını bəyan ediblər. Və təbii ki, sual Azərbaycana ünvanlanmalıdır, çünki Azərbaycanın iştirakı olmadan hər hansı vasitəçilik səyləri mənasızdır”.

Lavrov qeyd edib ki, Brüsseldə demarkasiya komissiyasının iclası keçirilir, nəzakətli insanlar olan ermənilər və azərbaycanlılar iclasa qatılırlar. Lakin Brüsseldə keçmiş sovet ölkələrinin xəritələri yoxdur, onlar yalnız Rusiya Silahlı Qüvvələrinin Baş Qərargahındadır.

“Sülh müqaviləsi ilə də eynidir. Onlar Avropa Siyasi Birliyi Forumu üçün Praqaya getdilər, burada demarkasiya və sülh sazişinin BMT Nizamnaməsinə və 1991-ci ilin dekabrında qəbul edilən Alma-Ata Bəyannaməsi ilə müəyyən edilmiş sərhədlərə əsaslanmasına dair sənəd imzaladılar. Bütün keçmiş sovet respublikaları Alma-Ata Bəyannaməsi ilə Müstəqil Dövlətlər Birliyini yaratdılar və Sovet İttifaqının müttəfiq respublikaları arasında mövcud olan sərhədlərin toxunulmazlığını təsdiq etdilər. Başqa sözlə, o zaman Dağlıq Qarabağ Muxtar Vilayəti birmənalı olaraq Azərbaycan SSR-in tərkibində idi. Və sənəd çərçivəsində həm Ermənistan, həm Azərbaycan, həm Fransa, həm də cənab Mişel Alma-Ata Bəyannaməsini ilkin şərt olmadan tanıdıqları təsdiqləyəndə, bu, əlbəttə ki, sonrakı işi asanlaşdırdı. Çünki Qarabağın statusunun necə olacağı məsələsi öz həllini tapdı. Əbəs yerə deyil ki, Ermənistan rəhbərliyinin son vaxtlar daha çox statusdan deyil, Qarabağın erməni əhalisinin hüquqlarının təmin olunmasının zəruriliyindən danışır. Azərbaycan tərəfi buna hazırdır, onlar Azərbaycanın digər vətəndaşlarının malik olduğu hüquqlara təminat verməyə hazırdırlar. Minsk qrupunu isə heç kim xatırlamır”, – Lavrov bildirib.

Press Klub

ABŞ Prezidenti Cozef Bayden rusiyalı həmkarı Vladimir Putinlə danışıqları mümkün hesab edir, ancaq o şərtlə ki, o, Ukraynaya qarşı müharibəni dayandırmaq niyyətindədir.

“Report” xəbər verir ki, bu barədə “Politico”nun jurnalisti Eli Stokols tviterdə yazıb.

“Mən Putinlə danışmağa hazıram, əgər həqiqətən də onda maraq varsa - o, müharibəni bitirmək üçün yol axtarır. Hələlik o, bunu etməyib", - ABŞ lideri bildirib.

Bayden onu da əlavə edib ki, onun Putinlə danışıqları yalnız NATO müttəfiqlərinin belə bir təşəbbüsü təsdiqlədiyi halda mümkündür.

Prezident vurğulayıb ki, Rusiya Prezidenti “bütün məqamlar üzrə səhv hesablamalar aparıb” və onun Ukrayna üzərində qələbəsi ilə bağlı fikirlərini “təsəvvür etmək belə mümkün deyil”.

Fransa prezidenti Emmanuel Makronun ABŞ-a 5 günlük rəsmi səfəri başlayıb.
Makronun səfəri dekabrın 3-də bitəcək. Ağır səfər olacaq, çünki Parislə Vaşinqton arasında müxtəlif mövzularla bağlı fikir ayrılıqları var. Parisin Avropanın Amerikadan asılılığını azaltması tələbini illərdir gündəmdə saxlaması da Vaşinqtonun xoşuna gəlmir.
Teref.az yazır ki, bunu politoloq Elxan Şahinoğlu yazır.Daha sonra politoloq fikirlərini şərh edərəkjm yazır:
Azərbaycan prezidenti İlham Əliyevin Ermənistanın baş naziri Nikol Paşinyanla növbəti görüşü dekabrın 7-də Brüsseldə planlaşdırılmışdı. Paşinyan “görüşdə Makron da iştirak etsin” tələbini gündəmə gətirməklə Brüsselin vasitəçiliyinə zərbə vurdu.
Çünki İlham Əliyev Brüsseldəki görüşdə Makronun iştirakının əleyhinədir. Fransalı jurnalistlərdən biri gərək Makronun özündən soruşa ki, ağır Vaşinqton səfərindən dərhal sonra Paşinyanın tələbiylə Brüsselə getməyə hazırdırmı?
Teref.az

Fransa parlamenti palatalarının Azərbaycana qarşı sanksiyaların tətbiqinə çağıran qətnamələri Parisin rəsmi mövqeyini əks etdirmir.

Bunu jurnalistlərə Fransa Xarici İşlər Nazirliyinin nümayəndəsi bildirib.

“Parlamentarilərin bu təşəbbüsü Fransa hökumətinin rəsmi mövqeyi deyil və tamamilə müstəqil şəkildə, hakimiyyət bölgüsü prinsipinə uyğun olaraq qəbul edilib”, - diplomat bəyan edib.

Onun sözlərinə görə, Fransa hökumətinin mövqeyi hamıya məlumdur. O, xarici işlər naziri Ketrin Kolonnanın “Fransa sülhə nail olmaq fürsətindən istifadə etmək üçün tərəfləri danışıqlarda irəliləməyə təşviq etməyə davam edəcək” ifadələrini xatırladıb.

Mənbə: TASS

"Siyasi partiyalar haqqında" yeni qanun layihəsi müzakirəyə çıxarılıb: deputatın biri partiya sədrlərini, biri qanunu tənqid etdi

Milli Məclisin bu gün keçirilən iclasında "Siyasi partiyalar haqqında" yeni qanun layihəsi birinci oxunuşda müzakirəyə çıxarılıb. Layihə barədə Milli Məclis sədrinin müavini, İctimai birliklər və dini qurumlar komitəsinin sədri Fəzail İbrahimli məlumat verib.

Komitə sədri deyib ki, partiyalar haqqında yeni qanun layihəsinin hazırlanmasına ehtiyac var idi: “Ötən qanun layihəsinin qəbul edilməsindən uzun zaman keçir. Qanunun yenilənməsinə ehtiyac hiss olunurdu. Bunun üçün də qanun hazırlandı. Yeni qanun layihəsi beynəlxalq təcrübələrə əsaslanır. Dünyanın 20 qabaqcıl ölkəsinin təcrübəsi öyrənilib, ölkənin siyasi sisteminin və milli xüsusiyyətlərinin, bununla yanaşı, Avropa Şurası Venesiya Komissiyasının siyasi partiyaların fəaliyyətinin tənzimlənməsi haqqında tövsiyələri nəzərə alınıb. Qanun lahiyəsində son variantda 66 dəyişiklik edilib”.

Birinci vitse-spiker: “Yalnız bir nəfər qanun layihəsinin əleyhinə səs verib”

“Bizim komitənin “Siyasi partiyalar haqqında” qanun layihəsi ilə bağlı fikirləri müsbətdir. Yalnız bir nəfər qanun layihəsinin əleyhinə səs verib. Bu gün qanun layihəsini konseptual baxımdan müzakirə edirik. Normativ hüquq aktlar haqqında konstitusiya qanunundan sonra “Siyasi partiyalar haqqında” qanuna baxılması zərurəti yaranmışdı”. Bu sözləri isə Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli deyib.

Vitse-spiker qanunun qəbulunda ikinci zərurət kimi bu illər ərzində bir sıra Avropa və postsovet ölkələrində “Siyasi partiyalar haqqında” qanunların dəyişməsini, müasirləşdirilməsini göstərib.

“Qanun hazırlanarkən Avropa Şurası Venesiya Komissiyasının həmin ölkələrə verdiyi tövsiyələr öyrənilib: “Qanunu qəbul etməkdə bir məqsəd də qabaqcıl təcrübələri bizim də qanunvericiliyə gətirməkdir. Aydındır ki, birləşmək hüququna və azadlığına təminat verilməlidir. Qanun bu təminatı verir. Xüsusilə, vurğulayım ki, 3.2 maddəsi Avropa İnsan Haqları Konvensiyasının tələbini ehtiva edir”, - deyə Ə.Hüseynli söyləyib.

Birinci vitse-spiker qeyd edib ki, qanun layihəsi ictimai müzakirədən keçib: “Bu müzakirələrdə komitə üzvü olmayan deputatlar da iştirak ediblər. Əminəm ki, qanun qəbul ediləcək”.

“Qanunla bağlı bütün müddəalar beynəlxalq standartlara cavab verir”

Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov da bildirib ki, "Siyasi partiyalar haqqında" qanun layihəsinin yenidən tərtib olunması vacib idi: “İlk qanun layihəsi 1993-cü ildə qəbul olunub. 30 ildən artıq zamanda bu qanuna təkcə 70 dəyişiklik edilib, amma müzakirələr zamanı 66 dəyişiklik olunub. Bu isə təbii ki, göstərilən diqqətin nəticəsidir”.

“Eyni zamanda, “Siyasi partiyalar haqqında” qanunun bütün müddəaları Milli Məclisin saytında qeyd olunur. Müddəalardan da görünür ki, qanunla bağlı bütün müddəalar beynəlxalq standartlara cavab verir”, - Z.Əsgərov əlavə edib.

Deputat: “Elə partiya sədri var ki, həyat yoldaşı onun hansı partiyanın sədri olduğunu bilmir”

Müzakirələr zamanı Demokratik Maarifçilik Partiyasının rəhbəri, deputat Elşən Musayev partiyalar haqqında maraqlı fikirlər səsləndirib.

Millət vəkili bəzi partiyaların fəaliyyətinə irad bildirərək qeyd edib ki, cibində beş partiyanın vəsiqəsini daşıyan adamlar tanıyır: “Elə partiya sədri var ki, təşkilatının möhürünü hara qoyduğunu bilmir. Adamlar tanıyıram ki, cibində 5 partiyanın vəsiqəsini daşıyır. Elə partiya sədri var ki, həyat yoldaşı onun hansı partiyanın sədri olduğunu bilmir. Bunlar gülməlidir, amma reallıqdır”.

“Hər kəs partiya yaradır. Baxırsan partiya qurub, amma öz tanışları, dostları onu ciddiyə almır. Belə qeyri-ciddiyyət olmaz. Partiyalar var ki, adındakı hərflərin sayı üzvlərinin sayından çoxdur. On agörə də reyestr məsələsinin olması vacibdir. Adama deyərlər, partiya ciddi məsələdir, bunun üçün tərəfdarların olmalıdır. Partiya ciddiliyini anlamırsansa, üzv toplaya bilmirsənsə, bir az adam yığ futbol komandası yarat”, - deyə deputat irad səsləndirib.

“Xalqın adından çıxış etməyim?”

Böyük Quruluş Partiyasının başqanı, deputat Fazil Mustafa müzakirə zamanı qeyd edib ki, "Siyasi partiyalar haqqında" qanun layihəsi yeganə qanundur ki, hazırlıq müddətində bu qədər dəyişikliklər edilib: “Ümumiyyətlə, heç bir qanun mükəmməl deyil. Zamanın tələbinə uyğun olaraq, müəyyən dəyişikliklər edilir, bundan sonra da olacaq. Qanunda müəyyən məhdudiyyətlər var ki, onları qeyd etmək lazımdır. Məsələn, qeyd olunur ki, xalqın adından danışmaq olmaz. Bu müddəa düzgün deyil. Necə yəni, xalqın adından danışmaq olmaz? Bu gün mən deyirəm ki, Fransa Senatının Azərbaycan haqqında çıxışlarını lənətləyirəm. Bu, xalqın adından danışılan məsələdir. İndi bunu deməyim? Xalqın adından çıxış etməyim? Bu müddəada uyğunsuzluqlar var. Hesab edirəm ki, bu kimi məsələlər nəzərə alınmalıdır”.

Müzakirələrdən sonra qanun layihəsi birinci oxunuşda qəbul edilib.

Müəllif: Anar Bayramoğlu

Cənubi Qafqazda regionunda Ermənistanın sülh danışıqlarından boyun qaçırmasından fərqli olaraq Azərbaycan Ermənistanla olan münasibətləri normallaşdırmağa çalışır və bu istiqamətdə fəal şəkildə diplomatik addımlar atır. Azərbaycana dost və qardaş olan ölkələr, bu məsələdə Azərbaycanın haqlı mövqeyini dəstəkləyirlər. Bu baxımdan misal olaraq, müharibə zamanı işğal altında olan torpaqların azad olunmasında Azərbaycana böyük köməyi və mənəvi dəstəyi olmuş Türkiyəni, eləcə də Pakistanı göstərmək olar.
Qeyd etmək lazmdır ki, bu gün Gürcüstan da Azərbaycanın haqlı mövqeyini dəstəkləyir və Cənubi Qafqazda sülhün və təhlükəsizliyin vacibliyini vurğulayır. Bu baxımdan Gürcüstanın Strateji və Beynəlxalq Araşdırmalar Fondunun prezidenti Yekaterina Metreveli “Report” informasiya agentliyinə verdiyi açıqlaması zamanı fikrini bu şəkildə ifadə edib: “Azərbaycan Gürcüstanın etibarlı tərəfdaşıdır. Orta Dəhliz çərçivəsində sıx əməkdaşlıq həm Azərbaycan, həm də Gürcüstan üçün faydalıdır”. Y.Metrevelinin belə bir qənaəti Gürcüstanla Azərbaycanın arasında fəal əməkdaşlığın olmasını bir daha təsdiq edir. Bundan əlavə, Y.Metreveli, Azərbaycanla Ermənistanın münasibətlərinin tez bir vaxtda normallaşmasına ümidvar olduğunu bildirib: “Sülh və təhlükəsiz regiona alternativ yoxdur. Biz hər birimiz bunda maraqlıyıq. Ümid edirəm ki, tezliklə danışıqlar həm Azərbaycan, həm də Ermənistan üçün məqbul olan sülh müqaviləsinin imzalanması ilə uğurla başa çatacaq” [1].
Qeyd etmək lazımdır ki, türk dövlətlərinin əməkdaşlığı Orta Dəhliz layihəsinə öz töhfəsini verəcəkdir. Ali Baş Komandan, Prezident İlham Əliyevin də qeyd etdiyi kimi, coğrafiyaya nəzər saldıqda Özbəkistan, Türkmənistan, Qazaxıstan, Qırğızıstan və Xəzər dənizinin bu sahilində Azərbaycan, Gürcüstan və Türkiyənin olması əlavə imkanlar yaradır [2]. Bu gün şərq-qərb dəhlizinin istifadəyə verilməsi yeni nəqliyyat imkanlarına, beynəlxalq yükdaşımaların genişlənməsinə şərait yarada bilər. Ermənistanın təxribat xarakterli fəaliyyəti, qeyri-sabit mövqeyi və geosiyasi nizamının olmaması sülh prosesini və qarşılıqlı əməkdaşlığı ləngidən başlıca amildir. Reallıq ondan ibarətdir ki, Ermənistan Cənubi Qafqazda heç bir üstünlüyə malik deyildir. Dalandan çıxa bilməyən Ermənistandan hər hansı nəqliyyat yolunun keçməməsi, Ermənistanın daxilində hələ də köhnəlik qalığı hesab olunan nəqliyyat şəbəkələrinin olmasını təsdiq edir. Ermənistanın yenidən Qarabağla əlaqədar danışıqlar aparmaq cəhdi də heç bir nəticə verməyəcək. Ali Baş Komandan, Prezident İlham Əliyevin də qeyd etdiyi kimi, Qarabağ münaqişəsi həll olunub, bu bizim ərazimizdir, hamı tərəfindən tanınır və bizim daxili işimizdir [2]. Qeyd edək ki, Ermənistanın köhnə taktikası artıq ona fayda vermir, belə bir halda isə onun üçün tək çıxış yolu sülh müqaviləsini imzalamaqdır.
Qeyd edək ki, noyabrın 23-də İrəvanda Kollektiv Təhlükəsizlik Müqaviləsi Təşkilatının sammiti öz işini yekunlaşdırıb. Ermənistanın Baş naziri Nikol Paşinyan həmin iclasda “Ermənistana yardım göstərmək haqqında” sənədləri imzalamağa hazır olmadığını qeyd edib. N.Paşinyan, İrəvanın sözügedən təşkilatdan “Ermənistan ərazilərinin işğalına siyasi qiymət verilməsini” gözlədiyini, lakin bunun səslənmədiyini bildirib [3]. N.Paşinyan çıxışı zamanı Azərbaycanı təcavüzkar kimi qələmə verməyə cəhd edərək, Azərbaycanın ünvanına əsassız iddialar səsləndirib. N.Paşinyan həmçinin, “Azərbaycanın Ermənistana qarşı təcavüzü”nə dair heç bir qərarın qəbul olunmasına nail ola bilmədiyini etiraf edib. Görünən reallıq ondan ibarətdir ki, N.Paşinyanın Azərbaycana qarşı təxribat xarakterli fəaliyyətlərinə, əsassız ittihamlarına baxmayaraq, bu gün onun Azərbaycana qarşı həyata keçirməyə çalışdığı məkrli niyyəti rəsmi sənədlərdə öz əksini tapmır, rəsmiləşdirilmir. Ermənistanın havadarları istisna olmaqla beynəlxalq ictimaiyyət Azərbaycanın haqlı mövqeyini dəstəkləməyə davam edir.
Onu da qeyd edək ki, Frankofoniya təşkilatına üzv olan Ermənistanın Azərbaycana qarşı planlaşdırılmış təxribatına havadarlıq edən məhz Fransadır. Məlum məsələdir ki, sözügedən təşkilatdan sui-istifadə edən erməni təxribatçıları öz mənafeləri naminə Azərbaycanın əleyhinə fəaliyyət göstərərək anti-Azərbaycan tezislərini dövriyyəyə buraxırlar. Lakin bu cür tezislər dezinformasiya xarakterli olduğuna görə heç bir yerdə öz təsdiqini tapmır, qəbul olunmur. Azərbaycanın bu gün beynəlxalq təşkilatlardakı nüfuzu, eləcə də Ulu Öndər Heydər Əliyevin siyasi kursunun layiqli davamçısı, Ali Baş Komandan, Prezident İlham Əliyevin beynəlxalq müstəvidə yeritdiyi müdrik siyasət təqdirə layiq hesab olunur və yüksək səviyyədə qiymətləndirilir. Bu baxımdan, Azərbaycanın xarici siyasət konsepsiyasında, qonşu ölkələrlə münasibətlərində dostluq və əməkdaşlıq prinisiplərinə üstünlük verməsi Azərbaycana belnəlxalq arenada böyük hörmət qazandırmışdır.

İstifadə olunmuş mənbələr:
1. Метревели: Сотрудничество в рамках Среднего коридора выгодно и Азербайджану, и Грузии /25.11.2022/ https://report.az/ru/vneshnyaya-politika/metreveli-sotrudnichestvo-v-ramkah-srednego-koridora-vygodno-i-azerbajdzhanu-i-gruzii/
2. Bakıda “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfrans keçirilib. Prezident İlham Əliyev konfransda iştirak edib /25.11.2022/ https://azertag.az/xeber/Bakida_Orta_Dehliz_boyunca_geosiyaset_tehlukesizlik_ve_iqtisadiyyat_movzusunda_beynelxalq_konfrans_kechirilib__Prezident_Ilham_Aliyev_konfransda_istirak_edib__YENILANIB_6_VIDEO-2385289
3. Paşinyan KTMT-nin "Ermənistana yardımla bağlı" sənədini imzalamayıb /23.11.2022/ https://www.bbc.com/azeri/region-63730511
Kamal Salayev
AMEA-nın Qafqazşünaslıq İnstitutunun
Gürcüstanşünaslıq şöbəsinin kiçik elmi işçisi
Teref.az